1. Dapré Matthieu 28:18-20, kisa Jézi di so disip-ya fè ?

APRÉ Bondjé résisité l’, Jézi alé wè so disip-ya ki té Galilé. I té gen roun bagaj enpòrtan pou di yé. A té kisa ? Nou ka jwenn sa i di yé annan Matthieu 28:18-20 (li).

2. Ki késyon nou ké wè ?

² Jézi di fè disip, é sa lòrd-a, a pou nou chak jòdla osi. Annan sa artik-a, nou ké wè trwa késyon parapòrta sa lòrd-a Jézi bay nou : 1) Kisa nou divèt fè anplis di anprann nouvo disip-ya sa Bondjé lé nou fè ? 2) Kouman tout moun annan asanblé-a pouvé idé roun moun ki ka étidyé Labib-a vansé ? 3) Kouman nou pouvé idé nou frè ké sò-ya ki arété préché roukoumansé fè disip ?

3. Ki bagaj enpòrtan Jézi di annan lòrd i bay nou-a ?

³ Lòrd Jézi bay nou, klè : nou divèt anprann moun-yan sa i di nou fè. Mé nou pa divèt bliyé roun bagaj enpòrtan. I pa di : ‘Anprann yé tousa mo di zòt fè’, mé i di yé : ‘Anprann yé fè tousa mo di zòt fè’. Pou nou obéyi sa Jézi di nou fè, nou divèt anprann moun-an ki ka étidyé Labib-a kisa i divèt fè mé osi montré li kouman i divèt fè l’ (Actes 8:31).

4. Kouman nou pouvé anprann roun moun ki ka étidyé Labib-a kouman i pouvé obéyi sa Jézi di nou fè ? Bay roun èkzanp.

 ⁴ Kouman nou pouvé idé roun moun fè sa Jézi di ? Annou pran roun èkzanp : Kouman roun monitèr lotoékòl ka anprann so zélèv-ya obéyi kod di larout-a ? Pou koumansé, i ka anprann yé kod di larout-a. Mé pou i anprann yé obéyi sa kod-a, i divèt fè rounòt bagaj ankò. Toupannan yé ka roulé loto-a é yé ka éséyé apliké sa yé anprann, i divèt la òbò yé é montré yé kouman yé divèt fè. Kisa sa èkzanp-a ka anprann nou ?

5. a) Dapré Jean 14:15 ké 1 Jean 2:3, kisa nou divèt anprann roun étidyan fè ? b) Kouman nou pouvé gidé roun étidyan ?

⁵ Lò nou ka étidyé Labib-a ké roun moun, nou ka anprann li sa Bondjé lé nou fè. Mé nou divèt fè plis ki sa. Nou divèt anprann li osi kouman i pouvé apliké chak jou annan so lavi sa i ka anprann (li Jean 14:15 ; 1 Jean 2:3). Ké nou èkzanp, nou pouvé anprann étidyan-an kouman i pouvé apliké vérité-ya ki annan Labib-a lò i lékòl, lò i ka travay ouben lò i ka anmizé. Nou pouvé palé li di roun bagaj ki rivé nou annan nou lavi, pou montré li kouman, paské nou swiv sa Labib-a ka di, sa protéjé nou ouben sa idé nou pran bon désizyon. Lò nou ansanm ké nou étidyan, nou pouvé priyè pou Jéova idé li gras a so lèspri sen (Jean 16:13).

6. Kisa nou divèt fè ankò pou anprann roun étidyan fè sa Jézi doumandé nou fè ?

⁶ Pou anprann nou étidyan fè sa Jézi di nou fè, nou divèt idé li pou, piti piti, i anvi fè disip. Roun ran étidyan ké pitèt pè alé préché. Atò, nou divèt pasyan ké yé toupannan nou ka idé yé konprann Labib-a pi byen, pou yé lafwa vin pi fò. Sa ké touché yé tchò é yé ké anvi préché. Kisa nou pouvé fè pou idé étidyan-yan pou yé anvi préché ?

