1. Dẹ̀ẹ̀a boo nú ea di mm̀ kpá Máátìù 28:18-20, mókà lẹ̀ẹ̀là ní e Jíízọ̀s beè nè pá a gbò nyòòne nvée ẽ́?

TṌÓ e Jíízọ̀s ni kẽeà aa kemà ú, a beè sila ló pá a gbò nyòòne nvée e ba beè di bṍóná Gálilì. A beè ié nú ea beè palàge dú bíi gè kọ́ nè va. Níà beè éé? Gbò a moǹ belá ẽ́á mm̀ kpá Máátìù 28:18-20.—Bugi.

2. Mókà gbò bíb ní eé ló sọ́l boo é?

² Log e Jíízọ̀s beè nè pá a gbò nyòòne nvée kọ bàá àà gé naa kọ gbò nen á nyoonìèe nvéeá lóá nágé bel kilma ló kọ̀láá kà gyóòlo Bàrì deè nieí. Vóà naa, naanii mè é ló sọ́l boo taà kà bíb ea kil ló tóm e Jíízọ̀s beè nèií. Túá kà, gbá ló gè noòmà ãa gbò e bà gé nyoone nvée Kráìst nú e Bàrì bĩ́íná lọ̀líí bá, éé ní eé náa nagé é? Ní ea égè bàà kà, mósĩ́ deè ní e dénè gbò e bà di mm̀ bõ̀ònatõ̀ò é láá nvèè bá ló gè bumá ãa gbò e bà gé nó Kpá Káí é? Ní ea égè taà kà, mósĩ́ deè ní eé láá nvèè bá nè pá vígà e bà náa ólò siná ól tóm kọ̀ kpẹ̀a kọ bàá láá kpáá dààmà togó gè kọ́ kpẹ̀a ẹ́?

3. Mókà dùùlà bá deè tṍ ní e Jíízọ̀s beè kọ́ bíi ló a lẹ̀ẹ̀làẹ?

³ Gbò log e Jíízọ̀s beè nè palàge valí gè dã́tẽ́ ló. Èé íè ge tú log e ẹlẹ beè nè noòmà gbò nen. Sõò, kà pọ̀b kà gá ea di ló á gá táí nyíe. Jíízọ̀s náa beè kọọ̀: ‘Noomaí va dénè lẹ̀ẹ̀là em beè nèi.’ Tãa vó, a beè kọọ̀: Noomaí va “kọ bà á gbàn tṍ ló dénè lẹ̀ẹ̀là e m beè nèi.” Kọbé è láá palàge tú nakà dùùlà bá deè tṍá siimá tóm tṍó e gé nóòmà Kpá Káí nen, àé dú bíi kọ é noòmà va vaá è zógè va sĩ́deè e bàé náámá. (Tóm 8:31) Éé ní ea náa à dú bíi kọ é naa vó é?

4. Éé ní ea tõó dọ̀ ge gbàn tṍ ló lẹ̀ẹ̀là ẹ? Nè nu dòòle ló.

⁴ Ge nè nu dòòle ló ea kil ló bé eé láá noòmà nuù nen kọ  á gbàn tṍ ló gbò log Kráìst naa, bugi togó boo nakà nu dòòmà báí. Mósĩ́ deè ní e nen ea gé nóòmà nen bé ea é teelá faà naa é nóòmàe gbò log ea gé lẹẹlà bel ló bé e nen é téélá faà boo èèlè naa ẽ́? Túá kà, àé zẹ́ẹ́ túe sẹlẹ́ kẽ kọ́ nèe gbò log ea lẹẹlà bel ló bé e nen é téélá faà boo èèlè naa. Sõò kọbé à láá noòmàe kọ á gbàn tṍ ló gbò logá, àé dú bíi kọ á naa nagé dõòna kà nu. Àé dú bíi kọ á faalá nen ea gé nó faàa kilma boo èèlè vaá noòmàe tṍó ea gé téélá faàa bé ea é tõó boo gbò log ea lẹẹlà bel ló bé e nen é téélá faà boo èèlè naa, belí bé ea beè zẹ́ẹ́ túe sẹlẹ́ kẽ dò bá nèe naaá. Éé ní eé láá nó lọl ló nakà nu dòòmà báí é?

