1. Jaabwọ ká ụpwụ nya ịMatiyu 28:18-20 ya, ehile oyina iJisọsị à tị́ ya deeji?

ỤKA ọlẹ ká iJisọsị wuleji bwula igu kpá, o hu ta angịjụgbẹyị nyamwụ ịlẹ kị tụguru ị-ịGalili. Ọ la ẹlẹhẹ ọkpọnchị ka ya jaa. Ẹlịyẹ tị́? Omyi ẹla nyamwụ ịịwa juwa ụ-ụpwụ nya ịMatiyu 28:18-20.​—Wọọ.

2. Ịtọ ẹla iyina ahị tị́ wẹẹ ka kụ ẹhị yẹ?

² Ehile ọlẹ ká iJisọsị da nyọka họ ká angịkịla ka ri angịjụgbẹyị gu ọnchẹ nya Ohe Oluhye ọnyị myị́ ọnyị alẹ. Chajị nyọọwa lẹ, ahị kụ ẹhị yẹ ịtọ ẹla ịta u-uhye nya ụkụrwọ ọlẹ ká iJisọsị ya hahị wẹẹ. Ọhọhẹ, datị hi ọ-ka mẹ ang ọlẹ ká Ohe tịtọ bwu ẹga nyahị jẹ angịjụgbẹyị inyeewe, ịyẹ ahị tị́ ka myịmyị-ị̀ họ? Oheeye, ányị angịlẹ wuu kị kaa kpa ẹrụ ọnyịịla pyẹ ẹ-ẹpwụ nya ọjịra-jịra à tị́ ka dụbwọ ká angịlẹ kị wẹẹ jẹ́ ịBayịbụụ ka nwà kịlahị ẹ-ẹpwụ nya ang nya olegu? Ọhata, ányị ahị tị́ ka bwu da aanahị ịlẹ kị gbile ẹta ẹkpẹ ụbwọ nyọka myịmyị-ị̀ tịrẹkpẹ ka yụbwọ ju ụkụrwọ nya ọ-họ ká angịkịla ka ri angịjụgbẹyị?

3. Ẹlịyẹ kpangga iJisọsị à tị́ ya ẹ-ẹpwụ nya ehile nyamwụ?

³ Ẹla ọlẹ ká iJisọsị ya wẹ la gede-gede. O ri opyii kahị ka mẹjẹ angịnyị kị ka ba ehile nyamwụ jẹ. Ma, ẹla ọkpọnchị ọhẹ juwa kọ baba kahị ka deeri hi ka. IJisọsị á yẹkẹẹ: ‘Mẹ ang myị́ ang ọlẹ wuu kam danụ ehile wẹ jaa’ kem ka. Ọkọkọ nyọọwa o yẹkẹẹ: Mẹjáa “chajị kị ka juwa kpa ehile nyam ịịwa họ ụkụrwọ mẹ.” Nyọka ju ihi nya ẹla ọlẹ ká iJisọsị ya wẹ, áhị ka mẹjẹ ọngọlẹ kọ wẹẹ jẹ́ ịBayịbụụ ang ọlẹ kọ baba nyọka họ kem ka, ahị ka mẹ abwọlẹ kọ ka bwu họ ang ọọwa jọ́ọ. (Ụkụr. 8:31) Ịyẹ tị́ du kahị baba nyọka họ ịnyị?

4. Ọ-chụ pwokwita oyina à tị́ ji u-uhye nya abwọlẹ kahị ka mẹ ịBayịbụụ jẹ ọngịnyị nyọka ju ihi nya ehile nya ịKịrayịsị?

