XCHANOBIL 42
¿Kʼuxi xuʼ jkolta kaj-estudiotik yoʼ xichʼ voʼ? (Xchaʼvokʼal)
«Jechuk-o me xakʼel aba atuk xchiʼuk kʼelo me lek li kʼusi chavakʼ ta chanele» (1 TIM. 4:16).
KʼEJOJ 77 Sakilal osil li ta ikʼal osile
LI KʼUSI TA JCHANTIKE *
1. ¿Kʼu yuʼun xuʼ sta-o xkuxlejal krixchanoetik li abtelal ta jpastike?
XUʼ STA-O xkuxlejal krixchanoetik mi la jpastik ta yajchankʼop Kristoe. ¿Kʼu yuʼun ti jech chkaltike? Yuʼun li Jesuse xi laj yal ta Mateo 28:19 xchiʼuk 20: «Batanik, bat pasik ta jchankʼop [...], akʼbeik yichʼ voʼ». Toj tsots skʼoplal li ichʼvoʼe, yuʼun jaʼ to jech xuʼ sta skolelik. Li buchʼu tskʼan chichʼ voʼe skʼan xchʼunojuk lek ti xuʼ sta xkuxlejal sbatel osil ta skoj ti cham ta jtojolaltik li Jesuse xchiʼuk ti chaʼkuxie. Jaʼ yuʼun, xi laj yalbe batel ermanoetik li jtakbol Pedroe: «Li ichʼvoʼ ti jaʼ yakal chakolik-o avi [...] ta sventa ti chaʼkuxi li Jesukristoe» (1 Ped. 3:21). Kʼalal oy buchʼu chichʼ voʼe, xuʼ sta-o kuxlejal sbatel osile.
2. ¿Kʼu yelan skʼan xijchanubtasvan jech kʼuchaʼal chal 2 Timoteo 4:1 xchiʼuk 2?
2 Sventa jpastik ta jchankʼop li krixchanoetike, skʼan xijtojob lek ta chanubtasvanej (kʼelo 2 Timoteo 4:1, 2). ¿Kʼu yuʼun? Yuʼun xi laj yal li Jesuse: «Batanik, bat pasik ta jchankʼop [...], chanubtasik». Li jtakbol Pabloe laj yalbe Timoteo ti akʼo xakʼbe yipal li abtelal taje xchiʼuk xi to laj yalbee: «Mi jech chapase, ta me xakol xchiʼuk ta me xkolik ek li buchʼutik chchikintabote». Pe xi to tojobtasat xtoke: «Kʼelo me lek li kʼusi chavakʼ ta chanele» (1 Tim. 4:16). Jech kʼuchaʼal laj kiltike, skʼan xijtojob lek ta chanubtasvanej sventa spasik ta yajchankʼop Kristo li krixchanoetike.
3. ¿Kʼusi ta jkʼeltik li ta xchanobil liʼe?
3 Jujun xemana ta smiyonal xa noʼox krixchanoetik chkakʼbetik chanubtasel ta Vivlia. Pe jech kʼuchaʼal la jkʼeltik li ta xchanobil echʼe, oy ta koʼontontik snaʼel kʼuxi xuʼ masuk ep buchʼu jkoltatik sventa xchʼiik ta mantal xchiʼuk ti xichʼik voʼe. Li ta xchanobil liʼe, ta jkʼeltik voʼtos kʼusi skʼan jpastik sventa jkolta kaj-estudiotik yoʼ xichʼik voʼ.
JAʼUK KAKʼTIK KʼOPOJUK LI SKʼOP DIOSE
Jkʼanbetik koltael li buchʼu xtojob lek ta chanubtasvanej yoʼ jaʼuk xkakʼtik kʼopojuk li Vivliae. (Kʼelo parafo 4-6). *
4. ¿Kʼu yuʼun skʼan jpajtsan jbatik ta loʼil kʼalal chkakʼtik estudioe? (Kʼelo xtok li tsʼib ta yok vune).