5. (a) Dẹ̀ẹ̀a boo nú ea di mm̀ kpá Jọ́ọ̀n 14:15 nè 1 Jọ́ọ̀n 2:3, éé ní ea dú bíi kọ é noòmà gbò e ólò noòmà Kpá Káí kọ bàá naa ẽ́? (b) Nè gbò nu dòòmà bá ea kil ló sĩ́deè eé láá tulè gbò e ólò noòmà nu.

⁵ Tṍó e gé nóòmà Kpá Káí dõòna gbò, èé nóòmà nú e Bàrì bĩ́íná lọ̀líí bá. Sõò èé náa èlmà vó. Èé íè ge noòmà gbò e ólò noòmà Kpá Káí kọ bàá láá tú gbò nú e ni noòmà va siimá tóm mm̀ ba dùm buù dee. (Bugi Jọ́ọ̀n 14:15; 1 Jọ́ọ̀n 2:3.) Tení dú ló bẹẹ nu dòòmà bá, èé láá zogè gbò e ólò noòmà Kpá Káí bé e bàé tú gbò kà kà bel e bà gé nó lọl mm̀ Kpá Káí siimá tóm naa gbẹá tọọ̀ kpá, kè tóm, àbèè tṍó dè kpéè. Èé láá nootẽ́ nú ea beè naaá ló beele naamá gè zogèe bé e gè tú dùùlà bá deè tṍ ea di mm̀ Kpá Káí siimá tóm ólò kpènài lọl bá gẹẹ-gẹẹ ló àbèè ge nvèè bá nèi kọ é láá nè lé béèlàfùl naa. Èé láá bàn Jìhóvà gbẹá kè sĩ́ gbò e ólò noòmà Kpá Káí kọ á lelé va dee bá tení dú ló a nyómá káí.—Jọ́ọ̀n 16:13.

6. Éé ní ea bãàa mm̀ ge noòmà dõòna gbò kọ bàá gbàn tṍ ló gbò log Jíízọ̀s e?

⁶ Gbò éé ní ea bãàa mm̀ ge noòmà dõòna gbò kọ bàá gbàn tṍ ló gbò log Jíízọ̀s e? À dú bíi kọ é nvèè bá nè gbò e ólò noòmà Kpá Káí kọ bàá ié tàn ge naa kọ gbò nen á nyoone nvéè Kráìst. Àé láá siimà pọ̀ sìgà gbò e ólò noòmà Kpá Káí gè kọ́ kpẹ̀a. Vóà naa, à dú bíi kọ é ié ĩ̀ìmà boo tṍó e gé nveè bá nè va kọ bàá dã́tẽ́ ló Kpá Káí leevè kọbé ba zìgà kpáá aga ló. Tṍóá, àé gbóó tọá vá ló naa ní ea é tan va gè kọ́ kpẹ̀a. Éé ní eé láá naa mm̀ ge nvèèmà bá nè gbò e ólò noòmà Kpá Káí kọbé à tań va gè kọ́ kpẹ̀a ẹ́?

