NGANI JAKULIJIGANYA 42
Twakamuchisyeje Ŵakulijiganya Baibulo Kuti Abatisidwe—Mbali Jaŵili
“Mliloleleje chenene mwasyene, nambo soni pa yele yimkusajiganya.”—1 TIM. 4:16.
NYIMBO NA. 77 Lilanguka M’chilambo Chachipi
YACHITULIJIGANYE *
1. Ligongo chichi tukuŵecheta kuti masengo gakwiganya ŵandu gali masengo gakulupusya umi?
MASENGO gakwiganya ŵandu gali masengo gakulupusya umi. Ligongo chichi tukuti myoyo? Yesu paŵapelekaga lilamusi lyalili pa Mateyu 28:19, 20, jwatite, “Mjawule, . . . mkajiganye ŵandu . . . , mkabatisyeje.” Ana akumanyilila umbone wa kubatisidwa? Mundu pabatisidwe akusakola upile wakuti chachikulupuka ni kutama ni umi wangamala. Mundu jwakusaka kubatisidwa akusasosekwa kukulupilila kuti chachipata umi wangamala ligongo lyakuti Yesu ŵawile ni kwimuka ligongo lya m’weji. Ni ligongo lyakwe ndumetume Petulo ŵasalile Aklistu achimjakwe kuti, “Ubatiso . . . ukusamkulupusya jemanja ligongo lyakwimuka . . . kwa Yesu Klistu.” (1 Pet. 3:21) Myoyo, mundu pabatisidwe akusakola chembecheyo chakulupuka ni kola umi wangamala.
2. Ana lilemba lya 2 Timoteo 4:1, 2 likusati tukusosekwa kuŵa ŵakwiganya ŵamtuli?
2 Kuti tukombole kwajiganya ŵandu ni kuŵa ŵakulijiganya ŵa Yesu pakusasosekwa kuti kwiganya kwetu kuŵeje “kusyesyene.” (Aŵalanje 2 Timoteo 4:1, 2.) Ligongo chichi tukuŵecheta myoyo? Pajatu Yesu ŵatulamwile kuti, “Mjawule, . . . mkajiganye ŵandu . . . , mkabatisyeje.” Ni ligongo lyakwe ndumetume Paulo ŵasasile kuti, “Mliloleleje mwasyene , . . . pa yele yimkusajiganya.” Kaneko jwatite, “Naga mkutenda yeleyi timchilikulupusya mwasyene nambosoni ŵandu ŵakusapikanila maloŵe genu.” (1 Tim. 4:16) Pakuŵa masengo gakwiganya gakusatendekasya ŵandu kuti aŵe ŵakulijiganya ŵa Yesu, tukusasosekwa kuti kwiganya kwetu kuŵeje kusyesyene.
3. Ana chitulijiganye yindu yapi yampaka yitukamuchisye patukutendesya majiganyo ga Baibulo?
3 Pachilambo chosope, tukwajiganya ŵandu ŵajinji usyesyene wawukusasimanikwa m’Baibulo. Nambo mpela mwatuyiwonele mungani jipite jila, tukusosekwa kumanyilila yampaka tutende kuti twakamuchisye jemanjaji kuŵa ŵakulijiganya ŵa Yesu Klistu. Mu nganiji chitulole yindu yine msano yatukusosekwa kutenda kuti twakamuchisye ŵakulijiganya Baibulo kuti abatisidwe.
