1. Wopo wɔkɔnge ewaso ente olemo wɔ nkfumba ambeki wolekɔ olemo w’owikɛ nsɛnɔ y’anto?

OLEMO wɔ ndjekɛ anto ambeki alekɔ olemo w’owikɛ nsɛnɔ y’anto! Wopo wɔkɔnge wewaso n’kambo djɛsɔ? Wina wɔ Yeso ndapɛyɛ ɔlɛmbɛ wolekɔ lá Mateo 28:19, 20, nde atepelaka ante: ‘Nyotshu, . . . nyokfumbe ambeki . . . , nyabatize.’ Lamo oyɛwɔ djonyi ndongola batisimo? Iso ladjɛ ndongola batisimo ntsha tɔkɔpa mba lowiko l’itshinda. Onto wɔkɔpa ndongola batisimo ladjɛ ndjawola ante, nde nkoka mba lowiko l’itshinda ngo ladjikɛnde Yeso avɔka lá n’kambo djɛso edjinge akfundɔka. Djɛkondeke ɔpɔstɔlɔ Pɛtɛlɔ ndashimela winande Akristo ante: ‘Batisimo kenyowikɛ . . . mpeyi m’ekfundwelo kɛ Yeso Kristo.’ (1 Pɛ. 3:21) Lasɔ wina w’ombeki ɔsande batisimo, nde nkoka nkongela lowiko l’itshinda.

2. Kɛkɔnge kɛ 2 Timɔte 4:1, 2 otepelande lá wopo wɔ wetsha woyɛso ladjɛ ndjala?

² Djɛ nangha olemo wɔ nkfumba ambeki, ngo iso ndjala ‘la balo djɛ ndakanyɛ.’ (Wala 2 Timɔte 4:1, 2.) Ladjikɛnge? Yeso atoshimelaka ante: ‘Nyotshu, . . . nyokfumbe ambeki . . . , nyalakanyɛ.’ Ɔpɔsstɔlɔ Poolo atepelaka djɛ ‘nkidjɛ’ l’olemo wɔkɔ, ‘má nangha nghɔsɔ ongoyawikɛ nghɔmɛlɛ endjinge ongowikɛ waakekameyɛ.’ Lá elonga kɛ wɔlɔ kɛsɔ, ndeke Poolo ndatepela ante: ‘Ilaká yimba lá . . . olakanyelo wɔko.’ (1 Ti. 4:16) Ladjikɛnde djɛ nkfumba ambeki ngo ndjewa ndakanyɛ, iso nkɔpaka ndɔngɔsɔla yopo yɛso yɛ ndakanyɛ.

3. Kɛkɔnge kɔkɔpaso nyɛna lá djamba djɛnɛ lá kɛnɛ kelendana la ndɔndjɛ wekelo wɔ Bible?

³ L’andja w’otondo tɔlɔndjɛ wa miliyɔ yɛ wekelo wɛ Bible wina  tshɛ. Koko, etengo isɛnyi lá djamba djehetisa, iso nkɔpaka ndjewa wopo wokokaso nkotshɛ efula kɛ l’anteyi kɛwɔ dj’iwɔ ndjala ambeki wa Yeso Kristo wambolongola batisimo. Lá djamba djɛnɛ, tɔngɛna akambo atano wa wetsha enkfumɔ oyɛwɔ ladjɛ nanga djɛ nkotshɛ ombeki djɛ nfula tii ta batisimo.

4. Ladjikɛnge wetsha oyɛnde ladjɛ ndaakota dj’ipa ntepela efula wina wɔlɔndjɛnde wekelo wɔ Bible? (Lenda edjinge notɛ.)

⁴ Iso nkɔpaka kɛnɛ kolakanyɛso má Otepela wɔ Ndjambe. Lasɔ iso ntshindamaka wina ɛmɔtshi djɛ ntepela efula lá kɛnɛ kɔkɔpaso. Koko, ntsha tɔlɔndjɛ wekelo w’Etange k’Olami, wekelo wɔ Bible wel’otshumano kana wekelo wɔ Bible wɔ l’ombeki, ilɔndjɛ apakoke ntepela efula. Wetsha onkfumɔ wɔkɔpa nkamba la Bible wɔlɔ wina wolakanyɛnde, ladjɛ mbadjɛ dj’ipa ntepela efula edjinge mpona djɛ nsakisola n’kambo nkfumɔ djewande lá vɛrse djɛ Bible kana djelá djamba. * (Dj. 16:12) K’ɛɛdjɛ kɛnɛ kingewaká má Bible wina wingakɔpɛ ndongola batisimo la kɛnɛ k’ewɛ win’ɔsɔ. Lá wina wɔkɔ, wɛ okaki ngo elakanyelo wɛ ntondo wɛ djonyi. (Heb. 6:1) Alɔmbamaka ɛnɔnyi efula djɛ wɛ ndjeka akambo wa ngombewa lɔɔko kɛnɛ, djɛko ndeke tohonake ndakanyɛ ombeki wɔ bango akambo tshɛ mbala kɛkɔ kɛmɔ.

