1. Tanbasá hanorin ema sai dixípulu bele salva sira-nia moris?

HANORIN ema sai dixípulu bele salva sira-nia moris. Oinsá ita hatene ida-neʼe? Bainhira Jesus fó mandamentu neʼebé hakerek iha Mateus 28:19, 20, nia hatete: “Laʼo bá no hanorin ema . . . atu sai haʼu-nia dixípulu, fó batizmu ba sira.” Batizmu importante ka lae? Sin importante. Ita presiza hetan batizmu atu bele hetan salvasaun. Ema neʼebé hakarak hetan batizmu tenke fiar katak liuhusi Jesus nia mate no moris-hiʼas deʼit mak sira bele hetan salvasaun. Tan neʼe, apóstolu Pedro hatete ba ninia maluk Kristaun sira: “Agora batizmu salva imi liuhusi imi-nia fiar ba Jesus Kristu nia moris-hiʼas.” (1 Ped 3:21) Entaun bainhira dixípulu foun hetan batizmu nia iha esperansa atu moris ba nafatin.

2. Tuir 2 Timóteo 4:1, 2 ita presiza halo saida nuʼudar mestre ida?

² Atu hanorin ema sai dixípulu, ita presiza aumenta ita-nia “matenek atu hanorin”. (Lee 2 Timóteo 4:1, 2.) Tanbasá? Tanba Jesus haruka ita: “Laʼo bá no hanorin ema . . . atu sai haʼu-nia dixípulu.” Apóstolu Paulo haruka ita atu “kaer metin” serbisu neʼe, ‘tanba hodi halo nuneʼe mak ita sei salva ita-nia an rasik no mós ema sira neʼebé rona ita’. Tan neʼe Paulo hatete: ‘Kontinua hanoin didiʼak kona-ba . . . ita-nia hanorin.’ (1 Tim 4:16) Atu ema bele sai dixípulu, ita presiza hanorin sira ho matenek.

3. Iha lisaun neʼe, ita sei aprende kona-ba saida?

³ Iha mundu tomak, Testemuña sira estuda Bíblia ho ema millaun ba millaun. Maibé hanesan temi iha lisaun antes neʼe, ita hakarak hatene oinsá ita bele ajuda estudante barak liután atu hetan batizmu. Iha lisaun neʼe, ita sei koʼalia kona-ba buat lima tan neʼebé mestre hotu presiza  halo atu ajuda sira-nia estudante laʼo ba oin no hetan batizmu.

4. Tanbasá mestre Bíblia presiza hatudu kontrola an bainhira halaʼo estuda Bíblia ho ema? (Haree mós nota-rodapé.)

⁴ Ita gosta tebes atu hanorin Bíblia ba ema. Tan neʼe, dala ruma ita hakarak atu koʼalia barak kona-ba neʼe. Maibé diʼak atu la koʼalia barak bainhira estuda Bíblia ho ema, dirije Estudu Livru Haklaken ka Estudu Bíblia iha Kongregasaun. Mestre sira hakarak uza Bíblia ho didiʼak bainhira hanorin, tan neʼe sira presiza kontrola an atu la koʼalia barak no la koko atu esplika buat hotu neʼebé sira hatene kona-ba eskritura ka tópiku ruma. * (João 16:12) Hanoin toʼok kona-ba Ita-nia koñesimentu kona-ba Bíblia bainhira Ita foin hetan batizmu no kompara ida-neʼe ho Ita-nia koñesimentu agora. Kuandu Ita foin hetan batizmu, karik Ita komprende deʼit hanorin báziku husi Bíblia. (Ebr 6:1) Presiza tinan barak ba Ita atu aprende buat hotu neʼebé Ita hatene agora. Tan neʼe koko atu la hanorin buat hotu ba Ita-nia estudante iha tempu ida deʼit.

5. (a) Tuir 1 Tesalónika 2:13, ita hakarak ita-nia estudante atu komprende saida? (b) Oinsá ita bele anima ita-nia estudante atu koʼalia kona-ba buat neʼebé sira aprende?

