1. Menurut Matius 28:18-20, perentah kai si ibereken Jesus?

KENCA Jesus ipekeke, ijumpaina murid-muridna si sangana pulung i Galilea. Lit perentah si penting si atena ipesehna man kalak e. Kai e? Perentahna e lit bas Matius 28:18-20.​—Baca.

2. Penungkunen kai saja kari si man bahasenta?

² Gundari pe, kerina umat Dibata arus ngelakoken perentah Jesus guna erban murid. Mari sibahas telu penungkunen si lit hubungenna ras tugas si enggo ibereken Jesus man banta. Si pertama, kai si arus silakoken selain ngajari murid si mbaru kerna perentah-perentah Dibata? Si peduaken, kai si perlu ilakoken kerina perberita bas runggun gelah banci nampati kalak si erlajar erban kemajun secara rohani? Si peteluken, uga kita banci nampati kalak si la aktif gelah mulihi ikut bas dahin erban murid?

3. Perentah penting kai si termasuk bas perentah Jesus?

³ Jelas kel perentah si ibereken Jesus eme arus siajari kalak kerna kai si enggo iperentahkenna. Tapi, lit si penting si la banci silupaken. Sanga iberekenna perentah e, labo bagenda nina Jesus, ‘Ajari kalak e kerina si enggo kuperentahken man kena.’ Tapi bagenda nina, ajari kalak e “ngelakoken kerina si nggo kuperentahken man kena.” Gelah banci silakoken perentah Jesus enda, la bias kita jadi guru saja, tapi arus ka sisampati kalak si erlajar ndalanken kai si ipelajarina. (Perb. 8:31) Engkai maka bage?

4. Kai ertina matuhi perentah? Ban perumpamanna.

 ⁴ “Ngelakoken” perentah ertina matuhi perentah e. Uga carana nampati kalak matuhi kai si iperentahken Kristus? Bayangken uga carana sekalak guru kursus maba motor ngajari murid-muridna matuhi peraturen lalu lintas. Banci saja sanga bas kelas enggo iajari guru e kerna peraturen lalu lintas man murid-muridna. Tapi guna ngajari murid-muridna uga carana matuhi peraturen, arus ia ikut ras kalak e sanga maba motor bas dalan. Janah sanga iusahaken kalak e ngelakoken kai si enggo ipelajarina, banci iberekenna nasehat si iperluken. Kai si banci sipelajari arah contoh e?

5. (a) Menurut Johanes 14:15 ras 1 Johanes 2:3, kai si perlu siajari man kalak si erlajar Pustaka? (b) Bereken contohna kerna uga kita banci nampati kalak si erlajar ndalanken prinsip-prinsip Pustaka.

⁵ Sanga siajari kalak kerna Pustaka, siajari kalak e kai si ipindo Dibata arah kita nari. Tapi lit ka si deban si arus silakoken. Arus siajari ia ndalanken kai si enggo ipelajarina. (Baca Johanes 14:15; 1 Johanes 2:3.) Arah pengalamenta, banci siajari ia uga carana ndalanken prinsip-prinsip Pustaka bas sekolah, bas ingan dahin, ntah pe sanga rekreasi. Banci siban sada contoh guna ncidahken uga ndalanken prinsip Pustaka banci ngelindungi kita arah bahaya. Ntah pe banci sisampati ia erban keputusen si mehuli. Selain si e, sanga ras kena ertoto, totokenlah gelah ibereken Jahwe kesah si badia man bana guna nampati ia.​—Joh. 16:13.

6. Kai si termasuk bas ngajari kalak si deban ngelakoken perentah Jesus?

⁶ Kai si termasuk bas ngajari kalak si deban ngelakoken perentah Jesus? Perlu sisampati kalak si erlajar gelah lit sura-surana erban murid. Piga-piga kalak si erlajar banci saja mbiar erberita. Emaka perlu kita sabar nampati ia gelah reh bagesna pengangkanna kerna kebenaren si lit bas Pustaka, gelah kena ku pusuhna kai si ipelajarina, janah tersuruh me ukurna ngelakoken kai si ipelajarina. Uga carata ngelakokenca?