AKAMULICHISYEJE MASENGO BAIBULO PAKWIGANYA
Amwusyeje jwakusamanyilila chenene kulalichila kuti ŵakamuchisye yampaka atendeje kuti akamulichisyeje masengo Baibulo pakwiganya (Alole ndime 4-6) *
4. Ana akusosekwa kuŵambala yindu yapi pakutendesya lijiganyo lya Baibulo? (Alole maloŵe gamwiŵanda.)
4 Wosopewe, tukusanonyela kwajiganya ŵandu Maloŵe ga Mlungu. Myoyo, mwine ndaŵi sine mpaka asacheje kulondesya yindu yosope yakumanyila. Nambopetu, chinga akutendesya Lijiganyo lya Sanja ja Mlonda, chinga Lijiganyo lya Baibulo lya Mpingo, kapena akutenda lijiganyo lya Baibulo ni mundu, ngakusasosekwa kutupiya yakuŵecheta. Akusasosekwa kukamulichisya masengo Baibulo pakwiganya. Aŵambaleje kulondesya yosope yene yakumanyilila pangani ja m’Baibulo jakukukambilana. * (Yoh. 16:12) Akaliŵalila kuti pakusajigala ndaŵi kuti mundu amanyilile yindu yejinji. Atamose wawojo, pandaŵi jiŵabatisidwaga, ŵaliji mkumanyilila yijiganyo yandandape basi. (Aheb. 6:1) Nambo apano akumanyilila yejinji ligongo lyakuti papitile ndaŵi jelewu ali abatisidwe. Myoyo, akajembecheya kuti jwakulijiganya jwawo chamanyilile yindu yosope yene mkanabatisidwe.
5. (a) Ana lilemba lya 1 Atesalonika 2:13, likulosya kuti jwakulijiganya akusosekwa kumanyilila chichi? (b) Ana mpaka tumkamuchisye chamtuli jwakulijiganya kuti alondesyeje yindu yakulijiganya?
5 Tukusasosekwa kumkamuchisya jwakulijiganya Baibulo jwetu kumanyilila kuti yakusalijiganya yikusatyochela m’Maloŵe ga Mlungu. (Aŵalanje 1 Atesalonika 2:13.) Ana mpaka tutende chamtuli yeleyi? Amlimbikasyeje jwakulijiganya Baibulo jwawo kuti alondesyeje yindu yakulijiganya. Mmalo mwakwambaga kulondesya malemba jikape, ampeje mpata kuti nombenajo alondesye malemba gane. Amkamuchisye jwakulijiganyajo kulola yampaka atende kuti akamulichisyeje masengo Maloŵe ga Mlungu paumi wakwe. Amwusyeje yiwusyo yampaka yikamuchisye kusala nganisyo syakwe pa malemba gaŵalasile. (Luk. 10:25-28) Mwine mpaka amwusye kuti, “Ana lilemba lyatuŵalasile likutukamuchisya kumanyilila kuti Yehofa akwete ndamo syapi?” “Ana yindu yatulijiganyisyeyi mpaka yitukamuchisye chamtuli m’weji?” “Ana akupikana uli ni yindu yatulijiganyisyeyi?” (Mis. 20:5) Chakusosekwa mnope chili kumkamuchisya jwakulijiganyajo kuti ayikamulichisyeje masengo yindu yakulijiganya ngaŵaga kwamba kumjiganya yindu yejinji.
6. Ligongo chichi yili yakusosekwa kumjigalaga ŵane ku lijiganyo lya Baibulo?
6 Ana pakwete paŵamjigele mjawo jwakusamanyilila chenene kulalichila, pakuja kutendesya lijiganyo lya Baibulo? Naga akusatenda yeleyi, amwusyeje mjawojo kuti ŵasalile naga wawojo akusatendesya chenene lijiganyolyo, soni naga akusosekwa kongolela pane ni pane. Nambo kuti akombole kongolela yachiŵasalileyo, akusosekwa kuŵa ŵakulinandiya. (Awanichisye ni Masengo 18:24-26.) Kaneko, amwusye mjawojo naga akuyiwona kuti jwakulijiganyajo akuwupikanichisya usyesyene. Mpaka amŵendesoni mjawojo kuti atendesyeje lijiganyolyo wawojo patyosile. Yeleyi yichikamuchisya kuti lijiganyolyo litendekweje mwakutamilichika soni yichikamuchisya kuti jwakulijiganyajo aliwoneje lijiganyolyo kuŵa lyakusosekwa. Akayiwonaga kuti lijiganyo lya Baibulolyo lili lyawolyawope soni kuti pangali jwampaka atendesye wawo patyosile. Kutenda yeleyi mpaka kumkamuchisye jwakulijiganyajo kulijiganya usyesyene mwakutamilichika.
