1. Met Jesus a allúkú ngeni néún kewe chón káé me ren Mateus 28:18-20?

MWIRIN án Jesus manawsefál, a pwá ngeni néún kewe chón káé mi chufengen lón Kalilea. A wor och pwóróus mi lamot epwe ereniir. Ifa? An kana pwóróus ra mak lón Mateus 28:18-20.​—Álleani.

2. Ikkefa ekkewe kapas eis sipwe pwóróus woor?

² Án Jesus na allúk le álisi aramas le wiliti néún kewe chón káé a pwal weneiti emén me emén néún Kot kewe chón angang lón ei fansoun. Ina popun, sipwe pwóróus wóón ekkeei úlúngát kapas eis mi riri ngeni ewe wis Jesus a ewisa ngenikich. Áeúin, met a lamot ach sipwe féri me lúkún ach sipwe asukula án Kot kewe allúk ngeni ekkewe mineféén chón káé? Oruuan, ifa usun meinisin chón afalafal lón ewe mwichefel repwe tongeni álisatá feffeitáán ekkewe chón káé lón pekin ngún? Aúlúngátin, ifa usun sipwe tongeni álisi pwiich kewe rese chúen akkafalafal le afalafalsefál?

3. Ikkefa án Jesus éúréúr mi tichik a apachaalong lón an allúk?

³ A ffat án Jesus éúréúr. A lamot ach sipwe asukula ngeni aramas minne a allúkú. Iwe nge, a lamot ach sipwe chechchemeni ei mettóch mi lamot. Jesus ese erá: ‘Oupwe afalafaler mettóch meinisin ua allúkú.’ Nge, a erá: “Oupwe afalafaleer pwe repwe aleasochisi meinisin mine üa allük ngenikemi.”  Ren ach sipwe apwénúetá ena éúréúr mi tichik lón ach asukula néúch chón káé, a lamot ach sipwe áiti ngeni met epwe féri, me pwal áiti ngeni ifa usun epwe féri. (Föf. 8:31) Pwata a lamot ach sipwe féri ena?

4. Áweweei ifa usun sia tongeni áiti ngeni néúch chón káé an epwe álleasochisi minne Kraist a allúkú.

⁴ Ifa usun sipwe tongeni áiti ngeni emén an epwe álleasochisi minne Kraist a allúkú? Ei kapas áwewe epwe álisikich le weweiti met a lamot sipwe féri. Ifa usun emén chón káit únteng epwe áiti emén ifa usun epwe álleasochisi allúkún traffic? Akkomw, ena chón káit epwe áiti ngeni ekkewe allúkún wóón al mi lamot epwe álleasochisiir. Iwe nge, ren an epwe áiti ngeni ifa usun epwe álleasochisi ekkena allúk, mi lamot epwe féri pwal och mettóch. Epwe fiti me emmweni néún we chón káé únteng lón an uwou tarakú me lón an achocho le apwénúetá minne a káé. Met sia tongeni káé seni ena kapas áwewe?

5. (a) Me ren Johannes 14:15 me 1 Johannes 2:3, met a lamot sipwe áiti ngeni néúch kewe chón káé le féri? (b) Áweweei ifa usun sia tongeni emmweni néúch kewe chón káé.

⁵ Lupwen sia káé ngeni aramas ewe Paipel, sia asukula ngeniir met Kot a mochen sipwe féri. Nge a lamot sipwe pwal féri och mettóch. Sipwe asukuler le apwénúetá minne ra káé lón manawer iteitan. (Álleani Johannes 14:15; 1 Johannes 2:3.) Sia tongeni áiti ngeniir ren ach féffér ifa usun repwe apwénúetá ekkewe kapasen emmwen seni Paipel lón ar sukul, leenien angang, are atun kunou. Sia tongeni apwóróusa ngeniir ifa usun ach apwénúetá án Paipel emmwen lón manawach a túmúnúkich seni feiengaw are ifa usun a álisikich le kefiléch. Lupwen sia iótek fengen me néúch kewe chón káé, sia tongeni tingor án Jiowa we ngún mi fel an epwe emmweniir.​—Joh. 16:13.

6. Met a kapachelong lón ach asukula ngeni aramas ar repwe álleasochisi án Jesus kewe allúk?

⁶ Met a kapachelong lón ach asukula ngeni aramas ar repwe álleasochisi án Jesus kewe allúk? A lamot ach sipwe álisiir le ámááraatá ar mochen le álisi aramas le wiliti néún Jesus chón káé. Ekkóch chón káé ra pireir le afalafal. Ina popun, sipwe mosonottam lón ach álisiir le weweéchúti ewe Paipel pwe epwe apéchékkúla ar lúkú, achchúngú letiper me amwékútúúr le mochen afalafal. Met sia tongeni féri le álisi néúch kewe chón káé ar repwe mochen afalafala ewe kapas allim?