⁵ Ita hakarak Ita-nia estudante Bíblia atu komprende katak buat neʼebé nia aprende mai husi Bíblia. (Lee 1 Tesalónika 2:13.) Oinsá Ita bele halo ida-neʼe? Anima Ita-nia estudante atu koʼalia kona-ba buat neʼebé nia aprende ona. Duké Ita mak sempre esplika eskritura sira, husu nia atu esplika eskritura sira ba Ita. Ajuda nia atu komprende oinsá Bíblia nia hanorin sira kona ninia moris. Husu pergunta sira neʼebé sei book nia atu fó sai ninia hanoin no sentimentu kona-ba eskritura neʼebé nia lee. (Lc 10:25-28) Porezemplu, husu ba nia: “Oinsá eskritura neʼe ajuda Ita komprende Jeová nia hahalok ida?” “Oinsá buat neʼebé Ita aprende bele ajuda Ita?” “Ita sente oinsá kona-ba buat neʼebé Ita foin aprende?” (Prov 20:5) Buat neʼebé importante liu mak Ita-nia estudante hadomi no aplika lia-loos neʼebé nia aprende, laʼós koñesimentu neʼebé nia hetan.

6. Tanbasá diʼak atu husu haklaken-naʼin neʼebé iha esperiénsia atu hamaluk ita?

⁶ Ita iha toman atu husu haklaken-naʼin neʼebé iha esperiénsia atu hamaluk Ita estuda Bíblia ho ema ka lae? Se nuneʼe, Ita bele husu nia atu fó sai ninia hanoin  kona-ba dalan neʼebé Ita dirije estudu neʼe no husu se Ita uza didiʼak Bíblia ka lae. Se Ita hakarak aumenta Ita-nia matenek nuʼudar mestre, Ita presiza haraik an. (Kompara ho Apóstolu 18:24-26.) Husu ninia hanoin se nia sente Ita-nia estudante komprende informasaun ka lae. Ita mós bele husu haklaken-naʼin neʼe atu dirije estudu ba semana ida ka liu se Ita labele halo ida-neʼe tanba razaun ruma. Hodi halo nuneʼe Ita-nia estudante sei kontinua estuda semana-semana no nia mós sei komprende katak ninia estuda mak importante. Ita labele hanoin katak neʼe mak “Ita-nia” estudante no ema seluk labele dirije. Ita hakarak buat neʼebé diʼak ba Ita-nia estudante atu nuneʼe nia bele kontinua aprende kona-ba lia-loos.

7. Saida mak bele book Ita-nia estudante atu laran-manas ho buat neʼebé nia aprende?

⁷ Ita-nia estudante presiza haree katak Ita laran-manas no fiar metin ba lia-loos husi Bíblia. (1 Tes 1:5) Neʼe bele book nia atu sente laran-manas ho buat neʼebé nia aprende. Karik Ita bele esplika oinsá moris tuir Bíblia nia prinsípiu sira ajuda ona Ita. Hodi halo nuneʼe, nia sei komprende katak Bíblia mós bele ajuda nia.

8. Ita bele halo saida tan atu ajuda Ita-nia estudante? Tanbasá?

⁸ Bainhira Ita estuda ho Ita-nia estudante, fó sai ba nia kona-ba irmaun-irmán sira neʼebé hasoru problema hanesan ho ninian no oinsá sira manán problema neʼe. Karik irmaun ka irmán nia ezemplu bele ajuda Ita-nia estudante. Tan neʼe, husu sira atu tuir Ita-nia estuda. Ka karik Ita bele hetan esperiénsia ruma husi série “Bíblia troka ema nia moris” iha jw.org. * Esperiénsia no vídeo sira-neʼe bele ajuda Ita-nia estudante komprende katak Bíblia bele ajuda nia halo mudansa.

