1. Matthai 28:18-20 ningin Jesuh nih a zultu pawl kha zeidah a fial hna?

THIHNAK in a thawhṭhan hnuah Jesuh nih Galilee ah aa pummi a zultu hna sinah a rak i langhter. Mah ah a biapimi thil cheukhat kong kha a rak chimh hna. Mah cu zeidah a si? Mah bia kha Matthai 28:18-20 ah hmuh khawh a si.—Rel.

2. Zei biahalnak dah kan i ruah hna lai?

² Jesuh fialmi zultu siternak rian cu tuchan Pathian salle pakhat cio zong nih kan ṭuan a hau. Cucaah Jesuh nih a kan pekmi rian kong he aa tlaiin biahalnak pathum kha i ruah hna u sih. Pakhatnak, zultu thar pawl kha Pathian nih a halmi hna kong cawnpiak lawng si loin zeidah kan tuah awk a si? Pahnihnak, Baibal kan cawnpiakmi hna kha thlaraulei ah an ṭhancho khawh nakhnga Khrihfabu chung i thawngthanhtu dihlak nih zeitindah kan bawmh khawh hna? Pathumnak, a cawlcang ti lomi unau pawl kha zultu siternak rian ah i tel ṭhan dingin zeitindah kan bawmh khawh hna?

3. Jesuh fialmi ah cuset khaset timi zei lamhruainak dah aa tel?

³ Jesuh lamhruainak cu a fiang tuk. Mi nih Jesuh fialmi vialte kha an tuah nakhnga kan cawnpiak hna a hau. Asinain a biapi tukmi kong kha kan philh lo a hau. Jesuh nih ‘kaan fialmi viate kha va cawnpiak hna u’ tiah a ti lo. Mah canah “kaan fialmi vialte hna hi an zulh nakhnga” va cawnpiak hna u tiah a ti. Cucaah Jesuh lamhruainak zulh khawh awkah Baibal kan cawnpiakmi kha zeidah tuah awk a si ti cawnpiak lawng si loin zeitindah tuah ding a si ti zong kan hmuhsak a hau. (Lam. 8:31) Zeicah cutin tuah a herh?

4. Fialmi zulh timi cu zei sullam dah a si? Tahchunhnak pe.

⁴ Fialmi “zulh” timi cu nawlngaih kha a si. Khrih fialmi thil  tuah awkah mi pakhat kha zeitindah kan cawnpiak khawh? A tanglei tahchunhnak nih zeidah kan tuah awk a si ti kha hngalhthiam awkah a kan bawmh khawh. Mawṭaw mawngh a chimtu pakhat nih a cawngmi kha mawṭaw mawngh ning he aa tlaiin dingrep hna kha zeitindah a cawnpiak khawh? Hmasa bik ah lam kong he aa tlaiin a zulh awk a simi dingrep hna kha a chimh a hau. Asinain mah dingrep pawl zulh khawh ning kong a cawnpiak tikah a tuah dingmi thil a um rih. A cawngmi nih mawṭaw a mawngh lioah a sinah ṭhu in ruahnak a cheuh a hau, cun a cawngmi nih a cawnmi ningin zulh awk zongah aa zuam a hau. Mah tahchunhnak in zeidah kan cawn khawh?

5. (a) Johan 14:15 le 1 Johan 2:3 ningin Baibal kan cawnpiakmi hna kha zei tuah awkah dah kan cawnpiak hna a herh? (b) Baibal kan cawnpiakmi hna lamhruai khawh ning kong kha tahchunhnak pe.

