1. Dɛ mbrɛ Matthew 28:18-20 kyerɛ no, ebɛn ahyɛdze na Jesus dze maa n’esuafo?

JESUS no wusoɛr ekyir no, oyii noho edzi kyerɛɛ n’esuafo a nna woehyia mu wɔ Galilee no. Nna ɔwɔ asɛnhia bi kã kyerɛ hɔn. Ɔyɛ ebɛn asɛm? Wɔayɛ ne nsɛm no ho kyerɛwtohɔ wɔ Matthew 28:18-20.​—Kenkan.

2. Ebɛn nsɛmbisa na yebosusu ho?

² Ahyɛdze a Jesus dze maa dɛ wɔnkɛyɛ nkorɔfo n’esuafo no, ɔfa Nyankopɔn n’asomfo a wɔwɔ hɔ ndɛ no mu biara ho. Dɛm ntsi, hom mma yensusu nsɛmbisa ebiasa a ɔfa dwumadzi a Jesus dze ahyɛ hɛn nsa yi ho. Odzi kan, Nyankopɔn n’apɛdze a yɛbɛkyerɛkyerɛ esuafo afofor no da nkyɛn a, ebɛnadze bio na ɔsɛ dɛ yɛyɛ? Otsĩa ebien, ebɛnadze na adawurbɔfo a wɔwɔ asafo no mu nyina botum ayɛ dze aboa Bible esuafo ma woeenya nkɔenyim? Otsĩa ebiasa, yebesi dɛn aboa hɛn nuanom a woegyaa asɛnka kɔ no ma wɔaasan ahyɛ esuafoyɛ edwuma no ase?

3. Wɔ ahyɛdze a Jesus dze mae no mu no, ebɛn asɛm pɔtsee na ɔkãe?

³ Nna Jesus n’ahyɛdze no mu da hɔ. Ɔsɛ dɛ yɛkyerɛkyerɛ nkorɔfo nsɛm a ɔkãe no. Naaso hom mma yɛnhyɛ asɛm a no ho hia yi nsew. Jesus annkã dɛ: ‘Hom nkyerɛkyerɛ hɔn dza mahyɛ hom no nyina.’ Mbom ɔkãa dɛ: “Hom nkyerɛkyerɛ hɔn dɛ wondzi dza mahyɛ hom nyina do.” Sɛ yebotum dze dɛm asɛm pɔtsee no ayɛ edwuma a, ɔsɛ dɛ yɛkyerɛkyerɛ hɛn Bible esuafo no dza ɔsɛ dɛ wɔyɛ. Afei so, ɔsɛ dɛ yɛkyerɛ hɔn mbrɛ wobesi ayɛ  no. (Andw. 8:31) Ebɛnadze ntsi na ɔsɛ dɛ yɛyɛ dɛm?

4. Sɛ wɔkã dɛ yendzi ahyɛdze bi do a, ɔkyerɛ dɛn? Fa mfatoho kyerɛkyerɛ mu.

⁴ Sɛ wɔkã dɛ ‘yendzi’ ahyɛdze bi do a, dza ɔkyerɛ ara nye dɛ yebetsie na yɛdze aayɛ edwuma. Yebotum ayɛ mfatoho dze akyerɛ kwan a yɛbɛfa do akyerɛkyerɛ obi mbrɛ obesi edzi Christ n’ahyɛdze no do anaa ɔdze ayɛ edwuma no mu. Hom mma yensusu dɛm nhwɛdo yi ho. Obi a ɔkyerɛ afofor kaar ka no, obesi dɛn akyerɛ hɔn a worusũa no mbrɛ wobesi edzi mbra ahorow a ɔfa kaar ka ho no do? Bi a obedzi kan akyerɛ esuafo no kaar ka ho mbra ahorow no. Naaso, sɛ obotum akyerɛ esuafo no ma woeedzi mbra ahorow no do a, adze fofor bi so wɔ hɔ a ɔsɛ dɛ ɔyɛ. Ɔsɛ dɛ ɔnye esuafo no kɔ kwan do na ɔkyerɛ hɔn ma wɔdze dza woesũa no yɛ edwuma ber a wɔreka kaar no. Ebɛnadze na yebotum esũa efi dɛm mfatoho yi mu?

