1. Inoñnaga ni kaat Matéô 28:18-20, imbe oda Yésu a bi ti bikristen?

I MBUS nyemb yé yak ni bitugne gwé, Yésu a bi pémél banigil bé ba ba bi kodba i Galiléa. A bééna jam li li yé nseñ ngandak i kal bo. I jam li li bé le kii? Di tehe jo i kaat Matéô 28:18-20.​—Añ.

2. Kii di ga tehe munu yigil ini?

² Oda i Yésu le di yilha bôt banigil i mbéñge bagwélél ba Djob bobasôna. Di béñge mambadga maa, ma ma gwé maada ni nson Yésu a bi ti bés. I bisu i yé le: U héya le di ñañle bôt mambén ma Djob, kii ipe di nlama boñ? I nyônôs iba: Lelaa batéé likalô bobasôna i likoda, ba nla hôla banigil Bibel i hol i pes mbuu? I nyônôs aa: Kii di nla boñ inyu hôla bilôk bikéé bi bôlôm ni bi bôda bi bi bi waa téé likalô, le ba témb ba bôdôl yilha bôt banigil?

3. Kii i tôbôtôbô Yésu a bi kal le di boñ?

³ Yésu a bi pot bé ni malép i nyo. Di nlama niiga bôt i mam momasôna a bi ti oda le di boñ. Ndi di nlama bé yan jam jada li li yé nseñ ngandak. Yésu a bi kal bé le: ‘Ni niiga bo mam momasôna me bi ti bé oda le ni boñ.’ Ndi a bi kal le: Ni niiga bo “i nôgôl mam momasôna me bi ti bé oda le ni boñ.” lnyu noñ maéba ma Yésu mana ngéda di niiga mut Bibel, di nlama bé ndigi niiga nye  kii a nlama boñ, ndi di nlama ki unda nye lelaa a boñ mo. (Minson mi baôma 8:31) Inyuki i yé loñge le di boñ hala?

4. I nôgôl ngim mbén, hala a nkobla le kii? Ti hihéga.

⁴ I “nôgôl” ngim mbén i nkobla le di boñ i yom mbén i i nkal. Inyu yi lelaa di nla niiga mut i nôgôl i mam Kristô a bi pot, di yoñ hihéga. Lelaa mut a nsômbôl nigil i luk matôa a mboñ inyu nôgôl mambén ma nluga? Malét wé a nkena ndugi nye i ndap suklu, a niiga nye mambén ma momasôna. Ndi inyu boñ le a niiga nye lelaa a nôgôl mambén ma, a nlama boñ jam lipe. Bo iba ba njôp matôa, ba kee nloñ matôa, ndi malét wé a unda nye lelaa a nla noñ i mam a niiga nye. Kii hihéga hini hi niiga bés?

5. Inoñnaga ni kaat Yôhanes 14:15 lôñni kaat 1 Yôhanes 2:3, kii di nlama niiga banigil Bibel i boñ? Ti dihéga.

⁵ I ngéda di niiga bôt Bibel, di nlama niiga bo kii Djob a mbat le di boñ. Ndi di nlama bé telep ha. Di nlama ki niiga bo i nôgôl i mam ba nigil. (Añ Yôhanes 14:15; 1 Yôhanes 2:3.) Kii hihéga, di nla unda banigil Bibel lelaa ba nla nôgôl matiñ ma Bibel i suklu, i bôlô tole ngéda ba yé mintuk. Di nla toñle bo lelaa bésbomede di bi noñ matiñ ma Bibel i niñ yés, lelaa ma bi sôñ bés, ma hôla ki bés i yoñ makidik malam. I ngéda di yé ni banigil Bibel, di nla soohe Yéhôva le a ti bo mbuu mpubi le u éga bo.​—Yôhanes 16:13.

6. Kii ipe di nla boñ inyu niiga bôt i nôgôl mambén ma Yésu?

⁶ Kii ipe di nla boñ inyu niiga bôt i nôgôl mambén ma Yésu? Di nlama hôla banigil Bibel i bana ngôñ i yilha bôt banigil. Inyu ngim banigil Bibel, i yi le ba nlama téé likalô i nkônha bo woñi. Ndi di nlama hônba bo, di hôla ki bo i tibil nok biniigana bi Bibel kayéle hémle yap i bôdôl nañ ndék ni ndék. I mbus, miñem nwap mi ga tinde bo i bana ngôñ i téé likalô. Mambe makeñge di nla gwélél inyu hôla banigil Bibel i bana ngôñ i téé likalô?

