MWISAMBO WA KULONGA 42
Mushindo wa kulonga Bible na bantu mpa na ku lubatshisho—Kipindji kya 2
“Dimuka p’abikutale obe nabeene na bulambukishi bwobe.”—1 TIM. 4:16.
LOONO 77 Etaata mu nsenga i mmufito
KYABAKWILA MWANKA *
1. Atuuku naminyi’shi mudimo wa kwikasha bantu bu balongi, nyi mudimo aupasha myuwa?
MUDIMO wa kwikasha bantu bu balongi, nyi mudimo aupasha myuwa! Atwibyuku naminyi? Atwibyuku nsaa ibaadi Yesu mutume eyi di mu Mateo 28:19, 20, adyamba’shi: “Ndaayi, . . . nwibeekashe buu balondji . . . nwi babatshishe.” Atuuku naminyi’shi kubatshishibwa kwi na muulo? Abitungu tubatshishibwe su atukumiina kupashibwa. Muntu akyebe kubatshishibwa abitungu ashikamishe’shi lufu na lusangukilo lwa Yesu, nyi alwitukwasha bwa kupeta muwa wa ikalayika. Nyi kibaadi mpa na Mpyeele mutumiibwa mulungule bena Kidishitu’shi: “Lubatshisho alwinupaasha [binobino] pa mwanda wa lusangukilo lwa Yesu Kidishitu.” (1 Mp. 3:21) Byabya, nsaa ayibatshishibwa muntu, mulombene kukulupila muwa wa loso.
2. Muyile 2 Timote 4:1, 2, abitungu twikale balongyeshi be naminyi?
2 Bwa kwikasha bantu bu balongi, abitungu twikale balongyeshi be buwa. (Badika 2 Timote 4:1, 2.) Bwakinyi? Mwanda Yesu etulungula’shi: “Ndaayi, . . . nwibeekashe buu balondji, . . . nwibalambukishe.” Mpoolo mutumiibwa amba’shi, “nyingiila” mu wawa mudimo, mwanda “pa kukita byaabya biinyibiinyi, ngi pokepasha obe nabeene mpaa naa bano abakuteemesha.” Baadi dingi na kabingilo kakwamba’shi: ‘Dimuka p’abitale . . . bulanbukishi bwobe.’ (1 Tim. 4:16) Bu bii kulongyesha akwikasha bantu bu balongi, abitungu twikale balongyeshi be buwa.
3. Nkinyi kyatulongo mu uno mwisambo pabitale kulonga Bible na bantu?
3 Tukwete kulonga Bible na bantu midiyo mu nsenga ishima. Anka, bu byatwibimwene mu mwisambo ushaale, atukumiina kukwasha bantu be bungi bwabadya kubatshishibwa na kufika bu balongi ba Yesu Kidishitu. Mu uno mwisambo, atutaluula ingi myanda itano ayitungu’shi mulongyeshi oso akite bwa kukwasha mulongi a Bible mpa na ku lubatshisho.
FUBISHA BIBLE BWA KULONGYESHA
Teka mulongyeshi e buwa bwa’shi akukwashe ofubishe Bible kalolo (Tala kikoso 4-6) *
4. Bwakinyi t’abitungu’shi mulongyeshi ekale akula ngofu nsaa yalongo Bible na muntu? (Tala mayi e kuushi kw’esaki.)
4 Twi bafule myanda i mu Bible y’atulongyesha. Byabya twibalombene kwiyakwila mund’a kipindji kii bula. Anka, t’abitungu muntu akunkusha Kitenta kya Mulami, Kulonga kwa Bible mu kakongye, sunga Kulonga Bible na muntu kushibo kwê ekale akuula ngofu. Bwa kufubisha Bible kalolo nsaa yalongyesha, abitungu mulongyeshi adimukile kukamba kwakula na kutompa kupatuula kantu koso kauku pabitale kifundwe kampanda sunga mwanda kampanda. * (Yo. 16:12) Pwandikisha kiukilo kya Bible kiboodi nakyo nsaa iboodi mubatshishibwe na kitodi nakyo binobino. Nsaa iboodi mubatshishibwe, boodi pangi ouku penda malongyesha akata a mu Bible. (Eb. 6:1) Bibaadi bikwaate bipwa bi bungi bwa kwikala na kiukilo kyodi nakyo lelo uno, nyi bwakinyi tokumanga kutompa kulongyesha mulongi mupya myanda yoso musango umune.
