1. Saashin Mateo 28:18-20, ¿kasa nuluwataaka anain Jesuu na nikirajüinkana?

SÜCHIKIJEE nüsoʼireʼennüin aaʼin Jesuu, eeʼiyalaashi nia namüin na nikirajüinkana wanaa sümaa chajanain naya jutkatüin Galilea. Nüküjeein namüin waneirua kasa. Aküjünüsü süchiki tia suluʼu Mateo 28:18-20 (paashajeʼera).

2. ¿Kasa wekirajaainjatka anain sünain ekirajaayakat tüü?

² Waaʼinrajatiaʼaya maaʼulu yaa tü nuluwataakalü anain Jesuu na nikirajüinkana. Wekirajaajeerü anain apünüinsü kasa wanaapünaaka sümaa tü nuluwataakalü anain waya Jesuu. Tü palajatkat shia nnojoliinjanain wekirajüin neʼe na wekirajüinkana sünain tü nuluwataakalü anain Maleiwa, eesü waneirua kasa waaʼinrajatka. Tü wane shia tü waaʼinrajatkat wapüshuaʼa süpüla sükooʼomüinraain nunoula wanee wayuu ekirajaakai sünain tü Wiwüliakat. Tü chiiruaajatkat shia tü waaʼinrajatkat süpüla nekirajüin wayuu nachikuaʼa na wawalayuu kakaliainnakana ooʼulaain suulia aküjaa pütchi.

3. ¿Kasa waaʼinrajatka süpüla wekirajüin wayuu maʼaka nuluwataain shia Jesuu?

³ Pansaasü maʼin tü nuluwataakalü anain Jesuu. Wekirajüinjana na wayuukana sünain tü kasa nuluwataakalü anain. Jülüjeesü waaʼin nnojolin nümüin neʼe Jesuu mayaa: «Jikirajeena naya sünain tü taluwataapüʼükat anain jia». Anuupejeʼe nünüiki Jesuu: «Jikirajeena naya sünain tü taluwataapüʼükat anain jia süpüla noonooinjatüin sümaa». Süpüla waaʼinrüin tü nümakat Jesuu, nnojotsü  neʼe waküjainjatüin namüin na wekirajüinkana tü naaʼinrajatkat, wekirajüinjana naya sünain jamüinjatüin sukuwaʼipa natuma (Aluw. 8:31). ¿Jamüsü waaʼinrajatka tia?

4. Püküja wanee sukuwaʼipa süpüla wayaawatüin saaʼu tü waaʼinrajatkat wekirajapa wanee wayuu sünain oonowaa sümaa tü nuluwataakalü anain Jesuu.

⁴ Jülüja waaʼin tü naaʼinrakat wanee wayuu ekirajakai wanee wayuu sünain oʼuniraa kemion, wayaawateerü sünainjee tia tü waaʼinrajatkat wekirajüinjachipa wanee wayuu süpüla noonooin sümaa tü nuluwataakalü anain Jesuu. Jamüshijaʼa chia wayuukai nnojotsü nüküjain neʼe nümüin chi nikirajüinkai jamüinjatüin suʼuniria kemion nutuma, oʼunushi nia nümaa suluʼu tü kemionkat süpüla nikirajüinjachin nia sünain jamüinjatüin suʼuniria nutuma otta süpüla naaʼinrajatüin tü kasa nikirajakalü anain nia. ¿Kasa watüjaka sünainjee tia?

5. (1) ¿Kasa wekirajüinjanaka anain na wekirajüinkana saashin Juan 14:15 otta 1 Juan 2:3? (2) ¿Kasa eeka süpüla waaʼinrüin wakaalinjainjanapa na wekirajüinkana süpüla naaʼinrüin tü nekirajaakalü anain?

⁵ Wekirajüle wayuu sünain tü Wiwüliakat, wekirajüin naya sünain tü nakuwaʼipainjatkat noʼuluʼu Maleiwa. Wekirajüinjanapejeʼe naya süpüla naaʼinrüin waneepia tü kasa nekirajaakalü anain (paashajeʼera Juan 14:15; 1 Juan 2:3). Eeshii süpüla wakaalinjain naya süpüla naaʼinrüin tü kasa nekirajaakalü anain chapa naya koleejialuʼu, naʼyataaleruʼu jee naneekajatpa tü nanajüinjatkat, tü nashaitüinjatkat jee tü naapajüinjatkat. Eesü süpüla waküjain namüin tü kasa anasü weʼrakat sünainjee waaʼinrüin tü sümakat tü Wiwüliakat otta eesü süpüla waküjain namüin sükaalinjain waya tü sümakat tü Wiwüliakat süpüla anain tü kasa waneekakat. Woʼuraaja nümüin Jeʼwaa namaa na wekirajüinkana süpüla nuʼunirüin nakuwaʼipa nükajee chi naaʼinkai (Juan 16:13).

