ARTIKULOʼIK BʼA SPAKLAJEL 42
Jastal oj jkoltaytik jun estudiante bʼa oj kʼot yiʼ jaʼ (xetʼan 2)
«Aa lec acuidado ba ja huen mismo. Jach ni ja jas huana seejeli» (1 TIM. 4:16).
TSʼEBʼOJ 77 Jun ijlabʼ bʼa yoj kʼikʼinal
JA JAS OJ PAKLAXUK *
1. ¿Jas yuj wa xkalatik ke ja yajel och nebʼumanil wani xbʼobʼ ya staʼ sakʼanil ja kristyano?
JA AʼTEL bʼa yajel och nebʼumanik jani bʼa oj staʼ sakʼanil ja kristyano. ¿Jas yuj jach wa xkalatiki? La juljkʼujoltik ke ja Jesús yaʼakan ja mandar it ja bʼa Mateo 28:19, 20 «caaxic», awik «och jnebumanil» sok «ti xa cʼulanex bautizara». Sok wani xnaʼatik jelni tʼilan ja yijel jaʼi, juni jasunuk jel tʼilan sbʼaja matik wa skʼana oj staʼ sakʼanile. Ja maʼ wa skʼana oj yi jaʼi tʼilani oj skʼuʼuk ke wani xbʼobʼ staʼ sakʼanil stsʼakatal yuja cham yuj keʼntik sok sakʼwi ja Jesús. Ja yujil, ja jekabʼanum Pedro yala yabʼye ja nebʼumaniki: «Cuando huax quiajtic jaʼ [...] [h]uantic snaajel jastal cʼulubalotic librar soc ja jmultiqui [...] como jaʼ ni yuj sacui ja Cajualtic Jesucristo» (1 Ped. 3:21). Ja yuj, masan ja bʼa jutsʼin wa xyiʼaj jaʼ june, wani xbʼobʼ ajyukyuj ja smajlajel bʼa ajyel sakʼan bʼa tolabida.
2. Jastalni wa xyala ja 2 Timoteo 4:1, 2, ¿jasa wa xmajlaxi bʼa keʼntik jastal maestroʼik?
2 Bʼa yajel och nebʼumanil, jelni tʼilan oj jnebʼtik jastal sjejel (kʼuman ja 2 Timoteo 4:1, 2). ¿Jas yuj? Yujni ja Jesús yakitik ja mandar it «caaxic», awik «och jnebumanil» sok «jeahuic[yile]». Ja jekabʼanum Pablo yala yabʼ ja Timoteo mok yakan skʼujolajel ja bʼa aʼtel jaw sok cha yala: «Jach cʼa huaxa cʼulan ja hueni, oj ni ataa ja hua coltajela y oj cho huaj staa ja scoltajel ja maʼ huas smaclaya». Mini cham wa xkabʼtik ja yayi ja rason it: «Aa lec acuidado [...] ja jas huana seejeli» (1 Tim. 4:16). Yuja aʼtel bʼa yajel och nebʼumanil tini chʼikan ja jastal wa xjeʼatiki, wani xkʼanatik chapan lek aʼajyuk ja jastal wa xjeʼatiki.
3. ¿Jasa oj kiltik ja bʼa artikulo it?
3 Kada semana wa xjeʼatikyi jitsan miyon kristyano ja smeranil wa sjeʼa ja Biblia. Pe jastalni kilatik ja bʼa bʼajtan artikulo, wani xkʼana oj jnatik jastal oj jkoltaytik mas kristyano bʼa jachuk oj kʼot man skʼujole sok oj yiʼe jaʼ. Ja bʼa artikulo it, oj kiltik joʼe modo bʼa tʼilan oj skʼuluke ja maestroʼik bʼa jachuk oj yiʼe jaʼ ja yestudianteʼe.
LA JETIK SOKA BIBLIA
La jkʼantikyi jun maestro bʼa ayxa yiʼoj snajel ayakitik rasonik bʼa jaʼ oj jetik soka Biblia. (Kʼela ja parrapo 4 man 6). *
4. ¿Jas yuj tʼilan oj skom sbʼaj ja maestro ja yajni wa xyaʼa estudio? (Cha kʼela ja nota).
