EKICWEKA C’OKWEGA 45
Oku turi kubasa kukwasa abandi korobera ebiragiro bya Kristo
‘Ni ahabw’eco mugende, muhindure abantu abegi, nimubegesa korobera byona ebi nabaragire.’—MAT 28:19, 20.
ECESHONGORO CA 89 Hurikiza, Oyorobe, Reero Otungye Omugisha
EMPINYE *
1. Tukuratize ebiri omuri Matayo 28:18-20, ni kiha kiragiro eki Yesu yahire abegi beye?
YESU ku yamazire kuzoka, akeyoreka abegi beye ababire bateranire omuri Galilaaya. Akaba ari kwenda kubagambira ekintu c’omugasho. Ni kiha? Eki yabagambire kiri omuri Matayo 28:18-20.—Hashome.
2. Ni biha bibuzo ebi twaza kushwijuma?
2 Nambwenu ekiragiro eki Yesu yahire abegi beye nikikwata aha bahereza ba Ruhanga omuri obu bwire. Obwe rero, twaza kushwijuma ebibuzo bishatu ebiri kukwata aha murimo ogu Yesu yatuhire. Ec’okubanza: Oyihireho kwegesa abantu ebiragiro bya Ruhanga, ni enki ekindi eki tushemerire kukora? Eca kabiri: Ni enki eki ababurizi bona b’omu kibina bari kubasa kukora kugira ngu bakwase abegi ba Bibuli kugira entunguka? Eca kashatu: Ni bata oku turi kubasa kukwasa abafukirire kongera kugira amani omu murimo g’okuhindura abantu abegi?
BEGESE KOROBERA EBIRAGIRO BYA KRISTO
3. Ni buha buhabuzi bw’omugasho oburi omu kiragiro ca Yesu?
3 Ebiragiro bya Yesu bihikire. Tushemerire kubyegesa abantu. Konka, titushemerire kwebwa ebintu by’omugasho. Yesu taragambire ngu: ‘Mubegese byona ebi nabaragire.’ Ahobwe, akagamba ngu: Mubegese ‘korobera byona ebi nabaragire.’ Kugira ngu tworobere eco kiragiro ca Yesu, tushemerire kwegesa abegi ebi bashemerire kukora kandi tukabegesa n’oku bari kubasa kubikora. (Byak 8:31) Ahabw’enki?
4. Korobera ekiragiro nikimanyisa ki? Gamba ecokureberaho.
4 Korobera ekiragiro nikimanyisa okukita omu nkora. Kugira ngu oshoborocerwe oku turi kubasa kwegesa omuntu korobera ebi Kristo yaragire, tekateka ahari eki cokureberaho. Ni bata oku omwegesa w’emotoka ari kubasa kwegesa omwegi korobera ebiragiro by’aha muhanda? Omwegesa w’emotoka nabanza yayegesa omwegi ebyo biragiro ebi ashemerire korobera. Konka kugira ngu ayegese omwegi korobera ebyo biragiro, ashemerire kutera endijo ntambwe. Omwegi yaba ari kuvuga emotoka, omwegesa ashemerire kuba ari na we kandi amwereka oku ashemerire kuta omu nkora ebi yayegire. Ni enki eki turi kwegera ahari eki cokureberaho?
5. (a) Nk’oku biri kugambwa omuri Yohaana 14:15 na 1 Yohaana 2:3 ni enki eki tushemerire kwegesa abegi bitu? (b) Gamba ebyokureberaho ebiri kwereka oku turi kubasa kukwasa abegi bitu kumanya eki bashemerire kukora.
5 Twaba turi kwegesa abegi Bibuli, nituba tushemerire kubegesa ebi Ruhanga ari kwenda ngu tukore. Konka tushemerire kukora ekiri kukira ahari eco. Tushemerire kwegesa abegi bitu ba Bibuli oku bari kubasa kuta omu nkora ebi bari kwega omu kubaho kwabo. (Shoma omuri Yohaana 14:15; 1 Yohaana 2:3.) Ecokureberaho: Tushemerire kwereka abegi bitu oku bari kubasa kuta emisinge ya Bibuli omu nkora baba bari ah’ishomero, aha murimo ninga omu kweshemeza. Nitubasa kumugambira oku emisinge ya Bibuli yaturinzire akabi ninga shi oku yatukwasize kukora ensharamu ndungi. Twaba turi hamwe n’abegi bitu, nitubasa kushaba Yehova ngu abahe omwika oguri kwera gubebembere.—Yoh 16:13.
