1. Hi swi tiva njhani leswaku ntirho wo endla vadyondzisiwa wu ponisa vutomi bya vanhu?

 NTIRHO wo endla vadyondzisiwa wu ponisa vutomi bya vanhu! Hi swi tiva njhani? Loko Yesu a vula xileriso lexi nga eka Matewu 28:19, 20, u te: “Fambani mi ya endla . . . vadyondzisiwa. Mi va khuvula.” Xana i swa nkoka ku fikela kwihi ku khuvuriwa? I swa nkoka hikuva lava lavaka ku ponisiwa swa boha leswaku va khuvuriwa. Lava yaka eku khuvuriweni va fanele va tshemba leswaku va ta ponisiwa ntsena hileswi Yesu a hi feleke a tlhela a pfuxiwa. Hi yona mhaka muapostola Petro a byeleke Vakrestekulobye a ku: “Ma ponisiwa hi . . . nkhuvulo . . . hi ku pfuxiwa ka Yesu Kreste eka lava feke.” (1 Pet. 3:21) Loko mudyondzisiwa lontshwa a khuvuriwa, u va ni ntshembo wa leswaku u ta ponisiwa.

2. Timotiya wa Vumbirhi 4:1, 2, yi hi khutaza ku va vadyondzisi va njhani?

² Leswaku hi kota ku endla vadyondzisiwa, hi fanele hi kota “ku dyondzisa kahle.” (Hlaya 2 Timotiya 4:1, 2.) Hikwalahokayini? Hikuva Yesu u hi lerise a ku: “Fambani mi ya endla . . . vadyondzisiwa . . . , mi va dyondzisa.” Muapostola Pawulo u vule leswaku u ya “emahlweni” ni ntirho wolowo “hikuva loko u endla tano u ta tiponisa u tlhela u ponisa ni lava ku yingisaka.” Pawulo u tlhele a ku: “Tikarhatele ku va . . . mudyondzisi lonene.” (1 Tim. 4:16) Leswi ku dyondzisa swi fambisanaka ni ku endla vadyondzisiwa, hi fanele hi antswisa ndlela leyi hi dyondzisaka hayona.

3. Eka nhlokomhaka leyi, hi ta bula hi yini mayelana ni ku dyondzisa vanhu Bibele?

³ Hi dyondzisa vanhu va timiliyoni Bibele emisaveni hinkwayo. Hi lava ku tiva leswaku hi nga va pfuna njhani vanhu volavo  leswaku va khuvuriwa kutani va va vadyondzisiwa va Yesu Kreste. Eka nhlokomhaka leyi, hi ta bula hi swilo swa ntlhanu leswi vadyondzisi va faneleke va swi endla leswaku va pfuna swichudeni swa vona swi fanelekela ku khuvuriwa.

4. Hikwalahokayini mudyondzisi a nga fanelanga a vulavula ngopfu loko a fambisa dyondzo ya Bibele? (Vona ni nhlamuselo ya le hansi.)

⁴ Leswi hi rhandzaka rungula ra le Bibeleni leri hi ri dyondzisaka, hi nga tikuma hi vulavule hi nga heti. Swi nga ri na mhaka leswaku u fambisa Dyondzo ya Xihondzo xo Rindza, Dyondzo ya Bibele ya Vandlha kumbe u dyondzisa xichudeni xa wena, a wu fanelanga u vulavula ngopfu. Mudyondzisi u fanele a tirhisa ngopfu Bibele ematshan’weni yo hlamusela xin’wana ni xin’wana lexi a xi tivaka hi mhaka leyi ku dyondziwaka hayona. * (Yoh. 16:12) Ehleketa hi leswi a wu swi tiva hi Bibele u nga si khuvuriwa ni leswi se u swi tivaka sweswi. Swi nga endleka leswaku loko u nga si khuvuriwa a wo tiva tidyondzo ta xisekelo ntsena. (Hev. 6:1) U nga dyondzisi xichudeni xa wena rungula ro tala hi siku rin’we hikuva na wena swi ku tekele malembe ku tiva leswi se u swi tivaka namuntlha.

5. (a) Hi ku ya hi 1 Vatesalonika 2:13, hi lava leswaku xichudeni xa hina xi twisisa yini? (b) Hi nga xi khutaza njhani xichudeni xa hina leswaku xi byela van’wana hi leswi xi swi dyondzaka?