7. Ifa usun sipwe álisi emén chón káé le ámááraatá an mochen le afalafala ewe kapas allim ngeni aramas?

⁷ Eli sipwe eisini néúch chón káé ekkeei kapas eis: “Ifa usun óm silei pwóróusen ewe Mwú a ámúrinnééló manawom? Óm lúkú pwe a lamot án ekkewe ekkóch repwe rong ena pwóróus? Met ka tongeni féri le álisiir?” (SalF. 3:27; Mat. 9:37, 38) Áiti ngeni noum we chón káé ekkewe tract mi nóm lón ewe Pwórun Asukul, me mut ngeni an epwe filatá menni a ekieki pwe aramasan kewe, chiechian, are chienan chón angang repwe sani. Ngeni noum na chón káé fitaché ekkena tract. Oupwe asóssót wóón ifa usun an epwe anéúnéú eché tract fán mennin. Pwúngún, mwirin án néúch we chón káé wiliti chón afalafal esaamwo papatais, sipwe fiffiti le afalafal me emmweni.​—SalAf. 4:9, 10; Luk. 6:40.

8. Pwata a lamot án néúch kewe chón káé repwe apéchékkúlaló ar tongei Kot me chón óruur? (Pwal ppii ewe pwóór “ Usun Ach Álisi Néúch Chón Káé le Alapaaló Ar Tongei Kot.”)

⁸ Chemeni pwe Jesus a éúréúrakich ach sipwe asukula aramas “pwe repwe aleasochisi meinisin” minne a allúkú. Ekkewe ruu allúk mi aúchea lap seni meinisin, ina ach  tongei Kot me chón óruch, ra wesewesen kapachelong lón minne Jesus a allúkú. Ekkena ruu allúk ra fókkun riri ngeni ewe angangen afalafal me álisi aramas le wiliti néún Jesus chón káé. (Mat. 22:37-39) Ifa usun? Ewe ákkáeúin popun sia fiti ewe angangen afalafal, pokiten sia tongei Kot me chón óruch. Pwúngún pwe neman ekkóch chón káé repwe niwokkus le fiti ewe angangen afalafal. Nge sia tongeni alúkúlúkúúr pwe ren án Jiowa álillis, ekis me ekis repwe tongeni okkufu ar niwokkusiti aramas. (Kölf. 18:1-3; SalF. 29:25) Ewe pwóór lón ei lesen a áweweei met sia tongeni féri pwe sipwe álisi néúch chón káé le alapaaló an tongei Kot. Pwal och, met chón ewe mwichefel ra tongeni féri le álisi ekkewe mineféén chón káé le alapaaló ar pwári tong?

9. Lón ewe kapas áwewe usun ewe chón káé únteng, ifa usun a káé ekkóch lesen mi aúchea?

⁹ Ekiekisefáli ewe kapas áwewe usun ewe chón káé únteng. Atun ewe chón áiti a fiti lón an uwou, ifa usun ena chón káé únteng a káé? Ren an akkaúseling ngeni néún we chón káit me ren an kakkatol ekkewe ekkóch chón únteng mi angéch. Áwewe chék, ewe chón áiti a tongeni itin ngeni emén chón únteng mi kirekiréch le mutaalóng pwal emén an epwe akkomw mwan. Are a tongeni itini pwal emén chón únteng mi kirekiréch le ekisaatiw ttinen néún kewe tengkiin mwan pwe ekkewe ekkóch chón uwou rete masaroch. Ekkena leenien áppirú ra áiti ngeni ewe chón káé únteng ekkóch lesen mi aúchea a tongeni apwénúetá lón an uwou tarakú.

10. Met epwe álisi emén chón káé le feffeitá lón pekin ngún?

¹⁰ Pwal ina chék usun, emén chón káé mi poputá le angang ngeni Jiowa ese chék káé seni ewe mi wisen káé ngeni, nge pwal seni án ekkóch néún Jiowa kewe chón angang leenien áppirú mi múrinné. Ina popun, met epwe wesewesen álisi ekkewe chón káé le feffeitá lón pekin ngún? Ar fiffiti ekkewe mwich. Pwata? Minne ra rong lón ekkena mwich epwe álisiir le alapaaló ar sile, apéchékkúla ar lúkú, me álisiir le apéchékkúlaló ar tongei Kot. (Föf. 15:30-32) Pwal och, atun ekkewe mwich ewe chón káé ngeni a tongeni pani ngeni pwiich kewe iir mi likiitú fán ekkewe esin osukosuk a pwal eáni. Ewe chón káé a tongeni kúna ifa usun chón ewe mwichefel ra pwári tong lefiler.

