1. Hi zvi tivisa kuyini lezvaku a ntiro wa ku maha vapizani wu ponisa wutomi ga vanhu?

A NTIRO wa ku maha vapizani wu ponisa wutomi ga vanhu! Hi zvi tivisa kuyini? A cikhati leci Jesu a nga nyika cileletelo ci nga ka Matewu 28:19, 20, i te: “Fambani mu va maha vapizani . . . , mu va bhabhatisa.” Hikuyini zvi nga zva lisima a ku a munhu a bhabhatiswa? Hi ku kasi a munhu a hanya kala kupindzuka zvi lava ku a bhabhatiswa. Loyi a lavako ku bhabhatiswa i fanele ku kholwa lezvaku hi to kuma wutomi ga pindzukelwa ntsena hi lezvi Jesu a nyikeleko wutomi gakwe kasi a hi tlhatlhisa, ni lezvi a vhuxilweko hi ka vafileko. Hi leco ci nga maha Pedro a byela maKristu-kuloni aku: “A kubhabhatisa ka mu ponisa . . . hi kota ya kuvhuka ka Jesu Kristu hi ka vafileko.” (1 Ped. 3:21) Makunu, loku a mupizani muswa a bhabhatiswa, i nghena ndleleni ya ku kuma wutomi ga pindzukelwa.

2. 2 Timote 4:1, 2 i komba ku a magondzisela ya hina ma fanele kuva yo tshamisa kuyini?

² Kasi hi maha vapizani, ku laveka ku hi ti karatela ku zvi ‘tiva khwatsi ku gondzisa’. (Lera 2 Timote 4:1, 2.) Hikuyini? Hakuva Jesu i hi layile aku: “Fambani mu va maha vapizani . . . , mu va bhabhatisa.” Mupostoli Pawule i te ku laveka ku u “timisela” ntirweni lowu, “hakuva loku u maha lezvo u ta ti ponisa wena u tlhela u ponisa ni lava va ku zwako”. Zva zwala makunu lezvi Pawule a ngaku: “Ti wonele . . . kugondziseni ka wena.” (1 Tim. 4:16) Lezvi ka ku kasi hi maha vapizani hi fanele ku gondzisa, a magondzisela ya hina ma fanele kuva ya ma nene nguvhu.

3. Zvini hi to gondza ka ndzima leyi xungetano hi ku fambisa zvigondzo zva Bhibhiliya?

 ³ Misaveni yontlhe hi gondzisa vanhu va talela ga cima. Kanilezvi, kota lezvi hi zvi wonileko ka ndzima yi nga hundza, ku laveka ku hi tiva tindlela ta ku va vhuna ku va bhabhatiswa kota vapizani va Jesu Kristu. Ka ndzima leyi, hi ta wulawula hi zvilo zvin’wani zva ntlhanu lezvi a vahuweleli vontlhe va faneleko ku maha kasi va vhuna zvigondzani lezvaku zvi bhabhatiswa.

4. Hikuyini a muhuweleli a faneleko ku ti khoma a cikhati a fambisako cigondzo ca Bhibhiliya? (Wona ni tlhamuselo wa lahasi.)

⁴ Ha li randza a lisine la Mhaka ya Nungungulu leli hi gondzisako. Hikwalaho, hi nga ringwa ku wulawula zvotala loku hi gondzisa. Hambulezvo, kani Cigondzo ca Murindzeli, kani Cigondzo ca Bhibhiliya ca bandla, kutani cigondzo ca Bhibhiliya, loyi a fambisako a nga faneli ku wulawula nguvhu. Kasi loyi a fambisako cigondzo a tsika Bhibhiliya gi gondzisa, i fanele ku tiva ku ti khoma, a nga zami ku tata hloko ya cigondzani hi ku tlhamusela zvontlhe a zvi tivako hi mhaka yo kari kutani ka vhesi go kari. * (Joh. 16:12) Hi nga alakanya lezvi u nga zvi tiva a cikhati leci wena u nga bhabhatiswa ni lezvi u zvi tivako zvezvi. Hi alakanya ku u wa nga tivi zvotala zvo hundza zvigondzo zvo sangula. (Mah. 6:1) Zvi lavile a ku ku hundza malembe kasi u gondza lezvi u zvi tivako nyamutlha. Hikwalaho, a cigondzani u nga zami a ku ci chululela a wutivi gontlhe u nga nago hi khati gin’we.

5. a) Hi kuya hi 1 Tesalonika 2:13, hi lava ku a cigondzani ca hina ci zwisisa yini ka lezvi ci gondzako? b) Hi nga ci kucisa kuyini a cigondzani a ku bhulela van’wani lezvi ci gondzako?