7. Kisa nou pouvé fè pou idé roun étidyan pou i anvi préché ?

⁷ Nou pouvé pozé nou étidyan sa késyon-yan : « Kouman ou lavi vin pi bèl dipi ou ka apliké sa Labib-a ka di ? Ès ou ka pansé ki ròt moun té ké bézwen tandé sa mésaj-a ? Kisa ou pouvé fè pou idé yé ? » (Prov. 3:27 ; Mat. 9:37, 38). Annou montré étidyan-an dépliyan nou ganyen annan nou bwèt zouti ansényan-an, é lésé li chwazi sa-ya so fanmi, so zanmi ouben so kolèg travay té ké anvi li. Annou bay étidyan-an plizyèr dépliyan. Épi, annou antréné nou kò ké li pou i pouvé propozé moun-yan sa dépliyan-yan jantiman. Lò étidyan-an ké divini roun proklamatèr, nou ké préché ké li pou montré li kouman pou i fè (Eccl. 4:9, 10 ; Luc 6:40).

8. Poukisa roun étidyan divèt fè so lanmou pou Bondjé é pou so konpanyen vin pi fò ? (gadé osi ankadré-a «  Idé to étidyan fè so lanmou pou Bondjé vin pi fò »).

⁸ Sonjé ki Jézi di nou anprann moun-yan ‘fè tousa i di nou fè’. Annan tout sa bagaj-ya i gen dé pi gran koumannman-yan : kontan Bondjé épi kontan so konpanyen. Sa koumannman-yan ka maché ansanm ké prédikasyon-an épi ké ansèyman-an (Mat. 22:37-39). Poukisa nou pouvé di sa ? A lanmou ki ka fè nou préché, lanmou pou Bondjé ké nou konpanyen. Mé roun ran étidyan pouvé pè alé préché. Nou pouvé di yé ki Jéova ké idé yé pou,  piti piti, yé rivé pa pè moun (Ps. 18:1-3 ; Prov. 29:25). Ankadré-a ki ka alé ké sa artik-a ké montré nou kisa nou pouvé fè pou idé nou étidyan pou i fè so lanmou pou Bondjé vin pi fò.

9. Kouman zélèv-a annan èkzanp-a ka anprann roulé roun loto ?

⁹ Annou viré asou èkzanp roun zélèv ki ka anprann roulé roun loto. Toupannan i ofon loto-a ké monitèr-a òbò li, kouman i ka anprann roulé ? I ka kouté konsèy monitèr-a ka bay é i ka byen gadé moun-yan ki ka byen roulé. Parèkzanp, monitèr-a pouvé fè li wè ki roun moun lésé rounòt loto pasé anvan li. I pouvé osi montré li kouman roun moun annan so loto montré i té janti lò i tiré so far pou i pa vèrglé ròt-ya. Gras a yé èkzanp, sa moun-yan ki konnèt byen roulé ka anprann zélèv-a kouman i divèt roulé.

10. Kisa ki ké idé roun moun ki ka étidyé Labib-a vansé ?

¹⁰ Menm fason-an, roun moun ki ka koumansé adoré Jéova ké anprann roun patché bagaj ké moun-an ki ka anprann li Labib-a mé osi ké ròt sèrvitèr Jéova. Atò, kouman roun moun ki ka étidyé Labib-a pouvé vansé pi vit ? A pou i vini annan réinyon krétyen-yan. A sa i divèt fè paské ansèyman i ké rousouvwè annan sa réinyon-yan ké idé li konnèt Labib-a pi byen, fè so lafwa divini pi fò é fè so lanmou pou Bondjé divini pi fò (Actes 15:30-32). Anplis di sa, pannan réinyon-yan, frè-a ouben sò-a ki ka étidyé Labib-a ké li pouvé fè li kontré frè ké sò ki annan menm sitiasyon ké li. Étidyan-an pouvé wè osi kouman frè ké sò-ya ka montré yé kontan yé konpanyen.