11. Ikkefa ekkewe leenien áppirú emén chón káé a tongeni kúna me lón ewe mwichefel, me ifa usun a tongeni achchúngú letipan?

¹¹ Ekieki usun ekkeei pwóróus. Emén chón káé mi wor néún nge ese wor pwúlúwan a kúna emén Chón Kraist fefin mi léllé nónnómur. A chúng letipen ena chón káé ren an kúna úkúkún achochoon ena fefin Chón Kraist le fiti ekkewe mwich fán néún kewe semirit. Emén chón káé mi weires ngeni an epwe úkú seni an ún suupwa a chiechi ngeni emén Chón Kraist mi pwal eáni ena esin weires me lóóm nge a okkufu. Ena Chón Kraist a apwóróusa ngeni ewe chón káé ifa usun lapólóón an tongei Jiowa a amwékútú le álleasochisi an kewe allúk. (2 Kor. 7:1; Fil. 4:13, Testament Mi Fö) Lupwen ena chón káé a aúseling ngeni pwóróusen pwiich na, iwe a lapóló an lúkúlúk ren an ereni, “Ka pwal tongeni úkú seni óm ún suupwa.” Emén chón káé fépwúl a kúna emén fépwúl Chón Kraist mi fókkun pwapwa lón manawan ren an emén Chón Pwáraatá. Lupwen ena chón káé a kúna pwapwaan ena Chón Kraist fépwúl, a pwal mochen silei pwata a chék pwapwa iteitan.

12. Pwata sia tongeni erá pwe emén me emén lón ewe mwichefel a wor wiser le álisi ekkewe chón káé?

¹² Lupwen ekkewe chón káé ra sissileeló chómmóng pwiich kewe mi tuppwél, ra káé  seni ar leenien áppirú ren ifa usun repwe álleasochisi án Kraist allúk le tongei Kot me chón óruur. (Joh. 13:35; 1 Tim. 4:12) Pwal och, usun met sia fen apasa me mwan pwe emén chón káé a tongeni káé seni pwiich kewe mi piin eáni ekkewe esin weires a pwal eáni. A káé seniir pwe ekkewe siwil mi lamot epwe féri a kii ngeni ren an epwe wiliti emén Chón Kraist. (Tut. 30:11) Meinisin lón ewe mwichefel ra tongeni álisatá feffeitáán ekkewe chón káé. (Mat. 5:16) Met ka pwisin achocho le féri le apéchékkúla ekkewe chón káé mi fiffiti ekkewe mwich?

13-14. Ifa féfférún Jesus ngeni néún kewe aposel lupwen ra meefi lichippúng?

¹³ Sia mochen álisi chienach kewe Chón Kraist rese chúen akkafalafal ar repwe akkafalafalsefál. Féfférún Jesus ngeni néún kewe aposel mi meefi lichippúng a áiti ngenikich met sia tongeni féri lón ei fansoun.

¹⁴ Lesópwólóón án Jesus angangen afalafal wóón fénúfan me mwen an epwele máló, ekkewe aposel “meinisin ra likitala Jesus o süla.” (Mark. 14:50; Joh. 16:32) Met Jesus a féri lón ena atun néún kewe aposel ra meefi lichippúng? Ekiseló mwirin án Jesus manawsefál, a ereni ekkóch néún kewe chón káé: “Ousap niuokus! Oupwe feila o üreni pwii kewe [pwe ua manawsefál].” (Mat. 28:10a) Jesus ese fangetááni néún kewe aposel. Inaamwo ika ra likitaló, nge a chúen kér ngeniir “pwii kewe.” Jesus a úméúméch me omusaaló tipis usun chék Jiowa.​—2 King 13:23.

15. Met meefiach usun chókkewe rese chúen akkafalafal?

¹⁵ Pwal ina chék usun, sia fókkun chúngú chókkewe mi úkútiw le akkafalafal. Iir pwiich kewe me sia tongeer! Sia chúen chechchemeni meinisin ewe angang ra féri fán iten Jiowa. Ekkóch chókkewe rese chúen akkafalafal iei ra fen pin angang weires ngeni Jiowa ren fite fite ier. (Ipru 6:10) Sia fókkun pwosiitiir! (Luk. 15:4-7) Ifa usun sia tongeni pwári ach chúngúúr usun chék Jesus?

