1. Uhi nela Jesu gbe nin edibo nesọle beji a gbẹn ọbhi Matthew 28:​18-20?

JESU ki riọ kpanọ bhi idin fo, ọle da zegbere man edibo nesọle bhi eji ele da sikoko bhi Galilee. Ọle da wo ha mhọn emhin kpataki nin ọle ho nin ọle taman ele. Be bhọ ọle ho nin ọle taman ele? Matthew 28:​18-20 (tie ọle), ọle a gbẹn ọta nin ọle taman ele ọi.

2. Inọnta nela mhan ha zilo nyan?

² Uhi nin Jesu gbe nin edibo nesọle ghe, nin ele dọ re ẹbho kiẹn edibo yẹ wo rẹtẹ ene ga iJehova ẹlẹnan. Bhiriọ, bha ji mhan zilo nyan inọnta ea ne diẹn mun iwẹnna nin Jesu mun nin mhan. Ọhẹnhẹn, rẹ deba uhi nesi Jehova nin mhan man ẹbho le, emhin ọbhebhe nela ọkhẹke nin mhan yẹ man ele le? Ọzeva, be ọrebhe bhi agbotu ha rẹ rẹkpa ọria nin mhan man ọle iBaibo yẹ, nin ọle da sabọ ha lu re alo? Ọzea, be imhan ha rẹ rẹkpa ibhio mhan ne iyẹ sasa bhi oga yẹ, nin ele da sabọ kie deba mhan ha lu ọne iwẹnna nan?

3. Iwẹnna nela Jesu mun nin edibo nesọle nin ele lu?

³ Uhi nin Jesu gbe wo manman khia bhi ẹlo. Ọkhẹke nin mhan man ẹbho emhin nin Jesu man mhan le. Ọkpakinọn, ọ iyi ọnan ọkpa hi ẹsọn nọnsẹmhan. Jesu bha gheghe yọle; ‘Bha dọ man ẹbho emhin rebhe nin mẹn man bha le.’ Sokpan ebi ọle tale hi: ‘Bha ha man ele emhin, nin ele da re obọ rẹkhan ene emhin rebhe nin mẹn rẹ gbuhi nin bha.’ Ahamiẹn mhan guanọ nin  mhan re obọ rẹkhan ọne uhi nan nin Jesu gbe, mhan ida wo gheghe ha man ẹbho emhin, mhan ki yẹ ha rẹkpa ele rẹ re obọ rẹkhan ebi mhan man ele le. (Acts 8:31) Bezẹle nọn da khẹke nin mhan ha lu iriọ?

4. Sounun bhi ijiẹmhin nọn rẹman ebi mhan ha rẹ sabọ rẹkpa ene imhan man ele iBaibo yẹ, nin ele da sabọ re obọ rẹkhan uhi nesi Jesu?

⁴ Bha ji mhan fẹ ijiẹmhin ghe nọn ha rẹkpa mhan lẹn, ebi mhan ha rẹ sabọ rẹkpa ọria yẹ, nin ọle da sabọ ha re obọ rẹkhan uhi nesi Jesu. Ji a man yọle ghe uwẹ man ọria ebi a rẹ gua imoto yẹ. Be uwẹ ha rẹ rẹkpa ọle yẹ, nin ọle da sabọ ha re obọ rẹkhan uhi nan gbe nin ene gua imoto bhi ukhuo? Asabọmiẹn emhin ọhẹnhẹn nin uwẹ ha lu hi, uwẹ ki ka re ẹghe ọbhi otọ rẹ tie ene uhi man ọlẹn. Sokpan, ọkhẹke nin uwẹ lu emhin ọbhebhe nin uwẹ rẹ rẹkpa ọle rẹ sabọ re obo rẹkhan ene uhi. Ọkhẹke nin uwẹ re ọle diọbhi ukhuo, uwẹ ha mun imoto nanlẹn nin ọle gua. Bhiriọ, ọne ọria ki miẹn isẹhoa rẹ re obọ rẹkhan uhi nin uwẹ tie man ọlẹn. Sẹyẹ, uwẹ ki miẹn isẹhoa rẹ ha dia ọle beji ọle ha rẹ ha dọnmhegbe rẹ re obọ rẹkhan ene uhi. Be imhan miẹn luẹ bhi ọne ijiẹmhin nan?

5. (a) Beji John 14:15 bi 1 John 2:3 rẹman, be ọkhẹke nin mhan rẹkpa eria nin mhan man ele iBaibo lu? (b) Sounun bhi uwedẹ eso nin mhan ha rẹ sabọ rẹkpa ene imhan man ele iBaibo.

