ARTÍCULO NEMA NATALIKGALHTAWAKGA 42
Kamakgtayaw tiku makgalhtawakgemaw xlakata natamunu (xlipulaktiy)
«Kuenta katlawa laku tanks nalatapaya, nachuna wantu [masiyaya]» (1 TIM. 4:16).
TAKILHTLIN 77 Xkgakganat kxakapukswa kakilhtamaku
TUKU NATALICHUWINAN *
1. ¿Tuku xlakata wanaw pi kamakgtayakan latamanin kstalaninanin Cristo nalitaxtukgo akgtum taskujut nema lakgmaxtu latamat?
NAKAMAKGTAYAYAW latamanin kstalaninanin Cristo nalitaxtukgo akgtum taskujut nema lakgmaxtu latamat. ¿Tuku xlakata chuna wanaw? Kalakapastakwi pi kMateo 28:19, 20 Jesús limapakgsinalh «kapitit», «kakamakgtayatit latamanin [...] kistalaninanin nawankgo» chu «kakamunutit». Chu katsiyaw pi tamunukan lu xlakaskinka, wa xlakata putum tiku lakgtaxtuputunkgo xlitamunutkan. Tiku tamunuputun xlikanajlat pi kajwatiya tlan nalakgtaxtu xlakata Jesús nilh kimpalakatakan chu lakastakwanalh. Wa xlakata, apóstol Pedro kawanilh kstalaninanin Cristo: «Tamunut, [...] kalakgmaxtuman [...] xpalakata xtalakastakwanat Jesucristo» (1 Ped. 3:21). Wa xlakata, akxni wi tiku tamunu, lata uma kilhtamaku kgalhi takgalhkgalhin xlakata tlan nalatama putum kilhtamaku.
2. Chuna la wan 2 Timoteo 4:1, 2, ¿tuku kilitlawatkan xlakata tlan makgalhtawakgenanin nawanaw?
2 Xlakata tlan nakamakgtayayaw latamanin kstalaninanin Cristo nalitaxtukgo, talakaskin pi lu liwana nakatsiyaw la namasiyayaw (kalikgalhtawakga 2 Timoteo 4:1, 2). ¿Tuku xlakata? Xlakata Jesús kinkalimapakgsin «kapitit», «kakamakgtayatit latamanin [...] kistalaninanin nawankgo» chu «kakamasiyanitit». Apóstol Pablo wanilh Timoteo pi chuntiya xliskujli namakgantaxti uma taskujut chu wanilh pi chuna tlan xlakgtaxtulh chu nachuna tiku xkgaxmatnikgolh. Wa xlakata ni kaks kinkamalakawaniyan pi wanilh uma tastakyaw: «Kuenta katlawa laku tanks nalatapaya, nachuna wantu [masiyaya]» (1 Tim. 4:16). Xlakata kamakgtayakan latamanin kstalaninanin Cristo nalitaxtukgo lu tatalakxtumi chuna la masiyayaw, talakaskin pi lu tlan la namasiyayaw.
3. ¿Tuku naʼakxilhaw kʼuma artículo?
3 Akgatunu semanas, kamasiyaniyaw lhuwa latamanin tuku xaxlikana masiya Biblia. Pero, chuna la akxilhwi kʼartículo nema titaxtulh, katsiputunaw la tlakg tlan nakamakgtayayaw latamanin xlakata nastakkgo xtakanajlakan chu chuna tlan natamunukgo. Kʼuma artículo, naʼakxilhaw pulakkitsis tuku xlitlawatkan tiku makgalhtawakganankgo xlakata tiku kamakgalhtawakgekgo tlan natamunukgo.
KAMASTAW TALAKASKIN PI WA BIBLIA NAMASIYA
Kaskiniw chatum tala tiku tlakg katsini pi kakinkamaxkin tastakyaw xlakata namastayaw talakaskin pi wa Biblia namasiya (Kaʼakxilhti párrafos 4 asta 6). *
4. ¿Tuku xlakata tiku limakgalhtawakgenan Biblia ni lhuwa nachuwinan? (Na kaʼakxilhti nota).
