1. Twamana siani nangue miilo ya kukita basambi ni miilo ili yapususia bukose?

MIILO ya kukita basambi ni miilo ili yapususia bukose! Twamana siani? Musita Yesu lwaafumiizie malaizio ali mu Mateo 28:19, 20, waalandile eevi: “Endo mwaye mukite basambi . . . , ni kubabatizia.” Juu ya ki kubatiziiwa ni kwa mana? Paantu muntu akebele kupusuka apalile kubatiziiwa. Muntu akebele kubatiziiwa apalile kuya waali ni kiketekelo nangue kupusuka kwakaviindikanasie paantu Yesu waatufuiliile ni kutuntumunua. Keekio i kyalengele mutumua Petro abalande Bakristu benakue nangue: “Lubatizio luli lwamipususia leenu . . . kupitila mukumutuntumuna Yesu Kristu.” (1 Pet. 3:21) Pakaako, kine musambi wa leenu wabatiziiwa, kunti waswapila kupusuka.

2. Lileembo lya 2 Timoteo 4:1, 2 lili lyalanda nangue tupalile kuya twali bakasambilizia ba musango ki?

² Eevi tuviinde kukita basambi, tupalile kuwaamia bufundi bwetu bwa kusambilizia. (Soma 2 Timoteo 4:1, 2.) Juu ya ki? Paantu Yesu waatulaiziizie eevi: “Endo mwaye mukite basambi . . . , kubasambilizia.” Mutumua Paulo waalandile nangue “twalilila” mu ezio miilo, ‘paantu kine waikita, teukepususiasie we muine, inzi wakapusuka pamo ni baalia bali bakutuilizia.’ Pakaako, Paulo waali ni nsaambu ya kulanda nangue: “Ilabukile pamo ni . . . masambilizio obe.” (1 Tim. 4:16) Paantu kusambilizia kupateene ni miilo ya kukita basambi, tutonene kusambilizia kwetu kuye kwaweeme saana.

3. Ni kiki kituli kusambilila mu leeli lyasi palua kutungulula masambililo a Bibilia?

³ Tuli mukusambilizia mamilioni a bantu bisinka bili mu Bibilia. Inzi, nga vyakilanda lyasi lyakipita, tutonene kumana vya  kukila kubakwasia bengi bafikiile kwaluka basambi bakue Yesu Kristu babatiziiziwe. Mu leeli lyasi, tuli kusambilila bintu binge bisano bipalile kukita kila kasambilizia eevi kukwasia musambi akite buyantanzi ni kubatiziiwa.

4. Juu ya ki kasambilizia apalile kulangilila mibeele ya kwitiinia musita lwali mukutungulula lisambililo lya Bibilia? (Mona ni bulondolozi buli pensina.)

⁴ Tutonene bintu bituli twasambilizia mu Mulandu Wakue Leeza. Pakaako, kunti twaponena mu muteo wa kukeba kulanda bingi palua bintu bitutonene. Inzi, ibe ali mukutungulula Lisambililo lya Lupungu Lwakue Kamwenenena, Lisambililo lya Bibilia lya Kilonghaano, ao kusambilizia muntu Bibilia, katungulula tapalile kulanda bingi saana. Eevi kulekela Bibilia iine isambilizie, kasambilizia apalile kwitiinia, kabili tapalile kwezia kulondolola kila kantu kali wasaangua wamanine palua lileembo ao lyasi kampanda. * (Yoan. 16:12) Palania bintu biwali wamanine palua Bibilia musita wa lubatizio ni bintu biumanine leenu. Kakiine, mu ozo musita waali wamaninesie masambilizio a musinzi. (Baeb. 6:1) Yakitwama miaka ingi wasambilila bintu biumanine leenu, pakaako, te kwezia kumusambilizia musambi wa leenu bintu byonse mu musita umo sie.

5. (a) Kukoonkana ni 1 Batesalonika 2:13, tutonene musambi weetu wa Bibilia amane ki palua beelia byali mukusambilila? (b) Kunti twamusonsezia siani musambi alondolole bintu byali mukusambilila?

