1. Erissiyo ashkkara oottiyo oosoy shemppo ashshiya ooso gidiyoogaa waati eriyoo?

ERISSIYO ASHKKARA oottiyo oosoy shemppo ashshiya ooso! Nuuni hegaa waati eriyoo? Maatiyoosa 28:19, 20n deˈiya azazuwaa Yesuusi yootido wode: “Biidi, . . . tana kaalliyaageeta oottite;  . .  eta xammaqite” yaagiis. Xammaqettiyoogee ay keena koshshiyaabee? Nuuni merinawu deˈana koyikko, xammaqettana bessees. Xammaqettanawu koyiya ooninne I merinaa deˈuwaa demmana danddayiyoy Yesuusi nu gishshawu hayqqidoogaanne denddidoogaa ammanana koshshees. Kiitettida PHeexiroosi ba mala Kiristtaanetussi yootidoy hegaassa: ‘Xinqqatee inttena haˈˈi ashshees. Hegee Yesuus Kiristtoosi hayquwaappe denddidoogaana.’ (1 PHe. 3:21) Hegaa gishshawu, mati erissiyo ashkkara gidida uri xammaqettiyo wode, merinawu deˈanawu hidootana danddayees.

2. Naaˈˈantto Ximootiyoosa 4:1, 2y nuuni ay mala asttamaare gidana koshshiyoogaa yootii?

² Erissiyo ashkkara oottanawu nuuni gooba asttamaare gidana koshshees. (2 Ximootiyoosa 4:1, 2 nabbaba.) Aybissi? Yesuusi nuna, “Biidi, . . . tana kaalliyaageeta oottite; . . .  eta tamaarissite” giidi azazido gishshataassa. Kiitettida PHawuloosi, “Neeni hegaa oottikko nenanne neeni giyoogaa siyiyaageeta ashshiyo gishshau” he oosuwaa “aggennan ootta” yaagiis. Yaatidi I, “Ne timirttiyaa naaga” giidoogee bessiyaaba. (1 Xim. 4:16) Erissiyo ashkkara oottiyo oosoy tamaarissiyoogaara gayttida ooso gidiyo gishshawu, nuuni tamaarissiyoogan gooba gidanawu koyoos.

3. Ha huuphe yohuwan, xannaˈissiyoogaa xeelliyaagan ay beˈanee?

³ Nuuni kumetta alamiyan miilooniyan qoodettiya xinaateta  xannaˈissoos. Hagaappe kasetiya huuphe yohuwan beˈidoogaadan, he xinaatetuppe daroti xammaqettidi Yesuus Kiristtoosi erissiyo ashkkara gidanaadan waati maaddana danddayiyaakko nuuni eranawu koyoos. Ha huuphe yohuwan, xinaateti diccidi xammaqettanaadan maaddanawu xannaˈissiya ubbay oottana koshshiya hara ichchashubata beˈana.

4. Geeshsha Maxaafaa xannaˈissiyo wode, xannaˈissiyaagee darobaa haasayana koshshennay aybissee? (Tohossa qofaakka xeella.)

⁴ Nuuni Xoossaa Qaalaappe tamaarissiyoobaa dosoos. Hegaa gishshawu, hegaappe darobaa haasayanawu koyana danddayoos. SHin, Wochiyo Keelaa Xinaatiyaa, Gubaaˈiyaa Geeshsha Maxaafaa Xinaatiyaa, woy issi xinaatiyaa kaalettiyo wodekka gidin kaalettiyaagee darobaa haasayana koshshenna. Xannaˈissiya ubbay xannaˈissiyo wode, Geeshsha Maxaafaa loytti goˈettanawu koyiyo gishshawu, darobaa haasayennaadan naagettana koshshees; qassi issi xiqisiyaa woy huuphe yohuwaa xeelliyaagan eriyo ubbabaa qonccissanawu malana koshshenna. * (Yoh. 16:12) Neeni xammaqettiyo wode neeyyo deˈiya Geeshsha Maxaafaa eraa haˈˈi ne eriyoogaara geeddarssa. Xammaqettiyo wode, Geeshsha Maxaafay tamaarissiyo koyro timirtte xalla erennan aggakka. (Ibr. 6:1, 2) Haˈˈi neeni eriyoobaa tamaaranawu daro layttaa ekkiis; yaatiyo gishshawu mati xannaˈiyoogaa doommida urawu ubbabaa issi kutti yootanawu maloppa.

5. (a) Koyro Tasalonqqe 2:13y yootiyoogaadan, nu xannaˈissiyo uri ay akeekanaadan koyiyoo? (b) Xinaatee tamaariyoobaa xeelliyaagan yootanaadan waati minttettana danddayiyoo?