6. Ni enki eki turi kubasa kukora kugira ngu tukwase abandi korobera ebiragiro bya Yesu?
6 Ni enki eki turi kubasa kukora kugira ngu tukwase abandi korobera ebiragiro bya Yesu? Tushemerire kukwasa abegi ba Bibuli kugira ecetengo c’okuhindura abantu abegi. Abegi abamwe nibatina omurimo g’okuburira. Obwe rero, tushemerire kwehangana twaba turi kubegesa amazima g’omuri Bibuli agari kubakwasa kugira okwikiriza, gakabahika aha mutima kandi gakabahiga kugira eki bakora. Ni bata oku turi kubasa kukwasa abegi bitu kugira ecetengo c’okugambira abandi obutumwa burungi?
7. Ni bata oku turi kubasa kukwasa omwegi wa Bibuli kukizaho kugira ecetengo c’okugambira abandi obutumwa burungi?
7 Nitubasa kubuza abegi bitu ebibuzo nk’ebi: “Ni bata oku kukuratiza ebi Bibuli eri kwegesa cahindwire amagara gawe? Mbehi n’abandi tibashemerire kuhurira obu butumwa? Ni enki eki ori kubasa kukora ngu obakwase?” (Enf 3:27; Mat 9:37, 38) Yereka omwegi otutabo oturi omu bi turi kukoresa omu kwegesa Bibuli rero omushabe kutoranamu oburi kukwasa abanyabuzare beye, banywani beye, hamwe n’abakozi bagenzi beye. Hereza omwegi otwo tutabo. Mwegese oku ari kubasa kuha abandi otwo tutabo. Abegi bitu baba ababurizi abatakabatizibwe, tushemerire kuguma hihi kugira ngu tubakwase kukora omurimo g’okuburira.—Mub 4:9, 10; Luk 6:40.
OKU AB’OMU KIBINA BARI KUBASA KUKWASA ABEGI BA BIBULI KUTUNGUKA
8. Ahabw’enki omwegi wa Bibuli ashemerire kukizaho kukunda Yehova n’abatahi? (Reba akashanduku akari kugira ngu: ‘ Oku ori kubasa kukwasa abegi ba Bibuli kukizaho kukunda Ruhanga.’)
8 Yijuka ku Yesu yatuhire ekiragiro c’okwegesa abandi ‘korobera byona’ ebi yaturagire. Eco nikitwariramu ebiragiro bibiri bikuru; kukunda Ruhanga n’okukunda abatahi, kandi byombi nibibugana n’omurimo g’okuburira n’okuhindura abantu abegi. (Mat 22:37-39) Nibibugana bita? Omusinge oguri kutuhiga kuburira ni rukundo eyi turi kukunda Ruhanga n’abatahi. Abegi ba Bibuli bamwe nibatina omurimo g’okuburira. Konka nitubasa kubahamiza ku Yehova ayetegwire kubakwasa obwo bwoba bukahwa. (Zab 18:1-3; Enf 29:25) Akashanduku akari omuri eki kicweka nikereka eki turi kubasa kukora kugira ngu tukwase omwegi witu kukizaho kukunda Ruhanga. Kandi shi ni enki eki ab’omu kibina bari kubasa kukora kugira ngu bakwase abegi ba Bibuli basya kukizaho kwereka rukundo?
9. Omu cokureberaho c’omuntu ori kwega kuvuga emotoka, ni bata oku omwegi ari kwega amashomo g’omugasho?
9 Nambwenu tekateka aha cokureberaho c’omwegi ori kwega kuvuga. Mbwenu shi omwegi yaba avugire omwegesa weye amuri aha rubaju, ni bata oku ari kwega? Nayega ari kuhurikiza omwegesa weye kandi ari kwetegereza abandi bavugi abamanyirire. Ecokureberaho: Omwegesa nabasa kushaba ondijo muvugi murungi omanyirire kumuza omu misho. Nabasa n’okwetegereza ondijo muvugi ori kucendeza amatara kugira ngu abandi bavugi babase kureba, rero ahiga omwegi weye kukikora. Omwegi nabasa kukuratiza ago mashomo ku ariba avugire.
10. Ni enki ekiri kukwasa omwegi wa Bibuli kukizaho kukura omu by’omwika?
10 Ni co kimwe, omwegi wa Bibuli yatandika kugendera omu muhanda gw’amagara, nayegera aha mwegesa weye n’aha birungi by’abandi bahereza ba Yehova. Mbwenu shi, ni enki ekiri kukwasa abegi ba Bibuli kukizaho kukura omu by’omwika? Ni okwija omu nterane. Ahabw’enki? Ebi bari kwega omu nterane nibituma bakizaho kugira obumanyi, bakizaho kugira okwikiriza, kandi bakizaho kukunda Ruhanga. (Byak 15:30-32) Nambwenu, omu nterane omwegesa wa Bibuli nabasa kwanjurira benetata na banyanyazi omwegi weye abine ebi babuganireho. Ni eha mitwarize eyi abegi bari kubasa kwegera aha Bakristo b’omu kibina? Yetegereze ebyokureberaho ebyaza kukurataho.