5. (a) Muyile 1 Beena-Tesalonika 2:13, atukumiina’shi mulongi etu a Bible aukye kinyi pabitale byalongo? (b) Mushindo kinyi watudi balombene kunyingisha mulongi a Bible bwadya kwakula pabitale myanda ya kwete kulonga?
5 Atukumiinashi mulongi etu a Bible aukye’shi, byabya byatulongo abitukila Mwiyi diyokyelwe dy’Efile Mukulu. (Badika 1 Beena-Tesalonika 2:13.) Twi kwibikita naminyi? Nyingisha mulongi a Bible bwadya kwikala alungula bangi bya kwete kulonga. Pamutwe pakwikalanga nk’omupatulwila bifundwe, mutekye namu bwadya nkupatulwila byanka. Mukwashe bwadya kumona mushindo umutale Eyi dy’Efile Mukulu pa bupenka bwaye. Mwele nkonko ayimukwasha bwadya kwakula byanangushena na byapusha pabitale bifundwe byabadika. (Luk. 10:25-28) Bu kileshesho, mwipushe’shi: “Kino kifundwe akikukwasha naminyi bwa kumona dimune dya ku ngikashi ya Yehowa?” “Kino kifundwe kilombene nkukwasha naminyi?” “Opusha naminyi pabitale bino bibokatuka mu kulonga?” (Nki. 20:5) Ki na muulo, ta mbungi bwa myanda ayiuku munlongi a Bible, anka mushindo wadi mwiyifule na w’eyitumikila.
6. Bwakinyi abitingu twende na mulongyeshi e buwa nsaa y’atulongo Bible na muntu?
6 Nsaa ywende mu kulonga Bible na muntu, okambaa kwenda na balongyeshi be buwa su? Su mbyabya, ebepushe byabapwandjikisha pabitale mushindo okwete kukunkusha kwakwa kulonga na mushindo okwete kufubisha Bible. Su okumiina kwikala mulongyeshi e buwa, abitungu wekale mwiyishe. (Pwandjikisha na Bikitshino 18:24-26.) Kunyima, ipusha yawa mulungudi su mulongi a Bible kwet’apusha bya kwete kulonga. We mulombene dingi kuteka yawa mulungudi bwadya kwikala alongo naye Bible nsaa yoshii panka. Bino abikwasha mulongi bwadya kwikala alongo lubingo loso na kuuka’shi kulonga kwi na muulo. Tokumanga efuku su ndimune kupwandjikisha’shi mmulongi “oobe,” na’shi muntu su ngumune te kulonga naye. Okumiina kwabikisha mulongi obe a Bible bi buwa, byabya, mulombene kwela matabula nka su atungunuka na kulonga bya binyibinyi.
LESHA’SHI WE MUFULE NA WE MUKUMIINE BY’OLONGYESHA
Pa mulongi obe a Bible bileshesho by’eyendo bya bantu abaadi bashintuule nshalelo bwa’shi bimukwashe amone bya kutumikila byabya byalongo (Tala kikoso 7-9) *
7. Nkinyi kilombene kukwasha mulongi a Bible bwa kufula bya kwete kulonga?
7 Mulongi a Bible e na lukalo lwa kumona’shi we mufule na we mukumiine byabya binyibinyi by’olongyesha. (1 Tes. 1:5) Paapa, anyisha kusankila by’alongo. Su kwi mushindo, we kumulungula bikukwashe mayi a kulonda a mu Bible mu muwa oobe. Paapa, ashingula’shi Bible e na malango alombene kumukwasha naye namu.