9. Oinsá Ita bele anima Ita-nia estudante atu fahe buat neʼebé nia aprende ho família no belun sira?

⁹ Se Ita-nia estudante mak kaben-naʼin, ninia kaben mós estuda ka lae? Se lae, konvida ninia kaben atu tuir Ita-nia estuda. Anima nia atu fahe buat neʼebé nia aprende ona ho ninia família no belun sira. (João 1:40-45) Oinsá? Karik Ita bele husu: “Oinsá Ita bele esplika pontu neʼe ba Ita-nia família?” ka “Eskritura saida mak Ita bele uza atu prova ida-neʼe ba Ita-nia  belun?” Hodi halo nuneʼe, Ita treinu Ita-nia estudante atu sai mestre. Bainhira nia kumpre kritéria nia bele sai haklaken-naʼin no komesa haklaken ho Ita-nia kongregasaun. Ita bele husu nia se nia hatene ema seluk neʼebé mós hakarak estuda Bíblia. Se nia fó sai kona-ba ema ruma, kontaktu kedas ema neʼe no oferese atu estuda Bíblia ho nia. Hatudu ba nia vídeo Oinsá mak ami halaʼo estuda Bíblia ho ema? *

10. Tuir 1 Tesalónika 2:7, 8, oinsá ita bele banati-tuir Paulo nia ezemplu?

¹⁰ Ita presiza hatudu interese ba Ita-nia estudante. Ita presiza haree nia nuʼudar ema neʼebé bele sai ita-nia irmaun ka irmán iha futuru. (Lee 1 Tesalónika 2:7, 8.) La fasil ba nia atu husik ninia belun sira iha mundu no halo mudansa atu bele serbí Jeová. Ita presiza ajuda nia atu habelun ho ema iha kongregasaun. Sai belun ho nia hodi gasta tempu ho nia, laʼós deʼit kuandu estuda hamutuk maibé mós iha tempu seluk. Ita bele hatudu katak Ita hanoin nia hodi telefone nia, haruka mensajen ka vizita nia maski neʼe laʼós Ita-nia loron atu estuda.

11. Ita hakarak ita-nia estudante atu hetan saida iha kongregasaun laran? Tanbasá?

¹¹ Baibain ema hotu apoia malu atu bele haboot oan ida. Nuneʼe mós, kongregasaun tomak presiza serbisu hamutuk atu hanorin ema ida sai dixípulu. Tan neʼe, mestre Bíblia neʼebé matenek sei fó koñese sira-nia estudante ba irmaun-irmán sira neʼebé bele fó influénsia diʼak ba estudante. Estudante bele kontente hodi ransu ho Maromak nia povu, no neʼe bele ajuda nia sai Jeová nia belun no mós ajuda nia kuandu hasoru problema. Ita hakarak ajuda estudante ida-idak atu sente katak nia mak parte ba kongregasaun no família espirituál. Ita hakarak ita-nia estudante atu gosta ita-nia família espirituál. Neʼe sei halo fasil liu ba nia atu para ransu ho ema neʼebé la ajuda nia atu hadomi Jeová. (Prov 13:20) Se ninia belun sira la gosta tan nia, nia hatene katak nia bele hetan belun neʼebé loos iha Jeová nia organizasaun.​—Mc 10:29, 30; 1 Ped 4:4.

12. Tanbasá ita presiza koʼalia kona-ba dedikasaun no batizmu ho ita-nia estudante?

¹² Ita presiza koʼalia beibeik kona-ba tanbasá importante atu dedika an ba  Jeová no hetan batizmu. Ita estuda Bíblia ho ema ruma tanba Ita hakarak ajuda nia atu serbí Jeová no hetan batizmu. Bainhira nia estuda ona durante fulan balu no mós tuir ona reuniaun, nia presiza komprende katak razaun tanbasá nia estuda mak atu sai Jeová nia Testemuña ida.

