1. Sigun sa Mateo 28:18-20, anong pagbuot an itinao ni Jesus?

PAGKATAPOS kan pagkabuhay liwat ni Jesus, nagpahiling siya sa saiyang mga disipulo na nagkakatiripon sa Galilea. May importante siyang sasabihon sa sainda. Ano iyan? Mababasa iyan sa Mateo 28:18-20.—Basahon.

2. Anong mga hapot an pag-uulayan niyato?

² An pagbuot ni Jesus na gumibo nin mga disipulo aplikado man sa lambang saro sa mga lingkod nin Diyos ngunyan. Kaya, pag-ulayan ta an tulong hapot na konektado sa asignasyon na itinao sa sato ni Jesus. Inot, apuwera sa pagtukdo sa bagong mga disipulo kan manungod sa mga kahagadan nin Diyos, ano pa an dapat niyatong gibuhon? Ikaduwa, paano makakakontribwir an gabos na parahayag sa kongregasyon sa pag-uswag sa espirituwal kan mga tinutukduan sa Bibliya? Ikatulo, paano ta matatabangan an inaktibong mga kapagtubod na makikabtang giraray sa gibuhon na paggibo nin mga disipulo?

3. Anong espesipikong instruksiyon an iiniba ni Jesus sa saiyang pagbuot?

³ Malinaw an instruksiyon ni Jesus. Dapat niyatong itukdo sa mga tawo an mga bagay na ipinagbuot niya. Pero, dai ta paglingawan an sarong mahalagang detalye. An sinabi ni Jesus bakong: ‘Tukduan sinda kan gabos na bagay na ipinagbuot ko sa saindo.’ Imbes, an sinabi niya: Tukduan sinda “na utubon an gabos na bagay na ipinagbuot ko sa saindo.” Para masunod an espesipikong instruksiyon na iyan pag nagtutukdo sa sarong Bible study, kaipuhan na bako sana kitang mga paratukdo kundi mga tagagiya man. (Gibo 8:31) Taano ta arog kaiyan?

4. Ano an kahulugan kan pag-utob sa pagbuot? Iilustrar.

 ⁴ An “pag-utob” sa pagbuot nangangahulugan na pagsunod diyan. Tanganing iilustrar kun paano ta tutukduan an saro na utubon, o sunudon, an mga bagay na ipinagbuot ni Cristo, pag-isipan an halimbawang ini. Paano tinutukduan nin sarong driving instructor an saiyang mga estudyante na magsunod sa mga ley sa trapiko? Tibaad itukdo nguna kan instruktor sa laog kan klase an mga ley sa trapiko. Pero tanganing matukduan an saiyang mga estudyante na magsunod sa mga ley na iyan, may kaipuhan pa siyang gibuhon. Kaipuhan niyang ibanan asin giyahan sinda mantang aktuwal sindang nagmamaneho asin hinihinguwang iaplikar an mga nanudan ninda. Ano an manunudan ta diyan?

5. (a) Uyon sa Juan 14:15 asin 1 Juan 2:3, ano an kaipuhan niyatong itukdo sa satong mga Bible study na gibuhon ninda? (b) Magtao nin mga halimbawa kun paano ta gigiyahan an satong mga tinutukduan sa Bibliya.

⁵ Pag tinutukduan niyato sa Bibliya an iba, itinutukdo niyato sa sainda kun ano an hinahagad sa sato nin Diyos. Pero urog pa diyan an dapat tang gibuhon. Dapat niyatong tukduan an satong mga Bible study na iaplikar sa saindang pang-aroaldaw na buhay an mga nanunudan ninda. (Basahon an Juan 14:15; 1 Juan 2:3.) Paagi sa satong halimbawa, maipapahiling ta sa satong mga tinutukduan kun paano ninda maiaaplikar an panginot na mga prinsipyo sa Kasuratan pag sinda nasa eskuwelahan, trabaho, o pag naglilibang. Puwede kitang mag-istorya nin sarong pangyayari sa satong buhay para ipahiling sainda kun paano nagin proteksiyon sa sato an pag-aplikar sa paggiya kan Bibliya o kun paano iyan nakatabang sa sato na makagibo nin madunong na desisyon. Kaiba an satong tinutukduan, puwede kitang mamibi ki Jehova na giyahan siya kan banal na espiritu.—Juan 16:13.

