1. Unfa u du sabi taa di heepi di u ta heepi sëmbë u de ko dë bakama u Jesosi, da wan wooko di ta heepi sëmbë u de feni libi?

DI HEEPI di u ta heepi sëmbë u de ko dë bakama u Jesosi, da wan wooko di ta heepi sëmbë u de feni libi! Unfa u du sabi di soni dë? Wë Jesosi bi taki a Mateosi 28:​19, 20, NW taa: „Un go a hii nasiön sëmbë, un heepi de u de ko dë bakama u mi, nöö un dopu de.” Unfa dopu dë fanöudu tjika? U musu dopu ee u kë libi u teego. Wan sëmbë di kë dopu musu biibi taa di wan kodo soni di mbei a sa libi u teego, hën da u di Jesosi dëdë paka zöndu da u, hën Gadu weki ën ko a libi baka. Fëën mbei apösutu Petuisi bi piki dee woto Keesitu sëmbë taa: „Di dopu ta heepi unu . . . fu di un bi ta biibi taa Jesosi Keesitu toona weki ko a libi baka” (1 Pet. 3:​21). Hën da te wan sëmbë di ko dë bakama u Jesosi dopu, nöö a ta ko dë a fa u feni di libi u teego.

2. Unfa u musu ta lei sëmbë soni, te u luku andi 2 Timoteo 4:​1, 2 ta taki?

² Fuu sa heepi sëmbë u de ko dë bakama u Keesitu, nöö u musu ko sa’ u lei sëmbë soni u Bëibel. (Lesi 2 Timoteo 4:​1, 2.) Faandi mbei di soni dë dë fanöudu? Wë u di Jesosi bi taki taa: „Un go a hii nasiön sëmbë, un heepi de u de ko dë bakama u mi, nöö un dopu de.” Apösutu Paulosu bi taki taa u musu ta du di soni dë nöömö, u di „te i ta libi sö kaa nöö joo puu i seei a hogi basu, i ku dee oto sëmbë dee ta haika i dë tuu”. Sö u ta si taa u wan bunu soni mbei Paulosu bi taki taa: „Di lei u Gadu di i ta lei sëmbë dë, hënseei musu dë a tatai liba tu” (1 Tim. 4:​16). U musu sa’ u lei sëmbë soni ee u kë heepi sëmbë u de ko dë bakama u Keesitu. Fëën mbei u kë lei sëmbë soni u Bëibel a di möön bunu fasi di u sa du ën.

3. Andi woo luku a di woto aki, te a nama ku di lei di u ta lei sëmbë soni u Bëibel?

 ³ U ta lei milionmilion sëmbë soni u Bëibel a hii së u goonliba. Ma kumafa u bi taki a di woto ufö disi, u kë ko sabi unfa u sa heepi dee sëmbë aki, u de ko dë dopudopu bakama u Jesosi Keesitu. A di woto aki, woo taki u feifi woto soni di hiniwan peleikima musu du, u heepi wan sëmbë di a ta lei soni u Bëibel faa go a fesi, faa sa dopu.

4. Faandi mbei wan sëmbë di ta lei wotowan soni u Bëibel, musu ta duwengi hënseei te a ta lei sëmbë soni u Bëibel? (Luku di pisi a basu tu.)

⁴ U lobi dee soni u Bëibel dee u ta lei sëmbë. Fëën mbei u sa fii fuu ta taki u dee soni dë nango nöömö. Ma aluwasi ee wan sëmbë ta tei fesi a di Hei Wakitimawosu-lei, a di kemeente Bëibel-lei, nasö aluwasi ee a ta lei wan sëmbë soni u Bëibel nëën pisi, tökuseei an musu ta fan hia poi. Ee di sëmbë di ta lei wotowan soni kë taa di Wöutu u Gadu musu hai sëmbë pakisei, nöö a musu ta duwengi hënseei. An musu ta suku u konda hii soni di a sabi u wan tëkisi nasö u wan woto * da sëmbë (Joh. 16:12). Tei di fa i bi sabi soni u Bëibel tjika di i dopu, maaka ku di fa i sabi soni u Bëibel nöunöu. A kan taa di i dopu, dee fanöudu lei u Bëibel nöö i bi sabi (Heb. 6:​1). A tei sömëni jaa fii bi sa ko sabi dee soni dee i sabi nöunöu. Fëën mbei ja musu suku u lei wan sëmbë di bigi lei soni u Bëibel hii soni tuu wan pasi.