⁵ Nu xinaatee tamaariyoobay Geeshsha Maxaafaappe gidiyoogaa I akeekanaadan koyoos. (1 Tasalonqqe 2:13 nabbaba) Hegaadan waati oottana danddayiyoo? I tamaariyoobaa yootanaadan minttetta. Geeshsha Maxaafaa xiqiseta ubbatoo neeni awu qonccissiyoogaappe amaridaageeta I neeyyo qonccissanaadan oychcha. Xoossaa Qaalaa ba deˈuwan waati oosuwan peeshshanaakko xinaatee akeekanaadan maadda. I nabbabido xiqiseta xeelliyaagan I qoppiyoonne awu siyettiyaabaa yootanaadan maaddanawu oyshata oychcha. (Luq. 10:25-28) Leemisuwawu, hagaadan oychcha: “Yihoowa eeshshatuppe issuwaa akeekanaadan ha xiqisee nena waati maaddidee?” “Ha Geeshsha Maxaafaa tumaappe neeni waana goˈettana danddayay?” “Neeni tamaaridobaa xeelliyaagan neeyyo aybi siyettii?” (Lee. 20:5) Waannabay, I ay keena eridee giyoogaa gidennan, he eridobaa ay keena siiqiinne oosuwan peeshshii giyoogaa.

6. Xannaˈissiyoogan kayma gididaageeta shoobbiyoogee loˈˈo gidana danddayiyoy aybissee?

 ⁶ Neeni xannaˈissiyo wode, tamaarissiyoogan kayma gidida aassiyaageeta shoobba eray? Yaatikko, neeni xannaˈissiyo hanotaa xeelliyaagaanne Geeshsha Maxaafaa loytti goˈettiyaakkonne eti akeekidobaa yootanaadan oychchana danddayaasa. Tamaarissiyoogan neeni kaseppe qara gidanawu ne huuphiyaa ziqqi oottana koshshees. (Oosuwaa 18:24-26⁠ra gatta xeella.) Tamaarissiyoogan kayma gidida aassiyaagee xinaatee tamaariyoobaa akeekidabadan qoppiyaakkonne oychcha. Issi woy hegaappe daro saaminttawu neeni deˈenna wode, he aassiyaagee ne gishshaa xannaˈissanaadan oychchana danddayaasa. Hegee I ubbatoo xannaˈiyoogee keehi koshshiyoogaa akeekissana. Hagee “ta” xinaatiyaa A hara ooninne xannaˈissana danddayenna gaada mule qoppoppa. Neeni aybippenne aaruwan ne xinaatiyawu loˈˈobaa koyiyo gishshawu, A tumaa ubbatoo loytta tamaarissana.

7. Xinaatee I tamaariyoobaa siiqanaadan maaddiyaabay aybee?

⁷ Geeshsha Maxaafay tamaarissiyoobaa neeni siiqiyoogaanne ammaniyoogaa ne xinaatee akeekana koshshees. (1 Tas. 1:5) Yaatiyo wode I tamaariyoobaa siiqana danddayees. Ne deˈuwan Geeshsha Maxaafay nena waati maaddidaakko yootana danddayaasa. He wode Geeshsha Maxaafay akka maaddana danddayiyoogaa I akeekana.

8. Ne xinaatiyaa maaddanawu harabaa ay oottana danddayay, qassi neeni hegaadan oottiyoy aybissee?

⁸ Neeni xannaˈissiyo wode, aagaa mala metoy gakkin xoonida hara ishanttubaanne michchonttubaa awu yoota. Xannaˈissiyo wode A leemisoy xinaatiyaa goˈˈana danddayiya issi ura gubaaˈiyaappe shoobbana danddayaasa. Woy “Geeshsha Maxaafay Asay Laamettanaadan Oottees” giya huuphe yohuwan kase kaalli kaalli kiyida Wochiyo Keelan, qassi hegaa mala jw.org saytiyan deˈiya deˈuwan hanidabaa demmana danddayaasa. He xuufetinne biidoti Geeshsha Maxaafay A deˈoy giiga gidanaadan oottana danddayiyoogaa xinaatee akeekanaadan maaddana.

