1. Xú kaʼnii eʼyáá rí muʼsngúún xa̱bu̱ maʼni rí makáwíin rá.

ÑAJUNʼ rí muʼsngúún xa̱bu̱ maʼni makáwíin. Xú káʼnii eʼyáá rá. Índo̱ Jesús niʼthí náa kiʼtáñajunʼ rí kiʼnirámáʼ náa Mateo 28:19, 20 náa naʼthí: “Guʼgua ga̱jma̱a̱ gusngún xa̱bu̱ [...] guxuʼmíinʼ iyááʼ”. Nduʼyáá rí gíʼdoo wéñuʼ numuu rí mbáa xa̱bu̱ majngúun iyááʼ. Numuu dí rúʼko̱ gíʼmaa maʼni á mu nandoo maxtáa kámuu. Mbáa bi̱ nandoo majngúun iyááʼ gíʼmaa rí maʼnimbo̱o̱ rí i̱ndó ma̱ndoo maxtáa numuu rí Jesús nikháñu ga̱jma̱a̱ numulú. Ikha jngó apóstol Pedro niʼthún a̱ngui̱i̱nʼ cristianos: “Rí majnguálá iyááʼ [...] nindxu̱u̱ rí maʼni káwáanʼ ikháanʼ ga̱jma̱a̱ numuu rí nigabi̱i̱ Jesucristo” (1 Ped. 3:21). Ikha jngó índo̱ mbáa xa̱bu̱ najngúun iyááʼ ma̱ndoo magiʼthu̱u̱n maxtáa kámuu mbiʼi.

2. Xó má eʼthí 2 Timoteo 4:1, 2 xú káʼnii gíʼmaa muʼni ikháanʼ bi̱ nuʼsngáa rá.

² Rí muʼsngúún xa̱bu̱, ndayóoʼ rí majmañulúʼ ‹muʼsngáa májánʼ› (atraxnuu 2 Timoteo 4:1, 2). * Náa numuu rá. Numuu rí Jesús niʼtáñajunlú: “Guʼgua ga̱jma̱a̱ gusngún xa̱bu̱”. Apóstol Pablo niʼthúu̱n Timoteo dí xániñuuʼ raʼtáraʼa ma̱ngaa niʼthúu̱n: “Mu xúʼko̱ makríñanʼ ikháán ga̱jma̱a̱ bi̱ nudxawanʼ”. Ikha jngó nda̱wa̱á niʼthúu̱n: “Atiexi̱ tsumáá wéñuʼ rí natani ga̱jma̱a̱ rí narasngáa” (1 Tim. 4:16). Numuu rí nandulú makuwá itháan bi̱ majngún iyááʼ, gíʼmaa manindxu̱lúʼ mbáa bi̱ naʼsngáa májánʼ.

3. Ndiéjunʼ gajmañulú náa artículo rígi̱ rá.

 ³ Náa xúgíʼ numbaaʼ mbaʼin wéñuʼ xa̱bu̱ eʼsngúún rí gajkhun ga̱jma̱a̱ numuu Biblia mámbá xmáná. Mú, xó má niʼthí náa artículo rí ninújngoo, nandulú mbuʼyáá xú káʼnii gumbáñuun xa̱bu̱ majngún iyááʼ. Náa artículo rígi̱, mbuʼyáá mbá witsu enii rí ma̱ndoo maʼni mbáa bi̱ naʼsngáa mu mambáyúu bi̱ naʼsngóo majngúun iyááʼ.

4. Náa numuu rí bi̱ naʼsngáa ragíʼmaa maʼthí wéñuʼ índo̱ naʼsngóo mbáa xa̱bu̱ rá. (Atayáá ma̱ngaa nota rí na̱ʼkha̱ agoo.)