7. Lelaa u nla hôla nnigil Bibel i bana ngôñ i añle bôt bape ñañ nlam?

⁷ Di nla bat nnigil Bibel mambadga mana: “Ibôdôl nu u noñ matiñ ma Bibel, baa u ntehe ngim mahéñha i niñ yoñ? Baa u nhoñol le bôt bape ba nla bana ngôñ i nok biniigana bi? Kii u nla boñ inyu hôla bo?” (Bingéngén 3:27; Matéô 9:37, 38) Unda nnigil Bibel mapep ma ma yé ikété Nkuu wés bisélél inyu niiga, u nwas nye a pohol lipep a nhoñol le li nla hôla bôt bé ba lihaa, mawanda mé tole mawanda mé ma bôlô. Ti nye jôga li mapep mu. Niiga nye lelaa a nla ti mut lipep jada mu ibabé le a babaa nye. I ngéda mimañ mi ga neebe le nnigil Bibel a bôdôl téé likalô ni likoda, u nlama ba nye ipañ inyu unda nye lelaa ba mboñ.​—Ñañal 4:9, 10; Lukas 6:40.

8. Inyuki i yé nseñ le banigil Bibel ba bana gwéha ikeñi inyu Yéhôva ni inyu mut wap libôk? (Béñge yak minkéñék mi matila le “ Lelaa di nla hôla banigil Bibel i kéñbaha gwéha inyu Djob?”)

⁸ Di hôya bañ le Yésu a bi bat le di niiga bôt bape i “nôgôl mam momasôna” a bi ti oda le di boñ. Yak mambén mana mo ima le di gwés Nyambe ni mut wés libôk ma  yé mukété, ma gwé ki maada ni nson wés likalô. (Matéô 22:37-39) Mambe maada? Njom i bisu bisu i i ntinde bés i téé likalô i yé gwéha inyu Djob ni inyu mut wés libôk. Ndi ngim banigil Bibel i nkon woñi i téé likalô. Di nlama kwés bo nkaa le Yéhôva a ga hôla bo i yémbél woñi u bôt ba binam. (Tjémbi 18:2-4; Bingéngén 29:25) Minkéñék mi matila mi mi nkiha ni yigil ini, mi ntoñle bés mam di nla boñ inyu hôla nnigil Bibel i kéñbaha gwéha yé inyu Djob. Nano, kii likoda li nla boñ inyu hôla bôt ba ntip yila banigil i ke ni bisu i unda gwéha yap inyu mut wap libôk?

9. Munu hihéga hi mut a nigil i luk matôa, mambe manjel malét wé a nla gwélél inyu niiga nye mam ma yé nseñ?

⁹ Di témb munu hihéga hiés hi mut a nigil i luk matôa. I ngéda a nluk, malét wé a bak nye ha ipañ, mambe manjel malét a nla gwélél inyu niiga nye? Pog, a nlama nôgôl i yom malét wé a nkal nye. Iba, a nlama béñge dihéga di bôt bape ba ba nluk matôa. Kii hihéga, malét wé a nla unda nye nluk matôa numpe nu a nti njel le litôa lipe li tagbe. Tole a nla unda nye nluk matôa nu a nsuhus mapubi ma litôa jé ni juu, inyu boñ le i bôt ba nlo nye i bisu ba tibil tehe njel. I nwet a nigil i luk matôa a nla nigle dihéga di.

10. Kii i nla hôla nnigil Bibel i hol i pes mbuu?

¹⁰ Nlélém jam won u yé ni mut nu a nigil Bibel. Ngéda a mbôdôl gwélél Yéhôva, malét wé a niiga nye ngandak mam, ndi yak dihéga di bôt ba ba ngwélél Yéhôva di niiga nye ngandak mam. Jon, kii i nla hôla nnigil Bibel i hol i pes mbuu? I ke i makoda. Inyuki di nkal hala? I mam a ga nok likoda ma ga niiga nye, ma lédés hémle yé, ma hôla ki nye le gwéha yé inyu Yéhôva i kônde nañ. (Minson mi baôma 15:30-32) I ngéda ba yé i likoda, nniiga a nlama hôla nye i kwel ni bilôk bikéé bi bi mboma minlélém mi mandutu. Jam lipe li yé le, i likoda, nnigil Bibel a ga tehe bikristen bipe bi bôlôm ni bi bôda, bi bi ñunda gwéha yap.