 ⁴ Ányị ahị tị́ ka mẹ ang jẹ ọngịnyị kọ ka ju ihi nya ehile nya ịKịrayịsị? Ọ-chụ pwokwita ọlẹ kahị wẹẹ ka yẹ, ka dahị ụbwọ nyọka jẹ́ ang ọlẹ kahị baba nyọka họ. Ányị ọngọlẹ kọ kaa mẹ iMoto ọ-pápá jẹ angịnyị a tịị bwu daa ụbwọ nyọka ju ihi nya ehile ịlụgbẹyị? Ọngọlẹ kọ kaa mẹ ang jẹ ka jene mẹjáa ẹ-ẹga lala ube-ụpwụ. Ma, nyọka jẹ́-ẹ mẹjẹ angịịwa jaabwọ kị ka ju ihi nya ehile ịịwa, ọ kaa hu ọgụ-ẹpẹtẹ ọkịla myịmyị. O ri opyii kọ ka baa ụka kị ja pá iMoto, kọ ka kpaa ụgbẹyị jaabwọ kị wẹẹ maga nyọka kpa ang ọlẹ kị jẹ́ họ ụkụrwọ. Ẹlịyẹ ahị tị́ ka jẹ́ bwu ẹpwụ nya ọ-chụ pwokwita ọwẹ?

5. (a) Jaabwọ ká ụpwụ nya ịJọn 14:15 bala 1 ịJọn 2:3 mẹjẹ, ịyẹ ahị tị́ baba nyọka mẹjẹ angịlẹ kị wẹẹ jẹ́ ịBayịbụụ kị ka họ? (b) Ya ọ-chụ pwokwita ịhyẹ nya abwọlẹ kahị ka bwu da angịlẹ kahị-ị̀ jẹ́ ịBayịbụụ ta ụbwọ wẹẹ.

⁵ Ụka kahị ja mẹ ịBayịbụụ jẹ angịkịla, ahị kaa mẹ ang ọlẹ ká Ohe tịtọ bwu ẹga nyahị jáa. Ma, ọọwa ahị tịị họ ba kem ka. Ahị ka mẹjẹ angịlẹ kị wẹẹ jẹ́ ịBayịbụụ abwọlẹ kị ka kpa ẹla ọlụwa họ ụkụrwọ ẹnụ myị́ ẹnụ ẹ-ẹpwụ nya ọhịhị nyaa. (Wa ịJọn 14:15; 1 ịJọn 2:3.) Bwula abwẹla nyahị, ahị ka mẹjẹ angịlẹ kị wẹẹ jẹ́ ịBayịbụụ jaabwọ kị ka kpa ẹlịlẹhị ịlẹpwụ nya ịBayịbụụ họ ụkụrwọ u-ube-ụpwụ, ọ-ọlụkụrwọ lee ụka kị ja ya ụya. Ahị ka jẹ́-ẹ joja nya ang ịlẹ kị họ ẹ-ẹpwụ nya ọhịhị nyahị ahị lụka ọkẹkpẹ nyọka mẹjáa abwọlẹ ká ọ-kpa ẹla ọlẹpwụ nya ịBayịbụụ họ ụkụrwọ gbehi bwu ẹpwụ nya ang ọtịpyọ ọhẹ lee abwọlẹ kọ dahị ụbwọ nyọka cheje ọnyịịla. Ẹ-ẹga nya angịlẹ kahị wẹẹ mẹ ịBayịbụụ jẹ, ahị ka jẹ́-ẹ raabwọ ha iJihova kọ ka ya olegu ịgọgọ nyamwụ haa nyọka kpaa ụgbẹyị.​—Jọn. 16:13.

6. Ịyẹ tị́ ji ẹpwụ nyọka mẹ ang jẹ angịkịla kị ka ju ihi nya ehile nya iJisọsị?

⁶ Ịyẹ tị́ ji ẹpwụ nyọka mẹ ang jẹ angịkịla kị ka ju ihi nya ehile nya iJisọsị? Ahị baba nyọka da angịlẹ ahị kaa mẹ ịBayịbụụ jẹ ụbwọ nyọka la irya nya ọ-họ ká angịkịla ka ri angịjụgbẹyị. Angịhyẹ ịlẹ kahị kaa jẹ́ ịBayịbụụ ta kaa juhi la ọ-ka yụbwọ ju ụkụrwọ nya ẹrụ ọnyịịla ọ-kpa pyẹ ẹ-ẹpwụ. Lẹ, ahị baba nyọka ju ugbodu ụka kahị ja mẹ ang jáa ụ-ụgbẹyị ọlẹ ká ang ọjẹ́jẹ nyaa ka la kpori-kpori gụ olene, kọ ka gwaa ọ-ọkịlẹtụ bala ọ-ka gwaa gbịla nyọka kpa họ ụkụrwọ. Ụgbẹyị oyina ahị tị́ ka kpa nyọka da angịlẹ ahị kaa jẹ́ ịBayịbụụ ta ụbwọ kị ka la irya nyọka ya ẹrụ ọnyịịla jẹ angịkịla?

