1. Según Matéu 28:18-20, ka gumadi líchugunbei Hesusu houn lani disipulugu?

LÁRIGIÑE láguyugun Hesusu, aba larufudagun lungua houn lani disipulugu ha meha óundaragubaña Galiléa. Anihein meha somu katei súdiniti lun lariñaguni houn. Katei meha san? Darí wamuti lidan Matéu 28:18-20 (aliiha huméi).

2. Kaba álügüdahani wakutiha?

² Ru lumuti giñe Hesusu gumadi le houn kada aban hádangiñe lubúeingu Bungiu ha uguñebaña weyu. Ligíati, wakutiha ǘrüwa álügüdahani libügürü dasi le líchugubei Hesusu woun. Furumiñe, amu luéi warufudahan houn iseri disipulugu luáguti lilurudun luma lugumadin Bungiu, ka amu katei lunbei wadügüni? Libiaman, ida luba hídehan sun íbirigu lidan damuriguaü lun hawanserun aturiahatiña Bíbülia? Lǘrüwan, ida luba wíderaguniña wábirigu ha mapurichihañabaña lunya hagumeserun adüga disipulugu?

3. Ka adundehani líchugunbei Hesusu lidan lugumadin?

³ Furanguti le lariñagubei Hesusu. Mosu warufudahani lugumadin houn gürigia. Gama lumoun, moun lumuti wabulieidun aban katei súdiniti. Mariñagunti Hesusu: ‘Arufudaha huguyame houn luagu sun le uágubei nariñaga hun’. Lubaragiñe lira, ariñagati: Arufudaha humá houn lun “gaganbadi hamá lun sun le uágubei nariñaga hun”. Lun wafalaruni ladundehan Hesusu, mosu warufudahan houn aturiahatiña Bíbülia kaba lan hadüga  luma ida luba lan hadügüni (Adü. 8:31). Ka uagu mosu lubéi wadügüni le?

4. Ka mini lubéi gaganbadi wamá lun aban gumadi? Afuranguagüda huméi.

⁴ Ida luba warufudahan houn gürigia lun “gaganbadi” hamá lun lugumadin Hesusu? Líderagubadiwa hénpulu le lun gunfuranda wamani. Ida luba larufudahan aban máisturu lánina abugahani houn gürigia ha afurendeirubaña abugaha lun gaganbadi hamá lun lilurudun abugahani? Furumiñe, mosu larufudahani máisturu lúrudu le houn ha afurendeirubaña lun gayara lan hafalaruni lúrudu le ǘmadarugu. Gama lumoun, lun larufudahan houn ida luba lan gaganbadi hamá lun lúrudu, mosu ladügün amu katei. Mosu ládinun tidoun karü hama lun ladundehaniña dan le añaha lan abugaha, lun larihini hadügüñein lan le furendei hamaalibei. Ka gayara wafurendeirun lídangiñe hénpulu le?

5. a) Según Huan 14:15 luma 1 Huan 2:3, ka lunbei warufudahan houn ha aturiahabaña wama lun hadügüni? b) Ru humá aban hénpulu libügürü ida luba lan warufudahan houn?

⁵ Dan le wíchugun aturiahani houn gürigia tídangiñe Bíbülia, arufudahatiwa houn ka lan labusenrubei Bungiu lun wadügün. Gama lumoun, mosu wadügün lanwoun lira. Mosu warufudahan houn ha aturiahabaña wama lun hawinwanduni le hafurendeirubei (aliiha huméi Huan 14:15; 1 Huan 2:3). Lau wani hénpulu, gayaraati warufudahan houn ida luba lan hawinwanduni lidan wadagimanu, tidan leskuela, o lidan isebáhari le hafurendeirubei tídangiñe Bíbülia. Gayaraati wabahüdahan houn luáguti somu katei le asuseredubei lidan wabagari lun warufuduni houn ida liña lan lóunigiruniwa wafalaruni adundehani le tídanbei Bíbülia luéi denchaü o ida liña lan líderaguniwa anúadira buidu. Dan le awanhán lan hama aturiahatiña, gayaraati wafurieidun lun Heowá amuriaha wagíame luma lun ladundehaniña lau lani sífiri sandu (Huan 16:13).

6. Ka amu katei lunbei wadügüni dan le warufudahani lugumadin Hesusu houn amu?

⁶ Ka amu katei lunbei wadügüni dan le warufudahani lugumadin Hesusu houn amu? Mosu wíderaguniña aturiahatiña lun busén hama lun hadügün disipulugu. Másiñati hanufude hama fiu aturiahatiña lun háfuridun apurichiha. Mosu gaguraasun wamá lau wíderaguniña lun gunfurandatima hamani inarüni le tídanbei Bíbülia lun derebugutima lan hafiñen. Ítara, lachülürüba inarüni tidoun hanigi ani ladügüba lira lun busén hama lun hapurichihan. Ka gayaraabei wadügün lun wíderaguniña aturiahatiña lun busén hamá lun hapurichihani uganu buiti?

