1. Dị ka e dere na Matiu 28:18-20, olee ihe Jizọs gwara ndị na-eso ụzọ ya ka ha mee?

MGBE a kpọlitechara Jizọs n’ọnwụ, ọ pụtara n’ihu ndị na-eso ụzọ ya gbakọtara na Galili. E nwere ihe dị mkpa ọ chọrọ ịgwa ha. Olee ihe ọ bụ? E dere ihe o kwuru na Matiu 28:18-20.—Gụọ ya.

2. Olee ajụjụ ndị anyị ga-atụle?

² Iwu Jizọs nyere ndị na-eso ụzọ ya ka ha mee ndị na-eso ụzọ gbasara ndị ohu Chineke niile taa. N’ihi ya, ka anyị zaa ajụjụ atọ gbasara ọrụ a Jizọs nyere anyị. Nke mbụ, e wezụga ịkụziri ndị ọhụrụ ihe Chineke chọrọ ka anyị na-eme, olee ihe ọzọ anyị kwesịrị ime? Nke abụọ, olee otú ndị nkwusa niile nọ n’ọgbakọ ga-esi enye aka mee ka ndị a na-amụrụ Baịbụl na-emekwu nke ọma? Nke atọ, olee otú anyị ga-esi enyere ndị kwụsịrịla ịga ozi ọma aka ịmaliteghachi ime ndị na-eso ụzọ?

3. Olee ihe doro anya Jizọs kwuru n’iwu ahụ o nyere?

³ Iwu Jizọs nyere doro anya. Iwu ji anyị ịkụziri ndị mmadụ ihe o nyere n’iwu. Ma, o nwere ihe dị mkpa anyị na-ekwesịghị ileghara anya. Jizọs asịghị: ‘Na-ezi ha ihe niile m nyere unu n’iwu.’ Kama, ọ sịrị: “Na-ezi ha ka ha debe ihe niile m nyere unu n’iwu.” Ọ bụrụ na anyị chọrọ ime ihe a Jizọs kwuru ma anyị na-eduziri mmadụ ọmụmụ Baịbụl, anyị kwesịrị ịkụziri onye ahụ ihe o kwesịrị ime, gosikwa ya otú ọ ga-esi eme ya. (Ọrụ 8:31) Gịnị mere anyị ji kwesị ime ihe a?

4. Jiri ihe atụ kọwaa otú anyị nwere ike isi kụziere onye anyị na-amụrụ ihe idebe ihe Kraịst nyere n’iwu.

 ⁴ Olee otú anyị nwere ike isi kụziere mmadụ idebe ihe Jizọs nyere n’iwu? Ka anyị tụlee ihe atụ ga-enyere anyị aka ịma otú anyị ga-esi eme ya. Olee otú onye na-akụziri mmadụ ịnya ụgbọala si akụziri onye ahụ ka ọ na-erubere iwu na-achị okporo ụzọ isi? O nwere ike ibu ụzọ kụziere ya iwu ndị ahụ n’ọnụ. Ma, iji kụziere ya otú ọ ga-esi na-erubere iwu ndị ahụ isi, e nwere ihe ọzọ o kwesịrị ime. O kwesịrị iso ya mgbe ọ na-anya ụgbọala iji mara otú ọ ga-esi eme ihe ndị ahụ ọ kụziiri ya. Olee ihe anyị nwere ike ịmụta n’ihe atụ a?

5. (a) Dị ka e kwuru na Jọn 14:15; 1 Jọn 2:3, gịnị ka anyị kwesịrị ịkụziri ndị anyị na-amụrụ Baịbụl ka ha na-eme? (b) Nye ihe atụ otú anyị nwere ike isi nyere ndị anyị na-amụrụ Baịbụl aka ime ihe ndị ha na-amụta na Baịbụl.

⁵ Anyị mụwara ndị mmadụ Baịbụl, anyị na-akụziri ha ihe Chineke chọrọ ka anyị na-eme. Ma e nwere ihe ọzọ anyị ga-eme. Anyị kwesịrị ịkụziri ha ka ha na-eme ihe ndị ha na-amụta eme. (Gụọ Jọn 14:15; 1 Jọn 2:3.) Anyị kwesịrị isi n’ihe ndị anyị na-eme kụziere ndị anyị na-amụrụ ihe otú ha ga-esi eme ihe Baịbụl kwuru n’ụlọ akwụkwọ, n’ebe ha na-arụ ọrụ, ma ọ bụ mgbe ha na-atụrụ ndụ. Anyị nwere ike ịkọrọ ha ihe mere anyị iji gosi ha otú ime ihe Baịbụl kwuru si chebe anyị ma ọ bụ otú o si nyere anyị aka ime mkpebi dị mma. Anyị nwekwara ike ịnọ n’ihu ha rịọ Jehova n’ekpere ka mmụọ nsọ ya nyere ha aka.—Jọn 16:13.

