SEMANA 42
Néna jarhuatani jorhenguarhirini ma paraka niáraaka itsï atakuarhini (parti 2)
“Jingontku jáma ka jingontku jorhentpi” (1 TIM. 4:16, Táta Diósïri Uandakua Tata Jesukristueri Aiatsperakua [TDU]).
PIREKUA 77 Lusi ma uinhanharhixati
AMBE ENGACHI EXEAKA *
1. ¿Andichisï uandajki eska Jesusiri chúxapatichani uáni, ánchikuarhita máeska enga pʼímutantaajka kʼuiripuecha?
I ÁNCHIKUARHITA para jarhuataani kʼuiripuechani Jesusiri chúxapatini, uáti paraksï pʼímutantskata uérani. ¿Andichisï ísï uandajki? Ju je miáni ambe enga Jesusi juramupka ixú Mateu 28:19, 20 TNM jimbo, ni je, jarhuataa je kʼuiripuechani parakaksï niáraaka juchiti chúxapatini ka itsï ataa je. Ka míteskachi eska itsï atakuarhini kánikua jukaparhakueska parachi úni pʼímutantskata uérani. Kʼuiripu ma enga uéjka itsï atakuarhini, jatsisti para jakajkuni eska solu ísï uáka pʼímutantskata uérani enga jakajkuska eska Jesusi uarhiska juchantsïni jimbo ka eska tsítanhantaska. Jimbosï apostuli Pedru arhiapti kristianuechani eskajtsïni “bautismu [...] pʼímutantasïnga jimboka Kristu tsíntaska uarhiricharhu” (1 Ped. 3:21). Ísï jimbo, enga nema niárajka itsï atakuarhini ambakiti erokuarhikua ma jatsisïndi, irekani para méntkisï.
2. Eska na arhijka 2 Timoteo 4:1, 2, ¿ambechi jatsiski para úni jucha engachi jorhentpijka?
2 Para Jesusiri chúxapatichani uáni, jatsiskachi para “sési jorhentpini” (arhinta je 2 Timoteo 4:1, 2). ¿Andi? Jimbokajtsïni Jesusi juramuchiska ni je, jarhuataa je kʼuiripuechani parakaksï niáraaka juchiti chúxapatini ka jorhendaa je. Apostuli Pablu arhispti Timoteuni eska seguiripiringa jánguarhintani ini ánchikuarhitani jimbo ka arhispti: “Jiájkandi pʼímutantskurheaka ka imechanturi pʼímutantauaka engaksïni kurhajchaaka”. Jimbosï íntskupti ini konsejuni: “Jingontku jorhentpi” (1 Tim. 4:16, TDU). Para Jesusiri chúxapatichani uáni jatsiskachi para jorhentpini, ísï jimbo jatsiskachi para sési jorhentpini.
3. ¿Ambechi exea ini jorhenguarhikua jimbo?
3 Mándani semana uánikua kʼuiripuechanchi jorhendaasïnga Bibliaeri ambe. Joperu eskachi na exeka máteru jorhenguarhikua jimbo, uékasïngachi jorhenguarhini néna sánderu uánikua kʼuiripuechani jarhuataani paraksï niárani Tata Diosïni marhuakuni ka itsï atakuarhini. Ini jorhenguarhikua jimbo, iúmu ambechi exeaka engaksï jatsika para úni jorhentpiricha paraksï úni jarhuataani jorhenguarhirichani ka paraksï niárani itsï atakuarhini.
JURAJKUNI ESKA BIBLIA JINDEUAKA ENGA JORHENTPIAKA
Ju je kurhakuni ambakiti jorhentpirini ma eskajtsïni jarhuataaka parachi úni eska Biblia jindeuaka enga jorhentpiaka. (Exe je párrafu 4 a 6). *
4. ¿Andisï jatsi para jorhentpiri pʼíngukuarhini enga Bibliaeri ambe jorhentpini jauaka? (Ístu exe je nota).
