MUTWE WAKULILONGESA 45
Kwasa Akwenu Hanga Ononokene Shimbi ja Kristu
“Kashika yeenu nukatayise tumbaji . . . , nikualongesa kufunga yuma yize yeswe nanuhele shimbi.”—MATEU 28:19, 20.
MWASO 89 Panjika, Ononoka Hanga Akupale
CHIKUMA CHILEMU *
1. Kulita ni Mateu 28:18-20, yika Yesu atumine tumbaji twenyi kulinga?
MUZE amuhindwishile mu ufwe, Yesu yasoloka kuli tumbaji twenyi waze te analikungulula mu Ngalileya. Iye kapwile ni chimwe chikuma chilemu chize afupile kulweza tumbaji twenyi. Chikuma chika chenacho? Maliji jacho mutuhasa kwawana ha Mateu 28:18-20.—Tanga.
2. Yihula yika mutukumbulula ha mutwe uno?
2 Maliji a Yesu a kuya ni kutayisa tumbaji kanatale nawa hali yetu musono. Kashika, tushimutwinenu yihula yitatu yize yinatale ha chiteli chize Yesu atuhele. Chitangu, kuchizako kulongesa tumbaji aha shimbi ja Zambi, yika nawa twatamba kulinga? Chamuchiali, kuchi akwa-kwambujola eswe mu chikungulwila mahasa kukwasa umwe longi wa Mbimbiliya kujama ku ufulielo? Chamuchitatu, kuchi mutuhasa kukwasa mandumbu waze hanazeye ku ufulielo hanga aputuke kwambujola nawa?
ALONGESE KWONONOKENA SHIMBI JA KRISTU
3. Chikuma chika chilemu chize chinasoloka zwalala ha shimbi ya Yesu?
3 Maliji a Yesu kanasolola zwalala ngwo: Twatamba kulongesa atu yuma yize iye atutumine. Alioze, kuli chimwe chikuma chilemu chize kutwatambile kuvulama. Yesu kakambile ngwenyi: ‘Longesenu atu yuma yeswe yize nanuhele shimbi.’ Alioze kambile ngwenyi: ‘Alongesenu kufunga yuma yeswe yize nanuhele shimbi.’ Chino chinalumbunuka ngwo, kutwatambile wika kwalongesa yize atamba kulinga; alioze twatamba kwalweza chize atamba kuyilinga. (Yili. 8:31) Mumu liaka twatamba kulinga chocho?
4. Kufunga yimwe shimbi yika chinalumbunuka? Hana chilweza.
4 “Kufunga” shimbi chinalumbunuka kuyononokena. Mba tumone chize mutu mahasa kufunga hanji kwononokena shimbi ja Yesu, tunyongenu ha chilweza chino. Kuchi longeshi yoze unalongesa longi kwendesa mashinyi, mahasa kumulongesa kwononokena shimbi ja mu tapalo? Chitangu, longeshi katamba kulongesa longi shimbi jacho mu kalasa. Alioze, mba akwase longi kwononokena shimbi jacho, iye katamba kulinga nawa chuma chikwo. Muze longi maputuka kwendesa mashinyi, longeshi katamba kuya nenyi hamuwika mu tapalo hanga amukwase kusa mu yitanga shimbi jize analilongesa. Yika mutuhasa kulilongesa ha chilweza chino?
5. (a) Kulita ni Yoano 14:15 ni 1 Yoano 2:3, yika twatamba kulongesa alongi jetu hanga alinge? (b) Hana chilweza cha chize mutuhasa kusongwela alongi jetu.
5 Muze twakulongesa atu Mbimbiliya, twakwalongesa shimbi ja Zambi. Alioze kuli yuma yinji yize twatamba kulinga. Twatamba kwalongesa chize mahasa kusa mu yitanga yuma yize analilongesa. (Tanga Yoano 14:15; 1 Yoano 2:3.) Chakutalilaho, mutuhasa kukwasa alongi jetu chize mahasa kukaula shimbi ja mu Mbimbiliya ku shikola, ku mulimo hanji muze anahehe. Mutuhasa kwalweza chize kukaula shimbi ja mu Mbimbiliya chatukwashile kwehuka ponde ku mwono wetu, ni chize chatukwashile kukwata yiyulo yipema. Muze tuli hamuwika ni alongi jetu, mutuhasa kulemba kuli Yehova ni kumwita hanga aasongwele ni spiritu yenyi yisandu.—Yoa. 16:13.