4 Kibʼanaltik jel xkʼulantik gusto sjejel sbʼaja yabʼal ja Dyosi. Ja yuj bʼobʼta ayni wokol wa xkabʼtik mi oj kʼumanukotik. Pe yajni wa xkoʼ jbʼajtik yiljel ja Spaklajel Ja Juʼun Cholumani, ja Spaklajel ja Biblia soka kongregasyon ma ja yajni wa xkaʼatik estudio, mokni jel kʼumanukotik. Mas lek la jetik soka Biblia. Ja yuj, tʼilani oj skom sbʼaj ja maestro sok mi oj sleʼ modo bʼa oj chʼak xchol yibʼanal ja jas wa snaʼa bʼa jun bersikulo ma bʼa jun jasunuk (Juan 16:12). * A-slaj sbʼaj ja weʼn ja jas waxa naʼa ja wego soka jas waxa naʼa ja yajni awiʼaj jaʼi. Pes bʼobʼta jaʼitani waxa naʼa ja jastik mas tʼilani (Heb. 6:1). Ta ja yiʼajwuj jitsan jabʼil bʼa oj ajyukawuj ja snajelil awiʼoj ja wego, moka leʼ modo bʼa junta jalon oja jeyi jawa westudiante.
5. a) Jastalni wa xyala ja 1 Tesalonicenses 2:13, ¿jasa wa xkʼanatik oj yabʼ stojol ja estudiante? b) ¿Jasa oj jkʼuluktik bʼa oj xcholkabʼtik ja jas wan snebʼjel ja estudiante?
5 Wani xkʼanatik ke ja estudiante a-snaʼ ke ja jas wan snebʼjeli tini wa x-el bʼa Yabʼal Dyos (kʼuman ja 1 Tesalonicenses 2:13). Bʼa oj bʼobʼuk ja it, tʼilani oj jtsatsankʼujoluktik bʼa oj yalkabʼtik ja jas wan snebʼjeli. La kaltikyabʼ a-xchol kabʼtik jujuntik teksto sok mi kechan keʼn oj jcholtik. La jkoltaytik bʼa oj yil jastal oj bʼobʼ ya makunuk bʼa sakʼanil ja jas wa xyala ja Biblia. La katikyi sjobʼjelik bʼa oj tojukyuj, bʼa oj yal ja jas wa spensarani sok ja jastal xyabʼ sbʼaja bersikuloʼik wa skʼumani (Luc. 10:25-28). Jun sjejel, la jobʼtikyi: «¿Jas modoʼal yiʼoj ja Jyoba waxa taʼa ja bʼa bersikulo it?», «¿Jastal wa xbʼobʼ skoltaya ja smeranil it bʼa Biblia?», «¿Jastal wa snikawa sbʼaja jas anebʼa?» (Prov. 20:5). Ja mas tʼilani mini jaʼuk ta anebʼa jitsan jastik, jani ta waxa yajtay sok wa xwa makunuk ja bʼa wa sakʼanil.
6. ¿Jas yuj jelni lek ja oj jloktik ja bʼa kestudiotik ja cholumanik bʼa ayxa yiʼoje mas snajelil?
6 ¿Wan maʼ xlokotik jujuntik ekʼele bʼa a-smojtayotik ja bʼa kestudiʼotik ja cholumanik bʼa ayxa yiʼoje mas snajelil? Ta smojtayotike, ojni bʼobʼ jobʼtikyile jastal yilawe ja jastal jkʼulantik ja estudio sok ta jani jeʼatik soka Biblia. Bʼa oj tojbʼuk ja jastal wa xjeʼatiki, tʼilani oj kaʼ jbʼajtik chʼin (cha kʼela ja Hechos 18:24-26). Cha ojni bʼobʼ jobʼtikyi ta wa xyila wan yabʼjel stojol ja estudiante ja jas wan spaklajeli. Ta mi ti oj ajyukotik june ma mas semanaʼik, ojni bʼobʼ jkʼantikyi a-skʼuluk ja estudio. Jachuk mi oj kʼot tekʼan ja estudio sok jachuk ja estudiante oj yil janekʼto stʼilanil yiʼoj. Mok jpensaraʼuktik ta keʼn jbʼajtik ja estudiante sok mi maʼ xbʼobʼ slokʼolukotik. Pes ja jas wa xkʼanatiki, jani ja jas mas lek sbʼaja kestudiantetik sok mok jas timjukyuj bʼa oj kʼot man skʼujol.