⁵ Ahamiẹn mhan man ọria iBaibo, mhan ki miẹn isẹhoa rẹ rẹkpa ọle lẹn uwedẹ nin Osẹnobulua guanọ nin mhan rẹ ha nyẹnlẹn. Sokpan, ọ iyi ọnan ọkpa mhan ha lu. Ọ yẹ khẹke nin mhan rẹkpa ele lẹn ebi ele ha rẹ ha re obọ rẹkhan ebi ele luẹ yẹ. (Tie John 14:15; 1 John 2:3.) Re uwedẹ nin uwẹ rẹ nyẹnlẹn rẹ rẹkpa ele lẹn, ebi ele ha rẹ ha re obọ rẹkhan adia ne ribhi Baibo yẹ, sade ele ribhi isiku, isi iwẹnna, la sade ele re egbe re ahoho. Uwẹ sabọ rẹ taman ele emhin eso ne sẹ sunu ji uwẹ bhi iẹnlẹn, ne rẹman ghe, adia ne ribhi Baibo sabọ gbega ọria, la ne rẹman ghe, adia ne ribhi Baibo sabọ rẹkpa ọria rẹ re ẹwanlẹn ha lu emhin. Ahamiẹn uwẹ deba ele nan erọnmhọn, bhii Jehova nin ọle re ẹlinmhin nọn khiale nọnsọle rẹ gbega ele.​—John 16:13.

6. Emhin ọbhebhe nela ọkhẹke nin mhan lu beji mhan rẹ man ẹbho iBaibo?

⁶ Be imhan ha rẹ sabọ rẹkpa ẹbho nin mhan man ele iBaibo yẹ, nin ele da sabọ re obọ rẹkhan uhi nin Jesu gbele ghe, nin mhan dọ rẹkpa ẹbho kiẹn edibo? Ọkhẹke nin mhan rẹkpa ele ha mhọn ọhubhudu rẹ dọ re ẹbho kiẹn edibo. Bhi ọsi ẹmhọanta, ofẹn mun ẹbho eso nin mhan man ele iBaibo rẹ vae dọ deba mhan ha tẹmhọn Osẹnobulua. Bhiriọ, ọkhẹke nin mhan ha mhọn iziẹngbe da ele, beji mhan ha rẹ ha man ele ẹmhọanta ne ribhi Baibo nin urẹọbhọ nọnsele da deziẹn. Ọnan dẹ sabọ rẹso ele bhi ọkhọle rẹ sẹbhọ ghe, ele ki vae dọ deba ha tẹmhọn Osẹnobulua. Be imhan ha sabọ lu, nin ọria nin mhan man ọle iBaibo da ha mhọn ọne ọkhọle rẹ dọ deba ha tẹmhọn Osẹnobulua?

7. Be imhan ha rẹ sabọ rẹkpa ọria nin mhan man ọle iBaibo yẹ, nin ọle da ha mhọn ọhubhudu rẹ ha tẹmhọn Osẹnobulua man ẹbho?

⁷ Mhan sabọ rẹ nọọn ọria nin mhan man ọle iBaibo ene inọnta nan: “Be emhin nin uwẹ luẹ bhi Baibo sẹ rẹ rẹkpa uwẹ yẹ bhi iẹnlẹn? Uwẹ bha be rẹọbhọ ghe ọkhẹke nin ẹbho ebhebhe yẹ lẹn ene emhin nan? Be uwẹ ha rẹ sabọ rẹkpa ele yẹ?” (Prov. 3:27; Matt. 9:​37, 38) Re itrati kẹkẹ man ọria nin uwẹ luẹ ọle iBaibo, uwẹ ha ji ọle da tobọle zẹ ọnọn ha ti imọẹ ọle bhọ, ene ribhi azagba-uwa nọnsọle, la ene ele ko wẹnna. Ne eso bhi ene itrati nanlẹn, uwẹ ha deba ọle lu arẹman nọn ha rẹkpa ọle lẹn ebi ọle ha rẹ sabọ re ẹwanlẹn ha ne ele nin ẹbho yẹ. Aharẹmiẹn agbotu re obọ ọbhọ nin ọle ha deba tẹmhọn Osẹnobulua, hẹi zobọ bhọ rẹ sẹyẹ ha rẹkpa ọle.​—Eccl. 4:​9, 10; Luke 6:40.