6. Ano pa an kaipuhan tang gibuhon sa pagtukdo sa iba na utubon an mga pagbuot ni Jesus?

⁶ Ano pa an kaipuhan tang gibuhon sa pagtukdo sa iba na utubon an mga pagbuot ni Jesus? Kaipuhan niyatong tabangan an satong mga tinutukduan sa Bibliya na magkaigwa nin pagmawot na gumibo nin mga disipulo. May mga tinutukduan sa Bibliya na natatakot sa ideya na makikikabtang sinda sa paghulit. Kaipuhan tang magin mapasensiya mantang tinatabangan ta sindang mas masabutan an mga katotoohan sa Bibliya na makakapakusog kan saindang pagtubod. Dangan matataros kaiyan an saindang puso asin mapapahiro sindang maghulit. Ano an puwede tang gibuhon tanganing tabangan an satong mga tinutukduan na magkaigwa nin pagmawot na ihiras sa iba an maugmang bareta?

7. Paano niyato matatabangan an sarong tinutukduan na magkaigwa nin pagmawot na ihiras sa iba an maugmang bareta?

⁷ Puwede niyatong ihapot sa satong tinutukduan sa Bibliya: “Paano nakatabang sa buhay mo an pag-aplikar sa mga itinutukdo kan Bibliya? Sa hiling mo, kaipuhan daw na maaraman kan iba an mensahe kan Kahadian? Ano an puwede mong gibuhon para tabangan sinda?” (Tal. 3:27; Mat. 9:37, 38) Ipahiling sa tinutukduan an mga tract na yaon sa satong Toolbox sa Pagtutukdo asin papilion siya kun arin diyan an sa hiling niyang magugustuhan kan saiyang mga kapamilya, amigo, o katrabaho. Tawan an tinutukduan nin nagkapirang kopya kan mga tract na iyan. Praktison nindong duwa kun paano niya maiaalok an tract sa mataktikang paagi. Siyempre, pagkatapos na maaprubaran an satong tinutukduan bilang dai pa bawtisadong parahayag, kaipuhan na ibanan ta siya sa paghuhulit tanganing giyahan siya.—Par. 4:9, 10; Luc. 6:40.

8. Taano ta importante na an satong mga tinutukduan magkaigwa nin makusog na pagkamuot sa Diyos asin sa kapwa? (Hilingon man an kahon na “ Kun Paano Tatabangan an mga Tinutukduan sa Bibliya na Kumusog an Pagkamuot sa Diyos.”)

⁸ Tandaan na ininstruksiyunan kita ni Jesus na tukduan an iba “na utubon an gabos na bagay” na ipinagbuot niya. Siguradong kaiba diyan an  duwang pinakaimportanteng tugon—an kamutan an Diyos asin an kamutan an kapwa—na parehong konektadong marhay sa gibuhon na paghuhulit asin paggibo nin disipulo. (Mat. 22:37-39) Paano iyan konektado? An panginot na motibo sa pakikikabtang sa paghuhulit iyo an pagkamuot—pagkamuot sa Diyos asin pagkamuot sa kapwa. Natural sana para sa nagkapirang tinutukduan sa Bibliya na makamati nin takot pag naiisip nindang mahulit sinda. Pero puwede tang asiguraron sainda na sa tabang ni Jehova luway-luway nindang mahahali an pagkatakot sa tawo. (Sal. 18:1-3; Tal. 29:25) Ipinapahiling kan kahon na kaiba kan artikulong ini an mga puwede tang gibuhon para tabangan an satong tinutukduan na kumusog an pagkamuot niya sa Diyos. Dugang pa, ano an puwedeng gibuhon kan kongregasyon para tabangan an bagong mga disipulo na umuswag sa pagpahiling nin pagkamuot?