⁵ Hi lava leswaku xichudeni xa hina xi twisisa leswaku leswi xi swi dyondzaka swi huma eBibeleni. (Hlaya 1 Vatesalonika 2:13.) Hi nga swi endla njhani leswi? Xi khutaze ku byela van’wana hi leswi xi swi dyondzaka. Ematshan’weni yo xi hlamusela matsalwa loko mi dyondza, kombela xona xi ma hlamusela. Xi pfune xi vona ndlela leyi Bibele yi nga xi pfunaka hayona. Xi vutise swivutiso leswi nga ta endla xi vula ndlela leyi xi titwaka hayona hi matsalwa lawa xi ma hlayeke. (Luka 10:25-28) U nga xi vutisa swivutiso leswi: “Tsalwa leri ri ku pfune njhani leswaku u vona vumunhu bya Yehovha?” “Leswi u swi dyondzaka eBibeleni swi nga ku pfuna njhani?” “U titwa njhani hi leswi wa ha ku swi dyondzaka?” (Swiv. 20:5) Mhaka ya nkoka, i ku va xichudeni xi rhandza ni ku tirhisa leswi xi swi dyondzaka, ku nga ri ku tiva swo tala.

6. Hikwalahokayini swi ri swinene ku famba ni vadyondzisi lava nga ni vutshila loko hi ya dyondzisa swichudeni swa hina?

⁶ Loko u ya dyondzisa xichudeni xa wena, xana u pfa u famba ni vadyondzisi lava nga ni vutshila? Loko swi ri tano, va vutise leswaku  madyondziselo ya wena ma njhani. Leswaku u kota ku antswisa madyondziselo ya wena u fanele u titsongahata. (Ringanisa Mitirho 18:24-26.) Endzhaku, vutisa munhu loyi a wu fambe na yena leswaku u xi vona njhani xichudeni xa wena. U nga tlhela u n’wi kombela leswaku a sala a dyondza na xona loko u nga ri kona. Sweswo swi ta endla xichudeni xa wena xi swi vona leswaku i swa nkoka ku dyondza nkarhi ni nkarhi. U nga tibyeli leswaku i xichudeni xa wena ntsena. Kahlekahle lexi u xi lavaka hileswaku xichudeni xa wena xi tiva ntiyiso.

7. I yini leswi nga ta pfuna xichudeni xi tsakela leswi xi swi dyondzaka?

⁷ Xichudeni xa wena xi fanele xi swi vona leswaku wa tiyiseka hi rungula ra le Bibeleni leri u xi dyondzisaka rona. (1 Tes. 1:5) Loko u endla tano, xi ta swi tsakela leswi xi swi dyondzaka. Xi byele ndlela leyi ku hanya hi misinya ya milawu ya Bibele swi ku pfuneke hayona. Sweswo swi ta endla xi swi vona leswaku na xona Bibele yi ta xi pfuna.

8. I yini swin’wana leswi u nga swi endlaka leswaku u pfuna xichudeni xa wena naswona u nga swi endla njhani?

⁸ Loko u ri karhi u dyondzisa xichudeni xa wena, xi byele hi vanhu lava hluleke mitlhontlho yo fana ni leyi xi langutaneke na yona. U nga famba ni makwerhu un’wana loyi a tshameke a langutana ni mitlhontlho yo fana ni leyi xi langutaneke na yona. Kumbe u xi komba mitokoto leyi nga eka jw.org ehansi ka nhlokomhaka leyi nge “Bibele Yi Hundzula Vutomi Bya Vanhu.” * Tinhlokomhaka ni tivhidiyo toleto swi ta xi pfuna xi vona nkoka wo hanya hi misinya ya milawu ya Bibele.

9. U nga xi khutaza njhani xichudeni xa wena leswaku xi bula ni swirho swa ndyangu ni vanghana va xona hi leswi xi swi dyondzaka?

