1. Thenge la Mataio 28:18-20, nemene la hna amekötin hnei Iesu kowe la itretre drei nyidrë?

 THUPENE la kola amele Iesu, hnei nyidrëti hna mama kowe la itretre drei nyidrë e Galilaia. Hnei nyidrëti hna qaja koi angatr la ketre mekun ka sisitria. Nemene mekun? Eje ngöne la tusi Mataio 28:18-20.—E jë.

2. Nemene la köni hnying hne së hna troa ce wang?

² Thatraqai së mina fe la hna amekötin hnei Iesu. Ame ngöne la tane mekun celë, easa troa sa la köni hnying göne la hnëqa hna ahnithe koi së hnei Iesu. Ame la hnapan, nemene la nyine tro sa kuca thupene la hna amamane la aja i Akötresie kowe la hnainin? Ame la hnaaluen, tro la ekalesia a xatuane tune kaa la itre ka ini tus troa kökötre ngöne la nyipici? Ame la hnaakönin, tro sa xatuane tune kaa la itre ka nanazij troa cainöje hmaca?

3. Nemene la mekun ka sisitria ka mama ngöne la hna qaja hnei Iesu?

³ Ka lualai la hnëqa hna ahnithe koi së hnei Iesu. Hnei nyidrë hna upi së troa inin la itre wathebo i nyidrë kowe la itre atr. Tha hnei Iesu kö hna qaja ka hape, ‘Inine jë la nöjei atr lo nöjei ewekë hnenge hna amekötin.’ Öni nyidrëti  pe: “Inine jë la nöjei atr troa trongëne lo nöjei ewekë hnenge hna amekötin.” Eje hi, tha tro hmekuje kö sa inine la itre hna amekötin kowe la itre ka ini tus. Ngo loi e tro fe sa amamai angatr la aqane troa trongën.—Itre hu. 8:31.

4. Tro sa xatuane tune kaa la hnainin troa trongën me drengethenge la itre hna amekötin hnei Iesu? Qaja jë la ketre ceitun.

⁴ Tro sa xatuane tune kaa la hnainin troa trongën la itre hna amekötin hnei Iesu? Hanawang la ketre ceitun. Nyipiewekë tro la ka hamë ini göi troa xomi loto a xatuane la itre ka ini troa drengethenge la itre hna amekötin. Tune kaa? Loi e tro la ka hamë ini a qejepengöne hnyawa la itre hna amekötin. Ngo hetre ketre ewekë ka sisitria nyine troa kuca. Loi e tro angeic a cememine la ka ini xomi loto me xatua angeic troa trongëne la itre hnei angeic hna inin. Nemene la ini koi së?

5. (a) Thenge la Ioane 14:15 me 1 Ioane 2:3, nemene la nyine tro sa amamane kowe la hnainin? (b) Nemene la aqane tro sa eatrongëne la hnainin?

⁵ Ame la easa ini tus, easa qaja kowe la hnainin la aja i Akötresie. Ngo hetre ketre ewekë nyine tro sa kuca. Loi e tro sa amamane koi angeic la aqane troa trongëne la itre hnei angeic hna inin. (E jë la Ioane 14:15; 1 Ioane 2:3.) Loi e tro sa amamai tulu me trongëne la itre trepene meköt ngöne la hna ini me hna huliwa me ngöne la easa ce madrin. Loi e tro fe sa qaja la ketre hne së hna melën, ka amamane la aqane thupëne la mele së hnene la itre trepene meköti Iehova, me aqane xatua së troa axecië mekun. Ketre, loi e tro fe sa thithi me angeic me sipone la uati hmitrötr koi Iehova matre troa eatrongë angeic.—Ioane 16:13.

6. Nemene la ketre aqane troa xatuane la hnainin troa trongëne la hna amekötin hnei Iesu?

⁶ Nemene la ketre aqane troa xatuane la hnainin troa trongëne la hna amekötin hnei Iesu? Loi e tro sa xatua angeic troa hetre aja troa inine la itre atr. Ame la itre xan, angatr a xou troa cainöj. Ngo loi e tro palahi sa xomihni aqaeany me ini angatr. E cili, tro hë angatr a trotrohnine la itre nyipici qa hnine la Tusi Hmitrötr. Tro ha ketr la hni angatr me upi angatr troa cainöj. Nemene la aqane tro sa xatua angatr troa hetre aja troa inine la itre atr?