7. Kai si banci silakoken guna nampati kalak si erlajar gelah tersuruh ukurna erberita?

⁷ Banci sisungkun penungkunen-penungkunen enda man kalak si erlajar: “Kai pengaruhna man bandu adi ilakokenndu kai si iajarken Pustaka? Reh ulina nge kegeluhenndu? Adi menurutndu, perlu ka nge kalak si deban megi berita enda? Kai si banci ilakokenndu guna nampati kalak e?” (Kua. 3:27; Mat. 9:37, 38) Cidahken man bana piga-piga risalah si lit bas Alat-Alat Pengajarenta janah suruh pilihna risalah si apai si akapna cocok man keluargana, temanna, ntah pe teman sada dahinna. Bereken man bana piga-piga risalah e. Ban latihen ras ia kerna uga carana mereken risalah e alu cara si mehuli. Sanga enggo ncukupi syarat kari ia jadi perberita si lenga iperidiken, sitemani janah sisampatilah ia erberita.​—Peng. 4:9, 10; Luk. 6:40.

8. Engkai maka penting ipebelin kalak si erlajar kekelengenna man Dibata bage pe kalak si deban? (Nen ka kotak “ Carana Mpebelin Kekelengen Kalak si Erlajar man Dibata.”)

⁸ Teruslah siinget perentah Jesus guna ngajari kalak “ngelakoken kerina” si iperentahkenna. E termasuk dua perentah si mbelinna eme engkelengi Dibata  bage pe kalak si deban. Duana perentah e lit hubungenna ras pendahin erberita bage pe erban murid. (Mat. 22:37-39) Adi sisampati kalak si erlajar matuhi duana perentah enda, e ertina sisampati ia erberita. Engkai? Adi reh belinna kekelengenna man Dibata bage pe man kalak si deban, tersuruh me ukurna erberita. Piga-piga kalak si erlajar banci saja mbiar erberita. Tapi, banci sipetetap ukurna maka alu penampat Jahwe reh dekahna lanai nge kari ia mbiar. (Msm. 18:2-4; Kua. 29:25) Kotak si lit bas artikel enda njelasken kai saja si perlu silakoken guna nampati kalak si erlajar gelah reh belinna kekelengenna man Dibata. Selain si e, kai si banci ilakoken runggun guna nampati murid-murid si mbaru gelah reh kelengna atena Jahwe ras kalak si deban?

9. Bas perumpaman murid si erlajar maba motor, alu cara kai saja murid e banci ndatken pelajaren si meherga?

⁹ Cuba ukuri mulihi perumpaman kerna kalak si erlajar maba motor ndai. Sanga latihen maba motor ia ras guruna, alu cara kai saja ia banci erlajar? Selain ibegikenna guruna, erlajar ka ia alu mperdiateken supir si deban. Contohna, ituduhken guruna man bana sekalak supir si mehuli si nggit mereken dalan man supir si deban, ntah pe sekalak supir si ngurangi sinar lampuna gelah lanai terangsa iakap supir si deban. Arah contoh-contoh si bage banci idatna pelajaren si meherga si banci ipakekenna kari sanga ia maba motor.

10. Kai si banci nampati kalak si erlajar erban kemajun rohani?

¹⁰ Kalak si erlajar Pustaka pe bage ka nge. Sanga enggo mulai ia ngelayani Jahwe, ia erlajar labo ngenca arah guruna saja, tapi arah usihen si mehuli si ibereken umat Jahwe si deban. Emaka, gelah kalak si erlajar banci maju secara rohani perlu ia reh ku perpulungen. Engkai? Kai si ibegina bas perpulungen, banci nambahi pemetehna kerna Kata Dibata, mpepaguh kinitekenna, ras mpebelin kekelengenna man Dibata. (Perb. 15:30-32) Selain si e, kalak si ngajari ia banci mpetandaken ia man turang senina si pengalamenna bali bagi ia. Idahna me kari kekelengen si icidahken turang senina bas runggun. Perdiateken piga-piga contoh enda.