8. Bezẹle nọn da yi emhin kpataki nin ọria nin mhan man ọle iBaibo rẹ ha mhọn oyẹẹ da Osẹnobulua bi ibo ọle? (Fẹ ẹkpẹti ghe nọn yọle “ Rẹkpa Ene Uwẹ Man Ele IBaibo Nin Oyẹẹ Nin Ele Mhọn Da Osẹnobulua Da Ha Ziẹn Ọbhọ.”)

⁸ Yere ghe ebi Jesu taman mhan hi, nin mhan dọ man ẹbho ebi ele ha rẹ ha “re obọ rẹkhan ene emhin rebhe” nin ọle man mhan le yẹ. Eso bhi ene emhin nin Jesu man mhan le hi, nin mhan hoẹmhọn Osẹnobulua yẹ hoẹmhọn ibo mhan. Ọne oyẹẹ nan dẹ rẹkpa ọria nin mhan man ọle Baibo rẹ zegbere ha deba tẹmhọn Osẹnobulua. (Matt. 22:​37-39) Bezẹle nin mhan da ta iriọ? Ranmhude, oyẹẹ nin mhan mhọn da Osẹnobulua bi ẹbho, ọle zẹle nin mhan da tẹmhọn Osẹnobulua. Sokpan, mhan lẹn sẹbhọ ghe, ofẹn mun ẹbho eso nin mhan man ele iBaibo rẹ vae dọ deba mhan ha tẹmhọn Osẹnobulua. Bhiriọ, ọkhẹke nin mhan rẹkpa ele lẹn ghe Jehova dẹ sabọ rẹkpa ele khọn ofẹn nọn mun ele mioto. (Ps. 18:​1-3; Prov. 29:25) Ẹkpẹti nan gbẹn rẹkhan ọne uhọnmhọn-ọta nan rẹman mhan emhin kẹkẹ nin mhan ha lu, nin mhan da sabọ rẹkpa ene imhan man ele Baibo ziẹn oyẹẹ nin ele mhọn da Osẹnobulua. Sokpan, be ọrebhe bhi agbotu ha rẹ rẹkpa ene la munhẹn ha vae bhi oga yẹ, nin ele da sabọ ha re oyẹẹ man?

9. Bhi ijiẹmhin ọsi ọria nọn gua imoto nin mhan tẹmhọnlẹn, be ọle rẹ luẹ ebi a rẹ gua imoto yẹ?

⁹ Bha ji mhan kie tẹmhọn ijiẹmhin nin mhan ka tẹmhọnlẹn. Be ọne ọria nin uwẹ man ọle ebi a rẹ gua imoto yẹ ha rẹ ha luẹ emhin yẹ, beji ọle rẹ gua ọne imoto khian bhi okhuo? Ọhẹnhẹn, ọle ki ha re ehọ ọbhi ebi uwẹ taman ọlẹn. Ọzeva, ọle ki yẹ ha gbẹlokotọ ghe ebi ẹbho nekẹle rẹ gua imoto yẹ. Bhi ọsi ijiẹmhin, uwẹ sabọ rẹ taman ọlẹn nin ọle re egbe khọkhọ ọria nọn ji moto ọbhebhe da hian kalọ nanlẹn. La uwẹ sabọ rẹ taman ọlẹn nin ọle re egbe khọkhọ ọria nọn dia ukpa nọnsọle, beji a ha da miẹn ghe, ọ bha ha gbe ọbhi ẹlo ọsi ẹbho nekẹle. Ene ijiẹmhin nan kẹkẹ nin uwẹ ha rẹman ọne ọria, dẹ rẹkpa ọle rẹ guẹ ebi a rẹ sabọ hẹn imoto nọnsẹn yẹ.

10. Be ha rẹkpa ọria nin mhan man ọle iBaibo rẹ ha lu re alo?

¹⁰ Iriọ yẹ nọn rẹji ẹbho nin mhan man ele iBaibo. Ele ha dọ munhẹn ha ga iJehova, ele ki yẹ ha miẹn emhin luẹ bhi ijiẹmhin ọsi ẹbho nekẹle ne yẹ ga ọle. Bhiriọ, ahamiẹn ẹbho nin mhan man ele iBaibo guanọ nin ele manman ha lu re alo, ọkhẹke nin ele ha vae bhi ikolo oga. Ahamiẹn ele vae bhi ikolo oga, emhin nan luẹ bhi enin ki rekpa ele lẹn ọta nọnsi Osẹnobulua dinmhin. Bhiriọ, urẹọbhọ bi oyẹẹ nin ele mhọn da Osẹnobulua ki ha ziẹn ọbhọ. (Acts 15:​30-32) Sẹyẹ, bhi Kindọn Họọ, ọria nọn man ele Baibo ki miẹn isẹhoa rẹ re ele tuẹ ẹbho ne ka yẹ ha ribhi idia nin ele ye. Ele ki yẹ daghe uwedẹ kẹkẹ nin mhan rẹ re oyẹẹ man egbe. Bha ji mhan fẹ ijiẹmhin eso ghe.

