1. Sigun iti Mateo 28:18-20, ania ti imbilin ni Jesus?

KALPASAN a napagungar ni Jesus, nagparang kadagiti adalanna a naguummong idiay Galilea. Adda napateg nga ibagana kadakuada. Ania dayta? Masarakan ti imbagana iti Mateo 28:18-20.—Basaen.

2. Ania dagiti saludsod nga usigentayo?

² Ti bilin ni Jesus a panagaramid kadagiti adalan ket agaplikar met iti tunggal adipen ti Dios ita. Usigentayo ngarud ti tallo a saludsod a konektado iti annongen nga inted kadatayo ni Jesus. Umuna, malaksid iti panangisuro kadagiti pagalagadan ti Dios kadagiti baro nga adalan, ania pay ti masapul nga aramidentayo? Maikadua, kasano a makatulong ti amin nga agibumbunannag iti kongregasion tapno rumang-ay iti naespirituan dagiti mayad-adalan iti Biblia? Maikatlo, kasanotayo a matulongan dagiti di aktibo a kapammatiantayo a makiraman manen iti trabaho a panagaramid iti adalan?

3. Ania dagiti espesipiko nga instruksion nga inraman ni Jesus iti bilinna?

³ Nalawag dagiti instruksion ni Jesus. Masapul nga isurotayo kadagiti tattao dagiti imbilinna. Ngem ditay liplipatan ti maysa a napateg a detalye. Saan nga imbaga ni Jesus: ‘Isuroyo kadakuada ti amin nga imbilinko kadakayo.’ Imbes ketdi, imbagana: Isuroyo kadakuada a “tungpalenda ti amin nga imbilinko kadakayo.” Tapno masurottayo dayta nga espesipiko nga instruksion no mangyad-adaltayo iti Biblia, masapul a saantayo laeng nga isuro ida no di ket igiyatayo pay ida. (Ara. 8:31) Apay?

4. Ania ti kaipapanan ti panangtungpal iti maysa a bilin? Iyilustrar.

⁴ Ti ‘panagtungpal’ iti maysa a bilin kaipapananna ti panagtulnog  iti dayta. Tapno iyilustrar no kasanotayo a maisuro ti maysa a mangtungpal wenno agtulnog kadagiti imbilin ni Kristo, panunotentayo daytoy a pagarigan. Ania ti aramiden ti instruktor iti panagmaneho tapno maisurona dagiti estudiantena a mangtungpal kadagiti linteg-trapiko? Umuna, isurona iti klaseda dagiti linteg a masapul a masurot iti kalsada. Ngem tapno maisurona no kasanoda nga agtulnog kadagita a linteg, adda pay sabali nga aramidenna. Masapul a kaduaen ken igiyana ida bayat nga aktual nga agmanmanehoda iti kalsada ken iyap-aplikarda dagiti nasursuroda. Ania ti masursurotayo iti daytoy a pagarigan?

5. (a) Sigun iti Juan 14:15 ken 1 Juan 2:3, ania ti masapul nga isurotayo kadagiti iyad-adalantayo iti Biblia? (b) Mangted kadagiti pagarigan no kasanotayo nga igiya dagiti iyad-adalantayo.

⁵ No mangyad-adaltayo iti Biblia, isursurotayo dagiti kayat ti Dios nga aramidentayo. Ngem adda pay masapul nga aramidentayo. Masapul nga isurotayo dagiti iyad-adalantayo a mangyaplikar kadagiti maad-adalda iti inaldaw a panagbiagda. (Basaen ti Juan 14:15; 1 Juan 2:3.) Babaen ti ulidantayo, maipakitatayo kadagiti iyad-adalantayo no kasanoda a mayaplikar dagiti prinsipio ti Biblia iti eskuelaan, iti pagtrabahuan, wenno iti paglinglingayan. Mabalintayo ti mangyestoria iti kapadasantayo no kasano a nakatulong ti panangyaplikar iti bilin ti Biblia tapno mailikliktayo iti peggad wenno tapno makaaramidtayo iti nainsiriban a desision. Iti sanguanan dagiti iyad-adalantayo, ikararagtayo ken Jehova nga igiya ida ti nasantuan nga espiritu.—Juan 16:13.

6. Ania ti karaman iti panangisurotayo kadagiti iyad-adalantayo a tungpalenda dagiti bilin ni Jesus?

⁶ Ania ti karaman iti panangisurotayo kadagiti iyad-adalantayo a tungpalenda dagiti bilin ni Jesus? Masapul a tulongantayo ida a maaddaan iti tarigagay nga agaramid iti adalan. Adda dagiti mayad-adalan a maamak a mangasaba. Masapul ngarud nga agan-anustayo bayat a tultulongantayo ida a mangpauneg iti pannakaawatda kadagiti kinapudno iti Biblia tapno bumileg ti pammatida. Iti kasta, madanon ti pusoda ket matignayda a mangasaba. Ania ti mabalintayo nga aramiden tapno matulongantayo dagiti iyad-adalantayo a maaddaan iti tarigagay a mangikasaba iti naimbag a damag?