⁵ Tutonene musambi weetu amane nangue beelia bituli mukusambilila bifumine mu Mulandu Wakue Leeza utungulwilue na mupasi. (Soma 1 Batesalonika 2:13.) Kunti twaviinda siani kukita evio? Mukinkizie musambi alande palua beelia byali mukusambilila. Kuliko kumulondoluela lyonse musambi maleembo a Bibilia, mwane ni weene akulondolueleko maleembo kampanda. Mukwasie musambi amone vya kubombia Mulandu Wakue Leeza palwakue bunke. Mwipuzie biipuzio bili kumulengia elondolole​—alande bintu byatontonkania ni kwiunvua palua lileembo lyasoma. (Luk. 10:25-28) Kwa mufuano, mwipuzie eevi: “Leeli lileembo lyakukwasia siani kumona imo pakati ka mibeele yakue Yehova?” “Bintu biwafuma mukusoma kunti byakukwasia siani?” “Waiunvua siani palua bintu biwafuma mukusambilila?” (Tus Maf. 20:5) Kintu kya mana te buingi bwa bintu bili kumana musambi, inzi, ni vyali kutona ni kubombia beelia byali mukusambilila.

6. Juu ya ki kunti kyawaama kutwama kasambilizia ali ni kibeelezio musita utuli twaya kutungulula lisambililo?

⁶ Eba, musita luuli waya kutungulula lisambililo lya Bibilia, uli watwamako ni bakasambilizia bange bali ni kibeelezio? Kine wakita evio, kunti wabepuzia bakubuile vibali  bamona watungulula lisambililo, kabili kine uli walekela Bibilia iine isambilizie. Kine balanda nangue upalile kuwaamia bufundi bobe bwa kusambilizia, ikeefie. (Palania ni Miilo 18:24-26.) Kisia paapo, mwipuzie ozo kasimika ali ni kibeelezio kine amwene nangue musambi ali waunvua bintu byali wasambilila. Kabili kunti wamuloomba ozo wenka kasimika aye watungulula lisambililo mu milungu kampanda kine weewe wafumapo. Keekio kili kukwasia lisambililo liye lyakitua lyonse ni kumulengia musambi enike nangue lisambililo ni lya mana. Te kumona ata kaniini nangue leelio lisambililo ni “lyobe,” kabili nangue te kuli unge apalile kulitungulula. Utonene musambi obe atwalilile buino saana, eevi aye waililiile kukita buyantanzi mukusambilila kisinka.

7. Ni kiki kili kumukwasia musambi asaansamukile beelia byali mukusambilila?

⁷ Musambi akabiile kukumona wasaansamukile ni kumona nangue utonene, kabili uzumiine bisinka bili mu Bibilia. (1 Bat. 1:5) Kine wakita evio, ni weene kunti wakila kusaansamukila bintu byali mukusambilila. Ni paange kunti wamubuila Bibilia viyakikukwasia mu buikazi bobe. Keekio kili kumukwasia enike nangue Bibilia kunti yamutungulula ni weene ni kumukwasia mu buikazi bwakue.

8. Kunti wakita ki kinge eevi kumukwasia musambi obe wa Bibilia, kabili juu ya ki kunti wakita evio?

⁸ Musita wa lisambililo, mubuile musambi mifuano ya bantu baasaakeene ni maavia nga akue ni kuviinda kuanzia. Kunti watwamako kasimika unge mu kilonghaano ali kuviinda kumukwasia musambi kupitila mufuano wakue. Ao kunti wasaanga mifuano inge ili yasonsezia, mu jw.org/swc mu maasi alandile “Bibilia ili Yaalulula Buikazi bwa Bantu.” * Azo maasi ni ma viideo kunti amulengia musambi enike nangue mafunde a Bibilia kunti amukwasia kuwaamia buikazi bwakue.

9. Kunti wamusonsezia siani musambi obe atendeke kubabuilako bantu ba mu lupua lwakue ni babibuza beelia byali mukusambilila?