5. a) Lá nkilika 1 Tesalɔnikɛ 2:13, kɛkɔnge k’ɔkɔpaso djɛ ombeki wɔso ndjoka má wekelo wɔnde? b) Wopo wɔkɔnge okokaso nkeketshɛ ambeki dj’iwɔ ntepela lá kɛnɛ kelendana l’akambo wekawɔ?

⁵ Iso nkɔpaka djɛ ambeki waso ndjoka kɛnɛ k’ekawɔ má Otepela wɔ Ndjambe. (Wala 1 Tesalɔnikɛ 2:13.) Wopo wɔkɔnge wokokaso nangha n’kambo n’tshɔ? Keketshɛ ombeki djɛnde ntepela lá kɛnɛ kelendana l’akambo wekande. Lá wopo wɔ wɛ ndolembetsheyɛ avɛrse ankfumɔ welá Bible, lɔmbande djɛnde nkolembetsheyɛ avɛrse amɔtshi. Kotshɛ ombeki djɛnde nyɛna wopo wɔ Otepela wɔ Ndjambe olendanawɔ lande. Opolande weepó wengokotshɛ djɛnde ntepela ikanyi yɛnde la kɛnɛ kelendana l’avɛrse w’owalande. (Luka 10:25-28) Ndjɔmbɔmba, opolande: “Wopo wɔkɔnge vɛrse djɛnɛ okokotshɛnde djɛ nyɛna djekeka mɔtshi djɛ Yehova?” “Wopo wɔkɔnge vɛrse djɛ ngombowala má Bible okokawɔ nkokotshɛ?” “Wopo wɔkɔnge oyawokɛ lá kɛnɛ kɛngombowala?” (Woo. 20:5) Ape kɛnɛ kɛ ombeki ewande ndeke loleka djonyi, koko wopo wɔ ombeki ɔkɔpande edjinge okambande la kɛnɛ kewande.

6. Ladjikɛnge alekɔ wɔlɔ iso ntshɔka l’ansakodji walekɔ la balo djɛ ndakanyɛ djɛ nteká l’ombeki wɔ Bible?

⁶ Wina w’ekɛ l’onto ɔmɔtshi Bible, ongotshɔke l’ansakodji yelekɔ la balo djɛ ndakanyɛ djɛ teeka lande? Ntsha ongotshɔke nyawɔ,  wɛ nkoka ndawopola kɛnɛ kiyɛnaki lá wopo wɔngɔlɔndjɛki wekelo wɔ Bible edjinge ntsha wɛ ombokambaka la Bible wɔlɔ. Wɛ ladjɛ ndjala l’okitshakitshɛ ntsha wɛ nkɔpaka ndjala wetsha wɔ wɔlɔ. (Ɛdjɛ lá Elemo 18:24-26.) Masɔ, opola ansakodji yelekɔ la balo djɛ ndakanyɛ, ntsha wakanela ambɔ ombeki oka akambo w’ekande wɔlɔ. Wɛ nkoka ndjopola lonkina ansakodji yɛkɔ dj’iwɔ nteká l’ombeki ntsha wɛ opalekɔ entshupa lá lobengo lɔmɔ kana mbengo efula. Nghɔsɔ ndeke wekelo iyongonanghemaka wina onkfumɔ edjinge iyɔngɔkɔkɔmɛ le ombeki djonyi djɛ wekeko wɔnde. Toyalake l’ikanyi y’ente ombeki nde “wɔko,” onto onkina apakoke ndjeka lande. Koko, wɛ nkɔpaka kɛnɛ kelekɔ wɔlɔ le ombeki, djɛnde nkindjɛ ndjeka akambo wa nsɔsɔlɔ.