6. Yika twatamba kulinga muze tunalongesa akwetu kufunga shimbi ja Yesu?
6 Yika yinatale ha kulongesa akwetu kufunga shimbi ja Yesu? Twatamba kukwasa alongi jetu a Mbimbiliya hanga azange kulinga mulimo wa kutayisa tumbaji. Kuli alongi amwe, nyonga lia kuya ni kwambujola liakwevwisa woma. Kashika, twatamba kupwa yimbovu muze tunaakwase kunyingika umwenemwene uze muukolesa ufulielo wo. Muze malongeso a Mbimbiliya maakwata ku mbunge, ayo ene mazanga kwambujola. Yika twatamba kulinga mba tukwase alongi azange kwambujola?
7. Kuchi mutuhasa kukwasa longi wetu wa Mbimbiliya hanga azange kwambujola sango lipema kuli akwo?
7 Mutuhasa kuhula longi wetu yihula ngwe yino: “Kuchi kukaula yize wakulilongesa mu Mbimbiliya chalumuna mwono we? Ku nyonga lie, shina atu akwo no kanafupu kupanjika sango jino? Kuchi muhasa kwakwasa?” (Yishi. 3:27; Mateu 9:37, 38) Lweza longi we Mushete wa Yikwata ya Kulongesa Nayo ni kumwecha hanga asakule mikanda yize mahasa kuhana kuli asoko, masepa hanji akwa-milimo-ni-akwo. * Mwehe mikanda yinji. Mulongese chize mahasa kuhana mikanda yacho kuli akwo. Muze longi wetu mamutayiza ngwe mukwa-kwambujola yoze kanda achimupapachisa, twatamba kwambujola nenyi hamuwika hanga tumukwase.—Chilu. 4:9, 10; Luka 6:40.
CHIZE CHIKUNGULWILA MUCHIKWASA LONGI KUJAMA KU UFULIELO
8. Mumu liaka chili chilemu alongi a Mbimbiliya kuzanga Zambi ni enyembo jo? (Tala mushete, “ Chize Mukwasa Longi Kukolesa Zango Lienyi Hali Zambi.”)
8 Iwuluka ngwe, Yesu katutumine kulongesa akwetu “kufunga yuma yize yeswe” atuhele shimbi. Yino yinatale nawa ha maliji aali anene a shimbi: kuzanga Zambi ni enyembo jetu. Shimbi jino jaali jinatale ha mulimo wa kwambujola ni kutayisa tumbaji. (Mateu 22:37-39) Mu mutapu uka? Chikuma chilemu chize twakwambulwila sango lipema chili: zango lietu hali Zambi ni hali enyembo jetu. Hamukunda wa woma, alongi amwe a Mbimbiliya keshi kuzanga kwambujola sango lipema. Alioze mutuhasa kwakolweza ngwetu, hakehe-hakehe Yehova maakwasa kukumba woma wa atu. (Samu 18:1-3; Yishi. 29:25) Mushete uli ha mutwe uno, unasolola yuma yize mutuhasa kulinga mba tukwase alongi kukolesa zango lio hali Zambi. Chikwo nawa, yika chikungulwila muchihasa kulinga hanga akwase longi wa Mbimbiliya akolese zango lienyi?