ALOSYEJE KUTI AKUSAYINONYELA SONI KUYIKULUPILILA YINDU YAKWIGANYA
Amsalileje jwakulijiganya jwawo yisyasyo ya ŵandu ŵane ŵaŵachenjile ndamo syawo, yampaka yimkamuchisye kuti akamulichisyeje masengo yakulijiganya (Alole ndime 7-9) *
7. Ana chichi champaka chimkamuchisye jwakulijiganya kusangalala ni yindu yakusalijiganya?
7 Jwakulijiganya Baibulo akusosekwa aliwoneleje jika kuti wawojo akusawunonyela soni kuwukulupilila usyesyene wakusimanikwa m’Baibulo. (1 Ates. 1:5) Yeleyi mpaka yimkamuchisye jwalakwejo kuti asangalalaje ni yindu yakulijiganya. Naga kwakomboleka, amsalileje yambone yapatile wawojo ligongo lyakulijiganya Baibulo. Naga akutenda yeleyi, jwakulijiganyajo chachimanyilila kuti m’Baibulo mwana yindu yambone yampaka yimkamuchisye jwalakwe.
8. Ana mpaka atende yindu yine yapi pakutendesya lijiganyo lya Baibulo? Ligongo chichi akusosekwa kutenda yeleyi?
8 Amsalileje jwakulijiganyajo yisyasyo ya ŵandu ŵane ŵaŵasimene ni yindu yakulandana ni yakusimana najo jwalakwejo. Kombolekasoni kwawula ni jwakulalichila jwine jwa mumpingo mwawo jwaŵasimene ni yindu yakulandana ni yakusimana nayo jwakulijiganyajo. Mpaka apatesoni yisyasyo yakamula mtima pa jw.org pasi pa mtwe wakuti “Baibulo Jikusachenga Umi wa Ŵandu.” * Ngani soni mafidiyo gagakusasimanikwa pelepa mpaka yimkamuchisye jwakulijiganya Baibulo kulola kusosekwa kwakamulichisya masengo yiwundo ya m’Baibulo.
9. Ana mpaka amkamuchisye chamtuli jwakulijiganya kuti ŵasalileje ŵane yindu yakulijiganya?
9 Naga jwakulijiganyajo ali jwamlombele, ana ŵamkwakwe akulijiganyasoni? Naga ngakulijiganya, ŵaŵende kuti atameje nawo pa lijiganyolyo. Amlimbikasye jwakulijiganyajo kuti ŵasalileje ŵandu ŵa mwiŵasa mwakwe soni achimjakwe yindu yakulijiganyayo. (Yoh. 1:40-45) Ana mpaka amlimbikasye chamtuli? Komboleka kwamba kumwusya kuti, “Ana mpaka alondesye chamtuli yindu yatulijiganyisyeyi kwa ŵandu ŵamwiŵasa mwawo?” Kapena mpaka amwusye kuti, “Ana mpaka akamulichisye masengo lilemba lyapi pakusaka kulondesya chiwundo chelechi kwa mjawo?” Kutenda yeleyi mpaka kumkamuchisye jwakulijiganyajo kuti chaŵe jwakwiganya jwambone msogolo. Naga jwalakwejo akukombola kutenda yeleyi, yichiŵa yangasawusya kuti atande kulalichila ni mpingo. Mpaka amwusyesoni jwakulijiganyajo naga akumanyilila mundu jwine jwakusaka kulijiganya Baibulo. Naga apali, ajawuleko mwachitemachitema kuti akatande kumjiganya. Amlosyesoni fidiyo jakuti, Ana pa Lijiganyo lya Baibulo Pakusatendekwa Yatuli? *
AMLIMBIKASYE JWAKULIJIGANYA KUTI AKOLE ACHIMJAKWE MUMPINGO
Amlimbikasyeje jwakulijiganya jwawo kupata achimjakwe mumpingo (Alole ndime 10-11) *
