1. Mikitini Matay 28:18-20, palimoˈotan ni Yis ko nisawawaan midemak to maanan hani?

IKOR no patikol maˈorip ci Yis, paˈaraway to masaˈopoay i Kalili a nisawawaan, iraay ko kalimlaan a demak ningra papasowalen cangra. O maanan a demak hani? Oniya sowal matiliday i Matay 28:18-20. (ˈOsien).

2. Oniya lalakaw wa milengo to maanan salicay hani?

² O aniniay a Krisciyang wa mitoor to limoˈot ni Yis a midemak, padama to tao malo Krisciyang. Mihaenay, wa miharateng kita to milingatay toniya limoˈot tolo a salicay. Saka 1, cowa ko pasifanaˈ aca to tamdaw mafanaˈ to Kawas, wa midemakho kita to maanan? Saka 2, O polong a mitosilay no kasakopang sasamaan misarocod, padama to pacikiwan macakat? Saka 3, samaan ko demak ita, padama to paselaˈay mitosil a tamdaw miliyaw mirienang to palo Krisciyangay to tamdaw a tayal hani?

3. Pasowalan ni Yis ko nisawawaan midemak to maanan?

³ Ihkalay ko sowal ni Yis, wa pasifanaˈ kita to tao mafanaˈ to limoˈot ningra. Kawra, cowa ka ngaˈay malawa ita ko cecay kalimlaan a demak. Cowa ka somowal cingra ‘o kihcod a limoˈot ako tamowanan, pasifanaˈen cangra,’ ao ‘o kihcod a limoˈot ako tamowanan, pasifanaˈen cangra midofdof.’ Sapitooraw to limoˈot ni Yis a midemak, cowa ko pasifanaˈ aca to pacekiwan, midemak to maanan, pasifanaˈenho ko pacekiwan, mafanaˈ to sasamaan midemak. (Dmak 8:31) Hano mamihaen ko demak ita hani?

4. Saka dademaken ko sapatinako mitadtad wa samaan kita pasifanaˈ to pacekiwan midofdof to limoˈot ni Yis hani?

 ⁴ O sasamaan kita pasifanaˈ to tao “midofdof” to limoˈot ni Yis hani? Laenoay sapatinako wa padama kitaanan cipinang to sasamaan midemak. O cecay pasifanaˈay parakat to paliding a singsi wa samaan pasifanaˈ to minanamay midofdof to sarikec no parakatay hani? Salakat itini cingra i picodadan mitadtad toniya sarikec, Kawra, sapasifanaˈaw to minanamay midofdof toniya sarikec, wa malacafay ko singsi to minanamay a tayra i lalan, mikayat to minanamay misaka dademak to mananamay a sifanaˈ. Mikitini toniya sapatinako mananamay ita ko maanan hani?

5. (1) Pakayni Yohani 14:15 ato 1 Yohani 2:3, papasifaˈen ita ko pacekiwan samaan ko demak? (2) Patinakoen mitadtad samaan kita pasifanaˈ to pacekiwan hani.

⁵ Ano pasifanaˈ kita to pacekiwan i, cowa ko pasowal aca cangranan to saali no Kawas, wa pasifanaˈenho cangra midemak to mananamay. (ˈOsien ko Yohani 14:15; 1 Yohani 2:3.) Ngaˈay kita saka dademaken ko demak no niyah a tinakoan, pasifanaˈ to pacekiwan cipinag itini picudadan, katayalan ato lawla i, samaan misaka dademak to safalod no Fangcalay Cudad. Ngaˈay kita pasowal to pacekiwan to nalifetan ita, wa cipinang cangra midofdof to limoˈot no Fangcalay Cudad samanay midipot kitanan, anca padama kitanan inaneng ko misaˈosian. Kalacafay to pacekiwan mitolon, micangacang ci Yihofaan tano fangcalay saocor mikayat to pacekiwan.—Yohani 16:13.

6. Sapasifanaˈaw to pacekiwan midofdof to limoˈot ni Yis, wa samaanho ko hademak ita hani?

⁶ Sapasifanaˈaw to pacekiwan midofdof to limoˈot ni Kristo, wa samaanho ko hademak ita hani? Pakalaloken ita ko pacekiwan, padama cangranan makalim mirienang to mitosilay a tayal, padama to tamdaw malo Krisciyang. Roma pacekiwan miharateng to mamirienang to mitosilay a tayal matalaway cangra, papaihkalen ita ko mihadidiay, padama cangranan palidlid saan cipinang to Fangcalay Cudad, padotoc paˈicel to pakasoˈlinay falocoˈ. Mihaen, o mamapakalalok cangra, makalim sapirienangaw to mitosilay a tayal. Sapadamaaw to pacekiwan makalim a mitosil, sasamaan ko hademak ita?

