1. Мәтта 28:18—20 ајәләринә әсасән, Иса Мәсиһ һансы тапшырығы вермишди?

ИСА МӘСИҺ дириләндән сонра Ҹәлиләдә топлашан шаҝирдләринә ҝөрүндү. Онлара ваҹиб сөзү вар иди. Бу һагда Мәтта 28:18—20 ајәләриндә јазылыб. (Ајәләри охујун.)

2. Һансы суаллары арашдыраҹағыг?

² Исанын шаҝирд һазырламагла бағлы вердији тапшырыг бу ҝүн дә Аллаһын һәр бир хидмәтчисинә аиддир. Буна ҝөрә дә ҝәлин Исанын вердији бу тапшырыгла бағлы үч суалы мүзакирә едәк. Биринҹиси, шаҝирдә Аллаһын бујругларыны өјрәтмәкдән әлавә нә етмәлијик? Икинҹиси, шаҝирдин руһән инкишаф етмәсинә јығынҹагдакы бүтүн тәблиғчиләр неҹә төһфә верә биләр? Үчүнҹүсү, гејри-фәал диндашларымыза шаҝирд һазырламаг ишиндә јенидән иштирак етмәјә неҹә көмәк едә биләрик?

3. Иса тапшырығына һансы ваҹиб мәгамы дахил етмишди?

³ Исанын ҝөстәриши ајдындыр: биз онун әмрләрини инсанлара өјрәтмәлијик. Амма ваҹиб бир мәгамы нәзәрдән гачырмамалыјыг. Иса демәди: «Сизә әмр етдијим һәр шеји онлара өјрәдин». О демишди: «Сизә әмр етдијим һәр шејә риајәт етмәји онлара өјрәдин». Демәли, биз дәрс кечәркән шаҝирдә тәкҹә нә етмәли олдуғуну өјрәтмәмәлијик, буну етмәјин јолуну да ҝөстәрмәлијик (Һәв. 8:31). Бәс буну неҹә едә биләрик?

4. Әмрләрә риајәт етмәји өјрәтмәјин нә демәк олдуғуну нүмунә әсасында изаһ един.

 ⁴ Ҝәлин бир нүмунәјә бахаг. Машын сүрмәк үзрә тәлиматчы тәләбәсинә јол һәрәкәти гајдаларына риајәт етмәји неҹә өјрәдир? Адәтән тәлиматчы әввәлҹә һәмин гајдалары синифдә баша салыр. Амма бу гајдалара риајәт етмәји өјрәтмәк үчүн о, нөвбәти мәрһәләјә кечир. Тәләбә сүкан архасына әјләшиб өјрәндикләрини тәтбиг етмәјә чалышаркән, тәлиматчы јанында отуруб она истигамәт верир. Бу нүмунәдән нә өјрәнирик?

5. а) Јәһја 14:15 вә 1 Јәһја 2:3 ајәләринә әсасән, шаҝирдә Аллаһын бујругларыны өјрәтмәклә јанашы, нә етмәлијик? б) Шаҝирдә неҹә истигамәт верә биләрик? Нүмунә чәкин.

⁵ Мүгәддәс Китаб дәрси кечәркән инсанлара Аллаһын бујругларыны өјрәдирик. Анҹаг бу, кифајәт дејил. Өјрәндикләринә ҝүндәлик һәјатда әмәл етмәк үчүн истигамәт вермәлијик. (Јәһја 14:15; 1 Јәһја 2:3 ајәләрини охујун.) Мәсәлән, шаҝирдә мәктәбдә, ишдә вә истираһәт заманы Мүгәддәс Китаб принсипләрини тәтбиг етмәјин јолуну ҝөстәрин. Һәмчинин өзүнүздән данышын: Мүгәддәс Китабда дејиләнләрә әмәл етмәк сизи тәһлүкәләрдән неҹә горујуб? Мүдрик гәрарлар вермәјинизә неҹә көмәк едиб? Шаҝирдин јанында дуа едиб Јеһовадан она мүгәддәс руһу илә јол ҝөстәрмәсини диләјин (Јәһ. 16:13).