4 Toj lek chkaʼitik yalbel skʼoplal li Skʼop Diose. Jech oxal, bakʼintike, xuʼ van mu xa noʼox xijpaj ta sloʼiltael. Pe kʼalal jbainojtik yetʼesel Xchanel Li Jkʼel-osil ta toyole, li Xchanel Vivlia ta tsobobbaile o kʼalal chkakʼtik jun estudioe, skʼan ti mu toj echʼemuk xijkʼopoje. Jaʼuk kakʼtik kʼopojuk li Skʼop Diose. ¿Kʼuxi xuʼ spas kuʼuntik taje? Skʼan jpajtsan jbatik xchiʼuk ti mu xkaltik skotol li kʼusi jnaʼojtik ta sventa junuk versikulo o junuk loʼile (Juan 16:12). * Nopbo skʼoplal kʼusitik toʼox achanoj ta sventa Vivlia kʼalal laj avichʼ voʼe xchiʼuk li kʼusitik achanoj xa avie. Xuʼ van kʼajomal toʼox anaʼoj «li kʼusitik kʼun ta [chanele]» (Ebr. 6:1). Epal jabil van laj yichʼ avuʼun sventa xachan skotol li kʼusitik anaʼoj avie, jaʼ yuʼun mu xa busanbe ta alel skotol avaj-estudio li kʼusitik achanoj xae.
5. 1) Jech kʼuchaʼal chal ta 1 Tesalonisenses 2:13, ¿kʼusi ta jkʼantik ti xaʼibe smelolal li kaj-estudiotike? 2) ¿Kʼusi xuʼ jpastik yoʼ xal kʼusi tsnop ta sventa li kʼusi yakal chchane?
5 Li kʼusi ta jkʼantike jaʼ ti xaʼibe smelolal kaj-estudiotik ti jaʼ yakal chchanubtasat yuʼun li Skʼop Diose (kʼelo 1 Tesalonisenses 2:13). ¿Kʼuxi xuʼ jkoltatik? Jtijbetik yoʼonton yoʼ xal kʼusi tsnop ta sventa li kʼusi yakal chchan batele. Mu skotoluk velta voʼotik jchapbetik smelolal li tekstoetike, mas lek kalbetik ti akʼo xchapbe smelolal junantik eke. Jkoltatik yoʼ snaʼ kʼuxi xuʼ xakʼ ta xkuxlejal li kʼusi chal Vivliae. Oyuk kʼusitik jakʼbetik yoʼ xal kʼusi tsnop xchiʼuk kʼu yelan chaʼi sba ta sventa li kʼusi chal junuk versikuloe (Luk. 10:25-28). Xiuk jakʼbetike: «¿Mi oy junuk stalelal Jeova chakʼ avil li ta versikulo liʼe?», «¿Kʼuxi xuʼ xatabe sbalil li kʼusi chal ta Vivlia liʼe?», «¿Kʼu yelan chavaʼi aba ta sventa li kʼusi la achane?» (Prov. 20:5). Li kʼusi mas tsots skʼoplale jaʼ ti xkʼot ta yoʼonton li kʼusi chchane xchiʼuk ti xakʼ ta xkuxlejale, maʼuk ti ep kʼusi chchane.
6. ¿Kʼu yuʼun lek ti xkikʼtik batel ermanoetik ti lek chanemik kʼalal chbat kakʼtik estudioe?