4 Kimputumkan lu lakgatiyaw masiyayaw xlakata xTachuwin Dios. Wa xlakata max namin kilhtamaku kajwatiya nachuwinamputunaw. Akxni nakinkalakgchanan napulalinaw Takgalhtawakga xla Makatsinina, Takgalhtawakga nema takilhtinit kBiblia kcongregación o akxni wi tiku makgalhtawakgemaw, talakaskin pi ni lhuwa nachuwinanaw. Kamastaw talakaskin pi wa Biblia namasiya. Wa xlakata, tiku makgalhtawakgenama xlimachokgot tuku nawan chu ni namasiyaputunkgo putum tuku xla katsi xlakata tuku lichuwinama o xlakata akgtum versículo (Juan 16:12). * Katamalakxtupi tuku wix katsiniya la uku xlakata Biblia chu tuku xkatsiniya akxni tamunu. Xlikana pi kajwatiya xkatsiya tuku masiya Biblia nema ni xalaktuwa (Heb. 6:1). Komo talakaskilh akglhuwa kata xlakata nakatsiniya tuku katsiya la uku, ni kalakpuwanti pi makgtum namasiyanikgoya xlakata Biblia tiku makgalhtawakgepat.
5. 1) Chuna la wan 1 Tesalonicenses 2:13, ¿tuku lakaskinaw pi naʼakgatekgsa tiku makgalhtawakgemaw? 2) ¿Tuku tlan natlawayaw xlakata nalichuwinan la akxilha tuku katsinima?
5 Lakaskinaw pi tiku makgalhtawakgemaw naʼakgatekgsa pi tuku katsinima wa tuku masiya xTachuwin Dios (kalikgalhtawakga 1 Tesalonicenses 2:13). Xlakata tlan chuna natlawayaw, kamakgpuwantiniw pi kalichuwinalh la akxilha tuku katsinima. Kaskiniw pi kalichuwinalh tuku masiya akgtum texto chu ni kajwatiya akinin tiku kawaniw tuku masiyakgo textos. Kamakgtayaw naʼakxilha la tlan nalilatama tuku wan Biblia. Katlawaniw takgalhskinin xlakata namakgtayayaw chu xlakata nakinkawaniyan tuku lakapastaka chu tuku makgkatsi akxni likgalhtawakga akgtum versículo (Luc. 10:25-28). Akgtum liʼakxilhtit, kakgalhskiw: «¿Tlan akxilha akgtum xtayat Jehová kʼuma texto?», «¿La tlan nalitamakgtayaya uma tuku masiya Biblia?», «¿La mamakgkatsiniyan tuku katsini?» (Prov. 20:5). Ni wa tlakg xlakaskinka komo lhuwa tuku katsinima, tuku tlakg xlakaskinka wa pi lanka xtapalh naliʼakxilha chu nalilatama.
6. ¿Tuku xlakata max lu tlan nakitaxtu komo naskiniyaw chatum tala tiku tlakg katsini pi kakinkataʼan akxni anaw makgalhtawakgenanaw?
