1. Folem Matiu 28:18-20, ?Jisas i givim wanem oda?

AFTA we Jisas i laef bakegen, hem i kamtru long ol disaepol blong hem we oli stap wanples long Galili. Hem i gat wan impoten samting blong talem long olgeta. ?Wanem samting ya? Ol tok blong hem i stap long Matiu 28:18-20.—Ridim.

2. ?Wanem ol kwestin we bambae yumi tokbaot long stadi ya?

² Oda we Jisas i givim blong pulum ol man oli kam disaepol, i go tu long olgeta man blong God tede. Taswe, bambae yumi tokbaot tri kwestin we i joen wetem wok ya. Faswan, ?yumi mas mekem wanem taem yumi tijim ol niu disaepol long samting we God i wantem yumi blong mekem? Seken, ?olsem wanem evri pablisa long kongregesen oli save joen blong halpem ol Baebol studen blong oli gohed gud? Mo namba 3, ?olsem wanem yumi save halpem ol Kristin we oli no moa prij, blong oli joen bakegen long wok blong mekem disaepol?

3. ?Wanem impoten poen i stap insaed long oda blong Jisas?

³ Instraksen blong Jisas i klia. Yumi mas tijim ol man long oda ya blong Jisas. Be yumi no mas fogetem wan impoten poen. Jisas i no talem se: ‘Yufala i tijim olgeta long evri samting we mi talem long yufala.’ Be, hem i se: Yufala i tijim olgeta blong “oli folem olgeta tok ya we mi mi talem finis long  yufala.” Blong folem instraksen ya, yumi mas tijim Baebol studen long samting we hem i mas mekem, mo yumi mas soem olsem wanem blong mekem. (Wok 8:31) ?From wanem?

4. ?I minim wanem blong folem wan oda? Talem wan pijatok.

⁴ Blong “folem” wan oda, hemia i min se yumi obei long oda ya. Blong kasemsave olsem wanem blong tijim wan man blong i folem, o obei long oda blong Jisas, traem tingbaot pijatok ya. ?Olsem wanem wan man we i stap tijim ol narafala blong draev, i save tijim ol studen blong hem blong folem ol loa long saed blong rod? Fastaem, bambae hem i tijim ol studen blong hem long ol rul blong rod taem oli stap long klasrum. Be blong tijim ol studen blong oli obei long ol rul ya, hem i mas mekem wan narafala samting. Hem i mas stap wetem ol studen blong hem taem oli draevem trak long rod, mo lidim olgeta taem oli stap draev, blong oli folem samting we oli lanem. ?Yumi lanem wanem long pijatok ya?

5. (1) Folem Jon 14:15 mo 1 Jon 2:3, ?yumi mas tijim ol Baebol studen blong mekem wanem? (2) Talem sam eksampol we i soem olsem wanem yumi save lidim ol studen blong yumi.

⁵ Taem yumi stadi Baebol wetem ol narafala, yumi stap tijim olgeta long ol samting we God i wantem blong yumi mekem. (Ridim Jon 14:15; 1 Jon 2:3.) Eksampol, yumi save soem long ol studen olsem wanem oli save folem ol stamba trutok blong Baebol taem oli stap long skul, long wok, o taem oli spel. Yumi save tokbaot wan samting we i hapen long laef blong yumi, blong soem long olgeta se taem yumi folem ol advaes blong Baebol, hemia i protektem mo i halpem yumi blong mekem waes desisen. Taem yumi stap wetem ol studen blong yumi, yumi save prea long Jehova blong i givim tabu spirit blong lidim olgeta.—Jon 16:13.

6. ?Wanem moa i joen wetem wok ya blong tijim ol narafala blong folem oda blong Jisas?

⁶ ?Wanem moa i joen wetem wok ya blong tijim ol narafala blong folem oda ya blong Jisas? Yumi mas halpem ol Baebol studen blong oli wantem tumas blong mekem disaepol. Sam studen, maet oli fraet tumas blong prij. Taswe yumi mas gat longfala tingting taem yumi stap halpem olgeta blong oli kasemsave moa long ol trutok blong Baebol, mekem trutok i kasem hat blong olgeta, mo pulum olgeta blong tekem aksen. ?Yumi save mekem wanem blong studen i wantem tumas blong serem gud nius long narafala?

