1. Sɔ koɖo Matie 28:18-20 ɖe, edɔ ci Yesu dɔ yi nukplaviwoɔ?

CI YESU fɔn so kuɔ, édasɛ yiɖeki nɔ yi nukplavi ciwo yí bɔ le Galile. Enyɔ vevi ɖeka le shi ejikɔ anu nɔ wo. Nyɔ ci yɔɔ? Yi nyɔ lɔwo le Matie 28:18-20 mɛ.—Hlin.

2. Nyɔbiɔse ciwo yí mìakpɔ ɖoŋci nɔɔ?

² Ese ci Yesu do mɔ, wo le yi ɖo nukplaviwo kan Mawu sɛntɔ ɖekpokpui le egbɛmɛ hɛnnɛ. Eyi taɖo, mína mìakpɔ nyɔbiɔse amɛtɔn ciwo yí kudo edɔ cɛ ci Yesu ɖo nɔ mì nu. Ŋkɔtɔ, to akpo nɔ Mawu sewo kplakpla nukplavi yoyuwo ɖe, nyi mìɖo agbewaɔ? Amɛvetɔ, lé eŋɛnywidratɔ ciwo pleŋ yí le hamɛ lɔ mɛ atɛnŋ ana Bibla nukplaviwo ashin doji le gbɔngbɔnmɛ doɔ? Amɛtɔntɔ, lé mìawɛ akpedo mìwo kpena xɔsetɔ ciwo yí mi kunuɖegbe yiyi nu nɔ woagbevatɔ nukplaviwowawadɔ lɔ keɔ?

3. Mɔdasɛ vevi ciwo yí Yesu na do yi se lɔ mɛɔ?

³ Yesu mɔdasɛ lɔwo mɛ kɔ petii. Enu ciwo yí emɔ mìwo le waɔ, wowo yí mìɖo akpla amɛwo. Ele ahan gan, mìdeɖo aŋlɔbe nyɔ vevi cɛ o. Yesu denu mɔ: ‘Mí kpla wo enu ciwo pleŋ yí Ŋ dɔnɔ mí’ o. Vɔ nyɔ ci enu yí nyi mɔ: Mí kpla enu wo “nɔ wo a wanɔ do enu ciwo pleŋ yí Ŋ dɔnɔ mí ji.” Gbɔxwe mìawa do mɔdasɛnamɛ vevi cɛ ji nɔ mìkplakɔ Bibla koɖo mɛɖeɔ, denyi enu ci woawa ɖekɛ yí mìakpla wo o, vɔ mìagbekpla lé woawa do wo ji. (Edɔ. 8:31) Nyi yí taɖo enyi ahan ɔ?

4. Na kpɔwɛ ci yí dasɛ lé woatɛnŋ akpedo mɛɖe nu nɔ awa do ese ɖe ji do.

 ⁴ Lé mìawɛ akpedo mɛɖe nu nɔ awa do enu ciwo Kristo dɔ mì jiɔ? Kpɔwɛ ci yí gbɔgbɔ atɛnŋ akpedo mì nu yí mìanya enu ci mìɖo awa. Lé mɛ ci yí kplakɔ ehunkuku mɛbuwo atɛnŋ akpla wo nɔ woawa do mɔzɔnzɔn sewo ji doɔ? Doŋkɔ le sukluxɔ mɛɔ, axwetɔ lɔ kplanɔ mɔzɔnzɔn se ciwo ji dɔkplavi lɔ awa do. Ele ahan gan, gbɔxwe akpla dɔkplavi lɔ lé awa do ese lɔwo ji doɔ, éɖo agbewa nubu. Éɖo anɔ dɔkplavi lɔ gbɔ hwenu akplakɔ ehun lɔ kuku le mɔ ji keŋ adadasɛ lé awa do enu ciwo yí ekpla ji. Nyi mìatɛnŋ akpla so kpɔwɛ cɛ mɛɔ?

5. (a) Sɔ koɖo Ӡan 14:15 koɖo 1 Ӡan 2:3 ɖe, nyi mìɖo akpla mìwo Bibla nukplaviwo mɔ wo le waɔ? (b) Emɔdasɛnamɛ ci hanwo mìatɛnŋ ana mìwo nukplaviwoɔ?