⁵ Midang he Baibal kan hlathlaiṭi tikah Pathian nih a kan halmi kong kha kan cawnpiak hna. Asinain mah lawngin a za lo. Baibal kan cawnpiakmi hna nih an cawnmi kong kha ni fatin an nunnak ah an hman khawh nakhnga kan cawnpiak hna zong a hau. (Johan 14:15; 1 Johan 2:3 rel.) Tahchunhnak ah, kan cawnpiakmi hna kha sianginn, rianṭuannak asiloah hrimhnak an tuah tikah Baibal phunglam zulh khawh ning kong kha kan chimh khawh hna. Baibal lamhruainak zulhnak nih thil ṭihnung in a kan huhphenh ning kong asiloah a ṭhami biakhiahnak tuah awkah a kan bawmh khawh ning kong kha kan chimh khawh hna. Cun Baibal kan cawnpiakmi hna he kan umṭi tikah thiang thlarau nih lam a hruai hna nakhnga Jehovah sinah thla kan cam khawh.—Johan 16:13.

6. Jesuh fialmi an zulh khawh nakhnga midang cawnpiaknak ah zeidah aa tel?

⁶ Jesuh fialmi an zulh khawh nakhnga midang cawnpiaknak ah zeidah aa tel? Baibal kan cawnpiakmi nih zultu siternak rian ah ṭhancho a duh nakhnga kan bawmh a hau. Baibal a cawngmi cheukhat nih phungchim kha an ṭih men lai. Cucaah a fekmi zumhnak an ngeih khawh nakhnga Baibal biatak cu a ṭha bikmi a si ti kha an hngalhthiam nakhnga kan bawmh hna tikah kan lung a sau a hau. Mah nih an lung a suk hna lai i phungchim rian ah i tel ding zongin a forh hna lai. Baibal a cawngmi nih thawngṭha chim duhnak lungthin an ngeih nakhnga zeidah kan tuah khawh?

7. Baibal kan cawnpiakmi nih midang sinah thawngṭha chim a duh nakhnga zeitindah kan bawmh khawh?

⁷ Baibal kan cawnpiakmi kha hi bantuk biahalnak hna hi kan hal khawh: “Baibal lamhruainak na zulh caah na nunnak zeitindah a ṭhancho? Mah kong hi midang nih an hngalh a hau tiah na ruat maw? Anmah bawmh awkah zeidah na tuah khawh?” (Ptb. 3:27; Matt. 9:37, 38) Cawnpiaknak Hriamnam chung i cazual kha hmuhsak law a rualchan, a hawikom asiloah a rianṭuanṭi hawi nih rel an duh lai tiah a ruahmi kong kha thimter. Cun mah aa thimmi cazual kha tampi in pe. Fimkhur tein cazual pek khawh ning kong kha cawnpiak law tuahchun u. Kan cawnpiakmi cu tipil a ing rih lomi thawngthanhtu a si hnu hmanhah amah he phungchimnak rian ah i tel in kan bawmh a hau.—Pct. 4:9, 10; Luka 6:40.

8. Baibal kan cawnpiakmi hna nih Pathian le innpa cungah an dawtnak ṭhanchoter chin cu zeicah a biapit? (“ Baibal Kan Cawnpiakmi Hna Nih Pathian An Dawt Chin Nakhnga Bawmh Khawh Ning” timi rinli kulh ah zoh.)

⁸ Midang kan cawnpiak hna tikah “kaan fialmi vialte hna hi an zulh nakhnga” timi Jesuh lamhruainak kha kan i cinken a hau. Mah ah Pathian le innpa dawt ding timi a ngan bikmi nawlbia pahnih aa tel. (Matt. 22:37-39) Baibal kan cawnpiakmi kha mah nawlbia zulh dingin kan bawmh ahcun phungchim dingin kan  bawmhmi a si lai. Zeicah? Pathian le midang kha a dawt hna ahcun mah nih phungchim dingin a forh lai. Baibal a cawngmi cheukhat nih phungchim rian ah i tel kha an ṭih men lai. Asinain Jehovah nih a bawmh hna lai i duhsah tein minung ṭihnak kha an tei khawh lai tiah kan zumh khawh. (Salm 18:1-3; Ptb. 29:25) Hi capar i a langhtermi rinli kulh ah Baibal kan cawnpiakmi nih Pathian a dawtnak a ṭhancho nakhnga kan bawmh khawh ning kong kha a langhter. Mah lengah Baibal a cawngmi nih dawtnak langhternak ah a ṭhancho nakhnga bawmh awkah Khrihfabu nih zeidah an tuah khawh?

