1. Ma lubbe ki Matayo 28:18-20, cik ango ma Yecu omiyo?

I NGEYE ma kicero Yecu ki i kin jo muto, en onen bot lupwo-nnyene ma onongo gucokke i Galilaya. En onongo tye ki lok mo ma pire tek ma mito waco botgi. Man onongo obedo lok ango? Lokke man tye nonge i Matayo 28:18-20.​—Kwan.

2. Lapeny ango ma wabinyamogi i pwony man?

² Cik ma Yecu omiyo me loko dano wek gudok lulub kore gudu lutic pa Lubanga ducu i kare-ni. Pi meno, kong dong wanyamu lapeny adek ma kwako tic man ma Yecu ominiwa. Mukwongo, gin ango mukene ma myero watim mapat ki pwonyo lulub kor Kricito manyen gin ma Lubanga mito ki botgi? Me aryo, lutit kwena ducu me kacokke gitwero konyo latin kwan me Baibul me dongo i yo me cwiny nining? Me adek, watwero konyo lutit kwena ma ticgi okwe woko me cako nywako odoco i tic me loko dano me doko lulub kor Kricito nining?

3. Tira ango ma Yecu omiyo i kare ma tye ka miyo cikke?

³ Cik ma Yecu omiyo niang iye yot. Myero wapwony dano jami ma en ociko. Kadi bed kit meno, wiwa myero pe owil ki tira mo ma pire tek adada i lokke meno. Yecu pe owaco ni: ‘Wupwonygi gin ducu ma dong atyeko cikowu kwede.’ Me ka meno, en owaco ni: Wupwonygi “me gwoko gin ducu ma dong atyeko cikowu kwede.” Wek waket lok meno kikome i tic ka watye ka pwonyo latin kwan me Baibul, omyero wapwonye  ngo ma myero en otim ki kit me timone bene. (Tic 8:31) Pingo myero watim kit meno?

4. Tyen lokke ngo me gwoko cik? Mi lapor.

⁴ Ka kiwaco ni “gwoko” cik moni, nongo kitye ka waco ni lubo cik meno. Lapor ma lubo-ni twero konyowa me niang gin ma watwero timone wek wapwony ngat moni me gwoko nyo lubo jami ma Yecu ociko. Ngat ma pwonyo dano ki dwoyo mutoka mono konyo lutino kwanne nining me gwoko cik ma kwako tic ki gudi? Me acel, lapwony pwonyo lutino kwanne ki cik ma myero gulubi kun nongo gitye i kilaci. Ento, wek lutino kwanne guniang kit me lubo cik magi, en myero otim gin mukene. En myero ocit kacel kwedgi ka dwoyo mutoka i dye gudi wek onen kit ma gilubo kwede jami ma gupwonyo. Gin ango ma watwero pwonyo ki i lapor man?

5. (a) Ma lubbe ki Jon 14:15 ki 1 Jon 2:3, gin ango ma myero wapwony lutino kwanwa me Baibul me timone? (b) Mi labol me nyutu kit ma watwero konyo kwede lutino kwanwa.

⁵ Ka wakwano Baibul ki jo mukene, wapwonyogi gin ma Lubanga mito ki botwa. Ento omyero watim makato. Omyero wapwony lutino kwanwa me Baibul me keto i tic i kwogi me nino ducu jami ma gupwonyo. (Kwan Jon 14:15; 1 Jon 2:3.) Ki i lanenwa, watwero nyuto bot lutino kwanwa kit ma gitwero lubo kwede cik ma igi lac me Baibul i cukul, i dog tic, nyo ka gitye ka namo. Watwero tittigi gin mo ma otimme i komwa i kare mukato angec ma twero nyutigi kit ma keto i tic tira me Baibul okonyowa me moko tam ma atir. Ka watye kacel ki lutino kwanwa, watwero lega bot Jehovah wek okonygi ki cwiny maleng wek gumok tam ma atir.​—Jon 16:13.

6. Gin ango mukene ma omyero watim ka watye ka pwonyo jo mukene me gwoko cik pa Yecu?

⁶ Gin ango mukene ma kubbe ki pwonyo jo mukene wek gugwok cik pa Yecu? Myero wakony lutino kwanwa me Baibul wek gudong miti me konyo jo mukene doko lulub kor Kricito. Pi lutino kwan mukene, tic me tito kwena twero kelo botgi lworo adada. Pi man, omyero wadi cwinywa ka watye ka pwonyogi jami ma dongo niangogi, gudo cwinygi, dok weko gibedo ki miti me cako tito kwena. Yo mene ma watwero tic kwede me konyo lutino kwanwa me Baibul me dongo mitigi me nywako kwena maber ki jo mukene?

