1. Sowtu wooko Yesesi gi den bakaman fi en enke fa a sikiifi a Mateyesi 28:18-20?

BAKA di Yesesi weki baka, a go a den bakaman fi en a Galileya, bika a be wani taigi den wan pelensipali sani. San a be wani taigi den? Den sani di Yesesi taigi den bakaman fi en, sikiifi a Mateyesi 28:18-20.​—Leisi en.

2. Sowtu akisi wi o luku?

² Ala sama di e dini Yehofa aini a ten ya mu du a wooko di Yesesi be gi den bakaman fi en. Neen meke wi o luku dii akisi di e taki fu a wooko di wi abi fu yeepi sama toon Yesesi bakaman. A fosiwan, boiti taki wi e leli sama den weiti fu Gadu, san u mu du moo? Du fu tu, fa ala peleikiman aini a kemeente sa yeepi wan sutudi fu go a fesi? Du fu dii, fa u sa yeepi den sama di nai peleiki moo fu bigin du a wooko ya baka?

3. San Yesesi taki u mu du te wi e leli sama?

³ Yesesi be taki u mu leli sama den sani di a taigi u. Yesesi á sende u fu ‘leli sama ala den sani di a taigi u’ namo, ma a taki u mu ‘leli den fu du ala den sani di a  taigi u’. Efu u wani du a sani di Yesesi taki, u mu yeepi den sutudi fu u fu si fa den sa wooko anga den sani di den leli (Toli 8:31). Saide a sani ya pelensipali?

4. Anga san i sa ageisi a yeepi di wi e yeepi sama fu du san Yesesi taki?

⁴ U sa si a wooko di Yesesi gi u fu du enke wan sama di e leli taawan fa den mu lei wagi. Fa ai du a sani ya? We, fosi a meke a sama go aini wan wagi, ai leli en den weiti fu a kondee, anga san a mu holi a pakisei te ai lei wagi. Baka dati, ai sidon anga en aini a wagi, da ai soi en fa a mu du den sani di a be leli en. San a sani ya e leli u?

5. (a) Enke fa Yohanisi 14:15 anga 1 Yohanisi 2:3 e soi, da san u mu leli den sutudi fu u? (b) San a wantu fasi fa u sa du a sani ya?

⁵ Te wi e sutudeli Beibel anga sama, wi e leli den fa Gadu wani u libi. Ma dati wawan á sai. U mu leli den Beibelsutudi fu u tu fa den sa wooko anga den sani di den e leli. (Leisi Yohanisi 14:15; 1 Yohanisi 2:3.) Te den sutudi fu wi e luku a fasi fa wi e libi, den mu man si fa den mu tyai denseefi te den de a sikoo, a wooko efuso te den go koi. I sa taigi den tu sowtu wini i fende di i du san Beibel e taki, efuso fa Beibel yeepi i fu du sani anga koni. Te yu e begi anga den sutudi fi i, akisi Yehofa fu a meke en santa yeye yeepi den.​—Yoh. 16:13.

6. San u mu du te wi e yeepi sama fu toon Yesesi bakaman?

⁶ San u mu du te wi e yeepi sama fu toon Yesesi bakaman? U mu yeepi den sutudi fu denseefi kon lobi a peleikiwooko. Son sutudi e feele fu peleiki, neen meke u mu abi pasensi te wi e yeepi den fu fusutan Beibel moo bun. A sani ya o meke den biibi taanga. O moo den e fusutan den sani di den e leli, o moo den o wani taigi taawan den sani ya. Fa u sa yeepi den sutudi fu u fu lobi a peleikiwooko?

7. Fa u sa yeepi wan sutudi fu taigi taawan san ai leli?

⁷ U sa akisi a sutudi taki: ‘Sowtu wini i fende di i bigin du san Beibel e taki? I si enke taawan mu yee a bosikopu ya? Fa i sa yeepi den?’ (Odo 3:27; Mat. 9:37, 38) Soi a sutudi ala den talakitaati di wi e wooko anga den, da yu akisi en sowtu wan fu den a si enke en famii, den mati fi en, efuso den sama neen wookope be o wani leisi. Gi a sutudi wantu fu den talakitaati ya, da i soi en fa a sa wooko anga den. Di a sutudi o toon wan peleikiman di á dopu ete, i mu wooko makandaa anga en fu leli en fa a sa toon wan bun peleikiman.​—Peleik. 4:9, 10; Luk. 6:40.