⁴ Numuu rí nandulú kuʼyáá wéñuʼ Ajngá rawuunʼ Dios. Ikha jngó naxkaxáanʼ muʼthá dí najmañulúʼ. Tséʼniuu á mu kuwáanʼ ruʼsngáa ga̱jma̱a̱ i̱yi̱i̱ʼ Bi̱ Nayejngoo, o náa Najmañulúʼ ga̱jma̱a̱ numuu Biblia náa congregación, o índo̱ nuʼsngáá xa̱bu̱ náa goʼwóo, ragíʼmaa muʼthá wéñuʼ. Mámbáa bi̱ naʼsngáa najmuu májánʼ Biblia, mú ragíʼmaa maʼthí xúgíʼ rí najmañuu (Juan 16:12). * Índo̱ ikháán nijnguáanʼ iyááʼ raʼkháa xúgíʼ dí naʼthí náa Biblia nikruaʼaʼ (Heb. 6:1). Ndijyúuʼ mbayuuʼ tsiguʼ rí ikháán nijmañaaʼ rí natayáá xúgi̱, ikha jngó xátani rí majmañuu mbá nacha̱ bi̱ narasngáá.

5. a) Xó má eʼthí 1 Tesalonicenses 2:13, ndiéjunʼ rí nandulú makro̱ʼo̱o̱ bi̱ nuʼsngáá rá. b) Xú káʼnii gándoo gumbáyii bi̱ nuʼsngáá mu maʼthí dí xtáa rajmañuu rá.

⁵ Nandulú rí xa̱bu̱ bi̱ nuʼsngáá makro̱ʼo̱o̱ rí xtáa rajmañuu náa Ajngá rawuunʼ Dios (atraxnuu 1 Tesalonicenses 2:13). * Xú káʼnii gándoo guʼni rúʼko̱ rá. Guxnúún tsiakii muthi dí kúwá rajmañúún. Índo̱ nuraxnuu texto gajmiúlú bi̱ nuʼsngáá gunda̱ʼa̱a̱ rí ikhaa maʼthí ndiéjunʼ ekro̱ʼo̱o̱, raʼkháa rí ikháanʼ muʼthán dí eyoo gáʼthúu̱n. Ga̱jma̱a̱ guʼtháán xú káʼnii gambáyúu ikhaa dí naʼthí náa Ajngá rawuunʼ Dios. Guʼniu̱u̱n tikhu graxe̱ di mambáyúu maʼthí rí xtáa rajmañuu ga̱jma̱a̱ xú káʼnii eku̱mu̱u̱ rí naguxnuu náa Biblia (Luc. 10:25-28). Mbá xkri̱da, gura̱xi̱i̱: “Xú káʼnii embáyáaʼ matayaa xóo nindxu̱u̱ Jeobá rí naʼthí náa versículo rígi̱ rá.” “Ndiéjunʼ gambáyaaʼ índo̱ natayáá dí gajkhun rí naʼthí ikhí rá.” “Xú káʼnii ku̱ma̱a̱ ikháán dí nijmañaʼ rá.” (Prov. 20:5.) Rí itháan gíʼdoo numuu náa mbáa bi̱ nuʼsngáá nindxu̱u̱ dí nangajo̱o̱ rí naʼnigajmaa ma̱ngaa rí nagíʼ maʼni rí ejmañuu.

