DILONGI 42
Buidi Wulenda Sadisila Nlonguki wu Kibibila Kukonzuka mu Kiphevi?—Kitini Kimuadi
‘Wukikieba ngie veka ayi mambu wunlonga.’—1 TIMOTEO 4:16.
NKUNGA 77 Muinda mu Nza yi Kitombi
MAMBU TUANLONGUKA *
1. Buidi tuzabidi ti kisalu ki kuvanga minlonguki kimvukisanga miela mi batu?
KISALU ki kuvanga minlonguki kidi kisalu kimvukisanga miela mi batu! Buidi tuzabidi mawu? Mu thangu Yesu kavana lutumu alolo luidi mu Matai 28:19, 20, nandi wutuba: ‘Yendanu, . . . lukitula batu minlonguki . . . , lubabotika.’ Mambu mbi befu tuzebi mu matedi nkinza wu kubotama? Kubotama didi diambu dinkinza mutu kafueti vanga muingi kavuka ayi kabaka luzingu lu mvu ka mvu. Mutu tidi kubotama kafueti kikinina ti kalenda baka to luzingu lu mvu ka mvu mu nzila khudulu yi Yesu. Buawu mvuala Petelo kakambila baklisto: ‘Kubotama kuawu kumu vukisa bubu . . . mu nzila yi luvulubukusu lu Yesu Klisto.’ (1 Petelo 3:21) Mawu mansundula ti bo mutu kambotama, nandi wunkuiza bakanga luaku lu kuba mu khati dingumba di batu bala vuka.
2. Mbi nkanda 2 Timoteo 4:1, 2, wunkindisa minsamuni kuvanga?
2 Muingi tuvanga minlonguki, tufueti ba “minlongisi mimboti.” (Tanga 2 Timoteo 4:1, 2.) Kibila mbi? Kibila Yesu wu tutuma: ‘Yendanu, . . . lukitula batu minlonguki . . . , lubalonga.’ Mvuala Polo wutuba ti tufueti “kuikama” mu kisalu beni, ‘mu kuvanga mawu befu tuala vukisa muel’itu ayi wu batu ba tukuwa.’ Kiawu, kibila mvuala Polo kabue tubila: ‘Ba keba keba . . . mu mambu wunlonga.’ (1 Timoteo 4:16) Mu kuzaba ti phila tunlongila yidi kithuadi na ndionzukulu yi minlonguki mitu, diawu tufueti bela keba keba mu phila tuku balongila.
3. Mu matedi kuvana ndongukulu yi Kibibila, mambu mbi tuenlonguka mu dilongi adidi?
3 Mu nza yimvimba, befu tunlongisanga bivevi na bivevi bi batu kiedika ki Kibibila. Vayi dedi bo tulongukidi mu dilongi dibeli, befu tutidi kusadisa bawombo mu bawu kuba minlonguki mibotama mi Yesu Klisto. Diawu mu dilongi adidi, tuemmona mambu manna kadika nsamuni kalenda vanga, muingi kusadisa minlonguki babaka makani ma kubotama.
SADILA KIBIBILA BO WUNLONGA
Dinda lusalusu lu minsamuni minkaka mipisuka, muingi ba kusadisa mu phila yi kutuadisila buboti ndongukulu yi Kibibila. (Tala matangu 4-6) *
4. Kibila mbi nlongisi kafueti kukiyadila mu thangu kantuadisa ndongukulu yi Kibibila? (Tala matangu madi va wanda)
4 Befu tunzolanga beni kulonga bankaka diambu di Nzambi. Diawu khumbu zinkaka tulenda vukumuka ayi kutubila mambu mawombo mu khumbu yimueka. Kuba kuandi mu thangu tuntuadisa Kibanga ki Nsungi, Ndongukulu yi Kibibila mu Kimvuka voti bo tunlonga mutu Kibibila ku nzo’andi, nsamuni voti ntuadisi kafueti ba keba keba muingi kabika kukoluka beni. Muingi kumonisa ti widi mu kusadila Kibibila bo wunlonga, nsamuni voti nlongisi kafueti kukiyala muingi kabika sudikisa mambu moso matedi lutangu lu Kibibila. * (Yoane 16:12) Yindulabu ngie veka luzabu lo wuba bo wumana kubotama ayi luzabu weka bubu. Ḿba mu thangu beni, ngie waba visanga to malongi ma theti ma Kibibila. (Ebeleo 6:1) Mawu mansundula ti vavioka thangu yiwombo muingi wuzaba mambu ngie mazaba bubu. Diawu bika kumeka kusudikisa mambu moso mu khumbu yimueka kuidi nlonguki widi wumona.