8. Saide den sutudi mu lobi Yehofa anga taa sama? (Luku a faki ‘ Fa i sa yeepi den sutudi fi i fu moo lobi Yehofa?’)

⁸ Yesesi taki u mu leli sama ‘fu du ala’ den sani di a taigi u. Dati wani taki u mu leli den fu lobi Yehofa anga taa sama tu, bika a disi a den tu moo gaan weiti (Mat. 22:37-39). Na a lobi di den o lobi Yehofa anga taa sama o gi den taanga-sikin fu du a peleikiwooko. Son sutudi e feele te den pakisei taki denseefi o abi fu peleiki gi taa  sama. Ma i sa soi a sutudi fi i taki Yehofa o yeepi en fu a á feele moo (Ps. 18:1-3; Odo 29:25). A faki di de aini a artikel ya e soi u fa u sa yeepi den sutudi fu u fu moo lobi Yehofa. Fa ala sama aini a kemeente sa yeepi den Beibelsutudi fu moo lobi Yehofa anga taa sama?

9. Fa wan sama di e leli lei wagi o sabi fa a mu du sani?

⁹ Luku a toli fu a sama di be e leli lei wagi baka. Fa ai du sabi san a mu du te a sidon aini a wagi? We, boiti taki ai aliki a sama di e leli en, ai luku fa taa sama e lei tu. Kande a sama di e leli en e soi en fa wan wagiman e sitopu gi wan taa wagi fu a pasa. Efuso kande ai soi en fa wan sama e saka a faya fu a wagi fi en fu a á fooseli taa sama. Den sani ya e soi a sama di e leli lei wagi fa enseefi sa du sani te en wawan bigin lei wagi.

10. San o yeepi wan sutudi fu go a fesi?

¹⁰ Leti enke wan sama di e leli lei wagi, a so wan sama di bigin dini Yehofa nai leli sani fu a sama di e sutudeli anga en namo, ma ai luku fa taa baala anga sisa aini a kemeente e tyai denseefi tu. San o yeepi den sutudi fu go a fesi? Den mu e go a den komakandaa. Saide? A omen sani den o leli a den komakandaa di den nai leli na a sutudi. Den sani ya a o taanga a biibi fu den, den o moo lobi Yehofa tu (Toli 15:30-32). Te ai kon a den komakandaa, a o miti taa baala anga sisa di e miti denseefi sani di e miti en. A o si fa den baala anga sisa aini a kemeente lobi denseefi tu. Meke u luku wantu toli di e soi sowtu wini wan sutudi e fende te ai kon a komakandaa.

11. San wan sutudi e si aini a kemeente te a kon a komakandaa? Fa a sani ya sa yeepi a sutudi?

¹¹ Kande wan sutudi di ná abi man e wooko taanga fu solugu den pikin fi en. Te a kon a den komakandaa, ai si wan sisa aini a kemeente di ná abi man tu. Ai si fa a sisa ya e meke moiti fu kon a den komakandaa anga den pikin fi en. Kande wan sutudi di e meke moiti fu tapu anga somoko e miti wan baala na a komakandaa di be abi aseefi polobelema. A baala e taigi a sutudi taki a sani di yeepi en, na a lobi di a be kon moo lobi Yehofa (2 Kor. 7:1; Filip. 4:13). Baka te a baala taigi a sutudi fa a du fu tapu anga somoko, ai taigi a sutudi taki: ‘Iseefi poi tapu tu.’ A sani ya e gi a sutudi taanga-sikin. Kande wan yonkuu sutudi e si wan yonkuu sisa di e piisii fu dini Yehofa. A sani ya e meke a sutudi wani sabi saide a yonkuu sisa e piisii ala yuu.

12. Saide u sa taki na ala sama aini a kemeente e yeepi wan sutudi fu go a fesi?

¹² Te a sutudi kon sabi moo sama aini a kemeente di e dini Yehofa anga den hii ati, a sani ya o soi en san a wani taki fu lobi Yehofa anga taa sama (Yoh. 13:35; 1 Tim. 4:12). A omen sani a sa leli fu baala anga sisa di be abi denseefi polobelema di a abi tu. A fasi fa den sama ya e du sani o soi a sutudi taki enseefi sa kengi (Deit. 30:11). Ala sama aini a kemeente sa yeepi wan sutudi fu go a fesi (Mat. 5:16). San yu e du fu yeepi den Beibelsutudi di e kon a komakandaa?

13-14. Fa Yesesi be libi anga den apostel fi en di den be lasi-ati?

¹³ U wani yeepi den baala anga sisa di nai peleiki moo fu bigin du a wooko di Kelestesi be gi ala den bakaman fi en baka. A fasi fa Yesesi be e libi anga den apostel fi en te den be booko-saka e soi fa u sa yeepi den sama ya.

¹⁴ A neti di sama kon kisi Yesesi fu go kii, ala den apostel fi en ‘lon gwe fika’ en (Malik. 14:50; Yoh. 16:32). San Yesesi du di a si taki den apostel fi en be lasi-ati? Faisi a weki baka, a go miti wantu fu den bakaman fi en neen a taigi den taki: ‘Ná feele! U go taigi den baala fu mi taki mi weki baka’ (Mat. 28:10a). Yesesi á be fika den apostel fi en. Winsi fa den be lon gwe fika en tokuso a be e si den enke en ‘baala’ ete. Yesesi be gi den paadon, leti enke fa Yehofa e gi sama paadon.​—2 Kow. 13:23.