7. Mósĩ́ deè ní eé láá nvèèmà bá nè nen e ólò noòmà Kpá Káí kọ á ié tàn ge kọ́ kpẹ̀a ẹ́?

⁷ Èé láá bĩiná nen e ólò noòmà Kpá Káí gbò bíb ea kọ́ọ̀: “Mósĩ́ deè ní e gè tú gbò nú e Kpá Káí nóòmà siimá tóm ni nyááná ńlóò dùm naamá lé é? É kọ olo bulà kọọ̀ à dú bíi kọọ̀ dõòna gbò á dã́ lẹ̀ẹ̀la tómí? Éé ní e olo é láá naa mm̀ ge nvèèmà bá nè va ẹ́?” (Pró. 3:27; Máát. 9:37, 38) Tú gbò trákt ea dṹùnà Gbò Vídiò Nè Kpá E Ólò Noòmà Gbò Nen zogè nvín nò Kpá Káíá kọ á sà ní e ẹlẹ bulà kọ àé léémá pá a dúà ló, pá a kóò, àbèè gbò e bà ólò gbá siá tóm gè bugi. Tú buù kà trákt e nen eo ólò noòmà Kpá Káí sa nèe. Gbai tenií boo sĩ́deè bé ea é láá tú tráktí nè dõòna gbò mm̀ kyèèlè bá naa. Kọ̀láá bé ea dì naa, tṍó e ba ni íbá ló nen e ólò noòmà Kpá Káí lọ̀l naamá neǹ kọ̀ kpẹ̀a ea gáà dììa múú, àé léémái gè olòó zọ̀ẹ kọ́ kpẹ̀a kọbé è nveè bá nèe.—Ẹ̀klì. 4:9, 10; Lúùk 6:40.

8. Éé ní ea náa à dú bíi kọọ̀ gbò e ólò noòmà Kpá Káí á toní agẹbá vulè kilma ló Bàrì nè gbò nen ẽ́? (Ẹ̀b nàgé ńkpó ea kọ́ọ̀: “ Sĩ́deè Eé Láá Nvèèmà Bá Nè Gbò E Ólò Noòmà Kpá Káí Kọ Bàá Kpáá Palàge Vùlè Bàrì.”)

⁸ Sẹ̀ẹ̀a bùlà kọọ̀ Jíízọ̀s beè kọ́ nèi kọ é noòmà dõòna gbò kọ bàá “gbàn tṍ ló dénè lẹ̀ẹ̀là” ea beè neèi. Níá bãàa mm̀ bàà kà log ea palàge bọọ—ea dú gè vùlè Bàrì nè gbò  nen—pálàa kà bãàa mm̀ tóm gè kọ́ kpẹ̀a nè ge naa kọ gbò nen á nyoone nvéè Kráìst. (Máát. 22:37-39) Éé ní ea gbá va ẹ́? Vulè e íè kilma ló Bàrì nè dõòna gbò ní ea dú kà pọ̀b kà nú ea ólò naa kọ é sí tóm kọ̀ kpẹ̀aí é. Kilma ló sìgà gbò e ólò noòmà va Kpá Káí, ge kọ́ kpẹ̀a é láá siimà va pọ̀. Sõò èé láá naa kọọ̀ íb gbò e ólò noòmà Kpá Káí e bà dì naa vó á àgala boo kọọ̀ tení dú ló nvèè bá ea aa bá Jìhóvà, bàé láá bé èlbá gè siiá pọ̀ ló nen. (Ps. 18:1-3; Pró. 29:25) Ńkpó ea nyoone togó belí é baatẽ́ gbò láb tọ eé láá tù mm̀ ge nvèèmà bá nè nen e ólò noòmà Kpá Káí kọ á láá kpáá palàge vùlè Bàrì. Gba ló vó, éé ní e bõ̀ònatõ̀ò é láá naa mm̀ ge nvèèmà bá nè gbò e ólò noòmà Kpá Káí kọ bàá láá kpáá palàge vùlè Bàrì e?