7. Kasanotayo a matulongan ti iyad-adalantayo a maaddaan iti tarigagay a mangikasaba iti naimbag a damag?

⁷ Mabalintayo nga isaludsod dagitoy iti iyad-adalantayo: “Kasano a simmayaat ti biagmo idi inakseptarmo ti mensahe ti Pagarian? Panagkunam, masapul ngata a mangngeg ti sabsabali daytoy a mensahe? Ania ti mabalinmo nga aramiden tapno matulongam ida?” (Prov. 3:27; Mat. 9:37, 38) Ipakitam iti iyad-adalam dagiti tract iti Toolbox iti Panangisuro ket pagpiliem no ania kadagita ti panagkunana a magustuan dagiti kabagian, gagayyem, wenno katrabahuanna. Ikkam isuna iti sumagmamano kadagitoy a tract. Agpraktiskayo a dua no kasano nga ipaima ti maysa a tract iti nataktika a pamay-an. Siempre, no naaprobaranen ti iyad-adalantayo kas di bautisado nga agibumbunannag, masapul a kaduaentayo a mangasaba tapno maigiyatayo.—Ecl. 4:9, 10; Luc. 6:40.

8. Apay a napateg a maaddaan dagiti iyad-adalantayo iti nauneg a panagayat iti Dios ken iti padada a tattao? (Kitaen met ti kahon a “ Tulongam ti Iyad-adalam a Mangpauneg iti Ayatna iti Dios.”)

⁸ Laglagipentayo nga imbilin ni Jesus nga isurotayo ti sabsabali a ‘tungpalenda ti amin nga imbilinna.’ Sigurado a karaman iti dayta ti dua a kadakkelan a bilin—panangayat iti  Dios ken iti kaarruba—nga agpada a konektado iti trabaho a panangasaba ken panagaramid iti adalan. (Mat. 22:37-39) Kasano? Ti kangrunaan a motibotayo a mangasaba ket ayat—ti ayattayo iti Dios ken iti kaarruba. Natural laeng a mabuteng a mangasaba ti dadduma a mayad-adalan. Ngem maipasiguradotayo kadakuada a matulongan ida ni Jehova tapno in-inut a malabananda ti panagbuteng iti tao. (Sal. 18:1-3; Prov. 29:25) Ipakita ti kahon iti daytoy nga artikulo dagiti mabalintayo nga aramiden tapno matulongantayo ti iyad-adalantayo a mangpauneg iti ayatna iti Dios. Kasta met, ania ti mabalin nga aramiden ti kongregasion tapno matulongan dagiti baro nga adalan tapno ad-adda a maipakitada ti ayat?

9. Iti ilustrasion maipapan iti estudiante nga agsursuro nga agmaneho, kasano a makasursuro isuna kadagiti napateg a leksion?

⁹ Subliantayo ti ilustrasion maipapan iti estudiante nga agsursuro nga agmaneho. Bayat nga agmanmaneho a kaduana ti instruktorna, kasano a makasursuro? Dumngeg iti instruktorna ken obserbaranna dagiti naannad a drayber. Kas pagarigan, mabalin nga itudo ti instruktor ti maysa a drayber a siaasi a nangpauna iti sabali a drayber. Wenno mabalin nga itudona ti narespeto a drayber a nangibaba iti headlight-na tapno saan a mapurar dagiti kasinnabatna a drayber. Makatulong dagita a pagarigan tapno makasursuro ti estudiante kadagiti napateg a leksion a mayaplikarna iti panagmanehona.

10. Ania ti makatulong iti mayad-adalan tapno rumang-ay iti naespirituan?

¹⁰ Kasta met, ti mayad-adalan iti Biblia a mangrugrugin a magna iti dalan ti biag ket saan laeng a makasursuro iti mangyad-adal kenkuana no di ket uray kadagiti nasayaat nga ulidan ti dadduma nga adipen ni Jehova. Ania ngarud ti dakkel a makatulong kadagiti mayad-adalan tapno rumang-ayda iti naespirituan? Panagatender kadagiti gimong ti kongregasion. Apay? Ti masursuroda kadagiti gimong ti mangpauneg iti pannakaammoda, mangpabileg iti pammatida, ken mangpauneg iti ayatda iti Dios. (Ara. 15:30-32) Mabalin met nga iyam-ammo ti mangyad-adal ti iyad-adalanna kadagiti kakabsat a posible a kapadana iti kasasaad. Ania dagiti mabalin a makitana a nasayaat nga ulidan dagiti kakabsat iti panangipakita iti ayat?