5. (a) Dɛ mbrɛ John 14:15 nye 1 John 2:3 kyerɛ no, ebɛnadze na ɔsɛ dɛ yɛkyerɛ hɛn Bible esuafo no dɛ wɔnyɛ? (b) Ma nhwɛdo ahorow a ɔfa akwankyerɛ a yebotum dze ama hɛn Bible esuafo ho.

⁵ Sɛ yɛnye afofor rusũa Bible no a, yɛkyerɛkyerɛ hɔn ma wohu dza Nyankopɔn rohwehwɛ efi hɛn hɔ. Naaso piinara wɔ hɔ a ɔsɛ dɛ yɛyɛ ka ho. Ɔsɛ dɛ yɛkyerɛkyerɛ hɛn Bible esuafo ma wɔdze dza worusũa no yɛ edwuma wɔ hɔn da biara da asetsena mu. (Kenkan John 14:15; 1 John 2:3.) Yebotum dze hɛn ndzeyɛɛ akyerɛ hɛn Bible esuafo no mbrɛ wobesi dze Bible mu ngyinadonsɛm ayɛ edwuma wɔ skuul mu, edwuma mu anaa ber a wɔregye hɔn enyi no. Yebotum akã asɛm bi a osii wɔ hɛn asetsena mu akyerɛ hɔn ma woeehu mbrɛ Bible mu akwankyerɛ a yɛdze dzii dwuma no bɔɔ hɛnho ban fii ɔhaw ahorow ho, anaadɛ ɔboaa hɛn ma yesii gyinae a nyansa wɔ mu. Yebotum abɔ mpaa wɔ hɛn Bible esuafo no enyim na yaaserɛ Jehovah dɛ ɔmfa no sunsum krɔnkrɔn no nkyerɛ hɔn kwan.​—John 16:13.

6. Sɛ yɛrekyerɛkyerɛ afofor dɛ wondzi Christ n’ahyɛdze do a, ebɛnadze bio na ɔsɛ dɛ yɛyɛ?

⁶ Sɛ yɛrekyerɛkyerɛ afofor dɛ wondzi Christ n’ahyɛdze do a, ebɛnadze bio na ɔsɛ dɛ yɛyɛ? Ɔsɛ dɛ yɛboa hɛn Bible esuafo ma wonya ɔpɛ dɛ hɔn so wɔbɛyɛ nkorɔfo esuafo. Hɛn Bible esuafo no bi wɔ hɔ a, bi a wɔbɔ hũ dɛ wɔnye hɛn bɔbɔ mu ayɛ asɛnka edwuma no. Dɛm ntsi, sɛ yɛdze akwankyerɛ a nkakrankakra ɔbɔboa hɔn ma woeenya ntseasee a ɔkɔ ekyir, ɔbɛka hɔn akoma na ɔbɛma woetum akã asɛm no rema hɔn a, ɔsɛ dɛ yenya hɔnho abotar. Ebɛnadze na yebotum ayɛ dze aboa hɛn esuafo ma woeenya ɔpɛ dɛ wɔbɛkã asɛmpa no akyerɛ nkorɔfo?

7. Yebesi dɛn aboa osuanyi bi ma oeenya ɔpɛ dɛ ɔbɛkã asɛmpa no akyerɛ afofor?

⁷ Yebotum ebisa hɛn Bible esuafo no nsɛm bi tse dɛ: “Ebɛn kwan do na Ahendzi ho nkrasɛm a agye ato mu no asesa w’asetsena? Aso isusu dɛ ɔsɛ dɛ afofor so tse Ahendzi ho nkrasɛm no? Ebɛnadze na ibotum ayɛ aboa hɔn?” (Mbɛ. 3:27; Matt. 9:37, 38) Kyerɛ no nkrataaba a ɔwɔ hɛn Edwindadze Etsitsir A Yɛdze Kyerɛkyerɛ no mu no, na ma ɔmpaw dza osusu dɛ n’ebusuafo, n’anyɛnkofo anaa n’edwumamufo enyi bɛgye ho. Ma no nkrataaba ahorow yi dodow a ɔfata. Afei, enye no nsiesie mbrɛ obotum dze nkrataaba no ama afofor wɔ kwan pa do. Ne nyina mu no, sɛ wɔpen do dɛ hɛn suanyi no nsom dɛ ɔdawurbɔfo a ɔmmbɔɔ esu a, ɔsɛ dɛ yɛnye no bɔ mu yɛ asɛnka edwuma no na yɛboa no.​—Ɔsɛnk. 4:9, 10; Luke 6:40.

