1. Mataio 28:18-20 ai, Iesu be oda herevana ia gwauraia?

IESU ia toreisi lou murinai, iena hahediba taudia be Galilea ai idia hebou lalonai idia dekenai ia hedinarai. Ia ura mai anina bada herevana ta do ia gwauraia. Unai be dahaka? Mataio 28:18-20 * ai iena hereva ita duahia diba.​—Futnout ai duahia.

2. Edena henanadai toi do ita herevalaia?

² Iesu ena oda herevana, hahediba taudia halaoa gaukarana karaia totona be ita ta ta dekenai ia gwauraia danu. Unai dainai, Iesu ese ia henia gaukara karaia totona, mani inai henanadai toi ita laloa. (1) Hahediba taudia matamatadia dekenai Dirava ena taravatu ita hadibaia neganai, dahaka ita karaia danu be namo? (2) Baibel stiuden ia goada totona, edena dala ai kongrigeisen ena pablisa ibounai ese idia durua diba? (3) Edena dala ai manoka pablisa taudia ita durua diba hahediba taudia halaoa gaukarana idia karaia lou totona?

3. Iesu ena oda herevana ai, dahaka mai anina bada gauna ia herevalaia?

³ Iesu ena oda herevana be auka lasi. Iena hahegani herevadia be taunimanima dekenai do ita hadibaia. To, namona be mai anina bada gauna ta ita laloatao. Iesu ia gwau lasi: ‘Umui lau hamaoroa gaudia ibounai be idia dekenai do umui hadibaia.’ To, ia gwau: “Idia umui hadibaia, umui dekenai lau henia hahegani ibounai idia badinaia totona.” Unai oda herevana ita badinaia totona, stiuden dekenai dahaka do ia karaia bona ia karaia dalana do ita hahedinaraia be namo. Dahaka dainai?

4. Edena dala ai Baibel stiuden ita hadibaia Keriso ena hahegani ia badinaia totona? Haheitalai gwauraia.

 ⁴ Edena dala ai ta ita hadibaia diba Keriso ena hadibaia herevadia ia badinaia totona? Unai ita karaia totona mani inai haheitalai ita laloa: Motuka taria ia hadibaia tauna ese edena dala ai iena stiuden do ia durua motuka taria ena taravatu ia badinaia totona? Hadibaia tauna ese klasrum ai unai taravatu ia herevalaia. To, stiuden ia durua unai taravatu ia badinaia totona, namona be kara ma ta ia karaia. Stiuden be dala ai motuka ia taria neganai, namona be hadibaia tauna ese ia bamoa bona ia durua, ia dibaia taravatu ia badinaia totona. Unai haheitalai amo dahaka ita dibaia?

5. (a) Ioane 14:15 bona 1 Ioane 2:3 edia hereva bamona, iseda Baibel stiuden ita hadibaia dahaka idia karaia be namo? (b) Stiuden ita durua diba daladia haida mani oi herevalaia.

⁵ Ma haida ida Baibel ita stadilaia neganai, idia dekenai Dirava ena ura ita hadibaia. To, gau ma haida ita karaia danu be namo. Namona be iseda stiuden ita durua idia dibaia gaudia be dina ta ta maurina ai do idia badinaia. (Ioane 14:15; 1 Ioane 2:3 duahia.) Namona be iseda haheitalai amo iseda stiuden ita durudia, sikuli ai, gaukara gabudia ai, eiava moale karadia lalonai, Baibel amo idia dibaia hereva momokani idia badinaia totona. Ita sibona eda ekspiriens ta, hegeregere Baibel ena hakaua herevadia ita badinaia karana ese ita ia gimaia, eiava ita ia durua abia hidi maorona ita karaia ena sivarai be stiuden dekenai ita gwauraia diba. Stiuden ida ita guriguri neganai, Iehova ita noia iena lauma helaga amo stiuden do ia hakaua.​—Ioa. 16:13.

6. Stiuden ita hadibaia Iesu ena hahegani idia badinaia totona, dahaka ita karaia danu be namo?

⁶ Stiuden ita durua Iesu ena hahegani idia badinaia totona, dahaka ita karaia be namo? Namona be iseda Baibel stiuden ita durudia, ma haida be hahediba taudia ai idia halaoa urana idia habadaia totona. Stiuden haida be idia gari haroro gaukara idia karaia totona. Unai dainai namona be mai haheauka ida idia ita hadibaia, unai amo metairametaira idia dibaia gaudia ese edia abidadama do ia hagoadaia, edia kudouna do ia hamarerea, bona idia haroro diba. Dahaka ita karaia diba unai amo stiuden do ia ura sivarai namona ia harorolaia?

