ARTIKULO YUʼUN ESTUDIO 42
¿Bin-utʼil ya jkoltaytik te estudiante kuʼuntik yuʼun ya yichʼ jaʼ? (parte 2)
«Tsahtaya aba soc tsahtaya te bin yac awacʼ ta nopele» (1 TIM. 4:16).
KʼAYOJIL 72 Akʼa jpukbeytik skʼoplal te Wentainel
¿BIN YA KILBEYTIK SKʼOPLAL? *
1. ¿Bin yuʼun mukʼ skʼoplal te ya kotsestik jnopojeletike?
TE KʼALAL ya kotsestik jnopojeletik ya jkoltaytik te ants winiketik yuʼun ya sta skolelik. Ta Mateo 28:19, 20 te Jesús jich la yal ta mantal: «Bahanic, otsesahic ta jnopojel [...] acʼticlambeyahic yichʼic haʼ». Te ichʼjaʼ kʼax mukʼ skʼoplal, melel jich ya jta jkoleltik. Te machʼa ya skʼan ya yichʼ jaʼ ya sta skolel teme ay schʼuunel yoʼtan ta swenta te laj te Jesús sok te chaʼkuxaje. Jaʼ yuʼun te jpuk-kʼop Pedro jich la yal: «Te ichʼ-haʼ [...] Ha ya xcolotic yuʼun ta scuenta te chaʼcuxaj te Jesucristo» (1 Ped. 3:21). Jich yuʼun, te machʼa ya yichʼ jaʼ ya sta skuxlejal ta sbajtelkʼinal.
2. Jich bitʼil ya yal 2 Timoteo 4:1, 2, ¿bin ya skʼan ya jnaʼtik spasel?
2 Ya skʼan ya jnaʼtik ta lek nojpteswanej, jichme ya kotsestik jnopojeletik (kʼopona 2 Timoteo 4:1, 2). Kʼalal te Jesús la yal te akʼa kotsestik jnopojeletik, jaʼnix jich la yal te ya xnojpteswanotik. Te jpuk-kʼop Pablo la yalbey te Timoteo te yakuk xbajt ta yoʼtan spasel te aʼtelil-abi, sok jich la yalbey: «Tsahtaya te bin yac awacʼ ta nopele [...] hich ya xcolat a soc te machʼatic ya yaʼiybat te acʼope» (1 Tim. 4:16). Jpastik tulan yuʼun ya xnojpteswanotik ta lek, melel jich ya sta skolelik te ants winiketike.
3. ¿Bin ya kiltik ta artikulo ini?
3 Bayal miyon ta jtul ants winiketik ya yichʼik akʼbeyel kurso yuʼun Biblia ta jujun semana. Jich bitʼil la kiltik ta yan artikulo, ya jkʼan ya jnaʼtik bitʼil ya jkoltaytik yuʼun ya yichʼik jaʼ. Ta artikulo ini ya kiltik joʼchajp te bin ya xjuʼ ya spas te machʼa ya yakʼ te nojptesel swenta ya skoltay te s-estudiante yuʼun ya yichʼ jaʼ.
YA YAKʼ TA NOPEL TE BIN YA YAL TE BIBLIA
Jkʼantik koltayel yuʼun jaʼ ya kakʼtik te ya xnojpteswan te Biblia. (Ilawil te parrafo 4 kʼalal ta 6). *
4. ¿Bin-a te ya skʼan ya jtsajtaytik te kʼalal ya kakʼtik kurso yuʼun Biblia? (Ilawil-euk te nota).
4 Bayal ya jmulantik yakʼel ta nopel te sKʼop Diose, jaʼ yuʼun ya jkʼan ya jcholbeytik skʼoplal spisil. Pero te machʼa ya skʼases Te J-ilkʼinal ta toyol, te Snopel skʼop Dios ta kongregasion o te machʼa ya yakʼ jun kurso yuʼun Biblia, ma skʼan te bayal ya xkʼopoj. Jaʼuk ya jtuuntestik te Bibliae. Ya skʼan ya jtsajtay jbatik yuʼun maba ya jcholtik spisil te bin kʼoem ta koʼtantik ta swenta jun bersikulo o jun tema (Juan 16:12). * Nopa awaʼiy te bin kʼoem ta awoʼtan ta ora ini te maniwan kʼoem ta awoʼtan-a te kʼalal la awichʼ jaʼe. Jaʼnaxniwan anopoj-a te bintik ma chujkuluk ta nopele (Heb. 6:1). Ma orauk kʼot ta awoʼtan te bin anopoj ta ora ini, jich yuʼun teme ya acholbey ta jun-nax buelta spisil te bin anopoje, te estudiante maba ya xkʼot ta yoʼtan-euk.
