1. Fa wi du sabi taki a wroko di wi e du fu meki disipel e kibri sma libi?

A WROKO di wi e du fu meki disipel e kibri sma libi! Fa wi du sabi dati? Di Yesus ben gi a komando di skrifi na Mateyus 28:19, 20, a ben taki: ’Go, meki disipel èn dopu den.’ O prenspari a de fu teki dopu? Wan sma musu teki dopu efu a wani libi fu têgo. A sma di wani teki dopu musu bribi taki na fu di Yesus dede gi wi èn kisi wan opobaka, meki a man kisi frulusu. Dati meki na apostel Petrus ben taigi den Kresten brada nanga sisa fu en: „Now a dopu e frulusu unu . . . fu di unu ben bribi na ini Yesus Krestes di kisi wan opobaka” (1 Petr. 3:21). Sobun, te wan sma teki dopu, a kan kisi frulusu èn libi fu têgo.

2. San de fanowdu fu gi sma leri na wan bun fasi, soleki fa 2 Timoteyus 4:1, 2 e sori?

² Fu man meki disipel, wi musu kon abi „a koni fu gi sma leri”. (Leisi 2 Timoteyus 4:1, 2.) Fu san ede? Fu di Yesus ben gi wi a komando disi: ’Go, meki disipel èn leri den.’ Na apostel Paulus ben taki dati wi musu „tan du” a wroko disi fu di „te yu du disi, dan yu o frulusu yusrefi nanga den sma di e arki yu”. Dati meki Paulus ben taki: „Tan poti prakseri na . . . den sani di yu e leri sma” (1 Tim. 4:16). Sobun, efu wi wani meki disipel, dan wi musu du ala san wi man fu gi sma leri na wan bun fasi.

3. San wi o luku na ini na artikel disi?

 ³ Na heri grontapu wi e studeri Bijbel nanga milyunmilyun sma. Ma soleki fa a fosi artikel ben sori, wi wani kon sabi fa wi kan yepi moro sma fu tron dopu disipel fu Yesus Krestes. Na ini na artikel disi wi o taki fu ete feifi sani di wi musu du fu yepi wan studenti fu go na fesi èn fu teki dopu.

4. Fu san ede wi no musu taki tumusi furu te wi e hori wan Bijbelstudie? (Luku sosrefi a futuwortu.)

⁴ Wi lobi den sani di wi e leri sma fu Gado Wortu. Dati meki a kan pasa makriki taki wi wani taki furu fu den sani dati. Ma awinsi wi e hori a Waktitoren-studie, a Gemeente Bijbelstudie, noso efu wi e studeri nanga wan sma, wi no musu taki tumusi furu. Efu wi wani meki Bijbel srefi taki, dan wi musu dwengi wisrefi fu no taigi a sma ala san wi sabi fu wan Bijbeltekst noso fu wan Bijbel tori (Yoh. 16:12). * Prakseri san yu ben sabi na a ten di yu teki dopu èn luku san yu sabi now. A kan taki di yu dopu, yu ben sabi soso den moro prenspari sani fu Bijbel (Hebr. 6:1). A teki someni yari fosi yu kon sabi ala den sani di yu sabi now. Sobun, no pruberi fu leri wan studenti ala sani wantronso.

5. (a) San a studenti fu wi musu kon frustan, soleki fa 1 Tesalonikasma 2:13 e sori? (b) Fa wi kan gi wan studenti deki-ati fu taki fu den sani di a e leri?

⁵ Wi wani a studenti fu wi frustan taki den sani di a e leri komoto fu Bijbel. (Leisi 1 Tesalonikasma 2:13.) Fa wi kan du dati? Gi a studenti deki-ati fu fruteri tra sma den sani di a e leri. Na presi taki yu e fruklari ala den Bijbeltekst gi a studenti, aksi en fu fruklari wan tu fu den gi yu. Yepi a studenti fu kon si san a musu du nanga den sani di a e leri na ini Gado Wortu. Poti aksi gi en di o yepi en fu taki fa a e denki fu den tekst di a e leisi (Luk. 10:25-28). Yu kan aksi en: „San a tekst disi e leri yu fu Yehovah?” „Fa a sani disi di yu leri fu Bijbel kan yepi yu?” „Fa yu e denki fu a sani di yu leri?” (Odo 20:5) No pruberi nomo fu meki a studenti kon sabi sani, ma yepi en fu kon lobi den sani di a e leri èn fu du den tu.