6. Исанын әмрләринә риајәт етмәји өјрәтмәјә башга нә дахилдир?

⁶ Исанын әмрләринә риајәт етмәји өјрәтмәјә нә дахилдир? Биз дәрс кечдијимиз инсанын үрәјиндә шаҝирд һазырламаг истәји јаратмалыјыг. Ола билсин, бәзи шаҝирдләри тәблиғ етмәк фикри горхудур. Она ҝөрә дә биз сәбирли олмалы, Мүгәддәс Китабдакы дәрин һәгигәтләри баша дүшмәјә көмәк етмәлијик. Беләҹә, өјрәндикләри онларын иманыны мөһкәмләндирәҹәк, үрәкләринә тәсир едәҹәк вә тәблиғ етмәјә тәшвиг едәҹәк. Бунун үчүн һансы үсулдан истифадә едә биләрик?

7. Шаҝирдин үрәјиндә хош хәбәри башгалары илә бөлүшмәк истәјини неҹә ојада биләрик?

⁷ Шаҝирдә нөвбәти суаллары верә биләрик: «Мүгәддәс Китабдакы һәгигәтләр сәнин һәјатыны јахшылыға доғру неҹә дәјишиб? Сәнҹә, бу һәгигәтләри ешитмәјә башгаларынын да еһтијаҹы вар? Сән онлара неҹә көмәк едә биләрсән?» (Мәс. 3:27; Мәт. 9:37, 38). Шаҝирдә хидмәт үчүн вәсаитләримиздән олан буклетләри ҝөстәрин. Онун фикринҹә, гоһумлары, достлары вә иш јолдашлары үчүн һансы буклетләр мараглы ола биләр? Һәмин буклетләрдән бир нечәсини она верин. Онлары нәзакәтли шәкилдә тәгдим етмәји бир јердә мәшг един. Әлбәттә ки, шаҝирд вәфтиз олунмамыш тәблиғчи оландан сонра биз онун јанында олуб, она тәблиғ етмәјин јолуну ҝөстәрәҹәјик (Ваиз 4:9, 10; Лука 6:40).

8. Нәјә ҝөрә шаҝирдин Аллаһа вә башгаларына мәһәббәтини артырмасы ваҹибдир? (« Шаҝирдин Аллаһа мәһәббәтини ҝүҹләндирин» адлы чәрчивәјә бахын.)

⁸ Нәзәрә алаг ки, Иса бизә инсанлара онун әмр етдији «һәр шејә риајәт етмәји» өјрәтмәји тапшырыб. Бура, шүбһәсиз ки, ики ән ваҹиб әмр — Аллаһы вә башгаларыны севмәк әмри дахилдир. Һәр ики әмр тәблиғ етмәк вә шаҝирд һазырламаг иши илә сых әлагәлидир (Мәт. 22:37—39). Неҹә? Бизи тәблиғ етмәјә тәшвиг едән әсас амил мәһәббәтдир — Аллаһа вә башгаларына олан мәһәббәт. Ајдындыр ки, Мүгәддәс  Китабы өјрәнәнләрин бәзиләрини тәблиғ етмәк фикри горхуда биләр. Амма биз онларда әминлик јарада биләрик ки, Јеһованын көмәјилә јаваш-јаваш инсан горхусуна үстүн ҝәләҹәкләр (Зәб. 18:1—3; Мәс. 29:25). Бу мәгаләјә аид олан чәрчивәдә ҝөстәрилир ки, шаҝирдин үрәјиндә Аллаһ севҝисини даһа да артырмаг үчүн биз һансы аддымлары атмалыјыг. Бәс јығынҹагдакылар она бу саһәдә неҹә көмәк едә биләр?

9. Машын сүрмәји өјрәнән тәләбә һансы үсулларла ваҹиб дәрсләр өјрәнир?