6. Ndíjkha dí májánʼ gáʼni mu̱ʼgua̱ gajmiúlú bi̱ itháan nakro̱ʼo̱o̱ índo̱ na̱jkua̱ guʼsngáa rá.

⁶ Índo̱ na̱dxu̱ʼ garasngáá mbáa xa̱bu̱ ga̱jma̱a̱  numuu Biblia, lá na̱dxu̱ʼ ga̱jma̱a̱ʼ mbáa bi̱ nakro̱ʼo̱o̱ itháan májánʼ rá. Á mu xúʼko̱, ma̱ndoo maratha̱a̱n maʼtháanʼ á mu najmaʼ májánʼ Biblia índo̱ narasngáa. Gíʼmaa manindxa̱ʼ xa̱bu̱ guabaaʼ á mu nandaaʼ majmañaaʼ marasngáa májánʼ (atayáá ma̱ngaa Hechos 18:24-26). Nda̱wa̱á atraxi̱i̱ precursor bi̱ najmañuu á mu naku̱mu̱u̱ rí bi̱ najuiʼsngáá nakro̱ʼo̱o̱ dí xtáa rajmañuu. Ma̱ngaa ma̱ndoo matanda̱ʼa̱a̱ rí maʼga̱ gáʼsngóo xa̱bu̱ buʼko̱ índo̱ ikháán xáraxtaa mbayuʼ mbiʼi. Rúʼko̱ gaʼni rí xániñuuʼ raʼnigájmaa bi̱ narasngáá ga̱jma̱a̱ mbaʼyoo rí gíʼdoo numuu maʼnigajmaa má xúʼko̱. Nditháan xáku̱ma̱ʼ rí i̱ndó “ikháán” ma̱ndoo marasngáá rí xándoo maʼsngóo imba̱a̱. Ikháán nandaaʼ rí maʼga̱ rajmañuu má xúʼko̱ dí gajkhun bi̱ narasngáá.

7. Ndiéjunʼ gámbáyúu manigu̱u̱ʼ dí naʼnigajmaa bi̱ narasngáá rá.

⁷ Gíʼdoo numuu rí bi̱ narasngáá mbaʼyoo rí nanigua̱a̱ʼ ga̱jma̱a̱ rí natayáá dí gajkhun nindxu̱u̱ dí naʼsngáa náa Biblia (1 Tes. 1:5). Rúʼko̱ gáʼni rí manigu̱u̱ʼ rí xtáa rajmañuu. Mbáa ma̱ndoo maratha̱a̱n xú káʼnii nimbáyaaʼ ikháán dí nitanigajmaa Biblia. Ikhú maʼga̱nú mbaʼyoo rí Biblia mambáyúu ma̱ngaa.

8. Ndiéjunʼ gándoo muʼni mu manigu̱u̱ʼ dí xtáa rajmañuu bi̱ nuʼsngáá rá.

⁸ Índo̱ narasngáá xa̱bu̱ ga̱jma̱a̱ numuu Biblia, aratháán tikhu xkri̱da rí xú káʼnii tikhun niraʼníí ikháá má xkujndu xóo ikhaa. Ma̱ndoo mi̱dxu̱ʼ ga̱jma̱a̱ʼ bi̱ xtáa náa congregación bi̱ nigíʼnuu xúʼko̱ kaʼnii, xkri̱da ndrígóo mambáyúu bi̱ narasngáá. O ma̱ndoo mataxkamaa tikhu experiencia rí manigu̱u̱ʼ náa Internet jw.org náa naʼthí “La Biblia les cambió la vida”. * Artículo ga̱jma̱a̱ video xóo rígi̱ mambáyúu bi̱ narasngáá mbaʼyoo rí gíʼdoo numuu maʼnimbánuu ikha rí na̱ʼkha̱ náa Biblia.

9. Xkáʼnii gumbáyii maʼtáruʼúún bi̱ kaʼñún ga̱jma̱a̱ bi̱ nambáxu̱u̱ gajmíi̱n bi̱ nuʼsngáá rá.

⁹ Á mu xa̱bu̱ ninigúnʼ má, lá naʼnigajmaa a̱ʼgiu̱ʼ ma̱ngaa xáʼ. Á mu na̱nguá. Aratháán rí ma̱ndoo magiʼi a̱ʼgiu̱ʼ ma̱ngaa. Aratháán bi̱ narasngáá rí maʼthúún bi̱ kúwá náa goʼwóo rí xtáa rajmañuu o bi̱ nambáxu̱u̱ gajmíi̱n (Juan 1:40-45). Xú káʼnii rá. Ma̱ndoo matrajxi̱i̱: “Xú káʼnii gárathu̱u̱n rí nijmañaʼ rígi̱ bi̱ xtañún rá.” O “náa biʼyaa texto ndrígóo Biblia gájmaaʼ maratha̱a̱n rígi̱ mbáa bi̱ nambáxa̱ʼ ga̱jma̱a̱ʼ rá.” Índo̱ nuʼni xúʼko̱ kuwáánʼ  ruʼnirathaa maʼsngáa ma̱ngaa nda̱wa̱á. Índo̱ gándoo mani̱ndxu̱u̱ mbáa publicador bi̱ xóó tséjngúun iyááʼ ma̱ndoo magajnúu gáʼtaraʼa gajmíi̱n a̱ngiu̱lú bi̱ kúwá náa nagimbáanʼ. Mú rí xúgi̱ ma̱ndoo matrajxi̱i̱ bi̱ narasngáá a mu naninuʼ eʼwíinʼ bi̱ nandún munigajmaa Biblia. Á mu naʼthí dí naniniiʼ, ma̱ndoo maratha̱a̱n matanigajmaa̱ ga̱jma̱a̱ʼ xa̱bu̱ buʼko̱. Atasngajmaa video Xú káʼnii nindxu̱u̱ rí miʼsngáa ga̱jma̱a̱ numuu Biblia rá. *