9. Sa ilustrasyon manungod sa nag-aadal na magmaneho, paano siya nakakanuod nin mahalagang mga leksiyon?

⁹ Pag-isipan giraray an ilustrasyon manungod sa sarong nag-aadal na magmaneho. Mantang nagmamaneho siya kataid an nagtutukdo saiya, paano siya nakakanuod? Paagi sa pagdangog sa nagtutukdo sa saiya asin sa pag-obserbar sa maingat na mga drayber. Halimbawa, puwedeng itukdo kan instruktor an sarong mapagpahunod na drayber na pinapasingit sa inutan niya an saro pang drayber. O tibaad itukdo niya an sarong drayber na makonsiderasyon na pinapaluya an headlight kan saiyang kotse tanganing dai masula an mga kasabatan niya. An siring na mga halimbawa nagtutukdo sa estudyante nin mahalagang mga leksiyon na puwede niyang iaplikar pag nagmamaneho.

10. Ano an makakatabang sa sarong tinutukduan na umuswag sa espirituwal?

¹⁰ Sa kaagid na paagi, an sarong tinutukduan sa Bibliya na nagpupuon na magbiyahe sa dalan na pasiring sa buhay nakakanuod bako lang sa nagtutukdo sa saiya kundi pati man sa marahayon na mga halimbawa kan ibang mga lingkod ni Jehova. Kaya, ano an makakatabang na marhay sa mga tinutukduan sa Bibliya na umuswag sa espirituwal? Pag-atender sa satong Kristiyanong mga pagtiripon. Taano? An basado sa Kasuratan na pagtutukdo na itinatao sa mga pagtiripon makakapararom sa saindang kaaraman, asin makakapakusog kan pagtubod saka pagkamuot ninda sa Diyos. (Gibo 15:30-32) Dugang pa, sa mga pagtiripon maipapabisto kan nagtutukdo an Bible study sa mga tugang na tibaad may mga pagkakapareho sa Bible study. Anong mga gibo nin Kristiyanong pagkamuot an puwedeng mahiling kan tinutukduan sa laog kan kongregasyon? Pag-isipan an minasunod na mga eksena.

11. Anong mga halimbawa an tibaad marisa kan tinutukduan sa laog kan kongregasyon, asin ano an puwedeng magin epekto kaiyan sa saiya?

¹¹ An sarong tinutukduan sa Bibliya na nagsosolong magurang inoobserbaran an sarong sister na nasa kaagid na sitwasyon. Natataros an puso kan tinutukduan na mahiling an grabeng paghihinguwa kan sister na makaatender sa Kingdom Hall kaiba an mga aki kaini. An sarong tinutukduan na nasasakitan ipundo an paninigarilyo nabisto an sarong parahayag na arog man kaiyan kaidto pero napangganahan iyan. Inistorya kan parahayag sa tinutukduan kun paano siya napahiro kan nagkukusog na pagkamuot niya ki Jehova na sunudon an mga pagbuot nin Diyos. (2 Cor. 7:1; Fil. 4:13) Pagkatapos na madangog an personal na eksperyensiya kan parahayag, mas nagkusog an buot kan tinutukduan kan asiguraron siya kan brother, “Maipupundo mo man ’yan.” Narisa nin sarong hoben na babaying tinutukduan sa Bibliya na ikinakaugmang marhay nin sarong hoben na sister an saiyang buhay bilang Saksi. Dahil sa nahihiling niyang kaugmahan kan sister, gusto niya man na maaraman pa kun taano ta pirming maugma an sister.

12. Taano ta masasabi niyato na an lambang saro sa kongregasyon may magigibo para tabangan an mga tinutukduan sa Bibliya?