10. Ana mpaka tusyasye wuli chisyasyo cha Paulo chachikusimanikwa pa 1 Atesalonika 2:7, 8?
10 Ŵakwiganya akusosekwa alosyeje kuti akusiŵanonyela yisyesyene ŵakulijiganya ŵawo. Akusosekwa ŵawoneje kuti chachiŵa abale kapena alongo ŵawo ŵamumpingo. (Aŵalanje 1 Atesalonika 2:7, 8.) Ngayikusaŵa yamasanje kuti mundu aleche kukamulana ni achimjakwe ŵa yitendo yakusakala soni kuti achenje ndamo syakwe ni kutanda kumtumichila Yehofa. Myoyo, ŵakamuchisyeje jemanjaji kuti apate achimjawo ŵambone mumpingo. Apateje ndaŵi jakunguluka ni jwakulijiganya Baibulo jwawo. Mpaka atende yeleyi mwakumjimbila foni, kumlembela meseji kapena kumjendela kumangwakwe. Yeleyi mpaka yilosye kuti ali mjawo jusyesyene.
11. Ana mpaka tumkamuchisye jwakulijiganya Baibulo jwetu kutenda chichi? Ligongo chichi tukusosekwa kutenda yeleyi?
11 Pana maloŵe gakuti, “Ujika wangalikunda kunyuma.” Kuŵecheta kwine, “Mundu jumo ngaŵa mkumkamuchisya jwakuliganyaga Baibulo kuti aŵe jwakulijiganya jwa Yesu.” Ni ligongo lyakwe ŵakulalichila ŵane akusammanyikasya jwakulijiganya Baibulo jwawo kwa ŵandu ŵane mumpingo ŵampaka amkamuchisye kuŵa paunasi wambone ni Yehofa. Jwakulijiganya Baibuloju mpaka aŵe jwakusangalala kusyoŵekana ni abale ni alongoŵa, ligongo mpaka amkamuchisyeje pandaŵi jasimene ni yakusawusya. Tumkamuchisyeje jwakulijiganya jwetu kulipikana kuti ali jwakusosekwa mumpingo soni kuti tuli nawo yimpepe m’gulu ja Yehofaji. Tumkamuchisyejesoni kuti asangalaleje ni chinonyelo chakusalosyana abale ni alongo. Yeleyi yichimkamuchisya jwalakwe kuti aleche kukunguluka ni achimjakwe ŵanganaŵa amlimbikasisye kuti amtumichileje Yehofa. (Mis. 13:20) Naga achimjakwe ŵakala atandite kumponya maganga, chachimanyiilila kuti mpaka apate achimjakwe ŵane ŵambone m’gulu ja Yehofa.—Maliko 10:29, 30; 1 Pet. 4:4.
AMKAMUCHISYEJE JWAKULIJIGANYA KUMANYILILA KUSOSEKWA KWA KULIPELEKA SONI KUBATISIDWA
Yili yakomboleka kuti jwakulijiganya Baibulo akuye yindu yosope yayikusosechela kuti abatisidwe (Alole ndime 12-13)
12. Ligongo chichi tukusosekwa kuŵechetana ni jwakulijiganya jwetu ngani ja kulipeleka kwa Yehofa soni kubatisidwa?
12 Amsalileje mwagopoka jwakulijiganya Baibulo jwawo kusosekwa kwa kulipeleka soni kubatisidwa. Tukaliŵalilaga kuti chakulinga chetu chakutenda majiganyo ga Baibulo chili kwakamuchisya ŵandu kuti abatisidwe ni kutanda kumtumichila Yehofa. Patutandikasisye lijiganyo lya Baibulo soni naga mundujo atandite kusimanikwa pamisongano, tukusosekwa tumsalile kuti chakulinga chetu chekulungwa chili kumkamuchisya jwalakwejo kuti atande kumtumichila Yehofa.
