1. Na cava e vakarota o Jisu ena Maciu 28:18-20?

NI VAKATURI oti ga o Jisu, e rairai vei ira na nona tisaipeli era soqoni yani e Kalili. E via tukuna vei ira e dua na itukutuku bibi. Na itukutuku cava qori? E volai na ka e tukuna ena Maciu 28:18-20.—Wilika.

2. Na taro cava eda na veivosakitaka?

² Eda vauci tale ga na dauveiqaravi ni Kalou nikua ena ivakaro i Jisu, ya meda vakavulici ira na lewenivanua mera tisaipeli. Eda na veivosakitaka qo e tolu na taro me baleta na ilesilesi e solia vei keda o Jisu. Kena imatai, na cava tale meda cakava nida vakavulica tiko na loma ni Kalou vei ira na tisaipeli vou? Kena ikarua, era na veivuke vakacava na dautukutuku kece ni ivavakoso ena nona toso vakayalo e dua na vuli iVolatabu? Kena ikatolu, eda na vukei ira vakacava na tacida era malumu tu vakayalo mera tomana tale nodra veivakatisaipelitaki?

3. Na ivakaro matata cava e tukuna sara ga o Jisu?

³ E matata vinaka tu na ivakaro i Jisu. E dodonu meda vakavulica na nona ivakaro. Ia meda nanuma tiko e dua na tikina bibi. A sega ni kaya ga o Jisu: ‘Vakavulici ira ena veika kece au vakarota vei kemuni.’ Ia e tukuna sara ga: Vakavulici ira “mera muria na ka kece au vakarota vei kemuni.” Nida vakavulica gona na ivakaro qori vua e dua na vuli iVolatabu, eda na sega ni veivakavulici ga, eda na dusimaki koya tale ga  ena sala me muria kina. (Caka. 8:31) Na vuna?

4. Na cava na ibalebale ni noda muria e dua na ivakaro? Vakamacalataka.

⁴ Ni “muri” e dua na ivakaro, e kena ibalebale meda talairawarawa kina. Me matata vei keda na sala meda vakavulica kina e dua me muria se me talairawarawa ena ivakaro i Karisito, vakasamataka na ivakaraitaki qo. Ena vakavulici ira vakacava nona gonevuli na qasenivuli ni vuli draiva mera muria na lawa ni gaunisala? De dua ena vakavulica eso na lawa ena loma ni kalasi. Me rawa ni vakavulici gonevuli vinaka, e tiko na ka me cakava. Ena tomani koya e vuli draiva tiko me vakatovotovotaka na veika rau sa vulica. Na cava eda rawa ni vulica ena ivakaraitaki qori?

5. (a) Me vaka e tukuni ena Joni 14:15; kei na 1 Joni 2:3, na cava meda vakavulica vei ira noda gonevuli? (b) Eda na vukei ira vakacava na gonevuli mera muria na ka era vulica?

⁵ Nida caka vuli iVolatabu, meda vakavulici ira noda gonevuli ena ka e vinakata na Kalou mera cakava. Ia e levu tale na ka e vinakati. E bibi meda vakavulici ira mera muria ena nodra bula e veisiga na ka era vulica tiko. (Wilika Joni 14:15; 1 Joni 2:3.) Eda rawa ni cakava qori ena noda ivakaraitaki sara ga, meda vakavulica kina eso na ivakavuvuli vakaivolatabu rawarawa mera muria e koronivuli, e valenicakacaka, se gauna ni marau. O rawa ni vakamacalataka vua na yaga ni nomu muria na veidusimaki ni iVolatabu, o yalomatua kina, e itataqomaki tale ga. Nida tiko kei ira noda gonevuli, eda rawa ni kerei Jiova ena masu me dusimaki ira na nona yalo tabu.—Joni 16:13.

6. Na cava e okati ena noda vakavulici ira eso mera muria na ivakaro i Jisu?

⁶ Na cava e okati ena nodra vakavulici eso tale mera muria na ivakaro i Jisu? E bibi meda vukea noda gonevuli me taleitaka na veivakatisaipelitaki. Eso na gonevuli era dau rere nira vakasamataka na cakacaka vakavunau. E bibi gona meda vosovoso nida dusimaki ira me titobu nodra kilaka, me tara na lomadra, mera muria sara. Meda vukei ira vakacava na gonevuli mera via vakaitavi ena vunautaki ni itukutuku vinaka?

