1. Кытысь ми тодӥськомы, дышетскисьёсты дасян уж адямиослэсь улонзэс утьыны юрттэ шуыса?

 ДЫШЕТСКИСЬЁСТЫ дасян уж адямиослэсь улонзэс утьыны юрттэ. Кытысь ми сое тодӥськомы? Иисус аслэсьтыз дышетскисьёссэ косӥз: «Мынэлэ... калыкъёсты дышетэлэ; соосты... пылатэ» (Матф. 28:19, 20). Нош ми тодӥськомы, утиськон понна пылатӥськыны туж кулэ шуыса. Со, кинлэн пылатӥськемез потэ, оскыны кулэ: утиськыны луэ Иисуслэн ми понна кулэмезлы луыса гинэ. Тӥни малы апостол Пётр гожтӥз: «Пылатон... ...Иисус Христослэн улӟыса султонэз пыр асьмелы утиськон сётэ» (1 Пётр 3:21). Озьыен, куке выль дышетскись пылатӥське, со султэ утиськонэ нуись сюрес вылэ.

2. Мар карыны милесьтым мылкыдмес ӝуто 2 Тимофейлы 2:24, 25 гожтэм кылъёс?

² Дышетскисьёсты дасян понна, милемлы «визьмо дышетӥсь» луыны тыршоно. (Лыдӟе 2 Тимофейлы 2:24, 25.) Малы? Малы ке шуоно Иисус милемыз косӥз: «Мынэлэ... калыкъёсты дышетэлэ». Апостол Павел мылкыдзэ ӝутӥз Тимофейлэсь, озьы ик милесьтым но, та ужез азьланьтыны но ватсаз: «Тазьы лэсьтыса, астэ ачид утёд, тонэ кылзӥськисьёсты но». Валамон, малы Павел озьы ик вераз: «Астэ ачид чакласа ул, адямиосты дышетонэз но» (1 Тим. 4:16). Соин ик, Христослэсь выль дышетскисьёссэ дасян понна, милемлы адямиосты быгатыса дышетоно.

3. Мае ми эскеромы та статьяын?

³ Быдэс дунне вылын трос миллион адямиосын Библиез дышето. Но, кызьы кылем статьяын вераськиз ини, милям  потэ, соос пӧлысь тросэз Христослэн пылатӥськем дышетскисьёсыз мед луозы шуыса. Та статьяын ми эскеромы на эшшо вить визь-кенешъёсты, кудъёсыз юрттозы дышетскисьмес пылатӥськонлы дасяны.

4. Малы, кинэн ке Библиез дышетыкумы, асьмеды киямы кутоно? (Озьы ик учке сноскаез.)

⁴ Ми яратӥськомы зэмлыкъёсты, кудъёссэ Инмарлэн Кылысьтыз тодӥмы. Нош куке ми мае ке яратӥськомы, ми со сярысь дугдылытэк вераны быгатӥськомы. Озьы ке но, куке ми ортчытӥськомы «Возьмаськон башняез» эскеронэз, кенешын Библиез дышетонэз яке кинэн ке Библиез дышетӥськомы, милемлы укыр трос вераськоно ӧвӧл. Кыӵе ке юанэз яке Библиысь кылбурез эскерыкуды, асьтэды кияды кутэ но эн тырше вераны ваньзэ, мае тодӥськоды (Иоанн 16:12) b. Ӵошатэ сое, кӧня тӥ тодӥськоды вал пылатӥськыкуды, соин, кӧня али тодӥськоды. Соку тӥ Библиысь валтӥсь зэмлыкъёсты гинэ тодӥськоды вал, дыр (Евр. 6:1). Трос аръёс ортчизы, тодон понна сомында, кӧня тӥ али тодӥськоды. Соин ик дышетскисьтэс вакчи дыр куспын ваньмызлы дышетыны эн тырше.

5. а) Мае валаны кулэ дышетскисьлы, 1 Фессалоникаослы 2:13 лыдэ басьтыса? б) Кызьы дышетскисьлэсь мылкыдзэ ӝутоно басьтэм тодон-валанэз сярысь аслэсьтыз малпанзэ вераны?