6. ¿Kasa maa waaʼinrajatka süpüla noonooinjanain na waneinnua sümaa tü nuluwataakalü anain Jesuu?

⁶ ¿Kasa maa waaʼinrajatka süpüla noonooin na waneinnua sümaa tü nuluwataakalü anain Jesuu? Wakaalinjainjana na wekirajüinkana süpüla keeʼireeinjatüin naaʼin nekirajüin wayuu sünain tü sümakat tü Wiwüliakat. Eeshii na wayuu ekirajaakana sünain tü Wiwüliakat mmoluwaakana aaʼin seema aküjaa pütchi. Nnojoliinjana ashapajaain waya wekirajapa naya, wekirajüinjana naya süpüla sükooʼomüinraain nanoula. Müle tia, sütanaleerü naaʼin otta keeʼireejeerü naaʼin naküjain pütchi namüin na waneinnua. ¿Kasa waaʼinrajatka süpüla wakaalinjain na wekirajüinkana süpüla naküjeein süchiki tü pütchi anasükat namüin na waneinnua?

7. ¿Kasa waaʼinrajatka süpüla keeʼireein naaʼin na wekirajüinkana naküjain süchiki tü pütchi anasükat?

⁷ Eeshii süpüla wasakirüin na wekirajüinkana sünain pütchikat tüü: «¿Kasa anasü piʼraka sünainjee paaʼinrüin tü sümakat tü Wiwüliakat? ¿Choʼujaasüche saaʼin pümüin naapüin na waneinnua süchiki tia pütchikat? ¿Kasa paaʼinrajatka süpüla püküjain shia namüin?» (Prov. 3:27; Mat. 9:37, 38). Weeʼiyata namüin na wekirajüinkana tü karaloʼutachein süpüshikat tü wekirajüinjatkalü aka wayuu otta wooʼulaa naneeküin tü naapajatkat namüin na napüshikana, na naʼaleewainyuukana jee na naʼyataajiraakana amaa. Waapa namüin süpüshi tia karaloʼutakat. Waküja namüin tü naaʼinrajatkat süpüla kamaneeinjanain naya naapajatpa tia karaloʼutakat. Naneekünapa süpüla naküjainjanain pütchi sümaa nnojoliin woutiisain naya, wojuʼita namaa sünain aküjaa pütchi otta waküja namüin tü sukuwaʼipainjatkat natuma (Ecl. 4:9, 10; Luc. 6:40).

8. ¿Jamüshi alinjachika Maleiwa otta na waneinnua napüla na wekirajüinkana? (Paashajeʼera tü pütchikat « Waaʼinrajatka süpüla alin Jeʼwaa napüla na wekirajüinkana»).

⁸ Nikirajüin waya Jesuu süpüla wekirajüin na waneinnua sünain tü nuluwataapuʼukalü anain. Piamasü maʼin tü pütchi alanaʼaleekat saʼakajee  tia maʼaka saaʼin alinjachin Maleiwa wapüla otta alinjanain na waneinnua wapüla (Mat. 22:37-39). Wakaalinjale na wekirajüinkana süpüla noonooinjanain sümaa tia pütchikat, wakaalinjainya naya süpüla naküjain pütchi, süka jamüin, aire Jeʼwaa napüla jee na waneinnua nachekeerü achiki naküjain pütchi (Sal. 18:1-3; Prov. 29:25). Sünain tü pütchikat «Waaʼinrajatka süpüla alin Jeʼwaa napüla na wekirajüinkana», aküjüneerü wamüin tü waaʼinrajatkat süpüla sükooʼomüinraain naalin Jeʼwaa napüla na wekirajüinkana. ¿Kasa naaʼinrajatka na wawalayuukana süpüla aipüraliinjanain na wekirajüinkana?

9. ¿Kasa naaʼinrajatka wanee wayuu süpüla nütüjain oʼuniraa kemion?