6. Olee ihe so n’ịkụziri ndị mmadụ idebe ihe Jizọs nyere n’iwu?

⁶ Olee ihe so n’ịkụziri ndị mmadụ idebe ihe Jizọs nyere n’iwu? Anyị kwesịrị ime ka ọ na-agụ ndị anyị na-amụrụ Baịbụl agụụ ime ndị na-eso ụzọ. Ụjọ ikwusa ozi ọma nwere ike ịna-atụ ụfọdụ n’ime ha. N’ihi ya, anyị kwesịrị inwere ha ndidi mgbe anyị na-enyere ha aka ịghọta eziokwu ndị dị na Baịbụl ka okwukwe ha nwee ike isikwu ike. Ọ bụ mgbe ahụ ka ihe anyị na-akụziri ha ga-eru ha n’obi, ya emeekwa ka ha chọọ ikwusa ozi ọma. Olee ihe ndị anyị kwesịrị ime iji nyere ndị anyị na-amụrụ Baịbụl aka ka ọ gụwa ha agụụ ikwusa ozi ọma?

7. Olee otú anyị ga-esi enyere onye anyị na-amụrụ Baịbụl aka ka ọ gụwa ya agụụ ikwusa ozi ọma?

⁷ Anyị nwere ike ịjụ onye anyị na-amụrụ Baịbụl ajụjụ ndị a: “Olee otú ndụ gị sirila gbanwee n’ihi na ị na-eme ihe Baịbụl kwuru? Ì chere na ndị ọzọ kwesịrị ịnụ ozi ọma a? Gịnị ka i nwere ike ime iji nyere ha aka?” (Ilu 3:27; Mat. 9:37, 38) Gosi onye ahụ ị na-amụrụ Baịbụl traktị ndị so n’Ihe Ndị Anyị Ji Akụziri Ndị Mmadụ Ihe. Gwa ya ka ọ họrọ ndị nke o chere ga-aka amasị ndị ikwu ya, ndị enyi ya, ma ọ bụkwanụ ndị ọrụ ibe ya. Nyekwa ya ole ga-ezuru ya. Gị na ya mụgharịakwa otú ọ ga-esi eji akọ enyefe traktị ndị ahụ. N’eziokwu, mgbe onye anyị na-amụrụ Baịbụl ghọrọ onye nkwusa a na-emebeghị baptizim, anyị kwesịrị iso ya na-aga ozi ọma ka anyị nwee ike ịna-enyere ya aka.—Ekli. 4:9, 10; Luk 6:40.

8. Gịnị mere o ji dị mkpa ka ndị anyị na-amụrụ Baịbụl nwee ịhụnanya siri ike maka Chineke nakwa maka ndị mmadụ? (Gụọ igbe isiokwu ya bụ “ Otú Anyị Ga-esi Eme Ka Ndị Anyị Na-amụrụ Baịbụl Hụkwuo Jehova n’Anya.”)

⁸ Cheta na Jizọs nyere anyị iwu ka anyị na-akụziri ndị mmadụ ka ha “debe ihe niile” o nyere n’iwu. Ihe ndị so n’ihe ndị ahụ  o nyere n’iwu bụ iwu abụọ kachanụ, ya bụ, ịhụ Chineke n’anya na ịhụ ndị agbata obi anyị n’anya. (Mat. 22:37-39) Anyị ga-ahụrịrị Chineke na ndị mmadụ n’anya ka anyị nwee ike ikwusa ozi ọma. O doro anya na ikwusa ozi ọma nwere ike ịtụ ụfọdụ ndị anyị na-amụrụ Baịbụl ụjọ. Ma, anyị nwere ike ime ka obi sie ha ike na Jehova ga-enyere ha aka iji nwayọọ nwayọọ kwụsị ịtụ mmadụ egwu. (Ọma 18:1-3; Ilu 29:25) Igbe dị n’isiokwu a kọwara ihe ndị anyị kwesịrị ime iji nyere onye anyị na-amụrụ ihe aka ịhụkwu Chineke n’anya. Olee ihe ndị nọ n’ọgbakọ nwere ike ime iji nyere ndị ọhụrụ aka inwekwu ịhụnanya?