6 Kʼalal chbat kakʼtik estudioe, ¿mi oy kikʼojtik batel ermanoetik ti lek snaʼ xchanubtasvanike? Mi jaʼ jeche, jakʼbetik kʼu yelan laj yil kʼalal laj kakʼtik estudioe xchiʼuk mi jaʼ laj kakʼtik kʼopojuk li Skʼop Diose. Skʼan bikʼit xkakʼ jbatik yoʼ xijtojob mas ta chanubtasvaneje (koʼoltaso xchiʼuk Echos 18:24-26). Xuʼ xi jakʼbetik xtoke: «¿Kʼu yelan avil? ¿Mi laj yaʼibe smelolal kaj-estudio li kʼusi la xchane?». Mi oy bu chijbat junchib xemanae, jkʼanbetik vokol ti jaʼuk to xbat yakʼbe estudioe. Jaʼ jech muʼyuk chkechan li s-estudioe xchiʼuk chakʼ venta ti toj tsots skʼoplal li kʼusi chchane. Mu me jnoptik ti jaʼ kuʼun jtuktik li kaj-estudiotike xchiʼuk ti muʼyuk buchʼu yan xuʼ xakʼbe estudioe. Li kʼusi ta jkʼantike jaʼ ti jechuk-o xchan batele xchiʼuk ti xchʼi ta mantale.
JKʼUPINTIK XCHIʼUK JCHʼUNOJTIKUK LI KʼUSI CHKALTIKE
Kalbe kaj-estudiotik kʼusi snuptanoj yan ermanoetik yoʼ snaʼ kʼuxi xuʼ xakʼ ta xkuxlejal li kʼusi chchane. (Kʼelo parafo 7-9). *
7. ¿Kʼuxi xuʼ skʼupin kaj-estudiotik li kʼusi yakal chchane?
7 Toj tsots skʼoplal ti xakʼ venta kaj-estudiotik ti ta jkʼupintik tajek xchiʼuk ti jchʼunojtik lek li kʼusi chal Vivliae (1 Tes. 1:5). Jaʼ van jech xuʼ skʼupin ek li kʼusi yakal chchan batele. Xuʼ xkalbetik kʼuxi jtaojbetik sbalil li beiltaseletik ta Vivliae. Vaʼun, xuʼ xakʼ venta ti xuʼ xkoltaat ta xkuxlejal eke.
8. ¿Kʼuxi xuʼ masuk to jkoltatik li kaj-estudiotike, xchiʼuk kʼu yuʼun?
8 Kʼalal yakal chijchanubtasvane, kalbetik sloʼil xkuxlejal ermanoetik ti oy kʼusi tsal yuʼunik ti jaʼtik van jech yakal tsnuptan li kaj-estudiotike. Mi oy junuk ermano ta jtsobobbailtik ti jech tsalem yuʼun svokole, kalbetik ti xbat xchiʼinutik ta akʼ estudioe. Xuʼ xkalbetik xtok li sloʼil xkuxlejal ermanoetik ti te oy ta jw.org yoʼ bu chal «Jelbat-o xkuxlejalik yuʼun li Vivliae». * Mi la skʼel li loʼiletik xchiʼuk li videoetik te oye, chakʼ venta ti tstabe sbalil mi laj yakʼ ta xkuxlejal li beiltaseletik ta Vivliae.
9. ¿Kʼuxi xuʼ jkolta kaj-estudiotik yoʼ xalbe yutsʼ yalal xchiʼuk yamigotak li kʼusi yakal chchane?
9 Mi nupunem xa li buchʼu ta jchanubtastike, ¿mi yakal xa van chichʼ estudio li snup xchiʼile? Mi muʼyuke, kalbetik ti akʼo tal xchiʼinutike. Jech xtok, jtijbetik yoʼonton kaj-estudiotik yoʼ xalbe yutsʼ yalal xchiʼuk yamigotak li kʼusi yakal chchane (Juan 1:40-45). Xuʼ xi noʼox xkalbetike: «¿Kʼu van yelan xuʼ xachapbe avutsʼ avalal li kʼusi la achane?» o «¿Kʼusi van tekstoal chakʼelbe avamigo sventa xachapbe smelolal liʼe?». Jaʼ jech chakolta avaj-estudio yoʼ xkʼot ta jchanubtasvanej. Vaʼun, mi pas yuʼun li kʼusi chichʼ kʼanele, xuʼ x-och ta jcholmantal ti muʼyuk to yichʼoj voʼe. Xuʼ jakʼbetik xtok mi oy buchʼu xojtikin ti tskʼan chchan Vivliae. Mi oye, jkʼopontik noʼox batel ta anil, jakʼbetik mi tskʼan chichʼ estudio xchiʼuk kakʼbetik yil li video ¿Kʼu yelan chichʼ akʼel li chanubtasel ta Vivliae? *
JKOLTATIK YOʼ STA YAMIGOTAK LI TA TSOBOBBAILE
Jkolta kaj-estudiotik yoʼ sta yamigotak li ta tsobobbaile. (Kʼelo parafo 10, 11). *