JEʼA GUSTO LEK SOK AKʼUʼUNEJ LEK
La katik makunuk experienciaʼik bʼa tuk kermanotik bʼa skoltajel ja estudiante bʼa jaʼ atojuk yuja rasonik bʼa Biblia. (Kʼela ja parrapo 7 man 9). *
7. ¿Jastal oj kʼot yabʼ stsamalil ja jas wan snebʼjel ja estudiante?
7 Jelni tʼilan ke ja kestudiantetik ayil ja gustoʼil sok ja jastal jkʼuʼunejtik lek ja jas wa xjeʼatik bʼa Biblia (1 Tes. 1:5). Jachuk masni tsamal oj yabʼ ja jas wan snebʼjeli. Bʼobʼta ojni bʼobʼ jcholtik yabʼ jastal skoltunejotik ja bʼa jsakʼaniltik ja rasonik bʼa Biblia. Ja it oj koltajukyuj bʼa oj yil ke ojni cha koltajuk ja yeʼn.
8. ¿Jastal oj bʼobʼ ajyuk chapan ja kestudiotik, sok jas yuj?
8 Yajni wantik skʼulajel estudiar, la jcholtik yabʼ experienciaʼik bʼa kermanotik bʼa kuchelyujile ja wokolik jastalni wan ekʼel sbʼaji. ¿Oj maʼ bʼobʼ koltajukyuj ja sjejel bʼa jun kermanotik bʼa kongregasyon? Anto, la kaltikyabʼ a-smojtayotik. Cha ojni bʼobʼ katik makunuk experienciaʼik bʼa jel stsatsankʼujolani ja bʼa xetʼanik «Ja Biblia stukbʼes ja sakʼanile» wa xtax bʼa jw.org. * Ja artikuloʼik jaw oj koltanuk bʼa oj yil ja slekilal wa x-ajyi ta wa xkiʼajtik ja rasonik wa xyala ja Biblia.
9. ¿Jasa oj bʼobʼ jkʼuluktik bʼa oj jtsatsankʼujoluktik ja estudiante bʼa oj yal yabʼ ja spamilya soka yamigoʼik sbʼaja jas wan snebʼjeli?
9 Ta nupanelxa sok mi wanuk skʼulajel estudiar ja smoji, ¿jas mi xlokotik bʼa oj ajyuk jmoktik ja bʼa estudio? Chomajkil, la jtsatsankʼujolantik bʼa a-xcholyabʼ ja spamilya soka yamigoʼik sbʼaja jas wan snebʼjeli (Juan 1:40-45). Bʼobʼta oj bʼobʼa walyabʼ jachuk: «¿Jastal oj bʼobʼa cholyabʼ ja it jawa pamilya?» ma «¿Jas teksto oj wa makunuk bʼa xcholjel yabʼ ja it jawa wamigo?». Ja it juni modo bʼa xchapjel ja kestudiantetik bʼa oj kʼot jun maestro. Sok jachuk, yajni ojxa bʼobʼ och jun choluman mito yiʼunejuk jaʼ, ojxani bʼobʼ eluk xcholjel soka kongregasyon. Ojni bʼobʼ jobʼtikyi ta ay maʼ wa snaʼa sbʼaj bʼa wa skʼana oj snebʼ sbʼaja Biblia. Ta yala kabʼtik ke ay, mok katik ekʼ tyempo bʼa skʼumajel ja kristyano sok la jkʼaptikyi jun estudio. La jetikyi ja bideo ¿Jastal wa xkaʼatikon ja sjejelik bʼa Biblia? *
STSATSANKʼUJOLAJEL BʼA OJ SLEʼ YAMIGOʼIK JA BʼA KONGREGASYON
La jtsatsankʼujolantik ja estudiante a-sleʼ yamigoʼik ja bʼa kongregasyon. (Kʼela ja parrapoʼik 10 sok 11). *
10. ¿Jastal oj bʼobʼ snoch jun maestro ja lekil sjejel yaʼa ja Pablo jastalni wa xyala ja 1 Tesalonicenses 2:7, 8?