9. Mm̀ nu dòòmà bá nen ea gé nó faàa, mókà gbò sĩ́deè ní ea nóómá gbò lé nu ea dọ bélè nèe ẽ́?

⁹ Kpáá bugi togó boo nu dòòmà bá nen ea gé nó faàa. Tṍó ea gé téélá faàa vaá nen ea gé nóòmàe dìé kpàn, mókà gbò sĩ́deè ní e nen ea gé nó faàa é nóómá nu ẽ́? Tení dú ló gè pãane tṍ ló nen ea gé nóòmàe vaá palàge ẹ̀b bá gbò e bà gé tú ọ̀ẹ̀ dẽe teemá faà boo èèlèa. Dì belí nu dòòmà bá, nen ea gé nóòmàe nuá é láá dò bá enè nen ea gé téélá faà ea gbọ́ọ̀lẹ̀ ló teelá vaá sọ̀tọ́ deè kọọ̀ dõòna nèn á teelá faà nveenìèé ke gbàà. Àbèè kọọ̀ àé láá dò bá dõòna nèn ea duulà bá lọl ló dẽè a sã́ faà kọbé dõòna gbò láá palàge mòn nu, vaá sièe kpóó ló kọọ̀ ẹlẹ á naa nagé naa vó. Íb gbò nu dòòmà báá, nóòmà nen ea gé nó faàa kọ ẹlẹ á láá naa nagé vó tṍó ea gé téélá faà.

10. Éé ní ea é nveè bá nè nen e ólò noòmà Kpá Káí kọ á sìm kilsĩ́ mm̀ ge fã̀ Bàrì e?

¹⁰ Mm̀ tẽ̀ènè sĩ́deèá, nen ea gé nó Kpá Káí vaá a dààmà togó gè fã̀ Jìhóvà é nó nu lọ̀l nàgé ló lé nu dòòmà bá dõòna kà gbò gyóòlo Jìhóvà, e bè níì áá nen ea ólò noòmàe Kpá Káí nì. Vóà naa, éé ní ea é láá palàge nvèè bá nè gbò e ólò noòmà Kpá Káí kọ bàá sìm kilsĩ́ mm̀ ge fã̀ Bàrì e? Ge olòó sí bẹẹ gbò nònù. Ló éé? Gbò nú e bà dã́ gbẹá nònù é nveè bá naa kọ ba nyìmànù á kpáá dọ ló, àé agẹlẹ ló ba zìgà, vaá nvèè bá nè va kọ bàá kpáá palàge vùlè Bàrì. (Tóm 15:30-32) Nagé gbẹá nònù, nen ea ólò noòmàe Kpá Káí é láá dòe bá nè pá vígà e bàé láá leeá bá. Nen e ólò noòmàe Kpá Káíá é mon pá vígà e bà zógè lé-lé nu dòòmà bá ea kil ló gè vùlè ené mm̀ bõ̀ònatõ̀ò?

11. Mókà gbò nu dòòmà bá ní e nvín nò Kpá Káí é láá mon mm̀ bõ̀ònatõ̀ò ẽ, vaá níí é láá tọá vá ló naa vàẹ?

¹¹ Bugi togó boo na gbò nu dòòmà báí. Ene kà nen ea ólò nó Kpá Káí e áá ẹ̀ẹ̀ gé búmá nvín mon dõòna kà vígà pábia ea dì nàgé mm̀ íb dìtõ̀òá. À tọ́á ló nvín nò Kpá Káíá ge mòn bé e vígà pábiaá gé piigà ge olòó faalá pá a nvín e bà di dí pá nvín domá Kíndòm Họ́ọ̀l naa. Ene kà nen ea gé nó Kpá Káí ea gé palàge pììga boo gè aa ló gè ṍ sĩi zọ dõòna kà vígà págbálà ea beè palàge pììgà nàgé naa vó besĩ́ à kalá láá aa ló gè ṍ sĩi nyòònà. Vígàa kọ́ nè nen ea gé nó Kpá Káíá bé e ńlẹ́ẹ̀ vulè kilma ló Jìhóvà beè naa kọ á láá gbanìè tṍ ló gbò a log naa. (2 Kọ́r. 7:1; Fíl. 4:13) Tṍó e vígàa ni kọ́ nè nen ea gé nó Kpá Káíá bé e ẹlẹ beè naa láá aalìè ló gè ṍ sĩi lọ̀l, à gbóó kọọ̀: “Olo é láá àà nàgé ló gè ṍ sĩi.” Níí síè kpóó ló nvín nò Kpá Káíá naa ní ea zigà kọ ẹlẹ é láá aanàè gé ló. Ene kà nvín pá nyáá ea gé nó Kpá Káí mon ene kà nvín ãa vígà pábia ea gé dé kpéè ló a dùm belí nen ea gé fã Bàrì vaá nè lóó gè nvèè bá nè dõòna gbò. Tṍó e nen ea gé nó Kpá Káíá mon bé e nyíè vígà pábiaá ẹ́ẹ naa, a beè naa kọọ̀ ẹlẹ á gbĩ́ gè nyimá ló nú ea ẹ́ẹ̀lẹ̀ẹ nyíe.