10. Li buchʼu chakʼ estudioe, ¿kʼuxi xuʼ xchanbe stalelal Pablo jech kʼuchaʼal chal 1 Tesalonisenses 2:7 xchiʼuk 8?
10 Skʼan oyuk ta koʼontontik li kaj-estudiotike. Teuk ta joltik ti xuʼ xkʼot ta kermanotaktike (kʼelo 1 Tesalonisenses 2:7, 8). Mu kʼunuk chaʼiik ti xikta yamigoik xchiʼuk ti oyuk kʼusi sjel ta xkuxlejalik sventa xtunik ta stojolal Jeovae. Jaʼ yuʼun, jkoltatik yoʼ sta slekil amigoik li ta tsobobbaile. Chkakʼtik ta ilel ti jaʼutik yamigoik mi jmoj kʼusi ta jpastik xchiʼukik ta yan kʼakʼal ti maʼuk noʼox kʼalal chkakʼbetik estudioe. Mi ta jkʼopontik batel, mi ta jtakbetik junuk mensaje o mi ch-echʼ jvulaʼantik bakʼintike, chkakʼbetik ilik ti oyik ta koʼontontike.
11. ¿Kʼu yelan ta jkʼantik ti akʼo xaʼi sbaik ta tsobobbail li kaj-estudiotike, xchiʼuk kʼu yuʼun?
11 Oy buchʼutik xi chalike: «Sventa xichʼ tsʼitesel jun olole, skʼan ep buchʼu xkoltavan». Xuʼ jech xkaltik ek: «Sventa xkʼot ta yajchankʼop Kristo li jun krixchanoe, skʼan ep buchʼu xkoltavan». Jaʼ yuʼun, li buchʼutik oy yaj-estudioike chakʼbeik yojtikin li ermanoetik ta tsobobbail ti xuʼ xkoltaatik yoʼ xnopajik ta stojolal Jeovae. Vaʼun, xuʼ skʼupinik ti te oyik li ta steklumal Diose, yuʼun jaʼ chkoltaatik ta mantal yuʼun li ermanoetike xchiʼuk chpatbat yoʼontonik kʼalal tsnuptan svokolike. Skʼan ti tsakbilikuk ta venta xaʼi sbaik li ta tsobobbaile xchiʼuk ti jaʼikuk kutsʼ kalaltik xaʼiike. Mi nopol chaʼi sbaik ta stojolal li ermanoetike, mas kʼun chaʼiik yiktael xchiʼinel li buchʼutik mu xkoltavanik ta mantale (Proverbios 13:20). Mi tenatik komel yuʼun li yamigotakike, snaʼojik ti xuʼ sta slekil amigoik li ta steklumal Jeovae (Mar. 10:29, 30; 1 Ped. 4:4).
KALBETIK TI XAKʼBE XKUXLEJAL JEOVA XCHIʼUK TI XICHʼ VOʼE
Li buchʼu ta melel oy ta yoʼonton mantale oy kʼusitik tspas sventa xichʼ voʼ. (Kʼelo parafo 12, 13).
12. ¿Kʼu yuʼun skʼan xkalbetik kaj-estudiotik ti xakʼbe xkuxlejal Jeova xchiʼuk ti xichʼ voʼe?