5. 1) Jich bitʼil ya yal 1 Tesalonicenses 2:13, ¿bin ya jkʼantik te yakuk xkʼot ta yoʼtan te estudiantee? 2) ¿Bin ya xjuʼ ya jpastik yuʼun ya schol kaʼiytik te estudiante te bin yilel ya yil te estudioe?
5 Ya jkʼantik te yakuk xkʼot ta yoʼtan te estudiante te lokʼem ta sKʼop Dios te bin yak ta snopele (kʼopona 1 Tesalonicenses 2:13). Jaʼ yuʼun kalbeytik te yakuk yal kaʼiytik bin yilel ya yil te estudioe. Jkʼanbeytik te yakuk schol kaʼiytik te bitʼil kʼot ta yoʼtan jun teksto swenta maba joʼotik ya jcholtik spisil. Jkoltaytik ta yilel bin-utʼil ya xjuʼ ya spas ta skuxlejal te bin ya yal te Bibliae. Te kʼalal ya skʼopon jun teksto, jojkʼoybeytik bin ya snop sok bin yaʼiyel ya yaʼiy sba yuʼun (Luc. 10:25-28). Ya xjuʼ ya jojkʼoybeytik: «¿Bin talelil yuʼun Jehová ya ata ta ilel ta teksto ini?», «¿Bin-utʼil ya skoltayat te bin la anope?», «¿Bin yilel ya awil te bin yakat ta snopele?» (Prov. 20:5). Ma jaʼuk mukʼ skʼoplal te bayal bin ya snope, jaʼ mukʼ skʼoplal te ya xkʼot ta yoʼtan sok te ya spas ta skuxlejale.
6. ¿Bin-utʼil ya xjuʼ ya skoltayotik te ermanoetik te pʼijubenikix ta leke?
6 Kʼalal ya kakʼtik kurso yuʼun Biblia, jkʼanbeytik te ermanoetik te pʼijubenikix ta lek te yakuk sjokinotike. Teme la sjokinotike, jojkʼoybeytik bin yilel la yil te bitʼil la kakʼtik te estudio sok teme jaʼ la jtuuntestik te Bibliae. Lekil jnojpteswanej ya xkʼootik teme pekʼel koʼtantik (paja sok Hechos 18:24-26). Jaʼnix jich ya xjuʼ ya jojkʼoybeytik teme jichbal ya yil te yak ta kʼoel ta yoʼtan te nojptesel te estudiante kuʼuntike. Teme maba nakalotik jun o cheb semana ya xjuʼ ya kalbeytik te jaʼuk ya yakʼbey te nojptesele. Jich maba ya skom sba ta snopel te Biblia sok jich ya yil-a te mukʼ skʼoplale. Mame jnoptik te jaʼ kuʼuntik te estudiante sok te maʼyuk yan machʼa ya xjuʼ ya yakʼbey te nojptesele, melel jaʼ ya jkʼantik te bin lek ta stojol te estudiante sok te ya yichʼ jaʼe.
SCHʼUUNEJ YOʼTAN SOK AY SBUJTSʼ YOʼTAN TA NOJPTESWANEJ
Jcholbeytik eksperiensiaetik yuʼun ya snaʼ bitʼil ya spas ta skuxlejal te bin ya yal te Biblia. (Ilawil te parrafo 7 kʼalal ta 9). *
7. ¿Bin ya xjuʼ ya jpastik yuʼun ya smulanxan-a te bin yak ta snopel te estudiantee?
7 Mukʼ skʼoplal te yakuk yil te estudiante te ay sbujtsʼ koʼtantik sok te schʼuunej koʼtantik te bin ya yakʼ ta nopel te Bibliae (1 Tes. 1:5). Jichniwan ya smulanxan-a te bin yak ta snopele. Ya xjuʼ ya jcholbeytik bitʼil skoltayojotik te Bibliae, jichme ya xjuʼ ya sta ta ilel te ya xkoltayot-euke.
8. ¿Bin ya xjuʼ ya jtuuntestik te kʼalal ya kakʼtik te kurso yuʼun Biblia sok bin yuʼun?