15. Fa wi e si den baala anga sisa di nai peleiki moo?

¹⁵ Wi e booko wi ede anga den sama di nai peleiki moo. U lobi den, bika den a u baala anga sisa ete. A omen fu den sama di nai peleiki moo nownow be wooko taanga gi Yehofa aini den ten di pasa (Heb. 6:10). Wi e angii fu den te ye (Luk. 15:4-7). Fa u sa soi den taki wi e booko wi ede anga den leti enke fa Yesesi be e booko en ede anga den apostel fi en?

16. Fa u sa soi taki wi e booko wi ede anga den baala anga sisa di nai peleiki moo?

¹⁶ Kai den kon a komakandaa. Wan fasi fa Yesesi be toosutu den apostel fi en a di a kai den kon a wan komakandaa (Mat. 28:10b; 1 Kor. 15:6). Aini a ten ya, useefi sa gi den sama di nai peleiki moo taanga-sikin fu kon a komakandaa. U sabi taki kande a omen leisi wi o abi fu kai den fosi den o kon. Yesesi be musu piisii di den apostel kon di a kai den.​—Luku Mateyesi 28:16 anga Lukasi 15:6 tu.

17. San u mu du te u si wan sama di nai peleiki moo kon a komakandaa?

¹⁷ Bali wadaa gi den. Di Yesesi si den apostel fi en, a soi den taki a piisii fu si den. A á wakiti fu den go taki anga en, ma neen fosi go taki anga den (Mat. 28:18). San i mu du te i si wan sama di nai peleiki moo kon a komakandaa? I mu go taki anga en. Kande yu e booko yu ede fu di yu á sabi san fu taki, ma i ná abi fu booko yu ede anga a sani de. I sa taigi en taki i poolo di i si en.

18. Fa u sa yeepi den sama di nai peleiki moo?

¹⁸ Gi den taanga-sikin. Kande den apostel be e booko den ede taki den á be o poi du a wooko di Yesesi be gi den. Ma Yesesi be taigi den taki: ‘Mi o de anga u te enke a kaba fu a goontapu doo’ (Mat. 28:20). A sani ya be yeepi den bakaman fi en? Eeye, bika a á langa baka dati neen den bigin ‘paati a bun nyunsu fu Kelestesi gi sama’ (Toli 5:42). Den sama di nai peleiki moo abi taanga-sikin fanowdu tu. Kande den e si enke den ná o poi peleiki moo. Soi den taki te den o bigin peleiki, a ná den wawan o de, yu o wooko makandaa anga den. Den o teke en fu bigi taki wi  e holibaka gi den te den o bigin du a wooko ya baka. Te wi e soi den sama di nai peleiki moo taki u lobi den enke u baala anga sisa ete, da a sani de sa yeepi den fu daai kon baka.

19. San u de kabakaba fu du? Saide u de kabakaba fu du a sani ya?

¹⁹ On ten a wooko di wi abi fu meke sama toon Yesesi bakaman o kaba? Wi abi fu du a wooko ya te enke Yehofa taki u sa tapu (Mat. 28:20). Wi o tan peleiki te enke a wooko ya kaba? Eeye, u de kabakaba fu du a sani ya. Neen meke wi e gi u ten, moni, kaakiti, anga taa sani di wi abi fu yeepi suku den sama di ‘ati bun fu fende a libi’ (Toli 13:48). Te wi e du a sani ya, wi e waka a Yesesi baka, bika a be taki: ‘Mi nyanyan na a du di mi e du san a sama di sende mi kon wani. Mi mu kaba a wooko di a gi mi fu du’ (Yoh. 4:34; 17:4). Leti enke Yesesi, useefi wani kaba a wooko di Yehofa gi u (Yoh. 20:21). U wani den sama di nai peleiki moo, bigin du a wooko ya baka makandaa anga u.​—Mat. 24:13.

20. Enke fa Filipisama 4:13 e soi, da saide u sa biibi taki u poi du a wooko di Yesesi gi u?

²⁰ A tuu taki a ná wan makiliki wooko Yesesi gi u, ma a á fika u wawan fu du a wooko ya. Yesesi paamisi u taki a o de anga u. Te wi e peleiki, wi e wooko ‘makandaa anga Yehofa anga Yesesi’ (1 Kor. 3:9; 2 Kor. 2:17). Neen meke u poi kaba a wooko ya. A wan gaandi wi abi fu wooko makandaa anga taa baala anga sisa.​—Leisi Filipisama 4:13.