12 Jamaluk xkalbetik kaj-estudiotik ti skʼan xakʼbe xkuxlejal Jeova xchiʼuk ti xichʼ voʼe. Yuʼun li kʼusi oy onoʼox ta koʼontontik kʼalal chkakʼtik estudioe jaʼ ti xichʼ voʼe xchiʼuk ti xtun ta stojolal Jeovae. Mi oy xa ta sjayibaluk u yakal chkakʼbetik estudioe xchiʼuk mi chkʼotilan xa ta tsobajele, skʼan xaʼibe smelolal ti jaʼ sventa xkʼot ta stestigo Jeova ti jech yakal jchanubtastike.
13. ¿Kʼusitik skʼan spas li kaj-estudiotik yoʼ xichʼ voʼe?
13 Li buchʼu ta melel oy ta yoʼonton mantale oy kʼusitik skʼan spas sventa xichʼ voʼ. Baʼyel, skʼan xojtikin li Jeovae, ti xlikuk skʼane xchiʼuk ti xakʼ xchʼunel yoʼonton ta stojolale (Juan 3:16; 17:3). Laje, tspas ta yamigo li Diose xchiʼuk li ermanoetik ta tsobobbaile (Ebr. 10:24, 25; Sant. 4:8). Ta kʼunkʼun chikta spasel li kʼusi chopole xchiʼuk tsutes yoʼonton (Ech. 3:19). Chlik yalbe yantik li kʼusi xchʼunoje (2 Kor. 4:13). Te une, chakʼbe xkuxlejal li Jeovae xchiʼuk chichʼ voʼ (1 Ped. 3:21; 4:2). Ta melel, ¡xijmuyubaj tajek li vaʼ kʼakʼale! Kʼalal jech tspas batel li kaj-estudiotike, jkʼupil kʼoptatik xchiʼuk jtijbetik yoʼonton yoʼ jechuk-o xakʼbe yipale.
JKʼELTIK MI YAKAL CHCHʼI TA MANTAL
14. ¿Kʼuxi xuʼ xkakʼtik venta mi yakal chchʼi ta mantal li kaj-estudiotike?
14 Skʼan oyuk smalael kuʼuntik sventa jkolta kaj-estudiotik yoʼ xakʼbe xkuxlejal Jeova xchiʼuk ti xichʼ voʼe. Pe skʼan onoʼox jkʼeltik mi ta melel oy ta yoʼonton chtun ta stojolal Jeova o mi muʼyuk. ¿Mi yakal chakʼ persa sventa xchʼun li kʼusitik laj yal Jesuse? ¿O mi jaʼ noʼox chchʼam s-estudio ta skoj ti oy kʼusitik labalik sba chil ta Vivliae?
15. ¿Kʼuxi xvinaj mi yakal chchʼi ta mantal li kaj-estudiotike?
15 Nopolikuk noʼox jkʼeltik mi yakal chchʼi ta mantal li kaj-estudiotike. Jech kʼuchaʼal liʼe, ¿mi chal li kʼusi oy ta yoʼonton ta stojolal Jeovae? ¿Mi tskʼopon li Jeovae? (Sal. 116:1, 2). ¿Mi lek chaʼi xchanel Svivlia? (Sal. 119:97). ¿Mi chkʼotilan ta tsobajeletik? (Sal. 22:22). ¿Mi oy xa kʼusitik yakal tsjel ta xkuxlejal? (Sal. 119:112). ¿Mi yakal xa chalbe yutsʼ yalal xchiʼuk yamigotak li kʼusi chchane? (Sal. 9:1). Pe li kʼusi mas tsots skʼoplale, ¿mi tskʼan chkʼot ta stestigo Jeova? (Sal. 40:8). Mi muʼyuk yakal tspas jtosuk li kʼusi laj kaltike, jkʼeltik lek kʼu yuʼun. Laje, ta slekiluk koʼontontik jchiʼintik ta loʼil, pe jamaluk xkalbetik xtok. *
16. ¿Kʼuxi xuʼ jnaʼtik mi skʼan xkiktabetik yakʼbel estudio li jun krixchanoe?