⁵ Nɔ mìkplakɔ Bibla koɖo amɛwoɔ, mìkplanɔ enu ci Mawu ji so mì shi wo. Vɔ mìɖo awa nu wu ahan. Mìɖo akpla mìwo Bibla nukplaviwo nɔ woawanɔ do enu ciwo yí wokpla ji le wowo gbenɔnɔ mɛ ŋkeŋke. (Hlɛn Ӡan 14:15; 1 Ӡan 2:3.) To mìwo nuwanawo jiɔ, mìatɛnŋ adasɛ lé mìwo nukplaviwo atɛnŋ awa do Bibla gɔnmɛɖosewo ji nɔ wole suklu, dɔmɛ alo nɔ womukɔ munu. Mìatɛnŋ anu ŋɖe ci yí jɔ do mì ji le agbemɛ keŋ asɔ dasɛ lé wawa do Bibla mɔdasɛnamɛwo ji glɔnnɔ ta nɔ mì alo lé ekpenɔdo mì nu yí mìsɔnɔ gbeta nywiwo do. Nɔ mìle mìwo nukplaviwo gbɔɔ, mìatɛnŋ ado gbe ɖaɖa nɔ Yehowa mɔ, yɛ le sɔ yi gbɔngbɔn kɔkɔɛ lɔ dasɛ mɔ nɔ wo.—Ӡan 16:13.

6. Nyi hanwo mìawa yí anyi mìkplakɔ nu mɛbuwo nɔ woawa do Yesu sewo jiɔ?

⁶ Nyi hanwo mìawa yí anyi mìkplakɔ nu mɛbuwo nɔ woawa do Yesu sewo jiɔ? Mìɖo akpedo mìwo Bibla nukplaviwo nu nɔ woaji veviɖe mɔ yewoaɖo nukplaviwo hɛnnɛ. Nukplavi ɖewo tɛnŋ vɔnkɔ nɔ kunuɖeɖe. Eyi taɖo mìɖo ado ӡinxo nɔ mìkpekɔdo wo nu nɔ woamɔŋje Bibla mɛ nyɔnɔnwiwo mɛ nywiɖe, ecɛ awa dɔ do wowo ji ji yí acucu wo nɔ woatɔ kunu ɖeɖe. Mɔnu ci mìatɛnŋ azan yí asɔ kpedo mìwo nukplaviwo nu nɔ woaji veviɖe mɔ, yewoadra eŋɛnywi lɔ nɔ mɛbuwoɔ?

7. Lé mìawɛ akpedo nukplavi ɖe nu nɔ aji veviɖe mɔ yeadra eŋɛnywi lɔ nɔ mɛbuwoɔ?

⁷ Mìatɛnŋ abiɔ nyɔ ɖewo mìwo Bibla nukplaviwo se, shigbe ecɛwo nɛ: “Ci èxɔ Fyɔɖuxu ŋɛdu lɔ ɖe, lé ena ao gbenɔnɔ nyɔ doji doɔ? Ci èkpɔɛ ɖe, mɛbuwo ӡan ŋɛdu cɛa? Lé àwɛ akpedo wo nuɔ?” (Elo. 3:27; Mt. 9:37, 38) Dasɛ trakti ciwo yí le mìwo Nukplakpla dɔwanu dakavi lɔ mɛ nɔ nukplavi lɔ yí anu ni nɔ asɔ ciwo yí ekpɔ mɔ woajɔ ji nɔ ye xomumɛtɔwo, ye xlɔwo, alo ye dɔmɛkpenawo. Na trakti sugbɔ nukplavi lɔ. Wa wadasɛ ɖe keŋ asɔ dre lé atɛnŋ ana trakti lɔwo koɖo vividodoamɛnu. Le nyɔnɔnwi mɛɔ, nɔ mìwo nukplavi je yí nyi eŋɛnywidratɔ mawaӡinӡindoshimɛɔ, mìɖo aɖe kunu koɖi keŋ akpedo nu.—Ŋun. 4:9, 10; Luiki 6:40.

8. Nyi yí taɖo ele veviɖe mɔ mìwo nukplaviwo aɖo lɔnlɔn sɛnŋsɛnŋ nɔ Mawu koɖo wowo kpenawoɔ? (Kpɔ dakavi ci yí nyi “ Lé mìakpedo mìwo Bibla nukplaviwo nu do nɔ woaɖo lɔnlɔn cito nɔ Mawu.”)

