1. Odaphạn Matiu 28:18-20, eeghe itọ kụ edị aZizọs angọ bumatuạn phọ odị?

OḄETON bọ Zizọs siphẹ aḍuugh phọ, odị amitenhaan ni bumatuạn odị dị ookpomhoghan epẹ Galili. Odị amhoọgh ni ephigh iyaạr oḅenhị abidị. Aḅenhị eeghe? Iyaạr phọ odị aḅenhị bọ bidị edi siphẹ Matiu 28:18-20.—Bạl.

2. Ighẹn kụ asipuru dị yira kooḅeghiọn?

² Itọ phọ aZizọs angọ bọ, ilọ oḍighi awe bumatuạn phọ, egbolhomaam aani ni torobọ ebenhẹ Enhaạn ḍio arodon. Esi iduọn phọ, ooḅeghiọn iraạr asipuru dị emhoọgh muḅọph r’oḍighi phọ aZizọs ungọ bọ iyira. Eḅẹl phọ, eeghe kụ iyaạr dị ewạ mọ yira oḍighi, siphẹ yira rotughemhị bọ sinhị iilhogh phọ Enhaạn bumhoom abumatuạn phọ? Omhunhenhiom iyạl, ika kụ idị oomo abukaaphọm ookpomhoghan phọ, kologhonhaạn ḍighaạgh buphẹ yira rotughemhị ghan bọ ophoph oghị aghisigh siẹn igey phọ? Omhunhenhiom iraạr, ika kụ idị yira kotue ologhonhaạn ḍighaạgh buphẹ moophoọm bọ, oḅilhẹ omhiigh ophinhom aani ghan abin rukumuan oḍighi awe bumatuạn phọ?

3. Eeghe iyaạr kụ edị aZizọs aḅarạm siphẹ itọ phọ odị angọ bọ?

³ Itọ phọ aZizọs eegholhaan ni. Yira omoọgh otughemhị awe raraạr phọ ipẹ odị atọ bọ uḅenhị iyira. Kuolọ ephigh iyaạr edi ni dị ewạ mọ olhọgh elhegh. AZizọs o/ḅẹm mọ: ‘Itughemị bidị oomo araraạr phọ mị atọ bọ iḅenị inyina.’ Kparipẹ ghụn aḅẹm mọ: Itughemhị bidị “ooko oomo araraạr phọ mị atọ bọ iḅenị inyina.” Orue odaphạn oroma phọ opọ phọ mem dị yira rotughemhị oye Baibul, pọ i/wạ moḍighi butughemhiạ bịn, kuolọ omhaạr ogbạ ghan oḅenhị bidị ilọ oḍighi. (Iiḍighi 8:31) Eeghe kụ iḍighi kụ ewạ bọ ni oḍighi iduọn phọ?

4. Kaạph amaaniọm ipẹ yira kotue bọ otughemhị oye ilọ ooko itọ phọ aKraist.

⁴ “Ooko” itọ remạ ghan odạph itọ phọ. Omhiịn eḍeenhaan ilọ ipẹ  yira kotue bọ otughemhị oye, ooko obobọ odạph itọ phọ aKraist. Esi omaạm, ika kụ idị oye dị ratughemhị ghan we oghiilhom amoto, ratughemhị ghan opọ odị ratughemhị bọ ilọ odạph iilhogh eten phọ? Odị rapụr ghan karolhomhị oye phọ ude, atughemhị iilhogh eten phọ. Toroboiperolbọ, orue otughemhị odị ilọ odaphạn iilhogh phọ ipẹ phọ, odị ragbatạn ghan ni enhọn edạ. Odị radạph ghan ni opọ odị ratughemhị bọ kaḍigh eten, kokạr ophogh nyodị, oḅilhẹ oḍeenhaan ilọ osighẹ oḍighinhom ipẹ odị matuughạ bọ. Eeghe iyaạr kụ edị eḍeenhaan phọ ephẹn phọ itughemhị iyira?

5. (a) Odaphạn Jọn 14:15 r’1 Jọn 2:3, eeghe kụ edị ewạ mọ otughemhị buphẹ yira rotughemhị ghan bọ Baibul phọ? (b) Mạ reḍeenhaan idị yira kotue ooḅakị buphẹ yira rotughemhị ghan bọ Baibul phọ.