7. ?Olsem wanem yumi save halpem wan studen blong i wantem tumas blong prij long narafala?

⁷ Yumi save askem long ol Baebol studen ol kwestin olsem: “?Olsem wanem laef blong yu i kamgud moa taem yu akseptem mesej blong Kingdom? ?Yu ting se ol narafala tu oli mas harem mesej ya? ?Yu save mekem wanem blong halpem olgeta?” (Prov. 3:27; Mat. 9:37, 38) Soem ol traket we oli stap long Tijing Tulboks, mo letem studen i jusum wan we hem i ting se i stret long ol famle o fren, o long ol man long ples blong wok blong hem. Mo yu givim sam traket ya we hem i jusum. Yutufala i praktis blong soem olsem wanem blong givimaot traket ya. Yes i tru, afta we studen blong yumi i kam wan pablisa we i no baptaes, bambae yumi wantem stap wetem hem blong lidim hem.—Pri. 4:9, 10; Luk 6:40.

8. ?From wanem i impoten we studen i gat bigfala lav long God mo ol neba? (Luk bokis ya tu, “ ?Olsem Wanem Blong Halpem Studen Blong i Lavem God Moa?”)

⁸ Tingbaot se Jisas i askem yumi blong tijim ol narafala blong oli “folem olgeta tok” we hem i talem finis long yumi. Mo hemia i minim tufala stamba loa ya tu, blong lavem  God mo lavem neba blong yu, we tufala i joen wetem wok ya blong prij mo mekem disaepol. (Mat. 22:37-39) ?Olsem wanem nao oli joen? Taem studen i lavem God mo ol neba blong hem moa, bambae hem i wantem tumas blong prij. Maet sam studen oli fraet taem oli tingbaot wok blong prij. Be yumi save enkarejem olgeta se wetem help blong Jehova, sloslo bambae oli winim fasin ya blong fraet long man. (Sam 18:1-3; Prov. 29:25) Bokis long pej 4, i tokbaot ol step we i save halpem studen blong i lavem God moa. Be tu, ?kongregesen i save mekem wanem blong halpem ol niu disaepol blong oli soemaot lav moa?

9. Long pijatok ya, ?olsem wanem studen i lanem sam impoten lesen?

⁹ Traem tingbaot bakegen pijatok blong studen ya we i stap lanem blong draev. Taem hem i stap draev long rod wetem fulap trak, mo tija blong hem tu i sidaon i stap long saed, ?olsem wanem nao studen ya i stap gohed blong lan? Hemia taem hem i lesin long tija blong hem, mo long semtaem i wajemgud ol narafala draeva. Eksampol, maet tija i poentem wan draeva we i give way long wan narafala trak. O maet i soem wan draeva we i putum low beam, blong i no blaenem narafala draeva. Hemia sam impoten lesen we studen i save folem taem hem i stap draev.

10. ?Wanem i save givhan long wan Baebol studen blong i gohed gud?

¹⁰ Long sem fasin, wan Baebol studen we i stat blong mekem wok blong Jehova, i no jes lanem samting long tija blong hem, be long ol gudfala eksampol blong ol narafala man blong Jehova tu. Be, ?wanem nao i save givhan moa long hem blong i gohed gud? Hem i mas kam long ol Kristin miting. ?From wanem? Samting we hem i harem long ol miting bambae i givhan blong mekem save blong hem i kam bigwan moa, bilif blong hem i kam strong, mo i lavem God moa. (Wok 15:30-32) Antap moa, long ol miting, Baebol tija i save soem studen ya long ol brata sista we maet laef blong olgeta i klosap sem mak long laef blong hem. ?Wanem sam eksampol blong Kristin lav we studen i save luk long kongregesen? Hemia sam eksampol.