7. Dahaka ita karaia diba unai amo stiuden do ia ura sivarai namona be ma haida dekenai ia harorolaia?

⁷ Iseda Baibel stiuden dekenai inai bamona henanadai ita henia diba: “Basileia ena sivarai oi abia dae karana ese edena dala ai emu mauri ia haidaua? Oi laloa ma haida ese unai idia kamonaia danu be namo, a? Dahaka oi karaia diba idia oi durua totona?” (Aon. 3:27; Mat. 9:37, 38) Stiuden dekenai iseda Hadibaia Gaukara Ena Tulu Idauidau ena pepapepa oi hahedinaraia, bona iena varavara, turadia, eiava gaukara taudia ese do idia ura henia pepapepa haida ia abia hidi diba. Unai pepapepa haida be ia dekenai oi henia bona ia hariharilaia dalana oi hadibaia. Momokani, iseda stiuden be bapatiso lasi pablisa ai ia lao murinai, namona be ia ida ita haroro bona ita durua.​—Had. 4:9, 10; Luka 6:40.

8. Dahaka dainai iseda stiuden ese Dirava bona edia dekena taudia idia lalokau henia be gau badana? (Maua itaia: “ Stiuden Ita Durua Dirava Ia Lalokau Henia Dalana.”)

⁸ Laloatao Iesu ese ita ia hamaoroa, namona be ma haida ita hadibaia ia henia “hahegani ibounai idia badinaia totona.” Unai  ita karaia totona, mai anina bada taravatu rua ita laloa be namo: (1) Dirava ita lalokau henia, bona (2) iseda dekena taudia ita lalokau henia. Haroro bona hahediba taudia halaoa gaukarana ita karaia totona Dirava bona taunimanima ita lalokau henidia be namo. (Mat. 22:37-39) Dahaka dainai? Ita laloparara Baibel stiuden taudia haida be haroro gaukara karaia totona idia gari. To idia do ita hamaoroa Iehova ena heduru amo taunimnima gari henia karana idia hanaia diba. (Sal. 18:1-3; Aon. 29:25) Rau 4 ena maua ese stiuden do ia durua Dirava ia lalokau henia daladia ia dibaia totona. Danu, kongrigeisen taudia be edena dala ai hahediba taudia matamatadia idia durua diba edia lalokau idia habadaia totona?

9. Motuka ia ura taria stiuden ena haheitalai amo, stiuden be edena dala haida ai mai anina bada gaudia ia dibaia?

⁹ Mani motuka ia ura taria stiuden tauna ena haheitalai ita laloa lou. Iena hadibaia tauna ida dala ai idia heau noho lalonai, stiuden be edena dala ai diba ia abia noho? Stiuden be ena hadibaia tauna ia kamonai henia namonamo bona taria taudia ma haida ia itaia karana amo diba ia abia. Hegeregere, hadibaia tauna ese taria tauna ta ia poinia, unai tauna be mai hemataurai ida ia stopu bona speis ia henia motuka ma ta be ia vairanai ia heau vareai totona. Eiava taria tauna ma ta be mai manau ida motuka ena laiti ena diari ia hamaragia, unai amo dala kahana amo idia mai taria taudia ese dala idia itaia namonamo diba. Ia ese stiuden tauna ia hamaoroa unai bamona do ia karaia danu. Unai haheitalai idauidau amo stiuden be mai anina bada gaudia ia dibaia, bona motuka ia taria neganai unai do ia badinaia.

10. Dahaka ese Baibel stiuden do ia durua ia goada ia lao totona?

¹⁰ Unai hegeregerena, Iehova ia hesiai henia matamaia stiuden be ena hadibaia tauna sibona amo diba ia abia lasi, to Iehova ena hesiai taudia ma haida edia haheitalai amo diba ia abia danu. Vadaeni, dahaka ese stiuden ia durua diba idia goada idia lao totona? Keristani heboudia lao henia karana. Dahaka dainai? Badina hebou dekenai idia kamonai Baibel ena hakaua herevadia amo, diba ma haida do idia abia, edia abidadama do ia hagoadaia, bona ia durudia edia lalokau Dirava dekenai idia habadaia totona. (Kara 15:30-32) Danu, hebou dekenai stadi tauna ese stiuden ia hakaua lao tadikaka eiava taihu ma haida ia hedavari totona​—reana guna edia mauri dalana be stiuden ena mauri dalana bamona. Stiuden ese kongrigeisen lalonai tadikaka taihu ese lalokau idia hahedinaraia daladia do ia itaia.