10. Xóo eʼthí 1 Tesalonicenses 2:7, 8, xú káʼnii gándoo bi̱ naʼsngáa mbaʼyáridoo Pablo rá.

¹⁰ Bi̱ nusngáa gíʼmaa maxmiéjúnʼ gajkhun kuñúún xa̱bu̱ bi̱ nusngúún. Gíʼmaa mbuñún rí xájyúuʼ má gáʼga̱nú mani̱ndxu̱ún xóo a̱ngiu̱ún (atraxnuu 1 Tesalonicenses 2:7, 8). * Ikhiin maʼniún mingíjyúuʼ rí muniñaʼ rambáxu̱u̱n gajmiún eʼwíínʼ xa̱bu̱ bi̱ kúwá náa numbaaʼ ga̱jma̱a̱ rí muriʼkhumijná muni ñajuunʼ Jeobá. Ndayóoʼ rí mumbañún muxkamiin bi̱ mambáxu̱u̱n gajmiún náa congregación. Gambaxáʼ ga̱jma̱a̱ʼ bi̱ narasngáá raʼkháa i̱ndó mbiʼi dí natanigajmaa ma̱ngaa ma̱ndoo matríyaʼ i̱ʼwáʼ mbiʼi mu maratha̱a̱n ga̱jma̱a̱ teléfono, mataxuʼnguánʼ mensaje o mi̱dxu̱ʼ gáta̱ya̱a̱ náa goʼwóo mbá xnga̱a̱, xúʼko̱ gatasngajmá rí naxmiéjuanʼ xtayáá.

11. Tsíin eyulú maxkamiin bi̱ nuʼsngúún náa nagimbáanʼ, ga̱jma̱a̱ náa numuu rá.

¹¹ Rígá mbá ajngáa rí naʼthí: “Náa mbá xuajen ndayóo rí xúgínʼ xa̱bu̱ muruguambáá muni mbaja̱a̱ mbáa ada̱”. Xóo muʼthá: “Ndayóoʼ rí náa congregación muruguambáá mu mbáa xa̱bu̱ maʼga̱nú majngúun iyááʼ”. Ikha jngó bi̱ nusngáa ga̱jma̱a̱ numuu Biblia nagún gajmiún eʼwíínʼ a̱ngiu̱lú bi̱ kúwá náa congregación mu mambáxu̱u̱n gajmiún bi̱ kúwá rajmañún. Xúʼko̱ ikhaa ma̱ndoo mambaxúu gajmíi̱n bi̱ kúwá náa xuajñuu Dios bi̱ mumbayíí mambáxu̱u̱ ga̱jma̱a̱ Jeobá ma̱ngaa mumbayíí índo̱ gagíʼdoo xkujndu. Nandulú rí xa̱bu̱ bi̱ nuʼsngúún makumún rí kúwá náa congregación ga̱jma̱a̱ rí ni̱ndxu̱ún a̱ngiu̱lú bi̱ nambáxu̱u̱n gajmiún Dios. Á mu naʼngo̱o̱ nuʼni rí ikhiin manigu̱u̱nʼ mambáxu̱u̱n gajmiún a̱ngiu̱lú, ikhú xáʼniun mingíjyúuʼ muniñaaʼ rambáxu̱u̱n gajmiún xa̱bu̱ bi̱ tsimbañúún maʼndún kuyáá Jeobá (Prov. 13:20). Á mu bi̱ nambáxu̱u̱n gajmiún nákhá ginii nánguá eñuun gúñún, ma̱ndoo muxkamiin bi̱ mambaxúún gajmiún náa xuajñuu Jeobá (Mar. 10:29, 30; 1 Ped. 4:4).