5. (a) Dedi bummonisina 1 Tesalonika 2:13, mbi befu tuntomba nlonguk’itu kavisa mu thangu kanlonguka Kibibila? (b) Buidi tulenda kunkindisila kalonga bankaka mambu kadi mu kulonguka?
5 Tuntomba nlonguk’itu kavisa ti mambu kadi mu kulonguka masi ko mitu vayi mambasikila mu Diambu di Nzambi. (Tanga 1 Tesalonika 2:13.) Buidi tulenda vangila mawu? Kindisa nlonguki’aku kalonga bankaka mambu kadi mu kulonguka. Ayi khumbu zinkaka, buboti kumbikilanga kasudikisa matangu ma Kibibila. Sadisa nlonguki kumona buidi kalenda sadila mambu kadi mu kulonguka mu luzingu luandi. Ayi bo mummana kutanga lutangu lu Kibibila, mvana biuvu muingi kuzaba mayindu mandi mu matedi lutangu beni. (Luka 10:25-28) Dedi, wulenda kunkuvula: “Mu matangu amomo tube tanga, khadulu mbi yi Yave ngie belonguka muawu?” “Ndandu mbi ngie bebaka mu mawu?” “Ayi buidi ngie tidi kusadila mawu mu luzingu luaku?” (Zingana 20:5) Tufueti tebukanga moyo ti diambu dilutidi nkinza bakana ko thalu yi mambu nlonguki kama zaba, vayi buidi nandi kadi mu kumonisina luzolo mu kusadila mambu beni mu luzingu luandi.
6. Kibila mbi didi diambu dinkinza kudindanga lusalusu lu minsamuni minkaka midi mipisuka?
6 Bo wukue longuka yandi Kibibila, ngie wulenda dinda muingi kubasika na minlongisi minkaka mipisuka. Bosi kutsuka, wulenda kuba kuvula buidi babe muena ndongukulu yi Kibibila betuadisa ayi boti ngie besadila buboti Kibibila. Ba ku kukamba vama wufueti luta vangila mangolo, buna wukikulula ayi kikinina malongi beni muingi wubuela luzabu luaku mu phila yi kulongila. (Dedikisa mvandi na Mavanga 18:24-26.) Mvandi wulenda kunkuvula boti nlonguki widi mu kuvisa mambu kadi mu kulonguka. Ayi boti nzila voti (viagem) yike yaku mu sabala yimueka voti zisabala wadi, ngie wulenda dinda khomba beni muingi katuadisa ndongukulu yi Kibibila yi nlonguki’aku. Mawu mala sadisa nlonguki’aku kabika viokisa bilumbu biwombo mu khambu longuka ayi wala mona nkinza ndongukulu yi Kibibila yidi mu luzingu luandi. Bukiedika ti ngie wuntomba nlonguki’aku wu Kibibila kayonzuka mu kiphevi. Diawu bika to kuba wukangama mu nandi vayi bika zikhomba zinkaka mvandi babuela mioko mu ndionzukulu’andi yi kiphevi.
LONGILA MU KIBAKALA AYI MU LUFIATU
Tubila binongo bi zikhomba baviokila mu mambu nlonguki’aku kadi mu kuviokila, muingi kavisa buidi kalenda sadila minsua mi Kibibila mu luzingu luandi (Tala matangu 7-9) *
7. Mbi bilenda sadisa nlonguki’aku kukuangalala mu mambu kadi mu kulonguka?
7 Nlonguki’aku kafueti mona ti ngie wunkolukilanga mu kibakala ayi mu lufiatu, kiedika kidi mu Kibibila. (1 Tesalonika 1:5) Mawu mala vanga nandi kaluta zola mambu kadi mu kulonguka. Boti kuba nkamba buidi minsua mi Kibibila mi kusadisilanga. Mawu mala vanga nandi mvandi kamona ti minsua mi Kibibila milenda kuntuadisa mvandi ndandu.
