1. Sumala sa Mateo 28:18-20, unsang sugo ang gihatag ni Jesus?

HUMAN mabanhaw si Jesus, nagpakita siya sa iyang mga tinun-an nga nagkatigom sa Galilea. May importante siyang gisulti kanila. Unsa kana? Ang iyang giingon makita sa Mateo 28:18-20.​—Basaha.

2. Unsang mga pangutana ang atong hisgotan?

² Ang sugo ni Jesus sa paghimog mga tinun-an mapadapat sab sa matag alagad sa Diyos karon. Busa, hisgotan nato ang tulo ka pangutana nga konektado sa asaynment nga gihatag ni Jesus kanato. Una, gawas sa pagtudlo sa bag-ong mga tinun-an sa mga sukdanan sa Diyos, unsa pay angay natong himoon? Ikaduha, sa unsang paagi ang tanang magmamantala sa kongregasyon makatabang sa mga Bible study nga mouswag sa espirituwal? Ikatulo, unsaon nato pagtabang ang dili aktibong mga igsoon aron makigbahin sila pag-usab sa buluhaton nga paghimog mga tinun-an?

3. Unsang espesipikong instruksiyon ang giapil ni Jesus sa iyang sugo?

³ Tin-aw ang instruksiyon ni Jesus. Kinahanglan natong tudloan ang mga tawo sa mga butang nga iyang gisugo. Pero, dili nato angayng kalimtan ang usa ka importanteng detalye. Si Jesus wala moingon: ‘Tudloi ninyo sila sa tanan nakong gisugo kaninyo.’ Hinunoa, siya miingon: Tudloi ninyo sila “sa pagtuman sa tanan nakong gisugo kaninyo.” Aron masunod kanang espesipikong instruksiyon dihang magtudlo sa usa ka Bible study, kinahanglan  nga dili lang ta magtutudlo kondili mga tiggiya usab. (Buh. 8:31) Ngano man?

4. Unsay gipasabot sa pagtuman sa usa ka sugo? Iilustrar.

⁴ Ang “pagtuman” sa usa ka sugo nagpasabot ug pagsunod niana. Aron sa pag-ilustrar kon unsaon nato pagtudlo sa Bible study sa pagtuman, o pagsunod, sa mga butang nga gisugo ni Jesus, tagda ni nga pananglitan. Sa unsang paagi ang instruktor sa pagdrayb magtudlo sa iyang estudyante sa pagtuman sa mga balaod sa trapiko? Una, ang instruktor magtudlo sa iyang estudyante sa mga balaod sa trapiko nga angay niining sundon. Pero, aron matudloan ang iyang estudyante kon unsaon pagsunod ang maong mga balaod, duna pa siyay kinahanglang buhaton. Kinahanglan niyang ubanan ang estudyante ug giyahan kini samtang nagdrayb ug naningkamot pagpadapat sa nakat-onan niini. Unsay atong makat-onan niana nga pananglitan?

5. (a) Sumala sa Juan 14:15 ug 1 Juan 2:3, unsay kinahanglan natong itudlo sa atong mga Bible study nga ilang himoon? (b) Paghatag ug pananglitan kon unsaon nato paggiya ang atong mga study.

⁵ Dihang mag-Bible study ta sa uban, gitudloan nato sila sa mga sukdanan sa Diyos. Pero, duna pa tay angayng himoon. Kinahanglan natong tudloan ang atong mga Bible study nga ipadapat nila sa adlaw-adlawng pagkinabuhi ang ilang nakat-onan. (Basaha ang Juan 14:15; 1 Juan 2:3.) Pinaagi sa atong binuhatan, ikapakita nato sa atong mga study kon unsaon nila pagpadapat ang ilang nakat-onan sa Bibliya diha sa eskuwelahan, trabahoan, o panahon sa lingawlingaw. Puwede natong iestorya ang usa ka hitabo sa atong kinabuhi aron ipakita kanila kon sa unsang paagi ang pagpadapat sa mga prinsipyo sa Bibliya nanalipod nato o nakatabang nato sa paghimog maalamong desisyon. Uban sa atong mga study, puwede natong iampo kang Jehova nga giyahan sila sa balaang espiritu.​—Juan 16:13.

6. Unsa pay kinahanglan natong himoon dihang magtudlo sa uban sa pagtuman sa mga sugo ni Jesus?

⁶ Unsa pay kinahanglan natong himoon dihang magtudlo sa uban sa pagtuman sa mga sugo ni Jesus? Kinahanglan natong tabangan ang atong mga Bible study nga maugmad ang tinguha sa paghimog mga tinun-an. Ang ubang study mahadlok tingaling mosangyaw. Kinahanglan tang magpailob samtang tabangan nato sila nga mas masabtan ang mga kamatuoran sa Bibliya aron mas molig-on ang ilang pagtuo. Dayon, matandog ang ilang kasingkasing ug mapalihok sila sa pagsangyaw. Unsay atong mahimo aron maugmad sa atong mga study ang tinguha sa pagsangyaw?