6. Fu san ede a bun fu aksi wan preikiman di abi ondrofeni fu go nanga yu na wan Bijbelstudie?

⁶ Yu e aksi preikiman di abi ondrofeni fu go nanga yu na wan Bijbelstudie? Yu  kan aksi den fa den feni taki yu hori a studie èn efu yu e gebroiki Bijbel bun. Efu yu wani gi leri na wan moro bun fasi, dan a prenspari taki yu abi sakafasi. (Luku sosrefi Tori fu den apostel 18:24-26.) Baka dati, yu kan aksi a preikiman di abi ondrofeni efu a denki taki a studenti e frustan den sani di a e leri. Yu kan aksi a srefi preikiman dati fu hori a studie gi yu te yu no o de fu wan pisi ten, awinsi na wán wiki nomo. Disi o meki taki a studie go doro èn a o yepi a studenti fu frustan o prenspari a studie de. Noiti no denki taki na „yu” studie èn taki nowan tra sma man studeri nanga en. Yu wani taki a studenti fu yu tan go na fesi èn dati meki a bun taki a e studeri ibri wiki.

7. San kan yepi wan studenti fu kon lobi den sani di a e leri?

⁷ Wan studenti musu man si taki yu lobi den sani di yu e leri en èn taki yu e bribi den sani di skrifi na ini Bijbel (1 Tes. 1:5). Disi kan meki taki en srefi o kon lobi den sani di a e leri. Te a fiti, yu kan fruteri en fa Bijbel yepi yu na ini yu eigi libi. Dan a o kon si taki den sani di skrifi na ini Bijbel kan yepi en tu.

8. Sortu tra sani yu kan du fu yepi yu Bijbelstudenti èn fu san ede a bun fu du dati?

⁸ Te yu e studeri nanga a sma, dan fruteri en ondrofenitori fu brada nanga sisa di ben abi den srefi sortu problema leki en èn fruteri en san yepi den. Efu yu sabi taki wan sma na ini a gemeente ondrofeni wan sani di kan yepi a studenti, dan aksi en fu kon nanga yu na a studie. Noso yu kan feni moi ondrofenitori na jw.org na a pisi di nen „Bijbel e kenki sma libi”. * Den artikel nanga felem disi o yepi yu studenti fu kon si taki Bijbel kan yepi en fu tyari kenki kon na ini en libi.

9. Fa yu kan gi yu studenti deki-ati fu fruteri en famiri nanga mati san a leri?

⁹ Efu a studenti trow, dan luku efu a patna fu en e studeri tu. Efu a no e studeri ete, aksi en efu a wani sidon tu na a studie. Gi yu studenti deki-ati fu fruteri en famiri nanga mati san a e leri  (Yoh. 1:40-45). Fa yu kan du dati? Kande yu kan aksi en: „Fa yu ben o fruklari a penti disi gi yu famiri?” noso „Sortu Bijbeltekst yu ben o gebroiki fu sori wan mati san Bijbel e leri?” Na so yu e leri yu studenti fa fu gi trawan leri tu. Èn efu a doro den marki, a kan tron wan preikiman di no dopu ete. Yu kan aksi a studenti efu a sabi sma di ben o wani studeri Bijbel tu. Efu a sabi wan sma, dan aksi en efu a kan seti sani so taki yu kan studeri nanga en. Yu kan sori a sma a felem Fa wi e studeri Bijbel nanga sma? *

10. Fa wi kan teki na eksempre fu Paulus, soleki fa 1 Tesalonikasma 2:7, 8 e sori?

¹⁰ Wi musu sori den studenti fu wi taki wi e broko wi ede trutru nanga den. Si den leki sma di kan tron wi brada noso sisa na ini a gemeente. (Leisi 1 Tesalonikasma 2:7, 8.) A no makriki gi den fu tapu nanga den mati di den ben abi na ini a grontapu èn fu tyari kenki kon fu man dini Yehovah. Wi musu yepi den fu feni trutru mati na ini a gemeente. Ma yu srefi musu de wan mati gi den tu. Dati meki yu musu meki ten gi den na tra okasi boiti te yu e studeri nanga den. Yu kan bel den, seni wan boskopu gi den, noso yu kan go luku den eife fu sori den taki yu e broko yu ede trutru nanga den.

11. Fa wi wani taki den studenti fu wi musu si a gemeente, èn fu san ede?

¹¹ Wan Afrikan odo e taki: „Wan heri dorpu de fanowdu fu kweki wan pikin.” Ma wi kan taki: „Wan heri gemeente de fanowdu fu meki wan disipel.” Dati meki preikiman di man gi bun leri e meki den studenti fu den miti trawan na ini a gemeente di kan de wan deki-ati gi den. Na so den studenti kan moksi nanga a pipel fu Gado èn den brada nanga sisa kan yepi den fu tron moro bun mati fu Yehovah. Den kan yepi den tu te den abi problema. Wi wani taki ibri studenti firi taki a kon na ini wan bigi famiri pe a abi brada nanga sisa di lobi en. Dan a o moro makriki gi en fu no moksi moro nanga sma di no e yepi en fu kon lobi Yehovah (Odo 13:20). Efu sma di ben de en mati fosi no wani moksi moro nanga en, dan a o sabi taki a kan feni trutru mati na ini Yehovah en organisâsi.​—Mark. 10:29, 30; 1 Petr. 4:4.