7. Ida luba wíderaguniña aturiahatiña lun busén hamá hapurichihani uganu buiti houn amu?

⁷ Gayaraati wadügün álügüdahani kei burí le houn aturiahatiña: “Ida liña harihini hibagari lúmagiñe haturiahanu Bíbülia? Saminatün san megei hamá amu gürigia haganbuni uganu le? Ka gayaraabei hadügüni lun híderaguniña?” (Ari. 3:27; Mat. 9:37, 38). Arufuda wamoun houn aturiahatiña agumeiraguagüdüni tótima wayusuruboun lun warufudahan, ani álügüda wamaña kaba lan hamuga tídangiñe hínsiñeboun houn haduheñu, hamadagu o hapanaagu lidan wadagimanu lun haliihanu. Ru wamá fiu tídangiñe tratadu houn. Asayaha wamá hama ida luba lan hederegerunu. Chóuruti, danme lan hagumeserun aturiahatiña apurichiha lunti wáfuridun apurichiha úara hama (Apur. 4:9, 10; Luk. 6:40).

8. Ka uagu súdini lubéi lun here lan ínsiñeni le hasandirubei aturiahatiña luagu Heowá luma hawagu gürigia? (Ariha huméi rekuáduru “ Ida luba wíderaguniña aturiahatiña Bíbülia lúntima línsiñedun Bungiu houn”).

⁸ Haritagua waméi ru lan Hesusu adundehani woun lun warufudahan houn gürigia lun “gaganbadi hamá lun sun le” uágubei lariñaga  woun. Laganagua lira, anihein bián gumadi le wéirigutimabei, lun hínsiñe lan Bungiu hama gürigia wáledigu woun (Mat. 22:37-39). Dan le warufudahan houn aturiahatiña lun gaganbadi hama lun gumadi burí le, wíderaguñanu lun hapurichihan. Gunfuranda wamuti hasandiruba lan fiu aturiahatiña anufudei dan le hasaminarun luagu háfuridun apurichiha, lau sun lira gayaraati wachoururagüdüniña lau lan lídehan Heowá gayaraabei lan lagidarun anufudei hawéi (Sal. 18:1-3; Ari. 29:25). Lafuranguagüdübei rekuáduru le lídanbei arütíkulu le, ka lan lunbei wadügüni lúntima línsiñedun Bungiu houn ha aturiahabaña wama. Lanwoun lira, ka gayaraabei ladügüni damuriguaü lun líderaguniña aturiahatiña lúntima harufudun ínsiñeni?

9. Ida liña lafurendeirun aban gürigia abugaha karü?

⁹ Saminaya wamá luagu hénpulu lani le afurendeirúbei abugaha karü. Ida liña lafurendeirun lau aniha lan abugaha lau máisturu ñun lóubagiñe? Lau laganbuni le lariñagunbei lumaisturun luma lau laríaguniña ha góunigibalin habugahan. Kei hénpulu, másiñati larufudun máisturu lun le afurendeirúbei abugaha, aban abugahati, le ígirubei lun lásügürün amu abugahati lubaragiñe. O másiñati giñe larufudun luagu amu abugahati, le abulubudagüdübalin tileitin lugune lun gayara lan harihin amu abugahatiña buidu. Arufudahati hénpulu burí le saragu katei súdiniti lun le afurendeirúbei, lun gayara lan ladügüni ligiaméme dan le labugahan.

10. Kaba íderaguaña aturiahatiña lun hawanserun?

¹⁰ Ítarameme, aturiahatiña Bíbülia ha agumeserubaña eseriwida lun Heowá, furendeitiña dandu hámagiñe ha íchugubaña aturiahani houn ítara kei hámagiñe íbirigu. Ligíati, kaba íderaguaña aturiahatiña lun hawanserun? Habasiihan adamuridagua. Ka uagu? Líderagubaña le hafurendeirubei lidan adamuridaguni lúntima laganwoundun hasubudin, lederebudagüdün hafiñen, luma lun línsiñeduntima Bungiu houn (Adü. 15:30-32). Lanwoun lira, gayaraati harufuduniña íchugutiña aturiahani aturiahatiña houn íbirigu ha ásügürübaña lídangiñe sügǘ libe le hásügürünbei. Harihubei aturiahatiña lubuidun hénpulu lánina ínsiñeni le harufudubei íbirigu lidan damuriguaü. Ariha wamá fiu hénpulu.