7. Sasamaan kita padama to pacekiwan palahad to kalim a mitosil hani?

⁷ Ngaˈayay licayen ita ko pacekiwan: “Mafanaˈ to ngaˈayay lihaf no Hongti Kitakit, samanay mifalic to kaˈorip iso? Harateng iso misaaliay ko tao sapitengilaw toniya lihaf han? Wa ngaˈay kiso midemak to maanan hani?” (Taneng 3:27; Matay 9:37, 38) Ngaˈayay paˈarawen ita ko pacekiwan to tancang i Sapasifanaˈ a Lalosidan, papiharateng to maanan a tancang ko mamisolot to salawina anca cafay matayal, ikor pafelien ko pacekiwan to tancang. Malacafay kita to pacekiwan a mihatatanam, pasifanaˈ cingranan tano damsayay a pakayraan paladaˈ to tao toniya tancang. Manaokaniw, ikor no mahayda ko pacekiwan malo cowaho picada to paputisem a mitosilay, kakalacafayen ita cingra a mitosil, pasifanaˈ cingranan.—Patnakay 4:9, 10; Luka 6:40.

8. Padama to pacekiwan mitongal to olah i Kawas ato roma tamdaw hano kalimlaan hani? (Nengnengen ko sapatongal lalakaw “ Samaan Padama to Pacekiwan Matongal ko Olah to Kawas.”)

⁸ Sowal ni Yis “kihcod a limoˈot” ningra, pasifanaˈen ita ko tao midofdof. O limoˈot ni Yis maedeng mahawpay ko tosa sataˈangayay a rikec, maolah to Kawas ato maolah to tamdaw malecad o niyah, oniya tosa rikec milingatay to padama to tamdaw malo Krisciyang a tayal, samanen o olah to Kawas ato tao o sakakaay a  ˈicel ita mitosil to tamdaw. (Matay 22:37-39) Manaokaniw, o roma pacekiwan maharateng ko mitosilay matalaway, ngaˈayay fanaˈen ita ko pacekiwan, mitadiˈec to sadama ni Yihofa, wa palidlid saan maremo nangra ko matalaway a falocoˈ. (ˈOlic 18:1-3; Taneng 29:25) O sapatongal a lalakaw wa mitadtad sasamaan ko singsi padama to pacekiwan matongal ko olah to Kawas. Cowa konini aca, wa ngaˈay ko kasakopang midemak to maanan, padama to pacekiwan matongal ko olah hani?

9. Itini minanamay parakat to paliding a sapatinako, ikor no malacafay ko minanamay ato singsi tayra i lalan wa samaan a minanam hani?

⁹ Haratengen aca ko minanamay parakat to paliding a sapatinako. Ikor no malacafay ko minanamay to singsi tayra i lalan, sasamaan a minanam hani? O mamitengil to sapasifanaˈ no singsi, mihapinang to samanay ko roma parakatay a parakat to paliding. Tinakoen, pasowal ko singsi o roma parakatay micaˈiyay to roma paliding, anca mipadeng to kaˈayaway a tinghoy, hoeca ka ˈeceng ko mata no roma palakatay. Oniya tinakoan o papadama to minanamay parakat to paliding a tamdaw.

10. Samaan ko demak no pacekiwan wa ngaˈay padotoc a macakat?

¹⁰ Malecaday, ikor no misatapang a romakat i sakatayra midaˈocay ˈorip a lalan ko pacekiwan i, cowa ko pasayra aca i singsi minanam, wa pasayraho i ngaˈayay taˈarawan no roma Krisciyang a minanam. Mihaenay, samaan ko demak no pacekiwan, ngaˈ ngaˈay ko kacakat hani? Mirienang to saˈopo no Krisciyang. Samanen o lalakaw no saˈopo wa ngaˈay padama cangranan matongal ko sifanaˈ, matongal ko pakasoˈlin, wa ngaˈayho padama cangranan matongal ko olah to Kawas. (Dmak 15:30-32) Roma i, ano mirienang ko pacekiwan i, ngaˈayay siwkayen no singsi mafanaˈ to malecaday ko nalifetan a salikaka cangranan. Itini kasakopang, wa maˈaraw no pacekiwan ko ngaˈayay taˈarawan no salikaka maolah to Kawas ato tao. Nengnengen ko laenoay tinakoan.

11. Itini kasakopang maˈaraway no pacekiwan ko maanan ngaˈayay taˈarawan? O mahaenay taˈarawan sasamaan milingat to pacekiwan hani?

