1. Mateo 28:18-20 textorjamajja, ¿kunsa Jesusajj discipulonakapar mayïna?

 JESUSAJJ jaktjjäna uka qhepatjja, Galilea markan tantachatäpkäna uka discipulonakaparuw uñstäna. Jupanakarojj wali importante yatiyäwi churäna. Uka arunakajj Mateo 28:18-20 (liytʼañataki) texton qellqatawa.

2. ¿Kuna jisktʼanakarus aka yatichäwin qhanañchaskañäni?

² Jesusajj ‘jaqenakar discipulojar tukuyapjjam’ siskäna uka arunakjja, jichha tiempon Diosan servirinakapajj sapa mayniw phoqapjjañaparaki. Aka yatichäwinjja, uka toqet parlir kimsa jisktʼanakaruw qhanañchaskañäni. 1) Jaqenakaru Diosan mayitanakap yatichkasajja ¿kunampsa lurañasa? 2) ¿Kunjamsa congregacionan taqenis Bibliat yateqerinakarojj nayrar sartapjjañapatak yanaptʼsna? 3) ¿Kunjamsa inactivo jilat kullakanakarojj mayamp predicapjjañapatak yanaptʼsna?

3. ¿Kunsa Jesusajj arkirinakapar mayïna?

³ Jesusan arunakapajj qhana amuykañawa. Ukatwa kuntï Jesusajj yatichkäna ukanak jaqenakarojj yatichañasa. Ukampis may amtañasa, Jesusajj janiw ‘taqe kuntï nayajj yatichapksma ukanak yatichapjjam’ sasajj siskänti. Jan ukasti ‘taqe kuntï nayajj yatichapksma ukanak phoqañ yatichapjjam’ sasaw säna. Uka arunakarjam lurañatakejja, janiw kuntï Bibliat yateqerejj lurañapäki ukak yatichañasäkiti, jan ukasti kunjamsa uk lurañapa ukwa yatichañasaraki. ¿Kunatsa ukham lurañasa?

4. ¿Kunjamsa Bibliat yateqerirojj Criston arunakap phoqañ yatichsna? Uk mä uñachtʼäwimp qhanañchtʼam.

 ⁴ ¿Kunjamsa jaqenakarojj Jesusan arunakap phoqañ yatichsna? Uk amuyañatakejja, auto apnaqañ yatichirit parltʼañäni. Jupajj ¿kunjamsa yateqeriparojj auto apnaqañ reglamentonak phoqañ yatichi? Nayraqatjja, clasenwa uka reglamentonak yatichi. Ukatjja, yateqerejj auto apnaqki ukhasa kuntï yateqki uk phoqañatak chʼamachaski ukhas jupamp chikaw sari, ukhamatwa reglamentonak phoqañ yanaptʼaraki. ¿Kunsa uka uñachtʼäwit yateqsna?

5. 1) Juan 14:15; 1 Juan 2:3 textonakarjamajja, ¿kunsa Bibliat yateqerinakar yatichañasa? 2) ¿Kunanaksa jupanakar yanaptʼañatakejj luraraksna?

⁵ Mayniru Bibliat yatichkasajja, kunsa Diosajj jiwasanakar mayistu ukwa yatichtanjja. Ukampis janiw ukak yatichañasäkiti. Jan ukasti kunjamsa yateqatarjam jakäwipan sarnaqaspa ukwa yatichañasaraki (Juan 14:15; 1 Juan 2:3 liytʼañataki). Kunjamsa escuelansa, trabajonsa, yaqha ukhamanakansa Biblian yatichäwinakaparjam sarnaqaspa ukwa kuntï ukhamanakan uñjasisajj lurirïktan ukamp yatichañasa. Jiwasarojj Biblian yatichäwinakaparjam sarnaqañajja, kunjamsa jan walinakat jarkʼaqawayistu jan ukajj kunjamsa suma amtanakar puriñatak yanaptʼawayistu ukwa cuenttʼsna. Ukatjja, jupanakamp chika oraskasajj espíritu santon yanaptʼapwa jupanakatak mayiraksna (Juan 16:13).