11. Be ọria nin mhan man ọle iBaibo ha sabọ daghe sade ọle vae bhi ikolo oga? Be ọnan ha rẹ sabọ rẹso ọle yẹ?

¹¹ Ji a man yọle ghe, ọria nin uwẹ man ọle iBaibo nọn iyẹ mhọn ọdọ da daghe obhio mhan nọn yẹ diabe ọle. Uwedẹ nin ọne obhio mhan rẹ dọnmhegbe rẹ ne imọn nesọle vae bhi ikolo oga da wo rẹso ọle bhi ọkhọle. Ji a man yẹ yọle ghe, ọria nin uwẹ man ọle iBaibo nọn sẹyẹ dọnmhegbe rẹ zobọ bhi ciga na sin, da miẹn obhio mhan nọn sabọ rẹban iciga arẹmiẹn ọ bha lẹkhẹ nanlẹn rẹ lu iriọ. Ọne obhio mhan da taman ọlẹn ghe, oyẹẹ nin ọle mhọn da iJehova re ọhubhudu nanlẹn rẹ ha lu ebe ti ọle bhọ. (2 Cor. 7:1; Phil. 4:13) Ọle ki kaehọ okha ọsi ọne obhio mhan fo, ọle da wo ha mhọn ọlẹn bhi ọkhọle ghe, ọle dẹ yẹ sabọ khọn iciga nan sin miotọ beji ọne obhio mhan nan lu. Sẹyẹ, ji a man yọle ghe, ọmanmhẹn nan man ọle iBaibo da vae bhi ikolo oga. Bhi enin, ọle da daghe obhio mhan nin ọmanmhẹn wo sọnyẹnmhẹn bhi oga nin ọle ga iJehova. Bhiriọ, ọle da ha guanọ nin ọle lẹn ebezẹle nin ọne obhio mhan da wo re iriọ ghọnghọn.

12. Bezẹle nin mhan ha da sabọ yọle ghe, ọrebhe bhi ẹkẹ agbotu dẹ sabọ rẹkpa ọria nin mhan man ọle iBaibo?

 ¹² Ahamiẹn ọria nin mhan man ọle iBaibo dọ lẹn ibhio mhan kẹkẹ nin mhan ko ga, ijiẹmhin nọnsele ki sabọ rẹkpa ọle lẹn ebi a re ọle ta nan rẹ hoẹmhọn Osẹnobulua bi ibo mhan. (John 13:35; 1 Tim. 4:12) Beji mhan ka yẹ ta, ọria nin mhan man ọle iBaibo dẹ manman miẹn emhin luẹ bhi ijiẹmhin ọsi obhio mhan nọn ribhi idia bii ọne ọle ye. Ọle ki sabọ dọ lẹn sẹbhọ ghe, ọle dẹ sabọ fi iẹnlẹn nọnsọle denọ nin ọle da sabọ kiẹn odibo nọnsi Jesu. (Deut. 30:11) Bhiriọ, ọrebhe bhi ẹkẹ agbotu mhọn eka nin ele ha sabọ lu rẹ rẹkpa ọria nin mhan man ọle iBaibo. (Matt. 5:16) Ọkhẹke nin mhan nọọn egbe mhan ọne inọnta nan: “Emhin nela mẹn sẹ lu nin mẹn rẹ rẹkpa ẹbho ne la munhẹn ha vae bhi ikolo oga?”

13-14. Be iJesu rẹ nin etuegbe nesọle lu emhin yẹ arẹmiẹn ele nẹ fi ọle a?

¹³ Mhan guanọ nin mhan rẹkpa ibhio mhan ne iyẹ sasa bhi oga, nin ele da sabọ kie deba mhan ha tẹmhọn Osẹnobulua. Uwedẹ nin Jesu rẹ ne etuegbe nesọle lu emhin dẹ sabọ rẹkpa mhan rẹ lu ọnan.