5. (a) Andi u kë u di sëmbë di u ta lei soni u Bëibel musu ko fusutan, te u luku andi 1 Tesalonika 2:​13 ta taki? (b) Unfa u sa da di sëmbë taanga faa taki andi a lei?

⁵ U kë u di sëmbë di u ta lei soni u Bëibel fusutan taa dee soni dee u ta lei ën kumutu a di Wöutu u Gadu. (Lesi 1 Tesalonika 2:​13.) Unfa u sa du di soni dë? Da di sëmbë taanga faa taki andi a lei. Ka fii ta puu da di sëmbë hii juu andi dee Bëibel tëkisi kë taki, nöö i sa hakisi ën faa puu da i andi so u de kë taki. Heepi di sëmbë faa si unfa a sa du di soni di di Wöutu u Gadu taki. Hakisi ën soni di o heepi ën faa konda unfa a ta pakisei u dee Bëibel tëkisi dee a ta lesi nasö unfa a ta feni de (Luk. 10:​25-​28). Kandë i sa hakisi ën taa: „Unfa di Bëibel tëkisi aki heepi i fii si wan u dee fasi di Jehovah abi?” „Unfa i sa feni wini u di soni u Bëibel di i lei aki?” „Unfa i feni di soni di i lei aki?” (Nöng. 20:​5) Na di un mëni soni di di sëmbë sabi hën da di möön fanöudu soni. Di möön fanöudu soni hën da di fa a lobi dee soni dee a sabi tjika, söseei di fa a ta du de tjika.

6. Faandi mbei a sa bunu fuu tja wan peleikima di abi öndöfeni go ku u te woo go lei wan sëmbë soni u Bëibel?

⁶ I ta tja peleikima di abi öndöfeni go ku i te i ta lei wan sëmbë soni u Bëibel ö? Wë ee i ta du ën, nöö i sa hakisi de be de piki i unfa de feni di  fasi fa i ta lei di sëmbë soni u Bëibel. Söseei be de piki i unfa i ta wooko ku di Bëibel tjika te i ta lei di sëmbë soni. I musu abi sakafasi ee i kë ko ta lei sëmbë soni u Bëibel a wan möön bunu fasi. (Luku Tjab. 18:​24-​26.) Baka di dë, i sa hakisi di peleikima di abi öndöfeni ee a si kuma di sëmbë ta fusutan dee soni dee a ta lei. I sa hakisi di seei peleikima dë, faa lei di sëmbë soni u Bëibel da i ee joo go a kamian u wan wiki nasö tu wiki longi. A sö wan fasi di sëmbë o sa lei soni u Bëibel go dou, nöö a o si tu unfa di lei di a ta lei soni u Bëibel dë fanöudu tjika. Nöiti i musu si kuma „ju” abi di sëmbë, nasö taa na wan woto sëmbë sa lei di sëmbë soni u Bëibel. Ee fuu taki ën, nöö i kë taa di sëmbë musu feni hii soni di dë fanöudu faa sa nango a fesi nöömö, a di lei di a ta lei soni u Bëibel.

7. Andi o heepi wan sëmbë di ta lei soni u Bëibel faa ko lobi dee soni dee a ta lei?

⁷ A dë fanöudu u wan sëmbë di i ta lei soni u Bëibel si taa i lobi dee soni di di Bëibel ta taki, söseei taa i ta biibi de (1 Tes. 1:​5). Te a si di soni dë, nöö a kan taa a o ko möön lobi dee soni dee a ta lei. Kandë i sa konda dëën unfa di libi di i ta libi ku dee mama wëti u Bëibel bi heepi i a di libi. Di soni dë o mbei a ko si taa di Bëibel ta taki soni di sa heepi ën tu.