6 ¿Kaskiniyaw natalan tiku tlakg katsinikgo xlakata nakinkataʼanan akxni anaw makgalhtawakgenanaw? Komo chatum tala nakinkataʼanan, tlan naskiniyaw pi kakinkawanin la akxilhli chuna la mastaw takgalhtawakga chu pi kakinkawanin komo mastaw talakaskin pi wa Biblia xmasiyalh. Xlakata tlakg tlan namakgalhtawakgenanaw, talakaskin pi nataktujuyaw (katamalakxtupi Hechos 18:24-26). Na tlan nakgalhskinaw komo lakpuwan pi tiku makgalhtawakgemaw liwana akgatekgsma tuku likgalhtawakgama. Komo ni katitawilaw akgtum o akglhuwa semanas, tlan naskiniyaw uma tala pi kamakgalhtawakgelh. Chuna tiku makgalhtawakgemaw ni katimakgatsankgalh xtakgalhtawakga chu naʼakxilha pi lu xlakaskinka. Nikxni kalakpuwaw pi tiku makgalhtawakgemaw kinkatapakgsiniyan chu niti atanu tiku tlan namakgalhtawakge. Lakaskinaw pi tiku kamakgalhtawakgeyaw namatliwakglhkgo xtakanajlakan chu nitu natlawa pi nialh nakgalhtawakgakgo.
XATAPAXUWAN KAMASIYAW CHU KALIMASIYAW PI KANAJLAYAW TUKU MASIYAMAW
Kakalitachuwinaw tiku kamakgalhtawakgeyaw tuku titaxtukgonit makgapitsi natalan xlakata namakgtayayaw nalilatama xtastakyaw Biblia (Kaʼakxilhti párrafos 7 asta 9). *
7. ¿Tuku natlawa pi tiku makgalhtawakgemaw kaks nalilakawan tuku katsinima?
7 Lu xlakaskinka pi tiku makgalhtawakgemaw naʼakxilha pi lu lipaxuwayaw chu pi kanajlayaw tuku masiya Biblia (1 Tes. 1:5). Chuna max tlakg kaks nalilakawan tuku katsinima. Max tlan nalitachuwinanaw la kinkamakgtayanitan xtastakyaw Biblia. Uma namakgtaya naʼakxilha pi na tlan namakgtaya kxlatamat.
8. ¿Tuku atanu tlan natlawayaw akxni namakgalhtawakgenanaw, chu tuku xlakata?
8 Akxni mastamaw takgalhtawakga xalak Biblia, kalitachuwinaw tiku makgalhtawakgemaw tuku titaxtukgonit natalan tiku xkgalhikgo taʼakglhuwit nema xla kgalhi. ¿Tlan namakgtaya xliʼakxilhtit chatum tala xalak congregación? Komo chuna, kaskiniw pi kakinkataʼan. Nachuna tlan namaklakaskinaw xliʼakxilhtitkan natalan nema kalichuwinankan krevista Makatsinina kserie «Biblia kalakgpalinilh xlatamatkan» chu atanu experiencias nema wilakgolh kjw.org. Umakgolh artículos chu videos nakamakgtaya naʼakxilhkgo tuku tlan kitaxtu komo nalilatamayaw xtastakyaw Biblia.
9. ¿Tuku tlan natlawayaw xlakata namakgpuwantiniyaw tiku makgalhtawakgemaw pi nakalitachuwinan xfamilia chu xʼamigos tuku katsinima?
9 Komo tiku makgalhtawakgemaw makgaxtokga chu tiku tamakgaxtokga nitu kgalhtawakgama, ¿tlan xwaniw pi akxtum xkinkatakgalhtawakgan? Nachuna, kamakgpuwantiniw tiku makgalhtawakgemaw pi kakalitachuwinalh xfamilia chu xʼamigos tuku katsinima (Juan 1:40-45). Max tlan nawaniyaw: «¿La tlan nakamaʼakgatekgsniya uma mifamilia?» o «¿Tuku texto xmaklakaskinti xlakata namasiyaniya xlakata uma chatum miʼamigo?». Komo chuna natlawayaw, uma namakgtaya nakatsini xlakata makgalhtawakgena nalitaxtu. Chu akxni namakgatsi tuku taskini xlakata naʼan lichuwinan Dios kʼakgatunu chiki, tlan akxtum nakataʼan natalan xalak congregación. Tlan nakgalhskinaw komo lakgapasa tiku katsiniputun xlakata Biblia. Komo nakinkawaniyan pi lakgapasa, kalakgapaxialhnaw uma lataman chu kamalaknuniw akgtum takgalhtawakga xalak Biblia. Kamasiyaniw video ¿Tuku tatlawa kʼakgtum takgalhtawakga xalak Biblia? *
KAMAKGPUWANTINIW PI KAKGALHILH AMIGOS KCONGREGACIÓN
Kamakgpuwantiniw tiku makgalhtawakgeyaw pi kakaputsalh amigos kcongregación (Kaʼakxilhti párrafos 10 chu 11). *