⁵ Милям потэ, дышетскисьмы мед валалоз, тодон-валанъёс, кудъёссэ со басьтэ, Инмарлэн Кылысьтыз луо шуыса. (Лыдӟе 1 Фессалоникаослы 2:13.) Мар милемлы со понна кароно? Дышетскисьтылэсь мылкыдзэ ӝутэ аслэсьтыз малпанъёссэ вераны. Библиысь кылбуръёсты котьку асьтэос валэктэм интые, куре дышетскисьтэс куд-ог кылбуръёсты тӥледлы валэктыны. Юрттэ солы валаны, кызьы Инмарлэн Кылыз соин асэныз герӟаськемын. Сётэ солы сыӵе юанъёс, кудъёсыз юрттозы солы вераны, мар со малпа лыдӟем кылбуръёс сярысь (Лука 10:25—28). Кылсярысь, таӵе юанъёс сётыны луоз: «Иеговалэн кыӵе сямыз сярысь тӥ тодӥды та кылбурысь? Кызьы тӥледлы юрттыны быгатэ та тодон-валан? Мар тӥ малпаськоды Библиысь та зэмлык сярысь?» (Мад. 20:5). Трос тодон-валан басьтэм интые, трослы кулэгес, куке дышетскись та тодон-валанъёсты яратэ но улоназ пыртэ.

6. Малы умой луысал Библиез дышетонамы быгатӥсь ивортӥсез ӧтьыны?

⁶ Умой луысал Библиез дышетонады быгатӥсь ивортӥсез ӧтьыны. Соку солэсь юаны быгатоды, мар со малпа со сярысь, кызьы тӥ дышетонъёсты ортчытъяськоды но быгатӥськоды-а  Библилы валтӥсь саклык висъяны. Тодады возе: адямиосты эшшо но быгатыса дышетэмды потэ ке, тӥледлы зӥбыт-востэм сям кулэ луоз. (Ӵошатэ Апостолъёслэсь ужъёссэс 18:24—26.) Со сяна, быгатӥсь ивортӥсьлэсь юаны луоз: солэн малпамезъя, дышетскисьмы басьтэм тодон-валанзэ умой вала-а? Нош куке тӥ арнялы яке кемалыгес кытчы ке кошкиськоды, куре со ик ивортӥсез дышетондэс тӥ интые ортчытыны. Соку дышетонды ялан ортчытӥськоз, но дышетскисьты валалоз, макем со кулэ луэ. Ноку эн малпалэ, со тӥляд дышетонды но тӥ гинэ сое ортчытыны быгатӥськоды шуыса. Милям лэсьтэммы потэ ваньзэ, мае быгатӥськомы, дышетскисьмы азьланяз но Инмарлэн Кылысьтыз тодон-валан мед басьтоз шуыса.

7. Мар юрттоз дышетскисьлы Библиысь зэмлыкъёсты яратыны?

⁷ Дышетскись адӟыны кулэ, Библиысь зэмлыкъёсты тӥ яратӥськоды но соослы оскиськоды шуыса (1 Фес. 1:5). Соку дышетскись но та зэмлыкъёсты яратоз, вылды. Быгатӥськоды-а тӥ дышетскисьтылы вераны, кызьы Библиысь возетъёс тӥледлы асьтэлы юрттӥзы? Талы луыса со валалоз, Инмарлэн Кылысьтыз визь-кенешъёс солы но пайда вайыны быгато шуыса.

8. Мар эшшо карыны луоз на, дышетскисьлы юрттон понна?

⁸ Дышетонды дыръя вералэ дышетскисьтылы вын-агайёс но сузэр-апайёс сярысь, кудъёсыз солэн кадь ик шуг-секытъёсын пумиськизы но соос пыр потыны быгатӥзы. Дышетонады ӧтьыны луысал агаез яке сузэрез, кудӥзлэн примерез дышетскисьтылы пайда вайысал. Озьы ик тупась учырез шедьтыны луоз jw.org сайтысь «Библия меняет жизнь» c рубрикаысь. Отысь статьяос но видеороликъёс дышетскисьтылы валаны юрттозы, Библиысь возетъёсты уже кутыса, солэн улонэз умой пала воштӥськоз шуыса.

9. Кызьы дышетскисьлэсь мылкыдзэ ӝутоно басьтэм тодон-валанзэ ӵыжы-выжыосызлы но эшъёсызлы вераны?