⁵ Mem dị yira rotughemhị we Baibul phọ, yira rotughemhị ghan bidị ipẹ Enhaạn rawạ bọ mọ oḍighi. Kuolọ yira omoọgh oḍighi idị epelhom siphẹ. Yira omoọgh otughemhị abidị ilọ osighẹ oḍighinhom ipẹ bidị rotuughạ bọ siphẹ adọl aghuḍum mọ abidị. (Bạl Jọn 14:15; 1 Jọn 2:3.) Eḍeenhaan phọ ayira ketue ni etughemhị aani opọ yira rotughemhị ghan bọ, ilọ osighẹ asinhị iilhogh aBaibul phọ kụ oḍighinhom epẹ otu askul phọ, otu oḍighi, obobọ mem dị razaamhiạn loor r’abunhọn. Yira otue ni okaạph oḅenhị bidị ilọ amem dị odạph asinhị iilhogh aBaibul phọ ighoph iyira esighẹ esi iiḅaghamhị, obobọ ilhoghonhaạn iyira ḍighaạgh osopha ogey osopha. Mem dị yira odi r’abidị, yira otue ni ooḅereghị olọm aZihova masighẹ uwaloor iigbia phọ aaḅakiọm bidị.—Jọn 16:13.

6. Otughemhị abunhọn ilọ ooko itọ phọ aZizọs, eḅaramaạm eeghe?

⁶ Otughemhị abunhọn ilọ ooko itọ phọ aZizọs, eḅaramaạm eeghe? Eḅaramaạm olhoghonhaạn aḍighaạgh buphẹ yira rotughemhị ghan bọ, omhoọgh eephuạ oḍighi aani awe bumatuạn. Abunhiin abuphẹ yira rotughemhị ghan bọ, otue ni omoọgh oghiilhaan oghị oghaạph iiḅi iinhaghạn phọ. Kụ iḍighi kụ, ewạ mọ omhoọgh ghan okparạm mem dị yira rongọ bidị iromhoghiom dị enụm enụm kebughẹ onhaghạn aḍughụm mọ abidị, eḅọgh ekpom mọ abidị, eḅilhẹ enyu bidị oḍighi iyaạr omiteom. Eeghe kụ idị yira kotue oḍighi, olhoghonhaạn aḍighaạgh buphẹ yira rotughemhị ghan bọ Baibul phọ, omhoọgh eephuạ oghị oghaạph aani iiḅi iinhaghạn phọ?

7. Ika kụ idị yira kotue ologhonhaạn ḍighaạgh oye dị yira rotughemhị ghan omhoọgh eephuạ oghaạph aani iiḅi iinhaghạn phọ?

⁷ Yira otue ni opuru opọ yira rotughemhị ghan bọ Baibul phọ sipuru phọ iphẹn: “Ika kụ idị osighẹ oḍighinhom itughemhị aBaibul phọ, menhighemhị dọl aghuḍum mọ anạ? Nạ ragbi mọ enighẹ ni dị abunhọn konaghạn aani dom mọ aḍiẹn phọ ḍughụm? Nạ kaḍighi ika kụ aloghonhaạn aani bidị ḍighaạgh?” (Prov. 3:27; Mat. 9:37, 38) Ḍeenhaan opọ nạ ratughemhị ghan bọ sitrạkt phọ ipẹ edi aani bọ siphẹ Igbe Araraạr Osighẹ Otughemhiọm Mọ Ayira, kụ aḅenhị mọ odị asaḅạr ilọ keḅeraạn siya odị, righirị odị, obobọ buọ otu oḍighi abidị. Ngọ ni iboom asitrạkt phọ iphẹn phọ. Ḍighi ni aḍeenhaan nyodị sighalhanyạ phọ odị katue bọ asighẹ aḍighinhom ongoọm ghan asitrạkt phọ. Kụ mem dị momạ nyodị oḍighi okaaphọm dị k”oḍiiny muụm, miịn ni mọ nạ atelhean ghan r’odị pidị odị atuughạ aani esi anạ.—Eccl. 4:9, 10; Luk 6:40.

8. Eeghe kụ iḍighi kụ emhạn bọ ni maạr dị abuphẹ yira rotughemhị ghan bọ komoọgh ephomhoghiạn dị ekpạr okị esi Enhaạn ḅilhẹ r’amatuman? (Miịn igbe phọ “ Idị Kotue Ologhonhaạn Ḍighaạgh Buphẹ Yira Rotughemhị Ghan Bọ Obughẹ Ephomhoghiạn Phọ Abidị Esi Enhaạn.”)