¹² Pag nabibisto kan mga tinutukduan sa  Bibliya an manlain-lain na maimbod na parahayag, naaaraman ninda sa mga halimbawa kaini an buot sabihon kan pagsunod sa pagbuot ni Cristo na kamutan an Diyos asin an kapwa. (Juan 13:35; 1 Tim. 4:12) Dugang pa, arog kan napag-ulayan ta, makakanuod an tinutukduan sa Bibliya sa mga parahayag na napapaatubang sa mga kadipisilan na kaagid kan saiya. Nanunudan kan mga tinutukduan sa siring na mga halimbawa na kaya niyang gibuhon an kinakaipuhan na mga pagbabago para magin disipulo ni Cristo. (Deut. 30:11) An lambang saro sa laog kan kongregasyon makakatabang sa manlain-lain na paagi para umuswag sa espirituwal an mga tinutukduan sa Bibliya. (Mat. 5:16) Paano mo hinihinguwang pakusugon an mga tinutukduan sa Bibliya na nag-aatender sa mga pagtiripon?

13-14. Paano trinatar ni Jesus an mga apostol niyang nangluluya an buot?

¹³ Gusto niyatong tabangan an satong inaktibong mga tugang na makikabtang giraray sa pag-utob sa sugo ni Cristo na gumibo nin mga disipulo. Mahihiling ta sa paagi nin pagtratar ni Jesus sa mga apostol niyang pinangluyahan nin buot kun ano an puwede tang gibuhon ngunyan.

¹⁴ Sa pagtatapos kan ministeryo ni Jesus digdi sa daga kan madali na siyang magadan, “binayaan siya [kan gabos na apostol] asin nagdurulag an mga ini.” (Mar. 14:50; Juan 16:32) Paano trinatar ni Jesus an mga apostol kan temporaryo sindang nangluya? Dai nahaloy pagkatapos kan saiyang pagkabuhay liwat, sinabi ni Jesus sa nagkapira sa saiyang mga parasunod: “Dai kamo matakot! Sige, baretaan nindo an mga tugang ko [na ibinangon ako].” (Mat. 28:10a) Dai binayaan ni Jesus an saiyang mga apostol. Dawa binayaan ninda si Jesus, inapod niya pa man giraray sindang “mga tugang ko.” Arog ni Jehova, si Jesus mahihirakon asin mapagpatawad.—2 Ha. 13:23.

15. Ano an namamatian niyato manungod sa mga nagpundo sa pakikikabtang sa ministeryo?

¹⁵ Kaagid kaiyan, nagmamalasakit kitang marhay sa mga nagpundo sa pakikikabtang sa ministeryo. Mga tugang niyato sinda, asin namumutan ta sinda! Nagigirumduman pa niyato an maigot na paglilingkod ninda kaidto ki Jehova—an iba tibaad mga dekada pa ngani. (Heb. 6:10) Talagang nami-miss ta sinda! (Luc. 15:4-7) Bilang pag-arog ki Jesus, sa anong mga paagi ta puwedeng ipahiling an satong pagmalasakit sa sainda?

16. Paano niyato maipapahiling an satong pagmalasakit sa satong mga inaktibong tugang?

¹⁶ Mabuot sindang imbitaran. An sarong paagi na pinakusog ni Jesus an saiyang nangluluyang mga apostol iyo an pag-imbitar sa sainda sa sarong pagtiripon. (Mat. 28:10b; 1 Cor. 15:6) Kaagid kaiyan sa ngunyan, puwede tang madagka an mga inaktibo na mag-atender giraray sa mga pagtiripon. Aram ta na tibaad kaipuhan niyatong imbitaran sinda nin nagkapirang beses bago ninda akuon iyan. Siguradong ikinaugmang marhay ni Jesus na inako kan saiyang mga disipulo an saiyang imbitasyon.—Pagkumpararon an Mateo 28:16 asin Lucas 15:6.