9. Mawṭaw mawngh a cawngmi tahchunhnak in a cawngmi nih a biapimi kong kha zei ti lam in dah a cawn khawh?

⁹ Mawṭaw mawngh a cawngmi kong tahchunhnak kha ruat ṭhan hmanh. A chimtu kha a pawngah ṭhu in a mawngh tikah mawngh ning kha zei ti lam in dah a cawn? Cawnpiaktu lamhruainak a ngaihnak thawngin le ralring tein a dang mawṭaw mawngtu pawl a zoh hnanak thawngin a si. Tahchunhnak ah, mawṭaw a mawngmi pakhat nih zaangfahnak ngeiin a dang mawṭaw a hmaiah a kaltermi kha cawnpiaktu nih a hmuhsak men lai asiloah midang nih fawi tein an hmuh khawh nakhnga a mei ceu ning a thlengmi mawṭaw mawngtu pakhat kha a hmuhsak men lai. Cun mah ningin tuah awkah tha a pek men lai. Mah tahchunhnak ningin mawṭaw mawngh a cawngmi nih a mawngh ahcun a caah man a ngei tukmi a si lai.

10. Baibal a cawngmi pakhat kha zultu si awkah zeinihdah a bawmh lai?

¹⁰ Cu bantukin Baibal a cawngmi nih Jehovah biak hram a hun thawk tikah a cawnpiaktu sin lawngin si loin zohchunhawk a ṭhami a dang Jehovah a biami hna sin zongin a cawn khawh. Cucaah Baibal a cawngmi hna kha thlaraulei ah ṭhancho dingin zeinihdah a bawmh hna lai? Khrihfabu pumhnak ah an i pumhnak thawngin a si. Zeicah? Zeicahtiah pumhnak ah an theihmi nih an zumhnak a fehter chin i Pathian an dawt chin nakhnga a bawmh hna caah a si. (Lam. 15:30-32) Cun cawnpiaktu nih pumhnak ah a cawnpiakmi kha amah bantukin inkhawhnak a ngei vemi unau pawl he theihhngalhnak a tuah khawh. Mah tikah Baibal a cawngmi nih pumhnak ah unau pawl nih dawtnak an langhtermi kha a hmuh lai. A tanglei tahchunhnak kong hi i ruah hmanh hna u sih.

11. Baibal a cawngmi nih pumhnak ah zei kong dah a hngalh khawh men, mah cu a cungah zeitindah huham a ngeih men lai?

¹¹ Baibal a cawngmi nuhmei nu pakhat nih pumhnak ah amah he sining aa khatmi unaunu pakhat kha a hmuh. Biakinn ah mino a simi a fale he i pumh dingin fakpi in aa zuammi unaunu a hmuhmi nih a lung a suk tuk. Baibal a cawngmi cu kuak phiat dingin aa zuammi a si ahcun kuak a rak i phiatmi unaupa pakhat he hngalhternak tuah. Mah thawngthanhtu unaupa nih Jehovah a dawtnak nih Pathian nawlbia ngaih dingin a forh ning kong kha a chimh khawh. (2 Kor. 7:1; Fil. 4:13) Thawngthanhtu nih a kong a chimh dih hnuah Baibal a cawngmi kha “nang zong kuak zuk naa phiat khawh ve” tiah a ti khawh. Mah tikah Baibal a cawngmi cu cutin tuah khawh awkah thazaang le zumhnak a ngei lai. Baibal a cawngmi mino nu nih mino unaunu pakhat aa nuamhmi kha a hmuh. Baibal a cawngmi nih mah unaunu aa nuamhmi a hmuh tikah zeicah aa nuamh peng timi kong kha tam deuh in hngalh a duh.