7. Eda na uqeti ira vakacava noda gonevuli mera via wasea na itukutuku vinaka?

⁷ Eda rawa ni taroga noda vuli iVolatabu ena so na taro qo: “E veisautaka vakacava nomu bula na itukutuku vinaka ni Matanitu ni Kalou? O nanuma ni dodonu mera rogoca eso tale na itukutuku qo? O na rawa ni vukei ira vakacava?” (Vkai. 3:27; Maciu 9:37, 38) Vakaraitaka vua na tikidua era tiko ena iVukevuke ni Veivakavulici (Teaching Toolbox) me qai digia na kena era na taleitaka na wekana, itokani, se o ira na cakacaka vata. Solia sara vua e vica na tikidua qori. Drau rawa ni vakatovotovotaka e dua na iwalewale vinaka me solia kina. Ni sa vakadonui me dautukutuku bera ni papitaiso, e rawa ni drau veitomani mo tuberi koya.—Dauv. 4:9, 10; Luke 6:40.

8. Na cava e bibi kina meda vukei ira na gonevuli mera lomana vakalevu na Kalou kei ira na kainona? (Raica na kato “ Vukei Gonevuli me Lomana Vakalevu na Kalou.”)

⁸ Mo nanuma tiko ni vakaroti keda o Jisu meda vakavulici ira eso tale “mera muria na ka kece” e vakarota. E okati kina e rua na ivunau levu, ya meda lomana na Kalou, meda lomani ira tale ga na kainoda. E bibi sara qori ena noda cakacaka vakavunau  kei na veivakatisaipelitaki. (Maciu 22:37-39) Na vuna? Na inaki levu ni noda wasea na itukutuku vinaka na loloma, oya noda lomana na Kalou kei ira na kainoda. E macala ga nira dau rere eso na vuli iVolatabu mera wasea na itukutuku vinaka. Ia eda rawa ni vakayaloqaqataki ira ni na vukei ira o Jiova mera kua ni rerevaka na tamata. (Same 18:1-3; Vkai. 29:25) Na kato ena ulutaga qo e tiko kina eso na sala meda vukei ira kina na gonevuli mera lomana vakalevu na Kalou. Na cava ena cakava na ivavakoso mera vukei kina na tisaipeli vou mera vakaraitaka vakalevu na loloma?

9. Ena vulica vakacava o koya e vuli draiva na veika bibi me muria?

⁹ Vakasamataka tale na vosa vakatautauvata me baleti koya e vuli draiva. Ni draiva ena gaunisala osooso, ena vuli vakacava ni tiko e yasana o qasenivuli? Qori ni vakarorogo vinaka, me vuli tale ga vei ira na draiva era dau qaqarauni. Kena ivakaraitaki, e rawa ni dusia o qasenivuli ni soli pasi e dua na draiva vua e dua tale me liu ena gaunisala qiqo. Se nona vakalailaitaka e dua na draiva na ramase ni nona cina vei ira na vo ni draiva. Na ivakaraitaki qori ena vulica kina o gonevuli na veika bibi me muria ni draiva.

10. Na cava ena vukea nona toso vakayalo na vuli iVolatabu?

¹⁰ Ena va tale ga qori na vuli iVolatabu e sasagataka me rawata na bula, ena vuli vua nona qasenivuli kei na nodra ivakaraitaki vinaka eso tale na dauveiqaravi i Jiova. Cava gona ena vukea na gonevuli me toso vakayalo? Nona dau tiko ena soqoni. Na vuna? Na ivakasala vakaivolatabu e vakamacalataki ena soqoni ena vakatitobutaka nona kilaka, vaqaqacotaka nona vakabauta, uqeti koya tale ga me lomana vakalevu na Kalou. (Caka. 15:30-32) Ni tiko ena soqoni, ena rawa ni sotavi ira kina eso na tacida e tautauvata na ka era taleitaka. Na ivakaraitaki cava ni loloma vaKarisito ena rairai raica o gonevuli ena ivavakoso? Dikeva mada qo eso na ituvaki va qori.