9. Ne xinaatee tamaariyoobaa ba so asassinne ba dabbotussi yootanaadan waata minttettana danddayay?

⁹ Xinaatee aqo oyqqidaba gidikko, aqo laggee xannaˈii? Xannaˈennaba gidikko, he aqo laggee xannaˈanaadan shoobba. Ne xinaatee tamaariyoobaa ba so asassinne ba dabbotussi yootanaadan minttetta. (Yoh. 1:40-45) Waatada? Hagaadan oychchana danddayaasa: “Ne  so asawu ha tumaa waata qonccissana danddayay?” woy “Hagee tuma gidiyoogaa ne dabbuwawu yootanawu awugaa xiqisiyaa goˈettuutee?” Neeni yaatiyoogan, xinaatee asttamaare gidanaadan loohissaasa. Yaatiyoogan, I baappe koyettiyaabaa oottiyo wode gubaaˈiyaara sabbakiyoogaa doommana danddayees. Geeshsha Maxaafaa xannaˈanawu koyiya I eriyo hara uri deˈikko, xinaatiyaa oychchana danddayaasa. I eriyo uri deˈikko, sohuwaara he uraara gayttada xannaˈanaadan shoobba. Yaatada, Geeshsha Maxaafaa Waati Xannaˈiyoo? * giya biiduwaa A bessa.

10. Koyro Tasalonqqe 2:7, 8y yootiyoogaadan, issi asttamaaree PHawuloosa leemisuwaa waati kaallana danddayii?

¹⁰ Asttamaareti bantta tamaaretussi qoppana koshshees. Eti mata wode gubaaˈiyaa ishantta woy michchontta gidana danddayoosona. (1 Tasalonqqe 2:7, 8 nabbaba.) Alamiyan deˈiya laggeta aggidi Yihoowawu haggaazanawu koshshiya ubbaban laamettiyoogee eta metana danddayees. Gubaaˈiyaappe loˈˈo laggeta koyiyoogan nuuni eta maaddana koshshees. Geeshsha Maxaafa xannaˈissiyo wode xalla gidennan, hara wodetunkka aara wodiyaa aattiyoogan ne xinaatiyawu lagge gida. Xannaˈiyo gallassan gidennan, hara gallassan ne awu silkkiyaa dawaliyoogee, kiitaa yeddiyoogee woy baada oychchiyoogee xinaatiyawu neeni qoppiyoogaa bessees.

11. Nu xinaateti gubaaˈiyaappe ay demmanaadan nuuni koyiyoo, qassi aybissi?

¹¹ Hagaadan giyo leemiso haasayay deˈees: “Issi naˈi diccanawu issi heeran deˈiya asa ubbaa maadoy koshshees.” Nuuni: “Erissiyo ashkkara oottanawu gubaaˈiyaa maadoy koshshees” gaana danddayoos. Hegaa gishshawu, gooba asttamaareti tamaareti gubaaˈiyan deˈiya haratuura laggetanaadan maaddoosona; he laggeti xinaateti kaseegaappe aaruwan Yihoowakko shiiqanaadan maaddana danddayoosona. Xinaateti Xoossaa asaara dabbota minttiyo wode, ayyaanaabaaninne koshshiya haraban maaduwaa etappe demmana danddayoosona. Xinaateti ubbay eti gubaaˈiyaa yame gididabadan, qassi ayyaanaaban nu so asaa gididabadan etawu siyettanaadan nuuni koyoos. Ishanttinne michchontti bessiyo siiqoy xinaateta ubbaa denttettanaadan koyoos. Hegee Yihoowaara dabbotanawu maaddenna asatuura deˈiya laggetetta agganawu metootennaadan oottana. (Lee. 13:20) Kase laggeti A ixxiyo wode, Yihoowa dirijjitiyaappe loˈˈo laggeta I demmana danddayiyoogaa erana.—Mar. 10:29, 30; 1 PHe. 4:4.

12. Bana Yihoowawu sheedhdhidi xammaqettiyoogaabaa nu xannaˈissiyo uraara haasayana koshshiyoy aybissee?

¹² Issi uri bana Yihoowawu sheedhdhidi xammaqettiyoogee ay keena koshshiyaabaakko neeni darotoo haasayana koshshees. Ubbaappe aaruwan, nuuni Geeshsha Maxaafaa xannaˈissiyo halchchoy issi uri xammaqettidi erissiyo ashkkara gidanaadan maaddanaassa. Amarida aginawu aggennan Geeshsha Maxaafaa xannaˈidoogee, ubba qassi shiiqota doommidoogee, xinaatee Geeshsha Maxaafaa I xannaˈiyoogaa halchchoy Yihoowa Markka gididi haggaaziyoogaa doommanaadan maaddiyoogaa akeekana.