⁸ Le nɔ susumɛ nɔ eo mɔ, Yesu do se nɔ mì mɔ mìwo le kpla nu mɛbuwo nɔ “wo a wanɔ do enu ciwo pleŋ” yedɔ mì ji. Kankandojitɔɔ, ese amɛve ciwo yí nyi mɔ, mìalɔn Mawu yí alɔn mìwo kpena can le mɛ. Ese cɛwo ca ka koɖo eŋɛnywidradra  koɖo nukplaviwowawadɔ lɔ. (Mt. 22:37-39) Nyi yí nyi ekacaca lɔɔ? Eyi nyi mɔ, nɔ éɖo lɔnlɔn sɛnŋ nɔ Mawu koɖo yi kpenaɔ, eyi acucui yí adra eŋɛnywi lɔ. Le nyɔnɔnwi mɛɔ, eŋɛnywi lɔ dradra atɛnŋ aɖyi vɔnvɔn nɔ nukplavi ɖewo. Vɔ mìatɛnŋ ana kankandoji nukplavi cɛwo mɔ, to Yehowa kpekpedonu mɛɔ, woatɛnŋ aɖu vɔnvɔn nɔ agbetɔ ji vivivi. (Eha. 18:1-3; Elo. 29:25) Dakavi ci yí zɔn koɖo nyɔta lɔ dre afɔɖeɖe ciwo ji mìazɔn do keŋ akpedo mìwo nukplaviwo nu nɔ lɔnlɔn ci woɖo nɔ Mawu asɛnŋ doji. Gbesɔ kpe ni ɖe, nyi hamɛ lɔ atɛnŋ awa keŋ asɔ kpedo nukplavi yoyuwo nu nɔ woayi ŋkɔ doji le lɔnlɔn dadasɛ mɛɔ?

9. Le ehunkplavi kpɔwɛ lɔ mɛ ɖe, lé dɔkplavi lɔ wɛ yí kpla enuveviwoɔ?

⁹ Gbebu tamɛ kpɔ so ehunkplavi kpɔwɛ lɔ nu. Nɔ dɔkplavi kukɔ hun lɔ le mɔ ji yí yi xwetɔ le axa ni ɖe, lé awɛ akpla hun lɔ kukuɔ? Áɖonɔ to yi xwetɔ yí agbelenɔ ŋkuvi do mɛ ciwo yí wa ɖaŋ kukɔ hun nu. Le kpɔwɛ mɛ, yi xwetɔ lɔ tɛnŋ dasɛ ehunkutɔ ɖe ci yí wa ɖaŋ na mɔ ehunkutɔ bu nɔ ayi ŋkɔ ni. Alo étɛnŋ dasɛ ehunkutɔ ɖe nɔ dɔkplavi lɔ nɔ akpɔ lé ebubɔ ezo ɖaɖa gɔnmɛ nɔ ŋgbedo aya nɔ ehunkutɔ ci yí gbɔgbɔ o. Kpɔwɛ cɛwo akpla enuveviwo dɔkplavi lɔ yí atɛnŋ azan wo nɔ éle hun kukɔ.

10. Nyi yí akpedo Bibla nukplavi ɖe nu yí awa ŋkɔyiyi le gbɔngbɔnmɛɔ?

¹⁰ Ahanke nɔ Bibla nukplavi ɖe tɔ agbe mɔ lɔ ji zɔnzɔn ɔ, denyi yi nukplamɛtɔ ɖekɛ gbɔ akpla nu le o, vɔ agbekpla nu so Yehowa sɛntɔ buwo kpɔwɛ nywiwo mɛ. Eyi taɖo, nyi yí akpedo Bibla nukplaviwo nu sugbɔ yí woawa ŋkɔyiyi le gbɔngbɔnmɛɔ? Eyi nyi mìwo Kristotɔwo bɔbɔwo yiyi. Nyi yí taɖo enyi ahan ɔ? Bibla mɛ nukplamu ciwo wonanɔ le bɔbɔ lɔwo akpedo wo nu yí woagbenya enu sugbɔ kpi, ado ŋsɛn wowo xɔse yí ana lɔnlɔn ci woɖo nɔ Mawu asɛnŋ doji. (Edɔ. 15:30-32) Gbesɔ kpe niɔ, nɔvi ci yí kplakɔ Bibla koɖo nukplavi lɔ atɛnŋ adasɛ nɔviŋsu koɖo nɔvinyɔnu ciwo yí tokɔ yi nɔnɔmɛ lɔ hanwo mɛ ni le bɔbɔ. Kristotɔwo lɔnlɔn kpɔwɛ nywi ciwo nukplavi lɔ atɛnŋ akpɔ le hamɛ lɔ mɛɔ? Bu tamɛ kpɔ so kpɔwɛ ci yí gbɔgbɔ nu.