8. Ebɛnadze ntsi na no ho hia dɛ hɛn Bible esuafo no benya ɔdɔ a no mu yɛ dzen ama Nyankopɔn nye nyimpa? (Hwɛ adakaba a wɔato dzin “ Mbrɛ Yebesi Aboa Hɛn Bible Esuafo Ma Woeenya Ɔdɔ Kɛse Ama Nyankopɔn” no so.)

⁸ Kaa dɛ, Jesus hyɛɛ hɛn dɛ yɛnkyerɛkyerɛ nkorɔfo ma “wondzi” dza ɔhyɛe no “nyina do.” Ɔda edzi kofee dɛ, asɛm a Jesus kãe no kyerɛ dɛ ɔsɛ dɛ yɛboa hɔn ma wodzi ahyɛdze akɛse  ebien a ɔnye dɛ, dɔ Nyankopɔn nye nyimpa no do. Dɛm ahyɛdze ebien no nyina nye asɛnka nye esuafoyɛ edwuma no wɔ ebusuabɔ kɛse. (Matt. 22:37-39) Ebusuabɔ a ɔwɔ mu nye dɛn? Adze tsitsir a ɔka hɛn ma yɛyɛ asɛnka edwuma no nye ɔdɔ a yɛwɔ ma Nyankopɔn nye hɛn nyɛnko nyimpa. Ntseasee wɔ mu dɛ, wɔ Bible esuafo binom afamu no, sɛ wɔdwen ho dɛ ɔsɛ dɛ wɔdze hɔnho hyɛ asɛnka edwuma no mu a, bi a wɔbɔbɔ hũ. Naaso yebotum ahyɛ esuafo a wɔtse dɛm no nkuran dɛ Jehovah bɔboa hɔn ma nkakrankakra woeetum edzi nyimpa ho suro a wɔwɔ no do. (Ndw. 18:1-3; Mbɛ. 29:25) Adakaba a ɔka adzesua yi ho no kyerɛ dza yebotum ayɛ dze aboa hɛn Bible esuafo ma woeenya ɔdɔ kɛse ama Nyankopɔn. Sɛ ɔno da nkyɛn a, ebɛnadze na asafo no so botum ayɛ dze aboa Bible esuafo ama woeetum ada ɔdɔ kɛse edzi?

9. Mfatoho a ɔfa nyia orusũa kaar ka ho no, ebɛn akwan do na osuanyi no botum enya esuadze a mfaso wɔ do?

⁹ Mfatoho a ɔfa nyia orusũa kaar ka ho no, hom mma yɛnsan nsusu ho. Sɛ ɔreka kaar no na nyia ɔrekyerɛ no tse ne nkyɛn a, ebɛnadze na ɔbɛyɛ dze akyerɛ dɛ orusũa kaar no ka? Ɔsɛ dɛ ɔyɛ aso tsie nsɛm a ne kyerɛkyerɛfo no bɛkã no. Nkyii so, ɔsɛ dɛ ɔhwɛ ahɛnkafo afofor a wɔdze ahwɛyie nam kwan do no. Dɛ nhwɛdo no, bi a ne kyerɛkyerɛfo no bɛkyerɛ no hɛnkanyi bi a ofi ayamuyie mu ma hɛnkanyi fofor kwan ma ɔbɛhyɛ n’enyim no. Anaadɛ, bi a ɔbɛkyerɛ no hɛnkanyi bi a ɔbrɛ ne kandzea adze, mbrɛ ɔbɛyɛ a ne kandzea no rennhye ahɛnkafo afofor enyiwa mu. Nhwɛdo ahorow a ɔtse dɛm no bɛma osuanyi no enya esuadze a mfaso wɔ do a obotum dze ayɛ edwuma ber a ɔreka kaar no.