7. Watwero konyo lutino kwanwa me Baibul nining wek gudong miti me tito kwena bot jo mukene?

⁷ Watwero penyo lutino kwanwa me Baibul ki lapeny calo magi: “Keto i tic gin ma Baibul pwonyo oloko kwoni odoko maber nining? Tika itamo ni jo mukene bene myero guwiny kwena man? Ngo ma itwero timone me konyogi?” (Car. 3:27; Mat. 9:37, 38) Nyut ki latin kwanni trak mapatpat ma tye i kin Jami Ticwa ma Pigi Tego me Pwony dok iwek en oyer mene ma en tamo ni twero gudo cwiny wadine, lureme, nyo lutic luwote. Mi bote trak magi mapatpat. Wuromo poro kit me miyo trak magi wek ipwonye kit me miyone ki diro. Ngene kene ni, ka latin kwanwa me Baibul odoko latit kwena ma peya onongo batija, wabimito ni wabed ka tito kwena kacel kwede wek wakonye.​—Latit. 4:9, 10; Luka 6:40.

8. Pingo pire tek ni lutino kwanwa me Baibul gudong mar matek pi Lubanga kacel ki pi jo mukene? (Nen bene bok ma wiye tye ni “ Kit me Konyo Lutino Kwanwa Wek Gudong Mar Matek pi Lubanga.”)

⁸ Wi opo ni Yecu ocikowa me pwonyo jo mukene “me gwoko gin ducu” ma en ociko. Ngene kene ni gin ducu ma en ociko tye iye cik me maro Lubanga ki maro luwotwa​—ma man kubbe ki ticwa me pwony ki loko  dano me doko lulub kor Kricito. (Mat. 22:37-39) Man kubbe nining? Tyen lok ma pire tek mumiyo watito kwena aye mar​—marwa pi Lubanga ki marwa pi dano luwotwa. Pe tye me ur ni, pi lutino kwan mukene, tam i kom nywako i tic man me tito kwena twero keligi lworo matek. Ento watwero cuko cwiny lutino kwan magi ni ki kony pa Jehovah motmot gibiloyo lworo ma gitye kwede i kom dano. (Jab. 18:1-3; Car. 29:25) Bok ma tye i pot karatac 4 tito kore ki kore jami ma myero watim wek wakony latin kwanwa me Baibul me dongo marre pi Lubanga. Medo i kom meno, gin ango ma kacokke twero timo me konyo latit kwena manyen wek onyut mar?

9. I yo ma nining ma latin kwan ma tye ka dwoyo mutoka-ni woto ki pwonyo jami ma pigi tego?

⁹ Tam kong dok i kom lapor pa latin kwan ma tye ka pwonyo dwoyo mutoka-ni. Ka en tye ka dwoyo mutoka i dye gudi ma lapwonye obedo cok kwede, jami ango ma latin kwan-ni woto ki pwonyone? En pwonyo jami ki winyo lok pa lapwonye ki bene neno ludwo mutoka mukene ma ludiro. Me labolle, lapwonye twero cimo ladwo mutoka mo ma oye ni ngat mukene odony i nyimme. Nyo en romo cimo ladwo mutoka ma onyuto woro kun dwoko dero mac mutokane weko pe ocar wang dano tutwal. Labol ma kit man pwonyo latin kwan jami mapol ma pigi tego ma en twero tic kwede ka tye ka dwoyo mutoka.

10. Gin ango ma twero konyo latin kwan me Baibul me dongo i yo me cwiny?

¹⁰ I yo acel-lu, latin kwan me Baibul ma ocako tic pi Jehovah pe nongo pwony ki bot lapwonye keken ento bene ki i lanen maber pa lutic pa Jehovah mukene. Dong, gin ango ma bikonyo lutino kwan me Baibul me dongo i yo me cwiny? Bedo tye i cokke pa Lukricitayo. Pingo tye kit meno? Jami ma giwinyo ki i cokke bikonyogi me nongo pwony mapol, jingo niyegi dok konyogi me dongo margi pi Lubanga. (Tic 15:30-32) Medo i kom meno, lapwony pa latin kwan twero nyute bot omege ki lumege ma kwogi bene cal ki mege. Labol ango me mar pa Lukricitayo ma latin kwan twero nenone i kacokke? Tam kong i kom lapor magi.

