1. Nimakere ku Matayo 28:18-20, Yesu ung’olo lembang’o ni Julub pare?

KINDE ma Yesu ucer, edok enyuthere ni julub pare saa ma gicokiri i Galilaya. Ebino ku lembe moko ma pire tek lee m’emito eyer igi. Ubino lembang’o? Lembene nwang’ere i Matayo 28:18-20.​—Som.

2. Wabidwoko wang’ penji makani i thiwiwec maeni?

² Cik ma Yesu umio ni Julub pare nia giketh dhanu udok julub, utie bende ni jurutic pa Mungu ceke ma tin. Dong’ wakewecu iwi penji adek m’ujengere iwi tic maeno ma Yesu mio iwa. Mikwong’o, m’uweko ponjo julub ma nyen ku lembe ma Mungu ubekwayu i bang’gi, lembang’o mange ma wacikara nitimo? Mir ario, jurwey lembanyong’a ceke mi cokiri gicopo diko cing’gi nenedi i kum mediri mi tipo pa japonj Biblia? Mir adek, wacopo konyo umego ku nyimego mwa ma gikwio i thenge mi tipo nenedi kara gicak rweyo lembanyong’a kendo?

3. Lemang’ola pa Yesu uketho i ie wec ma kani ma pire tek?

³ Yesu mio lembang’ola ma kamaleng’, ukwayu waponj dhanu ku lembang’olane. Pieno, mito ngo wiwa uwil ku lembe ma pire tek ma e: Yesu yero ngo nia, ‘wuponjgi ku gin ceke m’ang’olo iwu.’ Ento eyero nia: wuponjgi “ya giwor gin ceke m’ang’olo iwu.” Kara wawor lembang’ola maeno kinde ma wabeponjo dhanu, ukwayu ngo waponjgi aponja kende, ento wanyuth igi bende kite ma gicopo tio ko ku lembe ma giponjone. (Tic. 8:31) Pirang’o ukwayu watim kumeno?

4. Niworo cik thelembene tie ang’o? Ke mii lapor moko.

 ⁴ ‘Niworo’ cik thelembene tie nitio ku cikne. Pi ninyang’ i kite ma wacopo ponjo ko ng’atini niworo cik pa Kristu, wakewec iwi lapor moko. Ng’atu m’ubeponjo dhanu ku ringo mutukari copo timo ang’o kara dhanu m’ebeponjo ging’ei cik mi ringo ku mutukari? Mi kwong’o ukwayu ekelar eponjgi ku woro cik mi ringo ku mutukari. Re lembe mange de nuti m’ukwayu etim: ukwayu etel wigi gicidh kugi karacelo man eketh gitii ku gin ma giponjone. Waromo nwang’u ponji ma kani i kum lapor maeno?

5. (a) Nimakere ku Yohana 14:15; man 1 Yohana 2:3, wacikara niponjo ng’atu ma waponjo kude Biblia nia etim ang’o? (b) Kenyuth ayi moko ma wacopo konyo ko ng’atu ma wabeponjo kude Biblia.

⁵ Ka wabeponjo Biblia ku ng’atini, waponje ku lembe ma Mungu ubekwayu watim. Re ukwayu ngo wajik keno kende. Wacikara niponje bende nia etii ku gin m’ebeponjone i kwo pare ma kubang’ ceng’. (Som Yohana 14:15; 1 Yohana 2:3.) Nikadhu kud i lapor mwa, wacopo nyutho ire kite m’ecopo tio ko ku cik mir ukungu mi Biblia i kalasi, i tic, kunoke i saa mi nambu. Wacopo koro ire bende kite ma tio ku telowic mi Biblia ugam ukonyo kowa nimaku yub ma cuu kinde ma wabino nwang’ara i wang’ lembe moko ma tek. I saa ma wabedo karacelo ku ng’atu ma waponjo kude Biblia, wacopo kwayu Yehova utel wie ku tipo pare ma leng’.​—Yoh. 16:13.

6. Niponjo jumange giwor lembang’ola pa Yesu uketho i ie lembang’o?

⁶ Niponjo jumange giwor lembang’ola pa Yesu uketho i ie lembang’o? Ukwayu wakony ju ma waponjo kugi Biblia kara gibed kud ava mi doko jurwei lembanyong’a. Juponj Biblia moko copo bedo ku lworo mi doko jurwei lembanyong’a, pieno ukwayu wabed weg cirocir kinde ma wabekonyogi ni nyang’ cu i lemandha mi Biblia kara yioyic migi udok tek. Eno bimulo adundegi man ebicwalugi kara gin bende gidok jurwei lembanyong’a. Wacopo timo ang’o kara wakonygi gibed kud ava mi nyutho lembe ma gibeponjo ni jumange?