7. Ányị ahị tị́ ka da ọngọlẹ kọ wẹẹ jẹ́ ịBayịbụụ ụbwọ nyọka la irya nya o-ya ẹrụ ọnyịịla je angịkịla?

⁷ Ahị ka jẹ́-ẹ ta ọngọlẹ kahị wẹẹ jẹ́ ịBayịbụụ ta ịtọ ẹla ịlịịlẹ myị́: “Ányị ọhịhị nyang à tị́ há gụ olene chajị nya ọ-kpa ẹla ọla ịBayịbụụ họ ụkụrwọ? À me irya nyori angịkịla baba nyọka wo ẹla ọwẹ? Ịyẹ a tị́ ka họ nyọka daa ụbwọ?” (Etu 3:27; Mat. 9:37, 38) Mẹ ịTrakị ịlẹ kị ji ẹpwụ nya Ang-abwọ ịlẹ Kahị kaa Kpa Mẹ Ang Jẹ, jẹ ọngọlẹ kaa mẹ ịBayịbụụ jẹ, ka ya iwe da họọ nyọka chụ ịlẹ kọ me irya nyori nyị ka kpụ alugbiyegu, aligu lee alụkụrwọ nyamwụ ịpyọ. Ya ịmanyị-ịmanyị ha ọngọlẹ kaa mẹ ịBayịbụụ jẹ. Họ mẹjọ́ọ nyọka dọọ ụbwọ jẹ́ jaabwọ kọ ka bwu ya ha ọngịnyị ụ-ụgbẹyị ọdụmwọ. Ụka ká ọngọlẹ kahị kaa mẹ ịBayịbụụ jẹ a wẹ ka ri ọngọ kpa ẹrụ ọnyịịla pyẹ ọlẹ kọ hu enyi Ohe lẹka, ahị ka bajẹ balọọ kpehe nya ẹla Ohe chajị nyọka dọọ ụbwọ.​—Ọngọ. 4:9, 10; Luk. 6:40.

8. Ịyẹ tị́ du kọ baba ká angịlẹ kahị kaa mẹ ịBayịbụụ jẹ ka la ọháha ọnyọọngịrị ẹ-ẹga nya Ohe Oluhye bala angịnyị ehe? (Yẹ akpa ọlẹ kọ ri, “ Abwọlẹ Ahị ka Da Angịlẹ Kahị-ị́ Mẹ ỊBayịbụụ Jẹ Ụbwọ Nyọka La Ọháha ẹ-Ẹga nya Ohe Gụ Ene.”)

⁸ Kpịtịya nyori, iJisọsị ya ahị nyị mẹjẹ angịkịla kị ka ‘kpa ehile nyamwụ ịịwa họ ụkụrwọ.’ Ahị jẹ́ nyori, ehile imiiye ịlẹ kị gụgụ wuu kị ri ehile nyọka la ọháha ẹ-ẹga nya Ohe Oluhye bala ọngịnyị ọọnahị, juwa ẹ-ẹpwụ nya ẹlẹwẹ.  Chajị ịwa imimiiye dori wu ụkụrwọ nyọka kpa ẹrụ ọnyịịla pyẹ bala ọ-họ ká angịkịla ka ri angịjụgbẹyị. (Mat. 22:37-39) Ụ-ụgbẹyị oyina ị tị́ dori wu awụlẹ? Ang ọkpọnchị ọlẹ kọ du kahị kaa kpa ẹrụ ọnyịịla pyẹ ri ọháha​—ọháha ọlẹ kahị la ẹ-ẹga nya Ohe Oluhye bala angịnyị aanahị. Ọ tị chịkpẹẹ ká ọ-kụ irya u-uhye nya ẹrụ ọnyịịla ọ-kpa pyẹ ka chị uhi ju angịhyẹ nya angịlẹ kahị-ị̀ jẹ́ ịBayịbụụ ta myị́. Ma, ahị ka jẹ́-ẹ ju angịlịnyị ọhụ nyori bwula ụbwọ ọdada nya iJihova, ị ka kụrụ uhi nya angịnyị ojuju dụmwọ-dụmwọ. (Eje. 18:1-3; Etu 29:25) Akpa ọlẹpwụ nya ang ọjẹ́jẹ ọlẹ chabwọ nya ọgụ-ẹpẹtẹ ịlẹ kahị ka hu nyọka da ọngọ wẹẹ jẹ́ ịBayịbụụ ụbwọ nwà ẹ-ẹpwụ nya ọháha nya Ohe Oluhye. Datị hi ọwẹ, ịyẹ ọjịra-jịra à tị́ ka họ nyọka da angịjụgbẹyị inyeewe ụbwọ kị ka nwà kịlahị ẹ-ẹpwụ nya ọ-mẹ ọháha jẹ?