⁹ Jülüja waaʼin süchikuaʼa tü aküjünakat nüchiki chi wayuu ekirajaakai sünain oʼuniraa kemion. Nuʼunirapa kemion, yalashi joo naʼatoʼu chi ekirajakai nia. ¿Jamüshiche nütüjeechika chia wayuukai? Atüjeechi nia sünainjee tü nümakat chi ekirajakai nia otta sünainjee niʼrüin na atüjakana oʼuniraa kemion. Eesüjaʼa shiiʼiyatünüle nümüin nutuma chi ekirajakai nia tü naaʼinrakat wanee wayuu ooʼulaakai sülatüin kemion otta wanee wayuu amotsolokoi soʼu neʼejena süpüla anashiinjatüin eʼraa namüin na waneinnua. «Müinjatia sukuwaʼipa putuma», eeshijaʼa nümünüle amüin nutuma chi ekirajakai nia. Sünainjee süpüshuaʼa tü aküjünakat nümüin, niyaawatüitpaja saaʼu tü naaʼinrajatkat nuʼunirapeena joo kemion.

10. ¿Kasa akaalinjeenaka na wekirajüinkana süpüla sükooʼomüinraain maʼin nanoula?

¹⁰ Akaataajaʼa neʼe nakuwaʼipa na wekirajüinkana noʼttapa sünain aʼyatawaa nümüin Jeʼwaa, nnojoishii neʼe naya atüjain wanainjee, atüjashii naya sünainjee neʼrüin anain nakuwaʼipa na wawalayuukana. ¿Kasache akaalinjeenaka na wekirajüinkana süpüla sükooʼomüinraain nanoula? Noʼunule sünain tü outkajawaakat. Tü naapajakat sünain tü outkajawaakat sükaalinjeena naya süpüla nayaawatüinjatüin saaʼu tü sümakat tü Wiwüliakat, sükatchinraain nanoula otta sükooʼomüinraain naalin Maleiwa napüla (Aluw. 15:30-32). Eʼraajiraajeena naya namaa na wawalayuu alatakana amüin tü alatakat namüin. ¿Kasache natüjeetka na wekirajüinkana sünainjee neʼrüin aijiraain na wawalayuukana? Wekirajaajeerü süchiki tia.

11. (1) ¿Kasa eeka süpüla neʼrüin na wekirajüinkana sünain nakuwaʼipa na wawalayuukana? (2) ¿Kasa eeka süpüla naaʼinrüin sünainjee tia?

¹¹ Jamüsüjaʼa eere wanee wekirajüin epijaka süchon sümüiwaʼa jee shiʼrüle wanee wawala maka akuwaʼipa, atanatsü saaʼin sutuma shiʼrüin tü kasa saaʼinrakat tü wawalakat süpüla süntajatüin sünain tü outkajawaakat namaa süchonnii. Jamüshijaʼa eere wanee wekirajüin kakaliaichika ooʼulaweein suulia akamüjaa jee niʼraajiraale nümaa wanee wawala mapuʼukai akuwaʼipa, nüküjeerü chi wawalakai nümüin nuuʼulaain suulia akamüjaa süka alin maʼin Jeʼwaa nüpüla (2 Cor. 7:1; Filip. 4:13, TNM). «Puunteerü puuʼulaain suulia akamüjaa», meechi chi wawalakai nümüin. Naapapa chi wekirajüinkai süchiki süpüshuaʼa tü naaʼinrakat chi wawalakai süpüla nuuʼulaainjachin suulia akamüjaa, atütülaajeerü naaʼin otta niyaawateerü saaʼu eeinya süpüla nuuʼulaain suulia akamüjaa. Wanee majayüt ekirajaaka sünain tü Wiwüliakat, shiʼrüin talatüin saaʼin wanee wawala majayüt. Sutuma tia, sütüjawee aaʼu tü wayuukot jamüin talataka saaʼin waneepia tü wawalakat.

12. ¿Kasa waaʼinrajatka waneʼewai wakua süpüla wakaalinjain na wayuu ekirajaakana sünain tü Wiwüliakat?

¹² Neʼraajapa na wekirajüinkana waneinnua wawalayuu waneepiakana sünain aʼyatawaa nümüin Jeʼwaa, nayaawateerü saaʼu tü naaʼinrajatkat süpüla noonooin sümaa tü nuluwataakalü anain Jesuu süchiki alinjachin Maleiwa wapüla otta na waneinnua (Juan 13:35; 1 Tim. 4:12). Atüjeena na wekirajüinkana nanainjee na wawalayuu alatakana amüin tü kasa alatakat namüin. Nayaawateerü saaʼu eein süpüla nountuin  noushikajaain süchiirua nukuwaʼipa Kürisüto (Deut. 30:11). Akaalinjashii waya waneʼewai wakua süpüla sükooʼomüinraainjatüin nanoula na wayuu ekirajaakana sünain tü Wiwüliakat (Mat. 5:16). ¿Wakaalinjainche na wayuu ekirajaakana sünain tü Wiwüliakat, na antawaikana sünain tü outkajawaakat?