11. Stiuden be kongrigeisen lalonai edena haheitalai ia itaia, bona edena dala ai unai ese ia durua?

¹¹ Mani inai haheitalai haida oi laloa. Adavana lasi Baibel stiuden hahine ta be ia itaia, adavana lasi Keristani taihu ta be ia bamona. Stiuden be taihu ena haheitalai ese ia durua bada, badina ia itaia taihu be ia hekwarahi ena natuna maragidia ida Kingdom Hall dekenai idia lao totona. Baibel stiuden mero ta be ia hekwarahi kuku ania karana ia dadaraia totona, bona Kingdom Hall ai ia ese tadikaka ta ia tura henia. Unai tadikaka be guna kuku ia ania, to gabeai kuku ia rakatania. Ia ese stiuden ia hadibaia Iehova lalokau henia karana ese ia durua Dirava ena hahegani ia badinaia totona. (2 Kor. 7:1; Fili. 4:13) Tadikaka ese ena ekspiriens ia herevalaia murinai, stiuden ia hamaoroa: “Kuku ania karana oi rakatania diba.” Unai ese stiuden ia hagoadaia. Baibel stiuden kekeni ta ia itaia Witnes taihu matamata ta be ena mauri ia moalelaia. Unai dainai, ia ura diba dahaka dainai taihu be hanaihanai ia moale.

12. Dahaka dainai ita gwau diba kongrigeisen taudia ibounai ese Baibel stiuden idia durua diba?

 ¹² Stiuden be pablisa momo idia tura henia neganai, edia haheitalai ese idia ia durua Keriso ena hahegani, Dirava bona dekena tauna lalokau henia karana badinaia dalana idia lalopararalaia totona. (Ioa. 13:35; 1 Tim. 4:12) Guna ita herevalaia bamona, pablisa haida be guna Baibel stiuden ese ia davaria noho hekwakwanai idia hanaia. Edia haheitalai amo stiuden do ia itaia, ia be ena kara ia haidaua bona Keriso ena hahediba tauna ai ia lao diba. (Deu. 30:11) Kongrigeisen lalonai ta ta be dala idauidau ai Baibel stiuden idia durua ia goada ia lao totona. (Mat. 5:16) Oi be dahaka oi karaia hebou dekenai idia mai Baibel stiuden oi hagoadadia totona?

13-14. Iesu ese idia lalomanoka aposetolo taudia be edena bamona ia kara henidia?

¹³ Ita ura idia manoka tadikaka taihu ita durua Keriso ena hahegani, hahediba taudia halaoa gaukarana lalonai do idia vareai lou. Idia ita durua totona, Iesu ese idia lalomanoka aposetolo taudia ia kara henia dalana ita tohotohoa diba.

¹⁴ Tanobada ai, Iesu ena haroro gaukara dokonai bona ena mase negana be kahirakahira neganai, aposetolo taudia be “ia idia rakatania bona idia heau.” (Mar. 14:50; Ioa. 16:32) Iesu ena hahediba taudia be nega sisina lalonai idia manoka neganai, edena bamona ia kara henidia? Iesu ia toreisi lou bona daudau lasi murinai, iena murinai idia raka hahine haida ia hamaoroa: “Umui gari lasi! Umui lao egu tadikaka umui hadibaia [lau toreisi lou vadaeni].” (Mat. 28:10a) Iesu be ena aposetolo taudia dekenai ia hesiku lasi. Ena be ia idia rakatania, to idia ia boiria “egu tadikaka.” Iehova bamona, Iesu be ia hebogahisi bona edia kara ia gwauatao.​—2 Kin. 13:23.

15. Haroro gaukara idia hadokoa taudia be edena bamona ita lalodia?

¹⁵ Unai hegeregerena, ita ese haroro gaukara idia hadokoa taudia ita laloa bada. Idia be iseda tadikaka taihu, bona idia ita lalokau henia! Guna, haida be lagani momo lalonai Iehova ena hesiai gaukara idia karaia, bona edia gaukara namodia ita do laloatao noho. (Heb. 6:10) Idia ita reaia bada! (Luka 15:4-7) Iesu ena kara ita tohotohoa dainai, edena dala ai do ita hahedinaraia idia ita laloa bada?