11. Dimbe dihéga nnigil Bibel a nla boma i likoda? Lelaa dihéga di di nla hôla nye?

¹¹ Di yoñ ngim dihéga. Nnigil Bibel nu a néñés bon bé nyetama a nlo i likoda, a boma sita yada i i néñés bon bé nyetama kiki nye. Hala a ntihba nnigil Bibel nu, i tehe biliya gwobisôna sita yés i mboñ i lona disiina tjé di bon i ndap Ane. Nnigil Bibel, nu a njo sañ inyu nwas siga a mboma mankéé wés nu a bé ôt siga ngéda kôba, ndi a bi pam i nwas yo. I mankéé nu a ntoñle nnigil Bibel lelaa i ngéda gwéha yé inyu Yéhôva i bi nañ, hala a bi ti nye ngui i nôgôl mambén ma Djob. (2 Korintô 7:1; Filipi 4:13) I mbus, a kal nnigil Bibel nu le: “Yak we u nla nwas siga.” Bibuk bi, bi ntihba nnigil Bibel ngandak inyule a nyi le i nwet a mpôdôs nye, a bi bana nlélém ndutu kiki nye. Hingonda hi hi nigil Bibel hi nlo i ndap Ane, hi tehe sita i bo nye ba nla ba sega, i nkon maséé i gwélél Yéhôva. Hala a mboñ le a bana ngôñ i yi inyuki sita i i yé maséé hala hiki ngéda.

12. Inyuki di nkal le hiki mut ikété likoda a nla hôla banigil Bibel?

¹² I ngéda banigil Bibel ba nyi niñ i ngandak bagwélél ba Yéhôva, dihéga  tjap di nhôla banigil Bibel ba, i nôgôl mbén Kristô i i nkal le di gwés Nyambe ni mut wés libôk. (Yôhanes 13:35; 1 Timôtéô 4:12) Kiki di mbôk di kal, nnigil Bibel a nla nigil ngandak mam ni dihéga di bikristen di di mboma minlélém mi mandutu kii nye. Dihéga di bikristen di nla ki hôla nnigil Bibel i nok le a nla boñ mahéñha inyu yila nnigil Kristô. (Ndiimba Mbén 30:11) Hiki mut ikété likoda a nla yoñ ngaba i hôla banigil Bibel i hol i pes mbuu. (Matéô 5:16) Baa yak we u mboñ biliya i ti banigil Bibel ba nlo makoda makénd?

13-14. Lelaa Yésu a bi hôla baôma ngéda ba bi nimis makénd map?

¹³ Di gwé ngôñ i hôla lôk kéé i bôlôm ni i bôda i i bi waa téé likalô, le ba témb ba bôdôl nôgôl mbén Kristô i i mbat le di yilha bôt banigil. Mahôla Yésu a bi ti baôma bé ma ñunda bés kii di nla bon i len ini.

¹⁴ Ndék ngéda ilole Yésu a nwo, a ma mal nson wé hana ’isi, baôma ‘bobasôna ba bi tjôô nye, ba ke ngwéé.’ (Markô 14:50; Yôhanes 16:32) Lelaa Yésu a bi hôla baôma kiki ba bi nimis makénd map? Ndék ngéda i mbus bitugne gwé, Yésu a bi boma ngim banigil, a kal bo le: “Ni kon bañ woñi! Kena, leglana lôktata le [me ntuge].” (Matéô 28:10a) Yésu a bi lehel bé ñem inyu baôma bé. To hala kiki ba bi tjôô nye, a bi kônde sébél bo le “lôktata.” Kiki Yéhôva, Yésu a bééna konangoo, a yik ki nwéhél.​—2 Bikiñe 13:23.

15. Lelaa di ntehe i bôt ba bi waa téé likalô?

¹⁵ Yak bés di ntôñ i bôt ba bi waa téé likalô. Ba yé bilôk bikéé gwés, di ngwés bo! Di ngi hoñlak bôlô yap ba bi sélél Yéhôva, bape ba bi sal hala inyu ngandak nwii. (Lôk Héber 6:10) Di nhôya bé bo! (Lukas 15:4-7) Kiki Yésu, kii di nla boñ inyu unda le di ntôñ bo?