11. Ki kalité bagaj pouvé touché tchò roun étidyan, é kouman èkzanp frè ké sò-ya annan asanblé-a pouvé aji asou li ?

¹¹ Annou wè plizyèr èkzanp. Roun madanm ki ka étidyé Labib-a é ki ka lévé so timoun li rounso ka gadé roun sò ki annan menm sitiasyon ké li. Sa ka touché so tchò lò i ka wè tout éfòr sa sò-a ka fè pou vini annan réinyon-yan ké so timoun-yan ki piti toujou. Roun étidyan pa ka rivé arété fimen é i ka kontré ké roun frè ki jwenn menm problèm ké li é ki rivé arété fimen. Frè-a ka di li kouman sa pasé pou li é i ka di li ki a paské i fè so lanmou pou Jéova vin pi fò ki i rivé obéyi so koumannman (2 Cor. 7:1 ; Phil. 4:13). Étidyan-an pi désidé kontinyé éfòr i ka fè lò frè-a ka di li : « To osi, to pouvé rivé ! » Roun jennfi ki ka étidyé Labib-a, ka wè roun jenn sò ki kontan idé moun é ki toujou gen tchò kontan. Lò i ka wè sa, i lé savé kouman sa sò-a ka fè kontan konsa.

12. Poukisa nou ka di ki chak moun annan asanblé-a pouvé fè roun bagaj pou idé roun étidyan vansé ?

¹² Jézi di nou kontan Bondjé épi kontan nou konpanyen (Jean 13:35). Lò roun étidyan ka anprann konnèt plizyèr moun annan asanblé-a, yé èkzanp pouvé idé li konprann kisa sa lé di obéyi sa koumannman-an (1 Tim. 4:12). Anplis di sa, kou nou ja di l’ anvan, i pouvé anprann roun patché bagaj ké èkzanp frè ké sò-ya ki jwenn menm problèm ké li. Yé èkzanp ka montré li ki li menm osi pouvé chanjé sa i divèt chanjé annan so lavi pou i divini disip Kris (Deut. 30:11). Atò, chak moun annan asanblé-a pouvé idé roun étidyan vansé (Mat. 5:16). É to menm, kisa to ka fè pou  ankourajé étidyan-yan ki ka vini annan réinyon-yan ?

13-14. Kouman Jézi fè ké so apot-ya lò yé té dékourajé ?

¹³ Nou lé idé nou frè ké sò-ya ki pa ka préché ankò pou yé roukoumansé préché ké fè disip kou Jézi doumandé. Pou nou savé kouman nou pouvé fè, annou wè kouman i fè ké so apot-ya lò yé té dékourajé.

¹⁴ Roun tibi tan anvan lanmò Jézi, tout apot-ya ‘lésé l’ é yé pran kouri’ (Marc 14:50 ; Jean 16:32). Kouman i fè ké yé pannan sa tan-an yé té dékourajé ? Roun tibi tan apré Bondjé résisité li, i di déztrwa disip : « Pa bézwen pè. Alé di [...] mo frè-ya [ki Bondjé résisité mo] » (Mat. 28:10a). Jézi pa tounen do bay so apot-ya. Menm si yé té lésé l’, i aplé yé « mo frè-ya ». Kou Jéova, i té plen ké konpasyon é i té paré pou pardonnen (2 Rois 13:23).

15. Kisa sa ka fè nou lò nou ka sonjé sa-ya ki arété préché ?

¹⁵ Nou menm osi, nou ka vréman enkyété nou kò pou sa-ya ki arété préché. Yé sa nou frè ké nou sò, é nou kontan yé ! Nou pa ka bliyé tousa yé fè pou Jéova. Roun ran annan sa ki arété préché travay rèd pannan roun patché lannen (Héb. 6:10). Nou tchò gro lò nou ka sonjé yé ! (Luc 15:4-7). Kouman nou pouvé montré yé nou kontan yé ? Annou viré wè èkzanp Jézi.