8. Andi i sa du jeti u heepi di sëmbë di i ta lei soni u Bëibel, nöö faandi mbei i bi o du di soni dë?

⁸ Te i ta lei di sëmbë soni u Bëibel, nöö konda woto u baaa ku sisa dëën di bi abi dee seei bookohedi dee a abi, hën de hoi dou. I sa tja wan sëmbë u di kemeente go ku i te joo go lei di sëmbë soni u Bëibel. I sa tja wan sëmbë di di sëmbë o sa feni taanga nëën. Nasö i sa feni woto u sëmbë di o da di sëmbë taanga, a jw.org a di pisi „Bijbel e kenki sma libi”. * Dee lö woto dë, ku dee lö fëlön dë, o heepi di sëmbë di i ta lei soni u Bëibel, faa si unfa a dë fanöudu tjika faa ta libi ku dee mama wëti u Bëibel.

9. Unfa i sa da wan sëmbë di i ta lei soni u Bëibel taanga, faa ta konda dee soni dee a ta lei da dee famii fëën ku dee mati fëën?

⁹ Ee di sëmbë tööu, nöö unfa a dë ku di sëmbë di hën ku ën tööu? A ta lei soni u Bëibel tu ö? Wë ee an ta lei soni u Bëibel, nöö kai ën faa ko sindo ku unu te un ta lei soni u Bëibel. Da di sëmbë di i ta lei soni u Bëibel taanga faa konda dee soni dee a ta lei da dee famii fëën ku dee mati fëën (Joh. 1:​40-​45). Unfa i sa du di soni dë? Wë i sa hakisi ën nöö taa: „Unfa i bi o konda di soni aki da dee famii fii u de fusutëën?” Nasö i sa hakisi ën taa: „Un Bëibel tëkisi i bi o tei u lei wan mati fii di soni aki?” A sö wan fasi i ta bigi heepi di sëmbë faa ko sa’ u lei sëmbë  soni. Nöö te di juu dou, nöö a sa bigi ta peleiki ku di kemeente kuma wan peleikima di an dopu jeti. I sa hakisi di sëmbë ee a sabi woto sëmbë di bi o kë lei soni u Bëibel tu. Ee a sabi woto sëmbë di bi o kë, nöö bëli di sëmbë wantewante, nöö i hakisi ën ee a bi o kë fii lei ën soni u Bëibel. Boiti di dë, lei ën di fëlön Unfa u ta lei sëmbë soni u Bëibel? *

10. Unfa wan sëmbë di ta lei sëmbë soni u Bëibel sa djeesi Paulosu, te u luku andi 1 Tesalonika 2:​7, 8 ta taki?

¹⁰ Dee sëmbë dee ta lei sëmbë soni u Bëibel, musu ta booko de hedi tuutuu ku dee sëmbë di de ta lei soni u Bëibel. U musu ta si dee sëmbë aki kuma sëmbë di o ko dë baaa nasö sisa fuu a di biibi. (Lesi 1 Tesalonika 2:​7, 8.) An dë wan kösökösö soni da de u de disa dee mati u de di de bi abi, nöö de tooka hii soni di dë fanöudu u de ko ta dini Jehovah. A dë fanöudu fuu heepi de u de feni tuutuu mati a di kemeente. Du soni makandi ku di sëmbë di i ta lei soni Bëibel, be a ko ta si i kuma mati fëën. Du woto soni makandi ku ën, boiti di lei di i ta lei ën soni u Bëibel. Ee i bëli ën, nasö ee i manda wan bosikopu dëën, nasö ee i go luku ën pala nöö i toona ko, nöö a o dë u si taa i ta booko i hedi ku ën tuutuu.