⁸ Legheri mọ aZizọs uḅenhị iyira otughemhị aani abunhọn ilọ “ooko oomo araraạr phọ” odị atọ bọ uḅenhị iyira. Kụ iphẹn phọ eḅaramaạm iyạl phọ ikaraghị igbogh iilhogh phọ—ephomhoghiạn Enhaạn ḅilhẹ r’amatuman. Ephomhoghiạn Enhaạn ḅilhẹ r’amatuman emoọgh muḅọph r’oghaạph iiḅi iinhaghạn phọ ḅilhẹ r’oḍighi awe bumatuạn. (Mat. 22:37-39) Ika? Loor esi dị, ekpanhạ iyaạr phọ renyu ghan bọ oye ophinhom aani  abin oḍighi iphelhegbeel phọ pọ ephomhoghiạn—iduọn phọ pọ ephomhoghiạn phọ yira omhoọgh bọ oghị esi Enhaạn r’amatuman phọ ayira kụ rinyu ghan bọ iyira oghị ogbạ ikpo onhụ phọ. Ii, ibadị abuphẹ yira rotughemhị ghan bọ Baibul phọ otue ni okiilhaan oghị oghaạph aani iiḅi iinhaghạn phọ. Kuolọ, yira kotue ni ongọ bidị okuphom owol mọ r’olhoghonhaạn aḍighaạgh aZihova mọ enụm enụm bidị kotue ni okpạr opu oghiilhaan awe. (Ps. 18:1-3; Prov. 29:25) Igbe phọ edi bọ siẹn emhuoghaạph phọ ephẹn phọ egoolhạ radạ dị yira kogbariọn orue olhoghonhaạn aḍighaạgh buphẹ yira rotughemhị ghan bọ Baibul phọ, obughẹ ephomhoghiạn phọ bidị omhoọgh bọ oghị esi Enhaạn. Oḅarạm isiẹn, eeghe iyaạr kụ edị ookpomhoghan phọ kotue oḍighi olhoghonhaạn aḍighaạgh bumhoom abumatuạn, obughẹ ephomhoghiạn phọ abidị?

9. Siẹn oghaạph omaaniọm mọ ophọn, ighẹn areten kụ idị opọ rotughemhị bọ kakị ghisigh atuughạ iphigh araraạr?

⁹ Ḅilhẹ aatughiạn ilọ oghaạph omaaniọm oye phọ opọ ratuughạ bọ ilọ oghiilhom amoto phọ. Ighẹn areten kụ edị opọ rotughemhị bọ kakiọm ghisigh ituughạ phọ odị, mem dị maḍigh eten kụ otughemhiạ phọ odi oogaạny odị? Esi onhaghanhạn ghan otughemhiạ phọ odị, ḅilhẹ r’omhaạr ophogh ghan abunhọn dị omhiigha loor kụ rokiilhom. Esi omaạm, otughemhiạ phọ atue ni amạ aḍeenhaan okiilhom dị amhiigha loor bịn angọ eepoogh mọ onhọn amoto aḍigh ghisigh odị. Obobọ otughemhiạ phọ atue ni amạ aḍeenhaan okiilhom dị aghomhe itozị amoto phọ odị pidị abunhọn abukiilhom omhiịn aani eten. Areḍeenhaan phọ ipẹ phọ ketughemhị ni opọ rotughemhị bọ iphigh araraạr dị odị katue ni asighẹ aḍighinhom aani mem dị odị rakiil eten.

10. Eeghe kụ keloghonhaạn ḍighaạgh oye dị rotughemhị ghan Baibul phọ oḍighi aani onyọ amatuạn?

¹⁰ Iniin phọ kẹn ni, oye dị ratuughạ ghan Baibul phọ kụ mamhiigh orelhe aani eten aghuḍum mọ ka/tuughạ ghan esi otughemhiạ phọ odị bịn, kuolọ katuughạ kẹn esi imạ areḍeenhaan abueriphọ arebenhẹ phọ aZihova. Esi iduọn phọ, eeghe kụ kekạr etue eloghonhaạn ḍighaạgh buphẹ yira rotughemhị ghan bọ Baibul phọ ophoph oghị aghisigh siẹn igey phọ? Oru aani ghan ituughạ. Eeghe kụ iḍighi? Araghaạph aBaibul phọ rongọ ghan bọ epẹ otu ituughạ phọ kebughẹ olhegheri iyaạr phọ abidi, ekparamhị omheeraam mọ abidị, eḅilhẹ eloghonhaạn bidị ḍighaạgh okuamhị ophomhoghiạn Enhaạn. (Iiḍighi 15:30-32) Ḅilhẹ kẹn, epẹ otu ituughạ phọ otughemhiạ phọ kaḍeenhaan ni nyodị bumor r’abumarani dị osoman aani ghan iniin phọ asidọl phọ odị asoman bọ. Ighẹn areḍeenhaan ephomhoghiạn aKristẹn kụ edị opọ rotughemhị ghan bọ Baibul phọ katue amiịn siphẹ ookpomhoghan phọ? Ooḅeghiọn reḍeenhaan phọ edaphạn bọ siẹn.