9. N’ihe atụ onye na-amụ ịnya ụgbọala, olee otú onye ahụ na-amụ ịnya ụgbọala ga-esi amụta ihe ndị bara uru?

⁹ Ka anyị lebakwa anya n’ihe atụ onye ahụ na-amụ ịnya ụgbọala. Ọ gaa ịnya ụgbọala mgbe onye nkụzi ya so ya, olee otú ọ ga-esi amụta ihe? Ọ ga na-ege onye nkụzi ya ntị ma na-elekwa otú ndị ọzọ ji nlezianya na-anya ụgbọala si anya. Dị ka ihe atụ, onye nkụzi ya nwere ike igosi ya ọkwọ ụgbọala kwere ka onye ọzọ gbafere ya. O nwekwara ike igosi ya ọkwọ ụgbọala gbatulatara ọkụ ya ka ọ ghara ịchachi ndị ọzọ na-akwọ ụgbọala anya. Ihe ndị a ga-akụziri onye ahụ na-amụ ịnya ụgbọala ihe ndị o nwere ike ịna-eme ma ọ nyawa ụgbọala.

10. Olee ihe ga-enyere onye a na-amụrụ Baịbụl aka ịghọ onye na-eso ụzọ?

¹⁰ Otú ahụkwa ka ọ dị onye a na-amụrụ Baịbụl malitere ije ije n’ụzọ nke ndụ. Ọ bụghị naanị n’aka onye na-amụrụ ya Baịbụl ka ọ ga-esi amụta ihe. Ọ ga-amụtakwa ihe n’aka ndị ọzọ na-efe Jehova. N’ihi ya, olee ihe ga-enyere ndị a na-amụrụ Baịbụl aka ime nke ọma? Ọ bụ ịbịa ọmụmụ ihe anyị. N’ihi gịnị? Ihe ha ga-anụ n’ọmụmụ ihe ga-eme ka ha mụtakwuo ihe, mee ka okwukwe ha sikwuo ike, meekwa ka ha hụkwuo Chineke n’anya. (Ọrụ 15:30-32) Ihe ọzọ bụ na, n’ọmụmụ ihe, onye na-amụrụ ya Baịbụl nwere ike igosi ya ụmụnna ndị ọnọdụ ya na ha bụ otu, ma ọ bụkwanụ ndị ihe na-eme ya metụrụla. Ọ ga-ahụ na ụmụnna nọ n’ọgbakọ hụrụ ibe ha n’anya. Ka anyị tụlee ihe atụ ụfọdụ.

11. Olee ihe ndị onye a na-amụrụ Baịbụl nwere ike ịchọpụta n’ọgbakọ? Oleekwa otú ihe ndị ahụ nwere ike isi nyere ya aka?

¹¹ Mgbe otu nwaanyị a na-amụrụ Baịbụl naanị ya na-azụ ụmụ gara ọmụmụ ihe, ọ hụrụ otu nwanna nwaanyị na-azụkwa ụmụ naanị ya, ya emetụ ya n’obi otú nwanna nwaanyị ahụ si agba mbọ akpọ obere ụmụaka ya abịa ọmụmụ ihe. Otu nwoke na-aṅụ sịga a na-amụrụ Baịbụl matara nwanna gbara mbọ kwụsị ịṅụ sịga. Nwanna ahụ gwara ya otú ịhụkwu Jehova n’anya si nyere ya aka idebe iwu ya. (2 Kọr. 7:1; Fil. 4:13) Mgbe onye ahụ a na-amụrụ Baịbụl nụchara ihe nwanna ahụ kọọrọ ya gbasara onwe ya, obi siri ya ike mgbe nwanna ahụ gwara ya, sị: “Gịnwa ga-akwụsịlikwa ịṅụ sịga.” Otu nwa agbọghọ a na-amụrụ Baịbụl chọpụtara na obi na-atọ otu nwanna nwaanyị na-eto eto ụtọ n’ihi na ọ bụ Onyeàmà Jehova. Ihe a mere ka ọ chọọ ịmatakwu ihe mere nwanna nwaanyị a ji enwe obi ụtọ.

12. Gịnị mere anyị nwere ike iji kwuo na onye ọ bụla nọ n’ọgbakọ nwere ihe ọ ga-eme iji nyere onye a na-amụrụ Baịbụl aka?