12. Éé ní ea náa è kọọ̀ buù nen ea di mm̀ bõ̀ònatõ̀ò íe nú ea é láá naa mm̀ ge nvèèmà bá nè gbò e ólò noòmà Kpá Káí é?

 ¹² Tṍó e gbò e ólò noòmà Kpá Káí nyímá ló gbò vígà e bà bọ́ló dẹ̀lẹ̀ nyíé boo, bà ólò gbóó nó gè gbàn tṍ ló log Kráìst ea kọ bàá vùlè Bàrì nè nen lọl ló ba lé nu dòòmà bá. (Jọ́ọ̀n 13:35; 1 Tím. 4:12) Bọọ èlmà tõ̀ò, dì belí bé e beè zẹ́ẹ́ kọ́ naaá, nvín nò Kpá Káí é láá nó nu lọl ló pá vígà e ba beè kpee sĩ́ ló tã̀àgã̀ ea belí nágé íb ńlẹ. Nen ea gé nó Kpá Káí ólò nó nu lọl ló íb gbò nu dòòmà báá kọbé à láá nyaaná bá ló sìgà nu mm̀ a dùm naa ní ea é láá nyoone nvéè Kráìst. (Dìt. 30:11) Buù nen ea di mm̀ bõ̀ònatõ̀ò é láá nvèè bá mm̀ kele-kele sĩ́deè ge naa kọọ̀ gbò e ólò noòmà Kpá Káí á sìm kilsĩ́ mm̀ ge fã̀ Bàrì. (Máát. 5:16) Mókà pììgà ní e olo ni náa mm̀ ge siè kpóó ló gbò e bà gé nó Kpá Káí e bà dú nònù ẽ?

13-14. Móbá ní e Jíízọ̀s beè sẹ̀ẹ̀mà pá a gbò tóm tṍó e lóó va beè ọọ ẹ́?

¹³ È gbĩ́ì ge nvèè bá nè pá vígà e bà náa ólò kọ ná kpẹ̀a kọ bàá kpáá dààmà togó gè sí tóm e Kráìst beè nèiá. Bá e Jíízọ̀s beè sẹ̀ẹ̀mà pá a gbò tóm e lóó va beè ọọ zógè nú e beele é láá naá deè nieí.

¹⁴ Tṍó e sìtóm Jíízọ̀s boo kunukẽ̀í ni íná kùbmà vaá bàé gé fẹ́ẹ, dénè gbò e bà ólò nyoonée nvée beè “teá ààe ló.” (Máàk 14:50; Jọ́ọ̀n 16:32) Éé ní e Jíízọ̀s beè naa tṍó e lóó pá a gbò nyòòne nvée ọọ ẹ́? Pọ́ì ńkem̀ tṍó aa ló tṍó ea kẽeà aa kemà ú, Jíízọ̀s beè kọ́ nè sìgà gbò e bà ólò nyoonée nvée kọọ̀: “Pọ̀ á gá siíi. Aalii gé kọi nei gbò e a dṹùnàm̄á [kọọ̀ m kẽeà].” (Máát. 28:10a) Jíízọ̀s náa beè sã̀ànà bá ló pá a gbò nyòòne nvée gbẹẹ́ kẽ. Bã̀àna tṍó e dénè ọ̀và beè teá ààẹ́ ló, a beè kpáá kolí nágé va kolíe “gbò e a dṹùnàm̄á.” Dì belí Jìhóvà, Jíízọ̀s beè ié sàn nyíe vaá olòó ia ló pọ́lọ́.—2 Kíǹg 13:23.