⁹ Loko xichudeni xa wena xi catile, xana nuna kumbe nsati wa xona na yena wa dyondza? Loko a nga dyondzi, n’wi rhambe. Khutaza xichudeni xa wena leswaku xi bula ni swirho swa ndyangu ni vanghana va xona hi leswi xi swi dyondzaka. (Yoh. 1:40-45) Njhani? U nga xi vutisa leswi: “U nga swi hlamusela njhani swirho swa ndyangu wa ka n’wina leswi u swi dyondzaka?” kumbe “Hi rihi tsalwa leri u nga ri tirhisaka ku khorwisa munghana wa wena leswaku leswi u swi dyondzaka i ntiyiso?” Loko u endla leswi, u letela xichudeni xa wena leswaku xi ta va mudyondzisi. Loko se xi faneleka, xi  nga sungula ku chumayela ni vandlha. U nga xi vutisa loko ku ri ni loyi xi n’wi tivaka loyi a tsakelaka ku dyondza Bibele. Loko a ri kona, u nga ha yimayimi n’wi fonele u kombela ku n’wi dyondzisa Bibele. N’wi kombe vhidiyo leyi nge Leswi Endlekaka Eka Dyondzo Ya Bibele. *

10. Hi ku ya hi 1 Vatesalonika 2:7, 8, mudyondzisi a nga n’wi tekelela njhani Pawulo?

¹⁰ Vadyondzisi va fanele va komba swichudeni swa vona leswaku va khathala hi swona. Swi tekeni tanihi vanhu lava nga ta va vamakwenu. (Hlaya 1 Vatesalonika 2:7, 8.) A swi olovi ku va swi tshika mahanyelo ni vanghana va swona kutani swi sungula ku tirhela Yehovha. Hi fanele hi swi pfuna swi kuma vanghana lavanene evandlheni. Tinyike nkarhi wo tolovelana ni xichudeni xa wena u tlhela u va munghana wa xona. Kombisa leswaku wa khathala hi xona hi ku va u xi fonela, u xi rhumela meseji ni hi ku xi endzela.

11. Hi lava leswaku swichudeni swa hina swi kuma yini evandlheni naswona hikwalahokayini?

¹¹ Xitsonga xi ri: “N’wana a hi wa un’we.” Leswi vulaka leswaku: “Vandlha hinkwaro ri hoxa xandla eku endleni ka mudyondzisiwa.” Hi yona mhaka vadyondzisi lava nga ni vutshila va hlanganisaka swichudeni swa vona ni vamakwerhu lava nga ta swi pfuna swi va ni vuxaka lebyinene na Yehovha. Swichudeni swi ta kuma vanghana evandlheni lava nga ta swi tiyisa ni ku swi seketela. Hi lava leswaku swichudeni swa hina swi titwa swi ri ekaya loko swi ri evandlheni. Hi lava leswaku swi tikumela vanghana lavanene evandlheni ra Vukreste. Loko swi endla tano, swi ta swi olovela ku tshika ku tihlanganisa ni vanhu lava nga n’wi rhandziki Yehovha. (Swiv. 13:20) Loko vanghana va swona va khale va swi papalata, swi ta tsaka hi ku tiva leswaku swi ni vanghana lavanene enhlanganweni wa Yehovha.—Mar. 10:29, 30; 1 Pet. 4:4.

12. Hikwalahokayini hi fanele hi bula ni xichudeni hi mhaka ya ku tinyiketela ni ku khuvuriwa?

¹² Bula ni xichudeni xa wena hi mhaka ya ku tinyiketela ni ku khuvuriwa. Phela xikongomelonkulu xa hina i ku xi pfuna leswaku xi va mudyondzisiwa loyi a khuvuriweke. Loko se mi ri ni tin’hweti ti nga ri tingani mi dyondza naswona xichudeni xa wena se xi ta etinhlengeletanweni ta vandlha, xi hlamusele leswaku u lava ku xi pfuna xi va Mbhoni ya Yehovha.

13. Hi wahi magoza lawa xichudeni xi faneleke xi ma teka leswaku xi ta fanelekela ku khuvuriwa?

¹³ Ku ni magoza lawa xichudeni xi faneleke xi  ma teka leswaku xi ta fanelekela ku khuvuriwa! Xi fanele xi rhanga hi ku tiva ni ku rhandza Yehovha xi tlhela xi va ni ripfumelo eka Yena. (Yoh. 3:16; 17:3) Xi fanele xi va ni vuxaka na Yehovha xi tlhela xi tolovelana ni vamakwerhu evandlheni. (Hev. 10:24, 25; Yak. 4:8) Xi fanele xi tshika mikhuva yo biha xi tlhela xi hundzuka. (Mit. 3:19) Xi fanele xi byela van’wana hi leswi xi swi dyondzaka. (2 Kor. 4:13) Eku heteleleni, xi ta tinyiketela eka Yehovha xi tlhela xi khuvuriwa. (1 Pet. 3:21; 4:2) Vandlha hinkwaro ri ta giya hi siku rero! Loko xichudeni xi ri karhi xi endla nhluvuko, xi bumabumele u tlhela u xi khutaza leswaku xi ya emahlweni xi endla tano.

