1. Tinozviziya kudini kuti basa rekuita afundi i basa rinoponesa upenyu?

BASA rekuita afundi i basa rinoponesa upenyu! Tinozviziya kudini? Djesu paakapasa mutemo uri pana Mateu 28:19, 20, iyena wakati: “Hino endai, . . . mooita afundi . . . , meciabhabhatidza.” Cinyi catinoziya nge zve kukosha ke rubhabhatidzo? Tinodikana kubhabhatidzwa kana tecida kurarama nokusikaperi. Aya anoda kubhabhatidzwa anodikana kutenda kuti ruponeso rinobvira basi nge rufu ra Djesu. Ndiyo ndaa mu apostori Pedru wakareketa ku aKristu amweni kuti: “Rubhabhatidzo [ndirona] ririkumuponesai zvino . . . peciseenzeswa rumuko ra Djesu Kristu.” (1 Pe. 3:21) Hino mufundi mupsva paanobhabhatidzwa iyena unonga waamugwanza rinoenda ku upenyu usikaperi.

2. Masoko ari pana 2 Timoti 4:1, 2 anokohomedzesa afundisi kuti aitei?

² Patinoita afundi, tinodikana kusakurira wara re “kuziya kufundisa.” (Erengai 2 Timoti 4:1, 2.) Ngei? Ngekuti Djesu wakati katiri: “Hino endai, . . . mooita afundi . . . , meciafundisa.” Mu apostori Pauro wakati: “shingirira” pa kuita basa, “kana ukadaro ucadziponesa iwewe pacako no aya anokupurutana.” Ndiyo ndaa Pauro wakati: “Rumbwa wecidzingwarira . . . no kufundisa kako.” (1Ti. 4:16) Sezvo kufundisa kunobatanidza kuita afundi, tinoda kuti kufundisa kedu kurumbwe kecibudirira.

3. Ticaonei mu fundo ino?

³ Isusu tinogara tecifundisa mamirionji e anhu Soko ra Mwari Bhaibheri. Asi hingana zvakareketwa mu fundo yakapera,  tinoda kuziya kuti tingabetsera kudini ajinji kuti agare afundi a Djesu Kristu akabhabhatidzwa. Mu fundo ino, ticaona zviro zvishanu zvinodikanwa kuizwa nge afundisi kuti abetsere afundi awo kuti abudirire dakara pa kubhabhatidzwa.

4. Ngei mufundisi ecidikana kudzibata paanoitisa fundo ye Bhaibheri? (Onai masoko e pasi.)

⁴ Tinoda zvatinofundisa zviri mu Soko ra Mwari. Asi tingawira pa muedzo wekupedza nguwa yakawanda tecireketa nge zve zviro zvatinoda. Kunyazi zvakadaro, patinoitisa Fundo ye Murindiri, kana Fundo ye Bhaibheri ye Ungano kana fundo ne mufundi wedu, mufundisi aadikani kunyanya kureketa. Kusiya kuti Bhaibheri rifundise, mufundisi unodikana kudzibata kuti asarekete zvese zvaanoziya zvakaringana ne Bhaibheri. * (Ju. 16:12) Ezanisai uzii we Bhaibheri wamainga nawo pa makabhabhatidzwa, ne uzii wamunawo nyamasi. Pamweni musati mabhabhatidzwa maiziya fundo dzekutanga basi. (Ahe. 6:1) Makatora makore akawanda kuti mufunde zvamunoziya nyamasi, ndiyo ndaa musaedze kufundisa zvese zvamunoziya ku mufundi wenyu pa nguwa imwe basi.

5. (a) Maererano na 1 Atesaronika 2:13, cinyi catinoda kuti mufundi wedu azwisise paanofunda? (b) Tingakohomedzesa kudini mufundi kuti arekete zviya zvaari kufunda?