11. Ni enki eki omwegi ari kubasa kureba omu kibina, kandi shi nibimukwataho bita?
11 Omwegi wa Bibuli ori kurera abana ari wenka nabasa kwetegereza omunyanyazi ori omu mbera nk’ezeye. Ku ari kureba oku ogo munyanyazi ari kutaho amani kugira ngu arete abana beye bato omu nterane, nikimukora aha mutima. Omwegi owaremirwe kureka kuresa yamanya ondijo muburizi owarabire omuri ezo mbera kandi akazisingura, nikimukora aha mutima. Ogo muburizi nabasa kugambira omwegi oku rukundo eyi ari kukunda Yehova yatumire yayorobera ebiragiro byeye. (2 Kor 7:1; Fil 4:13) Omwegi yamara kuhurikiza omuburizi, nayesiga atari kubanganisa ku na we ari kubasa kureka kuresa. Omukazi ori kwega Bibuli nayetegereza omunyanyazi ori kutura ashemerirwe ahabw’okuba ari Omuhamya wa Yehova. Eco nikituma omwegi yayenda kwega byingi kugira ngu amanye enshonga eri kutuma omunyanyazi ari kutura ashemerirwe.
12. Ahabw’enki turi kubasa kugira ngu buri omwe omu kibina nabasa kukwasa abegi ba Bibuli kutunguka?
12 Abegi ba Bibuli bamanya ebyahikire aha bahereza ba Ruhanga b’abesigwa, nikituma bayega korobera ekiragiro ca Kristo c’okukunda Ruhanga n’abatahi. (Yoh 13:35; 1 Tim 4:12) Konka nk’oku twakireba, ababurizi abingi nibabasa kwegera byingi aha baburizi abahikirweho embera nk’ezi barimu. Ebyo byokureberaho nibyereka omwegi ku na we ari kubasa kukora empinduka kugira ngu abe omwegi wa Kristo. (Bir 30:11) Ab’omu kibina bona nibabasa kugira eki bakora kugira ngu bakwase abegi kukora entunguka. (Mat 5:16) Ni enki eki ori kubasa kukora kugira ngu okwase abegi ba Bibuli abari kwija omu nterane kukora entunguka?
KWASA ABAFUKIRIRE KUGARUKA KUKORA OMURIMO G’OKUBURIRA
13-14. Ni bata oku Yesu yatwarize entumwa zeye obu zabire zihwiremu amani?
13 Twena nitwenda kukwasa benetata na banyanyazi abafukirire kongera kukora murimo ogu Kristo yatusigire g’okuhindura abantu abegi. Omuri obu bwire nitubasa kukora eki Yesu yakorire abegi beye obu babire bahwiremu amani.
14 Aha muheru g’omurimo gwa Yesu omu nsi ari hihi kwitwa, entumwa ‘zeye zona zikamuhungaho, zayiruka.’ (Mak 14:50; Yoh 16:32) Ni bata oku Yesu yatwarize ezo entumwa zeye obu zabire zihwiremu amani? Hahwire obwire buce Yesu azokire, akagambira bamwe omu bakurasi beye ngu: ‘Mutatina, mugende, mugambire bagenzi bange [ku nzokire].’ (Mat 28:10a) Yesu tararekire entumwa zeye. N’obu bamuhungireho, akagumizamu kubeta ‘benishe.’ Nka Yehova, Yesu na we akaba ari omunyambabazi kandi ari kusaasira.—2 Bag 13:23.
15. Ni bata oku tushemerire kureba benetata na banyanyazi abarekire kukora omurimo g’okuburira?
15 N’itwe tushemerire kufa munonga aha baburizi abarekire kukora omurimo g’okuburira. Ni benetata na banyanyazi kandi nitubakunda! Tucayijuka omurimo ogu bakozire omu bwire bwa kare, kandi abamwe nibabasa kuba bagukozire emyaka myingi. (Heb 6:10) Mazima tubasisire! (Luk 15:4-7) Ni bata oku turi kubasa kutoreza Yesu, turi kufa ahari abo abafukirire?
16. Ni bata oku turi kubasa kwereka ku nitufa ahari benetata na banyanyazi abafukirire?
16 Bete bije omu nterane. Oburyo bumwe obu Yesu yahumurize entumwa zeye ezabire zihwire amani ni okuzeta ngu zije omu nterane. (Mat 28:10b; 1 Kor 15:6) N’omuri obu bwire, nitubasa kweta benetata na banyanyazi abafukirire ngu bije omu nterane. Hine obu turi kuba tushemerire kubeta emirundi myingi kugira ngu babone kwija. Hatariho okubanganisa, Yesu akashemererwa abegi beye ku bamworobire bakabuganira hamwe.—Geranisa ebiri omuri Matayo 28:16 na Luka 15:6.