4 Iáminduechachi tsitisïnga jorhentpini Tata Diosïri Karakateri ambe, joperuchi jamberi jukari uékaaka uandani inderi ambe. Ísï jimbo, engachi nitamatarani jauaka Jorhenguarhikua Aianhpiri jingoni, Bibliaeri Jorhenguarhikua kúnguarhikua jingoni o engachi Bibliaeri ambe jorhentpini jauaka, nóchi jatsiska para jukari jamberi uandani. Ju je jurajkuni eska Biblia jindeuaka enga jorhentpiaka, ísï jimbo jorhentpiri jatsisti para pʼíngukuarhini ka no uékani iámindu ambe jorhentpini enga xáni míteka, temeri ma o Karakateri ma (Juanu 16:12). * Eratsenta je na engajtsï xáni mítepka Bibliaeri ambe jiáni engajtsï itsï atakuarhika ka na engajtsï xáni mítekia iásï. Jamberijtsï imani ambejku mítepka engachi orheta jatsika para jorhenguarhini (Ebr. 6:1). Ambe engajtsï cha mítekia iásï, uánikua uéxurhini jimbojtsï míteska indeni ambe, ísï jimbo asï jánguarhinta je méntku ma xanhari jimbojku uékani iámu ambe jorhentpini.
5. a) Ísï eska na arhijka 1 Tesalonika 2:13, ¿ambechi uékasïni eska kurhanguaka jorhenguarhiri? b) ¿Nénachi uá úni eska kʼuiripu imeri ambe uandaaka enga jorhenguarhini jaka?
5 Uékasïngachi eska jorhenguarhiri kurhanguaka eska ambe enga jorhenguarhini jaka Tata Diosïri Karakateri ambeska (arhinta je 1 Tesalonika 2:13). Para ísï úni, ju je jarhuatani paraka uandaaka ambe enga jorhenguarhini jaka. Enbesi de jucha méntkisï arhini ambe arhikuekasïni máru karakatecha, ju je arhini eskajtsïni arhiaka ambe kurhanguski máru karakatecheri. Ju je jarhuatani paraka ima exeaka néna uá jarhuatani ima ambe enga Bibliarhu jorhenguarhini jaka. Ju je kurhamarhikuechani úkuani paraka uandaaka ambe enga eratsejka ka pʼikuarherani enga karakatechani arhiantauaka (Luk. 10:25-28). Por ejemplu, ju je kurhamarhini: “¿Úsïntsï cha exeni Jeobaeri kualidadi ma ini karakatarhu?”, “¿Nénaksïni uá marhuacheni i Bibliaeri karakata?”, “¿Nénaksïni pʼikuastaski i ambe engajtsï kʼamaraka jorhenguarhini?” (Prov. 20:5). Ambe enga sánderu jukaparhakueka jindesti eska tsitiaka ambe enga jorhenguarhini jaka ka ísï úni ka no eska uánikua ambe jorhenguarhiaka.
6. ¿Andisï sési japirini eskachi arhiapiringa aianhpirichani engaksï sési jorhentpijka eskajtsïni pámbeaka engachi niuaka Bibliaeri ambe jorhentpini?
6 Engachi nirajka Bibliaeri ambe jorhentpini, ¿ménisïchi arhiasïni erachichani o pirenchichani engaksï sési jorhentpijka eskajtsïni niuaka pámbeni? Engajtsïni maisï pámbeska, uákachi arhini eskajtsïni arhiaka néna exeski na engachi jorhentpika ka eskajtsïni arhiaka sinchi jurajkuski eska Biblia jindepiringa enga jorhentpika. Parachi sánderu ambakiti jorhentpiricheni jatsiskachi para kaxumbitiini (terukutanta je Ukuecha 18:24-26 jingoni). Ístuchi uáka kurhamarhini sini ima exesïni eska jorhenguarhiri kurhanguxaka ambe enga jorhenguarhini jaka. Engachi uéraaka ma o uánikua semanechanisï, uákachi kurhakuni eska niuaka jorhendani Bibliaeri ambe. Ísï seguirini jauati Bibliaeri ambe jorhenguarhini ka exeati na enga xáni jukaparhakueka inde ambe. Nóchi jatsiska para eratseni eskachi juchajkusï jatsika para jorhendani ka eska no uáka máteru nema jorhendani. Ambe engachi uéjka, jindesti eska jorhenguarhiri seguirini jauaka jorhenguarhini jurhimbikueri ambe.