11. Iti kongregasion, ania dagiti ulidan a mabalin a makita ti mayad-adalan, ken ania ti mabalin nga epekto dagita kenkuana?

¹¹ Usigentayo dagiti sumaruno nga eksena. Makitkita ti mayad-adalan iti Biblia ti maysa a kabsat a babai a kapadana nga agsolsolo a nagannak. Maparparegta ti mayad-adalan a makakita iti kabsat a babai a mangikagkagumaan a mangitugot kadagiti babassit nga annakna iti Kingdom Hall. Ti sabali pay a mayad-adalan a marigatan a mangisardeng iti panagsigariliona naam-ammona ti maysa a kabsat a kasta met idi ti problemana ngem naisardengna. Inyestoria kenkuana ti kabsat no kasano a nakatulong ti umun-uneg nga ayatna ken Jehova tapno agtulnog kadagiti bilin ti Dios. (2 Cor. 7:1; Fil. 4:13) Kalpasanna, napigpigsan ti pakinakem ti mayad-adalan idi imbaga ti kabsat, “Maisardengmo met dayta.” Adda met agtutubo a mayad-adalan a nadlawna ti maysa nga agtutubo a kabsat a maragragsakan iti panagserbina. Gapu iti dayta, kayatna a maammuan ti ad-adu pay a rason no apay a kanayon a naragsak ti kabsat.

12. Apay a maibagatayo nga adda maaramidan ti tunggal maysa iti kongregasion a tumulong kadagiti mayad-adalan?

¹² No agduduma a matalek a kakabsat ti maam-ammo dagiti mayad-adalan iti Biblia, masursuroda no kasanoda a tungpalen ti bilin ni Kristo nga ayaten ti Dios ken ti pada a tao.  (Juan 13:35; 1 Tim. 4:12) Maysa pay, kas nadakamaten, ti mayad-adalan ket makasursuro kadagiti kakabsat a naipasango kadagiti problema a kas iti mapaspasaranna. Gapu kadagiti ulidanda, nasursurona a kabaelanna nga aramiden dagiti kasapulan a panagbalbaliw tapno agbalin nga adalan ni Kristo. (Deut. 30:11) Makatulong ti tunggal maysa iti kongregasion iti nadumaduma a pamay-an tapno rumang-ay iti naespirituan dagiti mayad-adalan. (Mat. 5:16) Ania dagiti ar-aramidem tapno maparegtam dagiti makigimgimongen a mayad-adalan iti Biblia?

13-14. Kasano ti panangtrato ni Jesus kadagiti maup-upay nga apostolna?

¹³ Kayattayo a tulongan dagiti di aktibo a kakabsattayo a makiraman manen iti trabaho a panagaramid iti adalan nga imbilin ni Kristo. Ti panangtrato ni Jesus kadagiti maup-upay nga apostolna ipakitana ti mabalintayo nga aramiden ita.

¹⁴ Idi agpatinggan ti ministerio ni Jesus ditoy daga sakbay ti ipapatayna, “nagpapanaw amin nga [apostol] ket binaybay-anda.” (Mar. 14:50; Juan 16:32) Kasano ti panangtrato ni Jesus kadagiti apostolna idi temporario a naupayda? Di nagbayag kalpasan ti panagungarna, imbagana iti dadduma a pasurotna: “Dikay agbuteng! Inkay ipadamag . . . kadagiti kakabsatko [a napagungarakon].” (Mat. 28:10a) Saan a binaybay-an ni Jesus dagiti apostolna. Uray no pinanawanda, inawaganna latta ida iti “kakabsatko.” Kas ken Jehova, naasi ken manangpakawan ni Jesus.—2 Ar. 13:23.

15. Ania ti mariknatayo maipapan kadagidiay nagsardeng a makiraman iti ministerio?

¹⁵ Kasta met, maseknantayo unay kadagidiay nagsardeng a makiraman iti ministerio. Kakabsattayo ida ket ay-ayatentayo ida! Malaglagiptayo pay laeng dagiti nagsasayaat a naaramidanda gapu iti ayatda. Mabalin a dadduma kadakuada ti nagserbi iti adu a dekada. (Heb. 6:10) Mailiwtayo unay kadakuada! (Luc. 15:4-7) Kas panangtulad ken Jesus, ania dagiti pamay-an a maipakitatayo a maseknantayo kadakuada?