11. Contoh kai saja bas runggun si banci saja iperdiateken kalak si erlajar? Janah banci saja, kai pengaruhna man bana?

¹¹ Contohna, kalak si erlajar mperdiateken sekalak turang senina sisada mpebelin anakna. Janah idahna erusaha kel ia maba anakna si kitik denga ku perpulungen. Kena kel ku pusuhna ngidah turang senina e perban keadanna pe bage. Contoh si deban, kalak si erlajar si erjuang ngadi ngisap sitandan ras perberita si pernah ngadapi situasi si seri bagi ia. Iceritaken perberita e man bana kai si erbanca ia ngadi ngisap. Ikatakenna maka kekelengenna man Jahwe me si erbanca banci idalankenna perentah-perentah Jahwe. (2 Kor. 7:1; Pil. 4:13) Kenca iceritaken perberita e uga maka banci ia ngadi ngisap, nina, “Kam pe pasti banci ngadi ngisap.” Terpegegehi me kalak si erlajar e janah tek ia maka ia pe banci bage. Sekalak diberu si nguda denga si sangana erlajar mperdiateken sekalak turang senina si nguda denga si lalap ermeriah ukur. E erbanca merhat kel ia meteh kai si erban turang senina e lalap ermeriah ukur.

12. Engkai maka banci sikataken maka tiap kalak bas runggun banci nampati kalak si erlajar?

 ¹² Banci iteh kalak si erlajar kai ertina matuhi perentah Kristus guna engkelengi Dibata ras kalak si deban arah piga-piga perberita si setia si itandaina bas perpulungen. (Joh. 13:35; 1 Tim. 4:12) Janah bagi si enggo ikataken ndai, kalak si erlajar pe banci erlajar arah perberita si pernah ngadapi tentangen si bali bagi ia. Arah usihen kalak e, itehna maka ia pe pasti banci erban perubahen gelah jadi murid Kristus. (Ul. 30:11) Tiap kalak bas runggun banci nampati kalak si erlajar erban kemajun rohani alu erbage-bage cara. (Mat. 5:16) Kai si banci lakokenndu gelah banci isampatindu kalak si erlajar si enggo reh ku perpulungen?

13-14. Uga nge perbahanen Jesus man rasul-rasulna sanga idahna kitik ukur kalak e?

¹³ Sisampati ateta turang seninata si la aktif gelah mulihi matuhi perentah Jesus guna erban murid. Arah cara Jesus nampati rasul-rasulna si sangana kitik ukurna, banci sipelajari carana nampati kalak si la aktif gundari.

¹⁴ Bas pendungi pelayanen Jesus i doni, eme sanga ia nandangi mate, kerina rasul-rasulna “kiam nadingken ia.” (Mrk. 14:50; Joh. 16:32) Uga nge perbahanen Jesus man rasul-rasulna sanga idahna kitik ukur kalak e? La ndekah kenca ia ipekeke, bagenda nina man pengikutna, “Ula mbiar! Laweslah, kataken man senina-seninaku [maka aku enggo ipekeke].” (Mat. 28:10a) La itadingken Jesus rasul-rasulna aminna pe enggo itadingken kalak e ia. Tetap denga igelarina kalak e “senina-seninaku.” Bali bagi Jahwe, Jesus e perkuah janah nggit ngampuni.​—2 Raj. 13:23.

15. Uga perasanta man kalak si lanai ikut erberita?

¹⁵ Kita pe ermediate man kalak si lanai ikut erberita. Kalak e turang seninata denga janah keleng ateta kalak e. Siinget denga perbahanen-perbahanenna si mehuli mbarenda, janah piga-piga arah kalak e banci saja enggo puluhen tahun ngelayani Jahwe. (Heb. 6:10) Tuhu-tuhu tedeh kel ateta kalak e! (Luk. 15:4-7) Bagi Jesus, alu cara kai saja banci sicidahken maka ermediate kita man kalak e?