TSÍPIKUA JINGONI JORHENTPINI KA XARHATANI ESKA JAKAJKUSÏNGA AMBE ENGA JORHENTPIJKA
Parachi jarhuatani jorhenguarhini Bibliaeri karakatechani úraani, ju je erachicheri eksperiensiechani aianguani. (Exe je párrafu 7 a 9). *
7. ¿Ambe jarhuataa jorhenguarhirini para tsitini ambe enga jorhenguarhini jaka?
7 Jukaparhakuesti eska jorhenguarhiri exeaka na engachi tsitijka ka jakajkuni ima ambe engachi Bibliaeri ambe jorhentpijka (1 Tes. 1:5). Inde ambe jimbo jorhenguarhiri sánderu tsitiati ambe enga jorhenguarhini jaka. Jamberichi úpiringa aianguni na engajtsïni marhuacheka Bibliaeri karakatecha juchari irekuarhu. I ambe jarhuataati paraka exeaka eska imantu uáka marhuakuni.
8. ¿Ambeteruchi uá úni para jarhuatani Bibliaeri jorhenguarhirini, ka andi?
8 Jiáni engachi jorhenguarhini jauaka, ju je aianguni na engaksï máru erachicha úka orhepani uérakuani xarhati uandanhiatechani enga jorhenguarhiri jatsiaka. ¿Úpirini marhuakuni ejemplu ma erachiri enga kúnguarhikuarhu jaka? Jiájkani ju je kurhakuni erachini eskajtsïni pámbetaaka jorhenguarhikuarhu. Ístuchi uáka úraani ambakiti eksperiensiechani engaksï jw.org jaka, partirhu “Biblia jarhuataasti mójtakuni irekua”. * Ini jorhenguarhikuecharhu ka bideuecharhu, exeati na enga xáni sésika ísï úni na engaksï Bibliaeri karakatecha arhijka.
9. ¿Ambechi uá úni para jarhuatani Bibliaeri jorhenguarhirini paraka aianguauaka imeri familiani ka amiguechani ambe enga jorhenguarhini jaka?
9 Enga kʼuiripu tembuchatini o uambuchatini jaka ka imeri acheeti o uarhiiti no jorhenguarhini jarhani Bibliaeri ambe, ¿andichisï no pʼímarhijki paraka imajtu jorhenguarhiaka? Ístu, ju je pʼímarhini jorhenguarhirini eska aianguaka imeri familiani ka amiguechani ima amberi enga jorhenguarhini jaka (Juanu 1:40-45). Úpiringachi kurhamarhini: “¿Nénari úpirini aianguni ini jorhenguarhikuani chíti familiani?” o “¿Náki karakatari úrapirini parari aianguni chíti amiguni ma ini jorhenguarhikueri ambe?”. Ísï úparini, jarhuatanchi jauaka jorhenguarhirini paraka ambakiti jorhentpiri máeuaka. Jiájkani, enga úskia ambe enga xáni uétarhijka para aianhpiri úkuarhini, uáti kúnguarhikua jingoni uénani aianhpini. Uákachi kurhamarhini sini míteski nemani enga uékani jaka Bibliaeri ambe jorhenguarhini. Engajtsïni arhiska eska jo, ju je sóntku jirinhantani kʼuiripuni ka ju je aiakuni Bibliaeri jorhenguarhikua ma. Ju je exerani bideuni ¿Néna úkuarhisïni estudiu bíbliku ma? *
JARHUATANI JORHENGUARHIRINI PARAKA JATSIAUAKA AMIGUECHANI KÚNGUARHIKUARHU
Ju je jarhuatani jorhenguarhirini eska jatsiauaka amiguechani kúnguarhikuarhu. (Exe je párrafu 10 ka 11). *