7. Unsaon nato pagtabang ang atong study aron maugmad niya ang tinguha sa pagsangyaw?

⁷ Puwede natong pangutan-on ang atong Bible study ug sama niini: “Sa unsang paagi nabag-o ang imong kinabuhi tungod sa pagpadapat sa gitudlo sa Bibliya? Sa imong hunahuna, kinahanglan ba sab ning mahibaloan sa uban? Unsay imong mahimo sa pagtabang kanila?” (Prov. 3:27; Mat. 9:37, 38) Ipakita sa study ang mga tract nga naa sa atong Teaching Toolbox ug pangutan-a siya kon asa niini ang posibleng makapainteres sa iyang mga paryente, higala, o kauban sa trabaho. Hatagi siyag pipila niini. Magpraktis sesyon mo aron matudloan siya kon unsaon pagtanyag ang tract sa matinahorong paagi. Siyempre, kon ang atong study mahimo nang di-bawtismadong magmamantala, gusto natong ubanan siyag sangyaw aron magiyahan siya.​—Eccl. 4:9, 10; Luc. 6:40.

8. Nganong importante nga maugmad sa atong mga study ang lawom nga gugma para sa Diyos ug sa isigkatawo? (Tan-awa sab ang kahong  “Unsay Himoon Aron Molawom ang Gugma sa Atong mga Study Para sa Diyos?”)

⁸ Hinumdomi nga si Jesus naghatag ug instruksiyon nga tudloan nato ang uban “sa  pagtuman sa tanan” niyang gisugo. Siyempre apil niana ang duha ka kinalabwang sugo​—ang paghigugma sa Diyos ug paghigugma sa isigkatawo—​nga parehong konektado sa buluhatong pagsangyaw ug paghimog tinun-an. (Mat. 22:37-39) Sa unsang paagi? Ang pangunang motibo nato sa pagsangyaw mao ang gugma​—atong gugma sa Diyos ug sa isigkatawo. Tinuod, ang pipila ka Bible study mahadlok tingaling mosangyaw. Pero puwede nato silang pasaligan nga sa tabang ni Jehova, anam-anam nilang madaog ang ilang kahadlok sa tawo. (Sal. 18:1-3; Prov. 29:25) Ang kahon nga apil niining artikuloha naghisgot kon unsay atong himoon aron matabangan ang atong study nga mas mahigugma sa Diyos. Unsa pay himoon sa kongregasyon aron matabangan ang bag-ong mga tinun-an nga mas makapakitag gugma?

9. Sa ilustrasyon bahin sa nagtuon ug drayb, sa unsang mga paagi ang nagtuon makakat-on ug importanteng mga leksiyon?

⁹ Hunahunaa pag-usab ang ilustrasyon bahin sa nagtuon ug drayb. Samtang magdrayb siya kauban ang iyang instruktor, sa unsang mga paagi siya makakat-on? Pinaagi sa pagpaminaw sa iyang instruktor ug sa pagpaniid sa ubang maampingong mga drayber. Pananglitan, itudlo tingali sa instruktor ang usa ka drayber nga kinabubut-ong mitugot nga mosulod ang laing drayber sa unahan niya. O tingali, itudlo niya ang drayber nga nagpakitag konsiderasyon pinaagi sa pagpamenos sa kahayag sa headlight sa iyang sakyanan aron dili masulawan ang ubang drayber. Ang nagtuon ug drayb makakat-on ug importanteng mga leksiyon sa maong mga pananglitan, nga makatabang niya dihang magdrayb siya.

10. Unsay makatabang sa Bible study nga mouswag sa espirituwal?

¹⁰ Sa susama, ang Bible study nga nagsugod pagsubay sa dalan sa kinabuhi makakat-on dili lang gikan sa nag-study niya, kondili sa maayong mga ehemplo sa ubang alagad ni Jehova. Busa, unsay makatabang pag-ayo sa mga Bible study nga mouswag sa espirituwal? Ang pagtambong sa mga tigom. Ngano? Ang binase sa Bibliya nga instruksiyon nga ilang madawat diha sa mga tigom makapalawom sa ilang kahibalo, makapalig-on sa ilang pagtuo, ug makapadako sa ilang gugma sa Diyos. (Buh. 15:30-32) Dugang pa, diha sa mga tigom, puwedeng ipailaila sa nagdumala sa study ang iyang Bible study ngadto sa mga igsoon nga tingali parehas niinig kasinatian. Unsang maayong mga ehemplo sa pagpakitag Kristohanong gugma ang makita sa study diha sa kongregasyon? Konsideraha ang mosunod nga mga pananglitan.