⁹ Kine musambi opile ao opilue, eba, ni wakwakue ali wasambilila? Kine teezi kusambilila, mwane musambi amukupe mu lisambililo. Musonsezie musambi aye wabuilako lupua lwakue ao babibuza beelia byali mukusambilila. (Yoan. 1:40-45) Kunti wamukwasia siani kukita evio? Kunti wamwipuziasie eevi: “Kunti walondolola siani keeki kisinka ku bantu ba mu lupua lobe?” ao “Kunti wabombia lileembo ki eevi  kumusininkiziizia kibuza obe keeki kisinka?” Kine wakita evio, uli kuya wamubeelezia musambi obe kwaluka kasambilizia. Kupuako, kine wafikilizia bintu biloombelue, kunti watendeka kusimikila wali kasimika asinabatiziiwe. Kunti wamwipuzia musambi obe kine amanine ni muntu kampanda atonene kusambilila Bibilia. Kine waitabila, lanziana ni ozo muntu bila kukokola ni kumuloomba mutendeke kusambilila. Mulangilile viideo Lisaambililo lia Bibilia Liakitua Siani? *

10. Nga vikileembelue mu lileembo lya 1 Batesalonika 2:7, 8, kasambilizia kunti wapala siani kyakumuenako kyakue Paulo?

¹⁰ Bakasambilizia bapalile kulangilila nangue bali mukubeemena kakiine basambi babo. Ubamone kuya bali balupua ni bankazi bobe ba kimupasi ba lukeele. (Soma 1 Batesalonika 2:7, 8.) Te kileengele kuli beene kulekela babibuza babo ba mu kyalo ni kukita bupilibuko eevi kumubombela Yehova. Tupalile kubakwasia kupata babibuza bakisinka mu kilonghaano. Kita bukibuza pamo ni musambi obe kupitila kupisia musita pamo nakue, apanasie musita umuli mwasambilila nakue, inzi ni mu nsita inge. Kumukuuta ao kumuleembela ku telefone, ao kumwendela ntaanzi ya busiku bwa kuya kusambilila nakue kulangiliile nangue uli mukumwemena kakiine.

11. Tutonene basambi betu bapate ki mu kilonghaano, kabili juu ya ki?

¹¹ Kuli bulanzi bumo buli bwalanda nangue: “Muana ni obe wakili munda, tapua kuvyalua, waaluka wa bonse.” Kabili kunti twalanda nangue: “Muntu taaluka musambi, takili obe, waaluka wa kilonghaano.” Keekio i kili kyalengia bakasambilizia ba Bibilia bali ni bufundi, babakwasie basambi babo kubamana balupua ni bankazi mu kilonghaano, bali kuviinda kubasonsezia bamupalame Yehova. Basambi ba Bibilia kunti basaansamukila kupisia musita pamo ni bantu bakue Leeza bali kuviinda kubakwasia kimupasi ni mu maavia abo. Tutonene kubalua musambi eyunvue kuya wali seemu ya kilonghaano ni ya lupua lwetu lwa kimupasi. Tutonene aaluke ni nkulu ya kwingila mu lupua lwetu lwa balupua ni bankazi bali ni ntono. Ni keekio kunti kyamuleengela kulekela bukibuza pamo ni bantu basiizi kumukwasia kumutona Yehova. (Tus Maf. 13:20) Kine babibuza bakue ba kale balekela kumupalama, ali kuya wamanine nangue kunti wapata babibuza bakisinka mu kuteania kwakue Yehova.​—Mark. 10:29, 30; 1 Pet. 4:4.

12. Juu ya ki tupalile kumubuila musambi weetu palua kwipeela ni kubatiziiwa kwa Kikristu?

¹² Mubuile bila kumufiika palua kwipeela ni palua lubatizio lwa Kikristu. Ni paantu  kikata kituli twakeba musita utuli twatungulula lisambililo lya Bibilia ni kumukwasia muntu afikiile kwaluka musambi abatiziiziwe. Kisia miezi kampanda ya kusambilila Bibilia kwa mute pamo ni musambi, maka-maka kine watendeka ni kulonghaana, apalile kwinika nangue kikata kya kusambilila Bibilia, ni kufikiila kumubombela Yehova wali Kasininkizia Wakue.