11. Labol ango ma latin kwan me Baibul twero nenone i kacokke, dok man twero gudo latin kwan nining?

¹¹ Latin kwan mo me Baibul ma obedo lanywal ma tye kene oneno laminwa mo ma tye i kwo marom ki mege. Man ogudo cwiny latin kwan-ni adada me neno kit ma lamego-ni tute kwede me bino i Ot me Ker ki lutinone matino. Latin kwan ma tye ka tute me juko mato taa omako lirem ki latit kwena ma bene oyelle ki peko acel-li ci oloyo. Latit kwena-ni owaco ki latin kwan-ni kit ma marre pi Jehovah otugo cwinye me lubo cik pa Lubanga. (2 Kor. 7:1; 2 Kor. 4:7) I nge winyo gin mutimme i kwo pa latit kwena-ni, latin kwan-ni obedo ki tekcwiny i kare ma omego-ni ocuko cwinye ni, “In bene itwero wekone.” Nyako mo ma tye latin kwan me Baibul oneno laminwa mo matidi tye ka nongo mit pa kwo macalo Lacaden. I kare ma latin kwan-ni oneno yomcwiny pa laminwa matidi-ni, en obedo ki miti me niang pingo laminwa-ni kare ducu nongo cwinye yom.

12. Pingo watwero waco ni ngat acel acel me kacokke tye ki tic me konyo lutino kwan me Baibul?

¹² Ka latin kwan me Baibul ocako ngeyo lutit kwena mapatpat, latin kwan nongo pwony ki i labolgi ka odok i kom lubo cik pa Kricito me maro Lubanga kacel ki luwotwa. (Jon 13:35; 1 Tem. 4:12) Dok kit ma waneno kwede con, latin kwan me Baibul twero nongo pwony ki i labol pa lutit kwena ma gukato ki i ariya macal ki ma en bene tye ka kato  ki iye. Latin kwan nongo pwony ki i labol magi, ni en bene etwero timo alokaloka ma mitte me doko lalub kor Kricito. (Nwo. 30:11) Ngat acel acel ma i kacokke twero konyo latin kwan me Baibul i yo mapol wek en odong i yo me cwiny. (Mat. 5:16) Gin ango ma itwero tute me timone wek ikony lutino kwan ma gibino i cokke?

13-14. Yecu otero lukwenane ma cwinygi otur nining?

¹³ Watye ki miti me konyo omegiwa ki lumegiwa ma ticgi okwe woko wek gucak tito kwena odoco dok gulok dano me doko lulub kor Kricito. Kit ma Yecu otero kwede lukwenane ma cwinygi otur nyutiwa gin ma watwero timo i kare-ni.

¹⁴ Ma odong kare manok ma peya kineko Yecu, lukwenane “ducu guringo woko, guweke odong kene.” (Mar. 14:50; Jon 16:32) Gin ango ma Yecu otimo i kare ma onongo lukwenane cwinygi otur? Kare manok keken i nge cerre, Yecu otito ki lulub kore mukene ni: “Pe wulwor; wuciti wutit bot utmegina ni [kicera woko].” (Mat. 28:10a) Yecu pe oilo cinge woko i kom lukwenane. Kadi bed ni onongo guringo guweke woko, en pud olwongogi ni “utmegina.” Calo Jehovah, Yecu bene lakica.​—2 Luker 13:23.

15. Wawinyo nining i kom utmegiwa ma gujuko tito kwena woko?

¹⁵ I yo acel-lu, wan bene waparo pi utmegiwa ma gujuko tito kwena woko. Gin pud gitye omegiwa ki lumegiwa, dok wamarogi adada! Wiwa pud po i kom tic matek ma omege ki lumege magi gutimo pi Jehovah​—jo mogo i kingi ma ticgi okwe woko gutiyo pi mwaki mapol adada. (Ibru 6:10) Waparogi adada! (Luka 15:4-7) Ka walubo lanen pa Yecu, i yo ma nining ma watwero nyuto kwede ni waparo pi utmegiwa magi?