11. Unsang mga ehemplo ang posibleng makita sa usa ka Bible study diha sa kongregasyon, ug unsa tingali epekto niini kaniya?

¹¹ Ang usa ka babayeng Bible study nga nag-inusarang ginikanan nakakita sa usa ka sister nga parehas niyag situwasyon. Natandog ang kasingkasing sa study nga makita ang paningkamot sa sister nga moadto sa Kingdom Hall kauban ang iyang gagmayng anak. Ang usa ka study nga naglisod pag-undang sa pagpanigarilyo nakailailag magmamantala nga naglisod sab paghunong kaniadto pero milampos ra. Giingnan sa magmamantala ang study nga napalihok siya sa pagsunod sa mga sugo sa Diyos tungod sa iyang nagkalawom nga gugma kang Jehova. (2 Cor. 7:1; Filip. 4:13) Nadasig ang study sa giestorya sa magmamantala, ug dihang giingnan siya nga “Maundang pod nimo ang pagpanigarilyo,” mas masaligon na siya nga mahimo sab niya kana. Ang batan-ong babaye nga Bible study nakakita sa usa ka batan-ong sister nga malipayon kaayo sa iyang kinabuhi ingong Saksi. Dihang nakita sa Bible study kon unsa ka malipayon ang batan-ong sister, gusto niyang mahibaloan pag dugang kon nganong malipayon kini.

12. Nganong makaingon ta nga ang matag usa diha sa kongregasyon dunay mahimo sa pagtabang sa mga Bible study?

 ¹² Dihang ang mga Bible study makailailag lainlaing matinumanong magmamantala, ang mga study makakat-on sa ilang ehemplo kon unsaon pagtuman ang sugo sa Kristo nga higugmaon ang Diyos ug ang isigkatawo. (Juan 13:35; 1 Tim. 4:12) Dugang pa, sa nahisgotan na, ang Bible study makakat-on gikan sa mga magmamantala nga nakasinatig mga kalisdanan nga susama sa iyang giatubang karon. Ang study makakat-on sa maong mga ehemplo nga kaya niyang himoon ang mga kausaban aron mahimong tinun-an sa Kristo. (Deut. 30:11) Ang matag usa diha sa kongregasyon dunay mahimo aron matabangan ang mga Bible study nga mouswag sa espirituwal. (Mat. 5:16) Unsang mga paningkamot ang imong gihimo aron dasigon ang mga Bible study nga nanambong sa tigom?

13-14. Giunsa pagtratar ni Jesus ang iyang naluyang mga apostoles?

¹³ Gusto natong tabangan ang atong dili aktibong mga igsoon nga makigbahin pag-usab sa pagsangyaw ug paghimog mga tinun-an. Makakat-on ta sa gihimo ni Jesus dihang naluya ang iyang mga apostoles.

¹⁴ Dihang hapit nang mamatay si Jesus, ang tanan niyang apostoles “mibiya kaniya ug mikalagiw.” (Mar. 14:50; Juan 16:32) Giunsa pagtratar ni Jesus ang iyang mga apostoles dihang sila temporaryong naluya? Wala madugay human sa iyang pagkabanhaw, giingnan ni Jesus ang pipila niya ka sumusunod: “Ayaw mog kahadlok! Lakaw, sultihi ang akong mga igsoon [nga nabanhaw na ko].” (Mat. 28:10a) Wala isalikway ni Jesus ang iyang mga apostoles. Bisag gitalikdan nila siya, gitawag gihapon niya sila ug “akong mga igsoon.” Sama kang Jehova, si Jesus maluluy-on ug mapinasayloon.​—2 Hari 13:23.

15. Unsay atong pagbati niadtong wala na makigbahin sa ministeryo?

¹⁵ Sa susama, nabalaka sab ta pag-ayo niadtong wala na makigbahin sa ministeryo. Sila atong mga igsoon, ug gimahal nato sila! Mahinumdom pa ta sa tanan nilang paghago kaniadto para kang Jehova​—ang pipila kanila naghimo niana sulod sa daghang katuigan. (Heb. 6:10) Gimingaw gyod ta nila! (Luc. 15:4-7) Agig pagsundog kang Jesus, sa unsang mga paagi ikapakita nato nga gimahal nato sila?