11. Kpɔwɛ ciwo nukplavi ɖe atɛnŋ akpɔ le hamɛ lɔ mɛɔ, yí ŋsɛn ci woatɛnŋ akpɔ do jiɔ?

¹¹ Nyɔnu ɖeka ci yí nyi Bibla nukplavi yí hɛnkɔ eviɛwo yiɖekɛ kpɔ nɔvinyɔnu Kristotɔ ɖeka ci yí le yi nɔnɔmɛ lɔ han mɛ. Ci nukplavi lɔ kpɔ agbla gangan ci nɔvinyɔnu lɔ je gbɔxwe yí vanɔ Fyɔɖuxuxɔ mɛ koɖo eviɛ hwɛhwɛwoɔ, ewa dɔ do yi ji ji. Nukplavi ɖeka ci yí ɖɔkɔŋ mɔ yeami shiga yɔyɔ dogo koɖo eŋɛnywidratɔ ɖeka ci yí tɛnŋ mi shiga yɔyɔ vayi. Eŋɛnywidratɔ lɔ nu lé lɔnlɔn sɛnŋ ci yiŋtɔ ɖo nɔ Yehowa cucui yí ewa do Mawu sewo ji nɔ nukplavi lɔ. (2 Kor. 4:7; 7:1) Ci nukplavi lɔ se eŋɛnywidratɔ lɔ nyɔwo ɖegbɔ yí eŋɛnywidratɔ lɔ nu ni mɔ mɔ, “eɔ can àtɛnŋ amiɔ,” edo ŋsɛn yi. Nyɔnuvi ɖeka ci yí nyi Bibla nukplavi do jeshi mɔ, nɔvinyɔnu jajɛ Kunuɖetɔ ɖeka kpɔnɔ jijɔ le agbemɛ. Ci Bibla nukplavi lɔ do jeshi lé nɔvinyɔnu jajɛ lɔ kpɔnɔ jijɔ doɔ, éji mɔ yeakpla nu sugbɔ so enu ci yí taɖo nɔvinyɔnu lɔ kpɔnɔ jijɔ gbɛmɛ nu.

12. Nyi yí taɖo mìatɛnŋ anu mɔ mɛshiamɛ ci yí le hamɛ lɔ mɛ atɛnŋ awa ŋɖe asɔ kpedo Bibla nukplaviwo nuɔ?

¹² Nɔ Bibla nukplavi ɖe va jeshi eŋɛnywidratɔ egbejinɔtɔ vovovowoɔ, átɛnŋ akpɔ wowo kpɔwɛ yí anya lé awa do Kristo se ci yí mɔ woalɔn Mawu koɖo amɛkpena ji. (Ӡan 13:35; 1 Tim. 4:12) Gbesɔ kpe  niɔ, shigbe lé mìnui vayi nɛɔ, Bibla nukplavi ɖe atɛnŋ akpla nu so eŋɛnywidratɔ ciwo yí to cukaɖa ciwo han mɛ etokɔ mɛ. Wowo kpɔwɛ lɔwo ana nukplavi lɔ ado jeshi mɔ, yeatɛnŋ awa trɔtrɔ ciwo yí ӡan keŋ avanyi Kristo nukplavi. (2 Ese. 30:11) Mɛshiamɛ ci yí le hamɛ lɔ mɛ atɛnŋ awa ŋɖe asɔ kpedo Bibla nukplaviwo nu nɔ woayi ŋkɔ le gbɔngbɔnmɛ. (Mt. 5:16) Agbla ciwo yí èjenɔ mɔ yeado ŋsɛn Bibla nukplavi ciwo yí va bɔbɔɔ?

13-14. Lé Yesu wa nu do apotru lɔwo nu ci wogbɔjɔɔ?

¹³ Mìji mɔ mìakpedo mìwo nɔviŋsu koɖo mìwo nɔvinyɔnu ciwo yí mi kunuɖegbe yiyi nu nɔ woagbetɔ wawa do Kristo se ci yí mɔ wo le ɖo nukplaviwo ji. Lé Yesu wa nu do yi apotru ciwo yí le ŋshinshin mɛ dasɛ enu ci mìatɛnŋ awa le egbɛmɛ.