11. Eeghe areḍeenhaan kụ edị oye dị rotughemhị ghan Baibul phọ katue amiịn siphẹ ookpomhoghan phọ, kụ ika kụ idị ipẹ phọ ketue etir nyodị?

¹¹ Anhịr dị rotughemhị ghan Baibul phọ dị oginha odị bịn kụ rapạm ghan ibạm anmụny phọ odị, amhiịn onyọ umarani dị asoman aani ḍiniin phọ adọl phọ. Iḅọgh ni ekpom odị omhiịn ikuph phọ onyọ umarani phọ alhọgh bọ osi isiphẹ aKindọm Họl phọ r’iphurukpu ibạm anmụny phọ. Oye dị rotughemhị ghan Baibul phọ dị akparaghạ ghan owilhẹ ipughọl asigret, aazuanhaan ni onyọ umor dị asoman aani ghan iniin phọ ipaanhaạn phọ kụ makpạr apu. Onyọ umor phọ aghaạph ni aḅenhị opọ rotughemhị ghan bọ Baibul phọ mọ idiphọ ephomhoghiạn phọ odị amhoọgh bọ aghị esi Enhaạn rebụgh bọ bịn enyu nyodị odạph itọ phọ Enhaạn. (2 Kọr. 7:1; Fil. 4:13) Ikparamhị ni nyodị mem mọ onyọ umor phọ aghaạph bọ ilọ odị aḅenhị nyodị. Odị amheeraam ni r’okuphom owol mọ odị katue ni abilhẹ ipughọl asigret phọ mem mọ onyọ umor phọ aḅenhị bọ nyodị mọ, “Nạ katue ni abilhẹ aani ipughọl asigret phọ.” Oḍoọgh onyanhị dị rotughemhị ghan Baibul phọ amhiịn ni oḍoọgh onyọ umarani dị rakelhọm ghuḍum idiphọ onyọ Ogbaanhaạn. Idiphọ opọ rotughemhị ghan bọ Baibul phọ amhiịn bọ dọl oḅaạl olhoghi oḍoọgh onyọ umarani phọ, inyu nyodị olhegheri obughẹ  iyaạr phọ eḍighi bọ kụ onyọ umarani phọ ramoọgh ghan bọ oḅaạl olhoghi oomo amem.

12. Eeghe kụ iḍighi kụ yira kotue bọ ni oḅẹm mọ torobọ oye siẹn ookpomhoghan phọ amoọgh aani ni oḍighi, olhoghonhaạn aḍighaạgh buphẹ yira rotughemhị ghan bọ Baibul phọ?

¹² Mem dị opọ rotughemhị ghan bọ Baibul phọ alhegheri ibadị abukaaphọm dị okpẹ oḍuomolhoghi, areḍeenhaan phọ abidị ketughemhị ni nyodị okạr iyaạr phọ remạ ghan bọ ophomhoghiạn Enhaạn r’amatuman. (Jọn 13:35; 1 Tim. 4:12) Kụ iduọn mokaram bọ ni epẹ omhạn, opọ rotughemhị ghan bọ Baibul phọ katue ni atuughạ aani iyaạr esi areḍeenhaan abukaaphọm dị mokpạr ri opu iniin ipaanhaạn dị odị asoman. Opọ rotughemhị bọ Baibul phọ kamiịn reḍeenhaan phọ abidị kụ alegheri mọ odị katue ni anmia aani orue oḍighi onyọ amatuạn aKraist. (Deut. 30:11) Torobọ oye siphẹ ookpomhoghan phọ katue ni aḍighi aani iyaạr, olhoghonhaạn aḍighaạgh buphẹ rotughemhị ghan bọ Baibul phọ ophoph oghị aghisigh. (Mat. 5:16) Eeghe ikuph kụ edị nạ r’aloor ralọgh ghan, olhoghonhaạn aḍighaạgh we dị rotughemhị ghan Baibul phọ dị oru aani ituughạ?