16. Kouman nou pouvé montré nou frè ké sò-ya ki arété préché ki nou kontan yé ?

¹⁶ Envité yé vini annan réinyon-yan ké bokou lanmou. Roun bagaj Jézi fè pou ankourajé so apot-ya, a té envité yé annan roun réinyon (Mat. 28:10b ; 1 Cor. 15:6). Nou menm osi, nou pouvé ankourajé nou frè ké sò-ya ki arété préché vini annan nou réinyon. A vré, pitèt nou ké divèt envité yé plizyèr fwa anvan yé asèpté vini. Mé si yé ka vini, nou ké kontan toubonnman, menm fason Jézi té divèt kontan lò i wè ki so apot-ya té asèpté so envitasyon (gadé Matthieu 28:16 ké Luc 15:6).

17. Kouman nou pouvé byen rousouvwè roun frè ouben roun sò ki pa ka préché ankò é ki ka vini annan roun réinyon ?

¹⁷ Byen rousouvwè yé. Lò Jézi ké so apot-ya jwenn yé konpanyen, i mété yé alèz ; i vini òbò yé é i palé pou yé (Mat. 28:18). Kouman nou pouvé byen rousouvwè roun frè ouben roun sò ki pa ka préché ankò, lò i ka rivé annan Sal di Rwayonm-an ? Annou alé bò d’ li é annou di li kouman nou kontan wè li. Pitèt prémyé kou-a nou ké pè paské nou pa ké savé kisa pou nou di li. Mé san nou pa fè li ronté, roun bagaj tou senp nou pouvé fè, a di li ki nou vréman kontan wè li.

18. Kouman nou pouvé ankourajé frè ké sò-ya ki pa ka préché ankò ?

¹⁸ Ankourajé yé. Pitèt disip Jézi-ya pansé ki yé pa té ké jen rivé préché asou tout latè-a. Jézi ankourajé yé lò i di yé : « Mo ké la ké zòt touléjou » (Mat. 28:20). Kouman yé réyaji ? Ké ti kouri, yé koumansé « ansényé ké di bon nouvèl-a » (Actes 5:42). Frè ké sò-ya ki pa ka préché ankò bézwen nou ankourajé yé osi. Pitèt yé ka pansé ki yé pa ké janmen rivé roukoumansé préché. Nou pouvé ankourajé yé, si nou ka di yé ki nou ké la òbò yé. Épi, lò yé ké paré, annou alé  préché ké yé. Asiré pa pitèt, yé ké kontan wè ki nou ka idé yé. Si yé ka wè ki nou ka wè yé kou nou frè ké nou sò, pitèt yé ké anvi roukoumansé travay ansanm ké asanblé-a, é tout asanblé-a ké kontan.

19. Kisa nou vréman lé é poukisa ?

¹⁹ Konmyen tan nou ké divèt kontinyé fè disip ? Jistan « lafen monn-an » rivé (Mat. 28:20 ; gadé lexique-a pou « période finale du monde »). Ès nou ké rivé fini sa travay Jézi bay nou fè-a ? Nou byen désidé fè l’ ! Nou kontan bay nou tan, nou fòrs, nou soumaké pou chaché tout sa « yé tchò paré pou asèpté lavérité ki ka pèrmèt gen lavi pou tout-tan-an » (Actes 13:48). Konsa nou ka swiv èkzanp Jézi bay nou. I di : « Mo manjé, a fè volonté sa-la ki voyé mo-a épi fini fè tout so travay » (Jean 4:34 ; 17:4). A sa nou lé osi ké tout nou tchò. Nou lé fini travay Jézi bay nou fè-a (Jean 20:21). Nou lé kontinyé fè sa travay-a ansanm ké tout nou frè, é nou lé osi ki sa-ya ki arété préché vini ansanm ké nou (Mat. 24:13).

20. Dapré Philippiens 4:13, kisa ki ka idé nou fè travay Jézi bay nou fè-a ?

²⁰ A vré, travay Jézi bay nou fè-a pa fasil. Mé nou pa nou rounso pou fè l’. Jézi promèt ki i té ké la ké nou. Nou ka « travay ansanm ké Bondjé » é nou ka préché « ansanm ké Kris » (1 Cor. 3:9 ; 2 Cor. 2:17). Atò, nou pouvé fè sa travay-a. A pa ti lònò é a pa ti kontan nou kontan bay annan é idé ròt-ya fè menm bagaj-a ! (li Philippiens 4:13).