8. Mbi binkaka wulenda vanga muingi kubuela kindisa nlonguki wu Kibibila, ayi kibila mbi wufueti vangila mawu?
8 Mu thangu widi mu kuvana ndongukulu yi Kibibila, wulenda tubila na nlonguki’aku bifuani bi zikhomba baviokila mu mambu ma phasi dedi mo nlonguki’aku kadi mu kuviokila, vayi banunga mu mambu beni. Voti wulenda nata khomba yinkaka mu kimvuka ngie wuzabizi ti kifuani kiandi kimboti kilenda tuadisa ndandu kuidi nlonguki’aku. Mvandi wulenda botula thangu muingi kutanga binongo bidi mu jw.org mu kikhuku kintuba “Kibibila Kimbalulanga Luzingu lu Batu.” * Malongi amomo ayi zivideo zinkaka, zilenda sadisa nlonguki kumona buidi kusadila minsua mi Kibibila mu luzingu luandi, kulenda kuntuadisila ndandu.
9. Buidi wulenda kindisila nlonguki’aku wu Kibibila kulonga bakundi ayi basi dikanda mambu kadi mu kulonguka?
9 Boti nlonguki’aku widi wukuela, bukiedika kuandi ti nnuni’andi voti nkazi’andi mvandi widi mu kulonguka? Boti ndamba, wulenda kuntumisa muingi kalandakana ndongukulu yi Kibibila. Mvandi kindisa nlonguki’aku muingi katona kulonga basi dikanda ayi bakundi mambu kadi mu kulonguka. (Yoane 1:40-45) Buidi kalenda vangila mawu? Ngie wulenda kuvula nlonguki’aku: “Buidi wulenda sudikisila kiedika akiki kuidi basi dikanda diaku?” voti “Matangu mbi ma Kibibila wulenda sadila muingi kusudikisa kiedika akiki kuidi nkundi’aku?” Mu phila ayoyi ngie widi mu kukubika nlonguki’aku muingi mvandi kaba nsamuni. Ngie kufiongunina ayi kumona ti nandi mafuana kuba nsamuni, nkindisa muingi kazabikisa mawu kuidi bakulutu ba kimvuka muingi bafionginina boti nandi bafuana kuba nsamuni wukhambu botama. Ngie wulenda yuvula nlonguki’aku boti nandi zebi mutu wunkaka wuntomba kulonguka Kibibila. Boti vadi, buna wulenda kukivana muingi kulongukanga yandi. Wulenda monisina mutu beni video yintuba Buidi bu Mvangiminanga Ndongukulu yi Kibibila? *
KINDISA NLONGUKI’AKU KUVANGA KIKUNDI NA ZIKHOMBA MU KIMVUKA
Kindisa nloguki’aku kavanga kikundi na zikhomba mu kimvuka (Tala matangu 10-11) *
10. Dedi bummonisina 1 Tesalonika 2:7, 8, buidi nlongisi kalenda landikinina kifuani ki mvuala Polo?
10 Minlongisi bafueti monisa ti bamvuanga beni nkinza minlonguki miawu. Ayi kuba tadila ti mu thangu yikhufi, bawu mvawu bankuiza ba zikhomba mu kimvuka. (Tanga 1 Tesalonika 2:7, 8.) Boboti beni kutebukanga moyo ti disi ko diambu diluelu kuidi nlonguki, kubika bakundi boso kaba mu nza ayi kubalula nzingulu’andi muingi kusadila Yave. Diawu tufueti kuba sadisa kubaka bakundi bakiedika mu kimvuka. Mvandi vanga mangolo muingi wuba nkundi wu nlonguki’aku. Bika kukuenda to kuna mu kilumbu munlonguka Kibibila, vayi botulanga thangu bilumbu binkaka muingi kuviokila kuna. Ngie wulenda kuntela mu telefone, kumfila mensage muingi kumonisa ti wukumvuanga nkinza mu bukiedika.
11. Mbi befu tuntomba nlonguk’itu kabaka mu kimvuka, ayi kibila mbi?
11 Bantubanga ti: “Vantombuluanga lusalusu lu baboso va buala muingi muana kayonzuka buboti.” Vayi befu tulenda tuba ti: “Vantombuluanga lusalusu lu baboso mu kimvuka muingi nlonguki kayonzuka.” Diawu minlongisi mimboti, bamvangilanga mangolo muingi kuzabikisa minlonguki miawu kuidi zikhomba zinkaka mu kimvuka balenda kuba sadisa kukuna zikhadulu zimboti. Mu phila ayoyi, nlonguki kalenda baka ndandu mu kuba va kimueka na dikabu di Nzambi, balenda kunsadisa kufikama Yave ayi kukonzuka mu kiphevi. Tuntomba kadika nlonguki kazaba ti nandi nkinza kadi mu kimvuka ayi widi mu khati dikabu di kiphevi di Nzambi. Tutidi nandi kamona luzolo luidi mu khati dikabu di Nzambi. Ayi mawu mala kumvanga katatamana kufikama zikhomba ayi kubika nkangulu wu batu balenda kuntatula mu mioko mi Yave Nzambi. (Zingana 13:20) Kheti bakundi bandi bakhulu bambandizi mbusa, nandi kasinkuiza ba ko mu kiunda kibila zebi ti widi bakundi bakiedika mu kimvuka ki Yave.—Malako 10:29, 30; 1 Petelo 4:4.