15. Gbò e bà náa ólò kọ ná kpẹ̀a ólò tọáí ló naa vàẹ?

¹⁵ Mm̀ tẽ̀enè sĩ́deèá, beele é láá palàge tú lé bá sẹ̀ẹ̀mà gbò e bà náa ólò kọ ná kpẹ̀a. Bà dú pá bẹẹ vígà págbálà nè pábia, vaá è vulè va! È ólò kẽ̀èa boo dénè agẹ tóm e gbò vígàí beè sí nè Jìhóvà. Sìgà ọ̀và beè tú gã́bug gbáá siimá tóm nè Jìhóvà. (Híb. 6:10) À palàge tànii kọ bàá kpáá gbaái dẽe! (Lúùk 15:4-7) Mm̀ ge nó Jíízọ̀s, mókà gbò sĩ́deè ní eé láá zogè kọọ̀ è gé bulà nú ea kil vá ló é?

16. Mósĩ́ deè ní eé láá zogè bẹẹ tọa ló kilma ló pá vígà págbálà nè pábia e bà náa ólò kọ ná kpẹ̀a ẹ́?

¹⁶ Tú lé bá kolmá va domá nònù. Enè sĩ́deè e Jíízọ̀s beè siè kpóó ló pá a gbò nyòòne nvée e lóó va ọọ beè dú gè kolí va bõonè. (Máát. 28:10b; 1 Kọ́r. 15:6) Tẽ̀ènè áá báá deè nieí, èé láá siè kpóó ló gbò e bà náa ólò kọ ná kpẹ̀a tení dú ló gè kolí va domá nònù be bà náa ólò duná nònù. È nyímà kọọ̀ àé dú bíi gè kolí va gã́bug tṍó besĩ́ bà kálá dù. A beè palàge zaavẹ ló Jíízọ̀s tṍó e pá a gbò nyòòne nvée dã́ a kọ́l vaá dù.—Doolé ló Máátìù 28:16 nè Lúùk 15:6.

17. Èé lábví láb naa vàẹ tṍó e neǹ vígà e náa beè olòó siná ól tóm kọ̀ kpẹ̀a dú nònù ẽ?

¹⁷ Palàge zààvà vá ló. Jíízọ̀s beè palàge zààva ló gbò e bà ólò nyoonée nvée tṍó ea mon va; túá ẹlẹ ní ea beè bã̀ vá ló vaá ló bel nè va ẹ́. (Máát. 28:18) Èé lábví láb naa vàẹ tṍó e nen e bè náa ólò siná ól tóm kọ̀ kpẹ̀a àbèè nònù dú Kíndòm Họ́ọ̀l ẹ? Beele é gya sĩ́ tú bàà bá tuumá va. Túá tṍó, èé láá ié tã̀àgã̀ bùlà kọọ̀ née nyímà nú eé kọ́. Sõò kọbé kẹ́ẹ náa sííe, èé láá kọ́ nèe kọọ̀ nyíéi ẹ́ẹ ló gè mònie.