7. Kɛkɔnge kengokotshɛ ombeki djɛ nkɔpa akambo wekande?

⁷ Ombeki alekɔ la djonyi djɛ nyɛna osasalo wɔko edjinge ndjoka eshikikelo kelekɔ lawɛ l’akambo wa nsɔsɔlɔ wima Bible. (1 Te. 1:5) Nghɔsɔ ndeke edjinge nde ndongoyala l’osasalo l’akambo wekande. Ntsha mbamba kelekɔ, shimelande wopo wɔ Bible ndakokotshɛ la lowiko lɔɔko. Nde angɛna ante Bible alekɔ l’alako wa wɔlɔ wakoka ndokotshɛ edjinge nde.

8. Kɛkɔnge k’okokɛ nangha lonkina djɛ nkotshɛ ombeki wɔko wɔ Bible, ko oyɛ ladjɛ nangha nghɔsɔ la mo?

⁸ Wina w’ekanyo Bible, shimela ombeki wɔko ndjɔmbɔmba yɛ wananyɔ la wankaana yepomanisa l’ekakasano etengo wɛnde, ko walekanaka. Wɛ nkoka ndjakala onto ɔmɔtshi wɔ l’otshumano wolekɔ la ndjɔmbamba kɛ wɔlɔ wokoka nkotshɛ ombeki, djɛ nde ndjeka lanyu. Kana wɛ nkoka ndɔsa ndjɔmbɔmba imɔtshi yekeketshɛ lá jw.org lá wamba walekɔ l’ɛtɛ wɛ wayi ambɔ: “Bible ntshikitanyɛka nsɛnɔ y’anto.” * Wamba edjinge tovideo tɔ nghɔsɔ nkoka nkotshɛ ombeki wɔko djɛ nyɛna ante, nkamba la tɔkfɔ tɔ Bible lá lowiko lɔnde alekɔ n’kambo djɛ balo.

9. Wopo wɔkɔnge w’okokɛ nkeketshɛ ombeki djɛnde nshimela ase nkfumbo kɛnde la ntombe yɛnde akambo wekande?

⁹ Ntsha ombeki ambotshuka, ebula kɛnde angekake? Ntsha lako, eta ebula kɛnde djɛnde nsanghanaka lanyo lá wekelo. Keketshɛ ombeki wɔko djɛnde nshimelaka ase nkfumbo kɛnde la ntombe yɛnde akambo wekande. (Dj. 1:40-45) Ngete mo? Wɛ nkoka ndowopola ente:  “Wopo wɔkɔnge okokɛ ndembetshiyɛ ase nkfumbo kɛko olakanyelo wɔnɛ?” kana “Vɛrse djɛkɔnge dj’okokɛ nkamba la djɛkɔ djɛ ilongo yɛko ndjawola olakanyelo wɔnɛ?” Lá nanghaka nghɔsɔ, ongokfumba ombeki wɔko djɛ ndjala wetsha. Ko, ntsha nde ambokamba l’akambo w’ekande, nde nkoka ntateyɛ la mpoposanyɛ etengo nsakodji ketalongola batisimo. Wɛ nkoka ndjopola ombeki ntshande ndjewaka onto ɔmɔtshi wɔkɔpa ndjeka Bible. Ntsha nde ndjewaka onto, sawola l’onto wɔkɔ la wopo wɔ wɔlɔ, edjinge pɛyɛnde djɛnde ndjekaka nyande. Ɛnyɛnde ivideo Wekelo we Bible oyalakawɔ mo? *

10. Etengo otepelamawɔ lá 1 Tesalɔnikɛ 2:7, 8, wopo wɔkɔnge wetsha okokande ndjokola ndjɔmbɔmba kɛ Poolo?

¹⁰ Wetsha ladjɛ ndjilaka ambeki wande yimba. Ɔsawɔ etengo wanɛ wangoyɛ ndoyala wananyɔ la wankaana yɛko yelá nyuma. (Wala 1 Tesalɔnikɛ 2:7, 8.) Apalekɔ wɔdju le wɔ djɛ ntshika tolongo tɔwɔ tel’andja wanɛ edjinge nangha tshɛ kelekɔ djonyi lewɔ dj’iwɔ nangha etshikitano djɛ nkambela Yehova. Iso ladjɛ ndakotshɛ dj’iwɔ mba tolongo l’otshumano. Yala ilongo yɛ ntondo yɛ ombeki wɔko lá ndɔsaka wina djɛ nsawolaka nyande apengo lá wina w’ekanyu koko edjinge lá wina enkina. Ndoweta lá telefɔnɛ, ndofunela mesajɛ, kana ndowembola wina enkina wipa wɔ ndjeka, nyɛnyɛka djɛ wɛ ndowilaka yimba nsɔsɔlɔ.