NTEBULANGA MOYO NKINZA WU KUKIVANA AYI KUBOTAMA
Malembe malembe, nlonguki wu Kibibila kalenda baka makani ma kubotama! (Tala matangu 12-13)
12. Kibila mbi tufueti tubilanga matedi kukivana ayi kubotama na nlonguk’itu?
12 Botulanga thangu muingi mutubila matedi kukivana ayi kubotama. Kibila bo tuntona kulonga mutu Kibibila, makani mitu mafueti ba ma kunsadisa kaba nlonguki wubotama wu Klisto. Bo tuntona kulonguka yandi mua zingonda ayi bo kantona kulandakana zikhutukunu, buboti kuzabikisa nlonguk’itu ti makani mitu madi, kunsadisa kaba wumueka mu Zimbangi zi Yave.
13. Mambu mbi nlonguki kafueti vanga theti ava kubotama?
13 Vadi mambu theti nlonguki wu Kibibila kantombanga kuvanga ava kubaka makani ma kubotama! Dedi, theti nandi wuntombilanga kuzaba, kuzola ayi mvandi kuba kiminu mu Yave. (Yoane 3:16; 17:3) Bosi, nlonguki wu Kibibila wunkunanga kikundi kingolo na Yave ayi wuntombanga kufikama kimvuka kiandi. (Ebeleo 10:24, 25; Yakobi 4:8) Mvandi nlonguki wumbikanga mavanga mambi ayi wunnionginanga masumu mandi. (Mavanga 3:19) Ayi bo kiminu kiandi kimbuelama, nandi wuntonanga kulonga bankaka mambu kadi mu kulonguka. (2 Kolinto 4:13) Bosi nandi wukivananga kuidi Yave ayi wummonisanga mawu mu thangu kambotama. (1 Petelo 3:21; 4:2) Bukiedika, kimbanga kilumbu ki mayandi kuidi baboso mu kimvuka! Mu thangu nlonguki kadi mu kuvanga mangolo moso amomo muingi kubotama, tufueti kuntonda mu mawu ayi kunkindisa muingi katatamana kukonzuka mu kiphevi.
FIONGUNINA NDIONZUKULU YI NLONGUKI’AKU THANGU KA THANGU
14. Buidi nlongisi kalenda fiongunina ti nlonguki’andi widi mu kukonzuka mu kiphevi?
14 Tufueti monisanga mvibudulu mu thangu tunsadisa nlonguk’itu kubaka makani ma kukivana ayi kubotama. Vayi buboti beni kufionguninanga boti mu bukiedika nandi widi phuila yi kusadila Yave. Bukiedika kuandi ti ngie wummonanga bidimbu ti nandi wuntumukinanga zithumu zi Yesu? Voti makani mandi madi to kulonguka mambu Kibibila kintuba?
15. Buidi nlongisi kalenda fiongunina ndionzukulu yi kiphevi yi nlonguki’andi?
15 Fionguninanga kadika thangu ndionzukulu yi nlonguki’aku. Dedi, wulenda kuyikuvusa: Nandi wukunzabikisanga mabanza kadi mu Yave? Nandi wunsambilanga kuidi Yave? (Minkunga 116:1, 2) Nandi wunzolanga kutanga Kibibila? (Minkunga 119:97) Nandi wunlandakananga zikhutukunu zioso? (Minkunga 22:22) Vadi mambu kama nunga kubalula mu luzingu luandi? (Minkunga 119:112) Nandi matona kukamba basi dikanda ayi bakundi bandi mambu kadi mu kulonguka? (Minkunga 9:1) Dilutidi nkinza, nandi tidi kuba wumueka mu Zimbangi zi Yave? (Minkunga 40:8) Boti nlonguki’aku kasimmonisa ko ndionzukulu mu mambu amomo tuma tubila, buna buboti kukala yandi muingi kubakula mbi bi kuntula nkaku. Vayi bo wumvanga mawu, wufueti vangila mawu mu lukinzu. *