7. Wacopo konyo ng’atu ma waponjo kude Biblia nenedi kara ebed kud ava mi rweyo lembanyong’a?

⁷ Wacopo penjo ju ma waponjo kugi Biblia ku kit penji ma e: “Niai m’icaku tio ku lembe m’ibeponjo i Biblia, inwang’u alokaloka ma kani i kwo peri? Iparu nenedi, nyo jumange de gitie ku yeny mi winjo lembe maeni? Icopo konyogi ke nenedi?” (Rie. 3:27; Mat. 9:37, 38) Nyuth ire trakt moko ma nwang’ere i sanduku mwa mi jamtic mi ponjo Biblia ku dhanu man wek eng’ii acel m’enwang’u nia copo telo nen mi wedi pare, mi jurimbe man mi jurutic wadi. Mii ire kit trakt ma tung’ tung’, man wutim kude lanyuth iwi kite m’eromo mio ko traktne ku bodho ni jumange. Ka ng’atu ma waponjo kude Biblia udoko jarwei lembanyong’a ma fodi ulimo ngo, ukwayu wabed warwei kude lembanyong’a pi nikonye.​—Ekl. 4:9, 10; Lk. 6:40.

8. Pirang’o pire tie tek nia japonj Biblia umar Mungu lee man bende dhanu mange? (Nen bende sanduku “ Kony japonj Biblia kara mer m’emaru ko Mungu umedere.”)

⁸ Poi nia Yesu ung’olo ya waponj jumange “giwor gin ceke” m’eng’olo iwa. Wec maeno uketho i ie lembang’ola ario ma pigi tek: Nimaru Mungu man nimaru bende dhanu wadwa. Lembe ario maeno ceke utie ku winjiri ku tic mi rweyo lembanyong’a man mi ketho dhanu udok julub. (Mat. 22:37-39) Nenedi? Gin ma kwong’a ma cwaluwa nirweyo lembanyong’a, utie mer ma wamaru ko Mungu man dhanu wadwa. Ni juponj Biblia moko, nicirweyo lembanyong’a ni dhanu, copo bedo lembe ma nyayu lworo i igi. Wacopo tego cwinygi nia ku kony pa Yehova, nok nok gibivoyo lworo maeno.  (Zab. 18:1-3; Rie. 29:25) Sanduku mi thiwiwec maeni ukoro lembe ma tung’ tung’ ma japonj Biblia copo timo kara mer m’emaru ko Mungu umedere ameda. Dong’ cokiri ke copo konyo japonj Biblia nenedi kara emedere ninyutho mer?

9. Ng’atu m’ubeponjo ringo ku mutukari copo nwang’u ponji mange ma pigi tek i ayi makani?

⁹ Wakedok kendo iwi lapor pa ng’atu m’ubeponjo niringo ku mutukari. Kan eberingo ma japonji pare ubedo i ng’ete, eno copo ketho enwang’u ponji mange dupa; pilembe nwang’u ebewinjo gin ma japonji pare ubenyutho man ebeneno kilili kite ma jumange uberingo ko mutakari. Ku lapor, japonji pare copo nyutho ire kite ma jaring’ mutukari moko uleng’o ko yo kara jumange ukadhi, kunoke ecopo nyutho ire kite ma jaring mutukari moko m’ubebino i wang’gi ujwigo ko wang’ mac mi mutukari pare kara kud ucar wang’ juring’ mutukari mange. Lembuno copo konyo ng’atu m’ubeponjo ringo ku mutukari ning’eyo lembe m’eromo timo kinde m’eberingo ku mutukari.

10. Ang’o ma bikonyo japonj Biblia nitimo mediri lee i thenge mi tipo?

¹⁰ Japonj Biblia m’ucaku betimo ni Yehova bende nwang’u ngo ponji i bang’ japonji pare kende, ento i lapor mabeco mi jurutic pa Yehova mange de. Ang’o ma copo konye nitimo mediri lee i thenge mi tipo? Tie nicidho i coko. Pirang’o wayero kumeno? Pilembe gin m’ebiwinjo i coko bikonye nimedo ng’eyong’ec pare, nitielo yioyic pare man bikonye kara mer m’emaru ko Mungu umedere. (Tic. 15:30-32) Bende i coko, japonji pare binyuthe ni umego ku nyimego mange ma saa moko gin bende gigam ginwang’iri ku lembe marom ku m’ebenwang’ere ko. Ebiwok neno bende mer mandha m’umego ku nyimego gibenyutho i cokiri. Wakewec kawoni iwi lapor m’ulubo.