10. Ebɛnadze na ɔbɔboa Bible suanyi bi ma oeetum abɛyɛ Jesus no suanyi?

¹⁰ Dɛmara so na Bible suanyi a ɔahyɛ ase dɛ ɔrosom Jehovah no, nnyɛ ne kyerɛkyerɛfo no nkotsee na osũa biribi fi no hɔ, mbom no osũa Jehovah n’asomfo afofor so hɔn nhwɛdo pa no. Dɛm ntsi, ebɛnadze na ɔbɔboa Bible esuafo no ma woeetum abɛyɛ Jesus n’esuafo? Ɔsɛ dɛ wɔkɔ hɛn Christianfo nhyiamu. Ebɛnadze ntsi a? Bible mu nkyerɛkyerɛ a wɔbɛtse wɔ hɛn nhyiamu ahorow ase no bɔboa hɔn ma woeesũa pii, hɔn gyedzi aayɛ dzen na woeenya ɔdɔ kɛse ama Nyankopɔn. (Andw. 15:30-32) Bio so, wɔ hɛn nhyiamu ahorow ase no, Bible kyerɛkyerɛfo no botum dze osuanyi no ekyia enuanom a hɔn tsebea nye osuanyi no nedze dzi nsɛ. Ebɛn nhwɛdo ahorow na bi a ɔbɛma osuanyi no ehu dɛ hɛn nuanom reda ɔdɔ edzi wɔ asafo no mu? Hom mma yensusu nhwɛdo a odzidzi do yi ho.

11. Ebɛn nhwɛdo ahorow na bi a Bible suanyi bi bohu wɔ asafo no mu, na iyi bɛka no dɛn?

¹¹ Bible suanyi bi a ɔyɛ ɔbaatankor ehu akyerɛbaa bi a no so yɛ baatankor dɛmara. Sɛ ohu mbɔdzen a akyerɛbaa no robɔ dɛ ɔdze ne mba nkakraba bɛba Ahendzi Asa do no a, ɔka n’akoma papaapa. Aberantsɛ bi a wɔnye no sũa Bible na ɔrobɔ mbɔdzen dɛ obegyaa sigyarɛtsenom ehyia ɔdawurbɔfo bi a nna ɔno so wɔ tsebea a ɔtse dɛm mu, naaso otumii dzii do. Dawurbɔfo no ma Bible suanyi no hu mbrɛ ɔdɔ kɛse a onyae maa Jehovah no boaa no ma odzii Nyankopɔn ne mbra do. (2 Cor. 7:1; Phil. 4:13) Aber a ɔdawurbɔfo no kãa n’asɛm kyerɛɛ Bible suanyi no wiei no, ɔdze kaa ho dɛ, “Woara so botum egyaa.” Iyi hyɛ osuanyi no nkuran na onya gyedzi dɛ noara so botum egyaa. Akataasia bi a wɔnye no sũa Bible no ehu Ɔdasefo bi a no so yɛ akataasia a n’enyi gye wɔ n’asetsena mu. Bible suanyi no ahyɛ no nsew dɛ dabaa na akyerɛbaa no n’enyi agye. Iyi ma onya ɔpɛ dɛ obohu siantsir a n’enyi gye dɛm no.

12. Ebɛnadze ntsi na yebotum akã dɛ obiara a ɔwɔ asafo no mu no wɔ dwuma a obotum edzi dze aboa Bible esuafo?

¹² Sɛ Bible esuafo hu enuanom a ɔsor hɔn nsɛm tsebea dɛ wɔdze nokwardzi ridzi Christ n’ahyɛdze a ɔnye dɛ, yɛndɔ Nyankopɔn nye nyimpa no do a, ɔhyɛ hɔn nkuran ma hɔn so  wosũasua nhwɛdo a ɔtse dɛm no. (John 13:35; 1 Tim. 4:12) Bio so, dɛ mbrɛ yeedzi kan akã no, Bible suanyi bi botum esũa biribi efi adawurbɔfo a hɔn so worihyia nsɛndzendzen tse dɛ dza orihyia no. Dza osuanyi no sũa fi nhwɛdo ahorow a ɔtse dɛm mu no botum aboa no ma oeehu dɛ, nsesa ahorow a ɔsɛ dɛ ɔyɛ ama oeetum abɛyɛ Christ no suanyi no, obotum ayɛ. (Deut. 30:11) Obiara a ɔwɔ asafo no mu no botum afa akwan ahorow do aboa Bible esuafo ma woeenya nkɔenyim. (Matt. 5:16) Ebɛn mbɔdzen na erobɔ dɛ ebɔboa Bible esuafo a wɔba hɛn nhyiamu ahorow no ma woeenya nkɔenyim?

13-14. Ebɛn kwan do na Jesus nye n’asomafo a nna hɔn abaw mu ebu no dzii?

¹³ Hɛn nuanom a woegyaa asɛnka kɔ no, yɛpɛ dɛ yɛboa hɔn ma wɔsan dzi ahyɛdze a Christ dze maa dɛ yɛnyɛ nkorɔfo esuafo no do. Ɔkwan a Jesus nye n’esuafo a nna hɔn abaw mu ebu no dzii no ma yehu dza yebotum ayɛ ndɛ.