9. Ẹ-ẹpwụ nya ọ-chụ pwokwita nya ọngọ ma iMoto pá, agbẹyị iyina ọngọọwa à tịị jẹ́ ẹla i-ju apyobwuna?

⁹ Kụ irya myịmyị nya ọ-chụ pwokwita nya ọngọlẹ kọ wẹẹ ma iMoto pá wẹẹ. Jaabwọ kọ wẹẹ jẹ ụ-ụgbẹyị ká ọngọ mẹ ang jọ́ọ juwa bọọ ba, ányị ọ tịị kịnyaa la ang ọjẹ́jẹ? Bwula o-ke ụrụ wo la ọngọlẹ kọ wẹẹ mẹjọ́ọ bala ọ-kpẹhị yẹ angịkịla ịlẹ kị wẹẹ pá iMoto ịnyịnyị. Ọ-chụ pwokwita, ọngọlẹ kọ wẹẹ mẹjọ́ọ ka ya ụ́chụ́ me ọngọ pá iMoto ọkịla ọlẹ kọ ya iwe ha angịkịla nyọka ji ịlahị nyamwụ myị́. Lee ọ ka jẹ́-ẹ ya joo ụka ká ọngọkịla meme pwuru ila nyamwụ chajị ká angị pá iMoto ịkịla ka jẹ́-ẹ yọyị myị́. Ọgụ-ẹpẹtẹ ịlịịwẹ ka jẹ́-ẹ mẹ ẹla o-ju apyobwuna jẹ ọngọlẹ kọ wẹẹ ma iMoto pá, kọ ka kpa họ ụkụrwọ ụka kọ juwa pá iMoto.

10. Ịyẹ à tị́ ka jẹ́-ẹ da ọngọ wẹẹ jẹ́ ịBayịbụụ ụbwọ nyọka nwà kịlahị ẹ-ẹga nya ang nya olegu?

¹⁰ Ịnyịnyị, ọngọlẹ kọ wẹẹ jẹ́ ịBayịbụụ kọ dọmwụ nyọka jẹdịyẹ ụ-ụgbẹyị nya ọhịhị, á kaa jẹ́ ang bwu ẹga nya ọngọ mẹ ang jọ́ọ kem ka. Ma, ọ kaa jẹ́ ang bwu ọgụ-ẹpẹtẹ ịnyịịla nya anchẹ nya iJihova ịkịla. Chajị nyọọwa lẹ, ịyẹ à tị́ ka da ọngọ wẹẹ jẹ́ ang ụbwọ nyịlẹhị-ịlẹhị nyọka nwà kịlahị ẹ-ẹga nya ang nya olegu? Ọjịra-jịra ọkaka ịnyị. Ịyẹ tị́ du kọ lịnyị? Ang ọlẹ kị kaa mẹjẹ bwu ịBayịbụụ ọọjịra-jịra dudu ká ang ọjẹ́jẹ nyaa ka gụ olene, ọmyịmyị nyaa ka la ọngịrị bala ọ-daa ụbwọ nyọka nwà kịlahị ẹ-ẹpwụ nya ọháha ọlẹ kị la ẹ-ẹga nya Ohe Oluhye. (Ụkụr. 15:30-32) Ịnyịnyị ụka kị juwa ọọjịra-jịra, ọngọlẹ kọ kaa mẹ ịBayịbụụ jọ́ọ ka jẹ́-ẹ yoo je aanahị ịkịla ịlẹ kị ka ji iwe-ahụrụ ọlala ịnyamwụ myị́. Ọngọlẹ kọ wẹẹ jẹ́ ịBayịbụụ ka yẹ ọgụ-ẹpẹtẹ nya aanahị ịlẹ kịị mẹ ọháha jẹ ẹ-ẹpwụ nya ọjịra-jịra. Kụ irya ju ọ-chụ pwokwita ịlẹ wẹẹ.