13. Issi xinaatee xammaqettanawu ay oottana koshshii?

¹³ Xammaqettanawu koyiya issi xinaatee oottana koshshiyo issi issibati deˈoosona. Koyroogee, xinaatee Yihoowa erananne siiqana qassi A ammanana koshshees. (Yoh. 3:16; 17:3) Yaatidi, I Yihoowaaranne gubaaˈiyan deˈiya ishanttuuranne michchonttuura dabbotana bessees. (Ibr. 10:24, 25; Yaaq. 4:8) Qassi, xinaatee iita meezeta aggananne ba nagaraappe simmana koshshees. (Oos. 3:19, 20) Kallidi, I tamaaridobaa haratussi yootana bessees. (2 Qor. 4:13) Wurssettan, bana Yihoowawu sheedhdhana, qassi hegaa bessanawu xammaqettana koshshees. (1 PHe. 3:21; 4:2) Hegee ubba asaa keehi ufayssiya gallassa! Xinaatee ba halchchuwaa polanawu hegeeta oottiyo wode, wozanappe galata, qassi hegeeta ubbatoo oottanaadan aggennan minttetta.

14. Issi asttamaaree xinaatee dicciiddi deˈiyoogaa waati erana danddayii?

¹⁴ Issi xinaatee bana sheedhdhidi xammaqettanaadan maaddanawu nuuni danddayanchcha gidana koshshees. SHin I Xoossaa Yihoowawu oottanawu koyiyaakkonne nuuni akeekana koshshees. Xinaatee Yesuusa azazuwaa azazettanawu baaxetiyoogaa bessii? Woy Geeshsha Maxaafaa eraa demmanawu xalla koyii?

15. Xinaatee xammaqettanawu giigidoogaa asttamaaree waati eranee?

¹⁵ Xinaatee dicciiddi deˈiyaakkonne loytta akeeka. Leemisuwawu, I bawu siyettiyaabaa Yihoowawu yootii? I Yihoowakko woossii? (Maz. 116:1, 2) I Geeshsha Maxaafaa nabbabiyoogan ufayttii? (Maz. 119:97) I ubbatoo shiiqota shiiqii? (Maz. 22:22) I ba deˈuwan laamettana koshshiyaaban laamettidee? (Maz. 119:112) I  tamaariyoobaa ba so asassinne ba dabbotussi yootiyoogaa doommidee? (Maz. 9:1) Ubbappe aaruwan, I Yihoowa Markka gidanawu koyii? (Maz. 40:8) Xinaatee ha ginatun dichchaa bessennaba gidikko, aybissakko hiillan eranawu mala, qassi qoncciyan shin kehatettan hegaabaa aara haasaya. *

16. Issi ura xannaˈissiyoogaa aggana koshshiyoy awudee?

¹⁶ Issi uraara ubbatoo xannaˈana koshshiyaakkonne issi issitoo nena hagaadan oychcha: ‘Xannaˈiyaagee xinaatiyawu giigettennee? SHiiqota shiiqanawu koyennee? Iita meezeta aggibeennee? Worddo haymaanootiyaappe kiyibeennee?’ Ha oyshatu zaaroy ee giyaagaa gidikko, A ubbatoo xannaˈissiyoogee haattaa waraa eranawu koyenna ura erissanawu baaxetiyoogaa mala! Xinaatee tamaariyoobaa siiqennabanne laamettanawu koyennaba gidikko, ubbatoo xannaˈissiyoogee bessiyaabee?

17. Koyro Ximootiyoosa 4:16y yootiyoogaadan, Geeshsha Maxaafaa tamaarissiya ubbay ay oottana koshshii?

¹⁷ Erissiyo ashkkara oottiyo aawatettaa nuuni poliyoogee keehi koshshiyaaba; qassi nu xinaateti diccidi xammaqettanaadan maaddanawu koyoos. Nuuni tamaarissiyo wode Geeshsha Maxaafaa goˈettiyoynne tamaarissiyoobaa siiqiyoogaanne ammaniyoogaa bessiyoy hegaassa. Nu xinaatee gubaaˈiyaappe laggeta demmanaadan minttettoos. Qassi bana sheedhdhidi xammaqettiyoogaabaa ubbatoo haasayoos; xinaatee dicciiddi deˈiyaakkonne issi issitoo nuna oychchoos. (Sinttaa 13n “ Xinaateti Dichchaa Bessidi Xammaqettanaadan Asttamaaree Oottana Koshshiyaabata” giya saaxiniyaa xeella.) SHemppo ashshiya ha oosuwaa oottiyoogan keehi ufayttoos! Nu xinaateti dichchaa bessidi xammaqettanaadan maaddanawu nuussi danddayettida ubbabaa oottanawu murttidaageeta gidoos.