9. Ha chilweza cha mutu yoze unalilongesa kwendesa mashinyi, mu mutapu uka iye malilongesa yikuma yilemu?
9 Tunyongenu nawa ha chilweza cha mutu yoze analongesa kwendesa mashinyi. Muze anendesa mu tapalo ni ukwaso wa longeshi yenyi, mu mutapu uka iye mahasa kulilongesa? Ha kupanjika yiyulo ya longeshi yenyi ni kutala akwo waze anendesa kanawa. Chakutalilaho, longeshi mahasa kumulweza mukwa-kwendesa mukwo, yoze uli chimbovu uneche akwo hanga apalike kulutwe. Hanji kumulweza mukwa-kwendesa yoze unatepulula kahia ku mashinyi jenyi hanga ahone kupinjisa akwo waze aneza kulutwe. Longi mahasa kulilongesa yuma yinji ha yilweza yacho muze anendesa mashinyi.
10. Yika muyihasa kukwasa longi wa Mbimbiliya mba ajame ku ufulielo?
10 Chizechene nawa, longi wa Mbimbiliya yoze unaputuka kulingila Yehova, keshi kulilongesa wika kuli longeshi yenyi, alioze ni kuli tuvumbi akwo a Yehova waze ali yilweza yipema. Yika muyihasa kukwasa alongi a Mbimbiliya mba akole ku ufulielo? Kuya ku kukunguluka. Mumu liaka? Yuma yize malilongesa ku kukunguluka muyimukwasa kwokesa chinyingi chenyi, kukolesa ufulielo wenyi ni zango lienyi hali Zambi. (Yili. 15:30-32) Chikwo nawa, ha kukunguluka longeshi mahasa kusolola longi yenyi kuli mandumbu akwo waze hanji akwete yuma yalifwa ni longi. Hachino, longi mamona chize mandumbu akulisolwela zango mu chikungulwila. Tutalenu yimwe yilweza.
11. Yilweza yika longi mahasa kumona mu chikungulwila, nawa kuchi muyihasa kukwata ku mwono wenyi?
11 Achinyonga umwe longi wa Mbimbiliya twamishi yoze uli ni ana. Muze ali mu Zuwo lia Wanangana, mamona umwe ndumbu wa pwo yoze neye unapalika mu yuma yacho. Hachino, muze mamona tachi jize ndumbu yono akusa hanga aye ku kukunguluka ni ana-a-kemba, chino muchimukwata ku mbunge. Hanji achinyonga umwe longi wa Mbimbiliya yoze keshi kuhasa kweche kushipa makanya. Mba manyingika umwe ndumbu yoze wahashile kwecha ndako yacho. Hachino, ndumbu wacho malweza longi wa Mbimbiliya chize zango lienyi hali Yehova liamukwashile kwononokena shimbi jenyi. (2 Kori. 7:1; Fwili. 4:13) Hanyima lia kupanjika chize ndumbu ahashile kwecha kushipa, iye mahasa kulweza longi wacho ngwenyi: “Ni yena muhasa kwecha kushipa.” Chikwo nawa, achinyonga umwe mukweze wa pwo yoze wakulilongesa Mbimbiliya, mamona chize mwana-pwo-ni-mukwo anawahilila mumu lia kupwa Chela cha Yehova. Muze longi mamona chize mwana-pwo-ni-mukwo anawahilila, neye mahasa kufupa kunyingika mumu liaka iye anawahilila chichize.
12. Mumu liaka mutuhasa kwamba ngwetu, mandumbu eswe mu chikungulwila kali ni chiteli cha kukwasa alongi a Mbimbiliya hanga ajame ku ufulielo?
12 Muze alongi a Mbimbiliya manyingika yilweza yipema ya mandumbu eka ni eka mu chikungulwila, ayo mahasa kumona chize chinalumbunuka kwononokena shimbi ya Yesu ya kuzanga Zambi ni enyembo jo. (Yoa. 13:35; 1 Timo. 4:12) Chikwo nawa, ngwe chize twamona, longi mahasa kulilongesa kuli mandumbu waze akupalika mu ukalu ngwe wa iye. Muze mamona yilweza yacho, muyimukwasa kwalumuna yitanga ku mwono wenyi ni kupwa kambaji ka Kristu. (Shimbi 30:11) Mandumbu eswe mu chikungulwila, mahasa kukwasa alongi a Mbimbiliya mu majila alisa hanga ajame ku ufulielo. (Mateu 5:16) Tachi jika wakusa hanga ukwase alongi a Mbimbiliya waze akwiza ku kukunguluka?