⁵ Hi lava ku a cigondzani ca hina ci zvi zwisisa ku lezvi ci gondzako zvi lomu ka Bhibhiliya, a Mhaka ya Nungungulu. (Lera 1 Tesalonika 2:13.) Hi ga zvi mahisa kuyini? Kuca cigondzani lezvaku ci bhula ni van’wani hi lezvi ci zvi gondzako. Wutshan’wini ga ku wena u tlhamusela mitsalo yontlhe, mu kombele a ku a tlhamusela yokari. Mu vhune ku wona lezvi yena a nga yi tirisisako zvona a Mhaka ya Nungungulu. Mu mahe zviwutiso zvi to mu vhuna ku a ti phofula, a wula mawonela yakwe ni lezvi a ti zwisako zvona hi mutsalo lowo. (Luka 10:25-28) Hi cikombiso, mu wutise ku: “A mutsalo lowu wu ku vhunisa kuyini a ku wona gin’we ga matshamela ya Jehovha?” “U nga vhunekisa kuyini hi lisine leli la Bhibhiliya?” “U ti zwisa kuyini hi lezvi u nga zvi gondza?” (Mav. 20:5) Leci ci nga ca lisima nguvhu, hi lezvi ci zvi randzisako zvona lezvi ci gondzako ni lezvi ci zvi tirisisako zvona wutomini ga cona; a hi kutala ka lezvi ci zvi tivako.

6. Hikuyini zvi nga vhunako ku famba ni muhuweleli wo buvha hi ya fambisa cigondzo ca Bhibhiliya?

 ⁶ Wa tshuka u famba ni muhuweleli wo buvha mu ya fambisa a cigondzo co kari? Loku u tshuka u famba naye, u nga mu kombela ku a wula ku i zvi wonisile kuyini lezvi u nga fambisisa zvona a cigondzo leco ni ku wa zvi kota khwatsi ku tsika a Bhibhiliya gi gondzisa ke? Loku zvi hi kona u faneleko ku chukwatisa ka magondzisela ya wena, ti koramise u chukwatisa futsi. (Fananisa ni Mitiro 18:24-26.) Gumesa u wutisa a muhuweleli loye wo buvha lezvaku a cigondzani ca wena ca yi zwisisa khwatsi a lisine ke. Loku zvi nga koteki a ku u fambisa a cigondzo leco hi cipimo ca vhiki kutani mambiri, u nga kombela muhuweleli loye lezvaku aya fambisa. Lezvo zvi ta maha ku a cigondzo ci khandzakanya zvi tlhela zvi vhuna cigondzani lezvaku ci wona ku a cigondzo ca lisima. U nga tshuki u ti byela ku leco cigondzani ca wena wece niku a ci nge gondzisiwi hi mun’wani. Phela lezvi wena u zvi lavako, ku a cigondzani leco ci simama ku gondza lisine ci ta kula! A hi zvona ke?

7. Cini ci to vhuna cigondzani lezvaku ci tsakela lezvi ci zvi gondzako?

⁷ A cigondzani ci fanele ku zvi wona lezvaku a lisine wa li randza u tlhela u li kholwa. (1 Tes. 1:5) Loku ci zvi wona lezvo, ci ta zvi tsakela lezvi ci gondzako. Loku zvi ringana, mu byele lezvi u vhunekisako zvona hi ku hanya hi matshinya ya milayo ya Bhibhiliya. Lezvo zvi ta mu vhuna ku wona lezvaku a Bhibhiliya gi na ni wusungukati gi nene legi gi nga mu vhunako yenawu.

8. Zvini zvin’wani u nga mahako kasi ku vhuna cigondzani ca wena?

⁸ A cikhati mu gondzako, mu hlawutele lezvi a van’wani va nga zvi hlulisa zvona a zvikarato lezvi yena a kumanako nazvo. U nga famba ni muhuweleli wokari wa ku a cikombiso cakwe ci nga vhuna loyi u gondzako naye. U nga kuma matshango yo tiyisa kambe lomu ka Murindzeli, ka tindzima: “A Bhibhiliya ga cica wutomi ga vanhu.” A tindzima leto ti ta vhuna cigondzani ca wena a ku wona lezvi zvi vhunisako zvona a ku hanya hi matshinya ya milayo ya Bhibhiliya.