¹¹ O cecay pacekiwan o awaay ko faˈinay a wina, maˈaraw ningra itini kasakopang cecay fafahiyan salikaka o awaay ko faˈinay a wina, malalokay miˈorong to kaemangay a wawa mirienang to saˈopo, mapakalalokay ko harateng. Cecay pacekiwan pasangaray misawad to tamako, itini kasakopang mafanaˈay to cecay faˈinayan salikaka. Pasowalay ko salikaka, samanen maolahmaolahay cingra ci Yihofaan, makalimay sapidofdofaw to sarikec ni Yihofa, mansa malaˈosi ko pisawad to tamako. (2 Korinto 7:1; Filipi 4:13) Maharek ko salikaka mihadak to nalifetan noniyah pasowalay to pacekiwan: “O mamalaˈosi ko pisawad iso to tamako!” Mapakalalokay koya pacekiwan. O cecay minanamay to Fangcalay Cudad kaemangay fafahiyan mahapinangay ko cecay fafahiyan salikaka salipahak sanay, sakafanaˈaw to o maanan ko pakahemekay toni fafahiyan salikaka.

12. O kahacecay tamdaw no kasakopang hano ngaˈay padama to pacekiwan a macakat hani?

¹² Ano mafanaˈ ko pacekiwan to salikaka i, wa ngaˈay pasayra i ngaˈayay taˈarawan nangra a minanam, mafanaˈ to sasamaan midofdof to limoˈot ni Kristo, maolah to Kawas ato maolah to tao. (Yohani 13:35; 1 Timoti 4:12) Roma i, malecad masowalay i fafekang, o salikaka i kasakopang tahalifaay to malecaday ono pacekiwan a pasangaray, mikitini taˈarawan nangra wa mahapinang no pacekiwan wa ngaˈay ko niyah a mifalic, saikor ngaˈay malo Krisciyang. (Limoˈot 30:11) O kahacecay tamdaw no kasakopang wa ngaˈay mihadak to  ˈicel, tano masasiromaay pakayraan a padama to pacekiwan macakat. (Matay 5:16) Ano mirienang to saˈopo ko pacekiwan i, wa ngaˈay midemak kiso to maanan a pakalalok cangranan hani?

13-14. O tarokos matoleday a malonay, samanay ci Yis micada cangranan hani?

¹³ Mitokelay kita padama to paselaˈay mitosil a salikaka miliyaw midofdof to limoˈot ni Yis midemak, padama to tamdaw malo Krisciyang. Nengnengen ita samanay ci Yis padama to matoleday a tarokos, wa ngaˈay mafanaˈ to samaan ko hademak.

¹⁴ Itini ˈayaw mapatay ci Yis i, o tarokos “milaliway cingranan a maemin.” (Marko 14:50; Yohani 16:32) O tarokos matoleday a malonay, samanay ci Yis micada cangranan hani? Ikor no patikol maˈorip ci Yis i, pasowalay to nisawawaan: ‘Aka ka talaw. Olili. Pasowalen ko salikaka ako.’ (Matay 28:10 a) Soˈlin na milaliway ko tarokos ci Yisan, kawra cowa pisawad ci Yis cangranan, kamayan malo “salikaka ako” saan ko pinengneng cangranan. Ci Yis malecaday ci Yihofaan, matomesay ko siniˈadaay, makahiay misodod to tamdaw.—2 Hongti 13:23.

15. Samaan ko pinengneng ita toya paselaˈay mitosil a tamdaw hani?

¹⁵ Mahecaday, tada ciharatengay kita to paselaˈay mitosil a tamdaw. O salikak ita cangranan, tada maolahay kita cangranan! Kamayan maharateng ita ko paihkalan nangra a olah ci Yihofaan, o roma tamdaw pinaay poloˈ miheca malalokay matayal saki Yihofaan. (Hipray 6:10) Soˈlinayto tada ciharatengay kita cangranan! (Luka 15:4-7) Wa samaan kita mitodong ci Yisan, padama to salikaka mitinako to kaciharateng ita hani?

16. Samaan kita wa ngaˈay matinako no paselaˈay mitosil a salikaka ko kaciharateng ita cangranan hani?

¹⁶ Damsay a mitahidang cangranan mirienang to saˈopo. Sapakalalokaw to matoleday a tarokos, mitahidangan ni Yis cangra mirienang to cecay saˈopo, masasoˈaraw cingranan. (Matay 28:10b; 1 Korinto 15:6) Maˈaraw ni Yis micada ko tarokos to satahidang, maedeng tada mahemekay. (Nengnengen ko Matay 28:16; Luka 15:6) Mahecaday, o paselaˈay mitosil a tamdaw ano cowato ka mirienang to saˈopo, wa ngaˈay kita pakalalok cangranan mirienang to saˈopo. Kawra haharatengen ita, wa misaliyaliyaw kita mitahidang cangranan alatek, mihaen ngaˈ makahi cangra midemak.