6. Bibliat yateqeriru Jesusan arunakap phoqañ yatichkasajja, ¿kunamps lurañasa?

⁶ Jesusan arunakap phoqañ yatichkasajja, ¿kunamps lurañasa? Bibliat yateqerinakarojja, jaqenakaru Jesusan discipulopar tukuyañ munapjjañapatakiw yanaptʼañasa. Yaqhepatakejj predikir mistuñajj ajjsarañjamäspawa. Ukatwa Biblian cheqa yatichäwinakap sum amuytʼañ pacienciampi yanaptʼañasa. Ukhamatwa uka yatichäwinakajj chuymapar purtʼani, ukat predicañsa jan ajjsarjjaniti. ¿Kunjamsa Bibliat yateqerinakarojj predicañ munapjjañapatakejj yanaptʼsna?

7. ¿Kunjamsa Bibliat yateqerinakarojj predicañ munapjjañapatak yanaptʼsna?

⁷ Akhamwa Bibliat yateqerinakarojj jisktʼsna: “¿Kunjamsa Reinon suma yatiyäwinakap istʼañajj sum jakasiñatak yanaptʼawaytam? ¿Uka suma yatiyäwinakajj yaqhanakar yanaptʼarakispati? ¿Kunsa jupanakar yanaptʼañatakejj lurasma?” sasa (Prov. 3:27; Mat. 9:37, 38). Kit de enseñanza ukan utjki uka tratadonakwa uñjjattʼayañasa. Ukatjja, familiaranakapasa amigonakapasa trabajir masinakapasa kawkïr tratadonakatsa yatjjatañ munaspa uk ajlliñapatakiw chʼamañchtʼañasaraki. Ukatsti mä qhawqha tratadonakwa churañasaraki. Kunjamsa suma arunakampi uka tratadonak churaspa ukwa jupamp ensaytʼañasa. Ukatjja, publicadoräñatak mayitanak phoqjjani ukhajja, jupamp chikaw predikir sarañasa, ukhamat yanaptʼañataki (Ecl. 4:9, 10; Luc. 6:40).

8. ¿Kunatsa Bibliat yateqerinakajj Diosarusa jaqe masiparusa munasipjjañapa? (“ ¿Kunjamsa Bibliat yateqerinakarojj Diosar jukʼamp munasipjjañapatak yanaptʼsna?” sat recuadro uñjjattʼarakïta).

⁸ Jesusajj akham sänwa: “Taqe kuntï nayajj jumanakar yatichapksma ukanak phoqañ yatichapjjarakim” sasa. Yatichkäna ukanakatjja, pä jachʼa mandamientwa yaticharakïna: Jehová Diosar munasiña, ukhamarak jaqe masisar munasiña (Mat. 22:37-39). Uka munasiñaw jaqenakar predicañatak chʼamañchistu. Ukampis yaqhep yateqerinakatakejj  predicañajj ajjsarañjamäspawa. Ukatwa jupanakarojj “Jehová Diosan yanaptʼapampejj jukʼat jukʼatwa jaqenakar jan ajjsarjjätati” sasin chʼamañchtʼañasa (Sal. 18:1-3; Prov. 29:25). Aka yatichäwitak utjki uka recuadronjja, kunjamsa Bibliat yateqerinakarojj Diosar jukʼamp munasipjjañapatak yanaptʼsna ukaw qhanañchasi, ukampiw yanaptʼayasiraksna. Maysa toqetjja, ¿kunjamsa jilat kullakanakajj Bibliat yateqerinakarojj jukʼamp munasirïpjjañapatak yanaptʼapjjaspa?