11. Andi u kë u dee sëmbë dee u ta lei soni u Bëibel musu feni a di kemeente, nöö faandi mbei?

¹¹ De ta taki taa: „Tu maun panjan wan boto, a subi dan.” U bi o sa taki tu taa: „Tu maun panjan wan sëmbë, a ko dë wan bakama u Keesitu.” U di soni aki mbei dee peleikima dee sa’ u lei sëmbë soni bunu, lo’ u heepi dee sëmbë di de ta lei soni u Bëibel, u de ko sabi woto sëmbë a di kemeente di sa da de taanga. A sö wan fasi dee sëmbë aki sa ta dë makandi ku dee sëmbë u Gadu, nöö dee baaa ku dee sisa aki sa heepi de u de ku Jehovah sa ko dë möön gaan mati, söseei de sa da de taanga te de abi bookohedi. U kë u hiniwan sëmbë di ta lei soni u Bëibel fii taa a dë wan sëmbë u di kemeente. U kë u de ko lobi di fa u ta libi makandi kuma baaa ku sisa. A sö wan fasi, a o möön kösökösö da di sëmbë, fu an ta nama gaanfa sö möön ku sëmbë di an ta heepi ën faa ko lobi Jehovah (Nöng. 13:20). Ee dee sëmbë dee a bi ta nama ku de an kë dë mati fëën möön, nöö a o sabi taa a sa feni tuutuu mati a di ölganisaasi u Jehovah.​—Maik. 10:​29, 30; 1 Pet. 4:​4.

12. Faandi mbei u musu ta taki soni u di buta di wan sëmbë musu buta hën libi a Jehovah maun, nöö a dopu, ku di sëmbë di u ta lei soni u Bëibel?

¹² I musu lo’ u taki u di fa a dë fanöudu tjika u wan sëmbë buta hën libi a Jehovah maun,  nöö a dopu. Di soni mbei u ta lei wan sëmbë soni u Bëibel, hën da u di u kë heepi ën faa ko dë wan dopudopu bakama u Keesitu. Te di sëmbë lei soni u Bëibel wantu liba kaa, möönmöön te a bigi ta ko a dee komakandi, nöö a musu ko fusutan taa di soni mbei u ta lei ën soni u Bëibel, hën da u di u kë heepi ën faa ko ta dini Jehovah kuma wan Kotoigi fëën.

13. Andi ku andi wan sëmbë ta du te a nango a fesi, faa sa dopu?

¹³ Ee wan sëmbë di ta lei soni u Bëibel kë dini Gadu tuutuu, nöö a o nango a fesi pikipiki u te a dopu! Di fosu soni di ta pasa, hën da a ta ko sabi Jehovah, nöö a ko lobi ën, nöö a biibi ën (Joh. 3:​16; 17:​3). Baka di dë, a ta ko dë wan mati u Jehovah, nöö a ta bigi ta nama ku dee sëmbë u di kemeente (Heb. 10:​24, 25; Jak. 4:⁠8). Te u kaba fëën, di sëmbë ta tjali u dee hogi soni dee a bi du, nöö a ta disa u du de (Tjab. 3:​19). A di seei ten dë, di biibi fëën ta mbei a ta konda dee soni dee a ta biibi da sëmbë (2 Kol. 4:​13). Bakaten, a ta buta hën libi a Jehovah maun, nöö a dopu u lei taa a buta hën libi a Jehovah maun (1 Pet. 3:​21; 4:​2). Di daka dë ta dë wan gaan daka da hii sëmbë! Te di sëmbë ta du dee soni dee a musu du faa sa dopu, nöö i musu ta gafëën, ta dëën taanga faa mbei möiti go dou.

14. Unfa wan peleikima sa wegi luku ee wan sëmbë di a ta lei soni u Bëibel nango a fesi?

¹⁴ U musu abi pasensi te u ta heepi wan sëmbë u go a fesi, faa sa buta hën libi a Gadu maun, nöö a dopu. Ma te dou wan pisiten, nöö a ta dë fanöudu fuu ko sabi ee di sëmbë kë dini Jehovah Gadu. I ta si soni di ta lei taa di sëmbë ta pooba u du dee soni dee Jesosi piki u taa u musu ta du ö, naa lobi nöö a lobi taa i ku ën sa ta sindo ta fan?