KWASA WAZE HANAZEYE KU UFULIELO APUTUKE KWAMBUJOLA NAWA
13-14. Yika Yesu alingile muze apostolo jenyi te anazeye?
13 Twatamba kukwasa mandumbu jetu waze hanazeye ku ufulielo hanga afune mu mulimo wa kutayisa tumbaji. Mba tuchilinge, mutuhasa kwimbulula chize Yesu akwashile apostolo jenyi muze te anazeye.
14 Muze kufwa cha Yesu chakundamine, apostolo jenyi “yamuhichika, yachina.” (Marku 14:50; Yoa. 16:32) Yika Yesu alingile muze apostolo jenyi te anazeye? Muze amuhindwishile, Yesu yalweza amwe a kuli tumbaji twenyi ngwenyi: “Kanda nwivwa woma: yeenu, nukambulwile mandumbu jami [ngwenu kanguhindwisa].” (Mateu 28:10a) Yesu kakehukile apostolo jenyi. Chipwe ngwe ayo kamuhichikile ukawenyi, nihindu kapwile ni kwasanyika ngwenyi, “mandumbu jami.” Chizechene ngwe Yehova, Yesu neye kapwile ni kusolola keke ni kukonekena akwo.—2 Mia. 13:23.
15. Kuchi twakwivwa hali mandumbu waze haneche kwambujola sango lipema?
15 Ni yetu nawa, twakulihulumba ni waze haneche kwambujola sango lipema. Ayo kali mandumbu jetu, kashika twakwazanga chinji! Twakwiwuluka milimo yeswe yize mandumbu wano alingile ku mashimbu a kunyima. Amwe a kuli mandumbu jacho, kakalakalile ha miaka yinji. (Hepre. 6:10) Kwamba umwenemwene, twakweevwila usona unji! (Luka 15:4-7) Ngwe Yesu, kuchi mutuhasa kusolola ngwetu twakulihulumba hali mandumbu jetu waze hanazeye ku ufulielo?
16. Kuchi mutuhasa kusolola ngwetu twakulihulumba hali mandumbu jetu waze hanazeye ku ufulielo?
16 Asanyike eze ni kukunguluka. Jila yimwe yize Yesu atakamishinemo apostolo jenyi, yapwile kwasanyika ha kukunguluka. (Mateu 28:10b; 1 Kori. 15:6) Ni yetu nawa, mutuhasa kukolweza waze hanazeye ku ufulielo hanga eze ha kukunguluka nyi kanda aputuka kuchilinga. Tunanyingika ngwetu, mashimbu amwe muchifupiwa kwasanyika ha yisuho yinji mba atayize. Yesu kanakawahilila chinji muze tumbaji twenyi atayijile kuya ha kukunguluka, ni yetu nyi twachilinga mutuwahilila.—Tesa ni Mateu 28:16 ni Luka 15:6.
17. Yika twatamba kulinga muze umwe ndumbu yoze hanazeye ku ufulielo meza ku kukunguluka?
17 Atambwise ni zango. Yesu kakwashile tumbaji twenyi kulivwa kanawa, muze aliwanyine no. Iye mwe waliangile kuhanjika no. (Mateu 28:18) Yika twatamba kulinga muze umwe ndumbu yoze hanazeye ku ufulielo meza mu Zuwo lia Wanangana? Twatamba kulianga kuya ni kuhanjika nenyi ni zango. Hanji mutuhasa kunyonga ngwetu kutushi ni yize mutwamba. Alioze mba tuhone kumuvwisa sonyi, mutuhasa kwamba ngwetu, tunawahilila chinji kupwa ne hamuwika.