9. Auto apnaqañ yateqerejja, ¿kunjamsa auto sum apnaqañ yateqaraki?

⁹ Auto apnaqañ yateqerit parltʼaskakiñäni. Yatichiripamp chika auto apnaqaski ukhajja, ¿kunjamsa auto apnaqañ yateqaraki? Kuntï yatichiripajj jupar siski ukanak sumwa istʼi, sum apnaqañ yatipki uka choferunakatwa yateqasiraki. Sañäni, kunjamsa mä choferojj yaqha choferurojj jupa nayraqatar mantayi ukwa yatichirejj uñachtʼayi. Jan ukajj kunjamsa mä choferojj yaqha choferunakar jan chʼamaktʼayañatak luz jan sint qhankatayki ukwa uñachtʼayaraki. Auto apnaqañ yateqerejj ukanakat wal yateqe, ukarakiw sapak apnaqjjani ukhajj wal yanaptʼani.

10. ¿Kunas Bibliat yateqerirojj nayrar sartañapatak yanaptʼani?

¹⁰ Niya ukhamarakiwa, kawkïr yateqerinakatï Diosar serviñ qalltapki ukanakajja, janiw yatichiripatak yateqapkiti jan ukasti yateqaskay jilat kullakanakatwa yateqasipjjaraki. Ukhamasti ¿kunas Bibliat yateqerinakarojj nayrar sartapjjañapatak jukʼamp yanaptʼani? Tantachäwinakar sarañaw yanaptʼani. ¿Kunatsa? Kunatï tantachäwinakan yatichaski ukajja, Bibliat jukʼamp yatipjjañapataki, Diosar jukʼamp confiyapjjañapataki ukhamarak jukʼamp munasipjjañapatakiw yanaptʼani (Hech. 15:30-32). Ukatjja, jupjam jan waltʼäwinakar saykatiri jilat kullakanakaruw yatichirejj tantachäwinakan uñtʼayarakini. Congregacionanjja, munasiri walja jilat kullakanakaruw uñtʼani. Mä qhawqha uñachtʼäwinak uñjañäni.

11. ¿Kunjam jilat kullakanakarus mä yateqerejj tantachäwinakan uñtʼaspa, ukajj kunjamsa jupar yanaptʼarakispa?

¹¹ Sapaki wawapar uywiri mä yateqerit parltʼañäni, jupajja kunjamsa mä kullakajj wawanakaparu sapak uywi ukwa congregacionan uñji. Kunjamsa kullakajj wawanakapas irptʼata tantachäwinakar sarañatak chʼamachasi ukwa uñjaraki, ukasti yateqerirojj wal chʼamañchtʼi. Yaqha uñachtʼäwit parltʼañäni, cigarro fumañ apanukuñatak chʼamachaski uka yateqerejja, cigarro fumañ jaytir mä jilataruw uñtʼi. Uka jilatajja, kunjamsa Diosar jukʼamp munasiñajj mandamientonakap phoqañatak yanaptʼawayi ukwa yateqerirojj cuenttʼi (2 Cor. 7:1; Filip. 4:13). Ukanak cuenttʼasajj akham sasaw yateqerirojj saraki: “Jumajj cigarro fumañ jaytarakismawa” sasa. Jilatan uka arunakapajj yateqerirojj wal chʼamañchi, ukatwa jaytañatakejj wal chʼamachasi. Jichhajja, mä tawaqetat parltʼarakiñäni, jupajj wali kusisit jakasiri mä tawaq kullakaruw uñtʼi. Kunatsa kullakajj ukham kusisita jakasi ukwa yatiñ munaraki.

12. ¿Congregacionan taqeniw Bibliat yateqerinakarojj nayrar sartapjjañapatak yanaptʼsna sasajj kunatsa sissna?