18. Mósĩ́ deè ní eé láá siè kpóó ló gbò e bà náa ólò kọ ná kpẹ̀a ẹ́?

 ¹⁸ Palàge siè va kpóó ló. Lóó gbò nyòòne nvéè Jíízọ̀s beè láá iè ge ọọ tṍó ea kọ́ nè va kọ bàá kọ́ kpẹ̀a imá kọ̀láá ketõ̀ò ea di bàlà booí. Jíízọ̀s beè siè kpóó ló pá a gbò nyòòne nvée tení dú ló gè kọọ̀: “Nda é díí ló lee.” (Máát. 28:20) É kọọ̀ níá beè nvèè bá nè pá a gbò nyòòne nvéé? Ẽei. Pọ́ì ńkem̀ tṍó aa ló tṍóá, ba beè dì e bà géè “olòó nóòmà nu nè ge ló Lé Kpẹaí.” (Tóm 5:42) Gbò e lóó va ọọ ló gè kọ́ kpẹ̀a íe nagé bíi ló sìà kpóó ló. Pọ̀ é láá sií va tṍó e bà bugi togó boo bé bàé láá kpáá dààmà togó gè kọ́ kpẹ̀a naa. Èé láá siè va kpóó ló kọọ̀ áá ọ̀và náa é sí gé kọ́ kpẹ̀a. Tṍó e bà di kpènà ló, èé láá zọ̀ va sì gé kọ́ kpẹ̀a. Nyíé va é ẹ́ẹ kọ è nveè bá nè va tṍó e bà kpáá dààmà togó gè kọ́ kpẹ̀aí. Tṍó e ẹbvì gbò e bà náa ólò kọ ná kpẹ̀a naamá bẹẹ vígà págbálà nè pábia, lóó va é gbóó kpáá àgà vaá àé náa kọ bõ̀ònatõ̀ò á ié zààvà.

19. Éé ní ea dú bẹẹ tàn ẽ, vaá ló éé?

¹⁹ Mó tṍó ní eé kilsĩ́ gè kọ́ kpẹ̀a vaá naa kọ gbò nen á nyoone nvéè Kráìst tẹlẹ̀ ẹ? Èé kọ́ẹ dọ̀ kùbmà nvéè bàlà booí. (Máát. 28:20; ẹ̀b Glossary, “Conclusion of the system of things.”) É kọọ̀ èé láá sí tóm gè kọ́ kpẹ̀a nè ge naa kọ gbò nen á nyoone nvéè Kráìst dọ̀ọ̀mà tṍóá? È béèlàfùl ge naa vó! È túù ẹ́ẹ́-ẹẹ̀ nyíe nèèmà bẹẹ tṍó, bẹẹ kói, nè bẹẹ ìènù mm̀ ge gbĩimá “gbò e Bàrì beè sà kọ bà é ié dùm e bè naa tá.” (Tóm 13:48) Tṍó e náa vó, è nóò nu dòòmà bá Jíízọ̀s. Ẹlẹ beè kọọ̀: “Nà gyã́á kọlà ge naa bùlà nen e a beè lẹ̀ẹ̀làm̄, nè ge sí tóm e a beè nèm̄ lọ̀l dẽe.” (Jọ́ọ̀n 4:34; 17:4) Níà nú ea tan beele gè naa ẽ́. È gbĩ́ì ge sí tóm e ba beè nvèèí bá lọl dẽe. (Jọ́ọ̀n 20:21) Vaá beele gbĩ́ì kọọ̀ dõona gbò, bií ló gbò e bà náa ólò kọná kpẹ̀a á gbaáí dẽe sí tómí.—Máát. 24:13.

20. Dẹ̀ẹ̀a boo nú ea di mm̀ kpá Fílipaì 4:13, éé ní ea é náa kọ é láá sí tóm e Jíízọ̀s beè nèi lọl dẽe ẽ́?

²⁰ Mm̀ kà kà, náa bọọgẹ̀ valí gè sí tóm e Jíízọ̀s beè lẹ̀ẹ̀làií. Sõò, níì áá bẹ̀ì ní e gé sí tómíé nì. Jíízọ̀s beè zìgà nèi kọọ̀ ẹlẹ é dièí ló. Tṍó e gé náa kọ gbò nen á nyoone nvéè Kráìst è “gé gbá sí tóm nè Bàrì” vaá è “gé sí tóm nè Kráìst.” (1 Kọ́r. 3:9; 2 Kọ́r. 2:17) Vóà naa, èé láá sí bẹẹ tóm lọl dẽe. Ẹ̀b bé ea dú kà lé nèà deè nè nu zààvà ge sí tómí vaá nvèè bá nè dõòna gbò kọ bàá si nágé naaà!—Bugi Fílipaì 4:13.