10. Chuna la wan 1 Tesalonicenses 2:7, 8, ¿la tlan nastalani xatlan xliʼakxilhtit Pablo tiku limakgalhtawakgenan Biblia?
10 Tiku makgalhtawakgenankgo xliputum xnakujkan nakalilakgaputsakgo tiku kamakgalhtawakgekgo. Xkaliʼakxilhat chuna la tiku xnatalan nalitaxtukgo (kalikgalhtawakga 1 Tesalonicenses 2:7, 8). Xlakan tuwa makgkatsikgo nakamakgxtakgkgo xʼamigoskan xalak kakilhtamaku chu nalakgpalikgo kxlatamatkan xlakata naskujnanikgo Jehová. Wa xlakata, kakamakgtayaw natekgskgo xaxlikana amigos kcongregación. Nalimasiyayaw pi xʼamigos litaxtuyaw komo akxtum nakatatawilayaw o nakalakgapaxialhnanaw chu ni kajwatiya akxni kamakgalhtawakgeyaw. Nakalimasiyaniyaw pi xlikana kalilakgaputsayaw komo nakatachuwinanaw kteléfono, nakamalakgachaniyaw mensaje o nakalakgapaxialhnanaw puntsu.
11. ¿Tuku lakaskinaw pi natekgskgo kcongregación tiku kalimakgalhtawakgemaka Biblia, chu tuku xlakata?
11 Wi akgtum proverbio xalak África nema wan: «Talakaskin akgtum kachikin xlakata namakgastakkan chatum aktsu kgawasa». Chu xtachuna la uma, tlan nawanaw: «Talakaskin akgtum congregación xlakata wi tiku kstalanina Cristo nalitaxtu». Wa xlakata xalaktlan makgalhtawakgenanin kamalakgapasnikgo tiku kamakgalhtawakgemakgo natalan xalak congregación tiku nawilinikgo lu xatlan liʼakxilhtit. Chuna tlan nakamaxkikan tamakgtay xaʼespiritual nema kajwatiya tlan masta xkachikin Jehová. Lakaskinaw pi chatunu chatunu tiku kalimakgalhtawakgekan Biblia namakgkatsikgo pi makgtapakgsikgo kcongregación chu makgtapakgsikgo kkifamiliajkan xaʼespiritual. Komo nakamakgtayayaw nalakgatikgo xkachikin Jehová, tlakg ni tuwa katimakgkatsikgolh nakamakgxtakgkgo xʼamigoskan tiku ni kamakgtayakgo napaxkikgo Jehová (Prov. 13:20). Komo xʼamigoskan xalak kakilhtamaku nakalakgmakgankgo, liwana nakatsikgo pi tlan nakatekgskgo xaxlikana amigos kxkachikin Jehová (Mar. 10:29, 30; 1 Ped. 4:4).
NAWANIYAW PI TALAKASKIN NATAMAKAMASTANI DIOS CHU NATAMUNU
Tiku xlikana katsiniputun xlakata Biblia wi tuku tlawa xlakata namatliwakglha xtakanajla chu natamunu (Kaʼakxilhti párrafos 12 chu 13).
12. ¿Tuku xlakata talakaskin nawaniyaw tiku makgalhtawakgemaw pi lu xlakaskinka natamakamastani Dios chu natamunu?