11. ?Wanem sam eksampol we wan studen i save luk long kongregesen, mo hemia i save halpem hem olsem wanem?

¹¹ Wan Baebol studen we i wan singel perens i luk wan Kristin sista we hem tu i wan singel perens. Taem hem i luk we sista ya i traehad blong kam long ol miting wetem ol pikinini blong hem, samting ya i pulum hem. Wan studen we i stap traehad blong lego smok, i save wan pablisa we hem tu i bin gat sem problem, be naoia hem i winim. Pablisa ya i talem long studen se taem hem i lavem Jehova moa, hemia i halpem hem blong obei long ol komanmen blong God. (2 Kor. 7:1; Fil. 4:13) Afta we hem i lesin long stori blong pablisa ya, studen i gat strong tingting taem pablisa ya i talem long hem se: “Yu tu yu save lego.” Wan yang woman we i stap stadi Baebol, i luk wan yang sista we i glad tumas blong stap olsem wan Witnes. Ale, samting ya i pulum hem blong wantem lanem moa from wanem sista ya i glad oltaem.

12. ?From wanem yumi save talem se evriwan long kongregesen oli gat wok blong halpem ol Baebol studen?

¹² Taem ol Baebol studen oli save ol defdefren pablisa, eksampol blong ol gudfala pablisa ya i save tijim olgeta blong folem oda ya blong Kraes blong lavem God mo neba. (Jon 13:35; 1 Tim. 4:12) Mo tu, olsem we yumi tokbaot finis, wan Baebol studen i save lanem olsem wanem ol pablisa oli dil wetem ol traem we i sem mak long hemia blong hem. Eksampol blong ol pablisa i save tijim studen se hem tu i  naf blong mekem sam jenis blong kam wan disaepol blong Kraes. (Dut. 30:11) Evriwan long kongregesen i save givhan long ol Baebol studen long ol defdefren rod, blong oli gohed gud. (Mat. 5:16) ?Yu yu mekem wanem blong enkarejem ol Baebol studen we oli stap kam long ol miting?

13-14. ?Olsem wanem Jisas i tritim ol aposol blong hem we oli slak?

¹³ Yumi wantem halpem ol brata sista blong yumi we oli no moa prij, blong oli prij bakegen mo folem oda blong Kraes blong mekem disaepol. Fasin we Jisas i tritim ol aposol we tingting blong olgeta i foldaon, i soemaot samting we yumi save mekem tede.

¹⁴ Smoltaem bifo we Jisas i ded, ol aposol “oli lego hem, oli ronwe.” (Mak 14:50; Jon 16:32) ?Olsem wanem Jisas i tritim ol aposol blong hem we oli slak long taem ya? Afta we hem i laef bakegen, hem i talem long tu man blong hem se: “!Yutufala i no fraet! Yutufala i go talem long ol brata blong mi se [mi mi laef bakegen].” (Mat. 28:10a) Jisas i no lego ol aposol blong hem. Nating se oli lego hem, be yet, hem i kolem olgeta se “ol brata blong mi.” Jisas i gat sore mo i fogivim man olsem Jehova.—2Ki 13:23.

15. ?Wanem filing blong yumi long olgeta we oli no moa prij?

¹⁵ Yumi tu yumi stap wari from olgeta ya we oli no moa prij. !Oli brata sista blong yumi mo yumi lavem olgeta tumas! Yumi tingbaot yet ol hadwok we oli mekem blong Jehova. Sam long olgeta oli bin wok had blong plante yia bifo we oli kam slak. (Hib. 6:10) !Yumi rili misim olgeta! (Luk 15:4-7) ?Olsem wanem yumi save folem fasin blong Jisas blong soem se yumi kea long olgeta?

16. ?Olsem wanem blong soem se yumi kea long olgeta we oli no moa prij o oli slak?

