TULUN-AN NGA ARTIKULO 45
Kon Paano Naton Mabuligan ang Iban nga Tumanon ang mga Ginsugo sang Cristo
“Kadtui ninyo ang mga tawo . . . kag tudlui ninyo sila agod mangin disipulo ko. . . . Tudlui ninyo sila nga tumanon ang tanan nga ginsugo ko sa inyo.”—MAT. 28:19, 20.
AMBAHANON 89 Magpamati, Magtuman, kag Pakamaayuhon Ka
ANG BINAGBINAGON SA SINI NGA ARTIKULO *
1. Suno sa Mateo 28:18-20, ano ang ginsugo ni Jesus sa iya mga disipulo?
PAGKATAPOS ginbanhaw si Jesus, nagpakita sia sa iya mga disipulo nga nagtipon sa Galilea. Importante gid ang iya ginhambal sa ila. Mabasa naton ini sa Mateo 28:18-20.—Basaha.
2. Ano nga mga pamangkot ang binagbinagon naton?
2 Dapat man tumanon sang tanan nga alagad sang Dios subong ang sugo ni Jesus nga tudluan ang mga tawo para mangin disipulo niya sila. Gani binagbinagon naton ang tatlo ka pamangkot parte sa asaynment nga ginhatag ni Jesus sa aton. Una, magluwas nga dapat naton tudluan ang bag-o nga mga disipulo parte sa mga ginapatuman sang Dios, ano pa gid ang dapat naton itudlo sa ila? Ikaduha, paano makabulig ang tanan nga kauturan sa kongregasyon para mag-uswag ang aton ginatudluan sang Biblia? Ikatlo, paano naton mabuligan ang mga indi aktibo para mangin aktibo sila liwat sa pagtudlo sa iban?
TUDLUI SILA NGA TUMANON ANG MGA GINSUGO SANG CRISTO
3. Ano ang nalakip sa ginsugo ni Jesus nga importante gid nga himuon naton?
3 Maathag ang ginsugo ni Jesus nga dapat naton himuon. Dapat naton tudluan ang mga tawo sang mga butang nga ginsugo niya. Pero indi naton pagkalimtan ang isa ka importante nga punto. Wala nagsiling si Jesus: ‘Tudlui ninyo sila sang tanan nga ginsugo ko sa inyo.’ Sa baylo, nagsiling sia: “Tudlui ninyo sila nga tumanon ang tanan nga ginsugo ko sa inyo.” Para matuman naton ang ginsugo ni Jesus, dapat naton itudlo sa aton ginatudluan sang Biblia kon ano ang dapat niya himuon, kag dayon ipakita naton sa iya kon paano niya ini iaplikar. (Binu. 8:31) Ngaa dapat naton ini himuon?
4. Maghatag sing halimbawa kon paano naton mabuligan ang aton ginatudluan sang Biblia nga tumanon ang mga ginsugo sang Cristo.
4 Paano naton matudluan ang isa ka tawo nga tumanon ang mga butang nga ginsugo sang Cristo? Ari ang isa ka halimbawa nga makabulig sa aton nga mahangpan kon ano ang dapat naton himuon. Hunahunaa ang isa ka tawo nga nagatudlo kon paano magdrayb. Ano ang himuon niya para sundon sang iya ginatudluan ang mga kasuguan nga dapat tumanon sang mga drayber? Una, dapat niya anay itudlo ang mga kasuguan nga dapat sundon kon nagadrayb. Pero may dapat pa sia himuon para mapakita niya sa nagatuon nga magdrayb kon paano tumanon ini nga mga kasuguan. Dapat niya updan ang iya ginatudluan nga magdrayb. Samtang nagadrayb ang iya ginatudluan, tudluan niya sia kon paano iaplikar ang iya mga natun-an. Ano ang matun-an naton sa sini nga halimbawa?
5. (a) Suno sa Juan 14:15 kag 1 Juan 2:3, ano ang dapat naton itudlo sa aton ginatudluan sang Biblia? (b) Maghatag sing mga halimbawa kon paano naton mabuligan ang aton ginatudluan.