10. Eska na uandajka 1 Tesalonika 2:7, 8, ¿néna uá jorhentpiri májkueni úni eska Pablu?
10 Jorhentpirichaksï jatsisti para pendienti páni imecheri jorhenguarhiricha jimbo. No ióni jimboksï uáti jindeni juchari erachicha ka pirenchicha (arhinta je 1 Tesalonika 2:7, 8). Para imecha, úkua jukasti jurajkuani amiguechani engaksï no marhuakujka Jeobani ka mójtakuni máru ambe enga uétarhijka para úni marhuakuni Jeobani. Ísï jimbo, ju je jarhuataani ambakiti amiguechani jatsiani kúnguarhikuarhu. Engachi jucha imecha jingoni jarhajka ka no jiájkantku engachi Bibliaeri ambe jorhendani jarhajka, xarhatanchi jarhasïnga eskachi imecheri amigueska. Engachi uandajpauaka, mensaji axakuani o engachi niuaka pʼorhembiani méni engachi uáka, xarhatakuanchi jauaka eskachi uandanhiasïnga imechani jimbo.
11. ¿Ambechi uékasïni eskaksï jatsiaka jorhenguarhiricha kúnguarhikuarhu, ka andi?
11 Ísï uandanhasïndi eska “ma ireta uétarhisïnga para sapini ma tʼarhexerani”. Sáno májkueni, úpiringachi uandani eskaksï “iámindu kúnguarhikuarhu anapuecha uétarhisïnga para jarhuatani nemani Jesusiri chúxapatiini”. Ísï jimbo, ambakiti jorhentpirichaksï mítetaraasïndi jorhenguarhirichani ambakiti erachichani engaksï kúnguarhikuarhu jaka, parakaksï imechajtu jarhuatauaka sánderu andarhierani Jeobani. Ísï úparini, kúnguarhikuarhu anapu erachichaksï jarhuatauati parakaksï sánderu sési pájperaaka Jeobani jingoni ka jarhuataani jiáni engaksï uandanhiatechani jatsiauaka. Uékasïngachi eska mándani jorhenguarhiri sési pʼikuarheraaka ka eska niáraaka exeni eska kúnguarhikua jingoni kuenta úkuarhisïnguia. Engachi jarhuataska jorhenguarhirini para tsitini erachicha ka pirenchicha jingoni jarhani, sánderu fásiliuati jurajkuani imeri amiguechani engaksï no jarhuatajka para xénchani Jeobani (Proverbios 13:20). Engaksï imecheri amiguecha nóteru uékaakia kurhini, uáti mintsikani eska uáka jatsiani ambakiti amiguechani kúnguarhikuarhu (Mar. 10:29, 30; 1 Ped. 4:4).
UANDONTSKUARHEKUNI ESKA JUKAPARHAKUESKA AIAKUKUARHENI JEOBANI KA ITSÏ ATAKUARHINI
Bibliaeri jorhenguarhiri ma uánikua ambe úsïndi para úni itsï atakuarhini. (Exe je párrafu 12 ka 13).
12. ¿Andichisï jatsi para uandontskuarheni jorhenguarhiri jingoni paraka aiakukuarheaka Jeobani ka itsï atakuarhini?
12 Ju je uandontskuarhekuni na enga xáni jukaparhakueka aiakukuarheni Jeobani ka itsï atakuarhini. Jimboka ambe engachi jimbo jorhentpijka Bibliaeri ambe jindesti paraksï kʼuiripuecha marhuakuni Jeobani ka paraksï itsï atakuarhini. Enga kʼuiripu páni jakaia ma tiempu sési jorhenguarhini Bibliaeri ambe ka uénani jarhania nirani tánguarhikuecharhu, jatsisti para kurhanguni eskachi jorhendaxaka paraka niáraaka Jeobaeri testigueni.