13, 14. ¿Kasa naaʼinraka Jesuu napüleerua na nikirajüinkana wanaa sümaa sümatchinjaapünaain nanoula?

¹³ Wacheka achikit wakaalinjain na wawalayuu ooʼulaakana suulia aküjaa pütchi. Wakaalinjeein naya süpüla naküjain pütchi nachikuaʼa otta nekirajüin wayuu. Wayaawata aaʼu tü waaʼinrajatkat napüleerua sünainjee tü naaʼinrakat Jesuu napüleerua na nikirajüinkana wanaa sümaa sümatchinjaapünaain nanoula.

¹⁴ Süpülapünaa outuin Jesuu, aʼluwataashii na nikirajüinkana otta napütüin nia nümüiwaʼa (Mar. 14:50; Juan 16:32). ¿Kasa naaʼinraka Jesuu napüleerua na nikirajüinkana wanaa sümaa sümatchinjaapünaain nanoula? Anuu tü nüküjakat Jesuu namüin waneinnua nikirajüin süchikijee süsoʼiraain naaʼin: «Nnojo mmolüin jia. Shia anaka aluʼu müleka juʼunüle nanainmüin na tawalayuukana jaapiraiwa naya süchiki [tasoʼireʼennüin aaʼin]» (Mat. 28:101). Nnojoishii niyüülajüin Jesuu na nikirajüinkana mayaainjeʼe napütüin nia. «Tawalayuu», müshi nia namüin. Nüshatüin Jesuu nukuwaʼipa Jeʼwaa, amülialaasü naaʼin naalin na nikirajüinkana otta motusü naaʼin tü kasa mojusü naainjakat (2 Rey. 13:23).

15. ¿Jamüinjatü waaʼin naalin na wawalayuu kakaliainnakana ooʼulaain suulia aküjaa pütchi?

¹⁵ Müinjatia sukuwaʼipa watuma, kapülainjatü waaʼin nakuwaʼipa na wawalayuu kakaliainnakana ooʼulaain suulia aküjaa pütchi. Ayatayüliʼiya wawalayuuin naya, aishii maʼin naya wapüla, sotoyülia waaʼin süpüshuaʼa tü naaʼinrakat sünain aʼyatawaa nümüin Jeʼwaa. Noʼutku naya wawalayuukana aʼyataapuʼushii maʼin naya nümüin Jeʼwaa soʼunnaa wainma juya (Heb. 6:10). Wasukajüin maʼin naya (Luc. 15:4-7). ¿Kasa waaʼinrajatka süpüla kapülain waaʼin nakuwaʼipa maʼaka naaʼinrüin shia Jesuu napüleerua na nikirajüinkana?

16. ¿Kasa waaʼinrajatka kapürale waaʼin nakuwaʼipa na wawalayuu ooʼulaakana suulia aküjaa pütchi?

¹⁶ Wounejaa naya sümaa kamaneein waya namüin. Wanee kasa naaʼinraka Jesuu süpüla nütütüleʼerüin naaʼin na aluwataaushikana wanaa sümaa sümatchinjaapünaain nanoula shia nuunejaain naya sünain wanee outkajawaa (Mat. 28:102; 1 Cor. 15:6). Akaataajaʼa neʼe maaʼulu, eeshii süpüla watütüleʼerüin naaʼin na wawalayuu ooʼulaakana suulia aküjaa pütchi wounejaale naya sünain tü outkajawaakat. Wayaawata aaʼu wounejaainjanain naya kojuyatua süpüla nantajanain sünain tü outkajawaakat. Talatakajasaʼa maʼin naaʼin Jesuu wanaa sümaa nantüin na nikirajüinkana sünain tü outkajawaa nuunejaakalü anain naya (anasü paashajeʼerüle Mateo 28:16 otta Lucas 15:6).

17. ¿Kasa waaʼinrajatka nüntüle weʼrüin sünain tü outkajawaakat wanee wawala kakaliaichikai ooʼulaain suulia aküjaa pütchi?

¹⁷ Talata waaʼin namaa nantapa sünain tü outkajawaakat. Anasü naaʼin na nikirajüinkana Jesuu nutuma wanaa sümaa nantiraain nümaa otta aashajaashi nia namaa (Mat. 28:18). ¿Kaseerü waaʼinraka nüntüle weʼrüin sünain tü outkajawaakat wanee wawala kakaliaichika ooʼulaain suulia aküjaa pütchi? Kamaneeinjana waya nümüin. Eesüjaʼa nnojorüle watüjaain saaʼu tü wanüikinjatkat nümüin, eesü süpüla waküjain nümüin talatüin waaʼin sutuma weʼrüin nia nüchikuaʼa, nnojoipejeʼe eʼrüinjachin nia japülii watuma.