7. Nemene la aqane tro sa xatuane la hnainin troa hetre aja troa inine la itre atr?

⁷ Loi e tro sa hnyingëne kowe la hnainin ka hape: “Tune kaa la aqane saze la mele i eö ngöne la eö a kapa la maca ne la Baselaia? Hapeu, nyipiewekë kö troa hane tro fë la maca cili koi itre xan? Nemene la aqane tro eö a xatua angatr?” (Ite Edomë 3:27; Mat. 9:37, 38) Loi e tro fe sa amamane koi angeic la itre tarak ngöne la Jia Ne Cainöj, me upi angeic troa iën la itre tarak thatraqane la itre sinee me itre sine huliwa i angeic. Loi e tro sa hamën atrune la itre tarak me amamai angeic la aqane troa tro fë. Ame hë la angeic a nyiqane cainöj, nyipiewekë tro sa ce tro me angeic matre xatua angeic.—Ate cai. 4:9, 10; Luka 6:40.

8. Pine nemene matre nyipiewekë tro la hnainin a acatrene la ihnimi angeic koi Akötresie me koi itre xan? (Wange ju la hna eköhagen hna hape, “ Aqane Troa Acatrene La Ihnimi Ne La Hnainin Koi Akötresie.”)

⁸ Hnei Iesu hna upi së troa inine la itre xan ‘troa trongëne lo nöjei ewekë  hnei nyidrëti hna amekötine koi së.’ Kola qaja la lue wathebo ka tru, ene la troa hnimi Akötresie me hnime la atre lapa easenyi së. Ka nyipiewekë la lue wathebo celë ngöne la easa cainöj me inine la itre atr. (Mat. 22:37-39) Pine nemen? Pine laka, ihnimi së koi Akötresie me koi itre xan la ka upi së troa cainöje trootro. Ame la itre xaa hnainin, angatr a xou troa cainöj. Ngo loi e tro sa amamane koi angatr laka, jëne la ixatua i Iehova, ijije hi tro angatr a elë hune la xoue atr. (Sal. 18:1-3; Ite Edomë 29:25) Hetrenyi ngöne la tane mekun celë la ketre hna eköhagen, ka amamane la aqane tro sa xatuane la hnainin troa acatrene la ihnimi angeic koi Akötresie. Ngo nemene la aqane tro la ekalesia a xatuane la itre ka xötrei cainöj troa acatrene la ihnimi angatr?

9. Nemene la ka xatuane la atr troa atreine xomi loto?

⁹ Pane mekune hmaca jë la ceitune lo ka inine troa xomi loto. Angeic la ka xome la loto nge ce angeic memine la ka hamë ini. Nemene la ka xatua angeic troa atreine xomi loto? Nyipiewekë tro angeic a drenge hnyawa la ka hamë ini me goeëne la itre xan ka atreine xomi loto. Maine jë, tro la atre hamë ini a qaja aloine la ketre atr ka nue angeic troa pane nyap, maine ka saze la phare ne loto matre tha tro kö a atimekëne la itre xan. Jëne la itre tulu cili, tro hë angeic a atreine xomi loto.

10. Nemene la aqane tro la hnainin a canga kökötr ngöne la nyipici?

¹⁰ Ijije hi tro la ka ini tusi a xomi ini qa ngöne la tulu ne la atre hamë ini me itre xaa hlue i Iehova. Ngo nemene la ka troa xatua angeic troa canga kökötr ngöne la nyipici? Loi e tro angeic a sine la itre icasikeu, matre atrepengöne hnyawa la Tusi Hmitrötr, me acatrene la lapaune me ihnimi angeic koi Akötresie. (Itre hu. 15:30-32) Ketre, loi e tro la atre hamë ini a tro sai angeic kowe la itre xaa trejin ka melëne la itre jol hnei angeic hna cile kow. Tro hë angeic a öhne la ihnimi ne la itre trejin. Tro sa ce wang la itre xaa hna melën.