¹⁴ Le vɔvɔnu nɔ Yesu sumɔsumɔdɔ lɔ le nyigban ji hwenu yi ku gogoɔ, apotru lɔwo pleŋ “shi gbiɖi ɖɛ.” (Maki 14:50; Ӡan 16:32) Lé Yesu wa nu do apotru lɔwo nu ci wogbɔjɔ na nɔ hwenu ɖeɔ? Ci efɔn so kuɔ, énu nɔ yi dokplɔtɔ ɖewo mɔ: “Mí ŋgbe vɔn o. Mí soyì nu nɔ nɔvinyɛwo mɔ [wofɔnŋ so ku].” (Mt. 28:10a) Apotru lɔwo nu decikɔ nɔ Yesu o. Ci woso gbeɖi ɖɛ can ɔ, égbekpɔtɔ yɔnɔ wo mɔ “nɔvinyɛwo.” Shigbe Yehowa nɛɔ, Yesu kpɔnɔ dɔnusui nɔ amɛ yí gbesɔ nu kenɔ amɛ.—2 Efy. 13:23.

15. Lé mìsenɔ le mìwoɖekiwo mɛ kudo mɛ ciwo yí mi kunuɖegbe yiyi nuɔ?

¹⁵ Ahanke mìsɔnɔ ɖe le ji veviɖe nɔ mɛ ciwo mi kunuɖegbe yiyi nɛ. Mìwo nɔviŋsu koɖo nɔvinyɔnuwo yí wonyi yí mìlɔn wo! Mìgbekpɔtɔ ɖokɔ ŋwi lɔnlɔn dɔ ciwo mìwo kpena xɔsetɔ cɛwo wa vayi. Taŋfuin ɖewo sɔ exwe nɛniɖe wa dɔ sɛnsinɖe vayi. (Ebre. 6:10) Wowo kpɔkpɔ drokɔ mì! (Luiki 15:4-7) Shigbe Yesu nɛ ɖe, emɔ ciwo ji mìatɛnŋ adasɛ le mɔ mìsɔ ɖe le ji nɔ woɔ?

16. Lé mìatɛnŋ adasɛ nɔ mɛ ciwo yí mi bɔbɔwo mɔ mìsɔ ɖe le ji nɔ woɔ?

¹⁶ Do vivi do wo nu keŋ ayɔ wo nɔ bɔbɔ. Emɔ ɖeka ci ji Yesu to yí do ŋsɛn yi apotru ciwo yí gbɔjɔ yí nyi mɔ, éyɔ wo nɔ bɔbɔ ɖeka. (Mt. 28:10b; 1 Kor. 15:6) Ahanke le egbɛmɛɔ, mìatɛnŋ ado ŋsɛn mɛ ciwo yí gbɔjɔ nɔ woagbetɔ bɔbɔwo yiyi. Mìnya mɔ eӡan mɔ mìayɔ wo zenɛniɖe gbɔxwe woalɔn ava. Kankandojitɔɔ, ajɔ ji nɔ Yesu ci apotru yi tɔwo lɔn do amɛyɔyɔ yitɔ ji hwenɔnu.—Sɔ sɔ koɖo Matie 28:16 koɖo Luiki 15:6.

17. Lé mìawa nu do nɔ nɔviŋsu alo nɔvinyɔnu ci yí mi bɔbɔwo sa va Fyɔɖuxuxɔ mɛɔ?

¹⁷ Do wozɔn nɔ wo koɖo jijɔ. Yesu na yi nukplaviwo vo le wowoɖekiwo mɛ ci edo go koɖo wo. Édo wozɔn nɔ wo yí xo nuxu koɖo wo. (Mt. 28:18) Lé mìawa nu do nɔ mɛ ci yí mi bɔbɔwo sa va Fyɔɖuxuxɔ mɛɔ? Mìɖo agbosɔɛ yí asɔ jijɔ do ozɔn ni. Do ŋkɔɔ, mìtɛnŋ vɔn mɔ mìdenya nyɔ ci mìanu ni o. Vɔ nɔ mìdado ŋkpɛn yiɔ, mìatɛnŋ anu ni kpoŋ mɔ, eji jɔ mì ci mìkpɔɛ.