16. Thangu mbi ngie fueti bikila kulonguka Kibibila na nlonguki’aku?
16 Fionguninanga boti nlonguki’aku kafueti tatamana kulonguka Kibibila. Dedi wulenda kuyikuvusa: ‘Nlonguki’ami wunkubikanga buboti ndongukulu’andi? Nandi kavuanga ko nkinza zikhutukunu? Nandi wukhidi monisa bifu bimbi? Nandi wukhidi kuendanga mu binganga bi luvunu?’ Boti ngete, buna kutatamana kunlongisa Kibibila, kuidi buka mutu ngie widi mu kulongisa kusuka vayi mangizi kuandi kukusuka mu nlangu. Buabu boti nandi kasi ko wukubama muingi kusadila mambu kadi mu kulonguka mu luzingu luandi, kibila mbi kutatimina kulonguka yandi Kibibila?
17. Dedi buntubila 1 Timoteo 4:16, mbi minlongisi mioso mi Kibibila bafueti vanga?
17 Befu tumvananga beni luvalu kisalu kitu ki kuvanga minlonguki. Diawu tunkolukilanga mu lufiatu ayi mu kibakala bo tunsadilanga Kibibila. Tumvanganga mawu muingi kusadisa minlonguki mitu mi Kibibila batatamana kukonzuka mu kiphevi ayi kubaka makani ma kubotama. Befu tunkindisanga minlonguki mitu kuvanga bakundi mu kimvuka. Ayi tuba monisanga nkinza wu kukivana ayi kubotama. Mvandi tumfionguninanga thangu ka thangu boti bawu badi mu kukonzuka mu kiphevi. (Tala quadro yidi va tsielu 13, yintuba “ Mbi Minlongisi Bafueti Vanga Muingi Kusadisa Minlonguki Baba Bakubama muingi Kubotama.”) Befu tunkuangalalanga beni mu kubuela mioko kisalu akiokio kimvukisanga miela mi batu. Tutidi kuvanga mamoso tunnunga, muingi kusadisa minlonguki mitu mi Kibibila babaka makani ma kubotama.
NKUNGA 79 Wuba Longa Baba Bakuikama
^ Lut. 5 Mu thangu tuidi mu kuvana ndongukulu yi Kibibila, befu tuidi luaku lu kusadisa batu balonguka ti Yave wuntomba bawu babalula mayindu mawu, mavanga mawu, ayi mabanza mawu. Dilongi adidi, dinkuiza sudikisa buidi tulenda buela pisukila mu kisalu ki kulonga.
^ Lut. 4 Tala tsielu yintuba “Mintambu Fueti Tina bo Wunlonga Mutu Kibibila” mu Nzingulu ayi Kisalu ki Kusamuna Ngonda Yivua, mvu 2016.
^ Lut. 8 Kota vantuba MA TUTEDI > BINONGO BI LUZINGU.
^ Lut. 9 Kota mu JW Library®, vantuba MEDIA > ZIKHUTUKUNU AYI KISALU KI KUSAMUNA > BILONGULU TUNSADILANGA MUINGI KULONGA.
^ Lut. 15 Tala malongi madi mu Kibanga ki Nsungi ki Ngonda Yintatu mvu 2020 mantuba: “Luzolo mu Yave Lutukindisa Muingi Kubotama” ayi “Ngie Widi Wukubama Muingi Kubotama?”
^ Lut. 77 MAMBU MADI MU ZIFUKULA: Kutsuka ndongukulu yi Kibibila, khomba widi wupisuka mu kusamuna widi mu kusadisa khomba betuadisa ndongukulu yi Kibibila, muingi kabika kukolukanga beni bo kantuadisa dilongi di Kibibila.
^ Lut. 79 MAMBU MADI MU ZIFUKULA: Mu thangu banlonguka Kibibila, nlonguki belonguka buidi kalenda bela nkazi wumboti. Bosi va masika nandi wunzabikisa nnuni’andi mambu kabe longuka.
^ Lut. 81 MAMBU MADI MU ZIFUKULA: Nlonguki wu Kibibila ayi nnuni’andi badi mu kuviokisa thangu ku nzo yi khomba babe zaba ku Nzo yi Kintinu ayi babe vanga kikundi.