13. ¿Ambe ka ambe jatsiski para úni jorhenguarhiri paraka niáraaka itsï atakuarhini?
13 Jorhenguarhiri jarhasti para uánikua ambe úni enga uékaaka itsï atakuarhini. Orheta, jatsisti para míteni, xénchani ka mintsikani Jeobani (Juanu 3:16; 17:3). Tátsekua, Jeobaeri amigu úkuarhisïndi ka ístu kúnguarhikua anapu erachicha ka pirenchicha jingoni (Ebr. 10:24, 25; Sant. 4:8). Tiempu jingoni nóteru úsïndia no sési jásï ambe ka móantasïndi imeri ambe enga no sési úka (Uku. 3:19). Ístu, aianguasïndi máteru kʼuiripuechani ambe enga ima jakajkujka (2 Kor. 4:13). Ka últimu aiakukuarhesïndi Jeobani ka itsï atakuarhisïndi (1 Ped. 3:21; 4:2). Ka inde jurhiatikua kʼéri tsípikuarhita máesïndi para iáminduecha. Enga jorhenguarhiri imani ambe úni jarhajka enga jarhuataaka para itsï atakuarhini, ju je felisitarini ka pʼímarhini paraka seguirini jauaka ísï úni.
EXENI SINI JORHENGUARHIRI ÚXAKIIA AMBE MA PARA MARHUAKUNI TATA DIOSÏNI
14. ¿Néna uá míteni jorhentpiri ma sini jorhenguarhiri uékasïni marhuakuni Jeobani o nómbe?
14 Tekaantskua uétarhisïndi para jarhuatani jorhenguarhirini ma paraka niáraka aiakukuarheni Jeobani ka itsï atakuarhini. Peru ístuchi jatsiaka para exeni sini jorhenguarhiri uékasïni marhuakuni Jeobani o nómbe. ¿Xarharasïni eska jánguarhintaxaka ísï úni eskajtsïni Jesusi na juramuchika? ¿O solu jorhenguarhixaki jimboka ambakiti ambe jorhenguarhisïnga Bibliarhu?
15. ¿Ambe ka ambe xarhatasïni eska jorhenguarhiri uékasïnga marhuakuni Jeobani?
15 Ju je exeni sini jorhenguarhiri úxaki ambe ma para Jeobani marhuakuni. Por ejemplu, ¿uandasïni ambe enga pʼikuarherajka Jeobani jimbo? ¿Kómarhisïni? (Sal. 116:1, 2). ¿Tsitisïni arhintani Bibliani? (Sal. 119:97). ¿Sáno méntkisï nirasïni tánguarhikuecharhu? (Sal. 22:22). ¿Jánguarhintaxaki úni ambe enga jorhenguarhini jaka para mójtakurhini? (Sal. 119:112). ¿Uénaxakia aianguni imeri familiani ka amiguechani ambe enga jorhenguarhini jaka? (Sal. 9:1). Ka ambe enga sánderu jukaparhakueka, ¿uékasïni Jeobaeri testigueni? (Sal. 40:8). Enga no úni jaka ini ambe, ju je iatsitakuarhu kurhamarhini andisï no ísï úni jaki ka uékperakua jingoni uandontskuarhekuni inderi ambe joperu jurhimbikua jingoni. *
16. ¿Na jatini sési japirini eskachi nemani nóteru jorhendapiringuia Bibliaeri ambe?
16 Ístuchi jatsiska para exeni jarhani sinchi seguirini jaua Bibliaeri ambe jorhendani nemani. Ju je kurhamarhikuarhini: “¿Ima prepararikuarhisïni para méni enga jorhenguarhiaka? ¿Xarhatasïni eska uékasïnga nirani tánguarhikuecharhu? ¿Nóteru úsïnia imani ambe enga no sési jaka? ¿Jurajkuskia relijioni no jurhimbitini?”. Engajtsï exejka eska nómbe, seguirini jarhani Bibliaeri ambe jorhendani nemani, ísïpirindi komu nemani afuersa uékani jorhendani xarhiani o nadarini ka ima no uékani kuakani. Enga kʼuiripu no jukaparharajka ambe enga jorhenguarhini jaka ka no uékani mójtakurhini, ¿sési japirini seguirini jarhani jorhendani?