⁵ Tinoda kuti mufundi wedu azwisise zvaari kufunda mu Soko ra Mwari. (Erengai 1 Atesaronika 2:13.) Tingazviita kudini? Kohomedzesai mufundi wenyu kuti arekete zvaari kufunda. Musamupanganidzire tsamba dzese dze Bhaibheri, asi mukumbirei kuti iyena amupanganidzirewo tsamba dzimweni. Betserai mufundi kuona kuti Soko ra Mwari rinoseenza kudini kaari pacake. Itai mibvunzo inomubetsera kuona zvaanorangarira uye zvaanozwa paanoerenga Bhaibheri. (Ru. 10:25-28) Nge muezaniso, mubvunzisei kuti: “Tsamba ii yakamubetsera kudini kuona unhu umwe wa Djehovha?” “Cokwadi ici ce Bhaibheri cakamubetsera kudini?” “Munozwa kudini nge zvamuri kufunda?” (Zvie. 20:5) Cinokosha ngece kuona mufundi eciseenzesa zvaanofunda haiwa ruzio basi.

6. Ngei zvakanaka kupikawo aparidzi aano nguwa yakareba pamunoitisa fundo ye Bhaibheri?

⁶ Pamunoitisa fundo yenyu ye Bhaibheri, munosopikawo aparidzi aano nguwa yakareba here? Kana mecizviita, akumbirei kuti  amubetsere kuona mafundisiro amunoita uye kuti munoseenzesa kudini Bhaibheri pamunofundisa. Kana mecida kubudirira pa basa rekufundisa munodikana kudzidodosa. (Ezanisai na Zviito 18:24-26.) Photopo, bvunzisai muparidzi waano nguwa yakareba eciita basa iri kuti, mufundi urikuzwisisa cokwadi here. Mungakumbirawo muparidzi uu kuti afundise mufundi wenyu pa zuwa ramunonga musikakwanisi kufunda naye. Izvi zvicaita kuti mufundi arumbwe ecifunda kunyazi paya pamusikazvikwanisi. Musamborangarire kuti i fundo “yenyu” mwega, uye kuti apana munhu unodikana kuifundisawo. Kudarika zvese, munoda zvakanakira mufundi, kuitira kuti abudirire pa kufunda Bhaibheri.

7. Zvinyi zvicabetsera mufundi kuti apfare nge zviya zvaari kufunda?

⁷ Mufundi unodikana kuona kuti munoda uye munotenda zvinoreketwa nge Bhaibheri. (1 Ate. 1:5) Hino, izvi zvicaita kuti apfare nge zviya zvaari kufunda. Kana zviri izvona, mubvunzei kuti kurarama maererano no zvinoreketwa nge Bhaibheri zvakamubetsera kudini imwimwi pacenyu. Kana mukadaro iyena ucaona kuti Bhaibheri rino nhungamiriro dzinoseenza uye dzicazomubetserawo.

8. Cinyizve camungaita kuti mubetsere mufundi wenyu, uye ngei?

⁸ Pamunofundisa Bhaibheri, panganidzirai mufundi wenyu miezaniso ye anhu akasongana ne matambudziko akaezana ne ake, uye mawinire aakaita. Munokwanisa kuunzisa hama ye mu ungano ino muezaniso unobetsera mufundi wenyu. Kana kuti munokwanisa kuona maeshiperiensiya ari mu jw.org pakazwi “Bhaibheri Rinochinja Upenyu.” * Zviro izvi zvicabetsera mufundi wenyu kuona kuti zvakanakirei kuseenzesa nhungamiriro dze Bhaibheri mu upenyu wake.