⁹ Машын сүрмәји өјрәнән тәләбә нүмунәсинә гајыдаг. О һансы үсулларла өјрәнир? Јанында отуран тәлиматчыја диггәтлә гулаг асмагла вә диҝәр сүрүҹүләри мүшаһидә етмәклә. Мәсәлән, тәлиматчы тәләбәјә башга сүрүҹүјә өтмә әмәлијјатыны иҹра етмәјә јол верән сүрүҹүнү ҝөстәрә биләр. Јахуд да дөнмә ишыгларыны јандыран сүрүҹүнү ҝөстәрә биләр. Бу ҹүр нүмунәләр әсасында тәләбә машын сүрәркән тәтбиг едә биләҹәји ваҹиб дәрсләр өјрәнәҹәк.

10. Шаҝирдин руһани ҹәһәтдән инкишаф етмәсинә нә көмәк едәҹәк?

¹⁰ Ејнилә дә, һәгигәт јолуна гәдәм гојан шаҝирд тәкҹә мүәллиминдән јох, Јеһованын садиг хидмәтчиләринин нүмунәсиндән дә јахшы шејләр өјрәнир. Демәли, шаҝирдин руһани ҹәһәтдән инкишаф етмәсиндә нәјин бөјүк көмәји олаҹаг? Ибадәт ҝөрүшләриндә иштирак етмәјин. Јығынҹагларда ешитдији илаһи тәлим шаҝирдин билијини даһа да дәринләшдирәҹәк, иманыны мөһкәмләндирәҹәк, Аллаһа мәһәббәтини артырмаға көмәк едәҹәк (Һәв. 15:30—32). Һәмчинин мүәллим шаҝирди јығынҹагда онунла охшар вәзијјәтләрдә олан баҹы-гардашларла таныш едә биләр. Шаҝирд јығынҹагда мәсиһи мәһәббәтини әмәлдә ҝөстәрән баҹы-гардашларын ҝөзәл нүмунәсинин шаһиди олаҹаг. Мисал үчүн, нөвбәти вәзијјәтләр ола биләр.

11. Шаҝирд јығынҹагда һансы нүмунәләри ҝөрә биләр вә бу она неҹә тәсир бағышлаја биләр?

¹¹ Биринҹи вәзијјәт: Өвладыны тәк бөјүдән шаҝирд јығынҹагда һансыса бир баҹынын да ејни вәзијјәтдә олдуғуну мүшаһидә едир. Баҹынын балаҹа ушаглары илә јығынҹаға ҝәлмәк үчүн нә гәдәр чалышдығыны ҝөрмәк она бөјүк тәсир бағышлајыр. Икинҹи вәзијјәт: Сигарети атмаға чалышан шаҝирд белә бир проблемин өһдәсиндән ҝәлмиш тәблиғчи илә таныш олур. Һәмин тәблиғчи шаҝирдлә бөлүшүр ки, Јеһоваја мәһәббәтинин артмасы ону Јеһованын әмрләрини јеринә јетирмәјә неҹә тәшвиг етди (2 Кор. 7:1; Филип. 4:13). Гардашын һәјат һекајәси вә онун шаҝирдә «сән дә буну баҹарарсан» демәси шаҝирддә бөјүк әминлик јарадыр. Үчүнҹү вәзијјәт: Әҝәр шаҝирд ҝәнҹ гыздырса, ҝәнҹ баҹымызын Јеһованын Шаһиди кими һәјатдан неҹә мәмнунлуг дујдуғуну мүшаһидә едир. Баҹынын һәмишә белә севинҹ долу олмасы шаҝирддә бунун сәбәбини билмәк истәји ојадыр.

12. Нәјә ҝөрә дејә биләрик ки, шаҝирд һазырламаг ишиндә јығынҹагдакы һәр бир тәблиғчинин әмәји вар?