¹⁴ Ẹghe nin eghian iJesu rẹ mun iJesu nin ele dọ gbe ọle a, etuegbe nesọle rebhe da nẹgbe fi ọle a. (Mark 14:50; John 16:32) Be iJesu lu yẹ ọne ẹghe nan nin etuegbe nesọle rẹ nẹgbe fi ọle a? Jesu ki wo riọ kpanọ bhi idin fo, ọle da taman ene rẹkhan ọlẹn eso yọle: “Bha hẹi ji ofẹn mun bha. Bha ha khian dọ taman ibhio mẹn [ghe mẹn riọ kpanọ bhi idin].” (Matt. 28:10a) Jesu bha fi ikeke gbe etuegbe nesọle. Arẹmiẹn ele nẹ fi ọle a, ọle da sẹyẹ tie ele “ibhio mẹn.” Jesu wo ha re itohan ne ẹbho lu emhin yẹ rẹhunmhan ele beji Aba ọle lu.​—2 Ki. 13:23.

15. Ẹlo nela mhan rẹ ghe ibhio mhan ne iyẹ sasa bhi oga?

¹⁵ Bọsi iJesu, ẹmhọn ibhio mhan ne iyẹ sasa bhi oga sẹyẹ rẹtẹ mhan. Ibhio mhan ele sẹyẹ khin, mhan sẹyẹ wo manman hoẹmhọn ele! Mhan sẹyẹ wo yere iwẹnna nin ele lu bhi ẹghe nọn gbera. Asabọmiẹn ikpe ne bunbun, ọle eso bhi ẹwẹ ele bhọ ka rẹ lu iwẹnna oga. (Heb. 6:10) Ẹmhọn ele wo manman ti mhan bhọ! (Luke 15:​4-7) Beji Jesu lu, be imhan ha rẹ rẹman ene ibhio mhan nan yẹ ghe, ẹmhọn ele gene ti mhan bhọ?

16. Be imhan ha rẹ rẹman ibhio mhan ne iyẹ sasa bhi oga yẹ ghe ẹmhọn ele ti mhan bhọ?

¹⁶ Ha tie ele vae bhi ikolo oga. Uwedẹ ọkpa nin Jesu rẹ ziẹn etuegbe nesọle udu hi, ọle da tie ele vae bhi ikolo nin ọle mhanmhanlẹn. (Matt. 28:10b; 1 Cor. 15:6) Ẹlẹnan nian yẹ, mhan dẹ sabọ tie ibhio mhan ne iyẹ sasa bhi oga vae bhi ikolo oga ahamiẹn ele iyẹ vae. Mhan lẹn sẹbhọ ghe, asabọmiẹn igba ne bunbun mhan ha tie ele ọkuẹsẹ ele gene vae. Ọ wo ha ti Jesu bhọ ghe edibo nesọle gene sikoko ẹghe nin ọle rẹ tie ele.​—Yẹ fẹ Matthew 28:16 bi Luke 15:6 ghe.

17. Be ọkhẹke nin mhan lu sade obhio mhan nọn bha yẹ ha sasa bhi oga fikie vae?

¹⁷ Re ọkhọle rebhe rẹ gbe obokhian nin ele. Ẹghe nin Jesu bi edibo nesọle rẹ miẹn egbe, ọle da lu emhin bhi uwedẹ nọn ha re ọkhọle nọnsele de re. Ọle bha ha khẹ nin edibo nesọle bu ọle re, ọle hi ọnọn bu ele yẹ munhẹn ha ne ele talọ. (Matt. 28:18) Ahamiẹn ọria nọn bha yẹ ha sasa bhi oga fikie vae, be uwẹ ha rẹ nanlẹn lu emhin yẹ? Ọkhẹke nin uwẹ bu ọle yẹ manman gbe obokhian nanlẹn. Uwẹ sabọ ha riale ghe uwẹ bha lẹn ebi uwẹ ha taman ọlẹn. Ọrẹyiriọ, uwẹ dẹ sabọ taman ọlẹn ghe ọ ti uwẹ bhọ rẹ miẹn ọlẹn. Dọnmhegbe ta ọnan man ọlẹn bhi uwedẹ nọn ida re ẹkhọle lo ọle.