16. Wanyuto ni waparo pi omegiwa ki lumegiwa ma ticgi okwe woko nining?

¹⁶ Lwonggi ki mwolo me bino i cokke. Yo acel mukene ma Yecu ocuko kwede cwiny lukwenane ma cwinygi otur aye ki lwongogi me bino i cokke. (Mat. 28:10b; 1 Kor. 15:6) I yo acel-lu bene, i kare-ni watwero cuko cwiny jo ma ticgi okwe woko me bino i cokke ka inen pe gitye ka timo meno. Wangeyo bene ni twero mitte ni walwonggi tyen mapol ma nongo peya gujolo lwongowa meno. Labongo akalakala mo, cwiny Yecu obedo yom adada i kare ma lupwonnyene gujolo lwongone.​—Por ki Matayo 28:16, Luka 15:6.

17. Myero water ngat ma ticce okwe woko nining ka obino i cokke?

¹⁷ Jolgi ki yomcwiny. Yecu oweko lupwonnyene guwinyo agonya i kare ma gurwatte kwede. En pe okuro ni gin gubin bote ento en aye ocito botgi dok oloko kwedgi. (Mat. 28:18) Myero wadok iye nining ka ngat ma ticce okwe woko obino i Ot me Ker? Myero wakwany kare me jole ki yomcwiny. I acakkine, watwero bedo ka paro ni pe wabingeyo gin ma waromo wacone bote. Ento labongo timo gin mo ma lano dano-ni, watwero tite kit ma cwinywa yom kwede me nene.

18. Watwero cuko cwiny lutit kwena ma ticgi okwe woko nining?

¹⁸ Cuk cwinygi. Lupwonnye pa Yecu nen calo gutamo ni pe gibitwero tito kwena i wi lobo-ni ducu. Yecu ocuko cwiny lulub kore ki waco botgi ni: “Atye kwedwu kare ducu, nio i agikki piny.” (Mat. 28:20) Tika lokke man okonyo lulub kore? Ada, okonyogi. Ma pe ori, onongo gitye ka tic matek me “pwonyo dano ki tito lok me kwena maber.” (Tic 5:42) Lutit kwena ma ticgi okwe woko bene gimito  cuko cwiny. Gitwero bedo ki lworo me cako tito kwena odoco. Watwero cuko cwinygi ni pe gibicito ka tito kwena kengi. Ka gitye atera me wot ka tito kwena, watwero wot kacel kwedgi. Labongo akalakala mo, gibibedo ki pwoc pi kony ma waminigi ka giwoto ki cako tito kwena odoco. Ka wanyuto ki jo ma ticgi okwe woko ni wanenogi calo omege ki lumege, ci man twero tugo cwinygi me cako tic pi Jehovah odoco, dok cwiny jo ma i kacokke bene bedo yom.

19. Mitiwa tye me timo gin ango, dok pingo?

¹⁹ Pi kare ma rom mene ma myero watit kwena dok walok dano me doko lulub kor Kricito? Pi kare ducu, nio wa i agikki piny. (Mat. 28:20) Tika wabitwero tito kwena ki loko dano me doko lulub kor Yecu? Wabitwero dok wamoko tamwa me timo kit meno! Ki yomcwiny madit, watiyo ki cawawa, kerowa, kacel ki centewa me nongo “jo ducu ma myero gunong kwo ma pe tum.” (Tic 13:48) Ka watimo kit man, ci nongo watye ka lubo lanen pa Yecu. En otito ni: “Camma en tiyo gin ma ngat ma oora mito, ki cobo ticce.” (Jon 4:34; 17:4) Man aye obedo miti pa wan ducu. Watye ki miti me cobo tic ma kiminiwa. (Jon 20:21) Dok watye ki miti ni jo ducu, kadi wa jo ma ticgi okwe woko, bene gucir kacel kwedwa nio wa i agikki.​—Mat. 24:13.

20. Ma lubbe ki 2 Jo Korint 4:7, pingo watwero cobo tic ma Yecu ominiwa?

²⁰ Ngene kene ni, pe yot me timo tic man ma Yecu ominiwa ni watim. Kadi bed kit meno, pe watye ka tiyo tic man kenwa. Yecu ocikke ni ebibedo kwedwa. Ka watye ka tiyo tic man me loko dano, nongo “wan lutic kacel ki Lubanga” dok ‘watito lok kacel ki Kricito,’ pi meno, Jehovah ki Yecu gikonyowa me tiyo tic man. (1 Kor. 3:9; 2 Kor. 2:17) Man oweko watwero cobone. Pud dong obedo mot madit ya me tiyo tic man ki konyo jo mukene me timo meno bene!​—Kwan 2 Jo Korint 4:7.