17. Ni bata oku tushemerire kutwariza owafukirire yayija omu nterane?
17 Bakire oshemerirwe. Yesu akakira abegi beye ashemerirwe obu babugine na we kandi yahika ari kubaganirira. (Mat 28:18) Ni bata oku tushemerire kutwariza mwenetata ninga munyanyazi owafukirire yayija omu nterane? Tushemerire kuhika turi kumwakira tushemerirwe. Omu kubanza, nitubasa kutina ngu titurabone eby’okumugambira. Konka kugira ngu tutatuma yayehurira kubi, nitubasa kumugambira ku twashemererwa ahabw’okumubona.
18. Ni bata oku turi kubasa kugaruramu amani abafukirire?
18 Bagaruremu amani. Abegi ba Yesu nibabasa kuba batekatekire ku batari kubasa kuburira omu nsi yona. Yesu akahamiza abakurasi beye ngu: ‘Ndi hamwe n’imwe ebiro byona.’ (Mat 28:20) Mbehi ebyo bigambo bikabagaruramu amani? Yego. Bwanyima, ‘tibararekire kwegesa n’okuburira’ obutumwa burungi. (Byak 5:42) Abafukirire na bo nibenda ngu tubagaruremu amani. Nibabasa kuhurira batinire kugaruka kuburira. Nitubasa kubahamiza ku batariburira bari bonka. Baba bariho, nitubasa kugenda na bo omu murimo g’okuburira. Mazima ku turabakwase kushuba kukunda omurimo g’okuburira nibija kushemererwa. Twatwariza ge abafukirire kandi tukabareba nka benetata na banyanyazi, nikija kutuma omu kibina habamu okushemererwa kwingi.
NITWENDA KUHENDERA OMURIMO OGU YESU YATUHIRE
19. Ni enki eki turi kwenda, kandi ahabw’enki?
19 Omurimo g’okuhindura abantu abegi guryahendera ryari? Ni okuhisya obu ensi egi erihwaho. (Mat 28:20) Mbehi turyabasa kuhikiriza ogu murimo ogu Yesu yatuhire? Tukamaririra kugukora! Nitushemererwa kuhayo obwire bwitu, amani gitu n’ebintu byitu turi kuronda abetegwire kwikiriza amazima agari kutasya omu magara agatahwaho. (Byak 13:48) Twakikora tusyoya nituba turi kutoreza ecokureberaho ca Yesu. Akagira ati: ‘Ebyokurya byange ni ko kukora eki owantumire akunda n’okuhikiriza omurimo gweye.’ (Yoh 4:34; 17:4) Kandi n’itwe ni co turi kwenda. Nitwenda ngu tuhendere omurimo ogu Yesu yatuhire. (Yoh 20:21) Kandi nitwenda ngu n’abafukirire bagumizemu kukora omurimo n’itwe.—Mat 24:13.
20. Nk’oku biri kugambwa omu Bafilipi 4:13, ahabw’enki turi kubasa kuhendera omurimo ogu Yesu yatuhire?
20 Kuhendera omurimo ogu Yesu yatuhire ticorobi. Konka, tituri twenka. Yesu akaturaganisa ku ariba ari hamwe n’itwe. Nitukora omurimo g’okuhindura abantu abegi turi abakozi abari kukora na Ruhanga kandi turi kukora na Kristo. (1 Kor 3:9; 2 Kor 2:17) Obwe rero, nitubasa kuguhendera. Ku ni omugisha gw’amani kuhikiriza ogu murimo kandi tukakwasa n’abandi kugukora!—Shoma omu Bafilipi 4:13.
ECESHONGORO CA 79 Begyese Kwongyera Kutunguuka
^ par. 5 Yesu akaragira abakurasi beye kuhindura abantu abegi kandi bakabegesa korobera byona ebi yabaragire. Eki kicweka caza kutukwasa kumanya oku turi kubasa korobera obuhabuzi bwa Yesu. Harimu ebyarugire omu Munara g’Omurinzi gw’aha kiro ca 1 Okwamushanju, 2004, ahari peji ya 14-19.
^ par. 66 EKISHUSHANI: Omunyanyazi ari kushobororera omwegi wa Bibuli ebi ashemerire kukora kugira ngu akizeho kukunda Ruhanga. Bwanyima, omwegi yata omu nkora ebi yayega.