11. Lapor ma kani ma tung’ tung’ ma japonj Biblia copo neno i cokiri, man eno copo bedo ku matoke ma kani i wie?

¹¹ Japonj Biblia moko ma won ot pare mbe m’ubetungo nyatin pare kende, uneno nyamego mwa moko ma en de ebetungo awiya pare kende. Kinde ma japonj Biblia uneno kero ma nyamegone ubetimo pi nibino i coko karacelo kud awiya pare ma thindho, lembene umulo adundene lee. Japonj Biblia mange m’ubetimo kero niweko madhu taba ung’eyere kud umego moko m’ugam uweko bende madhu taba. Umegone ukoro ire kite ma mer m’emaru ko Yehova ugam ucwale niworo cik pa Mungu. (2 Kor. 7:1; Flp. 4:13) Kinde ma japonj Biblia uwinjo kpawa m’umego eno ukoro ire, lembene uketho cwinye udoko tek kinde m’umegone uwacu ire kumae: “In de icopo weko m’adhu taba.” Nyaku moko m’ubeponjo Biblia uneno nyamego mwa moko m’aradu m’ubekwo kud anyong’a pilembe etie Jamulembe pa Yehova. Anyong’a m’eneno i bang’ nyamego mwa uketho emito ekeng’ei gin m’uketho saa ceke nyamegwa utie kud anyong’a.

12. Pirang’o wacopo yero nia ng’atuman m’ikindwa copo konyo japonj Biblia nitimo mediri i theng’e mi tipo?

¹² Ka japonj Biblia ung’eyo umego ku nyimego ma tung’ tung’ i cokiri, enwang’u lapor ma beco i bang’gi iwi kite m’ecopo woro ko lembang’ola ma Kristu ung’olo nia wamar Mungu man bende dhanu wadwa. (Yoh. 13:35; 1 Tim. 4:12) Man m’usagu zoo, calu ma walar wayero, japonj Biblia copo nwang’u ponji dupa i bang’ umego ku nyimego ma givoyo kit peko ma rom ma en bende ebenwang’ere ko. Lapor migi copo konye nineno nia karaman en de eromo timo alokaloka m’ukwayere pi nidoko jalub pa Kristu. (Poi. 30:11) I cokiri, ng’atuman acel acel m’i kindwa copo konyo japonj Biblia i yo ma tung’ tung’ kara etim mediri i thenge mi tipo. (Mat. 5:16) Dong’ in  icukutimo ang’o pi nikethocwiny juponj Biblia m’ubino i coko?

13-14. Yesu utimo ang’o kinde ma cwiny jukwenda pare utur?

¹³ Wamito wakony umego ku nyimego mwa ma gikwio i tipo kara gicak kendo nitimo tic mi rweyo lembanyong’a man mi ketho dhanu udok julub. Dong’ wacopo konyogi nendi? Wakenen kite ma Yesu ugam ukonyo ko jukwenda pare kinde ma cwinygi utur.

¹⁴ Kinde ma Yesu utundo i ajiki mi tic pare iwi ng’om, ceng’ini i wang’ tho pare, jukwenda pare “ceke giweke [man] giringo.” (Mk. 14:50; Yoh. 16:32) Yesu utimo ang’o saa ma cwiny jukwenda utur? Nyanok i ng’eye, kinde m’ecer, eyero ni julub pare kumae: “Kud wulwor: wucidh wuyer ni utumira ya [acer].” (Mat. 28:10a) Cwiny Yesu utur ungo i kum jukwenda pare. Kadok giweke de, re asu elwong’ogi nia “utumira.” Calu Yehova, Yesu de utimo kisa man eweko racu mi jumange.​—2 Ub. 13:23.

15. Wawinjara nenedi pi ju ma giweko rweyo lembanyong’a?

¹⁵ Wan bende wabedieng’ lee pi ju ma gikwio i tipo man giweko nirweyo lembanyong’a. Gitie umego ku nyimego mwa man wamarugi asu. Fodi asu wabepoi i kum tic migi ma tek mi mer ma gitimo ni Yehova. Jumoko m’i kindgi utimo tije pi oro ma dupa. (Ebr. 6:10) Andha avagi ubenegowa lee! (Lk. 15:4-7) Calu Yesu, wacopo nyutho nenedi nia wabedieng’ pigi?