12. Náa numuu dí gíʼmaa muʼthán maxnáximinaʼ ga̱jma̱a̱ rí majngúun iyááʼ bi̱ nuʼsngáá rá.

¹² Gíʼmaa maratha̱a̱n má xúʼko̱ rí gíʼdoo numuu maxnáximinaʼ majngúun iyááʼ. Rí nuʼsngáá mbáa xa̱bu̱ ga̱jma̱a̱ numuu Biblia nandulú rí mumbáyii maʼga̱nú majngúun iyááʼ mu maʼni ñajuunʼ Jeobá. Á mu xa̱bu̱ mbayuuʼ má xtáa raʼnigajmaa má xúʼko̱ ga̱jma̱a̱ nagíʼdu̱u̱ na̱jkha̱ reunión, ikhaa gíʼmaa mbaʼyoo rí nandulú mumbáyii mani̱ndxu̱u̱ xa̱bi̱i̱ Jeobá.

13. Ndiéjunʼ gándoo magíminaʼ maʼni bi̱ nuʼsngáá mu majngúun iyááʼ rá.

¹³ Rígá mbaʼa rí ndayóo maʼni mbáa bi̱ nuʼsngáá mu ma̱ndoo majngúun iyááʼ. Timbá, gíʼmaa maniniiʼ Jeobá ga̱jma̱a̱ ma̱ndoo kaʼyoo ma̱ngaa rí magiʼdoo fe náa ikhaa (Juan 3:16; 17:3). Ikhú bi̱ nuʼsngáá maʼga̱nú mambáxu̱u̱ ga̱jma̱a̱ Jeobá ma̱ngaa mambáxu̱u̱n gajmiún bi̱ kúwá náa congregación (Heb. 10:24, 25; Sant. 4:8). Bi̱ nuʼsngáá naʼni gaʼduunʼ dí ra̱májánʼ ga̱jma̱a̱ naniñuʼ rí niʼni nákhá ginii (Hech. 3:19). Fe rí gíʼdoo naxkaxi̱i̱ maʼthúún eʼwíínʼ rí gajkhun (2 Cor. 4:13). Ga̱jma̱a̱ naxnáximinaʼ náa Jeobá mu nda̱wa̱á majngúun iyááʼ (1 Ped. 3:21; 4:2). Xúgínʼ nduyáá rí mbiʼi rúʼko̱ nindxu̱u̱ mbá mbiʼi gagi. Mámbá índo̱ naʼngo̱o̱ naʼni dí nigíminaʼ bi̱ nuʼsngáá ma̱ndoo muʼthán dí ra̱ʼkhá tháán májánʼ eʼni ga̱jma̱a̱ guʼtháán rí maʼni má xúʼko̱.

14. Xú káʼnii gándoo maʼni bi̱ naʼsngáa mbaʼyoo á mu najmañuu bi̱ naʼsngóo rá.

¹⁴ Ndayóoʼ rí muguaʼthi̱i̱n índo̱ numbáyíí mbáa bi̱ nuʼsngáá mu maxnáximinaʼ ga̱jma̱a̱ rí majngúun iyááʼ. Mú nguáná ndayóoʼ mbuʼyáá á mu gajkhun nandoo maʼni ñajuunʼ Jeobá. Lá nakujmaa rí bi̱ narasngáá nagíʼ naʼnimbo̱o̱ rí niʼtáñajunʼ Jesús ráʼ. O i̱ndó nandoo majmañuu rí na̱ʼkha̱ náa Biblia che̱ʼ.