17. Ano mirienang to saˈopo ko paselaˈay mitosil a salikaka i, sasamaan ko hademak ita hani?

¹⁷ Mikifalocoˈ a mihamham cangranan. Masasoˈaraw ci Yis to nisawawaan i, talaˈayaway a masasowal cangranan, parihadayay cangranan. (Matay 28:18) Ano tayni i Hongti Kitakit kasaˈopoan ko paselaˈay mitosil a salikaka i, sasamaan ko hademak ita hani? Tatalaˈayaw kita a militemoh cangranan, kawra hamaan pakangodoen cangra. Satapang aca ano cowa ka fanaˈ kita to o maanan ko hasowal, ngaˈayay pasowalen cangra, tada mahemekay kita pakaˈaraw cangranan.

18. Sasamaan kita pakalalok to paselaˈay mitosil a tamdaw hani?

¹⁸ Mikifalocoˈ a pakalalok cangranan. Palimoˈotan ni Yis ko nisawawaan patenak to ngaˈayay lihaf i polong no kakarayan, cato ka dangar sanay cangra miharateng. Pakalalokan ni Yis cangra, sanay: ‘Itini kihcod a romiˈad . . . wa kalacafayen ako kamo.’ (Matay 28:20) O sowal ni Yis iraay ko sapadama cangranan han? Iraay. Caka halafin, o nisawawaan ‘padotocay a pasifanaˈ to tamdaw, milasil to pakayniyay ci Kristo Yisan a lihaf.’ (Dmak 5:42) O paselaˈay mitosil a salikaka  misaaliay to malecaday a sapakalalok, miharateng cangra miliyaw mitosil, marawraway ko harateng, calemcemay alatek. Ngaˈayay pasowalen ita cangra, cowa ko cecayay cangra mitosil, ano makahi cangra, ngaˈayay kalacafay kita cangranan. Ano miliyaw cangra mitosil i, maedeng o mamiakoˈid to sadama ita. Ano matinako no paselaˈay mitosil, kamayan o salikaka saan ko pinengneng ita cangranan, o mamiliyaw a talifak, mihaen o polong no kasakopang tataˈangay ko lipahak.

19. Iraay ko maanan a harateng ita hani? Misamanay?

¹⁹ Wa hakowa ko halafin no padamaay to tamdaw malo Krisciyang a tayal hani? Itini salikoray ˈawaled, o papadotoc kita midemak toniya tayal. (Matay 28:20; Nengnengen ko Sapitadtad a Sowal, “Salikoray ˈawaled.”) Wa malaheci ita koniya sapatorod ni Yis a ˈinorong han? Seteken ita ko falocoˈ a midemak! Makahi kita mihadak to toki, ˈicel ato payci, mikilim to ‘matatodongay ko waywayan ngaˈayay milifok to tahadaˈocay ˈorip a tamdaw.’ (Dmak 13:48) Mihaen ko demak ita, o mitodongay to taˈarawan ni Yis, sanay cingra: ‘O kakaenen ako o pidemak to araaw noya miocoray takowanan, milaheci to tayal Ningra.’ (Yohani 4:34; 17:4) Malecaday ko harateng ita, makalim sapilaheciyaw to patorodan Ningra kitaanan a ˈinorong. (Yohani 20:21) Mitokelay kita to roma tamdaw, mahawpay ko paselaˈay mitosil a salikaka, malacafay kitaanan tahatolas ko pihadidi, milaheci toniya tayal.—Matay 24:13.

20. Mikitini Filipi 4:13, hano wa ngaˈay malaheci ita koniya sapatorod ni Yis a ˈinorong hani?

²⁰ Manaokaniw, sapilaheciaw kita toniya sapatorod ni Yis a ˈinorong cowa ko madoloay. Kawra, cowa ko kita ace ko matayalay, mikiˈokay ci Yis wa malacafay cingra kitaanan, hanaca ‘o kapot no Kawas kita a matayal,’ wa ‘tiˈeren ci Kristo milasil to lihaf.’ (1 Korinto 3:9; 2 Korinto 2:17) Mihaenay, wa ngaˈay mamalaheci ita koniya ˈinorong. Malikoay kita mirienang toniya tayal, halo padama to tao mihaen ko demak, tada kahemekanto!—ˈOsien ko Filipi 4:13.