5 Kon nagatudlo kita sang Biblia sa iban, ginabuligan naton sila nga mabal-an kon ano ang mga ginapatuman sang Dios sa aton. Pero may dapat pa kita himuon. Dapat naton sila tudluan kon paano iaplikar ang ila mga natun-an. (Basaha ang Juan 14:15; 1 Juan 2:3.) Paagi sa aton halimbawa, mapakita naton sa aton ginatudluan kon paano niya iaplikar sa eskwelahan, sa ulubrahan, ukon sa iya paglingawlingaw ang mga prinsipio sa Biblia nga iya natun-an. Puede naton isugid sa iya ang aton eksperiensia nga naamligan kita sang gin-aplikar naton ang mga laygay sang Biblia, ukon sang nabuligan kita sini kon paano makahimo sang maayo nga desisyon. Kag kon kaupod naton ang aton ginatudluan, puede naton ipangamuyo kay Jehova nga kabay pa nga giyahan sia sang balaan nga espiritu.—Juan 16:13.
6. Ano pa ang dapat naton himuon para mabuligan naton ang iban nga tumanon ang mga ginsugo ni Jesus?
6 Ano pa ang dapat naton himuon para mabuligan naton ang iban nga tumanon ang mga ginsugo sang Cristo? Dapat naton buligan ang aton ginatudluan sang Biblia nga handumon nga magtudlo man sa iban. Ang iban nga nagatuon sang Biblia mahimo nakulbaan nga magbantala. Gani dapat kita mangin mapinasensiahon sa aton pagtudlo sa ila nga mahangpan ang mga kamatuoran sa Biblia. Ang ila mga natun-an magapabakod sang ila pagtuo kag magapalig-on sa ila nga magbantala. Ano ang puede naton himuon para mabuligan naton ang aton ginatudluan nga mapalig-on nga magbantala sang maayong balita?
7. Paano naton mabuligan ang aton ginatudluan para mapalig-on sia nga ibantala ang maayong balita sa iban?
7 Mahimo mo pamangkuton ang imo ginatudluan sang Biblia: “Ano ang mga benepisyo sa imo kabuhi sang gin-aplikar mo ang mga ginatudlo sang Biblia? Sa banta mo, makabulig man bala ini sa iban? Ti, ano ang himuon mo para makabenepisyo man sila sa sini?” (Hulu. 3:27; Mat. 9:37, 38) Ipakita sa iya ang mga tract nga ara sa aton Teaching Toolbox kag papilia sia kon diin sa sini ang sa banta niya manamian sang iya mga paryente, mga abyan, ukon mga kaupod sa trabaho. Dayon hatagi sia sang sini nga mga tract. Buligi sia kon paano niya mapaathag ang tract sa mataktikanhon nga paagi kag praktisa ninyo ini. Kag kon mangin isa na sia ka indi bawtismado nga manugbantala, dapat naton sia updan sa pagbantala para buligan sia.—Man. 4:9, 10; Luc. 6:40.
KON PAANO MAKABULIG ANG KONGREGASYON
8. Ngaa importante nga pabakuron sang aton ginatudluan sang Biblia ang iya gugma sa Dios kag sa iya isigkatawo? (Tan-awa man ang kahon nga “ Kon Paano Naton Mabuligan ang Aton Ginatudluan sang Biblia nga Magbakod ang Iya Gugma sa Dios.”)
8 Dapat naton tandaan nga ginsugo kita ni Jesus nga tudluan ang iban nga “tumanon ang tanan nga ginsugo” niya. Nalakip sa sini ang duha ka pinakaimportante nga sugo nga amo ang higugmaon ang Dios kag higugmaon ang isigkatawo. (Mat. 22:37-39) Importante nga tumanon sang aton ginatudluan sang Biblia ining duha ka sugo para mapalig-on sia nga magbantala. Ngaa? Bangod ang gugma sa Dios kag sa aton isigkatawo amo ang panguna nga rason kon ngaa nagabantala kita. Pero may pila nga nagatuon sang Biblia nga nakulbaan magbantala. Palig-unon naton sila nga buligan sila ni Jehova nga madula ang ila kahadlok sa tawo. (Sal. 18:1-3; Hulu. 29:25) Mabasa naton sa kahon sa sini nga artikulo kon ano ang mga puede naton himuon para mabuligan naton ang aton ginatudluan nga magbakod ang iya gugma sa Dios. Ano naman ang puede himuon sang kongregasyon para mabuligan ang bag-o nga mga disipulo nga magpakita sang gugma?