15. Ndiéjunʼ rí gíʼmaa mbuʼyáá náa bi̱ nuʼsngáá rá.

¹⁵ Atayáá xú káʼnii ejkha̱ rajmañuu bi̱ narasngáá. Mbá xkri̱da, nasngájma rí naku̱mu̱u̱ kaʼyoo Jeobá xáʼ. Naʼthá kháñuu Jeobá xáʼ. (Sal. 116:1, 2) Naniguuʼ maguxnuu Biblia xáʼ. (Sal. 119:97.) Na̱jkha̱ xúgíʼ reunión xáʼ. (Sal. 22:22.) Niriʼkhuu xóo maxtáa xáʼ. (Sal. 119:112.) Naʼthúún bi̱ kaʼñúún ga̱jma̱a̱ bi̱ nambáxu̱u̱ gajmíi̱n rí xtáa rajmañuu xáʼ. (Sal. 9:1.) Rí majphú itháan gíʼdoo numuu, lá nandoo mani̱ndxu̱u̱ xa̱bi̱i̱ Jeobá xáʼ. (Sal. 40:8.) Á mu bi̱ narasngáá nimbá ndaa rí eyoo gaʼni, atayáá  náa numuu rí naʼni xúʼko̱, aratháán mbájmbu ga̱jma̱a̱ gamajkhu. *

16. Nguáná gándoo muniʼñááʼ ruʼsngáá mbáa rá.

¹⁶ Atayáá á mu ma̱ndoo marasngáá xóó xa̱bu̱ buʼko̱. Atraximinaʼ: “Naʼnirataminaʼ bi̱ nasngóo ráʼ. Na̱jkha̱ reunión xáʼ. Naʼniuu gakhi̱i̱ maniñuuʼ raʼni dí ra̱májánʼ xáʼ. Xóó na̱jkha̱ o naʼni rí na̱ʼkha̱ náa religión rí mindu̱wa̱ʼ xáʼ.” Á mu rí xúʼko̱, rí muʼnigajmaa gajmiúlú mani̱ndxu̱u̱ xóo rí nandulú muʼsngáá mbáa majmañuu maʼga̱ awúún iyaʼ mú ikhaa tsíyoo marmajaminaʼ. Á mu bi̱ nuʼsngáá tseʼyamajkhuu rí xtáa rajmañuu ga̱jma̱a̱ rí tsíyóo gariʼkuminaʼ. Nda̱a̱ numuu rí muʼnigajmaa gajmiúlú xóó.

17. Xó má eʼthí 1 Timoteo 4:16, ndiéjunʼ gíʼmaa muni̱ bi̱ nusngáa ga̱jma̱a̱ numuu Biblia rá.

¹⁷ Rí muʼsngúún xa̱bu̱ raʼkháa gitsíin nindxu̱u̱ ga̱jma̱a̱ nandulú rí bi̱ nuʼsngúún majngún iyááʼ. Ikha jngó guniʼñááʼ rí Biblia maʼsngóo xa̱bu̱ ma̱ngaa gusngajmá rí nanigulúʼ ga̱jma̱a̱ rí nduʼyáá dí gajkhun nindxu̱u̱ rí nuʼthá índo̱ nuʼsngáa. Guʼtháán bi̱ nuʼsngáá rí mambáxu̱u̱ gajmíi̱nʼ bi̱ kúwá náa congregación. Ga̱jma̱a̱ guʼtháán rí magíʼ maxnáximinaʼ náa Jeobá ga̱jma̱a̱ rí majngúun iyááʼ ma̱ngaa guʼyáá xú káʼnii egíminaʼ maʼnimbánuu rí naʼthí náa Biblia. (Atayáá kúgumaʼá “ Rí gíʼmaa maʼni bi̱ naʼsngáa”.) ¡Nadxulú wéñuʼ rí nuʼni ñajunʼ rígi̱ rí muʼthúún eʼwíinʼ mu makáwíin! Guʼnimijna xúgíʼ xóo eʼngo̱o̱ muʼsngúún xa̱bu̱ rí naʼthí náa Biblia mu majngún iyááʼ.