11. Ka hénpulu másiñati harihibei lan aturiahatiña lidan damuriguaü, ani ka gayaraabei gani lan le hawagu?

¹¹ Aba tarihin aban aturiahatu to agüriahabaliña tisaanigu tábugua, aban íbiri to lídanboun ligiaméme sügǘ kei tuguya. Aba tañuludagun tanigi aturiahatu tarihini áfaaguni le tadügübei íbiri lun tidin adamuridagua hau tirahüñü ñǘbürigiña. Aban aturiahati le áfaagubei lun magumulahan lan aba lasubudirun aban íbiri le ígirubalin agumulahani. Aba lariñagun íbiri lun aturiahati, ínsiñeni lan le lasandirubei luagu Heowá, ligía lan adügübei lun gaganbadi lan lun lugumadin (2 Ko. 7:1; 2 Ko. 4:7). Lárigiñe labahüdaha íbiri lun aturiahati luagu ida liña lan lígiruni agumulahani, aba lariñagun lun aturiahati: “Gayaraati giñe badügüni ligiaméme”. Ruti le gurasu lun aturiahati ani aban lafiñerun gayara lan ladügüni. Aba tarihin aban aturiahatu nibureintu aban íbiri nibureingiru to gúndaaboun lidan teseriwidun lun Heowá. Dan le tarihini nibureintu tuguya ugundani le tasandirubei íbiri aba busén tan tasubudiruni ka lan uagu gunda tubéi íbiri súnwandan.

12. Ka uagu gayara lubéi wariñagun gayara lan híderaguniña sun ha lídanbaña damuriguaü aturiahatiña?

¹² Dan le hasubudirun aturiahatiña íbirigu úaraguatiña ha ásügürübaña lídangiñe ámuñegueinarügü sügǘ, furendeitiña hámagiñe ka lan mini lubéi gaganbadi wamá lun lugumadin Hesusu, lun hínsiñe lan Bungiu hama gürigia wáledigu woun (Huan 13:35; 1 Tim. 4:12).  Ani kei buga wariñaguni, gayaraati hafurendeirun aturiahatiña hámagiñe íbirigu ha sügühaña lídangiñe libe sügǘ le hásügürübei. Furendeitiña aturiahatiña lídangiñe hénpulu burí le, gayaraabei lan hadügüni asansiruni le mégeiwabei lun aban hamá lani Hesusu disipulu (2 Lur. 30:11). Gayaraati hídehan sun ha lídanbaña damuriguaü lidan ámuñegueinarügü igaburi lun hawanserun aturiahatiña (Mat. 5:16). Ka wadügübei lun wíchugun gurasu houn aturiahatiña ha achülürübaña lidoun damuriguaü?

13, 14. Ida liña lóuseruniña Hesusu lani apostolugu ha meha eferidirubalin haguraasun?

¹³ Busentiwa wíderaguniña wábirigu ha máfuridunhaña apurichiha lunya hapurichihan luma lun hadügün disipulugu. Arufuda lumuti ligaburi lóuseruniña Hesusu lani apostolugu ha meha eferidirubalin haguraasun kaba lan wadüga uguñe weyu.

¹⁴ Murusun dan lubaragiñe lafarún, aba “hígiruni sun disipulugu Hesusu lábugua, aba hanurahan” (Mar. 14:50; Huan 16:32). Ka ladügübei Hesusu dan le heferidirunbalin lani disipulugu haguraasun? Murusun dan lárigiñe láguyugun, aba lariñagun Hesusu houn fiu hádangiñe lani disipulugu: “Manufudeda humá. Heiba awisaraña nánigu [saradina lan]” (Mat. 28:10a). Mígirun lumutiña meha Hesusu lani apostolugu. Íbini ígira hamani meha lábugua, wagili houn “nánigu”. Kei Heowá gudemehabuti Hesusu ani gíchigaditi ferudun (2 Uru. 13:23).

15. Ka wasandirubei hawagu íbirigu ha máfuridunhaña apurichiha?

¹⁵ Wéiriti berese wamá hau wábirigu ha máfuridunhaña apurichiha. Wábirigu hagía ani hínsiñetiña woun! Haritagua wamagili sun le meha hadügübei lidan hadasin lidan heseriwidun lun Heowá (Ebü. 6:10). Álugatiwa hawagu! (Luk. 15:4-7). Ítara kei Hesusu, ida luba warufuduni houn berese wamá hau?