15. Andi wan peleikima musu luku faa sa sabi ee wan sëmbë di ta lei soni u Bëibel nango a fesi?

¹⁵ I musu ta wegi luku ee di sëmbë di i ta lei soni u Bëibel nango a fesi. I sa luku dee lö soni aki: A ta taki unfa a lobi Jehovah tjika u? A ta begi Jehovah u? (Ps. 116:​1, 2) A lo’ u lesi di Bëibel ö? (Ps. 119:97) A ta ko a dee komakandi hii juu ö? (Ps. 22:22) A tooka wan soni seei a di fasi fa a ta libi, u lei taa a ta du dee soni dee a ta lei ö? (Ps. 119:112) A bigi ta konda dee soni dee a ta lei da dee famii fëën ku dee mati fëën u? (Ps. 9:​1) Ma di möön fanöudu soni da: A kë ko dë wan Kotoigi u Jehovah u? (Ps. 40:8) Ee di sëmbë an nango a fesi a na wan u dee soni dee u kai aki, nöö pooba fii ko fusutan faandi mbei. Baka di dë, nöö i da di woto ku ën  a wan suti fasi, ma söseei a wan fasi faa sa fusutëën gbelingbelin. *

16. Andi sa heepi i fii sabi taa an dë fii lei wan sëmbë soni u Bëibel go dou?

¹⁶ Wanwan pasi, i musu ta wegi luku ee a dë fanöudu fii lei wan sëmbë soni u Bëibel go dou. Hakisi iseei dee soni aki: ’Di sëmbë ta seeka hënseei ufö mi ko lei ën soni u Bëibel ö? A ta kë ko a dee komakandi ö? A ta du dee soni dee an fiti, dee a bi guwenti du go dou ö? A dë a wan poipoi keiki jeti ö?’ Wë ee i si taa di sëmbë an ta du soni kumafa a dë fanöudu, ma i ta lei ën soni u Bëibel go dou, nöö a o dë kuma i ta suku u heepi wan sëmbë faa ko sa’ u sun, hii fa di sëmbë an kë munjan! Ee di sëmbë an lobi dee soni dee a ta lei tuutuu, söseei ee an dë kabakaba faa tooka, nöö an bi o dë wan köni soni fii ta lei ën soni u Bëibel go dou.

17. Andi hii dee sëmbë dee ta lei wotowan soni u Bëibel musu du, kumafa 1 Timoteo 4:​16 ta taki?

¹⁷ U ta si di heepi di u musu heepi sëmbë u de ko dë bakama u Keesitu kuma wan fanöudu soni, nöö u kë heepi dee sëmbë dee u ta lei soni u Bëibel u de go a fesi, u de sa dopu. Fëën mbei woo ta tei di Bëibel u lei sëmbë soni. Woo ta mbei sëmbë si taa u lobi dee soni dee u ta lei de, söseei taa u ta biibi de. Woo ta da dee sëmbë dee u ta lei soni u Bëibel taanga u de ko dë mati ku sëmbë a di kemeente. Boiti di dë, woo ta taki soni u di fa a dë fanöudu tjika taa wan sëmbë di ta lei soni u Bëibel musu buta hën libi a Gadu maun, nöö a dopu. Söseei woo ta wegi luku ee di sëmbë di u ta lei soni u Bëibel nango a fesi. (Luku di pisi „ Andi dee peleikima musu du u heepi dee sëmbë di de ta lei soni u Bëibel u de go a fesi u de sa dopu?”.) U ta wai seei taa u sa heepi ku di wooko aki di ta heepi sëmbë u de feni libi! Boo mbei hii möiti fuu sa ta lei sëmbë soni u Bëibel u de go a fesi, u de sa dopu.