10 Ja maestroʼiki tʼilan oj chamskʼujole meran ja yestudianteʼik. Tʼilan oj yil-e oj kʼot jun yermano ja bʼa tyempo jakum (kʼuman ja 1 Tesalonicenses 2:7, 8). Bʼa yeʼnle mini pasiluk yajelkan ja yamigoʼe ja bʼa luʼumkʼinal it sok stukbʼesel ja sakʼanile bʼa oj yaʼteltaye ja Jyoba. Ja yujil, la jkoltaytike bʼa oj staʼe meran yamigoʼe ja bʼa kongregasyon. Ta ja keʼntik wa xkatik ekʼ tyempo soke bʼa tuk ekʼeleʼik sok mi kechanuk ja bʼa estudio, ojni jetik kʼotelotik yamigoʼe. Oj jetik meran wa xcham jkʼujoltik ta wa xkʼumantike, wa xjekatikyile jun mensaje ma wa x-ekʼ kulataytike jujuntik ekʼele.
11. ¿Jasa wa xkʼanatik oj staʼe ja estudianteʼik ja bʼa kongregasyon, sok jas yuj?
11 Jun proverbio africano wa xyala: «Wa xkʼanxi jun chonabʼ bʼa yajel kʼiʼuk jun yal kerem». Cha jachni wa xbʼobʼ kaltik ja keʼntiki: «Wa xkʼanxi jun kongregasyon bʼa yajel och jun nebʼuman». Ja yuj ja lekil maestro wani skʼulanyi presentar ja yestudiante ja hermanoʼik bʼa kongregasyon bʼa jachuk oj kʼotuke lekil sjejel bʼa yeʼna. Sok jachuk ja estudianteʼik oj ajyukyujile ja koltanel wa skʼanawe sbʼaja jastal wa xtaxye soka Dyosi sok ja yajtanel wa sjeʼa ja xchonabʼil ja Dyosi. Wani xkʼanatik ke kada estudiante ayabʼ tey jmoktik ja bʼa kongregasyon sok tini chʼikane jmoktik ja bʼa pamilya bʼa yaʼtijumotik Dyos. Ta wa xkaʼatikan bʼa apayjukyuj ja yajtanel wa sjeʼa ja xchonabʼil ja Dyos, masni pasil oj yabʼ ja mixa oj ajyukyuj yamigoʼik bʼa mi xkoltajiyuj bʼa syajtajel ja Jyoba (Proverbios 13:20). Ta mixa xkisji yuja yamigoʼik bʼa luʼumkʼinal it, oj julskʼujol wani xbʼobʼ ajyukyuj meran yamigoʼik ja bʼa xchonabʼ ja Jyoba (Mar. 10:29, 30; 1 Ped. 4:4).
YALJEL SBʼAJA YAJELYI JA SAKʼANIL JA DYOS SOK JA YIJEL JAʼ
Jun estudiante bʼa meran wa skʼana oj snebʼ bʼa Biblia wani skʼulan jitsan jastik junuk bʼa jachuk oj yi jaʼ. (Kʼela ja parrapoʼik 12 sok 13).
12. ¿Jas yuj jel tʼilan oj kaltikyabʼ ja estudiante sbʼaja yajelyi ja jsakʼaniltik ja Dyos sok ja yijel jaʼ?
12 Mok xiwkotik yaljel sbʼaja yajelyi ja jsakʼaniltik ja Dyos sok ja yijel jaʼ. Ja jas wa xkʼanatik ja yajni wa xkaʼatik estudio jani skoltajel ja kristyano bʼa oj yiʼe jaʼ sok oj yaʼteltaye ja Jyoba. Ta ja kristyano ayxa jujuntik ixaw wan skʼulajel estudiar sok mastoni ta kʼeta wajuk ja bʼa tsomjeliki, tʼilani oj snaʼ ke ja jas wa xkʼanatik soka estudio jani skoltajel bʼa oj och taʼumantiʼ bʼa Jyoba.