12. Baibal a cawngmi hna bawmh awkah Khrihfabu i unau pakhat cio cu rian kan ngei tiah zeicah kan chim khawh?

¹² Baibal a cawngmi hna nih zumhfekmi thawngthanhtu pawl i an sining kong kha an hun hngalh tikah Pathian le innpa dawt ding timi Khrih nawlbia cu zei sullam dah a si ti kha unau pawl kong in an cawn. (Johan 13:35; 1 Tim. 4:12) A cunglei ah kan i ruah cang  bantukin Baibal a cawngmi nih amah bantukin zuamcawhnak a tong vemi thawngthanhtu pawl sinin a cawn khawh. Baibal a cawngmi nih mah tahchunhnak in a cawn ahcun Khrih zultu si awkah a herhmi thlennak tuah awkah a bawmh lai. (Deut. 30:11) Khrihfabu i unau pakhat cio nih Baibal a cawngmi pawl kha thlaraulei ah an ṭhancho khawh nakhnga lam tampi in an bawmh khawh hna. (Matt. 5:16) Nangtah Baibal a cawng i a rak i pummi hna kha thazaang pek awkah zeinihdah aan forh?

13-14. A zultu pawl an lung a dongh lio caan ah Jesuh nih zeitindah a rak pehtlaih hna?

¹³ A cawlcang ti lomi unau pawl kha phungchimnak le zultu siternak ah i tel ṭhan dingin bawmh kan duh hna. Jesuh nih a lung a dongmi lamkaltu pawl a pehtlaih hna ningin tuchan ah kan tuah awk a simi kong kha a kan hmuhsak.

¹⁴ Jesuh cu thah a si hlanah “a zultu vialte nih khan an zamtak.” (Mark. 14:50; Johan 16:32) A zultu pawl an lung a dongh lio caan ah Jesuh nih zeidah a rak tuah? Thihnak in a thawh ṭhan hnu tlawmpal ah Jesuh nih a zultu cheukhat kha hitin a ti hna: “Nan thinphang hlah u. Ka unau pawl kha [ka thawh ṭhannak kong] va chim hna u.” (Matt. 28:10a) Jesuh cu a zultu cungah a lung a dong bal lo. An rak zamtak ko nain “ka unau pawl” tiah a rak auh rih hna. Jehovah bantukin Jesuh zong zaangfahnak le ngaihthiamnak lungthin a ngei.—2 Siang. 13:23.

15. Phungchimnak rian ah aa tel ti lomi hna kong he aa tlaiin zeitindah kan intuar?

¹⁵ Cu bantukin kannih zong phungchimnak rian ah aa tel ti lomi hna cungah siaherhnak kan ngei ve. Annih cu kan unau an si i kan dawt tuk hna. Mah unau hna nih Jehovah caah fakpi in an rak i zuammi kong kha kan philh lo. Atu ah a cawlcang ti lomi cheukhat cu kum tampi chung fakpi in a rak i zuammi an si. (Heb. 6:10) Annih kha kan ngai tuk hna. (Luka 15:4-7) Jesuh kha i zohchunh in an cungah siaherhnak kan ngei ti kha zeiti lam in dah kan langhter khawh?

16. A cawlcang ti lomi unau pawl cungah siaherhnak kan ngeih kha zeiitndah kan langhter khawh?

¹⁶ I pumh awkah dawtnak he sawm hna. Jesuh nih a lung a dongmi lamkaltu pawl thazaang a pek hnanak lamkhat cu i pumh awkah a sawm hnanak thawngin a si. (Matt. 28:10b; 1 Kor. 15:6) Tuchan zongah a cawlcang ti lomi hna kha i pumh awkah kan sawm hnanak thawngin tha kan pek khawh ve hna. An i pumh hlan tiang voi tampi kan sawm hna a hau men lai. A zultu pawl nih a sawm hnanak an lehrulhmi a hmuh tikah Jesuh cu aa lawm tuk lai.—Matthai 28:16 le Luka 15:6 he tahchunh.

