1. Khu ginani thumo nyo gire vapizane wu gu na ni lisima?

GU GIRA vapizane i thumo nya lisima ngudzu. Ha gu dziti kharini? Tepo Jesu a nga ningeya gileletelo gi gomogo omu ga Matewu 28:19, 20 a di khuye: ‘Indrani, . . . mu ya gira vapizane . . . , mu va bhapatisa.’ Khu ginani gubhapatiswa gu gu ni lisima? Ha gu ba hi vbweta gu vbanya kala gupindruga hi yede gu bhapatiswa. Oyu a vbwetago gu bhapatiswa yede gu khodwa gu khuye a na mana womi nya pindrugedwa khu kotani nya olu Jesu a nga hi feya a bwe a wuswa. Khiso si nga gira mupostoli Pedro a embeya maKristo kwanu khuye: “Gubhapatisw[a] mu vbanyiswago khugo enu, muhuno . . . gwa guta khu guwuga ga Jesu Kristo.” (1 Ped. 3:21) Khu kharato, tepo mupizane nya muphya a bhapatiswago, a nga manega ni gu tumba nyo vbanye kala gupindruga.

2. Ginani egi 2 Thimoti 4:1, 2 a hi kutsago gu gira kha nga vahevbudzi?

² Gasi gu gira vapizane hi yede gu khala vahevbudzi nya vadi. (Leri 2 Thimoti 4:1, 2.) Khu ginani? Kholu Jesu a hi leletede khuye: ‘Indrani, . . . mu ya gira vapizane . . . , mu va hevbudza.’ Mupostoli Pawulo ganede khu gu “simama” avba nya thumo wowo, kholu wa gu gira isoso “u na mana guvbanyiswa uwe ni vale va gu yingisago.” Khu gighelo gyogyo Pawulo a di khuye: ‘Dzi wonele . . . avba nya esi u hevbudzago.’ (1 Thim. 4:16) Kha nga olu gu hevbudza gu gimbeleyanago ni gu gira vapizane, gu vbwetega hi khala vahevbudzi nya vadi.

3. Ginani hi na bhulago khigyo avba nya ndrima yeyi maningano ni gu gimbidzisa sihevbulo nya Bhibhiliya?

³ Ethu ha gu gimbidzisa dzimiliyoni nya sihevbulo nya Bhibhiliya mafuni gwatshavbo. Ganiolu, kha nga hi si wonidego gupheyani nya ndrima yeyi, ethu ha gu vbweta guti edzi hi nga phasago khidzo vathu  vovo nya vangivangi, gasi va khala vapizane va Jesu Kristo va bhapatisidwego. Avba nya ndrima yeyi hi na bhula khu 5 silo esi ni wevbini muhevbudzi a yedego gu gira gasi gu phasa gihevbuli gu dandra khu liphuvboni kala giya bhapatiswa.

4. Khu ginani muhevbudzi a yedego gu potsa gu tadza silo nyo ganeye a gu ba a gimbidzisa gihevbulo nya Bhibhiliya? (Wona gambe tshamuselo wa vbavbatshi.)

⁴ Hi ngu ma gola mahungu hi hevbudzago ma gomogo omu nya Lito la Nungungulu. Khu kharato, adzina hi nga lingwa gu ganeya ngudzu khesi hi si golago. Ambari ulolo, gani gu gimbidzisa gihevbulo nya Mukhedziseyi, gani gihevbulo nya Bhibhiliya nya libandla mwendro gihevbulo nya Bhibhiliya ndrangani, muhevbudzi kha yeli gu tadza silo nyo ganeye. Ni wevbini muhevbudzi a ngu vbweta gu thumisa gwadi Bhibhiliya tepo a hevbudzago, khu kharato yede gu dzi woneya gasi a si tadzi silo nyo ganeye ni gu a si zami gu tshamuseya silo satshavbo a sitigo khu livhesi nyo khaguri nya Bhibhiliya mwendro mahungu * nyo khaguri. (Joh. 16:12) Nga dundrugeya khu silo nya singi u sitigo khu Bhibhiliya olu ni esi u nga ba u siti tepo u nga hongola uya Bhapatiswa. Kha si kanakanisi gu khiso tepo u nga bhapatiswa khiyo u di guti silo nya litshina basi. (Hebh. 6:1) Si dzegide myaga nya yingi gasi gu hevbula esi u sitigo muhuno, khu kharato, u nga zami gu tadza hungo gihevbuli gyago nya Bhibhiliya khu gu gi embedzeya satshavbo u sitigo khu gumogo.