13. ¿Jastik wa skʼulan jun estudiante bʼa oj kʼot yiʼ jaʼ?
13 Jun estudiante bʼa meran wa skʼana oj snebʼ bʼa Biblia wani skʼulan jitsan jastik junuk bʼa jachuk oj yi jaʼ. Bʼajtan, wa xkʼot snaʼ sbʼaj sok wa xkʼot syajtay ja Jyoba, sok wa xkʼot skʼuʼuk bʼa yeʼna (Juan 3:16; 17:3). Tsaʼan, wa xkʼot yamigoʼuk ja Dyos sok ja hermanoʼik bʼa kongregasyon (Heb. 10:24, 25; Sant. 4:8). Soka tyempo, wa xyaʼakan skʼulajel jastik bʼa mi lekuk sok wa sutxi skʼujol soka smuliki (Hech. 3:19). Jaxa yuja skʼuʼajel yiʼoji, wa xnikjiyuj bʼa oj yal yabʼ ja tuk kristyano sbʼaja smeranili (2 Cor. 4:13). Sok tsaʼan, wa xyayi ja sakʼanil ja Jyoba sok wa xyiʼaj jaʼ bʼa sjejel yaʼatayi ja sakʼanili (1 Ped. 3:21; 4:2). Ja kʼakʼu jaw jelni xya gustoʼaxukotik. Yajni ja estudiante wan skʼujolajel mas, la jkʼultik felicitar sok spetsanil jkʼujoltik sok la jtsatsankʼujolantik bʼa oj ajyukyuj mas skʼelsat.
TʼILANI OJ ILXUK JASTAL WAJUM
14. ¿Jastal oj yil jun maestro ta wan kʼotel bʼa skʼujol ja yestudiante?
14 Wa xkʼanxi oj ajyuk jpacienciatik bʼa jachuk jun kestudiantetik oj yayi ja sakʼanil ja Dyos sok oj yi jaʼ. Pe ojni kʼot jun yoraʼil bʼa oj kiltik ta wa skʼana oj yaʼteltay ja Jyoba ma miyuk. ¿Wan maʼ sjeʼa wa skʼujolan bʼa skʼuʼajel ja smandarik ja Jesús? ¿Ma kechan wan skʼulajel estudiar yuja jel tsamal xyabʼ ja jas wan snebʼjel bʼa Biblia?
15. ¿Jastal wa jeʼa wan kʼotel bʼa skʼujol jun kestudiantetik?
15 Kada tyempo la kiltik ta wan kʼotel bʼa skʼujol ja kestudiantetiki. Jun sjejel, ¿wan maʼ xyala ja jas wa xyabʼ sbʼaja Jyoba? ¿Wan maʼ xyayi orasyon? (Sal. 116:1, 2). ¿Wa maʼ xyiʼaj gusto skʼumajel ja Biblia? (Sal. 119:97). ¿Wan maʼ xwaj bʼa kada tsomjelal? (Sal. 22:22). ¿Stukbʼesta maʼ ja sakʼanili? (Sal. 119:112). ¿Kʼeta maʼ xcholyabʼ ja spamilya sok ja yamigoʼik sbʼaja jas wan snebʼjeli? (Sal. 9:1). Sok ja masto ay stʼilanili, ¿wan maʼ skʼana oj och taʼumantiʼ bʼa Jyoba? (Sal. 40:8). Ta mini june skʼulunej ja bʼa jastik it, la jletik modo sjobʼjelyi jas yuj sok tsaʼan la loʼilanukotiksok sbʼaja jaw bʼa jun modo tsamal pe jaman lek. *
16. ¿Jas ora mas lek yajelkan skʼulajel jun estudio?