11. Nemene la ka troa ketr la hni ne la hnainin, nge nemene la thangane koi angeic?

¹¹ Ame la ketre föe ka ini tus nge ka hetrun casine la itre nekö i eahlo ke, eahlo a xomi ini qa ngöne la hna melën hnene la ketre trejin. Hna ketr la hni eahlo hnene la itre trengecatr hna nue hnene lai trejin troa sine la itre icasikeu memine la itre nekö i angeic. Ame la ketre hnainin ke, thatreine kö angeic triji sixa. Hnei angeic hna xomi ini qa ngöne la tulu ne la ketre trejin ka cile kowe la jole cili. Önine lai trejin ka hape, ihnimi angeic koi Iehova la ka xatua angeic troa trongëne la itre hna amekötin qa hnine la Tusi Hmitrötr. (2 Kor. 7:1; Fil. 4:13) Ketre, hnene la trejin hna ithuecatre koi angeic me hape: “Ijiji eö fe troa triji sixa.” Ame pena la ketre neköjajiny, angeic a öhne la ketre trejine föe ka madrin me xatua itre xan. E cili, angeic a ajane troa atre la kepin matre kola madrin hnene lai trejin.

12. Nemene la ini hna xom hnene la hnainin qa ngöne la tulu la itre trejin?

¹² Hnei Iesu hna upi së troa hnimi Akötresie me hnime la itre xan. (Ioane 13:35) Ijije hi tro la hnainin a xomi ini qa ngöne la tulu ne la itre xaa trejin  göne la aqane troa trongëne la hna amekötin celë. (1 Tim. 4:12) Ketre, ijije fe tro la hnainin a xomi ini qa ngöne la tulu ne la itre trejin ka melëne la itre jol hnei angeic hna cile kow. Tro hë angeic a öhne laka, ijije hi tro angeic a hane saze matre troa xötrethenge Keriso. (Deu. 30:11) Eje hi, tru catr la ixatua hna hamën hnene la itre trejin kowe la itre ka ini tus. (Mat. 5:16) Nemene la hnei epuni hna kuca matre troa ithuecatre kowe la itre hnainin ka sine la itre icasikeu?

13-14. Nemene la aqane ujë i Iesu ngöne la kola kucakuca hnene la itre aposetolo?

¹³ Easa ajane troa xatuane la itre trejin ka nanazij troa xome hmaca la huliwa ne cainöj hna ahnithe koi së hnei Iesu. Tro sa ce wang la aqane ujë i Iesu ngöne la kola kucakuca hnene la itre aposetolo, me xomi ini qa ngön.

¹⁴ Qëmekene tro Iesu a mec, hnene la itre aposetolo “hna isa kötr, me nuaxöji nyidrë.” (Mar. 14:50; Ioane 16:32) Nemene la aqane ujë i Iesu e cili? Thupene la kola amele nyidrëti hmaca, öni nyidrë kowe la itre xan: “The xou kö! Tro jë, nge qaja ju kowe la itre trejin me eni laka, [ase hë amele ni hmaca].” (Mat. 28:10a) Eje hi, tha hnei nyidrëti kö hna nuetrije la itre aposetolo. Ngacama hnei angatr hna kötr, ngo hnei nyidrëti hna hë angatr ka hape, “itre trejin me eni.” Tui Iehova, ka utipine Iesu me nue la ngazo i itre xan.—2 Ite jo. 13:23.

15. Nemene la mekuna së göne la itre trejin ka nanazij?

¹⁵ Ketre tu së fe, easa mekune la itre ka nanazij. Easa hnimi angatr ke, itre trejine hi lai me easë. Tha thëthëhmine kö së laka, itre macatre ne angatr a catre huliwa koi Iehova me hnimi Nyidrë. (Heb. 6:10) Tru la hne së hna meku angatr! (Luka 15:4-7) Nemene la aqane tro sa amamane la ihnimi së koi angatr? Tro sa ce wang la tulu i Iesu.