16. Kasanotayo a maipakita a maseknantayo kadagiti di aktibo a kakabsattayo?

¹⁶ Sidudungngo nga awisem ida. Ti maysa a pamay-an a naparegta ni Jesus dagiti maup-upay nga apostolna ket idi inawisna ida nga agkikitada. (Mat. 28:10b; 1 Cor. 15:6) Kasta met ita, mabalintayo a paregtaen dagiti di aktibo nga umatender kadagiti gimong ti kongregasion. Ammotayo a mabalin a kasapulan a mamin-adu nga awisentayo ida sakbay nga umayda. Sigurado a naragsakan ni Jesus idi inawat dagiti adalanna ti awisna.—Idilig ti Mateo 28:16 ken Lucas 15:6.

17. Ania koma ti reaksiontayo no makigimong ti maysa a di aktibo?

¹⁷ Naimpusuan nga abrasaem ida. Idi nagkikitan ni Jesus ken dagiti adalanna, impariknana a maragsakan; isu ti immuna a nakisarita kadakuada. (Mat. 28:18) Ania ti reaksiontayo no adda di aktibo a sumangpet iti Kingdom Hall? Datayo koma ti umuna a sibabara a mangkablaaw kenkuana. Iti damo, baka ditay ammo ti ibagatayo. Ngem tapno di mapabainan, ibagatay laengen a maragsakantayo a makakita kenkuana.

18. Kasanotayo a maparegta dagiti di aktibo a kakabsat?

¹⁸ Sipapasnek a paregtaem ida. Nalabit a narikna dagiti adalan ni Jesus a saanda a kabaelan nga itungpal ti bilin a panangasaba iti intero a lubong. Impasigurado ni Jesus kadagiti pasurotna: “Addaak kadakayo iti amin nga al-aldaw.” (Mat. 28:20) Epektibo kadi dayta? Wen. Di nagbayag, okupadodan a ‘mangisursuro  ken mangipakpakaammo iti naimbag a damag.’ (Ara. 5:42) Kasapulan met dagiti di aktibo a kakabsat ti pammaregta. Baka madanaganda a mangasaba manen. Mabalintayo nga ipasigurado a saanda nga agmaymaysa a mangasaba. Inton nakasaganadan, mabalin a kaduaentayo ida iti ministerio. Sigurado nga apresiarenda ti suportatayo no rugianda manen nga ikasaba ti naimbag a damag. No ibilang ken tratuentayo dagiti di aktibo kas kakabsattayo, posible nga agbalindanto manen nga aktibo ket maragsakan ti amin iti kongregasion.

19. Ania ti naimpusuan a tarigagaytayo, ken apay?

¹⁹ Agingga kaano nga itultuloytayo ti trabaho a panagaramid iti adalan? Agingga iti panungpalan daytoy a sistema ti bambanag. (Mat. 28:20; kitaen ti Glosario, “Panungpalan daytoy a sistema ti bambanag.”) Kabaelantayo kadi nga itungpal daytoy a paset ti bilin ni Jesus? Determinadotayo a mangaramid iti dayta! Maragsakantayo a mangipaay iti tiempo, pigsa, ken sanikuatayo tapno mabirokantayo dagidiay “addaan iti umiso a kababalin nga umawat iti agnanayon a biag.” (Ara. 13:48) No aramidentayo dayta, sursurotentayo ti ulidan ni Jesus. Imbagana: “Ti taraonko ket ti panangaramid iti pagayatan daydiay nangibaon kaniak ken ti panangileppasko iti trabaho nga intedna.” (Juan 4:34; 17:4) Dayta met ti naimpusuan a tarigagaytayo. Kayattayo nga ileppas ti trabaho a naitalek kadatayo. (Juan 20:21) Ken kayattayo a ti sabsabali, a pakairamanan dagiti di aktibo, ket kaduatayo nga agibtur iti daytoy a trabaho.—Mat. 24:13.

20. Sigun iti Filipos 4:13, apay a kabaelantayo nga itungpal ti trabaho nga ipapaaramid ni Jesus kadatayo?

²⁰ Saan a nalaka nga itungpal ti dakkel a trabaho nga ipapaaramid ni Jesus. Ngem saantayo nga agmaymaysa a mangaramid iti dayta. Inkari ni Jesus nga addanto isuna kadatayo. Itungpaltayo ti trabaho a panagaramid iti adalan kas ‘katrabahuan ti Dios’ ken “kadua ni Kristo.” (1 Cor. 3:9; 2 Cor. 2:17) Kabaelantayo ngarud nga itungpal dayta. Talaga a makaparagsak ken maysa a pribilehio ti panangitungpal iti daytoy a trabaho ken panangtulong iti sabsabali a mangaramid met iti dayta!—Basaen ti Filipos 4:13.