16 Nopolikuk noʼox jkʼeltik xtok mi chkakʼbetik to estudio li jun krixchanoe. Jnopbetik skʼoplal liʼe: «¿Mi chchapan sba lek jujukoj? ¿Mi oy ta yoʼonton chbat ta tsobajel? ¿Mi yiktaoj xa spasel li kʼusitik chopole? ¿Mi yiktaoj xa li srelijione?». Mi muʼyuke, xkoʼolaj ti oy buchʼu ta jkʼan ta jchanubtastik ta nuxinajele, pe ti mu skʼan xtʼuxije. Mi muʼyuk tsots skʼoplal chil li kʼusi yakal chchane xchiʼuk mi mu skʼan sjel xkuxlejale, ¿mi xlokʼ van venta ti xkakʼbetik to estudioe?
17. Jech kʼuchaʼal chal ta 1 Timoteo 4:16, ¿kʼusitik skʼan spasik li buchʼutik chakʼik estudioe?
17 Toj tsots skʼoplal chkiltik ti jpastik ta yajchankʼop Kristo li krixchanoetike. Oy ta koʼontontik skoltael kaj-estudiotik sventa xichʼik voʼ. Jaʼ yuʼun, kakʼtik ti jaʼuk xkʼopoj Skʼop Dios kʼalal ta jchanubtastike. Kakʼbetik yil ti ta jkʼupintik tajek xchiʼuk ti jchʼunojtik lek li kʼusi chkaltike. Jkoltatik yoʼ sta yamigotak li ta tsobobbaile. Jamaluk xkalbetik ti skʼan xakʼbe xkuxlejal Jeova xchiʼuk ti xichʼ voʼe. Nopolikuk noʼox jkʼeltik mi yakal chchʼi ta mantal. (Kʼelo li rekuadro « Li kʼusi skʼan spas li buchʼu chakʼ estudioe»). Xijmuyubaj tajek ti xuʼ xijkoltavan li ta abtelal ti xuʼ sta-o xkuxlejal li krixchanoetike. Jaʼ yuʼun, kakʼtik persa ta skoltael kaj-estudiotik sventa xichʼik voʼ.
KʼEJOJ 79 Koltao sventa oyuk stsatsal yoʼntonik
^ par. 5 Kʼalal chkakʼbetik estudio junuk krixchanoe, xuʼ jchanubtastik yoʼ jechuk snop xchiʼuk ti jechuk spas stalelal kʼuchaʼal tskʼan li Jeovae. Li xchanobil liʼe chakʼ kiltik kʼuxi xuʼ xijtojob mas ta chanubtasvanej.
^ par. 4 Kʼelo li mantal ta Programa xchiʼuk bu chijtsʼibaj ta septiembre ta 2016 ti xi sbie: «Li kʼusi mu stakʼ xapas kʼalal chavakʼ estudioe».
^ par. 8 Ochan yoʼ bu chal JKʼOPLALKUTIK > SLOʼIL XKUXLEJALIK.
^ par. 9 Ochan ta JW Library® yoʼ bu chal MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
^ par. 15 Kʼelo li mantal «¿Kʼusi xuʼ stij avoʼonton sventa xavichʼ voʼ?» xchiʼuk «¿Mi chapalun xa sventa xkichʼ voʼ?», li ta revista Li Jkʼel-osil ta toyol ta marso ta 2020.
^ par. 77 LI KʼUSI XVINAJ TA LOKʼOLE: Kʼalal laj yoʼontonik ta yakʼel estudioe, li ermana ti lek xtojobe chalbe tojobtaseletik li yan ermana sventa mu toj masuk xkʼopoj.
^ par. 79 LI KʼUSI XVINAJ TA LOKʼOLE: Kʼalal yakal chichʼ estudioe, li antse la xchan kʼuxi xuʼ xkʼot ta jun lekil ajnilal. Laje, chalbe smalal li kʼusi la xchane.
^ par. 81 LI KʼUSI XVINAJ TA LOKʼOLE: Li ants xchiʼuk smalale chchʼay jlikel yoʼontonik ta sna jun ermana ti te laj yojtikin kʼalal ay ta salone.