⁹ Адями, кудӥныз тӥ Библиез дышетӥськоды, кузпалъяськемын ке, ӵектэ солэн кузпалэзлы тӥледын ӵош Библиез дышетыны. Дышетскисьтылэсь мылкыдзэ ӝутэ тодэмзэ ӵыжы-выжыосызлы но эшъёсызлы вераны (Иоанн 1:40—45). Кылсярысь, солэсь юаны луоз: «Кызьы та малпанэз тӥ матысь адямиостылы валэктысалды?» яке «Кыӵе кылбурез тӥ  кутысалды, Библиысь та зэмлыкез эштылы валэктон понна?» Озьы тӥ дышетскисьтылы юрттоды мукетъёссэ дышетыны. Нош куке со вань куронъёслы тупалоз, со быгатоз быдэс кенешен ӵош пылатӥськымтэ ивортӥсь луыса ужаны-тыршыны. Со сяна, дышетскисьтылэсь юаны луоз: вань-а солэн тодмоосыз пӧлын кин ке но, кинлэн Библиез дышетэмез потэ? Вань ке, юалэ: быгатэ-а дышетскисьты со адямиен вераськыны, тӥ соин кытын ке пумиськыны но солы «Кызьы ортчытӥське Библиез дышетон?» d видеороликез возьматыны мед быгатоды шуыса.

10. Кызьы ми Павеллэсь адӟем карыны быгатӥськомы, 1 Фессалоникаослы 2:7, 8 лыдэ басьтыса?

¹⁰ Дышетскисьёсты сярысь сюлмаське. Соос шоры учке вуоно вын-агайёс но сузэр-апайёс шоры кадь. (Лыдӟе 1 Фессалоникаослы 2:7, 8.) Соослы капчи ӧвӧл та дуннеысь эшъёссэс кельтыны но улонзэс воштыны, Иеговалы ужан-тыршон понна. Ми соослы юрттыны кулэ кенешысь зэмос эшъёс шедьтыны. Дышетскисьтылы эш луэ, соин дырдэс ортчытъялэ, дышетонъёсты дыръя гинэ ӧвӧл, нош мукет учыръёсы но. Куке тӥ мукет нуналъёсы но солы жингыртоды, гожъялоды яке огдырлы гинэ со доры пыралоды, со шӧдоз, тӥ со сярысь сюлмаськиськоды шуыса.

11. Малы дышетскисьлы туж кулэ кенешысь эшъёс шедьтыны?

¹¹ Африкаын тазьы верало: «Нылпиез быдэс гурт будэтэ». Нош ми вераны быгатӥськомы: «Дышетскисез быдэс кенеш будэтэ». Тӥни малы туж кулэ дышетскисез вын-агайёсын но сузэр-апайёсын тодматыны. Соку со Инмарлэн калыкеныз эшъяськоз. Кенешысь вын-агайёс но сузэр-апайёс солы юрттыны быгато Инмарлы эшшо но матэгес кариськыны, озьы ик юнматыны быгато, куке со шуг-секытъёсын пумиськоз. Милям потэ, котькуд дышетскись ассэ яратӥсь духовной семьямылэн оглюкетэныз мед шӧдоз шуыса. Соку солы капчигес луоз эшъяськемысь дугдыны соосын, кинъёс уг юртто солы Иеговаез эшшо но юнгес яратыны (Мад. 13:21). Куке азьвыл эшъёсыз солэсь палэнскозы, со тодоз, зэмос эшъёс сое Иеговалэн организацияз возьмало шуыса (Марк 10:29, 30; 1 Пётр 4:4).

12. Малы ми дышетскисьмылы вераны кулэ сӥзиськон но пылатӥськон сярысь?

¹² Дышетскисьтылы шонерак вералэ со сярысь, макем кулэ улонзэ Иеговалы сӥзьыны  но пылатӥськыны, малы ке шуоно милям солы юрттэммы потэ Христослэн пылатӥськем дышетскисез луыны. Куке дышетонмы кӧня ке толэзьёс ӵоже кыстӥське ини но дышетскисьмы пумиськонъёсы ветлыны кутскиз ини, со валаны кулэ: дышетонлэн ужпумез — юрттыны солы Иеговалэн Адӟись-Ивортӥсез луыны.

13. Кыӵе вамышъёс лэсьтоно дышетскисьлы пылатӥськон понна?

¹³ Дышетскись, кудӥзлэн пылатӥськемез потэ, со понна куд-ог вамышъёс лэсьтыны быгатэ. Нырысь со Иегова сярысь тодон-валан басьтэ, сое яратыны но солы оскыны кутске (Иоанн 3:16; 17:3). Собере со Иеговаен эшъяськыны кутске, озьы ик кенешысь вын-агайёсын но сузэр-апайёсын (Иак. 4:8; Евр. 10:24, 25). Кӧня ке дыр ортчыса, со урод сямъёссэ вормыны быгатэ но сьӧлыкъёсыз понна ӧпкеле (Ап. уж. 3:19). Оскон солэсь мылкыдзэ ӝутэ зэмлык сярысь мукетъёсызлы вераны (2 Кор. 4:13). Нош собере со улонзэ Иеговалы сӥзе но пылатӥське (1 Пётр 3:21; 4:2). Со нунал ваньмызлы туж бадӟым шумпотон вае! Котькуд вамыш лэсьтэмез бере, милемлы дышетскисьмес ушъяно но солэсь мылкыдзэ ӝутоно азьланяз но кулэ луись вамышъёс лэсьтыны.