18. Kuchi mutuhasa kutakamisa mandumbu waze hanazeye ku ufulielo?
18 Mukolweze ni mbunge ye yeswe. Tumbaji a Yesu kota kanyongene ngwe te kechi kuhasa kulinga mulimo wa kwambujola hashi heswe. Yesu yaakolweza hakwamba ngwenyi: “Yami hamuwika ni yenu nguli matangwa eswe.” (Mateu 28:20) Shina maliji wano kakwashile tumbaji twenyi? Ewa. Hakupalika cha mashimbu akehe, ayo yaputuka “kulongesa, nikwambujola sango lipema.” (Yili. 5:42) Mandumbu waze anazeye ku ufulielo no kakufupiwa utakamiso. Ayo mahasa kwivwa woma wa kuputuka kwambujola cheka. Mutuhasa kwatakamisa ha kwalweza ngwetu, o kechi kwambujola ukawo. Muze maputuka kwambujola, mutuhasa kwambujola no hamuwika. Ayo mawahilila chinji ha ukwaso uze mutwaha muze maputuka kwambujola cheka. Nyi twamona waze hanazeye ku ufulielo ngwo kali mandumbu jetu, ayo mahasa kujikiza cheka mu ufulielo. Hachino, chikungulwila cheswe muchiwahilila chinji.
TUNAZANGE KUMANUNUNA MULIMO UZE YESU ATUHELE
19. Yika tunazange kununga ni kulinga, nawa mumu liaka?
19 Ndo mwiji muka mutununga ni kulinga mulimo wa kutayisa tumbaji? Ndo muze songo lia chifuchi chino muliza. (Mateu 28:20; tala Glossário, Sistema de coisas.) Shina mutuhasa kununga ni kwambujola ndo muze songo muliza? Chino che tunazange kulinga! Yetu twakwivwa kuwaha muze twakuzachisa mashimbu, tachi ni mbongo jetu hanga tuwane “waze eswe Zambi hanafunjikila ku mwono wa mutolo.” (Yili. 13:48) Muze twakuchilinga, twakwimbulula chilweza cha Yesu. Iye kambile ngwenyi: “Kulinga upale wa yoze wangutumine chenacho kulia chami, hanga ngukamanunune milimo yenyi.” (Yoa. 4:34; 17:4) Chino che ni yetu tunazange kulinga. Tunazange kumanununa mulimo uze Yesu atuhele. (Yoa. 20:21) Tunazange nawa akwetu akwo hamwe ni waze hanazeye ku ufulielo hanga anunge mu mulimo uno hamuwika ni yetu.—Mateu 24:13.
20. Kulita ni A-Fwilipu 4:13, mumu liaka mutuhasa kumanununa mulimo uze Yesu atuhele?
20 Hi chashi ko kumanununa mulimo uze Yesu atuhele. Alioze kutushi ukawetu mu mulimo wacho. Yesu katulakenyene ngwenyi, kumapwa hamwe ni yetu. Tunungenu ni kutayisa tumbaji ngwe “akwa milimo-ni-akwo a Zambi” hamuwika ni Kristu. (1 Kori. 3:9; 2 Kori. 2:17) Kashika, yino yakutwaha shindakenyo ngwetu, mutuhasa kumanununa mulimo wacho. Chili chiwape chinene kulinga mulimo uno ni kukwasa akwetu akwo hanga no aulinge!—Tanga A-Fwilipu 4:13.
MWASO 79 Alongesenu Ajame
^ kax. 5 Yesu katumine tumbaji twenyi hanga aye ni kutayisa tumbaji ni kwalongesa kufunga yuma yize yeswe aahele shimbi. Mutwe uno muusolola chize mutuhasa kukaula maliji wano a Yesu. Chikuma chino chinakatuka ha umwe mutwe wa Sentinela de 1.º de julho de 2004, páginas 14 a 19.
^ kax. 7 Hano liji longi linatale hali alongi a malunga ni a mapwo.
^ kax. 67 ULUMBUNWISO WA YIZULIE: Ndumbu wa pwo kanasongwela longeso lia Mbimbiliya ni kulumbunwina longi yuma yize atamba kulinga mba zango lienyi hali Zambi likole. Hanyima longi kanase mu yitanga yuma yize longeshi yenyi amulongesanga.