¹⁶ Invaetem olgeta. Wan rod we Jisas i mekem blong enkarejem ol aposol blong hem we oli slak, hemia taem i invaetem olgeta long wan miting. (Mat. 28:10b; 1 Kor. 15:6) Tede, yumi save enkarejem olgeta we oli no moa prij o oli slak, blong kam long ol miting. Yumi save se, maet yumi mas invaetem olgeta plante taem bifo we oli kam. I sua se Jisas i glad se ol disaepol blong hem oli akseptem invetesen blong hem mo oli go.—Skelem Matiu 28:16 mo Luk 15:6.

17. ?Yumi mas mekem wanem sipos wan pablisa we i no moa prij o i slak, i kamtru long Haos Kingdom?

¹⁷ Welkamem olgeta. Jisas i welkamem ol man blong hem, hem i no wet blong oli kam long hem, be hem i go mo i toktok long olgeta. (Mat. 28:18) ?Bambae yumi mekem wanem sipos wan pablisa we i no moa prij o i slak, i kamtru long Haos Kingdom? Yumi mas tekem fas step blong welkamem hem. Maet fastaem bambae yumi wari se bambae yumi talem wanem. Be blong no mekem hem i sem, yumi save talem nomo se yumi glad tumas blong luk hem.

18. ?Olsem wanem yumi save enkarejem ol pablisa we oli no moa prij?

¹⁸ Talem gudfala toktok blong enkarejem olgeta. Ating ol disaepol blong Jisas oli harem se oli no naf blong prij long olgeta ples long wol. Be Jisas i enkarejem olgeta taem i se: “Mi mi stap wetem yufala oltaem.” (Mat. 28:20) ?Tok ya i halpem olgeta? Yes. I no longtaem afta, oli bisi blong “tijim ol man mo blong talemaot gud nius.” (Wok 5:42) Ol pablisa tu we oli no moa prij, oli nidim we yumi enkarejem olgeta. Maet oli fraet taem oli tingbaot se bambae oli stat prij bakegen. Yumi save talem long olgeta se bambae oli no prij olgeta wan. Taem oli rere, yumi save joen wetem olgeta  long wok blong prij. I sua se bambae oli glad tumas we yumi sapotem olgeta, taem oli stat blong talemaot gud nius bakegen. Taem yumi tingbaot mo tritim olgeta olsem ol brata sista blong yumi, bambae yumi luk gudfala frut long kongregesen blong yumi.

19. ?Yumi wantem tumas blong mekem wanem, mo from wanem?

¹⁹ ?Bambae yumi gohed kasem wetaem blong mekem disaepol? Go kasem en blong sistem blong wol ya. (Mat. 28:20; yu luk Diksonari long tok ya “Lashaf blong sistem blong wol.”) ?Bambae yumi naf blong finisim wok ya we Jisas i givim long yumi? !Yes, yumi naf! Yumi glad blong yusum taem, paoa, mo mane blong yumi blong faenem olgeta ya we “oli stret blong kasem laef we i no save finis.” (Wok 13:48) Taem yumi mekem olsem, yumi stap folem eksampol blong Jisas. Hem i talem se: “Kakae blong mi i blong mekem wil blong hemia we i sanem mi, mo blong mi finisim wok we hem i givim long mi.” (Jon 4:34; 17:4) Mo hemia nao samting we yumi tu, yumi wantem tumas blong mekem. Yumi wantem finisim wok ya we hem i givim long yumi. (Jon 20:21) Mo yumi wantem se ol narafala wetem olgeta ya tu we oli no moa prij, oli holemstrong long wok ya wetem yumi.—Mat. 24:13.

20. Folem Filipae 4:13, ?from wanem yumi naf blong finisim wok ya we Jisas i givim long yumi?

²⁰ I no isi blong folem oda ya we Jisas i givim. Be, yumi no stap mekem wok ya yumi wan. Jisas i promes se bambae hem i stap wetem yumi. Taem yumi gohed long wok ya blong mekem disaepol, yumi stap “joen wetem God” mo “Kraes.” (1 Kor. 3:9; 2 Kor. 2:17) From samting ya, yumi naf blong finisim wok ya. !I naes tumas mo i wan privilej blong yumi mekem wok ya mo halpem ol narafala blong oli mekem olsem yumi!—Ridim Filipae 4:13.