8 Te kʼalal yakotik ta yakʼel te kursoe, jcholbeytik eksperiensia yuʼun ermanoetik te la sitintayik wokolil te pajal sok te bitʼil yak ta kʼaxel ta stojole. Ayniwan jtul ermano ta kongregasion te ya xjuʼ ya xkoltayot te ejemplo yuʼune. Teme jiche, kikʼtik bael ta yakʼel te kursoe. Jaʼnix jich ya xjuʼ ya jtuuntestik eksperiensiaetik te ay ta jw.org «Jelontesbot skuxlejalik yuʼun te Biblia». * Teme ya skʼopon o ya yil ta bideo te eksperiensiaetik-abi, yame yil bintik lek ya sta teme ya schʼuun spasel te bin ya yal te Bibliae.
9. ¿Bin-utʼil ya jtijbeytik yoʼtan te estudiante yuʼun ya scholbey yaʼiy sfamilia sok yamigotak te bin yak ta snopele?
9 Teme nujpunem te estudiantee, ya xjuʼ ya kalbeytik te sjoy teme ya skʼan ya sjokinotik ta snopel te Bibliae. Jtijbeytik yoʼtan te estudiante te yakuk scholbey yaʼiy te sfamilia sok te yamigotak te bin yak ta snopele (Juan 1:40-45). Jichniwan ya xjuʼ ya awalbey: «¿Bin-utʼil ya xjuʼ ya acholbey afamilia ini?» o «¿Bin teksto ya xjuʼ ya atuuntes yuʼun ya acholbey yaʼiy jtul awamigo?». Jichme ya akoltay yuʼun lekil jpʼijubteswanej ya xkʼot te estudiantee. Te kʼalal chapalix yuʼun ya x-och ta publikador-ae, jichme ya snaʼ bitʼil ya schol skʼop Dios sok te kongregasion. Ya xjuʼ ya jojkʼoybeytik teme ay machʼa ya snaʼbey sba te ya skʼan ya snop te Bibliae. Teme aye, jkʼopontik sok japbeytik jun kurso yuʼun Biblia. Jaʼnix jich kakʼbeytik yil te bideo ¿Bin utʼil ya yichʼ akʼel te nojptesel yuʼun te Bibliae? *
YA STIJBEY YOʼTAN YUʼUN YA YAMIGOIN TE ERMANOETIK
Jkoltaytik ta stael yamigotak ta kongregasion. (Ilawil te parrafo 10 sok 11). *
10. ¿Bin-utʼil ya xjuʼ ya jtʼuntik te ejemplo yuʼun te Pablo te ya jtatik ta 1 Tesalonicenses 2:7, 8?
10 Te machʼa ya yakʼ te nojptesel ya skʼan te ay skʼoplal ta yoʼtan te s-estudiantee. Jichuk ya yil te bitʼil ya yil te ermanoetike (kʼopona 1 Tesalonicenses 2:7, 8). Wokol ya yaʼiyik yijkitayel te yamigotakik sok te ya sjeltay skuxlejalik yuʼun ya x-abatinik ta stojol te Jehová. Jaʼ yuʼun jkoltaytik yuʼun ya sta lekil yamigotak ta kongregasion. Jkʼasestik tiempo sok te estudiante kuʼuntike, jichme ya sta ta ilel-a te yamigootike. Ya kakʼtik ta ilel te ay skʼoplal ta koʼtantik te kʼalal ya jkʼopontik bael ta telefono, ya jtikunbeytik bael jun mensaje o ya xbajt kulaʼtaytik.
11. ¿Bin ya jkʼantik te yakuk sta ta kongregasion te estudiante kuʼuntik sok bin yuʼun?
11 Ay jich ya yichʼ alel: «Ta jun pueblo spisil ya xkoltaywanik yuʼun ya xchʼi te alale». Jichnix ya xjuʼ ya kaltik: «Ta jun kongregasion spisil ya xkoltaywanik yuʼun ay machʼa ya yichʼ jaʼ». Jaʼ yuʼun te ermanoetik te ya snaʼik ta lek pʼijubteswanej ya skoltay te s-estudianteik yuʼun ya snaʼbeyik sba te ermanoetik te jaʼik jun lekil ejemploe. Jichme ya sta smukʼul yoʼtan sok ya xkoltayot yuʼun ya yamigoinxan te Jehová. Jaʼ ya jkʼantik te kʼanbil ya yaʼiy sba ta kongregasion sok te jun yoʼtan sba sok te ermanoetike. Teme kʼux aʼiybil ya yaʼiy sba ta lum yuʼun te Jehová, maba wokol ya yaʼiy yijkitayel te yamigotak te ma kʼux ta yoʼtanik te Jehová (Prov. 13:20). Teme maba lek ya x-ilotix yuʼun te yamigotak, yame snaʼ te ya sta smelelil yamigotak ta organisasion yuʼun Jehová (Mar. 10:29, 30; 1 Ped. 4:4).