9. Tingakohomedzesa kudini mufundi wedu kuti arekete ne hama uye shamwari dzake zvia zvaari kufunda?

⁹ Kana mufundi wenyu ane waakawakana naye, umweni wake urikufundawo here? Kana asikafundi, mupikei paya pamunofunda. Kohomedzesai mufundi wenyu kuti arekete ne hama uye shamwari dzake zvia zvaari kufunda. (Ju. 1:40-45) Ungazviita kudini? Imwimwi mungabvunzisa mufundi wenyu kuti: “Zvamuri kufunda izvi maizozvipanganidza  kudini ku hama dzenyu?” kana kuti “I tsamba ipi yamaizoseenzesa kuti mupangidze izvi ku shamwari yenyu?” Ngekudaro, munonga mecifundisa mufundi wenyu kuti agare mufundisi. Hino kana akakwanisa kuita izvi, ucatanga kubuda mu basa re kuparidza hingana muparidzi asati abhabhatidzwa. Mungabvunzisa mufundi wenyu kuti pano munhu waanoziya here uri kuda kufunda Bhaibheri. Kana aripo, pindai mucitenderano ne munhuwo uye mukumbirei kufunda naye Bhaibheri. Mupangidzei vhidhiyo inoti Fundo yo Bhaibheri Inoizwa Kudini? *

10. Hingana zvinoreketwa pana 1 Atesaronika 2:7, 8, mufundisi ungateedzera kudini muezaniso wa Pauro?

¹⁰ Afundisi anodikana kupangidza kuti anoda zvezvirokwazvo afundi awo. Aonei hingana hama ne hanzvadzi dzenyu. (Erengai 1 Atesaronika 2:7, 8.) Azviri nyorepi kuti asiye shamwari dziri mu nyika uye kuita cinjo dzese dzinodikana kuti aseenzere Djehovha. Tinodikana kuabetsera kuti agumire shamwari dze cokwadi mu ungano. Garai shamwari ye mufundi wenyu, mecitora nguwa muri mwese haiwa basi pakufunda Bhaibheri, asi pa nguwa dzimweniwo. Kumukweerawo bote, kumutumira ma mesagi, kana kumuvhakacira kuti mumbocedze padoko, munanga mecipangidza kuti zvezvirokwazvo munomurangarirawo.

11. Tinoda kuti afundi edu agumirei mu ungano, uye ngei?

¹¹ Makambozwa soko rekuti: “Zvinoda thaundi kuti tirere mwana.” Tingabhuya kuti: “Zvinoda ungano kuti munhu agare mufundi.” Ndiyo ndaa afundisi e Bhaibheri anounzisa afundi awo ku misangano kuti apangidze ku hama dzino miezaniso yakanaka kaari. Afundi angapfara nge kubatana no anhu a Mwari angaabetsera pa kunamata. Tinoda kuti mufundi wedu apfadzwe nge kusongana ne hama. Kana zvikadaro zvicaita nyore kuti asiye shamwari dzisikapfadzi Djehovha. (Zvie. 13:20) Kana shamwari dzekare dzikamuramba, iyena unoziya kuti unogumira shamwari dzakanaka mu sangano ra Djehovha.—Mk. 10:29, 30; 1 Pe. 4:4.

12. Ngei tecidikana kureketa ne afundi edu nge zve kudzipira ke ciKristu uye kubhabhatidzwa?

¹² Reketai zviri pamhene nge zve kudzipira ke ciKristu uye kubhabhatidzwa. Ngekuti  cinangwa cedu patinofundisa Bhaibheri, nge ce kubetsera mufundi kuti aseenzere Djehovha. Kana mufundi woofunda masumana ese kajinji kana oopinda misangano, mufundi unodikana kuzwisisa kuti cinangwa cekufunda Bhaibheri ngece kumubetsera kuti aseenzere Djehovha uye kuti azogarewo umwe we Apupuri a Djehovha.