8. Nkinyi dingi kyodya kukita bwa kukwasha mulongi obe a Bible, na bwakinyi abitungu webikite?
8 Nsaa y’anulongo, pa mulongi obe a Bible bileshesho by’eyendo bya bantu abaadi bapete nkalakashi i mumune na yaye, kadi beyikambile. Pwende mu kulonga naye Bible, we kutwala mulungudi a mu kakongye kenu mwikale kileshesho ki buwa kilombene kumukwasha. Sunga’shi we kupeta mwanda aumukumu kwishimba mu miisambo ayamba’shi: “Bible kwete kushintuula bantu.” * Yaya miisambo sunga ma video mbilombene kukwasha mulongi obe a Bible bwadya kumona’shi, Bible e kumukwasha bwa kushintuula nshalelo aye.
9. Mushindo kinyi odya kunyingisha mulongi obe a Bible bwadya kulungula bena kifuko na ba kuuku baye bya kwete kulonga?
9 Su mulongi obe a Bible mwibakile, mwina kwaye kwete naye kulonga Bible su? Su ta mbyabya, mwitamine bwadya kulonga namu naye. Nyingisha mulongi obe a Bible bwadya kulungula bena kifuko na ba kuuku baye byakwete kulonga. (Yo. 1:40-45) Mushindo kinyi? We kumwipusha’shi: “Mushindo kinyi odi mulombene kupatulwila bena kifuko n’obe bino bya binyibinyi?” sunga’shi “Nkifundwe kinyi kyodya kufubisha bwa kushinkamisha kuuku obe bino bibatulongo”? Su okitshi bino, okwete kulongyesha mulongi obe a Bible bwadya kwikala mulongyeshi. Paapa, ekala mukumbane bwadya kubanga kulungula mukandu wibuwa bu mulungudi shabatshishibwe. We kwipusha mulongi a Bible su auku muntu akumiina kulonga Bible. Su amuuku, kimba bya kwipetana na yawa muntu bukidibukidi bwa kulonga naye Bible. Omuleshe video amba’shi: Kulonga kwa Bible akukitshikaa naminyi? *
NYINGISHA MULONGI A BIBLE BWADYA KUDYA BU KUUKU NA BANTU MU KAKONGYE
Nyingisha mulongi a Bible bwadya kudya bu kuuku na bangi mu kakongye (Tala kikoso 10-11) *
10. Muyile 1 Beena-Tesalonika 2:7, 8, mushindo kinyi ulombene mulongyeshi kwambula kileshesho kya Mpoolo?
10 Abitungu balongyeshi bapasukile balongi babo ba Bible. Banga kwibamona bu bakwetu balume na bakashi ba mu kakongye. (Badika 1 Beena-Tesalonika 2:7, 8.) Ta mbibabofwile bwa kuleka ba kuuku babo ba mu uno ndumbulwilo na kushintuula myanda bwa kubanga kufubila Yehowa. Abitungu twi bakwashe bwabadya kupeta ba kuuku be buwa mu kakongye. Ikala kuuku a mulongi obe pa kukisha naye nsaa kushii penda nsaa y’anulongo Bible, kadi pw’ende mu kumutembela. Kumwitamina ku telefone sunga kumufundjila ka mesaje, nkulombene kulesha’shi omupasukilaa.
11. Atukumiina’shi balongi betu ba Bible bapete ba kuuku be naminyi mu kakongye, na bwakinyi?
11 Lungi lukindji alwamba’shi: “Kunde ya be bungi ayibobaa na mata.” Mu mushindo umune, “Kakongye kashima akafubaa pamune bwa kwikasha muntu bu mulongi.” Nyi bwakinyi, balongyeshi be buwa abakwasha balongi babo bwabadya kwiukena na bangi mu kakongye, be kwibakwasha bwa kwifubwila peepi na Yehowa. Balongi ba Bible mbalombene kusangeela kwikala pamune na mwilo w’Efile Mukulu, ulombene kwibanyingisha mu kikudi nsaa yabapete nkalakashi. Atukumiina’shi mulongi oso a Bible epushe bu mwina kakongye na bu mwina kifuko kyetu kya mu kikudi. Kifulo kyetu kya bu bana na bana kibakakye kwatudi. Paapa, abibabofwila bwabadya kutshiba kipwano na bantu bashii balombene kwibakwasha bwa kufula Yehowa. (Nki. 13:20) Sunga bebasumbushena kwi ba kuuku babo, abauku’shi be kupeta ba kuuku be buwa mu ndumbulwilo a Yehowa.—Mak. 10:29, 30; 1 Mp. 4:4.