KALBEYTIK TE MUKʼ SKʼOPLAL TE YA YAKʼ SBA TA STOJOL JEHOVÁ SOK TE YA YICHʼ JAʼ
Teme ya skʼan ya x-abatin ta stojol te Jehová te estudiante, bayal bin ya spas yuʼun ya yichʼ jaʼ. (Ilawil te parrafo 12 sok 13).
12. ¿Bin yuʼun ya skʼan ya kalbeytik te estudiante kuʼuntik te mukʼ skʼoplal te ya yakʼ sba ta stojol Jehová sok te ya yichʼ jaʼ?
12 Mame xiwotik ta yalbeyel te mukʼ skʼoplal te ya yakʼ sba ta stojol Jehová sok te ya yichʼ jaʼe. Melel jaʼ ya jkʼantik te ya x-abatin ta stojol Jehová te machʼa ya kakʼbeytik kursoe. Teme ayix cheʼoxeb u te yak ta snopel te Biblia sok teme kajix ta bael ta tsoblejetik, yame skʼan ya snaʼ bin yuʼun te yak ta yichʼel kursoe, jaʼme yuʼun te ya x-och ta testigo yuʼun Jehová.
13. ¿Bintik ya skʼan ya spas te estudiante swenta ya yichʼ jaʼ?
13 Te machʼa ya skʼan ya x-abatin ta stojol te Jehová bayal bin ya spas swenta ya yichʼ jaʼ. Ya snaʼbey sba te Jehová, ya xchʼi skʼuxul yoʼtan sok ya yakʼ schʼuunel yoʼtan ta stojol (Juan 3:16; 17:3). Ya yamigoin te Jehová sok te ermanoetike (Heb. 10:24, 25; Sant. 4:8). Ta patil ya yijkitay spasel te bin chopol sok ya sujtes yoʼtan (Hech. 3:19). Te schʼuunel yoʼtan jaʼnix jich ya xtijbot yoʼtan ta yalbeyel yantik te bintik snopoj ta Bibliae (2 Cor. 4:13). Te kʼalal la spasix spisil-abi, ya yakʼ sba ta stojol Jehová sok ya yichʼ jaʼ (1 Ped. 3:21; 4:2). Kʼalal ya xkʼot skʼajkʼal-abi, jpisiltik tseʼel koʼtantik. Jaʼ yuʼun te kʼalal yak ta spasel tulan yuʼun ya yichʼ jaʼ, kakʼbeytik smukʼul yoʼtan sok kutsilkʼoptaytik yuʼun ma skom sba ta spasel.
KILTIK TEME YAK TA SPASEL TA SKUXLEJAL
14. ¿Bin-utʼil ya jnaʼtik teme ya skʼan ya x-abatin ta stojol Jehová te estudiantee?
14 Ma skʼan ya xlujbotik ta skoltayel te estudiante yuʼun ya yakʼ sba ta stojol te Jehová sok te ya yichʼ jaʼe. Melel ya sta yorail te ya jnaʼtik teme ya skʼan ya x-abatin ta stojol Jehová o maʼuk. ¿Chikanbal ta ilel te ya spas tulan ta schʼuunbeyel smantal te Jesuse? O ¿Jaʼnaxbal ya yichʼ te kurso ta swenta te tʼujbil ya yil te bin ya snope?
15. ¿Bin-utʼil ya jnaʼtik teme yak ta spasel ta skuxlejal te bin yak ta snopel te estudiantee?
15 Kiltik teme yak ta spasel ta skuxlejal te estudiante te bin yak ta snopele. ¿Yabal yakʼ ta ilel te kʼux ta yoʼtan te Jehová? ¿Yabal skʼopon? (Sal. 116:1, 2). ¿Yabal smulan skʼoponel te Bibliae? (Sal. 119:97). ¿Yabal xbajt spisil-ora ta tsoblejetik? (Sal. 22:22). ¿Aybal bin sjeltayojix ta skuxlejal? (Sal. 119:112). ¿Yabal scholbey sfamilia sok yamigotak te bin yak ta snopele? (Sal. 9:1). Sok ¿yabal skʼan ya x-och ta testigo yuʼun Jehová? (Sal. 40:8). Teme ya kiltik te maba yak ta spasele, jojkʼoybeytik sok yutsil koʼtantik bin yuʼun. Ta patil kʼopojukotik sok ta swenta te bin ya xmakot ya yaʼiye sok jkoltaytik. *
16. ¿Bin-ora ya xjuʼ ya kijkitaytik yakʼbeyel kurso yuʼun Biblia jtul estudiante?