¹² Bibliat yateqerinakajj Diosar taqe chuyma serviri walja jilat kullakanakar uñtʼapjje ukhajja, jupanakatwa kuntï Cristojj Diosar munasiñatsa, jaqe masisar munasiñatsa siskäna uk phoqañ yateqapjje (Juan 13:35; 1 Tim. 4:12). Ukatjja, kunjamtï uñjaniwaytanjja, jupanakjam jan walinakar saykatiri jilat kullakanakatwa yateqasipjjaraki. Criston discipulopäñatakejj kunanakansa cambiapjjaspa ukwa  uka jilat kullakanakat yateqasipjje (Deut. 30:11). Congregacionan taqeniw Bibliat yateqerirojj nayrar sartañapatak kunaymanit yanaptʼsna (Mat. 5:16). Tantachäwinakar jutapki uka yateqerinakarojj ¿kunjamsa jumajj nayrar sartapjjañapatak chʼamañchtʼirïta?

13, 14. ¿Kunjamsa Jesusajj apostolonakaparojj aynachtʼatäpkäna ukhajj uñjäna?

¹³ Inactivo jilat kullakanakaruw mayamp predicjjapjjañapatak yanaptʼañ muntanjja. Kunjamtï Jesusajj llakit apostolonakapar uñjkänjja, jiwasajj ukhamarakiw inactivo jilat kullakanakar uñjañasa.

¹⁴ Jesusajj aka oraqen predicañ tukuyjjäna, jiwañapas jakʼankjjäna ukhajja, apostolonakapajj “taqeniw jupar jaytanukusajj escapjjapjjäna” (Mar. 14:50; Juan 16:32). Apostolonakajj aynachtʼata jikjjatasipkäna ukhajja, ¿kunjamsa Jesusajj jupanakar uñjäna? Jaktjjäna uka qhepatjja, yaqhep discipulonakapar akhamwa jupajj säna: “¡Jan ajjsarapjjamti! Jilanakajar [nayan jaktatajat] yatiyir sarapjjam” sasa (Mat. 28:10a). Jesusajj janiw apostolonakaparojj apanukkänti. Apostolonakapajj jupar apanukkchïnsa, jupajj ‘jilanakaja’ sasaw saskakïna. Jesusajj Jehová Diosjamarakiw apostolonakapat khuyaptʼayasïna, perdonarakïna (2 Rey. 13:23).

15. ¿Kunjamsa inactivo jilat kullakanakarojj uñjtanjja?

¹⁵ Jiwasajj ukhamarakiw khitinakatï jan predikir mistjjapjje ukanakat llakistanjja. Jupanakajj jilat kullakanakasäpjjewa, wali munatäpjjarakiwa. Kuntï jupanakajj Jehová Diosatak nayrajj lurawayapki ukanak janiw armktanti. Yaqhepajja walja maranakaw ukham serviwayapjje (Heb. 6:10). Cheqansa jupanakamp chik predicañ wal muntanjja (Luc. 15:4-7). Jesusat yateqasisajja, ¿kunjamanakatsa jupanakat llakisitas uñachtʼaysna?

16. ¿Kunjamsa inactivo jilat kullakanakat llakisitas uñachtʼaysna?

¹⁶ Tantachäwinakar jutapjjañapatak munasiñamp invittʼapjjañäni. Jesusajja, aynachtʼata apostolonakapar chʼamañchtʼañatakejja, mä tantachäwiruw invittʼäna (Mat. 28:10b; 1 Cor. 15:6). Inactivo jilat kullakanakatï tantachäwinakar jan jutjjapjjchi ukhajja, Jesusjamarakiw tantachäwinakar jutapjjañapatak jupanakar invittʼsna. Tantachäwinakar jutapjjañapatakejj walja kut invitañaw wakisispa, uk jan armapjjañäniti. Jesusajja, kunapachatï discipulonakapajj invitacionapar istʼas tantachasir sarapkäna ukhajja wal kusisïna (Mat. 28:16; Lucas 15:6 uñjjattʼarakïta).

17. ¿Inactivo jilatasa jan ukajj kullakasa tantachäwir jutani ukhajj kunsa lurañasa?