¹² Шаҝирд сәдагәтли тәблиғчиләрин нүмунәсиндә Исанын «Аллаһы вә башгаларыны севмәк» әмринә риајәт етмәјин нә демәк олдуғуну өјрәнәҹәк (Јәһ. 13:35; 1 Тим. 4:12). Бундан әлавә, гејд етдијимиз кими, шаҝирд онунла охшар чәтинликләрин өһдәсиндән ҝәлән тәблиғчиләрин дә нүмунәсиндән чох шеј өјрәнә биләр. Бу нүмунәләрин әсасында о баша дүшәҹәк  ки, Мәсиһин шаҝирди олмаг үчүн һансы дәјишикликләри етмәлидир (Ган. 30:11). Јығынҹагдакы һәр бир кәс шаҝирдин инкишафына мүхтәлиф јолларла төһфә верә биләр (Мәт. 5:16). Јығынҹаға ҝәлән шаҝирди руһландырмаг үчүн шәхсән сиз нә едирсиниз?

13, 14. Иса руһдан дүшән һәвариләрилә неҹә давранмышды?

¹³ Биз истәјирик ки, гејри-фәал баҹы-гардашларымыз Исанын «шаҝирд һазырлајын» тапшырығыны јенидән иҹра етсин. Бу саһәдә онлара неҹә көмәк едә биләрик? Ҝәлин ҝөрәк Иса руһдан дүшән һәвариләри илә неҹә рәфтар етмишди.

¹⁴ Исанын јерүзү хидмәтинин сонунда өлүмүнә чох аз галмыш шаҝирдләри ону гојуб гачдылар (Марк 14:50; Јәһ. 16:32). Бәс Иса бир мүддәтлик зәифлик ҝөстәрән һәвариләрилә неҹә рәфтар етди? Дириләндән гыса мүддәт сонра Иса бәзи шаҝирдләринә деди: «Горхмајын, ҝедин гардашларыма дејин ки, [дирилмишәм]» (Мәт. 28:10а). Иса һәвариләриндән әлини үзмәмишди. Һәтта ону атыб ҝетсәләр дә, онлара гардашларым дејирди. Јеһова кими, Иса да мәрһәмәтли вә бағышлајан иди (2 Пад. 13:23).

15. Тәблиғ етмәји дајандыран диндашларымыза неҹә јанашырыг?

¹⁵ Ејнилә, биз дә тәблиғ етмәји дајандыран диндашларымыз үчүн чох нараһатыг. Онлар бизим баҹы-гардашымыздыр, биз онлары севирик. Онларын әввәлләр, бәлкә дә, узун илләр Јеһованын јолунда ҝөстәрдикләри мәһәббәти һәлә дә хатырлајырыг (Ибр. 6:10). Онлар үчүн чох дарыхырыг (Лука 15:4—7). Иса кими, биз дә онлара гајғымызы һансы үсулларла ҝөстәрә биләрик?

16. Гејри-фәал баҹы-гардашларымыз үчүн нараһат олдуғумузу неҹә ҝөстәрә биләрик?

¹⁶ Гејри-фәаллары меһрибанлыгла јығынҹаға дәвәт един. Иса һәвариләрини руһландырмаг үчүн онлары тәшкил етдији бир ҝөрүшә чағырмышды (Мәт. 28:10б; 1 Кор. 15:6). Ејнилә, биз дә гејри-фәаллары ибадәт ҝөрүшүнә дәвәт едә биләрик. Биз баша дүшүрүк ки, буну бир нечә дәфә етмәк лазым ҝәлә биләр. Шаҝирдләри дәвәти гәбул едиб ҝәләндә Иса севинмишди. Гејри-фәал баҹы-гардашымыз ибадәт ҝөрүшүнә ҝәләндә биз дә севинәҹәјик (Мәт. 28:16; Лука 15:6 ајәләри илә әлагәләндирин).

17. Гејри-фәал диндашымыз ибадәт ҝөрүшүнә ҝәләндә она неҹә мүнасибәт ҝөстәрмәлијик?