5. (a) Guya khu 1 Vatesalonika 2:13 ginani egi hi vbwetago gu khethu gihevbuli gyathu nya Bhibhiliya gi si pwisisa avba nya gihevbulo gyagyo nya Bhibhiliya? (b) Hi nga kutsa kharini gihevbuli gyathu gu ganeya khesi gi si hevbulago?

⁵ Ha gu vbweta gu khethu sihevbuli sathu nya Bhibhiliya si pwisisa esi si hevbulago omu nya Lito la Nungungulu. (Leri 1 Vatesalonika 2:13.) Hi nga gira kharini isoso? Kutsa gihevbuli gyago gu ganeya khesi gi si hevbulago. Vbavbandze nya gu tepo yatshavbo u gi tshamuseya milowo, gi dige nigyo gi gu tshamuseya. Phasa gihevbuli gyago gu wona edzi Lito la Nungungulu li nga gi phasago khidzo. Gira siwudziso gihevbuli gyago si na gi phasago gu ganeya esi gi pimisago ni edzi gi dzipwago khidzo khu lowo gi leridego. (Luka 10:25-28) Khu giyeyedzo gi wudzise khuwe: “Lowo wowu wu gu phaside kharini gu wona limwedo nya makhalelo ya Jehovha?” “Esi u nga rigu gu leri omu nya Bhibhiliya si nga gu phasa kharini?” “Wa gu dzipwa kharini khesi u nga rigu gu leri?” (Mav. 20:5) Nya lisima khu gu gihevbuli gyago gi gola ni gu thumisa esi gi sitigo nasiri pimo nya guti gi gu nago.

6. Khu ginani si gu sadi gu hongola ni muhevbudzi a vidzidwego gasi uya gimbidzisa naye gihevbulo nya Bhibhiliya?

⁶ Tepo u hongolago uya gimbidzisa gihevbulo  nya Bhibhiliya, ina u ngu hongola ni vahuweleyi va gu vahevbudzi va vidzidwego? Abari gu ina, va wudzise gu khuwe va gu yi wona kharini ndziya u gimbidzisago khiyo gihevbulo nya Bhibhiliya nigu ina u ngu thumisa gwadi Bhibhiliya gani? Wa gu ba u vbweta gu khala muhevbudzi nya wadi u yede gu dzinogisa. (Fananisa ni Mith. 18:24-26.) Khu kharato wudzisa muhevbudzi a vidzidwego gu khuwe ina gihevbuli gyago nya Bhibhiliya gi ngu si pwisisa esi gi hevbulago gani. Wa gu vbweta gu endra u nga lomba mumbe muhuweleyi gasi a tshala a gu gimbidziseya gihevbulo. Isoso si na gira gu gihevbulo gi si emi nigu si na phasa gihevbuli gyago nya Bhibhiliya gu wona lisima nya gu hevbule. U nga tshuki u pimisa gu khuwe egi gihevbuli “gyago” mwalo a yedego gu gi hevbudza. Gu diga satshavbo, wa gu vbweta gu khuwe gihevbuli gyago gi dandra khu liphuvboni, gi yede gu simama gu hevbula lisine.