14. Mudyondzisi a nga xi kambela njhani xichudeni xakwe ku vona loko xi endla nhluvuko?

¹⁴ Hi fanele hi lehisa mbilu loko hi ri karhi hi pfuna xichudeni leswaku xi ta fanelekela ku khuvuriwa. Kambe hi fanele hi xi kambela ku vona loko xi swi lava hakunene ku tirhela Yehovha Xikwembu. Loko u xi langutile, xana u vona onge xa swi yingisa swileriso swa Yesu? Kumbe xo tsakisa hi ku dyondza Bibele ntsena?

15. Mudyondzisi a nga swi vona njhani leswaku xichudeni xakwe xi endla nhluvuko?

¹⁵ Nkarhi ni nkarhi kambela xichudeni xa wena ku vona loko xi endla nhluvuko. Hi xikombiso, xana xa ku byela ndlela leyi xi titwaka hayona hi Yehovha? Xana xa khongela eka Yehovha? (Ps. 116:1, 2) Xana xa tinyika nkarhi wo hlaya Bibele? (Ps. 119:97) Xana xi tshama xi ri kona etinhlengeletanweni ta vandlha? (Ps. 22:22) Xana se xi ma tshikile mahanyelo ya xona ya khale? (Ps. 119:112) Xana se xi sungurile ku byela swirho swa ndyangu ni vanghana va xona leswi xi swi dyondzaka? (Ps. 9:1) Xa nkoka swinene, xana xa swi lava ku va Mbhoni ya Yehovha? (Ps. 40:8) Loko xi nga swi endli leswi, hi vutlhari xi vutise leswaku xi tiyimisele ku endla yini hi leswi xi swi dyondzaka. *

16. U nga swi vona njhani leswaku u fanele u tshika ku dyondza ni xichudeni xa wena?

¹⁶ Nkarhi ni nkarhi kambisisa ku vona loko swa ha fanerile ku ya emahlweni u dyondza ni xichudeni. Tivutise: ‘Xana a xi lunghiseleli? Xana a xi ti etinhlengeletanweni ta vandlha?  Xana xa ha ri ni mikhuva yo biha? Xana xa ha nghena kereke?’ Loko nhlamulo ku ri ina, ku ya emahlweni u dyondza na xona swi ta fana ni ku vehela xingwavila xa nsuku enhompfini ya nguluve! Loko xichudeni xi nga swi tlangeli leswi xi swi dyondzaka naswona xi nga tiyimiselanga ku cinca mahanyelo ya xona, tshika ku dyondza na xona.

17. Hi ku ya hi 1 Timotiya 4:16, vadyondzisi hinkwavo va Bibele va fanele va endla yini?

¹⁷ Hi byi teka byi ri bya nkoka vutihlamuleri bya hina byo endla vadyondzisiwa naswona hi lava ku pfuna swichudeni swa hina swi fanelekela ku khuvuriwa. Hi yona mhaka hi tirhisaka Bibele ngopfu loko hi dyondzisa hi tlhela hi kombisa leswaku ha tiyiseka hi leswi hi swi dyondzisaka. Hi ta khutaza swichudeni swa hina leswaku swi kuma vanghana evandlheni. Hi ta bula naswona hi mhaka ya ku tinyiketela ni ku khuvuriwa, hi tlhela hi swi kambela nkarhi ni nkarhi ku vona loko swi endla nhluvuko. (Vona bokisi nge “ Leswi Vadyondzisi Va Faneleke Va Swi Endla Leswaku Va Pfuna Swichudeni Swi Fanelekela Ku Khuvuriwa.”) Ha tsaka leswi hi hoxaka xandla entirhweni lowu, lowu ponisaka vutomi bya vanhu. Onge hi nga tikarhatela ku pfuna swichudeni swa hina leswaku swi fanelekela ku khuvuriwa!