18. ¿Kasa waaʼinrajatka süpüla watütüleʼerüin naaʼin na wawalayuu ooʼulaakana suulia aküjaa pütchi?

¹⁸ Watütüleʼera naaʼin. Eesüjaʼa shapaale maʼin naaʼin na nikirajüinkana Jesuu saaʼu nounteerüle naküjain pütchi sainküin mmakat süpüshuaʼa. Anuupejeʼe tü nümakat Jesuu namüin süpüla nütütüleʼerüin naaʼin: «Shiimüin sünain jümaainjachin  taya waneepia» (Mat. 28:20). ¿Sütanalüinche naaʼin na nikirajüinkana Jesuu tü nümakat? Aa, sütanalüin naaʼin, müshiijeseʼe ayatüin naya waneepia sünain ekirajaa otta aküjaa pütchi (Aluw. 5:42). Müinjatia tü waaʼinrakat napüleerua na wawalayuu ooʼulaakana suulia aküjaa pütchi, watütüleʼerüinjatü naaʼin. Eesüjaʼa shapaale naaʼin saaʼu naküjainjanain pütchi nachikuaʼa. Waküja namüin nnojolin namüiwaʼain naya. Yapapa naya süpüla aküjaa pütchi, wojuʼita namaa. Talateerü maʼin naaʼin sutuma neʼrüin wakaalinjain naya süpüla naküjainjanain pütchi nachikuaʼa. Nayaawatapa saaʼu ayatüinya wawalayuuin naya, keeʼireejeerü naaʼin naküjain pütchi nachikuaʼa otta talateerü naaʼin napüshuaʼa na wawalayuukana.

19. (1) ¿Kasa wachekaka achiki? (2) ¿Jamüsü wachekaka süchiki tia?

¹⁹ ¿Joujainjanache waya ooʼulaain suulia ekirajaa wayuu? Sajaʼttaleepa kasakat süpüshuaʼa (Mat. 28:20). ¿Wekeraajeetche tü waʼyataainkat? Shiaʼaya waaʼinreeka amüin tia, müshiijeseʼe wachajaain nachiki na wayuu «kapülakana aaʼin nünüiki Maleiwa süpüla eeinjanain naya waneepia» jaʼitashii kakaliain waya sünain aaʼinraa tia, mapüsain waya otta wakataajüin wanneetse sünain (Aluw. 13:48, TNM). Waaʼinrüle tia, washatüin nukuwaʼipa Jesuu. Anuu tü nümakat: «Maa aka wane wayuu eekai talatüin naaʼin emirapa, akaajaa tayakai talateerü maʼin taaʼin müleka taaʼinrüle tü ajütünakat apüla taya nutuma Maleiwa, süka keeʼireein maʼin taaʼin tekeraajeein tü nüchekakat tapüleerua» (Juan 4:34; 17:4). Shiaʼaya wachekaka achiki tia, keeʼireesü waaʼin wekeraajüin tü aʼyatawaa aapünakat wamüin (Juan 20:21). Keeʼireesü waaʼin nekeraajüin shia na waneinnua jaʼitakajeʼe na wawalayuu ooʼulaakana suulia aküjaa pütchi (Mat. 24:13).

20. Sünainjee tü sümakat Filipos 4:13, ¿jamüsü watüjaaka saaʼu wekeraajeerüin tü aʼyatawaa naapakat Jesuu wamüin?

²⁰ Nnojotsü mapüleein ekeraajaa tü nuluwataakalü anain Jesuu. Nnojoliipejeʼe waya wamüiwaʼain sünain aaʼinraa tia aʼyatawaakat. Nüküjain Jesuu eejeechin nia wamaa waneepia. Wekirajüle wayuu süpüla suushikajaainjatüin süchiirua nukuwaʼipa Jesuu, aʼyataajiraashii waya nümaa Jeʼwaa otta nümaa Jesuu (1 Cor. 3:8, 9; 2 Cor. 2:17). Müshiijeseʼe nakaalinjeenain waya süpüla wekeraajüin tia aʼyatawaakat. Anakuwaʼipalii maʼin waya süka waʼyataain sünain tia aʼyatawaakat otta süka wakaalinjain na waneinnua süpüla nekeraajüin shia (paashajeʼera Filipos 4:13, TNM).