¹² Onye a na-amụrụ Baịbụl mata ụmụnna dị iche iche kwesịrị ntụkwasị obi n’ọgbakọ, ọ ga-esi n’akụkọ ha mụta ihe mmadụ irube isi n’iwu Kraịst pụtara, nke bụ́ ka anyị hụ Chineke na ndị agbata obi anyị n’anya. (Jọn 13:35; 1 Tim. 4:12)  Ihe ọzọkwa bụ na, dị ka anyị kwurula, onye a na-amụrụ Baịbụl nwere ike isi n’aka ụmụnna ndị nwere ụdị nsogbu yanwa na-enwe mụta idi nsogbu ahụ. Onye ahụ a na-amụrụ Baịbụl ga-esikwa n’aka ha mụta na ọ ga-emeli mgbanwe ndị ọ dị mkpa ka o mee iji nwee ike ịghọ onye na-eso ụzọ Kraịst. (Diut. 30:11) Onye ọ bụla nọ n’ọgbakọ nwere ike inye aka n’ụzọ dị iche iche, mee ka onye a na-amụrụ Baịbụl na-eme nke ọma n’ọgbakọ. (Mat. 5:16) Olee mbọ ndị gịnwa na-agba iji gbaa onye a na-amụrụ Baịbụl na-abịa ọmụmụ ihe ume?

13-14. Olee otú Jizọs si mesoo ndịozi ya mgbe ha dara mbà n’ihi ụjọ?

¹³ Anyị chọrọ inyere ụmụnna anyị ndị kwụsịrịla ịga ozi ọma aka ka ha maliteghachi ime ihe Kraịst gwara anyị mee, ya bụ, ime ndị na-eso ụzọ. Otú Jizọs si mesoo ndịozi ya dara mbà gosiri ihe anyị nwere ike ime taa.

¹⁴ Mgbe ọ fọrọ ntakịrị ka e gbuo Jizọs, ndịozi ya niile ‘hapụrụ ya gbaa ọsọ.’ (Mak 14:50; Jọn 16:32) Olee otú Jizọs si mesoo ha n’oge ahụ ha dara mbà n’ihi ụjọ? Obere oge a kpọlitechara ya n’ọnwụ, ọ gwara ndị na-eso ụzọ ya, sị: “Unu atụla egwu! Gaanụ kọọrọ ụmụnna m, [na a kpọlitela m n’ọnwụ].” (Mat. 28:10a) Jizọs ahapụghị ndịozi ya. N’agbanyeghị na hanwa hapụrụ ya, ọ ka nọkwa na-akpọ ha “ụmụnna m.” Jizọs mere ka Jehova. O meere ha ebere ma gbaghara ha.—2 Eze 13:23.

15. Olee otú ọ na-adị anyị ma anyị cheta ụmụnna ndị kwụsịrịla ịga ozi ọma?

¹⁵ Otú ahụ ka ọ dịkwa anyịnwa. Ihe banyere ndị kwụsịrịla ịga ozi ọma na-emetụ anyị n’obi. Ha ka bụkwa ụmụnna anyị, anyị hụkwara ha n’anya. Anyị ka na-echeta ọrụ ha rụsiri ike maka Jehova n’oge ndị gara aga. Ụfọdụ n’ime ha rụsiri ọrụ ike ruo ọtụtụ afọ. (Hib. 6:10) Ọ na-agụsi anyị agụụ ike ka ha lọghachi. (Luk 15:4-7) Olee otú anyị nwere ike isi ṅomie Jizọs ma gosi na ihe banyere ha na-emetụ anyị n’obi?

16. Olee otú anyị nwere ike isi gosi na ihe banyere ụmụnna anyị kwụsịrịla ịga ozi ọma na-emetụ anyị n’obi?

¹⁶ Meda obi kpọọ ha ka ha bịa ọmụmụ ihe. Otu ụzọ Jizọs si gbaa ndịozi ya dara mbà n’obi ume bụ ịkpọ ha ka ha zukọta. (Mat. 28:10b; 1 Kọr. 15:6) Taakwa, anyị nwere ike ịgba ndị kwụsịrịla ịga ozi ọma ume ka ha bịa ọmụmụ ihe ma ọ bụrụ na ha ebidobeghị ime otú ahụ. O nwere ike iwetụ oge tupu ha amaliteghachi ịbịa ọmụmụ ihe. O doro anya na obi tọrọ Jizọs ụtọ mgbe ndịozi ya zara ya òkù ọ kpọrọ ha ka ha zukọta.—Tụlee Matiu 28:16 na Luk 15:6.