12. Fu san ede wi musu sori wi studenti o prenspari a de fu gi ensrefi abra èn teki dopu?

¹² Taki krin nanga yu studenti èn sori en o prenspari a de fu gi ensrefi abra na Yehovah èn teki dopu. Te yu luku en bun, wi e studeri nanga sma fu yepi den fu dini Yehovah èn fu teki dopu. Te a studenti e studeri wan tu mun kaba èn te a e bigin kon na den konmakandra, dan a musu frustan taki wi wani yepi en fu tron wan Kotoigi fu Yehovah.

13. San wan studenti musu du fu man teki dopu?

¹³ Kon meki wi go luku wan tu sani di wan Bijbelstudenti musu du efu a wani teki dopu. A fosi sani, na taki a studenti e kon leri sabi Yehovah, a e kon lobi en, èn a e poti bribi na ini en (Yoh. 3:16; 17:3). Na so a studenti e tron wan mati fu Yehovah èn fu den brada nanga sisa na ini a gemeente (Hebr. 10:24, 25; Yak. 4:8). Te fu kaba, a studenti e kon abi berow fu den sondu fu en èn a no e du den sani dati moro (Tori 3:19). Boiti dati a e fruteri trawan san a e bribi now (2 Kor. 4:13). Baka dati a e gi ensrefi abra na Yehovah èn a e teki dopu (1 Petr. 3:21; 4:2). Na a dei dati ala sma e prisiri! Te a studenti e du den sani di a musu du fu man teki dopu, dan a bun fu tan prèise en èn fu gi en deki-ati fu go na fesi.

14. Fa wi kan kon sabi efu wan studenti e go na fesi?

¹⁴ Wi musu abi pasensi te wi e yepi wan studenti fu go na fesi èn fu teki dopu. Ma wi musu kon sabi tu efu a wani dini Yehovah Gado. A studenti e sori taki a e meki muiti fu gi yesi na sani di Yesus leri? Noso na sabi a wani kon sabi moi tori fu Bijbel nomo?

15. San e sori efu wan studenti e go na fesi?

¹⁵ Ten na ten a bun fu luku efu a studenti e go na fesi. Fu eksempre, a e fruteri san a lobi fu Yehovah? A e begi Yehovah? (Ps. 116:1, 2) A lobi leisi Bijbel? (Ps. 119:97) A gwenti kon na den konmakandra? (Ps. 22:22) A tyari kenki kon di e sori taki a e du san a leri? (Ps. 119:112) A bigin fruteri en famiri nanga mati san a e leri? (Ps. 9:1) Ma san moro  prenspari na disi: A wani tron wan Kotoigi fu Yehovah? (Ps. 40:8) Efu a studenti no e du den sani disi, dan pruberi fu kon sabi fu san ede. Taki krin nanga en fu a tori, du dati na wan switi fasi èn yepi en. *

16. San o sori efu yu musu stop nanga wan studie?

¹⁶ Ten na ten yu musu aksi yusrefi efu yu musu tan studeri nanga wan sma. Aksi yusrefi: ’A studenti e sreka ensrefi gi a studie? A lobi kon na den konmakandra? A abi takru gwenti ete? A de wan memre ete fu wan kerki?’ Efu yu e tan studeri nanga wan sma di no wani du san a e leri, dan a ben o de neleki yu musu leri wan sma swen aladi a no wani nati en skin. Efu a studenti no e warderi den sani di a e leri èn efu a no wani tyari kenki kon, dan fu san ede yu ben o tan studeri nanga en?

17. San wi alamala di e gi sma leri musu du, soleki fa 1 Timoteyus 4:16 e sori?

¹⁷ Wi e si en leki wan prenspari sani fu meki disipel èn wi wani yepi den Bijbelstudenti fu wi fu go na fesi èn fu teki dopu. Dati meki wi o meki Bijbel srefi taki te wi e gi leri, wi o sori taki wi lobi den sani di wi leri èn taki wi e bribi den tu. Wi o gi a studenti deki-ati fu meki mati na ini a gemeente. Wi o sori en o prenspari a de fu gi ensrefi abra èn fu teki dopu, èn ten na a ten wi o luku efu a e go na fesi. (Luku a faki na tapu bladzijde 13, „ San yu musu du fu yepi yu studenti fu go na fesi èn fu teki dopu”.) Wi breiti taki wi kan yepi nanga a wroko disi di e kibri sma libi! Meki wi du ala san wi man fu yepi wi Bijbelstudenti fu go na fesi èn fu teki dopu.