16. Tro sa amamane tune kaa la ihnimi së kowe la itre trejin ka nanazij?

¹⁶ Loi e tro sa hë angatr kowe la itre icasikeu. Hnei Iesu hna hëne la itre aposetolo troa icasikeu matre ithuecatre koi angatr. (Mat. 28:10b; 1 Kor. 15:6) Celë hi matre loi e tro sa ithuecatre kowe la itre trejin ka nanazij troa sine la itre icasikeu. Maine jë, tro sa anyimua hë angatr qëmekene tro angatr a traqa. Ngo maine tro angatr a kapa la ihë së, tro hë sa madrine tui Iesu ngöne lo nyidrëti a öhne la itre aposetolo ka traqa troa sine la icasikeu.—Wange ju fe la Mataio 28:16 me Luka 15:6.

17. Tro sa kapa tune kaa la ketre trejin ka nanazij ngöne la hna icasikeu?

¹⁷ Loi e tro sa kepe angatre hnyawa. Ame lo kola iöhnyi hnei Iesu memine la itre aposetolo, hnei nyidrëti hna kepe angatre hnyawa. Hnei nyidrëti hna easenyi koi angatr me ithanata koi angatr. (Mat. 28:18) Tro sa kapa tune kaa la ketre trejin ka nanazij ngöne la Uma Ne Baselaia? Loi e tro sa easenyi koi angeic me ibozu. Maine jë, thatre kö së la nyine troa qaja, ngo loi e tro sa amamane koi angeic laka, easa madrin troa öhnyi angeic ngöne la hna icasikeu. E cili, tha tro hë angeic a xou.

18. Tro sa ithuecatre tune kaa kowe la itre trejin ka nanazij?

¹⁸ Loi e tro sa ithuecatre koi angatr.  Maine jë, hnene la itretre drei Iesu hna mekun laka, thatreine kö angatr troa cainöj e cailo fen. Ngo hnei Iesu hna ithuecatre koi angatr me hape: “Tro pala hi ni a ce me nyipunie.” (Mat. 28:20) Nemene la thangane lai? Hnei ‘angatre pala hi hna catre cainöjëne la maca ka loi.’ (Itre hu. 5:42) Ketre tune fe, loi e tro sa ithuecatre kowe la itre trejin ka nanazij. Maine jë, angatr a mekun laka, thatreine kö angatr troa xome hmaca la huliwa ne cainöj. Ngo loi e tro sa amamane koi angatr laka, tro palahi sa ceme angatr. Maine aja i angatre hë, loi e tro sa ce cainöj me angatr. Eje hi, maine tro sa goeë angatr ceitu me itre trejin, tro hë angatr a madrin troa bëeke kowe la ekalesia.

19. Nemene la hne së hna ajan, nge pine nemen?

¹⁹ Uti hë eu la tro sa inine la itre atr? “Uti hë la troa nyipune la fene celë.” (Mat. 28:20; wange ju la hna hape, “Pune la fene celë” ngöne la Hnë Qejepengön.) Hapeu, tro kö sa afenesine la huliwa hnei Iesu hna ahnithe koi së? Eje hi! Easa madrine troa nue la traem me trengecatre së me itre mo së, matre troa thele la itre atr “ka hmalahnine troa kapa la mele ka pë pun.” (Itre hu. 13:48) Caasi hi la mekuna së me Iesu lo nyidrëti a hape: “Ange la troa kuca la aja ne la atre upi ni, me afenesine la huliwa i nyidrë.” (Ioane 4:34; 17:4) Tui Iesu, easa ajane troa afenesine la huliwa hna ahnithe koi së. (Ioane 20:21) Celë hi matre, easa catre cainöj memine la itre trejin, nge aja së tro la itre trejin ka nanazij a bëeke kowe la ekalesia.—Mat. 24:13.

20. Thenge la Filipi 4:13, drei la ka xatua së troa afenesine la huliwa hna ahnithe koi së hnei Iesu?

²⁰ Nyipici laka, tha ka hmaloi kö la huliwa hna ahnithe koi së hnei Iesu. Ngo tha easë kö a huliwa caas. Hnei Iesu hna thingehnaean laka, tro nyidrëti a ceme easë. Nge easë fe a “ce huliwa me Akötresie.” (1 Kor. 3:9) E cili, tro sa atreine afenesine la huliwa hna ahnithe koi së. Drei la ketre madrine ka tru troa xatuane la itre xan troa hane sine la huliwa ne cainöj!—E jë la Filipi 4:13.