18. Be imhan ha rẹ sabọ re izebhudu nin ibhio mhan ne iyẹ sasa bhi oga yẹ?

¹⁸ Re izebhudu nin ele. Asabọmiẹn iwẹnna itẹmhọn Osẹnobulua nin Jesu taman edibo nesọle nin ele lu, da wo diabe udede ihẹ rẹji ele,  ranmhude ọle taman ele ghe, a dẹ lu ọle na bhi ọne otọ agbọn nan rebhe. Ọrẹyiriọ, Jesu da re izebhudu nin ele yọle: “Mẹn ne ibha dia rẹ na bhi ene ikpẹdẹ rebhe rẹ dọ sẹbhi ọkpẹnlẹn ọsi ọne agbọn nan.” (Matt. 28:20) Ọne ọta nan nin Jesu ta wo gene ziẹn ele udu, ranmhude, ọ bha sẹ bue gbe, ele da wo ha “wewe ọne ọta nọn mhẹn ọsi Jesu Kristi.” (Acts 5:42) Ọ yẹ khẹke nan re izebhudu nin ibhio mhan ne iyẹ sasa bhi oga. Ofẹn sabọ ha mun ele rẹ kie deba mhan ha tẹmhọn Osẹnobulua. Bhiriọ, mhan sabọ rẹ re izebhudu nin ele ghe, ọ iyi ele ọkpa ha dagbare dọ tẹmhọn Osẹnobulua, ghe ahamiẹn ele muegbe rẹ yo, mhan dẹ dọ datie ele. Ọ dẹ wo re ele ha ghọnghọn sade uwẹ re inian rẹkpa ele rẹ sabọ kie ha tẹmhọn Osẹnobulua. Ahamiẹn mhan ji ibhio mhan ne iyẹ sasa bhi oga lẹn ghe, ẹmhọn ele ti mhan bhọ, asabọmiẹn ọnan ki rẹkpa ele kie ha sasa. Bhiriọ, ọrebhe bhi agbotu ki ha ghọnghọn.

19. Be bhọ mhan muegbe rẹ lu? Bezẹle?

¹⁹ Ẹghela iwẹnna itẹmhọn Osẹnobulua nin mhan lu ha rẹ sotọ? Mhan dẹ lu ọle sẹbhi ẹghe nin ọne agbọn nan ha rẹ kpẹn. (Matt. 28:20; fẹ “Conclusion of the system of things” ghe bhi Glossary.) Mhan dẹ be gene sabọ lu ọne iwẹnna nan sẹbhi ọne ẹghe nin? Mhan wo muegbe rẹ lu ọle sẹbhọ! Mhan wo re eghọnghọn noo ẹghe, ahu, bi ebi mhan mhọnlẹn rebhe, rẹ guanọ ene muegbe nin ele rẹ miẹn umiẹnfan. (Acts 13:48) Mhan ha lu inian, Jesu mhan re egbe khọkhọ. Rẹji ọne iwẹnna nan, Jesu da yọle: “Ebale nọnsẹmhẹn hi, nin mẹn lu iho ọsi ọnọn je mẹn yẹ miẹnsọn nọnsọle sotọ.” (John 4:34; 17:4) Ọnan mhan yẹ mhọn bhi ọkhọle. Mhan guanọ nin mhan lu iwẹnna nan mun nin mhan sotọ. (John 20:21) Mhan guanọ nin ene imhan ko ga rebhe, rẹ dọ sẹbhi ene iyẹ sasa bhi oga deba mhan miẹn ọne ẹsọn nan sotọ.​—Matt. 24:13.

20. Beji Philippians 4:13 rẹman, bezẹle nin mhan ha da sabọ lu iwẹnna nin Jesu mun nin mhan sotọ?

²⁰ Bhi ọsi ẹmhọanta, iwẹnna itẹmhọn Osẹnobulua nin Jesu mun nin mhan bha lẹkhẹ. Ọkpakinọn, Jesu ve ive nin mhan ghe ọle re imhan bhi ikeke. Bhiriọ, ọ iyi mhan ọkpa lu ọne iwẹnna nan. Osẹnobulua bi Jesu mhan deba wẹnna sade mhan lu ọle. Ọnan rẹkpa mhan lẹn ghe, Jehova bi Jesu dẹ re ahu nin mhan rẹ sabọ lu ọle. (1 Cor. 3:9; 2 Cor. 2:17) Bhiriọ, mhan dẹ sabọ lu ọle sotọ. Ekpẹn nọn khua nọn rẹji mhan rẹ ha lu ọne iwẹnna nan, yẹ rẹkpa ẹbho rẹ deba mhan ha lu ọle!​—Tie Philippians 4:13.