11. Kɛkɔnge k’ɔkɔpaso djɛ ambeki waso mba l’otshumano, ko ladjikɛnge?

¹¹ Djongo mɔtshi ntepelaka ante: “Wɔna la n’kfundu nde w’onto ɔmɔ, koko ntsha amboposa ambokoma w’anto ankfumɔ.” Iso nkoka ntepela ente: “Djɛ nkfumba ombeki ngo otshumano w’otondo ndjila lɔwɔ.” Djɛkondeke wetsha wɔ wɔlɔ wɔ Bible nkotshɛka ombeki djɛnde ndjewana l’anto ankina wa l’otshumano wakoka ndokotshɛ djɛnde ndjala entshupa nya Yehova. Nghɔsɔ ndeke ambeki okokawɔ ndjala ntombe yɛ wɔlɔ l’ekambi wɛ Ndjambe, wakoka ndakotshɛ djɛ ndjala tolongo tɔ Yehova la ndakeketshɛ wina w’opomanawɔ l’ekakasano. Iso nkɔpaka djɛ ombeki onkfumɔ ndaawoka djɛnde ɔs’opiko l’otshumano edjinge nde alekɔ l’eteyi kɛ nkfumbo kɛso kelá nyuma. Iso nkɔpaka djɛ ambeki ankfumɔ nsepama la ngandji kɛso k’Akristo k’onto la wɔnanyɛnghɛnde. Nghɔsɔ ndeke iyongoyala wɔdju lewɔ djɛ ndjopa losambi lɔwɔ l’anto wapakoke ndaakotshɛ djɛ nkɔpa Yehova. (Woo. 13:20) Ntsha ntombe yɛwɔ yɛ ntondo wambatona, iwɔ ndjewaka ambɔ iwɔ nkoka mba tolongo tɔ nsɔsɔlɔ l’olonghanyelo wɔ Yehova.​—Mar. 10:29, 30; 1 Pɛ. 4:4.

12. Ladjikɛnge oyɛso ladjɛ nshimelaka ombeki wɔso n’kambo djelendana la ndalambola la ndɔsa batisimo?

¹² Kɔkɔmɛnde lamo oyɛwɔ djonyi djɛ ndalambola edjinge ndɔsa batisimo. Elonga k’ekaso l’anto nde, ndaakotshɛ djɛ nkambela Yehova edjinge ndɔsa batisimo. M’ɔmɔkɔngɔ wɔ ombeki ndjeka Bible lá ngɔndɔ imangha toko, pekapeka m’ɔkɔngɔ wɔ nde ntateyɛ ndjingela nsanghanyɛ, ombeki ladjɛ ndjoka ante okoma w’owekɛso Bible nde, ndokotshɛ djɛnde nkoma Owakɛ Wɔ Yehova.

13. Akambo wakɔnge ombeki oyɛnde ladjɛ nangha djɛ nde nfula tii ta batisimo?

¹³ Akambo amɔtshi wa djonyi walekɔ w’ombeki wɔ Bible wɔkɔpa ndɔsa batisimo okokande nangha! Ntondontondo, ombeki ladjɛ ndjewa la nkɔpa Yehova edjinge ndjala la djawo te Nde. (Dj. 3:16; 17:3) Nde angoyala ilongo nya Yehova edjinge nya wananyɔ la wankaana yel’otshumano. (Heb. 10:24, 25; Dja. 4:8) M’asɔ, ombeki ladjɛ ntona n’kfumbo djɛ nyɛtshi edjinge ndaapɛla m’evunga wɛnde. (Ele. 3:19) Lonkina, nde ladjɛ nshimela anto ankina kɛnɛ kɛ ndombotateyɛ ndjawola. (2 Kɔ. 4:13) Lasɔ nde angoyalambola nyɔmɛlɛ te Yehova la, ndɔsa batisimo. (1 Pɛ. 3:21; 4:2) Ɔsɔngo lofu lɔsɔ iyongoyala lofu l’osasa le onto onkfumɔ! Wina w’ombeki ndotakotshɛ n’kambo mɔ mɔ, wandolande l’oloko ɔmɔ edjinge keketshɛnde djɛnde nkidjɛ nfula lá mboka kɛ wɔlɔ.