13. Ni bintu ki bipalile kukita musambi eevi afikiile kubatiziiwa?

¹³ Kuli bintu kampanda bipalile kukita musambi wa Bibilia akebele kubatiziiwa! Kya mambo, musambi apalile kumumana ni kumutona Yehova ni kwaluka ni kiketekelo muli Weene. (Yoan. 3:16; 17:3) Kisia paapo, musambi ali kutendeka kukita bukibuza pamo ni Yehova, kabili pamo ni balupua ni bankazi mu kilonghaano. (Baeb. 10:24, 25; Yak. 4:8) Musambi ali walekela lwendo lubiipile ni kulapila mazaambi akue. (Miil Bat. 3:19) Mu wenka ozo musita, kiketekelo kyakue kili kumusonsezia kubuilako bange keekio kisinka. (2 Bakor. 4:13) Kupuako, ali waipeela kuli Yehova ni kubatiziiwa. (1 Pet. 3:21; 4:2) Kabili bobo busiku buli bwasaansamusia kila umo! Musita musambi lwali kuya waikwinda kukita kintu kimo-kimo kiloombelue eevi kubatiziiwa, uye wamutasia mu kisinka ni kumukinkizia atwalilile kukita evio.

14. Kasambilizia kunti watoosia siani buyantanzi bwakue musambi?

¹⁴ Tupalile kulangilila mibeele ya kupembelela musita utuli mukukwasia musambi eevi epeele ni kubatiziiwa. Inzi, musita kampanda tupalile kutoosia eevi kumona kine ozo muntu atonene kumubombela Yehova Leeza. Eba, kuli bintu bilangiliile nangue ali mukwikwinda kukoonka malaizio akue Yesu? Ao atonenesie kumana bintu kampanda bili mu Bibilia?

15. Kasambilizia kunti wainika siani nangue musambi ali mukukita buyantanzi?

¹⁵ Lyonse uye watoosia buyantanzi buli mukukita musambi. Kwa mufuano, ali walangilila vyali waiunvua palwakue Yehova? Eba, ali wapepa kuli Yehova? (Malum. 116:1, 2) Eba, ali watona kusoma Bibilia? (Malum. 119:97) Eba, ali waiza lyonse ku kulonghaana? (Malum. 22:22) Eba, ali mukwalulula buikazi bwakue mu nzila kampanda nga vikikabiilue? (Malum. 119:112) Eba, wakitendeka kubabuila bantu ba mu lupua lwakue ni babibuza beelia byali wasambilila? (Malum. 9:1) Ni kikilile pa byonse, eba, atonene kwaluka umo wa Bakasininkizia Bakue Yehova? (Malum. 40:8) Kine musambi tali mukukita  buyantanzi mu nzila imo pakati ka ezio yazimbulua, ikwinde kukeba na bufundi kilengele ni kiki, landa nakue mu nzila iweeme, inzi bila kumufiika kantu. *

16. Ni musita ki u upalile kulekela kusambilila ni musambi obe?

¹⁶ Kila musita, upalile kuya waiipuzia kine upalile kutwalilila kusambilila ni muntu kampanda. Iipuzie eevi: ‘Eba, musambi ali wateania lisambililo? Eba, ali watona kuya ku kulonghaana? Eba, ali mukulekela mibeele ibiipile? Eba, wakilekela kwingila mu diini ya bufi?’ Kine tali mukukita evio, kutwalilila kusambilila na ozo muntu, kili nga evelia kusambilizia vya kuma bungoi ao kusamba, muntu asiizi kutona kutoma! Kine musambi tatonene kakiine bintu byali mukusambilila, kabili tatonene kukita bupilibuko mu buikazi bwakue, ale kulekelasie kusambilila nakue?

17. Kukoonkana ni lileembo lya 1 Timoteo 4:16, bakasambilizia ba Bibilia bapalile kukita ki?

¹⁷ Tutweme twafiniizie miilo yeetu ya kukita basambi, kabili tutonene kubakwasia basambi betu bakite buyantanzi ni kufikiila kubatiziiwa. Pakaako, tuye twalekela Bibilia iine iye yasambilizia, kabili tuye twasambilizia twasaansamukile, ni kulangilila nangue tuzumiine bebio bintu. Tukinkizie basambi betu bakebe babibuza mu kilonghaano. Kabili tuye twatonta ku basambi betu palua kwipeela ni kubatiziiwa, ni kutoosia buyantanzi bwabo mu nsita paleepale. (Mona kisanduku “ Bintu Bipalile Kukita Bakasambilizia Eevi Kubatungulula Basambi Bafikiile Kubatiziiwa,” ku lubali lwa 13). Kakiine tuli ni nsaansa paantu tuli mukukwasia mu eezi miilo ya kupususia bukose! Kansi, tupingule kukita maka etu onse eevi kukwasia basambi betu bafikiile kubatiziiwa.