17. Ísï eska na arhijka 1 Timoteo 4:16, ¿ambeksï jatsiski para úni Bibliaeri jorhentpiricha?
17 Kánikua jukaparhakuesti para jucha jarhuataani kʼuiripuechani paraksï Jesusiri chúxapati úkuarhini. Uékasïngachi juchari Bibliaeri jorhenguarhirichani jorhendaani astakaksï niáraaka itsï atakuarhini. Ísï jimbo, ju je jurajkuni eska Biblia jindeuaka enga jorhendauaka ka ju je tsípikua jingoni jorhentpini ka xarhatani eskachi jakajkusïnga ambe engachi jorhentpijka. Ju je jarhuatani jorhenguarhirini paraka jatsiauaka amiguechani kúnguarhikuarhu, ju je xarhatakuni eska jukaparhakueska niárani aiakukuarheni Jeobani ka itsï atakuarhini ka ju je exeni sini jorhenguarhiri úxaki imani ambe enga jorhenguarhini jaka. (Exe je rekuadruni “ Ambe enga jatsika para úni jorhentpiri”). ¡Kánikuachi tsípisïnga ini ánchikuarhitani úni enga marhuajka para pʼímutantspini! Ísï jimbo, ju je jánguarhintani xáni eskachi xáni uáka parakaksï juchari jorhenguarhiricha niáraaka itsï atakuarhini.
PIREKUA 79 Jarhuataa paraksïni úni marhuachini
^ párr. 5 Engachi nemani Bibliaeri ambe jorhendani jarhajka, kʼéri kóntperatachi ma jatsiska kʼuiripuni jorhendani na enga Jeoba uéjka eska pʼikuarheraaka, eska eratseaka ka eska jámaaka. I jorhenguarhikuajtsïni jorhendaati nénachi uá sánderu ambakiti jorhentpirini.
^ párr. 4 Exe jorhenguarhikuani “Asï ú je ini ambe engajtsï estudiu ma úni jauaka” enga Programarhu para Ánchikuarhini septiembrini 2016 uéraka.
^ párr. 8 Exe je JUCHARI AMBE > AMBE ENGAKSÏ NITAMAKUARHIKA JEOBAERI TESTIGUECHA.
^ párr. 9 Pájinarhu jw.org exe je BIBLIAERI JORHENGUARHIKUECHA > JORHENGUARHI JE BIBLIAERI AMBE JEOBAERI TESTIGUECHA JINGONI.
^ párr. 15 Exea je jorhenguarhikuani “Ambe enga ma pʼikuarherajka Jeoba jimbo, úsïndi eska uékaaka itsï atakuarhini” ka “¿Exesïntsï eskajtsï uákia itsï atakuarhini?” rebistarhu Aianhpiri marsueri 2020 anapu.
^ párr. 77 AMBE ENGAKSÏ XARHATAJKA IMAJENICHA: Engaksï na jorhentpipkia Bibliaeri ambe, pirenchi ma enga sési jorhentpijka arhistakuxati máteru pirenchini eska no xáni kánikua ambe uandaani enga Bibliaeri ambe jorhentpini jauaka.
^ párr. 79 AMBE ENGAKSÏ XARHATAJKA IMAJENICHA: Engaksï Bibliaeri ambe jorhenguarhini jarhajka, jorhenguarhiri, jorhenguarhisïndi sánderu ambakiti témba máeni. Ka tátsekua aiangusïndi uámbani ambe enga jorhenguarhika.
^ párr. 81 AMBE ENGAKSÏ XARHATAJKA IMAJENICHA: Jorhenguarhiri ka imeri uámba, tsípikuarhixatiksï pirenchicho ma enga Kʼumanchikua Reinuerirhu mítepka.