16. Wacopo nyutho nenedi nia wabedieng’ pir umego ku nyimego mwa ma gikwio i tipo?

¹⁶ Lwong’gi kud amora gibin i coko. Yo acel ma Yesu ugam ukonyo ko jukwenda pare kinde ma cwinygi utur, ubino nilwong’ogi i coko. (Mat. 28:10b; 1 Kor. 15:6) Wan bende yo ma wacopo konyo ko umego ku nyimego mwa ma gikwio i tipo utie nilwong’ogi gibin i coko. Wang’eyo nia kara gibin i coko, saa moko bikwayere nia walwong’gi wang’ mapol. M’umbe jiji ka gibino, anyong’a binegowa lee calu m’ugam unego Yesu kinde ma julub giyio lwong’o pare.​—Nen Matayo 28:16 man Luka 15:6.

17. Wacikara nitimo ang’o kan umego kunoke nyemego mwa moko m’ukwio i tipo ubino i coko?

¹⁷ Jolgi ku yaw yaw. Yesu uketho julub pare giwinjiri ma ber kinde ma girombo karacelo. Ekuro ngo nia julub pare re ma gibin i bang’e, ento en re m’ecidho i bang’gi. (Mat. 28:18) Wacopo timo ang’o kan umego kunoke nyamego moko m’ukwio i tipo ubino i coko? Ukwayu wacidh i bang’e man wajole ku yaw yaw. Saa moko ku kwong’a lworo copo negowa pilembe nwang’u wakoso lembe ma wayer ire. Re kakare niyero wec ma nyayu lewic i wie, wacopo yero ire kende kende nia anyong’a benegowa lee m’ebino i coko.

18. Wacopo tielocwiny jurwei lembanyong’a ma gikwio i tipo nenedi?

¹⁸ Tiel cwinygi. Saa moko nyo julub pa Yesu gigam ginwang’u nia gicopo romo ngo ku tic mi rweyo lembanyong’a i ng’om zoo. Ento Yesu uketho cwinygi ku wec ma e: “Wanuti wakudu thiri thiri.” (Mat. 28:20) Nyo andha wec maeno ukonyogi? Eyo. Pilembe i ng’ei wec maeno gigalu ngo ‘niponjo man niyero’ lembanyong’a. (Tic. 5:42) Jurwei ma gikwio i thenge mi tipo de gitie ku yeny mi tielocwiny. Saa moko lworo copo negogi nicaku rweyo lembanyong’a kendo. Pieno, mito wanyuth igi nia wabirweyo karacelo kugi. Ka gitie ayika, wacopo cidho karacelo kugi i tic mi rweyo lembanyog’a. M’umbe jiji anyong’a binegogi lee i kum kony ma wakonyo kogi nicaku rweyo lembanyong’a kendo. Ka wabeneno ju ma gikwio i tipo ni umego ku nyimego mwa, man wabekwo kugi ma ber, eno bimio amora i kumgi  man dhanu ceke mi cokiri bibedo kud anyong’a.

19. Wamito watim ang’o kud adundewa ceke man ke pirang’o?

¹⁹ Wabimedara nitimo tic mi ketho dhanu udok julub nitundo awene? Nitundo i ajiki mi ng’om maeni ma rac. (Mat. 28:20; nen Lexique, “Période finale du monde.”) Nyo andha wabicopo nirweyo man niketho dhadnu dok julub nitundo i saa maeno? Eyo, pilembe wadaru keco nia wabitime. Watie kud anyong’a nitio ku saa mwa, kero mwa, man jamcingwa pi ninwang’u dhanu “m’adundegi bedo ayika pi kwo ma rondo ku rondo” (Tic. 13:48, NWT) Ka wabetimo kumeno eno nwang’u wabelubo lapor pa Yesu. Kum ewacu kumae: “Cemo para en e timo yeny ma i ng’atu m’uora yenyo, ku daru tic pare bende.” (Yoh. 4:34; 17:4) Eno tap gin ma wan bende wamito watim, ke kud adundewa ceke. Wamito wadar tic ma jumio i korwa. (Yoh. 20:21) Man wamito watim tije ku cirocir karacelo ku jumange, uketho i ie ju ma gikwio i tipo bende.​—Mat. 24:13.

20. Nimakere ku Jufilipi 4:13, pirang’o wang’eyo nia wacopo timo tic ma Yesu ung’olo iwa nia watim?

²⁰ Andha etie lembe ma yot ungo nitimo tic ma Yesu ung’olo nia watim. Re wang’eyo nia wabetimo tije kendwa ngo. Yesu ng’olo nia ebibedo kudwa thiri thiri. Tic mi ketho dhanu udok julub utie tic ma wabetimo ‘karacelo ku Mungu’ man “i Kristu.” (1 Kor. 3:9; 2 Kor. 2:17) Pieno, wang’eyo nia wacopo timo tije. Etie iwa rwom man anyong’a ma dit nitimo tic maeno man nikonyo dhanu mange de gitim tije.​—Som Jufilipi 4:13.