¹⁴ Aka kakra ma woeeku Jesus no, asomafo no “nyinara gyaa no hɔ, na woguanee.” (Mark 14:50; John 16:32) Dɛm aber a Jesus n’asomafo no hɔn abaw mu bui no, ebɛn kwan do na ɔnye hɔn dzii? Jesus no wusoɛr ekyir ber tsiabaa bi no, ɔkãa kyerɛɛ n’ekyirdzifo binom dɛ: “Mma hom nnsuro; hom nkɔ nkɛkã nkyerɛ mo nuanom [dɛ woenyan me].” (Matt. 28:10a) Jesus ammpa abaw wɔ n’asomafo no ho. Ɔmmfa ho dɛ wogyaa no hɔ no, ɔkɔr do frɛɛ hɔn dɛ “mo nuanom.” Dɛ mbrɛ Jehovah da mbɔbɔrhu edzi na ɔdze bɔn kyɛ no, dɛmara na Jesus so yɛe.​—2 Ahe. 13:23.

15. Hɛn nuanom a woegyaa asɛnka kɔ no, yɛtse nka dɛn wɔ hɔnho?

¹⁵ Hɛn so, hɔn a woegyaa asɛnka kɔ no, yɛdwen hɔnho papaapa. Wɔyɛ hɛn nuanom na yɛdɔ hɔn! Edwumadzen a dɛm enuanom yi yɛe maa Jehovah no, yɛda ho ara kaa ne nyina. Dɛm enuanom yi, binom wɔ hɔ a wɔdze mfe pii na wɔdze yɛɛ edwuma maa Jehovah. (Heb. 6:10) Yɛafe hɔn papaapa! (Luke 15:4-7) Aber a yerusũasua Jesus no, yebesi dɛn akyerɛ dɛ yɛdwen hɔnho?

16. Ebɛnadze na yebotum ayɛ dze akyerɛ dɛ yɛdwen hɛn nuanom a woegyaa asɛnka kɔ na wɔmmba asafo nhyiamu no ho?

¹⁶ Fi ayamuyie mu to nsa frɛ hɔn dɛ wɔmbra asafo nhyiamu. Ɔkwan kor a Jesus faa do hyɛɛ n’asomafo a nna hɔn abaw mu ebu no nkuran nye dɛ, ɔtoo nsa frɛɛ hɔn ma wɔkɔr nhyiamu bi ase. (Matt. 28:10b; 1 Cor. 15:6) Dɛmara na ndɛ so, sɛ hɔn a woegyaa asɛnka kɔ no mmba asafo nhyiamu a, yɛbɛhyɛ hɔn nkuran dɛ wɔmbra. Yɛgye to mu dɛ bi a no ho behia dɛ yɛto nsa frɛ hɔn mpɛn dodow bi ansaana wɔaba. Ɔda edzi dɛ aber a Jesus n’esuafo no gyee ne nsato no too mu na wɔkɔr nhyiamu no ase no, n’enyi gyee.​—Fa toto Matthew 28:16 nye Luke 15:6 ho.

17. Sɛ onua anaa akyerɛbaa bi a oegyaa asɛnka kɔ na ɔmmba asafo nhyiamu ba Ahendzi Asa do a, ɔsɛ dɛ yɛyɛ hɛn adze dɛn?

¹⁷ Fi w’akoma mu ma hɔn akɔaba. Aber a Jesus n’esuafo no hyiaa no no, ɔmaa wonyaa ahomka. Ɔanntweɔn dɛ wɔbɛba ne nkyɛn, mbom otuu anamɔn kɔr hɔn nkyɛn na ɔnye hɔn kasae. (Matt. 28:18) Sɛ hɛn nua bi a oegyaa asɛnka kɔ na ɔmmba asafo nhyiamu ba Ahendzi Asa do a, yɛbɛyɛ hɛn adze dɛn? Ɔsɛ dɛ yedzi kan tu anamɔn ma no akɔaba. Ahyɛse no dze, bi a hɛn adwen bɛyɛ hɛn dɛ yerunnhu asɛm a yɛbɛkã. Mbrɛ ɔbɛyɛ a yɛnnkɛma n’enyi ato no, yebotum akã akyerɛ no dɛ hɛn enyi agye dɛ yeehu no.