16. Edena dala ai ia manoka tadikaka o taihu ta ita laloa bada?

¹⁶ Hebou dekenai ita boiridia mai. Iesu ese idia lalomanoka aposetolo taudia ia hagoadaia dalana ta be ia boiridia hebou ta dekenai do idia lao. (Mat. 28:10b; 1 Kor. 15:6) Unai hegeregerena, hari bema manoka pablisa be kongrigeisen hebou idia mai lasi, idia ita boiridia mai diba. Ita laloparara reana nega momo ita boiridia murinai, hebou dekenai do idia mai. Iesu ena aposetolo taudia be iena boiboi herevana idia abia dae dainai ia moale.​—Mataio 28:16 bona Luka 15:6 hahegeregerea.

17. Manoka tauna ta be hebou ia mai neganai, edena bamona ita kara henia be namo?

¹⁷ Mai moale ida ita welkam henidia. Iesu be ena hahediba taudia ia hedavari henidia neganai ia welkam henidia; bona ia naria lasi to ia lao bona ia hereva henidia. (Mat. 28:18) Manoka tauna ta be Kingdom Hall dekenai ia mai neganai, edena bamona do ita kara henia? Namona be ita lao bona ia ita welkam henia. Matamanai, reana ita daradara dahaka do ita hereva. Namo lasi ia ita hahemaraia, to do ita hamaoroa ia ita itaia dainai ita moale.

18. Edena dala ai idia manoka pablisa ita hagoadaia diba?

¹⁸ Namona be ita hagoadadia. Iesu ena  hahediba taudia be reana idia laloa idia hegeregere lasi tanobada ibounai dekenai idia haroro totona. Iesu be ena murinai idia raka taudia ia hagoadaia, ia gwau: “Lau be dina iboudiai umui ida do lau noho.” (Mat. 28:20) Unai ese idia ia durua, a? Oibe. Daudau lasi murinai, idia be “sivarai namona idia hadibaia bona harorolaia.” (Kara 5:42) Manoka pablisa ita hagoadaia be namo. Reana idia laloa do idia haroro lou lasi. Namona be ita hamaorodia idia be sibona do idia haroro lasi, to idia hegeregere neganai haroro gaukara ai idia ita bamoa diba. Momokani, sivarai namona idia harorolaia lou neganai, mai moale ida eda heduru do idia abia dae. Manoka pablisa be iseda tadikaka bona taihu bamona ita kara henidia neganai, do idia haroro lou bona kongrigeisen taudia ibounai do idia moale.

19. Iseda lalona ita hadaia dahaka do ita karaia, bona dahaka dainai?

¹⁹ Hahediba taudia halaoa gaukarana do ita karaia ela bona edena negai? Ela bona inai nega oromana ena dokona. (Mat. 28:20) Ita haroro bona hahediba gaukara do ita karaia noho ela bona unai nega, a? Oibe, iseda lalona ita hadaia unai do ita karaia! Namona be mai moale ida iseda nega, goada, bona kohu ita gaukaralaia, “mauri hanaihanai idia ura kudou-maoro taudia” ita tahua totona. (Kara 13:48) Unai bamona ita karaia neganai, ita be Iesu ena haheitalai ita tohotohoa. Ia gwau: “Lauegu aniani be lau ia siaia tauna ena ura do lau karaia bona iena gaukara do lau karaia haorea.” (Ioa. 4:34; 17:4) Ita danu ita ura unai ita karaia. Ita ura ita dekenai ia henia gaukarana ita haorea. (Ioa. 20:21) Bona ita ura ma haida, hegeregere idia manoka pablisa, be ita ida mai haheauka danu inai gaukara do ita karaia noho.​—Mat. 24:13.

20. Filipi 4:13 ena hereva bamona, dahaka dainai Iesu ese ia gwauraia gaukarana ita hagugurua diba?

²⁰ Momokani, Iesu ena hahegani ita hagugurua be mai ena hekwarahi. To, ita sibona ese unai gaukara ita karaia lasi. Iesu ia gwauhamata ia be ita ida do ia noho. Hahediba gaukara ita karaia neganai, ita be ‘Dirava ida ita gaukara hebou’ bona ‘Keriso ita badinaia.’ (1 Kor. 3:9; 2 Kor. 2:17) Unai dainai, ita hagugurua diba. Unai hesiai gaukara ita karaia bona ma haida ita durua idia karaia danu be hahenamo badana bona mai ena moale!​—Filipi 4:13 duahia.