9. Loyi u gondzako naye u nga mu kucisa kuyini ku a bhulela maxaka ni vanghana lezvi a zvi gondzako?

⁹ Loku va hanya kota nuna ni sati, zvi ngava chukwana a ku vontlhe va vambiri va gondza. Loku u nga gondzi navo vontlhe, ramba loyi mun’wani va ta gondza hi wumbiri gabye. Kuca cigondzani ca wena lezvaku ci bhulela maxaka ni vanghana lezvi ci zvi gondzako. (Joh. 1:40-45) Lezvo a zvi karati. U ngo mu wutisa lezvi: “A mhaka leyi u nga yi tlhamuselisa kuyini ka  xaka ga wena?” Kutani ku, “mutsalo muni u nga wu tirisako kasi u mu kholwisa a mhaka leyi a munghana wo kari?” Leyo i ndlela ya ku vhuna cigondzani lezvaku ci ta gondzisa. Loku hi kufamba ka cikhati a ringanelwa, a nga sangula ku chumayela kota muhuweleli wo kala ku bhabhatiswa. U ga wutisa cigondzani kambe lezvaku ku ni wokari a zvi lavako ku gondza Bhibhiliya ke. Loku a hi kona, tekela ku mu lavetela u tlhela u zama ku sangula ku gondza naye. Mu kombe a vhidhio: Xi mahisiwa kuyini a xigonzo xa Biblia? *

10. A muhuweleli a nga ci pimanyisisa kuyini a cikombiso ca Pawule hi kuya hi lezvi zvi tlhamuselwako ka 1 Va Le Tesalonika 2: 7, 8?

¹⁰ A vahuweleli va fanele ku khatala hi zvigondzani zvabye hi mbilu yontlhe. Va wone kota lava va tova vamakabye va wena cikhatini ci tako. (Lera 1 Va Le Tesalonika 2:7, 8.) A zvi olovi a ku va tsika vanghana va tiko ni ku cica zvontlhe zvi lavekako kasi va tirela Jehovha. Hikwalaho, hi fanele ku va vhuna ku kuma vanghana va lisine lomu bandleni. Maha munghana wa cigondzani ca wena hi ku ti nyika cikhati ca ku muva zvin’we, na ku nga hi ka cikhati mu gondzako basi, kanilezvi ni ka zvikhati zvin’wani. Loku u mu fonela, u mu tsalela mesaji kutani ku hundza u mu vhuxela hi cikhatanyana, zvi nga mu komba ku wa khatala nguvhu hi yena.

11. Hi lava ku a zvigondzani zva hina zvi ti zwisa kuyini lomu bandleni, niku hikuyini?

¹¹ Ku na ni vingu gaku: “A n’wanana i gondzisiwa hi dhoropa gontlhe.” Makunu, hina hi nga zvi wulisa lezvi: “Kasi a munhu ava mupizani i gondzisiwa hi bandla gontlhe.” Hi leco ci mahako ku a vahuweleli zvi va fambelako khwatsi ntirweni wa ku maha vapizani va vhunako zvigondzani zvabye a ku tivana ni van’wani lomu bandleni, lava va to va vhuna ku maha wunghana na Jehovha. Lezvo zvi maha ku a zvigondzani zvi ti buza hi wunghana ni vanhu va Nungungulu, lava va nga va vhunako hi tlhelo ga moya ni ku va tiyisa loku va kumana ni zvikarato. Hi lava ku a cigondzani cin’we ni cin’wani ci tizwa na ci hi ca lisima lomu bandleni ci tlhela ci ti wona kota ciro ca ngango wa hina wa moya. A hi lezvo basi, hi lava ku vazwa lirandzo li nga kona laha ngangweni wa hina kota maKristu. Loku hi maha lezvo, zvi ta va olovela a ku tsema wunghana ni vanhu va nga va vhuniko ku randza Jehovha. (Mav. 13:20) Loku va tsikiwa hi lava va nga hlakana navo, va nga ta karateka hakuva va ta zvi tiva lezvaku va nga kuma vanghana va lisine lomu hlengeletanweni ya Jehovha. — Mar. 10:29, 30; 1 Ped. 4:4.

12. Hikuyini loyi hi gondzako naye hi faneleko ku mu tlhamusela zvi ku dlunya lezvaku ku laveka ku a ti nyikela a tlhela a bhabhatiswa kota muKristu?

¹² Loyi u gondzako naye, mu tlhamusele zvi ku dlunya lezvaku ku laveka ku a ti nyikela ka Jehovha a tlhela a bhabhatiswa kota muKristu. Phela hi fambisa zvigondzo kasi ku vhuna vanhu lezvaku va bhabhatiswa kota vapizani va Jesu. Andzhako ka tihweti to kari na u gondza naye hi kukhandzakanya, nguvhunguvhu loku a sangulile kuta mitlhanganweni, i fanele ku zvi zwisisa lezvaku a kungo ga cigondzo ku mu vhuna ku sangula ku tirela Jehovha kota Kustumunyu wakwe.