7. Ginani gi na phasago gihevbuli gu engedzeya gu gola esi gi si hevbulago?

⁷ Gihevbuli gyago gi yede gu wona gu khigyo uwe u ngu gola ni gu khodwa esi Bhibhiliya yi si hevbudzago. (1 Tes. 1:5) Isoso si na gira gu gihevbuli gi engedzeya gu gola esi gi si hevbulago. Sa gu kodzega, gi embeye edzi matshina nya milayo nya Bhibhiliya ma gu phasago khidzo womini gwago. Khavbovbo gihevbuli gi na tugula gu khigyo Bhibhiliya yi na ni wusingalagadzi wu nga gi phasago nigyo womini wagyo.

8. Ginani gambe u nga girago gasi gu phasa gihevbuli gyago nya Bhibhiliya nigu khu ginani u yedego gu gira isoso?

⁸ Ndrani nya gihevbulo, bhuleya gihevbuli gyago nya Bhibhiliya khu vandriyathu va tshanganidego ni sigaradzo nyo fane ni sagyo ni edzi va si padego khidzo. U nga hongola u ya gimbidzisa gihevbulo ni moyo nya ndriyathu wa libandlani oyu a gu ni giyeyedzo gi nga phasago gihevbuli gyago. Mwendro gu mana matshango ma gomogo omu nya jw.org omu nya gipandre “A Biblia muda a vida das pessoas.” * Dzindrima dzodzo ni dzivhidhiyu dzakona dzi na phasa gihevbuli gyago gu wona lisima nya gu thumise matshina nya milayo nya Bhibhiliya womini wagyo.

9. U nga kutsa kharini gihevbuli gyago nya Bhibhiliya gu bhuleya valongo ni dzipari khesi gi si hevbulago?

⁹ Abari gu gihevbuli gyago nya Bhibhiliya gi tshadhide, ina pari yagyo nya wugadzi yi ngu hevbula? Abari gu ne, yi rane gasi yi ta patega niyo avba nya gihevbulo. Kutsa gihevbuli gyago gu bhuleya valongo ni dzipari esi gi hevbulago. (Joh. 1:40-45) U nga gira kharini? U nga wudzisa gihevbuli  gyago khuwe: “U di hadzi ma tshamuseya kharini mahungu yaya ga nongo wago?” mwendro “Khu wevbini lowo u nga wu thumisago gasi gu tshamuseya mahungu yaya ga pari yago?” Khu ndziya yeyi u na ba u dongiseya gihevbuli gyago gu khala muhevbudzi nya wadi. Khavbovbo, a gu dzumeledwa a nga pheya gu patega thumoni nyo tshumayele kha nga muhuweleyi nya mba bhapatiswa. U nga wudzisa gihevbuli gyago nya Bhibhiliya gu khuwe ina gi nguti muthu nyo khaguri a vbwetago gu hevbula Bhibhiliya gani. Gya gu ba gi muti, vbwetedzeya muthu yoyo khu gu vbiredza u bwe u pheya naye gihevbulo. Mu yeyedze vhidhiyu yi gu khiyo Ginani gi giregago gihevbuloni nya Bhibhiliya? *

10. Guya khu 1 Vatesalonika 2:7, 8, muhevbudzi a nga pimedzeya kharini giyeyedzo gya Pawulo?

¹⁰ Muhevbudzi yede gu yeyedza gu khatala nya lisine khu sihevbuli saye a bwe a si wona kha ga vathu va na khalago vandriyaye mindru ga tshigu. (Leri 1 Vatesalonika 2:7, 8.) Kha si vbevbugi gu sihevbuli si diga dzipari si nga ba siri nadzo gale si bwe si gira guvbindrugedza nyo khaguri gasi si thumeya Jehovha. Gu vbwetega hi si phasa gasi si mana dzipari nya lisine libandlani. Khala pari nya gihevbuli gyago nigu vbavbandze nya gu hevbule nagyo basi dzi ninge tepo nya gu vbungadze nagyo. Yeyedza gu khuwe u ngu khatala khu gihevbuli gyago khu gu u gi ligareya, u gi rumeleya mesaji mwendro gu gi wuseya gaya gwagyo.