12 Ni kapekuaw akxni nawaniyaw pi lu xlakaskinka natamakamastani Dios chu natamunu. Kalakapastakwi pi kamakgtayaputunaw tiku kamakgalhtawakgeyaw natamunukgo chu naskujnanikgo Jehová. Komo akglhuwata papaʼ la takgalhtawakgamaw chatum lataman chu komo tsukunita an ktamakxtumit, xliʼakgatekgsat pi makgalhtawakgeyaw xlakata xtatayana Jehová nalitaxtu.
13. ¿Tuku tlawa chatum tiku limakgalhtawakgekan Biblia xlakata tlan natamunu?
13 Tiku xlikana katsiniputun xlakata Biblia wi tuku tlawa xlakata nastaka xtakanajla chu tlan natamunu. Pulana, lakgapasa chu tsuku paxki Jehová, chu xlikana kanajlani (Juan 3:16; 17:3). Alistalh, xʼamigo Dios litaxtu chu xʼamigos litaxtukgo natalan xalak congregación (Heb. 10:24, 25; Sant. 4:8). Alistalh, makgxtakga tuku nitlan xtlawa chu nitlan limakgkatsi xtalakgalhin (Hech. 3:19). Chu xtakanajla makgpuwantini nakalitachuwinan xaxlikana amakgapitsin (2 Cor. 4:13). Chu alistalh, tamakamastani Jehová chu tamunu xlakata nalimasiya pi tamakamastaninit Jehová (1 Ped. 3:21; 4:2). Xlikana, uma kilhtamaku lu lipaxuw. Akxni tiku makgalhtawakgemaw wi tuku natlawa xlakata natatliwakglha xtakanajla, xatapaxuwan kawaniw pi lu tlan taskujut tlawama chu kamakgpuwantiniw chuntiya naliskuja.
KAʼAKXILHWI LA TATLIWAKGLHTILHA XTAKANAJLA
14. ¿Tuku tlan natlawa tiku makgalhtawakgenama xlakata naʼakxilha komo tatliwakglhma xtakanajla tiku makgalhtawakgema?
14 Talakaskin pi lu nalimasiyayaw takgalhkgalhin xlakata tiku makgalhtawakgemaw natamakamastani Dios chu natamunu. Pero namin kilhtamaku naʼakxilhaw komo xlikana skujnaniputun Jehová o ni. ¿Tasiya pi liskuja xlakata nakgalhakgaxmata xlimapakgsin Jesús? ¿O kajwatiya kgalhtawakga xlakata katsiputun tuku lanit nema lichuwinan Biblia?
15. ¿Tuku limasiya pi tiku limakgalhtawakgepat Biblia liskujma xlakata namatliwakglha xtakanajla?
15 Kaʼakxilhti tuku tlawama tiku makgalhtawakgepat xlakata namatliwakglha xtakanajla. Akgtum liʼakxilhtit, ¿lichuwinan tuku makgkatsi xpalakata Jehová? ¿Tlawani oración? (Sal. 116:1, 2). ¿Lakgati likgalhtawakga Biblia? (Sal. 119:97). ¿Ankgalhin an ktamakxtumit? (Sal. 22:22). ¿Tlawanit talakgpalit kxlatamat nema talakaskin? (Sal. 119:112). ¿Tsukunit kalitachuwinan xfamilia chu xʼamigos xlakata tuku katsinima? (Sal. 9:1). Chu nachuna, ¿xtatayana Jehová litaxtuputun? (Sal. 40:8). Komo nitu liskujma xlakata natlawa umakgolh, liwana kaʼakxilhwi tuku xpalakata chu alistalh katachuwinaw, lakatitum tuku kawaniw pero kalimasiyaniw tapaxkit. *
16. ¿Tuku nalikatsiyaw pi nialh talakaskin chuntiya namakgalhtawakgeyaw chatum lataman?