17. Olee ihe anyị kwesịrị ime ma ndị kwụsịrịla ịga ozi ọma bịa ọmụmụ ihe?

¹⁷ Jiri obi gị niile nabata ha. Jizọs mere ka obi ruo ndị na-eso ụzọ ya ala mgbe ha bịakwutere ya. Ọ bụ yanwa bu ụzọ gwa ha okwu. (Mat. 28:18) Gịnị ka anyị ga-eme ma ndị kwụsịrịla ịga ozi ọma bịa ọmụmụ ihe? Anyị kwesịrị ịga jiri obi anyị niile nabata ha. O nwere ike isiri anyị ike ná mmalite ịma ihe anyị ga-ekwu. Ma, anyị nwere ike ịgwa ha na obi dị anyị ụtọ ịhụ ha, gwakwa ha ya otú ọ na-agaghị emenye ha ihere.

18. Olee otú anyị nwere ike isi mee ka obi sie ndị nkwusa kwụsịrịla ịga ozi ọma ike?

¹⁸ Mesie ha obi ike. Ọ ga-abụ na ndị na-eso ụzọ Jizọs nọ na-eche na ha agaghị ekwusali ozi ọma Jizọs sịrị ha kwusaa  n’ụwa niile. Ma, Jizọs mesiri ha obi ike. Ọ sịrị ha: “M nọnyeere unu ụbọchị niile.” (Mat. 28:20) Ihe a Jizọs kwuru ò mesiri ha obi ike? Ee. Obere oge, ha malitere “na-akụzi ihe” ma “na-ezisa ozi ọma.” (Ọrụ 5:42) E kwesịkwara ime ka obi sie ndị nkwusa kwụsịrịla ịga ozi ọma ike. Ịmaliteghachi ịga ozi ọma nwere ike ịna-atụ ha ụjọ. Anyị nwere ike ime ka obi sie ha ike na ọ bụghị naanị ha ga-ekwusa ozi ọma. Ọ bụrụ na ha ekpebie ibido ịga ozi ọma, anyị nwere ike iso ha gaa. O doro anya na obi ga-adị ha ụtọ ma anyị kwadoo ha. Anyị were ha ka ụmụnna anyị, o nwere ike ime ka ha maliteghachi ịga ozi ọma, obi atọọ onye ọ bụla nọ n’ọgbakọ ụtọ.

19. Olee ihe anyị chọrọ ime, n’ihi gịnịkwa?

¹⁹ Olee mgbe anyị ga-akwụsị ime ndị na-eso ụzọ? Anyị ga-emegide ya ruo ọgwụgwụ usoro ihe a. (Mat. 28:20) Ànyị ga-emeli ya? Anyị kpebisiri ike na anyị ga-eme ya. Anyị na-eji obi ụtọ eji oge anyị, ike anyị, na ihe ndị anyị nwere achọta ndị “nwere ezi obi maka inweta ndụ ebighị ebi.” (Ọrụ 13:48) Anyị mee ihe a, anyị na-eṅomi Jizọs. Jizọs sịrị: “Ihe oriri m bụ ka m mee uche onye zitere m, ka m rụchaa ọrụ ya.” (Jọn 4:34; 17:4) Ọ bụkwa ihe a ka anyịnwa chọrọ ime. Anyị chọrọ ịrụcha ọrụ e nyere anyị. (Jọn 20:21) Anyị chọkwara ka ndị kwụsịrịla ịga ozi ọma na ndị ọzọ soro anyị rụruo ya n’isi.—Mat. 24:13.

20. Dị ka e kwuru ná Ndị Filipaị 4:13, olee ihe mere obi ji sie anyị ike na anyị ga-arụli ọrụ ahụ Jizọs nyere anyị?

²⁰ Ọ bụ eziokwu na ịrụ ọrụ a Jizọs nyere anyị adịghị mfe, ma, anyị anaghị arụ ya naanị anyị. Jizọs kwere anyị nkwa na ọ ga-anọnyere anyị. Anyị na-arụ ọrụ a n’ihi na anyị bụ “ndị ha na Chineke na-arụkọ ọrụ” na ndị ha na Kraịst na-emekọrịta ihe. (1 Kọr. 3:9; 2 Kọr. 2:17) N’ihi ya, anyị ga-arụli ọrụ a. Obi dị anyị ụtọ maka ọrụ a pụrụ iche e nyere anyị. Anyị jikwa obi ụtọ na-enyere ndị ọzọ aka ka ha soro rụọ ya.—Gụọ Ndị Filipaị 4:13.