11. Ginani hi vbwetago gu khethu sihevbuli sathu si gi mana libandlani nigu khu ginani?

¹¹ Livingu nyo khaguri lari khilo: “Ni wevbini muthu a vbanyago dhoropani yede gu phasa sanana gu dandra gwadi.” Hi nga ganeya gu khethu: “Ni wevbini muthu libandlani yede gu phasa vambe gu dandra khu liphuvboni.” Khu kharato, tepo muhevbudzi nya wadi nya Bhibhiliya a phasago sihevbuli saye gu thanga wupari ni vambe libandlani, avo va na si phasa gu khala dzipari dza Jehovha. Sihevbuli nya Bhibhiliya si nga dzi buza khu wupari ni vathu va Nungungulu nigu avo va na si phasa gu khala dzipari dza Jehovha va bwe va si tiyisa sa gu emisana ni sigaradzo. Ha gu vbweta gu khethu gihevbuli gyathu gi dzipwa na gi gu gira gipandre nya libandla ni ndranga yathu ya liphuvboni gi bwe gi dzipwa na gi gu haladzwa khu vandriyathu. Isoso, si na gi phasa gu ema gu dzi pata ni vathu va na ghohago wupari wagyo ni Jehovha. (Mav. 13:20) Va gu za vathu gi nga ba gi tala gu hagana navo gale yoyo va pheya gu gi sefa, gi na dzegeya gu si wona gu khigyo dzipari nya lisine gi nga dzi mana basi hengeledzanoni ya Jehovha. — Marko 10:29, 30; 1 Ped. 4:4.

12. Khu ginani hi yedego gu bhuleya gihevbuli gyathu khu lisima nya gu hendzeledze womi wagyo ga Jehovha gi bwe gi bhapatiswa?

¹² Tepo yatshavbo bhuleya gihevbuli gyago khu lisima nya gu gi hendzeledza womi wagyo ga Jehovha gi bwe gi bhapatiswa. Gighelo gi hi girago hi hevbula ni muthu gu mu phasa gasi a thumeya Jehovha a bwe a bhapatiswa. Hwane nya gu ba gihevbuli nya Bhibhiliya gi hevbude khu migimana gi bwe gi hongola mitshanganoni, gi yede gu pwisisa gu khigyo ethu ha gu vbweta gu gi phasa gu khala mweyo nya Dzifakazi dza Jehovha.

13. Ginani egi gihevbuli gi yedego gu gira gasi gi bhapatiswa?

¹³ Gu na ni silo nya singi esi gihevbuli nya Bhibhiliya gi vbwetago gu bhapatiswa gi yedego gu gira! Nyo pheye, gihevbuli gi yede guti ni gu haladza Jehovha gi bwe gi khodwa Gwaye. (Joh. 3:16; 17:3) Igyo gi yede gu khala pari ya Jehovha ni vandriyathu libandlani. (Hebh. 10:24, 25; Jak. 4:8) Khu gu hegisa, gi yede gu diga gu gira silo nyo vivbe gi bwe gi dzi laya ga sighoho sagyo. (Mith. 3:19) Nigu igyo gi yede gu bhuleya vambe khesi gi si khodwago. (2 Kor. 4:13) Khavbovbo, gi yede gu hendzeledza womi wagyo ga Jehovha gi bwe gi bhapatiswa. (1 Ped. 3:21; 4:2) Litshigu leli, litshigu nya gu tsakise ngudzu ga vatshavbo. Tepo gihevbuli gi dzegago mazambo ma yisago gubhapatiswatunu, gi zundze u bwe u gi kutsa gu simama gi gira isoso.