¹⁷ Taqe chuyma katoqtʼapjjañäni. Jesusajja, tantachäwir sarapkäna uka discipulonakaparojj taqe chuymaw katoqtʼäna. Jupaw jupanakar jakʼachasisin parlañ qalltarakïna (Mat. 28:18). Inactivo jilatasa jan ukajj kullakasa tantachäwir jutani ukhajja, ¿kunsa lurañasa? Jiwasaw nayraqat jupar jakʼachasisin sum katoqtʼañasa. Qalltanjja, “jichhajj kamsarakïsti” sasaw llakissna. Ukampis jan chuym ustʼayañatakejja, jutatapat kunja kusisitätansa ukakwa sissna.

18. ¿Kunjamsa inactivo jilat kullakanakarojj chʼamañchtʼsna?

¹⁸ Chʼamañchtʼapjjañäni. Jesusan discipulonakapajj aka oraqpachanwa predicapjjañapäna, uk yatisajj inas ajjsarayasipjjchïna. Jesusajj akham sasaw jupanakar chʼamañchtʼäna: ‘Nayajj sapürupuniw jumanakampïskäjja’ sasa (Mat. 28:20). Uka arunakajj jupanakar wal yanaptʼäna. Uka qhepatjja, ‘suma yatiyäwinak  yatiyasipkakïnwa’ (Hech. 5:42). Inactivo jilat kullakanakajj ukhamarakiw chʼamañchtʼatäñ munapjje. Jupanakajj mayamp predicjjañ ajjsarayasipjjaspawa. Ukhamasti “janiw sapak predickätati” sasaw chʼamañchtʼañasa. Predicacionar mistjjapjjani ukhajja, jupanakamp chikaw predikir sarañasa. Ukham yanaptʼañäni ukhajj jupanakajj wal yuspärapjjestani. Inactivo publicadoranakar jilat kullakanakasarjam uñjañäni ukhajja, mayampiw predicjjapjjaspa, uk uñjasasti congregacionajj wal kusisispa.

19. ¿Kun lurañsa muntanjja, kunatsa?

¹⁹ ¿Kunapachkamas predicañäni? Akapachajj tukuskani ukapachkama (Mat. 28:20). ¿Jesusajj kun lurañastï maykistu uk phoqañäniti? Jïsa, phoqañwa muntanjja. ‘Khitinakatï wiñay jakañatak suma chuymanïpki’ ukanakar yanaptʼañatakejja, wal chʼamachastanjja, taqe chuymaw tiempsa apstʼastanjja, qollqessa gastastanjja (Hech. 13:48). Ukham lurasajja, Jesusat yateqasitaswa uñachtʼaytanjja. Jupajj akham sänwa: “Nayan manqʼajajja, khitankitu ukan munañap lurañawa, kuna lurañtï jupajj churkitu uk tukuyañajarakiwa” sasa (Juan 4:34; 17:4). Jiwasajj ukhamarakiw kuna lurañtï Jesusajj jaytawaykistu uk tukuyañ muntanjja (Juan 20:21). Taqe jilat kullakanakasa ukhamarak inactivo publicadoranakasa, jiwasamp chika tukuykam aguantapjjaspa ukwa muntanjja (Mat. 24:13).

20. Filipenses 4:13 textorjamajja, ¿kun lurañastï Jesusajj maykistu uk phoqañäniwa sasajj kunatsa sissna?

²⁰ Kun lurañastï Jesusajj maykistu uk phoqañajj janiw faciläkiti. Ukampisa janiw sapakejj uk phoqkañäniti. Jesusajja, ‘sapürupuniw jumanakampïskäjja’ sasaw arsuwayi. Jiwasajja, ‘Diosamp chika trabajirïpjjtanwa’ ‘Criston discipulopäpjjaraktanwa’, ukhamasti Jehová Diosampi Jesucristompiw yanaptʼasipkistu (1 Cor. 3:9; 2 Cor. 2:17). Uka yanaptʼampiw kun lurañastï Cristojj maykistu uk phoqsna. ¡Uk phoqañasa, yaqhanakaru uk phoqapjjañapataki yanaptʼañasa wali kusiskañawa! (Filipenses 4:13 liytʼañataki).