13. Zvini lezvi a cigondzani ci faneleko ku maha kasi ciza ci bhabhatiswa?

¹³ Ku na ni mazambo yo kari lawa loyi u gondzako naye a faneleko kuba kasi a bhabhatiswa. Go sangula, i fanele ku tiva Jehovha, a mu randza, a tlhela kholwa ka yena. (Joh. 3:16; 17:3) Lezvo zvi ta maha ku a wumba wunghana naye a tlhela a sangula ku ti tlhanganisa ni bandla. (Mah. 10:24, 25; Jak. 4:8) I ta tsika mahanyela yo biha a guma a ti sola zviwonho zvakwe. (Miti. 3:19) A kukholwa kakwe kambe ku ta mu kuca ku a bhulela van’wani lezvi a zvi kholwako. (2 Kor. 4:13) Hi kugumesa, i ta ti nyikela ka Jehovha a tlhela a zvi kombisa hi ku bhabhatiswa. (1 Ped. 3:21; 4:2) Ne a ha ha wuli ku lego i siku ga litsako la hombe ka hontlheni! Laha a cigondzani ci bako mazambo lawa hi gin’we gin’we hi ku, ci dzundze hi laha u zvi kotako hi kona, u nga ti feleli. Tlhela u mu kuca ku a simama ku kula kala a bhabhatiswa.

14. A muhuweleli a nga hlolisa kuyini a ku a cigondzani ca kula hi tlhelo ga moya ke?

¹⁴ Laha hi vhunako a cigondzani kasi ci ringanelwa hi ku bhabhatiswa, hi fanele kuva ni lihlazva-mbilu. Kanilezvi, hi fanele kuta na hi hlola lezvaku ca zvi lava ku tirela Jehovha ke. Xana wa wona zvokari zvi kombako ku a cigondzani leco ca ti karatela ku ingisa milayo ya Jesu, kutani co lava ku gondza Bhibhiliya basi?

15. Zvini zvi to vhuna muhuweleli a ku tiva lezvaku a cigondzani ca kula ke?

¹⁵ Tolovela ku hlola kasi u wona lezvaku loyi u gondzako naye wa kula hi tlhelo ga moya ke. U nga ti wutisa zvilo zvo fana ni lezvi: Wa wula lezvi a ti zwisako zvona hi Jehovha? Wa khongela ka Jehovha? (Lis. 116:1, 2) A ku lera Bhibhiliya zva mu tsakisa? (Lis. 119:97) Wata mitlhanganweni hi kukhandzakanya? (Lis. 22:22) Wa cica  zvokari wutomini gakwe, lezvi zvi kombako ku wa hanya hi lezvi a gondzako ke? (Lis. 119:112) Lezvi a zvi gondzako wa tolovela ku bhulela maxaka ni vanghana vakwe? (Lis. 9:1) A ca lisima ka zvontlhe: Kona yena wa zvi lava kuva Kustumunyu wa Jehovha? (Lis. 40:8) Loku a nga mahi ne cin’we ca lezvi, bhula naye hi wunene ni lirandzo u zama ku tiva ku hikuyini. *

16. Cini ci nga kombako ku zva ringana a ku nyima ku gondza ni wokari?

¹⁶ Tana na u hlola ku zva ringana a ku simama u gondza ni munhu loye ke. Ti wutise lezvi: ‘A munhu loyi wa tshuka a nga vhuxeti a cigondzo? O kala a nga zvi lavi kuta mitlhanganweni? Wa ha hi ni mahanyela yo biha? Wa ha lumba wukhongeli ga mawunwa ke?’ Loku a hlamulo wu hi “ina”, a ku simama ku gondza naye zvi wa ta fana ni ku mu gondzisa ku hlambela a munhu wa ku ne a nga zvi lavi ku tsakama! Loku a nga zvi randzi lezvi a gondzako, hikuyini u ti mbhetelako sikira hi ku funya?

17. Hi kuya hi 1 Timote 4:16, zvini lezvi va faneleko ku maha vontlhe lava va gondzisako Bhibhiliya?

¹⁷ A ntiro wa ku maha vapizani hi wu nyika nguvhu lisima niku hi lava ku vhuna a zvigondzani zva Bhibhiliya lezvaku zvi ringanelwa hi ku bhabhatiswa. Hi cigelo leco, hi ta tsika Bhibhiliya gi gondzisa hi tlhela hi komba lezvaku ha zvi randza niku ha zvi kholwa lezvi hi gondzisako. Hi ta kuca cigondzani kambe lezvaku ci ti mahela vanghana lomu bandleni. Hi ta vhuna cigondzani kambe lezvaku ci tiva lisima la ku ti nyikela ka Jehovha ni ku bhabhatiswa hi tlhela hi ta na hi hlola ku ca kula hi tlhelo ga moya ke. (Wona kwadru: “ Kasi u gondzisa munhu a ringanelwa hi ku bhabhatiswa, maha lezvi” gi nga ka pajina 13.) A ho ku tsaka hi lezvi hi nga ni thomo legi ga ku maha a ntiro lowu wu ponisako wutomi ga vanhu! Hikwalaho, hi lava ku maha zvontlhe hi zvi kotako kasi hi vhuna zvigondzani zva hina lezvaku zvi ringanelwa hi ku bhabhatiswa.