18. Yebesi dɛn ahyɛ adawurbɔfo a woegyaa asɛnka kɔ no nkuran?

¹⁸ Hyɛ hɔn nkuran. Obotum aba dɛ Jesus n’esuafo no tsee nka dɛ wonnkotum ayɛ asɛnka edwuma no wɔ wiadze nyina. Jesus kãa kyerɛɛ n’ekyirdzifo no dɛ: “Menye hom wɔ hɔ daa.”  (Matt. 28:20) Ɔkãa dɛm asɛm yi dze hyɛɛ hɔn nkuran. Aso dɛm asɛm a ɔkãe yi boaa esuafo no? Nyew. Ɔno ekyir pɛɛ no, ‘wɔkyerɛkyerɛe na wɔkãa asɛmpa’ no. (Andw. 5:42) Adawurbɔfo a woegyaa asɛnka kɔ no so hia nkuranhyɛ. Bi a wɔbɛtse nka dɛ worunntum nnyɛ asɛnka edwuma no bio. Naaso yebotum ahyɛ hɔn nkuran dɛ nnyɛ hɔn nko na wɔbɛyɛ asɛnka edwuma no. Aber biara a wɔbɛyɛ krado dɛ wɔbɔkɔ asɛnka no yebotum nye hɔn abɔ mu akɔ. Ekyingye biara nnyi ho dɛ sɛ wɔhyɛ ase dɛ wɔrekã asɛmpa no akyerɛ afofor bio, na yɛdze mboa a ɔtse dɛm ma hɔn a, hɔn enyi bɛgye. Sɛ yebu adawurbɔfo a woegyaa asɛnka kɔ no dɛ wɔyɛ hɛn nuanom a, wɔbɛyer hɔnho wɔ asafo no mu na iyi bɛma obiara n’enyi agye.

19. Hɛn akoma do adze nye dɛn, na ebɛnadze ntsi a?

¹⁹ Ebɛn aber na yebowie asɛnka nye esuafoyɛ edwuma no? Yɛbɛyɛ ekesi dɛ wiadze nhyehyɛɛ yi bɛba ewiei. (Matt. 28:20) Aso ahyɛdze a Jesus dze maa dɛ yɛnkã asɛm no na yɛnyɛ nkorɔfo esuafo no, yebotum edzi do? Yeesi hɛn bo dɛ yebedzi do! Yefi enyigye mu dze hɛn ber, hɛn ahoɔdzen nye hɛn ahodze boa hwehwɛ hɔn a “woeyi hɔn ama onnyiewiei nkwa no,” kyerɛ, hɔn a wɔpɛ onnyiewiei nkwa no. (Andw. 13:48) Sɛ yɛyɛ dɛm a, nna yeridzi Jesus no nhwɛdo ekyir. Ɔkãa dɛ: “M’edziban nye dɛ meyɛ nyia ɔsomaa me no pɛ na muwie n’edwuma.” (John 4:34; 17:4) Hɛn so hɛn akoma do adze ara nye no. Yɛpɛ dɛ yewie edwuma a wɔdze ahyɛ hɛn nsa no. (John 20:21) Yɛpɛ dɛ yɛnye afofor bɔ mu yɛ asɛnka edwuma no kesi ase a hɔn a woegyaa asɛnka kɔ no mpo ka ho.​—Matt. 24:13.

20. Dɛ mbrɛ Philippifo 4:13 kyerɛ no, ebɛnadze ntsi na yebotum ewie edwuma a Jesus hyɛɛ hɛn dɛ yɛnyɛ no?

²⁰ Ɔwɔ mu, edwuma a Jesus dze ama hɛn no sõ na ɔnnda famu dɛ yɛbɛyɛ. Naaso, nnyɛ hɛn nko na yɛreyɛ edwuma a ɔtse dɛm. Jesus hyɛɛ hɛn bɔ dɛ ɔbɛka hɛnho. Edwuma a ɔhyɛ hɛn nsa dɛ yɛnyɛ nkorɔfo esuafo no ma yɛyɛ “Nyankopɔn edwumaboafo” na yɛnye Christ bɔ mu yɛ edwuma. (1 Cor. 3:9; 2 Cor. 2:17) Dɛm ntsi, yebotum ewie edwuma no. Hwɛ ho kwan nye enyigye ara a ɔyɛ dɛ yɛbɛyɛ dɛm edwuma yi na yaaboa afofor ma hɔn so wɔaayɛ dɛmara!​—Kenkan Philippifo 4:13.