16. Ifa usun sia tongeni pwári ach chúngú pwiich kewe mi patapateló lón ar angang ngeni Jiowa?

¹⁶ Etiwer ngeni ekkewe mwich fán tong. Eú alen án Jesus apéchékkúla néún kewe aposel mi lichippúng, ina ren an etiwer lón eú mwich. (Mat. 28:10b; 1 Kor. 15:6) Pwal ina chék usun lón ei fansoun, sia tongeni apéchékkúla chókkewe mi patapateló lón ar angang ngeni Jiowa le fiti ekkewe mwich. Sia mirititi pwe eli a lamot ach sipwe etiwer fán fite me mwen ar repwe etiwa ach etiwetiw. Ese mwáál Jesus a pwapwa lupwen néún kewe chón káé ra etiwa an etiwetiw.​—Apépé ngeni Mateus 28:16 me Lukas 15:6.

17. Met sipwe féri atun emén mi patapateló a fiti mwich?

¹⁷ Etiwaéchúúr. Jesus a ámmeef ngeni néún kewe chón káé pwe a fókkun etiwaéchúúr lupwen ra chufengen. Ese witiwiti ar repwe feito ren, nge a pwisin ló rer me fós ngeniir. (Mat. 28:18) Met sipwe féri atun emén mi patapateló a wareiti ewe Leenien Mwich? Mi lamot sipwe akkomw mwékút le etiwaéchú. Eli me lepoputáán sia pireir pwe sise silei met sipwe apasa. Nge sia chék tongeni ereni pwe sia pwapwa le kúna nge sisap ásáwa.

18. Ifa usun sia tongeni alúkúlúkú ekkewe mi patapateló?

¹⁸ Enletin alúkúlúkúúr. Eli néún Jesus kewe chón káé ra meefi pwe rese tufichin féri ewe angangen afalafal wóón unusen fénúfan. Jesus a alúkúlúkúúr ren an apasa: “Ngang üpwe etikemi fansoun meinisin.” (Mat. 28:20) Iwe, án Jesus kapasen alúkúlúk a álisiir? Ewer. Ekiseló mwirin, ra achocho le “afalafal  . . . o aiti ngeni aramas ewe Pworausen Manau.” (Föf. 5:42) A pwal lamot kapasen alúkúlúk ngeni ekkewe mi patapateló. Neman ra fókkun pireir le afalafalsefál. Sia tongeni alúkúlúkúúr pwe rese chék áláemén le afalafal. Lupwen ra mmólnetá, sia tongeni fitiir. Ese mwáál repwe aúcheani ach álisiir lón ar poputásefál le afalafala ewe kapas allim. Atun sia pwári ngeniir pwe iir chón ach famili lón pekin ngún, iwe eli repwe péchékkúlsefál lón ar angang ngeni Jiowa, ina met a apwapwaai meinisin chón ach mwichefel.

19. Ifa enletin mochenich me pwata?

¹⁹ Itá tori ineet sipwe sópweló le akkafalafal? Tori lesópwólóón ótóten ei fénúfan. (Mat. 28:20) Itá sia tongeni akkafalafal tori ena fansoun? Sia tipeppós le féri ena! Sia pwapwa le fangóló ach fansoun, ach péchékkúl me wéúch le kútta chókkewe “letiper a páái ngeni ar repwe etiwa ewe enlet mi atoto manaw esemuch.” (Föf. 13:48, NW) Lupwen sia féri ena, sia tapweló mwirin án Jesus leenien áppirú. A erá: “Anei mongö ai üpwe aleasochisi letipen ewe mi tiniei o awesala ewe angang.” (Joh. 4:34; 17:4) Pwal ina enletin mochenich. Sia mochen áwesaaló ewe angang a ewisa ngenikich. (Joh. 20:21) Me sia mochen pwe ekkewe ekkóch, kapachelong chókkewe mi patapateló, repwe fitikich le likiitú lón ei angang.​—Mat. 24:13.

20. Pwata sia tongeni áwesaaló ewe angang Jesus a ewisa ngenikich me ren Filipi 4:13, TF?

²⁰ Pwúngún pwe ese mecheres ach apwénúetá minne Jesus a ewisa ngenikich. Iwe nge, sise áláeménúló lón ei angang. Jesus a pwonei pwe epwe etikich. Lupwen sia álisi aramas le wiliti Chón Kraist, sia “akkangangfengen me Kot” me sia chienen Jesus le angang. (1 Kor. 3:9, NW; 2 Kor. 2:17) Ina minne, sia tongeni áwesaaló ei angang. A ifa me feiéchúch me pwapwaach le apwénúetá wisach me álisi aramas le pwal féri ena!​—Álleani Filipi 4:13 seni Testament Mi Fö.