11. Ọgụ-ẹpẹtẹ ịlányị ọngọlẹ kọ wẹẹ jẹ́ ịBayịbụụ à tị́ ka yẹ ọọjịra-jịra? Ányị ọọwa à tị́ ka jẹ́-ẹ dọọ ụbwọ?

¹¹ Ọnyang ọhẹ kọ kaa jẹ́ ịBayịbụụ kọ juwa bala ọrụmwụ kaka yẹ ọọnahị ọkịla ọlẹ kọ ju iiwe-ahụrụ ọlịnyị. O gwoo ọ-ọkịlẹtụ nyọka yẹ jaabwọ ká ọọnahị ọwẹ kaa maga nyịlẹhị-ịlẹhị nyọka wẹ ọjịra-jịra bala anjwo nyamwụ ichiche. Ọngọkịla ọlẹ kọ wẹẹ jẹ́ ịBayịbụụ kọ tị wẹẹ maga nyọka tụụbwọ hi ẹchụ ọnwànwà wẹ ka jẹ́ ọọnahị ọlẹ kọ la akama ụma ọlịnyị kọ tị maga kpụ̀ ọ kụrwọọ myị́ lẹ. Ọọnahị ọọwa ya je ọngọlẹ kọ wẹẹ jẹ́ ịBayịbụụ jaabwọ ká ọháha ọlẹ kọ la ẹ-ẹga nya iJihova ọ-nwà kịlahị gwoo gbịla nyọka ju ihi nya ehile nyamwụ. (2 Kọr. 7:1; Filip. 4:13) Nyọlẹ ká ọọnahị ya joo abwọlẹ kọ bwu hwabwọ la ẹchụ ọnwànwà kpá, o byoo yẹkẹẹ: “Ahụ ịnyịnyị ka ba la ẹchụ ọnwànwà myị́.” Ọngọlẹ kọ wẹẹ jẹ́ ịBayịbụụ ye ọhụ ojuju bala ọ-myị nyori ọ ka họọ myị́. Ọyẹẹnọ ọhẹ kọ wẹẹ jẹ́ ịBayịbụụ wẹ ka jẹ́ ọọnahị ọyẹẹnọ ọkịla ọlẹ kọ kaa chị ọkẹkẹnị yẹẹyẹẹ nyọlẹ ko ri Olibeenu nya iJihova. Ụka kọ yẹ jaabwọ ká ọọnahị ọwẹ wẹẹ chị ọkẹkẹnị, ọ tịtọ nyọka jẹ́ ang ọlẹ kọ du kọ kaa chị ọkẹkẹnị ụka myị́ ụka.

12. Ịyẹ tị́ du kahị ka jẹ́-ẹ ya nyori ọng myị́ ọng ẹ-ẹpwụ nya ọjịra-jịra ka jẹ́-ẹ da angịlẹ kị wẹẹ jẹ́ ịBayịbụụ ụbwọ?