9. Sa halimbawa sang nagatuon nga magdrayb, paano sia makatuon nga mangin maayo nga drayber?
9 Hunahunaa liwat ang halimbawa sang isa ka tawo nga nagatuon nga magdrayb. Samtang nagadrayb sia upod sa nagatudlo sa iya, paano sia makatuon nga mangin maayo nga drayber? Paagi sa pagpamati sa nagatudlo sa iya kag paagi sa pag-obserbar sa iban nga mga drayber nga nagahalong kon nagadrayb. Halimbawa, mahimo ipatalupangod sang nagatudlo ang isa ka drayber nga naghatag sang lugar para makauna ang isa ka salakyan. Ukon mahimo niya ipatalupangod ang isa ka drayber nga gin-low ang iya suga para indi masilawan ang iya sugata. Importante ini nga mga leksion nga maaplikar sang nagatuon nga magdrayb.
10. Ano ang makabulig sa nagatuon sang Biblia para mag-uswag sia?
10 Matuod man ini sa aton ginatudluan sang Biblia nga nagaaplikar na sang iya mga natun-an. Makatuon sia indi lang sa nagatudlo sang Biblia sa iya kundi sa maayo man nga halimbawa sang iban pa nga alagad ni Jehova. Gani, ano gid ang makabulig sa aton ginatudluan sang Biblia para mag-uswag sia? Ang pagtambong sa mga miting sang kongregasyon. Ngaa? Ang mabatian niya sa mga miting magapalig-on sa iya nga magtuon pa gid, magapabakod sang iya pagtuo, kag magabulig sa iya nga magbakod ang iya gugma sa Dios. (Binu. 15:30-32) Dugang pa, puede sia ipakilala sang nagatudlo sa iya sang Biblia sa mga kauturan nga mahimo may pareho sa iya eksperiensia. Matalupangdan gid sang nagatuon nga ang mga kauturan sa kongregasyon nagapakita sang gugma.
11. Ano nga mga halimbawa ang mahimo makita sang nagatuon sang Biblia sa kongregasyon, kag ano ang posible nga epekto sini sa iya?
11 Binagbinaga ini nga mga halimbawa. Nagaisahanon na lang nga nagapadaku sang iya kabataan ang isa ka iloy nga nagatuon sang Biblia. Nakilala niya sa kongregasyon ang isa ka sister nga pareho man sa iya ang sitwasyon. Napalig-on gid sia sa mga panikasog sang sister para makakadto sia sa Kingdom Hall upod ang iya magagmay pa nga kabataan. Nabudlayan naman ang isa nga nagatuon sang Biblia nga untatan ang pagpanigarilyo. Nakilala niya ang isa ka utod nga nauntatan ini nga bisyo bisan pa nga sang una nabudlayan man sia. Ginsugiran sia sang utod nga ang iya gugma kay Jehova amo ang nagpalig-on sa iya nga tumanon ang mga sugo sang Dios. (2 Cor. 7:1; Fil. 4:13) Pagkatapos masugid sang utod kon paano niya nauntatan ang pagpanigarilyo, ginsilingan niya ang nagatuon sang Biblia, “Masarangan mo man nga untatan ang pagpanigarilyo.” Napalig-on gid sia sa ginsiling sang utod. Natalupangdan naman sang isa ka pamatan-on nga babayi nga nagatuon sang Biblia nga malipayon gid ang isa ka pamatan-on nga sister. Bangod sini, napalig-on sia nga hibaluon kon ngaa pirme lang malipayon ang sister.