14. Wopo wɔkɔnge wetsha oshishimakande wopo w’ombeki ndotafule?

¹⁴ Iso ladjɛ ndjala la baletshitshi wina wokotshɛso ombeki djɛnde nkotshɛ kɛnɛ kɛlɔmbama djɛ ndongola batisimo. Koko, lonkina iso ladjɛ mpona djɛ ndjewa ntsha nde alekɔ la mposɛ kɛ nkambela Yehova Ndjambe. Ɔngɛnake tolembetelo tɔmɔtshi tɛnyɛ ente ombeki wɔko mponaka djɛ nɛmɛyɛ ɛlɛmbɛ wɛ Yeso? Kana ɔkɔpande ngo ndjewa akambo welá Bible toko?

15. tolembetelo tɔkɔnge wetsha oyɛnde ladjɛ mpona le ombeki?

¹⁵ Shishimaka mbala la mbala wopo w’ombeki wɔko ndotafule. Ndjɔmbɔmba, nde angotepelake wopo woyawokande la n’kambo djɛ Yehova? Angɔlɔmbake Yehova? (Yee. 116:1, 2) Angɔkɔpake ntanga Bible? (Yee. 119:97) Angingelake nsanghanyɛ mbala la mbala? (Yee. 22:22) Ambɛnyɛ etshikitano wɛ wɔlɔ lá nanghedji djɛnde? (Yee. 119:112) Angosawolake nya ase  nkfumbo kɛnde edjinge nya tolongo tɔnde akambo wekande? (Yee. 9:1) N’kambo djeleka djonyi nde, angɔkɔpake ndjala Owakɛ wɔ Yehova? (Yee. 40:8) Ntsha ombeki apɛnyisa efulelo lá wayi wanɛ, hona la n’kɔmɛ djɛ ndjewa ladjikɛnge, ko sawola nyape la ngandji, koko nyoshimelane akambo papo papoo. *

16. Lambamba kɛkɔnge k’okokaso nyemɛ wekelo wɔso wɔ Bible l’ombeki?

¹⁶ Yawopolaka mbala la mbala ntsha wɛ nkoka nkindjɛ ndjeka ny’onto ɔmɔtshi. Yawopola ente: ‘Ombeki wɔnɛ apalɔngɔsɔlaka wekelo? Apakɔpaka ntshɔ tá nsanghanyɛ? Angokindjɛke la n’kfumbo djɛnde djɛ nyɛtshi? Angɔsake opiko lá n’kɛlɛsiya dj’engolo?’ Ntsha nsakiso lá weepó wɛsɔ nde Ɛɛ, nkindjɛ ndjeka nyande angoyala etengo mpona djɛ ndjekɛ onto ɔmɔtshi djɔkɔ! Ntsha ombeki apakɔpɛ nsɔsɔlɔ akambo wekande edjinge apakɔpɛ nangha etshikitano, ladjikɛnge nkidjɛ ndjeka lande?

17. Lá nkilika 1 Timɔte 4:16, kɛkɔnge kɛ wetsha enkfumo wɛ Bible oyɛwɔ ladjɛ nangha?

¹⁷ Iso ndɔsaka odjito wɔso wɔ nkfumba ambeki l’odjito, edjinge iso nkɔpaka nkotshɛ ambeki waso wa Bible dj’iwɔ nfula tii tá batisimo. Djɛkondeke tongotshikelaka Bible nyɔmɛlɛ ndakanyɛ edjinge tongolakanyɛka l’osasalo edjinge l’eshikikelo. Tongokeketshɛka ombeki djɛnde mpona tolongo l’otshumano. Edjinge tɔngɔkɔkɔmɛke okoma wɔ ndalambola la ndɔsa batisimo, tongoshishimake mbala la mbala wopo w’ombeki ndotafule. (Lenda ipapango: “ Kɛnɛ kɛ wetsha oyɛwɔ ladjɛ nangha djɛ nkotshɛ ambeki dj’iwɔ nfula tii tá batisimo.”) Tolekɔ l’osasa wɔ ndɔsa opiko l’olemo wowikɛ nsɛnɔ y’anto! Iso nkopaka nangha tshɛ k’okokaso nangha djɛ nkotshɛ ambeki wa Bible djɛ nfula tii tá batisimo.