16. Lelaa u nla unda le u ntôñ lôkisoñ i i bi waa téé likalô?

¹⁶ Naña bo likoda. Njel wada Yésu a bi gwélél inyu ti baôma bé makénd i yé le a bi naña bo likoda. (Matéô 28:10b; 1 Korintô 15:6) Yak bés i len ini, di nla ti bilôk bikéé bi bi waa téé likalô makénd, ibale di naña bo le ba loo makoda. Di nyi le, i nla béda le di boñ hala ngandak ngélé ilole ba neebe. Ibabé pééna, Yésu a bi kon maséé ngéda ba bi neebe nsébla wé.​—Hégha ni Matéô 28:16 ni Lukas 15:6.

17. Kii u nlama boñ ibale mankéé nu a bi waa téé likalô a nlo likoda?

¹⁷ Leege bo ni ñem woñ wonsôna. Yésu a bi leege banigil bé i ngéda ba bi lo i boma nye; nyen a bi bôk a pôdôs bo. (Matéô 28:18) Lelaa w’a boñ ibale mankéé wés nu a bi waa téé likalô a nlo likoda? Di nlama leege nye ni ñem wés wonsôna. Bebek di nla kon woñi le d’a yi bé kii di kal nye. Ndi di tééñga bañ nye ni mambadga, di nla ndik kal nye le di yé maséé i tehe nye.

18. Lelaa u nla lédés manyuñ nu a bi waa téé likalô?

¹⁸ Lédés nye. Bebek le banigil ba Yésu ba bi kon woñi le ba ga la bé téé likalô ni nkoñ ’isi wonsôna. Ndi Yésu a bi lédés bo i ngéda a bi kal le: “Me yé ni  bé dilo tjodisôna.” (Matéô 28:20) Baa hala a bi lédés banigil bé? Ñ. Inyule i mbus ndék ngéda, ba bé ‘niiga ba añlak ñañ nlam.’ (Minson mi baôma 5:42) I lôk kéé i bi waa téé likalô i gwé ngôñ le di lédés bo. Bebek le ba nkon woñi i tiimba bôdôl téé likalô. Ndi di nla kal bo le ba ga ba bé botama ngéda ba ga ke likalô. Di ga ba bebee i ke ni bo likalô. Ibabé pééna, ba ga kon maséé ni mahôla més ngéda ba ga bana ngôñ i tiimba téé likalô. Ibale di mbéñge lôk kéé yés i i bi waa téé likalô ni mis malam, di hôlga bo, ba ga témb ba bôdôl téé likalô, likoda jolisôna li ga kon ki maséé.

19. Sômbôl yés i yé le kii, inyuki?

¹⁹ Letee ni ngéda mbe d’a téé likalô, di yilha ki bôt banigil? Ntel wonsôna d’a niñ munu i mamélél ma nkoñ ’isi. (Matéô 28:20; béñge bibuk bini le “Mamélél ma nkoñ ’isi” i Ndoñi i bibuk bi Bibel.) Baa d’a mal nson Yésu a bi bééga bés? Sômbôl yés i yé hala! Di yé maséé i gwélél ngéda yés, ngui yés, ni moni nwés inyu yéñ i bôt ba ‘gwé libak lilam inyu kôhna niñ boga.’ (Minson mi baôma 13:48) I ngéda di mboñ hala di noñ ndémbél i Yésu. A bi kal le: “Bijek gwem bi yé le me boñ sômbôl i nu a bi om me, me mélés ki nson wé.” (Yôhanes 4:34; 17:4) Yak bés sômbôl yés i. Di gwé ngôñ i mal nson a bi bééga bés. (Yôhanes 20:21) Di gwé ki ngôñ le bôt bape ba loo ba gwel nson u lôñni bés, yak bilôk bikéé bi bi waa téé likalô.​—Matéô 24:13.

20. Inoñnaga ni kaat Filipi 4:13, inyuki di yé nkwoog nkaa le di ga mélés i nson Yésu a bi ti bés?

²⁰ I yé maliga le, i gwel i nson unu i ta bé jam li ntomb. Ndi di ngwel bé wo bésbotama. Yésu a bi bôn le a ga ba lôñni bés. Ngéda di ngwel nson unu ‘di yé baso bagwelnson ba Nyambe,’ ‘di podok kiki banigil ba Kristô.’ (1 Korintô 3:9; 2 Korintô 2:17) Jon, Yéhôva bo Yésu ba nhôla bés, inyu hala nyen di yé nkwoog nkaa le di nla mélés i nson u. Kinje bisai ni maséé i gwel nson unu ni i hôla bôt bape i boñ nlélém!​—Añ Filipi 4:13.