17. Ano an dapat niyatong gibuhon pag nag-atender sa pagtiripon an sarong inaktibong tugang?

¹⁷ Akuon sinda nin udok sa puso. Kan makipaghilingan si Jesus sa mga disipulo niya, trinatar niya sinda sa paaging dai sinda mag-aalangan sa saiya; siya an nag-inot na makipag-ulay sa sainda. (Mat. 28:18) Ano an gigibuhon ta pag nag-abot sa Kingdom Hall an sarong inaktibo? Dapat na kita an mag-inot na magdulok saiya asin mabuot siyang akuon. Sa primero, tibaad dai ta aram kun ano an sasabihon saiya. Sa paaging dai man siya mapapasupog, puwede tang sabihon saiya kun gurano kita kaugma na nag-atender siya.

18. Paano ta mapapakusog an buot kan mga inaktibong parahayag?

¹⁸ Magtao nin sinserong pampakusog nin buot. Posibleng marhay na namatian kan mga disipulo ni Jesus na garo dai ninda kaya an sugo sainda na maghulit sa bilog na kinaban. Pinakusog ni  Jesus an mga parasunod niya paagi sa pagsabing: “Kaibanan nindo ako sa gabos na aldaw.” (Mat. 28:20) Nakatabang daw iyan? Iyo. Dai nahaloy, nagin sibot sinda sa “pagtutukdo asin pagpahayag kan maugmang bareta.” (Gibo 5:42) Kaipuhan man kan mga inaktibong parahayag nin pampakusog nin buot. Tibaad natatakot sindang maghulit giraray. Puwede ta sindang asiguraron na dai man sinda maghuhulit nin solo. Puwede ta sindang ibanan pag nakikikabtang na giraray sinda sa ministeryo. Siguradong maaapresyar ninda an satong tabang mantang nagpupuon na sindang maghulit giraray kan maugmang bareta. Pag minamansay asin tinatratar ta an mga inaktibo bilang satong mga tugang, puwedeng magkaigwa iyan nin marahayon na mga resulta sa kongregasyon.

19. Ano an determinado tang gibuhon, asin taano?

¹⁹ Sagkod nuarin ta ipagpapadagos an paggibo nin disipulo? Sagkod sa katapusan kan sistemang ini nin mga bagay. (Mat. 28:20; hilingon sa Glosaryo, “Pagtatapos kan sistema nin mga bagay.”) Mauutob ta daw an aspektong ini kan sugo ni Jesus? Determinado kitang gibuhon iyan! Nauugma kitang gamiton an satong panahon, kusog, asin mga pagsadiri para hanapon an mga “igwang pusong nasa tamang kamugtakan para sa buhay na daing katapusan.” (Gibo 13:48) Pag ginigibo ta iyan, inaarog ta an halimbawa ni Jesus. Sinabi niya: “An sakuyang kakanon iyo na gibuhon an kabutan niya na nagsugo sa sako asin na tapuson an saiyang gibuhon.” (Juan 4:34; 17:4) Iyan man an satong udok sa pusong pagmawot. Gusto niyatong tapuson an gibuhon na ipinagkatiwala sa sato. (Juan 20:21) Asin gusto niyatong magpadagos man na kaiba ta sa gibuhon na ini an iba, pati an mga inaktibo.—Mat. 24:13.

20. Sigun sa Filipos 4:13, taano ta kaya tang maisagibo an gibuhon na isinugo sa sato ni Jesus?

²⁰ Iyo, bakong madali an pag-utob sa dakulang sugo ni Jesus. Dawa arog kaiyan, dai kita nagsosolo sa gibuhon na ini. Ipinanuga ni Jesus na makakaibanan ta siya. Isinasagibo ta an asignasyon na gumibo nin disipulo bilang “mga kapwa trabahador nin Diyos” asin “kaibanan ni Cristo.” (1 Cor. 3:9; 2 Cor. 2:17) Kun siring, kaya tang maisagibo iyan. Pribilehiyo nanggad asin kaugmahan niyato na isagibo an asignasyon na ini asin tabangan an iba na iyan man an gibuhon!—Basahon an Filipos 4:13.