11. Na cava eso na ivakaraitaki era dau raica na vuli iVolatabu ena ivavakoso? E uqeti ira vakacava?

¹¹ E raica ena soqoni e dua na vuli iVolatabu itubutubu le dua, e dua na tacida yalewa e itubutubu le dua tale ga. E tara na lomana na nona sasaga me kauti ratou mai na luvena lalai ena soqoni. Dua tale na vuli iVolatabu e sotava e dua na dautukutuku a sega ni rawarawa nona biuta na vakatavako, ia e qai biuta rawa. E tukuna na dautukutuku qori ni uqeti koya nona lomani Jiova vakalevu me muria nona ivakaro. (2 Kor. 7:1; Fpai. 4:13) Ni rogoca oti na nona italanoa, e qai vakadeitaka na tacida qori, “O rawa ni biuta tale ga.” E nuidei sara ga na vuli iVolatabu. Dua tale na goneyalewa e vuli iVolatabu, e raica nona marautaka tiko nona bula e dua na tacida goneyalewa ni sa iVakadinadina i Jiova. Na ka e raica qori e uqeti koya sara ga me via kila na vuna e dau marau kina.

12. Na cava eda kaya kina nida vakaitavi kece na lewe ni ivavakoso ena nodra vukei na vuli iVolatabu?

¹² Nira veikilai na vuli iVolatabu kei na levu na dautukutuku ivakaraitaki vinaka, era vulica na sala mera muria kina na ivakaro i Karisito mera lomana na Kalou kei na kainodra. (Joni 13:35; 1 Tim. 4:12) Me vaka eda sa dikeva mai, ena rawa sara ga nira vuli vei ira na dautukutuku e tautauvata na leqa era sotava. Era na vulica na vuli iVolatabu ni rawa tale ga  nira veisau mera tisaipeli i Karisito. (Vkru. 30:11) E levu na sala eda rawa ni veitokoni kina na lewe ni ivavakoso yadua ena nodra toso vakayalo na vuli iVolatabu. (Maciu 5:16) Na cava o dau cakava mo uqeti ira kina na vuli iVolatabu era tiko ena soqoni?

13-14. Na cava nona rai o Jisu ni ratou yalolailai na nona yapositolo?

¹³ Eda via vukei ira noda itokani vakabauta era malumu tu vakayalo mera tomana tale na itavi e lesia o Karisito, oya meda veivakatisaipelitaki. Eda rawa ni vakatotomuria nikua na ivakarau ni nona vukei ratou nona yapositolo o Jisu ni ratou yalolailai.

¹⁴ Ni vakarau cava na cakacaka vakaitalatala i Jisu e vuravura, sa voleka tale ga ni mate, eratou “biuti koya kece” na yapositolo me “ratou dro.” (Mari. 14:50; Joni 16:32) Cava nona rai o Jisu ni ratou yalolailai na yapositolo ena dua na gauna lekaleka? Ni oti ga vakalailai nona vakaturi, e kaya vei rau e rua nona imuri: “Drau kua ni rere! Drau lai tukutuku vei ratou na taciqu [niu sa vakaturi].” (Maciu 28:10a) E vosoti ratou tiko ga nona yapositolo o Jisu. Eratou biuti koya ena dua na gauna, ia se kacivi ratou tiko ga “taciqu.” E vakaraitaka nona yalololoma kei na nona dauveivosoti me vakataki Jiova.—2 Tui 13:23.

15. Na cava noda rai me baleti ira era sa sega ni vakaitavi tu ena cakacaka vakaitalatala?

¹⁵ E bibi meda kauaitaki ira tale ga vakalevu era sa sega ni vakaitavi tu ena cakacaka vakaitalatala. Era se tacida vakayalo tiko ga, eda lomani ira! Eda sega ni guilecava na loloma era vakaraitaka ena veigauna sa oti, de dua ena vicasagavulu na yabaki. (Iper. 6:10) Eda nanuma vinaka tu na noda dau veimaliwai! (Luke 15:4-7) Eda na kauaitaki ira gona vakacava me vakataki Jisu?