12. Ngaa makasiling kita nga ang kada isa sa kongregasyon may mabulig gid para mag-uswag ang nagatuon sang Biblia?
12 Kon makilala sang nagatuon sang Biblia ang madamo nga kauturan, makatuon sia kon paano tumanon ang sugo sang Cristo nga dapat naton higugmaon ang Dios kag ang aton isigkatawo. (Juan 13:35; 1 Tim. 4:12) Kag suno sa ginsambit kaina, makatuon man sia sa mga kauturan nga pareho sa iya ang problema. Matun-an niya nga kinahanglan niya maghimo sang mga pagbag-o para mangin disipulo sia sang Cristo, kag masarangan niya ini. (Deut. 30:11) May mabulig gid ang kada isa sa kongregasyon para mag-uswag ang nagatuon sang Biblia. (Mat. 5:16) Ano ang ginahimo mo para mapalig-on mo ang nagatuon sang Biblia nga nagatambong na sa mga miting?
BULIGI ANG MGA INDI AKTIBO NGA MAGBANTALA LIWAT
13-14. Ano ang ginhimo ni Jesus sang naluyahan ang iya mga apostoles?
13 Gusto naton buligan ang aton indi aktibo nga mga kauturan nga mangin aktibo sila liwat sa pagbantala kag pagtudlo sa iban. Paano naton sila mabuligan? Makatuon kita sa ginhimo ni Jesus sa iya naluyahan nga mga apostoles.
14 Sang lapit na matapos ang ministeryo ni Jesus sa duta kag antes sia ginpatay, ang tanan niya nga apostoles “nagbiya sa iya kag nagpalagyo.” (Mar. 14:50; Juan 16:32) Ano ang ginhimo ni Jesus sang naluyahan ang iya mga apostoles? Wala madugay pagkatapos ginbanhaw si Jesus, ginsilingan niya ang pila sa iya mga sumulunod: “Indi kamo magkahadlok! Lakat kamo, sugiri ninyo ang akon mga utod [nga nabanhaw na ako].” (Mat. 28:10a) Padayon nga ginbuligan ni Jesus ang iya mga apostoles. Bisan pa ginbiyaan nila sia, gintawag niya sila gihapon nga iya “mga utod.” Pareho kay Jehova, maluluy-on kag mapinatawaron man si Jesus.—2 Hari 13:23.
15. Ano ang ginabatyag naton para sa aton mga kauturan nga nag-untat sa pagbantala?
15 Nagaulikid man kita sa aton mga kauturan nga nag-untat sa pagbantala. Mga utod naton sila, gani palangga naton sila. Madumduman pa naton ang ila mga panikasog nga ginhimo sang una para maalagad si Jehova. Ang pila sa nangin indi aktibo matutom nga nagaalagad sang una sa madamo nga tinuig. (Heb. 6:10) Nahidlaw gid kita sa ila. (Luc. 15:4-7) Paano naton mapakita nga nagaulikid kita sa ila pareho sa ginhimo ni Jesus?
16. Paano naton mapakita nga nagaulikid kita sa aton indi aktibo nga mga kauturan?
16 Agdaha sila nga magtambong sa mga miting. Ang isa ka paagi nga ginpalig-on ni Jesus ang iya naluyahan nga mga disipulo amo ang pag-agda sa ila sa isa ka pagtilipon sang iya mga disipulo. (Mat. 28:10b; 1 Cor. 15:6) Gani puede naton agdahon ang mga indi aktibo nga wala nagatambong sa mga miting sang kongregasyon. Mahimo nga kinahanglan naton sila agdahon sing pila ka beses. Kag kon magtambong na sila, malipay gid kita pareho sa ginbatyag ni Jesus sang ginbaton sang iya mga disipulo ang iya pangagda.—Ipaanggid ang Mateo 28:16 kag Lucas 15:6.
17. Ano ang dapat naton himuon kon may indi aktibo nga magtambong sa aton miting?
17 Abiabiha sila. Ginpabatyag ni Jesus sa iya mga disipulo nga nalipay sia nga makita sila. Wala sia naghulat nga kadtuan nila sia kag istoryahon kundi sia mismo ang nagpalapit sa ila kag nag-istorya sa ila. (Mat. 28:18) Ano ang dapat naton himuon kon may indi aktibo nga magtambong sa miting sa Kingdom Hall? Dapat kita mismo ang magpalapit sa iya kag abiabihon sia. Sa umpisa, basi mabalaka kita nga indi kita kabalo kon ano ang aton isiling. Pero para indi sia masaw-ahan, silinga sia nga nalipay ka gid nga makita sia.