16. Unsaon nato pagpakita nga gimahal nato ang atong dili aktibong mga igsoon?

¹⁶ Kinasingkasing silang imbitaha sa atong mga panagkatigom. Ang usa ka paagi nga gidasig ni Jesus ang iyang naluyang mga apostoles mao ang pag-imbitar kanila sa usa ka panagkatigom. (Mat. 28:10b; 1 Cor. 15:6) Sa susama, kon ang mga dili aktibo wala na magtambongan sa tigom, puwede nato silang dasigon nga motambong. Basig kinahanglan nga kadaghan nato sila imbitahon una sila motambong. Seguradong nalipay si Jesus nga gidawat sa iyang mga tinun-an ang iyang imbitasyon.​—Itandi ang Mateo 28:16 ug Lucas 15:6.

17. Unsay angay natong buhaton kon dunay dili aktibo nga motambong sa tigom?

¹⁷ Kinasingkasing silang abiabiha. Gipabati ni Jesus sa iyang mga tinun-an nga nalipay siyang makita sila. Siyay miuna sa pagpakig-estorya nila. (Mat. 28:18) Unsay atong buhaton kon dunay dili aktibo nga motambong sa tigom? Kinahanglan nga kitay mouna sa pag-abiabi kaniya. Sa sinugdan, mabalaka tingali ta kay wala ta mahibalo kon unsay atong isulti. Kon mao, puwede ra nato siyang ingnon nga nalipay gyod ta nga makita siya, pero himoon nato ni sa paagi nga dili siya maulawan.

18. Unsaon nato pagdasig ang mga dili aktibo?

¹⁸ Dasiga sila. Ang mga tinun-an ni Jesus mibati tingali nga dili nila mahimo ang pagsangyaw sa tibuok kalibotan. Gipasaligan ni Jesus  ang iyang mga sumusunod: “Ako magauban kaninyo sa tanang adlaw.” (Mat. 28:20) Nakatabang ba nâ sa iyang mga tinun-an? Oo. Wala madugay, nagkugi sila sa “pagpanudlo ug pagpahayag sa maayong balita.” (Buh. 5:42) Ang dili aktibong mga magmamantala kinahanglan pong dasigon. Mahadlok tingali silang mosangyaw pag-usab. Puwede nato silang pasaligan nga dili sila mag-inusara pagsangyaw. Kon andam na sila, puwede nato silang ubanan diha sa ministeryo. Seguradong maapresyar nila ang atong tabang dihang mosangyaw sila pag-usab. Kon atong ipakita sa mga dili aktibo nga giisip nato sila ingong atong mga igsoon, basin mahimo silang aktibo pag-usab, nga makapalipay sa tibuok kongregasyon.

19. Unsa gyoy gusto natong buhaton, ug ngano?

¹⁹ Hangtod kanus-a nga magpadayon ta sa pagsangyaw ug paghimog mga tinun-an? Hangtod sa kataposan niining sistema sa mga butang. (Mat. 28:20; tan-awa ang Glossary, “Hinapos sa sistema sa mga butang.”) Matuman ba nato ang sugo ni Jesus hangtod nianang panahona? Determinado tang himoon kana! Andam tang mogamit sa atong panahon, kusog, ug materyal nga mga butang aron makita kadtong “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Kon buhaton nato kini, gisundog nato si Jesus. Siya miingon: “Ang akong pagkaon mao ang pagbuhat sa kabubut-on sa usa nga nagpadala kanako ug ang paghuman sa iyang buluhaton.” (Juan 4:34; 17:4) Mao pod nay gusto natong buhaton. Gusto natong humanon ang buluhaton nga gisalig kanato. (Juan 20:21) Ug gusto nato nga ang uban, apil ang mga dili aktibo, molahutay niining buluhatona uban kanato.​—Mat. 24:13.

20. Sumala sa Filipos 4:13, nganong molampos ta sa paghimo sa buluhaton nga gisugo ni Jesus kanato?

²⁰ Tinuod, dili sayon ang paghimo sa buluhaton nga gisugo ni Jesus kanato. Pero wala ta mag-inusara niining buluhatona. Si Jesus nagsaad nga siya mag-uban kanato. Sa dihang magsangyaw ta ug maghimog mga tinun-an, kita “mga isigkamagbubuhat sa Diyos” ug gihimo nato ni ‘kauban ang Kristo.’ (1 Cor. 3:9; 2 Cor. 2:17) Busa, molampos ta sa paghimo niini. Dako gyong pribilehiyo ug kalipay ang pagtuman niini nga asaynment ug ang pagtabang sa uban nga mohimo sab niini!​—Basaha ang Filipos 4:13.