13. Ana jwakulijiganya Baibulo akusosekwa kutenda yindu yapi kuti abatisidwe?
13 Pana yindu yejinji yampaka jwakulijiganya Baibulo asosekwe kutenda kuti abatisidwe. Pandanda pene, akusatanda kummanyilila soni kumnonyela Yehofa nambosoni kumkulupilila. (Yoh. 3:16; 17:3) Jwalakwe akusatenda yakomboleka kuti aŵe paunasi wambone ni Yehofa soni abale ni alongo. (Aheb. 10:24, 25; Yak. 4:8) Kaneko, akusalitendela chanasa ligongo lya yindu yakusakala yaŵatendaga mwamti akusaleka. (Mase. 3:19) Konjechesya pelepa, jwalakwe akusatanda kwasalila ŵandu ŵane yakulijiganya. (2 Akoli. 4:13) Pambesi pakwe, akusalipeleka kwa Yehofa soni kubatisidwa. (1 Pet. 3:21; 4:2) Kusala yisyene, lisiku lya ubatiso likusaŵa lyakusangalasya kwa mundu jwalijose. Naga jwakulijiganya Baibulo akutenda yindu yatuyisasileyi, akusosekwa amlimbikasyeje kuti akawujila munyuma.
ALOLEJE MWAKWAWULILA PASOGOLO JWAKULIJIGANYA BAIBULO
14. Ana jwakwiganya mpaka amanyilile chamtuli naga jwakulijiganya Baibulo akwawula pasogolo?
14 Tukusosekwa kuŵa ŵakuwusimana mtima patukumkamuchisya jwakulijiganya Baibulo kuti alipeleche ni kubatisidwa. Nambope tukusosekwasoni kumanyilila naga jwalakwe akusachilila kumtumichila Yehofa. Ana jwakulijiganya Baibulo jwawo akulosya kuti akulingalinga kupikanila malamusi ga Yesu? Kapena, ana jwalakwe akusagamba kusangalala ni kulijiganya yindu yine yakusangalasya ya m’Baibulo?
15. Ana yindu yapi yampaka yimkamuchisye jwakwiganya kumanyilila naga jwakulijiganya Baibulo akwawula pasogolo?
15 Aloleje yindu yayikulosya kuti jwakulijiganya jwawo akwawula pasogolo. Mwachisyasyo, ana jwalakwe akusasala mwakupikanila mumtima ligongo lya kuŵa paunasi ni Yehofa? Ana akusapopela kwa Yehofa? (Sal. 116:1, 2) Ana jwalakwe akusanonyela kuŵalanga Baibulo? (Sal. 119:97) Ana akusasimanikwa pamisongano ndaŵi syosope? (Sal. 22:22) Ana pana yindu yine yachenjile paumi ligongo lya yindu yakulijiganya? (Sal. 119:112) Ana atandite kwasalila achimjakwe kapena ŵamwiŵasa mwakwe yindu yakulijiganya? (Sal. 9:1) Chiwusyo chine chakusosekwa mnope chili chakuti, ana jwalakwe akusachilila kuŵa jwa Mboni sya Yehofa? (Sal. 40:8) Naga jwakulijiganyajo ngakutenda chilichose pa yindu yeleyi, akusosekwa kukambilana najo mwachinonyelo soni mwangapita mumbali kuti amanyilile chachikumtendekasya. *
16. Ana mpaka amanyilile chamtuli kuti akusosekwa kwimichila lijiganyo?
16 Ndaŵi syosope aliwusyeje naga akusosekwa kupitilisya kulijiganya ni mundu Baibulo. Mpaka aliwusye kuti, ‘Ana jwakulijiganya Baibuloju akusalepela kukosechela yachitulijiganye? Ana jwalakwe ngakusasaka kwika kumisongano? Ana nganaŵe kuchenga ndamo sine syakusakala? Ana akusajawulagape ku dini jakwe?’ Naga akwanga kuti elo pa yiwusyo yosopeyi, mpaka yiŵe chenene kumleka kaje mundujo ligongo nikuti jwalakwe ngakuwunonyela usyesyene soni ngakusaka kuchenga ndamo syakwe. Kupitilisya kumjiganya mundu mpela jweleju mpaka yiŵe mpela tukumkanganichisya kuti alijiganye kung’ambila, chitamilecho ali ngakusaka kunyoŵa.