17. A cawlcang ti lomi pakhat aa pumh tikah zeitindah kan pehtlaih awk a si?

¹⁷ Lungtak tein conglawmh hna. Jesuh nih a zultu pawl he an i ton tikah a kan conglawmh timi ruahnak a ngeihter hna. Cun amahlei in a chawnh hmasa hna. (Matt. 28:18) A cawlcang ti lomi pakhat aa pumh tikah zeidah kan tuah lai? Kanmah lei in lungtak tein kan conglawmh hmasa a hau. A hmasa ahcun chim awk kan hngalh lo caah kan thin a phang kho men. Asinain siarem loin a um nakhnga lo kan i ton caah kan i lawm tuk ti kha a sawhsawh tein kan chimh khawh.

18. A cawlcang ti lomi thawngthanhtu hna kha zeitindah tha kan pek khawh hna?

¹⁸ Lungtak tein thazaang pe hna. Jesuh zultu pawl nih vawleicung pumpi ah phung kan chim khawh lai tiah an ruat men lai lo. Jesuh nih a zultu pawl kha zumhnak he hitin a ti hna: “Nan sinah a zungzal in, caan dongh tiangin ka um lai.” (Matt. 28:20) Mah bia cu zultu pawl caah  bawmtu a si maw? A si. Mah hnu tlawmpal ah a zultu pawl nih “thawngṭha kha an cawnpiak hna i an chimh lengmang hna.” (Lam. 5:42) A cawlcang ti lomi thawngthanhtu pawl zong thazaang pek an hau. Annih nih thawngṭha hun chim ṭhan kha an ṭih men lai. Cucaah anmah lawngin phung an chimmi a si lo ti kha kan hngalhter khawh hna. Timhcia an si tikah anmah he phungchimnak ah kan kalṭi kho. Thawngṭha chimnak rian ah i tel ṭhan dingin kan bawmh hna caah an i lawm tuk lai ti cu a fiang ko. A cawlcang ti lomi hna kha unau bantukin kan hmuh hna i kan pehtlaih hna tikah Khrihfabu ah lunglawmhnak a ummi kan hmuh men lai.

19. Lungtak tein kan duhmi cu zeidah a si, zeicah?

¹⁹ Zultu siternak rian kha zeitik tiang dah kan ṭuan rih lai? Hi vawlei caan dongh tiang kan ṭuan lai. (Matt. 28:20) Mah caan tiang ah Jesuh pekmi rian kha kan liim kho lai maw? Liim khawh awkah biakhiahnak kan tuah. “Zungzal nunnak hmu dingah thim a simi hna” kawlnak caah kan caan, kan thazaang le kan tangka kha lunglawm tein kan hman. (Lam. 13:48) Cutin kan tuah tikah Jesuh kan i zohchunhmi a si. Jesuh nih “ka rawl cu a ka thlahtu duhnak zulh le a ka fialmi rian liim kha a si” tiah a ti. (Johan 4:34; 17:4) Kannih zong lungtak tein cutin tuah kan duh ve. Pek kan simi rian kha liim kan duh. (Johan 20:21) Mah rianṭuannak ah a cawlcang ti lomi hna i telin midang zong i tel ve hna seh ti kan duh.—Matt. 24:13.

20. Filipi 4:13 ningin Jesuh fialmi rian kha zeicah kan liim khawh?

²⁰ Jesuh nih a kan fialmi rian liim cu a fawi lo. Asinain mah rian cu kanmah lawngin kan ṭuanmi a si lo. Jesuh nih kaan umpi hna lai tiah bia a kan kamh. Zultu siternak rian kan ṭuan tikah “Pathian rianṭuanṭi hawi” kan si i “Khrih sal” zong kan si caah Jehovah le Jesuh nih mah rian ṭuan khawh awkah a kan bawmh lai. (1 Kor. 3:9, NW; 2 Kor. 2:17) Cucaah mah rian kha kan liim khawh ko. Mah rian kan ṭuan khawhmi le midang zong cutin tuah ve awkah kan bawmhmi hna cu tinvo sung le lunglawmh awk taktak a si.—Filipi 4:13 rel.