14. Muhevbudzi a nga gira kharini gasi gu wona gu khuye gihevbuli gyaye gi ngu dandra khu liphuvboni?

¹⁴ Hi yede gu laphisa monyo tepo hi phasago gihevbuli gyathu nya Bhibhiliya gasi gi ninganedwa khu gu bhapatiswa. Ganiolu hi yede gu dziti gambe gu khethu ina gi ngu dzina gu thumeya Jehovha gani. Ina gihevbuli gyago gi ngu yeyedza gu khigyo gi ngu dzi garadzeya gu engisa sileletelo sa Jesu? Mwendro gyo vbweta gu hevbula basi Bhibhiliya?

15. Ginani gi na phasago muhevbudzi gu tugula gu khuye gihevbuli gyaye gi ngu ninganedwa khu gu bhapatiswa gani?

¹⁵ Tepo yatshavbo gevisisa gasi gu wona gu gihevbuli gyago gi ngu gira gu vbindrugedza nyo khaguri gani. Khu giyeyedzo, ina gi ngu ganeya edzi gi dzipwago khidzo khu Jehovha? Ina gi ngu gombeya gwaye? (Ndzi. 116:1, 2) Ina gi ngu leri Bhibhiliya? (Ndzi. 119:97) Ina gi ngu manega mitshanganoni tepo yatshavbo? (Ndzi. 22:22) Ina igyo gi ngu thumisa esi gi si hevbulago womini wagyo? (Ndzi. 119:112) Ina gi phede gu bhuleya dzipari ni  valongo khesi gi si hevbulago? (Ndzi. 9:1) Nigu nya lisima, ina gi ngu dzina kamwe gu khala Fakazi ya Jehovha? (Ndzi. 40:8) Abari gu gihevbuli gyago kha gi giri silo sesi, zama gu tugula gighelo gyakona u bhula nagyo khu gwadi ganiolu khu ndziya nyo kongome. *

16. Ginani gi na yeyedzago gu khigyo hi yede gu ema gu hevbula ni muthu nyo khaguri?

¹⁶ Tepo yatshavbo zama gu wona gu ina u na simama gu hevbula ni muthu nyo khaguri gani. Dzi wudzise khuwe: Ina gihevbuli gi ngu dzi dongiseya gasi gu ta hevbula? Ina gi ngu tsakeya gu hongola mitshanganoni? Ina gi ngari ni mavbanyelo nyo vivbe? Ina gi ngari givbango nya wukhozeyi nya malipha? Abari gu hlamulo nya siwudziso sesi i ina, wa gu simama ni gihevbulo si na fana ni gu zama gu hevbudza muthu gu hambeya a si dzinigo gu nagana. Go ba guri gu gihevbuli kha gi tsakiswi khesi gi hevbulago nigu kha gi dzini gu vbindrugedza, tshukwana hi ema gu hevbula nagyo.

17. Guya khu 1 Thimoti 4:16, ginani egi vatshavbo vahevbudzi nya Bhibhiliya va yedego gu gira?

¹⁷ Khya lisima gu tadzisa thumo wathu nya gu gire vapizane hi bwe hi phasa sihevbuli sathu nya Bhibhiliya gu dandra khu liphuvboni kala siya bhapatiswa. Khu kharato, ethu ha gu diga Bhibhiliya yi hevbudza, hi bwe hevbudza na hi tsakide ni gu tiyisega khesi hi hevbudzago. Hi yede gu kutsa gihevbuli gyathu gu gira dzipari libandlani. Hi bwe hi gi kutsa gu dzi vegeya misuwo nya gu hendzeledze womi wagyo gi bwe gi bhapatiswa ni gu zama gu wona gu gihevbuli gyathu gi ngu gira guvbindrugedza nyo khaguri womini wagyo gani. (Wona kwadru yi gomogo pajina 13, yi gu khiyo “ Esi vahevbudzi va yedego gu gira gasi gu kutsa gihevbuli gu bhapatiswa.”) Lithomo gwathu gu patega avba nya thumo wowu nya lisima ngudzu. Gu vbwetega hi gira satshavbo hi si kodzago gasi gu phasa sihevbuli sathu nya Bhibhiliya gu ninganedwa khu gu bhapatiswa.