17. Ana lilemba lya 1 Timoteo 4:16, likwakamuchisya ŵakutendesya majiganyo ga Baibulo wosope kutenda chichi?
17 Tukusajiwona ngani ja kumkamuchisya mundu kuti aŵe jwakulijiganya jwa Yesu kuŵa jakusosekwa mnope. Tukusasachililasoni kumkamuchisya jwakulijiganya Baibulo jwetu kuti abatisidwe. Ni ligongo lyakwe tukusosekwa kukamulichisya masengo Baibulo patukwiganya. Soni patukwiganya tukusosekwa kulosya kuti tukuyinonyela soni kuyikulupilila yatukwiganyayo. Tukusasosekwasoni kumlimbikasya jwakulijiganyajo kupata achimjakwe mumpingo. Tumsalileje kusosekwa kwa kulipeleka soni kubatisidwa kwineku tuli mkulola mwakwawulila pasogolo mundujo. (Alole libokosi pa peji 13, lyakuti, “ Yakusosekwa Kutenda Jwakwiganya.”) Tuli ŵakusangalala kuti tukwete upile wakukamula nawo masengo gakulupusya umiga. Myoyo, kwende tuŵe ŵakusimichisya kutenda yampaka tukombole pakwakamuchisya ŵakulijiganya Baibulo ŵetu kuti abatisidwe.
NYIMBO NA. 79 Ŵakamuchisye Aŵe Ŵakulimba
^ ndime 5 Kutendesya lijiganyo lya Baibulo kukusatupa upile wakwakamuchisya ŵandu kutanda kuganisya soni kutenda yindu mwakamulana ni yakusasaka Yehofa. Nganiji chijitukamuchisye kulola yampaka tutende kuti tukusye lunda lwetu lwakwiganya.
^ ndime 4 Alole ngani jakuti, “Yakusosekwa Kuŵambala Pakutendesya Lijiganyo lya Baibulo” mu kabuku ka Undumetume ni Umi Wachiklistu ka Sepetemba 2016.
^ ndime 8 Ajawule pa ZOKHUDZA IFEYO > ZOCHITIKA PAMOYO WA A MBONI ZA YEHOVA
^ ndime 9 Pa JW Library®, ajawule palembile kuti, MEDIA > OUR MEETINGS AND MINISTRY > TOOLS FOR THE MINISTRY.
^ ndime 15 Alole ngani jakuti “Kumnonyela Soni Kumyamichila Yehofa Mpaka Kwalimbikasye Kubatisidwa,” soni jakuti “Ana Ali Ŵakoseka Kubatisidwa?” Nganisi sili mu Sanja ja Mlonda ja Malichi 2020.
^ ndime 77 KULONDESYA YIWULILI: Mlongo jwine jwakusamanyilila chenene kulalichila akumkamuchisya mjakwe yampaka atende kuti akatupiyaga yakuŵecheta pakumjiganya mundu.
^ ndime 79 KULONDESYA YIWULILI: Jwakulijiganya Baibulo alijiganyisye yampaka atende kuti aŵe jwamkongwe jwambone. Kaneko akwasalila ŵamkwakwe yalijiganyisyeyo.
^ ndime 81 KULONDESYA YIWULILI: Jwakulijiganya Baibulo jula yimpepe ni ŵamkwakwe apite kukunguluka kunyumba ja mjawo jwine jwasimene najo ku Nyumba ja Uchimwene.