16 Ta baeltik, kiltik teme snujpʼto ya kakʼbeytik kurso yuʼun Biblia te estudiantee. Jojkʼoybey jbatik: «¿Yabal schajpan te leksion ya yichʼ nopele? ¿Yabal skʼan ya xbajt ta tsoblejetik? ¿Labal yijkitayix te bin kʼayem ta spasele? ¿Labal yijkitayix te srelijione?». Teme mato spasoje, tojolxanix te ya jnojptestike, jich kʼoem te yakotik ta snojptesel ta nuxel te machʼa ma skʼan ya x-och ta jaʼe. Teme maʼyuk skʼoplal ta yoʼtan te bin yak ta snopel sok teme maba ya sjeltay te skuxlejale ¿bin yuʼun te yato kakʼbeytik te kursoe?
17. Swenta ya jnaʼtik ta lek nojpteswanej jich bitʼil ya yal 1 Timoteo 4:16, ¿bin ya skʼan ya jpastik?
17 Kʼax mukʼ skʼoplal ta koʼtantik te ya kotsestik jnopojeletike. Ya jkʼan ya jkoltaytik te estudiante kuʼuntik yuʼun ya yichʼik jaʼ. Jaʼ yuʼun jtuuntestik ta lek te Biblia, schʼuunejuk koʼtantik sok ayuk sbujtsʼ koʼtantik ta nojpteswanej. Jkoltaytik ta stael yamigotak ta kongregasion, kalbeytik skʼoplal te ya yakʼ sba ta stojol Jehová sok te ya yichʼ jaʼ. Kiltik teme yak ta spasel ta skuxlejal te bin yak ta snopele. (Ilawil te rekuadro « Te bin ya skʼan ya spas te machʼa ya yakʼ te nojptesel»). Tseʼel koʼtantik yuʼun te ya x-aʼtejotik ta skoltayel te ants winiketik yuʼun ya sta skolelik. Jaʼ yuʼun jpastik tulan ta skoltayel te estudiante kuʼuntik yuʼun ya yichʼ jaʼ.
KʼAYOJIL 79 Junuk yoʼtan akʼa yakʼ sbaik
^ parr. 5 Kʼalal ay machʼa ya jnojptestik ta Biblia, ya jkoltaytik te jichuk spensar bitʼil te Jehová, te jichuk yoʼtan sok te jaʼuk ya spas te bin ya smulan te Jehová. Te artikulo ini ya skoltayotik yuʼun lekil jnojpteswanej ya xkʼootik.
^ parr. 4 Ilawil te artikulo «Ma xa apas te bin maba lek ta pasel kʼalal ya xpʼijubteswanat ta Biblia» te lokʼ ta Sjunal kaʼteltik ta swenta tsoblej yuʼun septiembre 2016.
^ parr. 8 Ochan ta SWENTA JKʼOPLALTIK > EKSPERIENSIAETIK.
^ parr. 9 Ta JW Library®, ochan ta MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
^ parr. 15 Ilawil te artikulo «Te kʼuxul oʼtanil sok yalel wokol ya stij koʼtantik ta yichʼel jaʼ» sok «¿Chapalatixbal yuʼun ya awichʼ jaʼ?» te lokʼ ta rebista Te J-ilkʼinal ta toyol yuʼun marso ta 2020.
^ parr. 77 TE BIN YA XCHIKNAJ TA FOTOETIK: Te kʼalal laj yoʼtanik ta yakʼel jun kurso yuʼun Biblia, jtul ermana te pʼijubenix ta lek ya yalbey bin ya xjuʼ ya spas te ermana yuʼun maba bayal ya xkʼopoj kʼalal ya yakʼ te kurso.
^ parr. 79 TE BIN YA XCHIKNAJ TA FOTOETIK: Te estudiante ya snop bitʼil lekil inamil ya xkʼot. Ta patil ya yalbey te smamalal te bin la snope.
^ parr. 81 TE BIN YA XCHIKNAJ TA FOTOETIK: Te estudiante sok te smamalal ayik ta sna jtul ermana te la snaʼbey sba ta sNail Tsoblej.