13. Ngazvipi zvinodikanwa kuizwa nge mufundi kuti abhabhatidzwe?

¹³ Padoko ne padoko mufundi we Bhaibheri unokwanisa kuguma pakubhabhatidzwa! Cekutanga, mufundi unotanga kuziya Djehovha, kumuda uye kutenda maari. (Ju. 3:16; 17:3) Kana zvadaro mufundi unotanga kushamwaridzana na Djehovha uye kubatana ne ungano. (Ahe. 10:24, 25; Tg. 4:8) Pakupedzesera mufundi unosiya miitiro yakashata uye unocinyuka pa zvitema zvake. (Zvi. 3:19) Pazvinodaro kutenda kake kunoita kuti arekete nge zve Bhaibheri no amweni. (2Ako. 4:13) Photopo iyena unodzipira kuna Djehovha uye unopangidza kudzipira kake nge kubhabhatidzwa. (1 Pe. 3:21; 4:2) Uye iri i zuwa rinopfadza anhu ese! Mufundi paanotora danho rekubhabhatidzwa, musimbei uye mukohomedzesei kuti arumbwe ecibudirira pa zviya zvaarikuita.

14. Mufundisi ungaongorora kudini kubudirira ke mufundi wake?

¹⁴ Tinodikana kugara ne mwoyo unononoka kutsamwa patinobetsera mufundi kuti abudirire pa kudzipira uye pakubhabhatidzwa. Asi pa nguwa dzimweni, tinodikana kuona kuti iyena unodadi kuseenzera Djehovha Mwari here kana kuti haiwa. Pano cirikupangidza kuti mufundi urikuteerera mitemo ya Djesu here? Kana kuti iyena unoda kundofunda Bhaibheri basi?

15. Mufundisi unodikana kuongororei ku mufundi wake?

¹⁵ Garai meciongorora kubudirira kuri kuita mufundi wenyu. Nge muezaniso, unopangidza mazwiro ake kuna Djehovha here? Unonamata kuna Djehovha here? (Pis. 116:1, 2) Unopfarira kuerenga Bhaibheri here? (Pis. 119:97) Urikupinda misangano nguwa dzese here? (Pis. 22:22) Pano zviro zvaakacinja here? (Pis. 119:112) Unoreketa ne hama uye shamwari dzake zvia zvaari kufunda here? (Pis. 9:1) Zvinotonyanya kukosha,  unoda kugara umwe we Apupuri a Djehovha here? (Pis. 40:8) Kana mufundi asikaiti kana ciro cimwe pa mibvunzo dzese idzi, onai kuti cinyi ciri kumuita kuti asabudirire, pedzepo cedzai naye nge zve nyaya ii, asi zviitei ne ushamwari uye mecimubudira pamhene. *

16. Zviro zvipi zvinopangidza kuti fundo ye Bhaibheri inodikana kusiyiwa?

¹⁶ Potai meciongorora kana mecida kurumbwa mecifunda ne munhu. Dzibvunzisei kuti: ‘Mufundi unogadzirira fundo here? Unopfarira kuenda ku misangano here? Uciri kuita zvakashata here? Urikuenda ku magereja e kunyepa here?’ Kana mhinduro iri honde, kurumbwa mecifunda naye zvinoita hingana kuti muri kufundisa munhu kusambirira iyena asikadi. Kana mufundi asikabati nge nyara mbiri zvia zvaari kufunda, hino ngei muciri kufunda naye?

17. Maererano na 1 Timoti 4:16, ngazvipi zvinodikanwa kuizwa nge afundisi e Bhaibheri?

¹⁷ Isusu tinobata nge nyara mbiri basa redu rekuita afundi uye tinoda kubetsera afundi edu e Bhaibheri kuti abudirire dakara pakubhabhatidzwa. Ndiyo ndaa tinosiya kuti Bhaibheri rifundise uye ticafundisa ne cido cese. Ticakohomedzesa mufundi kuti agumire shamwari mu ungano. Uye ticasimba cinangwa cekudzipira ne ku bhabhatidzwa teciongorora nguwa ne nguwa kuhambira mberi ke mufundi. (Onai bhokisi “ Ngazvipi Zvinodikana Kuizwa no Mufundisi Zvingaita kuti Mufundi Agume pa Kubhabhatidzwa.”) Tinopfara ngekuti tinokwanisa kuitawo basa iri rinoponesa! Ngatirumbwe tecipeta masimba pakuita fundo dze Bhaibheri dzinobudirira dakara pakubhabhatidzwa.