14. Кызьы валано, дышетскись азинсконъёс лэсьтэ-а, уг-а шуыса?

¹⁴ Милемлы чидан кулэ, куке ми юрттӥськомы дышетскисьмылы сӥзиськонлы но пылатӥськонлы дасяськыны. Нош со дыре ик валаны кулэ, потэ-а солэн Иеговалы ужамез-тыршемез. Тырше-а со Иисуслэсь курон-косонъёссэ быдэсъяны? Яке солы Библиысь мае ке выльзэ тодыны гинэ тунсыко потэ?

15. Кыӵе юанъёс аслыд сётыны луоз, дышетскись Иеговаен кусыпъёссэ юнматэ-а, уг-а шуыса валан понна?

¹⁵ Дышетскисьмы Иеговаен кусыпъёссэ юнматэ-а, уг-а шуыса валан понна, куддыръя асьтэлэсь юалэ: вера-а со аслаз шӧдонъёсыз сярысь Иеговалы? Вӧсяське-а со солы? (Пс. 114:1, 2). Кельше-а солы Библиез лыдӟыны? (Пс. 118:97). Ялан-а со кенешлэн пумиськонъёсаз ветлэ? (Пс. 21:23). Лэсьтӥз-а со аслаз улоназ кыӵе ке воштӥськонъёс? (Пс. 118:112). Кутскиз-а со Библиысь тодэмзэ ӵыжы-выжыосызлы но эшъёсызлы вераны? (Пс. 9:2). Нош тужгес но валтӥсез, потэ-а солэн Иеговалэн Адӟись-Ивортӥсез луэмез? (Пс. 39:9). Та юанъёслы валэктонъёс возьмато ке, дышетскись Иеговаен кусыпъёссэ уг юнматы шуыса, мугъёссэ валаны тырше.  Нош собере шонерак, но лякытэн дышетскисеныды вераське e.

16. Кызьы валано, адямиен Библиез дышетэмысь дугдоно шуыса?

¹⁶ Дырын-дырын малпаське, кулэ-а соиныз яке таиныз адямиен азьланяз но Библиез дышетыны? Асьтэлэсь юалэ: «Дасяське-а со дышетонъёслы? Потэ-а солэн кенешлэн пумиськонъёсаз ветлэмез? Куштӥськиз-а со урод сямъёсызлэсь? Потӥз-а со зэмос луисьтэм религиысь?» Адями та вамышъёсты ӧз лэсьты ке, соку азьланяз но соин Библиез дышетон котмыны кышкась адямиез уяны дышетэм кадь! Дышетскись басьтэм тодон-валанзэ уг дунъя ке но улонысьтыз номыре воштэмез уг поты ке, кулэ-а соин азьланяз но Библиез дышетыны?

17. Мар кароно соослы, кинъёс Библиез дышетонэз ортчыто, 1 Тимофейлы 4:16 лыдэ басьтыса?

¹⁷ Ми валаськомы, дышетскисьёсты дасян уж туж кулэ луэ шуыса. Со сяна, милям дышетскисьёсмылы юрттэммы потэ пылатӥськыны. Тӥни малы милям потэ дышетонъёсмы дыръя Библиез уже кутэммы, мылысь-кыдысь но мур осконэн дышетэммы. Ми дышетскисьмылэсь мылкыдзэ ӝутӥськомы кенешысь эшъёс шедьтыны. Ми вераськомы, макем кулэ сӥзиськыны но пылатӥськыны. Озьы ик дырын-дырын эскериськомы, дышетскисьмы азинсконъёс лэсьтэ-а, уг-а шуыса. (Учке « Мар кароно милемлы, дышетскисез пылатӥськонлы дасян понна?» рамкаез.) Ми туж шумпотӥськомы, адямиослэсь улонзэс утёнъя уже пыриськыны быгатӥськомы шуыса! Ойдолэ лэсьтомы ваньзэ, мае быгатӥськомы, дышетскисьёсмылы пылатӥськонлы дасяськыны юрттон понна!