18. Paano naton mapalig-on ang mga indi aktibo?
18 Palig-una sila. Mahimo gid nga nabalaka ang mga disipulo ni Jesus kon paano nila ibantala ang maayong balita sa bilog nga kalibutan. Gani ginpalig-on niya sila kag nagsiling sia: “Kaupod ninyo ako sa tanan nga tion.” (Mat. 28:20) Napalig-on bala sini ang iya mga disipulo? Huo. Wala madugay pagkatapos sini, nangin masako sila “sa pagpanudlo kag sa pagbantala sing maayong balita.” (Binu. 5:42) Dapat man naton palig-unon ang mga indi aktibo. Mahimo nga nakulbaan sila nga magbantala liwat. Pasaliga sila nga kon magbantala na sila liwat, may upod gid sila pirme. Kon handa na sila nga magbantala, puede naton sila updan. Pasalamatan gid nila nga ginabuligan naton sila sa ila pagbantala liwat. Kon ipabatyag naton sa ila nga mga kauturan gihapon naton sila, posible gid nga mangin aktibo sila liwat kag malipay gid ang aton kongregasyon.
GUSTO NATON TUMANON ANG GINSUGO NI JESUS ASTA NGA MATAPOS INI
19. Ano ang gusto naton nga himuon, kag ngaa?
19 Asta san-o kita nga magbantala kag magtudlo sa iban? Asta sa hingapusan sang sistema sini nga mga butang. (Mat. 28:20; tan-awa ang Glossary, “Hingapusan sang sistema sang mga butang.”) Masarangan gid bala naton nga himuon ining ginsugo ni Jesus? Gusto gid naton ini nga himuon. Nalipay kita nga gamiton ang aton tion, kusog, kag mga pagkabutang para pangitaon ang mga “may husto nga panimuot sa pagtigayon sing kabuhi nga wala sing katapusan.” (Binu. 13:48) Kon ginahimo naton ini, ginailog naton si Jesus. Nagsiling sia: “Ang akon pagkaon amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34; 17:4) Amo man ini ang gusto naton nga himuon. Gusto naton nga padayon nga himuon ang ginsugo sa aton asta nga matapos ini. (Juan 20:21) Kag gusto naton nga makaupod naton ang iban sa sini nga hilikuton, lakip na ang mga indi aktibo.—Mat. 24:13.
20. Suno sa Filipos 4:13, ngaa masarangan naton nga himuon ang ginsugo ni Jesus sa aton?
20 Indi mahapos ang pagtuman sa ginsugo ni Jesus sa aton. Wala naton ini ginahimo nga kita lang. Nagpromisa si Jesus nga kaupod naton sia. Kon ginatudluan naton ang iban para mangin disipulo sila, mga “masigkamanugpangabudlay [kita] sang Dios” kag “kaupod naton ang Cristo.” (1 Cor. 3:9; 2 Cor. 2:17) Gani, masarangan naton ini nga himuon. Pribilehiyo gid naton nga himuon ini nga hilikuton kag nalipay man kita nga buligan ang iban nga tumanon ini!—Basaha ang Filipos 4:13.
AMBAHANON 79 Tudlui Sila nga Magtindog sing Malig-on
^ par. 5 Ginsugo ni Jesus ang iya mga sumulunod nga tudluan ang mga tawo para mangin disipulo niya sila. Ginsugo man niya sila nga tudluan ang mga tawo nga tumanon ang tanan nga ginsugo niya sa ila. Binagbinagon sa sini nga artikulo kon paano naton himuon ang ginsugo ni Jesus. Ang pila ka impormasyon sa sini nga artikulo ginkuha sa isa ka artikulo sa Hulyo 1, 2004, nga Ang Lalantawan, pahina 14-19.
^ par. 66 MGA PIKTYUR: Ginapaathag sang isa ka sister sa iya ginatudluan sang Biblia kon ano ang mga dapat niya himuon para magbakod ang iya gugma sa Dios. Gin-aplikar sang iya ginatudluan ang iya tatlo ka panugda.