¹² Ụka ká angịlẹ kị wẹẹ jẹ́ ịBayịbụụ á wẹ ka jẹ́ aanahị ịdatị-ịdatị ịlẹ kị la ọmyịmyị, ị kaa jẹ́ ang  bwu ọgụ-ẹpẹtẹ nyaa u-uhye nya ang ọlẹ kọ ri, nyọka ju ihi nya ehile nya ịKịrayịsị ọlẹ kọ ya nyori Ohe bala angịnyị aanahị nyị ka háahị. (Jọn. 13:35; 1 Tim. 4:12) Ma jaabwọ kahị ya ene, ọngọlẹ kọ wẹẹ jẹ́ ịBayịbụụ ka jẹ́-ẹ jẹ́ ang bwu ẹga nya ọọnahị ọlẹ kọ la akama ụma ọlẹ kọọwa wẹẹ chịpwụrụ bwu. Ọngọlẹ kọ wẹẹ jẹ́ ịBayịbụụ ka jẹ́ ang bwu ọgụ-ẹpẹtẹ ịlịnyị nyori, ọwa ịnyịnyị ka jẹ́-ẹ yẹ abwẹla nyamwụ da kpụ̀ ọ ka ri ọngọjụgbẹyị nya ịKịrayịsị myị́. (Ehile. 30:11) Ọng myị́ ọng ọọjịra-jịra ka jẹ́-ẹ dụbwọ ụ-ụgbẹyị ọhẹ lee ọkịla chajị ká angịlẹ kị wẹẹ jẹ́ ịBayịbụụ ka jẹ́-ẹ nwà ẹ-ẹpwụ nya ang nya olegu. (Mat. 5:16) Ịyẹ kpangga ahụ a tị kaa họ nyọka ju angị wẹẹ jẹ́ ịBayịbụụ ịlẹ kịị wẹ ọjịra-jịra ọhụ?

13-14. Ányị iJisọsị à tị́ họ ụka ọlẹ ká ọkịlẹtụ kpụ alẹrụ nyamwụ enyi?

¹³ Ahị tịtọ kahị ka da aanahị ịlẹ kị gbile ẹta ẹkpẹ ụbwọ nyọka myịmyị-ị̀ kpa ẹla nya Ohe pyẹ bala ọ-họ ká angịkịla ka ri angịjụgbẹyị. Ụgbẹyị ọlẹ ká iJisọsị bwu kpa alẹrụ nyamwụ ịlẹ kị la ọkịlẹtụ ọ-kpụ enyi mẹ ang ọlẹ kaahị ịnyịnyị ka jẹ́-ẹ họ alẹ jẹ.

¹⁴ Ene kị wẹẹ nwụ iJisọsị, alẹrụ nyamwụ wuu “rụnyẹ rụ, nyị epepe hyoo.” (Mak. 14:50; Jọn. 16:32) Ányị iJisọsị à tị́ họ ẹ-ẹga nya alẹrụ nyamwụ ụka ọlẹ ká ọkịlẹtụ kpaa enyi? Lụka o-kpii nyọlẹ ká iJisọsị wuleji bwula igu kpá, o byi angịjụgbẹyị nyamwụ ịhyẹ yẹkẹẹ: “Anụ juhi kpong-kpong kaka. Anụ kele kaka ya je anyadam [nyori am nyị wuleji bwula igu lẹ mẹ].” (Mat. 28:10) IJisọsị á nyẹẹkpẹ da alẹrụ nyamwụ ka. Nanana nyori ịwa ji ẹkpẹ doo, ọ wụraa nya “anyadam.” Lala iJihova, iJisọsị la ahyẹẹrwẹrwa bala ọ-kaa hịnyọhi.​—2 Ịdị. 13:23.

15. Ányị ẹla nya angịlẹ kị hwabwọ la ọ-kpa ẹrụ ọnyịịla pyẹ, à tịị lahị?

¹⁵ Ịnyịnyị, ẹla nya angịlẹ kị hwabwọ la ọ-kpa ẹrụ ọnyịịla pyẹ ri ẹla nyahị yẹẹyẹẹ. Ị ri aanahị, ị tị háahị yẹẹyẹẹ! Ahị kpịtịya nya ụkụrwọ nya ọháha ọlẹ ká aanahị ịwẹ họ lụka ọkẹkpẹ. Angịhyẹ lẹpwụ nyaa dọmwụ họ ụkụrwọ la ẹka lụmẹ-lụmẹ. (Hib. 6:10) Iwe nyaa dahị yẹẹyẹẹ! (Luk. 15:4-7) Lala iJisọsị, agbẹyị iyina ahị tị́ ka mẹjẹ nyori ẹla nyaa ri ẹla nyahị?