13-14. AZizọs azoọm ghan ika bumatuạn phọ odị mem dị bidị oḅonyonhu ozuan?

¹³ Yira kotue ni ologhonhaạn ḍighaạgh bumor r’abumarani phọ ayira abuphẹ moophoọm bọ oḅilhẹ omhiigh ophinhom aani abin rukumuan oḍighi awe bumatuạn phọ. Eten phọ epẹ aZizọs azoọm ghan bọ butelhedom odị lọ oḅonyonhu ozuan, iḍeenhaan iyira ipẹ ewạ bọ dị yira koḍighi aani iniin phọ ḍio arodon.

¹⁴ Mem mọ aZizọs mamhạn bọ rukumuan phọ odị siẹn ade, kụ meteẹny bọ dị kokiigh nyodị, “oomo abumatuạn phọ owilẹ nyodị osumughu.” (Mạk 14:50; Jọn 16:32) AZizọs azoọm ika bumatuạn phọ odị mem mọ bidị odugh bọ esi ekulha amem? Oḅeton bọ nyodị, i/bia bịn odị aghị aḅenhị bumatuạn phọ odị mọ: “Ke/kiilaan. Ikị eḅenị bumor phọ amị [mọ muḅeton imhị].” (Mat. 28:10a) AZizọs o/ḅitonhaạn bumatuạn phọ odị. Ghalhamọ r’iduọn bidị oḅitonhaạn bọ ni nyodị, odị amhạgh ni bidị mọ “bumor” amhị. Idiphọ aZihova, aZizọs amhoọgh igbiririph r’osạr owilhenhaạn ghan.—2 Ki. 13:23.

15. Yira rologhoma ghan ika ilọ abuphẹ phọ mowilhẹ bọ omite ghan epẹ erugh phọ?

¹⁵ Iniin phọ kẹn ni, yira omoọgh ni ogbolhomaam okị esi abuphẹ mowilhẹ bọ omite ghan epẹ erugh phọ. Bidị abumor r’abumarani ayira, kụ yira opomhoghiạn ni bidị! Yira ko/bilhẹ ni ootughiạn arukumuan ephomhoghiạn phọ bidị okumuan ghan bọ mem dị eten—buniin eeni ukumuan ni esi ibadị asiạ. (Hib. 6:10) Inyaam abidị edi ni! (Luk 15:4-7) Ighẹn areten kụ edị yira kotue otuughaạny Zizọs oḍeenhaan aani abidị ogbolhomaam?

16. Ika kụ idị yira kotue oḍeenhaan ogbolhomaam buphẹ moophoọm bọ?

¹⁶ Maghạm bidị r’eenyuụm oru aani ituughạ. Eniin eten dị aZizọs akparamhị butelhedom mọ oḅonyonhu bọ ozuan pọ omhạgh abidị ookpomhoghi. (Mat. 28:10b; 1 Kọr. 15:6) Iniin phọ kẹn ni ḍio arodon, yira otue ni omạgh aani buphẹ moophoọm bọ oru ituughạ eḍighi maạr dị ro/tu ghan. Eeni amem yira komạgh ni ikaika amem kụ ogbi omhegheron. Iikia i/lo, iḅaạl li olhoghi aZizọs mem mọ abutelhedom mọ omhegheron bọ oghị esi aḍimhạgh phọ odị.—Poghom Matiu 28:16 r’aLuk 15:6.

17. Ewạ mọ yira ozọ ika mem dị oye dị maaphoọm aru ituughạ?

¹⁷ Mạgh bidị mọ nyinha mesi r’oomo olhoghi. AZizọs aḍighi ni idị abutelhedom mọ odị omhoọgh ibo mem mọ bidị oru bọ oteẹny nyodị; odị kụ aphụr amhiighom oghaaphạn abidị. (Mat. 28:18) Yira koḍighi ika mem dị oye dị maaphoọm aru aḍigh siẹn aKindọm Họl phọ? Okem ghan oghị omhạgh nyodị r’eenyuụm mọ nạ masi. Eeni yira otue ni opụr ologhoma mọ yira ko/legheri iyaạr oghaạph. Kuolọ orue oḍighi idị odị ka/loghoma umugholoor, yira otue ni oḅenhị nyodị mọ olhoghi ayira aḅaạl agey omhiịn odị.