¹⁷ Сәмими гаршылајын. Шаҝирдләри илә ҝөрүшәндә Иса онлары хош гаршылады, сөһбәтә өзү башлады (Мәт. 28:18). Бәс гејри-фәал диндашымыз ибадәт евинә дахил оланда биз она неҹә мүнасибәт ҝөстәрәҹәјик? Биз өзүмүз тәшәббүс ҝөстәриб ону меһрибанлыгла гаршыламалыјыг. Әввәл-әввәл, ола билсин, нараһат олаҹағыг ки, она нә дејәк. Ону утандыраҹаг һеч нә демәмәли, садәҹә ону ҝөрдүјүмүз үчүн чох севиндијимизи сөјләјә биләрик.

18. Гејри-фәаллары јенидән тәблиғ етмәјә неҹә тәшвиг едә биләрик?

¹⁸ Онларда өзләринә гаршы әминлик јарадын. Јәгин Иса бүтүн дүнјада тәблиғ етмәк тапшырығыны верәндә шаҝирдләри бунун өһдәсиндән ҝәлә билмәјәҹәкләрини дүшүнүрдүләр. Иса онларда әминлик јаратмаг үчүн белә демишди: «Һәмишә сизинләјәм» (Мәт. 28:20). Бу сөзләрин көмәји дәјди? Бәли. Бундан чох кечмәмиш онлар «мүждәни дурмадан билдирир, инсанлара өјрәдирдиләр» (Һәв. 5:42). Еләҹә дә гејри-фәаллары јенидән тәблиғ етмәк фикри горхуда биләр. Буна ҝөрә дә  онлары буну баҹараҹагларына әмин етмәк лазымдыр. Биз онлары архајын едә биләрик ки, тәблиғдә тәк олмајаҹаглар. Онлар јенидән тәблиғ етмәјә башлајанда онларла әмәкдашлыг едә биләрик. Јенидән хош хәбәрин тәблиғиндә иштирак етмәјә онлара көмәк етдијиниз үчүн сизә миннәтдар олаҹаглар. Гејри-фәаллара баҹы-гардашымыз кими јанашсаг, онлар јенидән фәал ола биләрләр вә бу, бүтүн јығынҹаға севинҹ бәхш едәҹәк.

19. Бизим амалымыз нәдир вә нәјә ҝөрә?

¹⁹ Шаҝирд һазырламаг ишимизи нә вахта гәдәр давам етдирмәлијик? Бу дөврүн јекунуна кими (Мәт. 28:20; Лүғәтдә «Дөврүн јекуну» ифадәсинә бахын). Бәс биз о вахта гәдәр тәблиғи давам етдирә биләҹәјик? Биз буна гәтијјәтлијик! Биз севә-севә вахтымызы, ҝүҹүмүзү, вәсаитимизи «әбәди һәјата апаран јолда јеримәјә мејли оланлары» тапмаға сәрф едирик (Һәв. 13:48). Бунунла Исанын нүмунәсини изләмиш олуруг. О демишди: «Мәним јемәјим мәни ҝөндәрәнин ирадәсини јеринә јетирмәк вә Онун бујурдуғу иши тамамламагдыр» (Јәһ. 4:34; 17:4). Бизим дә амалымыз будур. Бизә һәвалә олунан иши тамамламаг истәјирик (Јәһ. 20:21). Истәјирик ки, бу ишдә башгалары да, о ҹүмләдән гејри-фәал тәблиғчиләр дә ахыра кими бизимлә олсун (Мәт. 24:13).

20. Филиппилиләрә 4:13 ајәсинә әсасән, нәјин сајәсиндә Исанын тапшырығыны јеринә јетирә биләрик?

²⁰ Билирик ки, Исанын бу ваҹиб тапшырығыны јеринә јетирмәк елә дә асан дејил. Анҹаг биз бу ишдә тәк дејилик. Иса бизимлә олаҹағына сөз вериб. Биз шаҝирд һазырламаг тапшырығыны Аллаһын әмәкдашлары кими иҹра едирик (1 Кор. 3:9). Буна ҝөрә дә биз бу иши баҹараҹағыг. Бу тапшырығы јеринә јетирмәк вә башгаларына да бу саһәдә көмәк етмәк бизим үчүн бөјүк шәрәфдир! (Филиппилиләрә 4:13 ајәсини охујун.)