16. Ányị ahị tị́ ka mẹjẹ nyori ẹla nya aanahị ịlẹ kị gbile ẹta ẹkpẹ ri ẹla nyahị?

¹⁶ Wụraa ụ-ụgbẹyị ọdụmwọ wẹ ọjịra-jịra. Ụgbẹyị ọhẹ ọlẹ ká iJisọsị ju alẹrụ nyamwụ ịlẹ ká ọkịlẹtụ kpenyi ọhụ, ri ọ-wụraa ka ọjịra-jịra ọhẹ. (Mat. 28:10; 1 Kọr. 15:6) Ịnyịnyị alẹ, ahị ka ju angịlẹ kị gbile ẹta ẹkpẹ ọhụ nyọka ka ọjịra-jịra kori kị dọmwụ nya ọ-họ ịnyị lẹka. Ahị jẹ́ nyori, ahị ka wụraa pwụ ụka ịmanyị-ịmanyị ene kị ka myị ọnụ nyọka wẹ. Ịwẹẹ ọdada á juwa ka, iJisọsị chị ọkẹkẹnị nyọlẹ ká angịjụgbẹyị nyamwụ ye ọwụrụ-wụrụ nyamwụ myị.​—Kụ ẹhị yẹ ịMatiyu 28:16 bala iLuku 15:6.

17. Ányị ahị tị́ ka họ ụka kahị yẹ ọngọlẹ kọ gbile ẹta ẹkpẹ ọọjịra-jịra?

¹⁷ Daa ọwụraba yẹẹyẹẹ. IJisọsị họ ká angịjụgbẹyị nyamwụ jẹ́ nyori nyị ye ịwa myị ụka ọlẹ kị tọ awụlẹ. IJisọsị-ị́ dayị kị ka wẹ ka tọọ ene ka. Ọkọkọ nyọọwa, ọwa à jẹ tụ́ baa, ọ dọmwụ nya o-ya ẹla balaa lẹ. (Mat. 28:18) Ányị ahị tị́ ka họ ụka kahị yẹ ọngọlẹ kọ gbile ẹta ẹkpẹ kọ ju wẹ Ube nya Ịpyị-Adịrahụ? Ahị ka jene dọọ ọwụraba yẹẹyẹẹ. Ụka nya ọgbanyẹ, ahị ka chuko nyori áhị jẹ́ ẹla ọlẹ kahị ka ya ka myị́. Ma la ọ-chị oyoyi jwoo ka, ahị ka jẹ́-ẹ byoo myị́ nyori ahị chị ọkẹkẹnị nyọlẹ kahị yọọ.

18. Ányị ahị tị́ ka ju angịlẹ kị gbile ẹta ẹkpẹ ọhụ?

¹⁸ Jwaa ọhụ. Ọ chịkpẹẹ myị́ ká angịjụgbẹyị nya iJisọsị ka la uhi ojuju u-uhye nya ụkụrwọ nyọka kpa ẹrụ ọnyịịla pyẹ chị odehe ọnụ wuu. IJisọsị tị ya ahị ọdahile ha angịjụgbẹyị nyamwụ bwula o-byaa yẹkẹẹ: “M̀ ka juwa tanụ ẹ-ẹga myị́ ẹga ụka wuu.” (Mat. 28:20) Ẹlẹwẹ da angịjụgbẹyị nyamwụ ụbwọ? Ee. Lụka o-kpii  ku ẹkpẹ nyọọwa, ị kịnyaa la ụkụrwọ “juwa mẹ ang jẹ angịnyị ehe bala o-juwa ya ẹla nya Ohe Oluhye.” (Ụkụr. 5:42) Angịlẹ kị gbile ẹta ẹkpẹ ịnyịnyị baba nya ọhụ ojuju. Ị ka juhi myị́ nyọka dọmwụ nya ọ-kpa ẹrụ ọnyịịla pyẹ myịmyị. Ahị ka jẹ́-ẹ jwaa ọhụ nyori, ị́ ka kpehe nya ẹla Ohe ụbwaa ka. Ụka kị nwụlanọ, ahị ka bajẹ balaa kpehe nya ẹla Ohe. Ahị tị jẹ́ nyori ị ka chị ọkẹkẹnị kori kahị daa ụbwọ ụka kị dọmwụ nyọka kpa ẹrụ ọnyịịla pyẹ myịmyị. Ụka kahị yẹ angịlẹ kị gbile ẹta ẹkpẹ lala aanahị kahị tị kpaa ụ-ụgbẹyị ọwọọwa, o dudu kị kaa la ila ọchịchị myịmyị. Ọjịra-jịra tị kaa chị ọkẹkẹnị u-uhye nyọọwa.