16 Nachuna ni xmakgasni kaʼakxilhwi komo tlan chuntiyaku nalimakgalhtawakgeyaw Biblia chatum lataman. Kalilakpuwaw umakgolh takgalhskinin: «¿Xʼakstu lakkaxwili tuku naklikgalhtawakgayaw? ¿Tasiya pi amputun ktamakxtumit? ¿Makgxtakgnit tuku nitlan xtlawa? ¿Makgxtakgnit nixaxlikana takanajla?». Komo akxilha pi ni makgantaxtima chu chuntiya namakgalhtawakgeya, xtachuna kitaxtu la komo akxni wi tiku chuntiya masiyanipat la tajukan kchuchut pero ni tajuputun kchuchut. Komo uma lataman ni xtapalh liʼakxilha tuku katsinima chu ni tlawaputun talakgpalit kxlatamat, nialh kamakgalhtawakge.
17. Xlakata kuenta natlawa la masiya, chuna la lichuwinan 1 Timoteo 4: 16, ¿tuku xlitlawat tiku limakgalhtawakgenan Biblia?
17 Kamakgtayakan latamanin xlakata kstalaninanin Cristo nalitaxtukgo akgtum taskujut nema lu xlakaskinka liʼakxilhaw. Kamakgtayaputunaw nastaka xtakanajlakan chu tlan natamunukgo tiku kalimakgalhtawakgeyaw Biblia. Wa xlakata, namastayaw talakaskin pi wa Biblia nakamasiyani, xatapaxuwan nakamasiyaniyaw chu nalimasiyayaw pi kanajlayaw tuku lichuwinanaw. Namakgpuwantiniyaw tiku makgalhtawakgemaw xlakata na nakgalhi amigos kcongregación, nawaniyaw pi lu xlakaskinka natamakamastani Dios chu natamunu, chu naʼakxilhtilhayaw komo tatliwakglhtilhama xtakanajla. (Kaʼakxilhti recuadro kpágina 13, « Tuku xlitlawat tiku makgalhtawakgenan»). ¡Lu lipaxuwayaw pi kgalhiyaw talakgalhaman na natlawayaw uma taskujut nema lakgmaxtu latamat! Wa xlakata, lu kaliskujwi xlakata nakamakgtayayaw namatliwakglhkgo xtakanajlakan chu natamunukgo tiku kamakgalhtawakgeyaw.
TAKILHTLIN 79 Kakamatliwakglhti
^ párr. 5 Akxni limakgalhtawakgeyaw Biblia chatum lataman, kgalhiyaw talakgalhaman xlakata namasiyaniyaw la lakaskin Jehová pi nalakpuwan, namakgkatsi chu tuku natlawa. Uma artículo nakinkamaxkiyan tastakyaw xlakata tlakg tlan makgalhtawakgenanin nawanaw.
^ párr. 4 Kaʼakxilhti artículo «Ni chuna natlawaya akxni makgalhtawakgenampat», klikgalhtawakga Tuku natalikgalhtawakga septiembre kata 2016.
^ párr. 9 Anta kJW Library®, kapit MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
^ párr. 15 Kaʼakxilhti artículos «Tapaxkit namakgpuwantiniyan natamunuya» chu «¿Tlantiya natamunuya?», nema min krevista Makatsinina xla marzo kata 2020.
^ párr. 76 TUKU TASIYA KDIBUJO. Akxni makgalhtawakgenankgo, tala puskat tiku tlakg katsini maxki tastakyaw tiku makgalhtawakgenan xlakata namakgtaya ni lu lhuwa nachuwinan.
^ párr. 78 TUKU TASIYA KDIBUJO. Akxni makgalhtawakgemaka, tiku kgalhtawakgama katsini la tlakg tlan puskat nalitaxtu. Alistalh, litachuwinan xchixku tuku katsinilh.
^ párr. 80 TUKU TASIYA KDIBUJO. Tiku limakgalhtawakgekan Biblia chu xchixku lipaxuwamakgolh akxni ankgonit kxchik chatum tala tiku xla lakgapasli ktamakxtumit.