16. Ida luba warufudun berese wamá hau wábirigu ha máfuridunhaña apurichiha madamuridagun hagía?

¹⁶ Agunbiraha wamaña lidoun adamuridaguni. Aban igaburi le ídanbei meha líchiga Hesusu dǘgüdaguaü houn lani apostolugu ha meha eferidirubalin haguraasun lagunbirahaniña adamuridagua (Mat. 28:10b; 1 Ko. 15:6). Gayaraati giñe wagunbirahaniña wábirigu ha máfuridunhaña apurichiha madamuridagun hagía lunya hadamuridagun. Subudi wamuti mosu lan wagunbirahaniña fiu wéiyaasu lubaragiñe hánharun. Chóuruti gunda lan meha Hesusu dan le hánharun lani disipulugu dan meha le lagunbirahaniña (ariha huméi giñe Matéu 28:16 luma Lúkasi 15:6).

17. Kaba wadüga dan le hachülürün íbirigu ha madamuridaguhaña mapurichihan hagía tidoun Luban Adamuridaguni?

¹⁷ Ru wamá aban buiti achülürüni houn. Adügati meha Hesusu lun buidu lan hasandiragun lani disipulugu houngua dan le meha lóundaragun hama. Magurabahanti meha lun houdin lumoun, lubaragiñe lira, ligía meha ñǘndübei ayanuha hama (Mat. 28:18). Kaba wadüga dan le hachülürün íbirigu ha madamuridaguhaña mapurichihan hagía tidoun Luban Adamuridaguni? Gayaraati woudin íchiga aban buiti achülürüni houn. Másiñati wadiheridun ibidiñebei lan woun kaba lan wariñaga houn. Gama lumoun, sin wadügün lun wuriba lan hasandiragun houngua, ariñaga wamá houn gunda wamá warihiniña.

18. Ida luba wíchugun gurasu houn íbirigu ha madamuridaguhaña mapurichihan hagía?

¹⁸ Ru wamá gurasu houn. Másiñati samina hamá meha lani Hesusu disipulugu siñabei lan hagunfulirun lau dasi lun hapurichihan lidan sun ubóu. Ruti meha Hesusu gurasu houn lani disipulugu dan meha le lariñagubei houn: “Anahein [...] huma sagü weyu” (Mat. 28:20).  Íderagua lumutiña funa san dimurei le lariñagubei Hesusu lani disipulugu? Anha. Murusun dan lárigiñe lira, aba hagumeserun apurichiha luma arufudaha lau ubebeni (Adü. 5:42). Mégeitiña giñe íbirigu ha madamuridaguhaña mapurichihan hagía gurasu. Másiñati hanufude hamá lunya hapurichiha. Gayaraati wíchugun gurasu houn lau wariñagun houn mídinbaña lan apurichiha hábugua. Dan le aranseeña lun houdin apurichiha, gayaraati woudin hama. Chóuruti gúndaabaña lan wíderaguniña dánmeya hagumeserun apurichiha. Danme le warufuduni houn íbirigu ha madamuridagunhaña mapurichihan hagía ariha wamaña lan kei wábirigu, másiñati hagiribudun, aban katei le íchugubei ugundani lun damuriguaü.

19. Ka wabusenrubei tídangiñe sun wanigi, ani ka uagu?

¹⁹ Átiribei san dan wau apurichiha luma adüga disipulugu? Darime lagumuchun ubóu (Mat. 28:20). Gayaraabei san wagunfulirun lau dasi le líchugubei Hesusu woun? Aranseñuwaña lun wagunfuliruni! Gúndaatiwa lau wayusuruni wadaani, were luma wámati lun wadariruniña “ha lúntiñabaña ibagari le magumuchaditi” (Adü. 13:48). Dan le wadügüni le, wáyeihañein Hesusu. Ariñagati: “Nadügüni lugundan le óunahabalina, luma nagumuchuni luadigimari, ligía néiginbei” (Huan 4:34; 17:4). Tau sun wanigi, ligía giñe wabusenrubei wadügün. Busentiwa lun wagumuchuni dasi le ichugúbei woun (Huan 20:21). Ani busentiwa lun hasigirun sun wábirigu adügei dasi le wama darí lagumuchun, íbini ha madamuridaguhaña mapurichihan hagía (Mat. 24:13).

20. Según le lariñagunbei 2 Korintuna 4:7, ka uagu gayara lubéi wagunfuliruni dasi le líchugubei Hesusu woun?

²⁰ Hénrengubei lagunfulirúniwa dasi le líchubei Hesusu woun. Lau sun lira, madügün wamuti dasi le wábugua. Füramaseti Hesusu aniheinbei lan wama. Adüga wamuti dasi lánina hadügǘn disipulugu kei ídehatiña luma Bungiu luma kei nadagimeintiña úara luma Kristu (1 Ko. 3:9; 2 Ko. 2:17). Ligíati, gayaraati wagunfuliruni. Aban lubuidun chansi wámabei lun wadügüni dasi le luma lun wíderaguniña amu gürigia lun giñe hadügüni buidu (aliiha huméi 2 Korintuna 4:7).