19. Irya oyina ahị tị́ la ọ-ọkịlẹtụ nyahị? Ịyẹ tị́ du?

¹⁹ Ányị ụkụrwọ nya o-ya ẹla Ohe bala ọ-họ ká angịkịla ka ri angịjụgbẹyị à tị́ ka tata ka ba? Gbee ka da ocheju ịnyị. (Mat. 28:20; yẹ Glossary, “Conclusion of the system of things.”) Ahị ka jẹ́-ẹ kpa ẹrụ ọnyịịla pyẹ bala ọ-họ ká angịkịla ka ri angịjụgbẹyị gbee da ụka ọwẹ myị́? Ahị cheje nyọka họ ịnyị! Ọ tị kaa kpụhị ịpyọ nyọka kpa ụka, ọngịrị bala okpoko nyahị họ ụkụrwọ nyọka mwahị nya “angịlẹ kị chịla-chịla nyọka la ọhịhị ọmyịmyị-ka.” (Ụkụr. 13:48, NW) Ụka kahị họ ịnyị, ahị wẹẹ dịrẹ ọgụ-ẹpẹtẹ nya iJisọsị. O yẹkẹẹ: “Ọ-ka họ irya nya Ohe Oluhye jịra bala ọ-ka họ ụkụrwọ ọlẹ ká Ohe Oluhye dum ẹrụ warị nyọka họhọ wuu jịra gbanggbang, a ri ang oriri nyam” lẹ. (Jọn. 4:34; 17:4) Irya ọlẹ kahị la ọ-ọkịlẹtụ nyahị ịnyịnyị à wẹ lẹ. Ahị tịtọ nyọka họ ụkụrwọ ọlẹ ká iJisọsị ya juhi ụbwọ kpá. (Jọn. 20:21) Ahị tị tịtọ ká angịkịla tụ́ angịlẹ kị gbile ẹta ẹkpẹ ka bọhụ ẹ-ẹpwụ nya ụkụrwọ ọwẹ balahị.​—Mat. 24:13.

20. Jaabwọ ká ụpwụ nya Ala iFilipayị 4:13 ya, ịyẹ tị́ du kahị ka jụ ụkụrwọ ọlẹ ká iJisọsị ya juhi ụbwọ họ myị́?

²⁰ Ịnyịlẹhị lẹ, ó ri ang ọchịkpẹẹ nyọka họ ụkụrwọ ọlẹ ká iJisọsị ya juhi ụbwọ nyị họ ka. Ma, áhị kaa họ ụkụrwọ ọwẹ ụbwọọhị ka. IJisọsị myị ọnụ nyori ọwa nyị ka juwa balahị. Ahị wẹẹ họ ụkụrwọ nyọka họ ká angịkịla ka ri angịjụgbẹyị lala “alụkụrwọ ị-da Ohe Oluhye ụbwọ ẹ-ẹpwụ nya ụkụrwọ ọhọhọ nyamwụ” bala angị họ ụkụrwọ ‘bala ịKịrayịsị.’ (1 Kọr. 3:9; 2 Kọr. 2:17) Chajị nyọọwa lẹ, ahị ka họọ myị́. O ri iwe bala ọkẹkẹnị ọtụka-ọtụka nyọka họ ụkụrwọ ọwẹ bala ọ-da angịkịla ụbwọ kị ka họọ ịnyịnyị!​—Wa Ala iFilipayị 4:13.