16. Eda na vakaraitaka vakacava nida kauaitaki ira na tacida era sa malumu tu?

¹⁶ Veisureti vakayalololoma. Dua na sala e uqeti ratou kina nona yapositolo o Jisu ni ratou yalolailai, ya ni veisureti me ratou lai sota. (Maciu 28:10b; 1 Kor. 15:6) Nikua tale ga eda rawa ni sureti ira na malumu tu vakayalo ena soqoni. Meda kua ni sureti ira ga vakadua, de dua eda na sureti ira vakavica era na qai makutu. Macala ga ni marautaka o Jisu nodratou ciqoma nona veisureti.—Vakatauvatana Maciu 28:16 kei na Luke 15:6.

17. Na cava meda cakava ni gole mai na soqoni e dua sa malumu tu vakayalo?

¹⁷ Kidavaki ira vakayalololoma. E cakava qori o Jisu ni sotavi ira nona tisaipeli, e vakaliuliu sara ga ni vosa vei ira. (Maciu 28:18) Na cava eda na cakava ni gole mai na soqoni e dua sa malumu tu vakayalo? Meda vakaliuliu ni kidavaki koya vakayalololoma. De dua eda na leqataka na ka meda kaya. Eda rawa ni tukuna nida marau ni raici koya, meda kua ga ni vakavuna tale nona madua.

18. Eda na vakayaloqaqataki ira vakacava na malumu tu vakayalo?

¹⁸ Vakayaloqaqataki ira. De dua era leqataka na tisaipeli i Jisu na ilesilesi mera vunau e vuravura taucoko. Ia e vakayaloqaqataki ira o Jisu ni kaya: “Au [na] tiko vata kei kemuni ena veisiga kece.” (Maciu 28:20) Vakacava e yaga? Io. Oti ga vakalailai, era sa gumatua ena ‘veivakavulici kei na vunautaki ni itukutuku vinaka.’ (Caka. 5:42) E bibi tale ga mera vakayaloqaqataki  na malumu tu vakayalo. Era na rairai madua mera vakaitavi tale ena cakacaka vakavunau. Eda rawa ni vakayaloqaqataki ira nida tokoni ira. Ke ra sa vakarau mera vakaitavi tale ena cakacaka vakaitalatala, eda rawa sara ga ni tomani ira. Macala ga nira na marautaka na noda veitokoni nira tekivu vunautaka tale na itukutuku vinaka. Nida vakaraitaka vei ira na veikauaitaki vakamataveitacini, eda na raica na kena yaga ena ivavakoso.

19. Na cava eda via cakava? Na vuna?

¹⁹ Ena vakacava na dede ni noda veivakatisaipelitaki tiko? Me yacova na ivakataotioti ni veika vakavuravura. (Maciu 28:20; raica na iVakamacala ni Vosa ena iVolatabu, “iVakataotioti ni veika vakavuravura.”) Vakacava eda na vakaotia vinaka na itavi e lesia o Jisu? Eda vakadeitaka meda cakava qori! Eda marau ni vakayagataka noda gauna, kaukaua, kei na iyau meda vakasaqarai ira “na yalomalumalumu era muria na sala mera bula tawamudu kina.” (Caka. 13:48) Eda vakatotomuri Jisu nida cakava qori. E kaya: “Na qau kakana meu cakava na loma i koya e talai au mai, meu vakaotia tale ga nona cakacaka.” (Joni 4:34; 17:4) Qori tale ga na ka eda vinakata. Eda via vakaotia vinaka na ilesilesi eda nuitaki kina. (Joni 20:21) Eda vinakata mera tomani keda eso tale ni vakayacora na itavi qo ena vosota, okati kina o ira na malumu tu vakayalo.—Maciu 24:13.

20. Me vaka e tukuni ena Filipai 4:13, na cava eda kaya kina ni rawa nida vakacavara vinaka na ka e vakarota o Jisu?

²⁰ E macala ni sega ni rawarawa na itavi e lesi keda kina o Jisu. Ia eda sega ni vakaitavi duadua tiko. E yalataka o Jisu ni na tokoni keda. Nida vakayacora tiko noda ilesilesi, eda “cakacaka vata [tiko] kei na Kalou” kei “Karisito.” (1 Kor. 3:9; 2 Kor. 2:17) Koya gona, eda rawa ni vakacavara vinaka noda itavi. E dua dina na itavi totoka qai marautaki noda vakayacora na ilesilesi qo meda vukea eso tale mera vakaitavi tale ga!—Wilika Filipai 4:13.