16 Cha la kiltik kada tyempo ta ojto katikyi estudio jun kristyano. La jobʼ jbʼajtik: «¿Wan maʼ xchapa sbʼaj bʼa kada estudio? ¿Wan maʼ skʼana oj wajuk ja bʼa tsomjelaliki? ¿Yaʼata maʼ kan ja jastik malo wa skʼulani? ¿Yaʼata maʼ kan ja relijyon mi meranuki?». Ta mini june wan skʼulajel, snochjel yajelyi estudio oj slaj jastal sjejelyi tarega noxjel june bʼa mi skʼana oj poxuk. Ta ja kristyano mi chaʼanyabʼaliluk xyila ja jas wan snebʼjeli sok mi skʼana stukbʼesel sbʼaj, ¿jas yuj ojto katikyi estudio?
17. ¿Jasa tʼilan oj skʼuluk ja maestro wa sjeʼa bʼa Biblia bʼa oj ya lek kwidado soka jas wan sjejeli, jastalni wa xyala ja 1 Timoteo 4:16?
17 Ja yajel och nebʼumanili juni aʼtel bʼa jel chaʼanyabʼalil xkilatik. Wani xkʼana oj jkoltaytik ja kestudiantetik bʼa oj kʼot yiʼe jaʼ. Ja yujil, tolabida jaʼ oj jetik soka Biblia, gustoxta lek sok bʼa jun modo jkʼuʼunejtik lek. Oj jtsatsankʼujolantik ja kestudiantetik bʼa oj sleʼ yamigoʼik ja bʼa kongregasyon, tʼilani oj kaltikyabʼ sbʼaja yajelyi ja sakʼanile ja Dyos sok ja yijel jaʼ, sok kada tyempo la kiltik ta wan kʼotel bʼa skʼujol. (Kʼela ja rekwagro, « Ja jas tʼilan oj skʼuluk ja maestro»). ¡Jelni xyakitik gusto koltanel ja bʼa aʼtel it bʼa yajel staʼ sakʼanil ja kristyano! Ja yujil, la jkʼujoluktik lek bʼa skoltajel ja kestudiantetik bʼa oj yiʼe jaʼ.
TSʼEBʼOJ 79 Koltay bʼa oj ajyuke tsats
^ par. 5 Yajni wa xkatikyi estudio jun kristyano, ayni kiʼojtik ja niwan cholal bʼa sjejelyi jastal wa skʼana ja Jyoba oj spensaraʼuk, jastal oj yabʼ sok oj sjeʼ ja smodo. Ja artikulo it oj yakitik mas rasonik bʼa jastal oj kʼotkotik lekil maestroʼik.
^ par. 4 Kʼela ja artikulo «Moka kʼuluk ja it yajni xa kʼulan jun estudio», ja bʼa juʼun Ja Sakʼaniltik soka Kaʼteltik bʼa septiembre bʼa 2016.
^ par. 8 Kaʼax bʼa SBʼAJA KEʼNTIKONI > EXPERIENCIAʼIK BʼA TAʼUMANTIʼIK BʼA JYOBA.
^ par. 9 Ja bʼa JW Library®, kaʼax ja bʼa MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
^ par. 15 Kʼela ja artikuloʼik «Ja yajtanel soka yajel tsʼakatal wa xnikwani bʼa yijel jaʼ» sok «¿Chapanxa maʼ aya bʼa yijel jaʼ?», ja bʼa Ja Juʼun Cholumani bʼa marzo bʼa 2020.
^ par. 77 XCHOLJEL SBʼAJA POTO: Yajni chʼakta yaʼe jun estudio, jun hermana bʼa ayxa yiʼoj snajelil wan yajelyi jujuntik rason bʼa skoltajel jun maestra bʼa mi jel oj kʼumanuk.
^ par. 79 XCHOLJEL SBʼAJA POTO: Yajni wan ajelyi estudio, jun estudiante wan snebʼjel jastal kʼotel jun lekil cheʼumal. Tsaʼan, wa xcholo yabʼ ja statam ja jas snebʼuneji.
^ par. 81 XCHOLJEL SBʼAJA POTO: Jun estudiante soka statami wane yajel ekʼ gusto jutsʼin bʼa snaj jun hermana bʼa ti snaʼa sbʼaj bʼa Naʼits bʼa Tsomjel.