SHIMIKA KASELE PA KWILAMBULA NA KUBATSHISHIBWA
Kapelakapela, mulongi a Bible sha kishima akumbasha kepatshila kaye ka kubatshishibwa! (Tala kikoso 12-13)
12. Bwakinyi abintugu twisambe na mulongi etu a Bible pabitale kwilambula na kubatshishibwa?
12 Abintungu wekale wakula nsaa yoso bwakinyi bi na muulo kwilambula kwi Yehowa na kubatshishibwa. Kepatshila ketu ka kulonga Bible na bantu, nka kwibakwasha bwa kwifubwila peepi na Yehowa na kubatshishibwa. Kunyima kwa myeshi ipela nanwe kubanga kulonga Bible lubingo loso, bikishekishe su mulongi ba banga kutwela mu bisangilo, apusha’shi atukumiina kumukwasha bwadya kwikala Temwe Yehowa.
13. Mmyanda kinyi ayitungu’shi mulongi a Bible akite bwa kubatshishibwa?
13 Kwi myanda ibungi ayitungu’shi mulongi a Bible akite bwadya kubatshishibwa! Kya kumpala, abitungu’shi aukye, afule na ekale na lukumiino mwi Yehowa. (Yo. 3:16; 17:3) Paapa, ekala bu kuuku na Yehowa mpa na bakwetu balume na bakashi mu kakongye. (Eb. 10:24, 25; Shak. 4:8) Akupu, alekye bikitshino byaye bi bubi na kwilanga kwishimba bwa milwisho yaye. (Bik. 3:19) Na dingi, lukumiino lwaye alumutakula bwa kulungula bangi bya binyibinyi. (2 Kod. 4:13) Kufundilo a byoso, elambula kwi Yehowa na kubatshishibwa. (1 Mp. 3:21; 4:2) Dino ny’efuku dya muloo bwa bantu boso! Nsaa i mulongi a Bible akitshi ino yoso myanda itekibwe bwadya kubatshishibwa, mutumbule ngofu na omunyingishe bwadya kuyididila na kukita myanda i buwa.
TALUULA NSAA YOSO MATABULA AKWETE KWELA MULONGI A BIBLE
14. Mulongyeshi e kuuka naminyi’shi mulongi a Bible kwete kwenda kumpala?
14 Abitungu twikale na lwishinko nsaa y’atukwasha mulongi a Bible bwadya kwilambula na kubatshishibwa. Anka ingi nsaa abitungu twiukye su e na lukalo lwa kufubila Yehowa Efile Mukulu. Okwete kumona bitundwilo abilesha’shi mulongi obe a Bible kwete kukookyela miiya ya Yesu su? Su lukalo lwaye ndwa kulonga penda myanda ya mu Bible?
15. Mbitundwilo kinyi abitungu’shi mulongyeshi akimbe kwi mulongi a Bible?
15 Taluula nsaa yoso matabula akwete kwela mulongi a Bible. Bu kileshesho, kwete kulesha’shi mmufule Yehowa su? Kwete kumuteka su? (Mis. 116:1, 2) Kwete kusangeela kubadika Bible su? (Mis. 119:97) Kwete kutwela mu bisangilo lubingo loso su? (Mis. 22:23) Kwete kushintula nshalelo aye bwa kulesha’shi atumikila byalongo su? (Mis. 119:112) Tabangile kulungula bena kifuko naye na ba kuuku baye bya kwete kulonga su? (Mis. 9:2) Na mwanda wi na muulo, akumiina kwikala Temwe a Yehowa su? (Mis. 40:9) Su mulongi t’eele etabula su ndimune, kimba kuuka bwakinyi, na esambe naye kushii kudya mukanwe kadi na kalolo koso. *