13. Ita-nia estudante presiza halo saida hodi laʼo ba oin no hetan batizmu?

¹³ Ita-nia estudante neʼebé hakarak atu hetan batizmu bele halo buat balu. Primeiru, nia presiza koñese no hadomi Jeová no tau fiar ba Jeová. (João 3:16; 17:3) Tuirmai, nia sai Jeová nia belun no mós habelun ho irmaun-irmán sira iha kongregasaun. (Ebr 10:24, 25; Tgo 4:8) Nia mós presiza husik tiha ninia toman aat no arrepende ninia sala sira. (Após 3:19) No ninia fiar book nia atu fahe lia-loos neʼebé nia aprende ho ema seluk. (2 Kor 4:13) Tuirmai nia dedika an ba Jeová no hatudu sai ninia dedikasaun hodi hetan batizmu. (1 Ped 3:21; 4:2) Ita kontente tebes bainhira nia hetan batizmu. Bainhira Ita-nia estudante halo hakat ida-idak atu bele kumpre ninia planu, gaba nia beibeik. No anima nia atu kontinua laʼo ba oin no hetan batizmu.

14. Oinsá Ita bele buka-hatene se Ita-nia estudante laʼo ba oin?

¹⁴ Ita presiza hatudu pasiénsia bainhira Ita ajuda Ita-nia estudante laʼo ba oin no hetan batizmu. Maibé Ita mós presiza buka-hatene se nia hakarak duni serbí Maromak Jeová. Ita-nia estudante hatudu katak nia hakarak halo tuir Jesus nia mandamentu sira ka lae? Ka nia hakarak aprende deʼit informasaun kona-ba Bíblia?

15. Estudante neʼebé laʼo ba oin halo saida?

¹⁵ Analiza beibeik oinsá Ita-nia estudante laʼo ba oin. Porezemplu, nia fó sai ninia domin ba Jeová ka lae? Nia halo orasaun ba Jeová ka lae? (Sal 116:1, 2) Nia gosta atu lee Bíblia ka lae? (Sal 119:97) Nia tuir reuniaun beibeik ka lae? (Sal 22:22) Nia komesa halo mudansa sira ka lae? (Sal 119:112) Nia komesa fahe lia-loos ba ninia família no belun sira ka lae? (Sal 9:1) No importante liu, nia hakarak sai Testemuña ba Jeová ida ka lae?  (Sal 40:8) Se Ita-nia estudante la laʼo ba oin iha dalan sira-neʼe, Ita presiza uza matenek hodi buka-hatene tanbasá no koʼalia nakloke ho nia kona-ba neʼe. *

16. Bainhira mak Ita presiza para estuda ho ema?

¹⁶ Dala ruma Ita presiza hanoin kona-ba para estuda ho ema ruma. Husu ba Ita-nia an: “Haʼu-nia estudante lakohi prepara ba ninia estuda ka lae? Nia lakohi mai tuir reuniaun ka lae? Nia nafatin iha toman aat sira ka lae? Nia nafatin sai membru ba relijiaun falsu ka lae?” Se resposta mak sin no Ita kontinua estuda ho nia, neʼe hanesan Ita koko hanorin ema atu nani maibé nia lakohi sai bokon. Se Ita-nia estudante la hafolin buat neʼebé nia aprende no la prontu atu halo mudansa, diʼak liu atu la kontinua estuda ho nia.

17. Tuir 1 Timóteo 4:16, mestre Bíblia hotu tenke halo saida?

¹⁷ Importante atu kumpre ita-nia responsabilidade atu hanorin ema sai dixípulu, no ita hakarak ajuda ita-nia estudante atu laʼo ba oin no hetan batizmu. Tan neʼe ita uza Bíblia bainhira hanorin ema no ita hanorin ho laran-manas no fiar metin. Ita anima ita-nia estudante atu habelun ho irmaun-irmán sira iha kongregasaun. No ita koʼalia beibeik kona-ba planu atu dedika an no hetan batizmu. Ita mós dala ruma analiza oinsá ita-nia estudante laʼo ba oin. (Haree kaixa “ Buat neʼebé mestre Bíblia presiza halo”.) Ita kontente tebes tanba bele hola parte iha serbisu importante neʼe. Mai ita hakaʼas an atu ajuda ita-nia estudante Bíblia atu laʼo ba oin no hetan batizmu.