18. Ika kụ idị yira kotue okpoomhị oḅio abuphẹ moophoọm bọ?

 ¹⁸ Kpoomhị oḅio abidị. Eeni abutelhedom mọ aZizọs umhoọgh ni oghiilhaan ilọ ipẹ kokaạph bọ oghaạph iiḅi iinhaghạn phọ oleenye oomo isiẹn aḅirinhi phọ. AZizọs akpoomhị ni oḅio abidị esi oḅenhị abidị mọ: “mị odianaan ni r’anyina, ḍio etum ḍio.” (Mat. 28:20) Ipẹ phọ ilhọgh ni ḍighaạgh ḍughụm? Ii. Bidị omhiigh bọ, “u/soph ghan ḍio otughemị r’oghaạph ghan” iiḅi iinhaghạn phọ. (Iiḍighi 5:42) Ewạ kẹn ni dị kokpoomhị oḅio abukaaphọm dị moophoọm. Loor esi dị bidị otue ni omoọgh oghiilhaan oḅilhẹ omite epẹ erugh phọ. Yira kotue ni ongọ bidị okuphom owol mọ ogina abidị kụ ko/kị. Mem lọ bidị monyạ, yira otue ni otelhe r’abidị epẹ erugh phọ. Kụ iikia i/lo, bidị kosereghiạn ni olhoghonhaạn aḍighaạgh phọ ayira mem lọ bidị oḅilhẹ omhiigh oghaạph iiḅi iinhaghạn phọ. Mem dị yira osighẹ buphẹ moophoọm bọ idiphọ abumor r’abumarani ayira, ketue ni ekọm imạ engọ ookpomhoghan phọ ayira.

19. Yira osopha oḍighi eeghe r’oomo olhoghi, kụ eeghe kụ iḍighi?

¹⁹ Yira kokiọm ghisigh rukumuan oḍighi awe bumatuạn phọ kapụr amem? Tutụ eteẹny eekunha aḅirinhi phọ ophọn phọ. (Mat. 28:20; miịn Glossary, “Conclusion of the system of things.”) Yira kotue ni opamanạm rukumuan oḍighi awe bumatuạn phọ k’amem mọ amuphẹ phọ ḍughụm? Yira osopha ni oḍighi iduọn phọ! Yira oḅaạl li olhoghi rolọgh ghan mem, inyaạm, ḅilhẹ r’asipenị ayira, owạ “abuphẹ Enaạn mesaḅạr bọ omoọgh aghuḍum k’agee-pọ.” (Iiḍighi 13:48) Mem lọ yira oḍighi iduọn phọ, pọ yira rodạph ghan eḍeenhaan phọ aZizọs. Odị aḅẹm mọ: “Eḍien amị, oḍighi ghan oḍighi opọ urom bọ imị r’omadạn oḍighi phọ odị.” (Jọn 4:34; 17:4) Ipẹ kụ idị yira rowạ oḍighi aani. Yira rowạ ni omhạn oḍighi phọ moḅọgh bọ ungọ iyira. (Jọn 20:21) Kụ yira rowạ ni mọ abunhọn, eḅaramaạm buphẹ moophoọm bọ, oru ni ophinhom aani bin oḍighi phọ ophọn phọ.—Mat. 24:13.

20. Odaphạn Filipai 4:13, uḍighi ika kụ yira kotue bọ ni omunenhi oḍighi phọ ophọn aZizọs ungọ bọ iyira?

²⁰ Okạr oghaạph, ipaanhaạn edi ni omhunhenhi ogbogh oḍighi phọ ophọn aZizọs aḅọgh bọ ungọ iyira. Toroboiperolbọ, ogina ayira bịn kụ ko/ḍighi oḍighi phọ ophọn phọ. AZizọs aguanhaan mọ odị katọl li r’ayira. Yira opamanạm rukumuan oḍighi awe bumatuạn phọ idiphọ awe dị “oḅọph oḍighi rokumu kongọ Enaạn” ḅilhẹ r’idiphọ “abuọ aKraist.” (1 Kọr. 3:9; 2 Kọr. 2:17) Esi iduọn phọ, yira kotue ni omunenhi oḍighi phọ. P’eeghe emạ eepoogh dị yira omhoọgh ophinhom aani abin oḍighi phọ ophọn phọ, ḅilhẹ r’olhoghonhaạn abunhọn ḍighaạgh oḍighi aani igina phọ!—Bạl Filipai 4:13.