16. Nsaa kinyi yatudi balombene kwimika kulonga Bible na muntu?
16 Eyipushe nsaa yoso bwakinyi okumiina kutungunuka na kulonga Bible na muntu. Eyipushe’shi: ‘Kwete kwilumbuula bwa kulonga su? Kwete kufika mu bisangilo? Kyatungunuka nka na kwikala na bikitshino bi bubi? Kyatungunuka nka na kwikala mu kipwilo kya madimi?’ Su lwaluulo ku ino nkonko yoso lwi’shi, oolo, kutungunuka na kulonga na uno muntu e bino, kwi nka bu kutungunuka na kulongyesha muntu sh’akyebe kutwela mmema bya kuywa! Su mulongi a Bible ta mufule bya kwete kulonga na t’akumiina kushintuula nshalelo aye, bwakinyi kutungunuka na kulonga naye?
17. Muyile 1 Timote 4:16, nkinyi akitungu’shi balongyeshi boso ba Bible bakite?
17 Abitungu twate na muulo bushito bwatudi nabo bwa kwikasha bantu bu balongi, na atukumiina kukwasha balongi betu ba Bible bwabadya kwela matabula mpa na ku lubatshisho. Nyi bwakinyi abitungu tufubishe Bible bwa kulongyesha na kulesha’shi twi bafule byatukwete kulongyesha. Tunyingishe balongi ba Bible bwabadya kudya bu kuuku na bangi mu kakongye. Tushimikye kasele pa kepatshila ka kwilambula na kubatshishibwa, na nsaa yoso tukimbe bitundwilo abilesha’shi mulongi a Bible kwete kwela matabula. (Tala kashibo: “ Kyakukita balongyeshi bwa kukwasha balongi ba Bible mpa na ku lubatshisho.”) Twi na muloo wa kukita uno mudimo aupasha bantu! Twateyi kitshibilo kya kulonga Bible na bantu mpa na ku lubatshisho.
LOONO 79 Twibalongyeshe bashale banyingye
^ par. 5 Twi na kineemo kya kukwasha bantu bwabadya kulonga mushindo aukumiina Yehowa’shi tunangushene, tupushe na tukite myanda pa kulonga nabo Bible. Uno mwisambo aupatuula dingi mushindo watudi balombene kulumbuula ngobesha yetu ya kulongyesha.
^ par. 4 Tala mwisambo awamba’shi: “Myanda yoshokukita nsaa yolongo Bible na muntu” mu Programe a bisangilo bya bwina Kidishitu na mudimo wetu a mweshi wa 9/2016.
^ par. 8 Twela mu jw.org pa mbalo ifunde’shi: TWI BANTU KINYI > MYANDA IMONE BANTU.
^ par. 9 Twela mu jw.org pa mbalo ifunde’shi: MIKANDA > MA VIDEO > BISANGILO NA MUDIMO WETU > BINTU BYA KUKITA NABYO BULUNGUDI.
^ par. 15 Tala miisambo ayamba’shi: “Kifulo na lutumbu bwa Yehowa mbilombene nkutakula mu kubatshishibwa” na “Bopu kwilumbuula bwa kubatshishibwa su?” mu Kitenta kya Mulami kya mweshi wa 3/2020.
^ par. 77 BI MU BIFWATULO: Kunyima kwa kulonga Bible, mukwetu mukashi alongyeshaa kalolo alesha mukwetu mukashi kyadya kukita bwa’shi tekalanga akula ngofu nsaa y’alongo na muntu.
^ par. 79 BI MU BIFWATULO: Nsaa y’abalongo, mulongi a Bible balongo byadya kwikala mukashi e buwa. Kunyima, esamba na mulum’aye pabitale bibabalongo.
^ par. 81 BI MU BIFWATULO: Mulongi na mulum’aye be na muloo ku nshibo kwa bakwetu babekalanga badye nabo bu kuuku ku bisangilo.