16. Uga carata mbuktiken maka ermediate kita man turang seninata si la aktif?

¹⁶ Undanglah kalak e ku perpulungen. Salah sada cara Jesus mpegegehi rasul-rasulna si sangana kitik ukurna eme alu ngundang kalak e gelah jumpa ras ia. (Mat. 28:10b; 1 Kor. 15:6) Gundari pe banci siiahken kalak si la aktif gelah reh ku perpulungen. Janah banci saja, perlu mulih-ulih siiahken kalak e. Sanga reh kalak e ku perpulungen, pasti meriah kel ukurta bali bagi Jesus si meriah kel ukurna sanga ialoken rasul-rasul undangenna.​—Bandingken Matius 28:16 ras Lukas 15:6.

17. Uga nge arusna perbahanenta sanga reh kalak si la aktif ku perpulungen?

¹⁷ Alo-alolah kalak e alu bulat ukur. Sanga kalak si la aktif reh ku Bale Kerajan, kai nge si arus silakoken? Sanga ijumpai rasul-rasul Jesus, mis idahina kalak e janah icakapina. (Mat. 28:18) Kita pe arus sialo-alo kalak si la aktif janah mehulilah pengalo-ngalota. Tangtangna banci saja la siteh kai si man katanken. Tapi ula sempat siban mela kalak e. Banci sikataken maka meriah kel ukurta jumpa ras ia.

18. Uga carata mpegegehi perberita si la aktif?

 ¹⁸ Pegegehilah kalak e. Banci saja iakap murid-murid Jesus maka labo kalak e ngasup erberita seh ku belang-belang doni. Ipegegehi Jesus murid-muridna e alu ngataken, “Aku tetap ras kena.” (Mat. 28:20) Lit nge pengaruhna kata-kata Jesus e? Lit. La ndekah kenca si e, mis kalak e sibuk “ngajar ras meritaken berita si meriah.” (Perb. 5:42) Kalak si la aktif pe perlu ipegegehi. Banci saja mbiar kalak e erberita mulihi. Sikatakenlah man bana maka labo ia erberita sisada. Sanga enggo siap kari ia erberita, sitemanilah ia erberita. Pasti iergaina kel sanga sisampati ia erberita mulihi. Sanga igejapken kalak si la aktif e maka sianggap denga ia turang seninata, banci saja dungna aktif ka kari ia mulihi. Pasti meriah kel siakap kerina ngidahsa.

19. Kai nge sura-surata, janah engkai?

¹⁹ Ngayak ndigan nge silakoken pendahin erban murid enda? Seh ngasa kedungen jaman enda. (Mat. 28:20) Ngasup nge kita ngelakokenca? Ertekad kita ngelakokenca! Meriah ukurta nggunaken waktu, tenaga, ras senta guna ndarami kalak “si pusuh ras perbahanenna ngaloken kebenaren guna kegeluhen si rasa lalap.” (Perb. 13:48) Adi bage siban, siusih Jesus. Nina Jesus, “Panganku eme ngelakoken peraten Si nuruh aku, janah ndungi dahin si iberekenNa man bangku.” (Joh. 4:34; 17:4) Kita pe bagi Jesus ka ateta. Sidungi ateta dahin si enggo ibereken man banta. (Joh. 20:21) Janah siarapken kalak si deban termasuk kalak si la aktif terus ikut bas pendahin e.​—Mat. 24:13.

20. Menurut Pilipi 4:13, engkai maka banci sidungi dahin si enggo ibereken Jesus man banta?

²⁰ Memang la menukah ngelakoken perentah Jesus e. Tapi, labo kita sisada ngelakokenca. Perban enggo ijanjiken Jesus maka terus nge kari ia ras kita. Sanga kita erban murid, kita jadi “teman erdahin Dibata” ras jadi “pengikut Kristus.” (1 Kor. 3:9; 2 Kor. 2:17) Emaka, pasti nge banci sidungi dahin e. Pasti meriah kel ukurta perban banci silakoken dahin enda janah sisampati ka kalak si deban ngelakokenca. Tuhu-tuhu sada kehormaten kel siakap!​—Baca Pilipi 4:13.