18. Lé mìatɛnŋ ado ŋsɛn eŋɛnywidratɔ ciwo mi kunuɖegbe yiyi doɔ?

¹⁸ Do ŋsɛn wo so jimɛ. Yesu nukplaviwo tɛnŋ kpɔɛ mɔ yewodatɛnŋ aɖe kunu to xexeɛ pleŋ mɛ o. Yesu do ŋsɛn yi dokplɔtɔwo ci enu nɔ wo mɔ: “Enyɛ ɔ, Na nɔ̀ koɖo mí tɛgbɛɛ.” (Mt. 28:20) Yi nyɔ lɔ kpedo wo nua? Ɛɛ. Dejinjin o “wokplakɔ enu amɛwo mamimami yí le eŋɛnywi lɔ nukɔ nɔ wo.” (Edɔ. 5:42, NWT) Eŋɛnywidratɔ ciwo yí mi kunuɖegbe yiyi  can ӡan ŋsɛndoamu. Wotɛnŋ vɔnkɔ nɔ kunuɖegbe yiyi ke. Mìatɛnŋ ado ŋsɛn wo mɔ denyi wowoɖekɛ yí jikɔ aɖe kunu o. Nɔ wosɔgbeɔ, mìatɛnŋ akplɔ wo yi kunuɖegbe. Kankandojitɔɔ, kpekpedonu ci mìana wo yí woagbetɔ kunuɖegbe yiyi ajɔ ji nɔ wo. Nɔ mìwanɔ nu do mɛ ciwo yí mi bɔbɔwo koɖo kunuɖegbe yiyi nu nywiɖe yí kpɔnɔ wo shigbe mìwo nɔviŋsu koɖo nɔvinyɔnuwo nɛɔ, ana woasɛnŋ yí eji ajɔ mɛshiamɛ le hamɛ lɔ mɛ.

19. Nyi yí mìji so jimɛɔ, yí nyi yí taɖoɔ?

¹⁹ Hwenu yí mìadra ŋɛnywi lɔ yí aɖo nukplaviwo sɛn ɔ? Keke ava ɖo xexe vwin cɛ vɔvɔnu. (Mt. 28:20) Mìasun ji awanɔ do Yesu se cɛ ji keke aɖo hwenɔnua? Mìɖui gligaan mɔ mìawɛ ahan! Mìsɔ jijɔ zannɔ mìwo gamɛ, ŋsɛn koɖo mìwo nuwo yí sɔ jinɔ “mɛ ciwo shi yí eji nɔnɔmɛ nywi le nɔ agbe mavɔ kpɔkpɔ.” (Edɔ. 13:48, NWT) Nɔ mìwɛni ahan ɔ, anyi mìsrankɔ Yesu kpɔwɛ. Énu mɔ: “Anyi nuɖuɖu nyi mɔ Ma wa edro amɛ ci yí dɔ Ŋ ɖaɖa tɔ [yí] a wunu nɔ Yi dɔ.” (Ӡan 4:34; 17:4) Eyi ke yí mìwo can mìji so jimɛ. Mìji mɔ mìaɖegbɔ edɔ ci woɖo nɔ mì. (Ӡan 20:21) Yí mìji mɔ mɛbuwo koɖo mɛ ciwo yí mi kunuɖegbe yiyi can awa dɔ cɛ koɖo mì yi vɔvɔnu.—Mt. 24:13.

20. Sɔ koɖo 2 Korɛntitɔwo 4:7 ɖe, nyi yí taɖo mìatɛnŋ awa edɔ ci Yesu dɔ mìɔ?

²⁰ Le nyɔnɔnwi mɛɔ, wawa do Yesu se lɔ ji defa o. Ele ahan gan, denyi mìwoɖekɛ yí wakɔ dɔ lɔ o. Yesu ɖo gbe mɔ yeanɔ koɖo mì. Mìwakɔ nukplaviwowawadɔ lɔ, ɖo mìwanɔ “dɔ koɖo Mawu” “le Kristo mɛ.” (1 Kor. 3:9; 2 Kor. 2:17) Susu cɛ yí taɖo mìatɛnŋ awa dɔ lɔ. Mɔnukpɔkpɔ koɖo jijɔ enyi nɔ mì mɔ mìawa edɔ ci wodɔ mì yí akpedo mɛbuwo nu yí wowo can awɛ!—Hlɛn 2 Korɛntitɔwo 4:7.